Udinese – Milan 3-1

L’Udin al vinç e al convinç. La scuadre di balon furlane cuintri dal Milan e torne a vinci dopo tant timp – juste sîs mês – ancje in cjase. Cui milaniscj la formazion di Sottil e zuie une partide cuasi perfete. cun atenzion e caratar in difese e cun snait e grinte inte fase ofensive. Almancul in part dal incuitri – par esempli tai prins vincj minûts di zûc – al somee fintremai di tornâ a vê denant dai voi i blancs e neris dal principi dal campionât, biei di viodi e in stât di puartâ a cjase ducj i trê ponts a disposizion. Massime tal imprin de partide e vie pal secont timp l’Udin al è pardabon fuart. Cun di plui il Milan al mostre di vê plui di cualchi probleme in ducj i reparts e nol è clâr se al è par vie de mancjance di Giroud e di Theo Hernandez o ben par efiet de resurezion de scuadre furlane.
Se il public dal Stadi Friûl al ves sburtât l’Udin ancje cjantant ‘Scjaraçule Maraçule’ o ‘Tu tramontis’ (un robe che al sarès biel che al fasès simpri e che impen nol à mai fat…) e sarès stade une serade perfete.

L’Udin al tache cul pas just. Il so classic 3-5-2 al mostre daurman di jessi compat e dinamic, cun Becao, Bijol e Perez indaûr, Walace tal mieç dal cjamp, Samardzic e Pereyra miezis alis, Udogie e Ehizibue esternis e la cubie Success-Beto in atac. Tal Milan al torne in cjamp dal prin minût Ibrahimovic, in atac dongje di Leao, intant che la struture de scuadre di Pioli si disvilupe dilunc de linie centrâl là che si dan dongje cun compits di direzion e di coordienament Tonali e Brahim Diaz.
La scuadre di balon furlane e fâs valê il so jessi parone di cjase cuntune serie di iniziativis ofensivis che a meti in dificoltât i ospits, che a scugnin salvâsi in corner in trê ocasions. Success al prove a tirâ in puarte di lontan, ma nol cjate il spieli: une conferme de sô precision scjarse tal moment di tirâ, ma ancje de sô gjenerositât e dal so dinaimisim, che a saran costants e impuartnats vie par dute la sô partide, fint cuant che al vignarà clamât fûr a vincj minûts de fin par lassâ spazi a Thauvin.

A fuarce di dâi, dopo nancje dîs minûts de prime sivilade di Doveri, al rive il prin gol dal Udin: Samardžić al anticipe Tomori tal mieç dal cjamp, al va vie su la diestre, al fâs un slalom inzirlôs e al lasse sfilâ il balon par Pereyra, che al zire la bale in direzion dal secont pâl là che Maignan, che al à ancje la visuâl cuvierte, nol pues rivâ, e al è un a zero. La scuadre furlane no si contente, il Milan nol rive a reagjî, e i parons di cjase si svicinin ae dopleade. Dopo il prin cuart di ore di zûc i corners a pro dal Udin a son cinc, la bale e baline in plui ocasions inte aree milaniste e a un ciert pont Beto al tire cul cjâf e Maignan al rive a parâ.

Plui indenant al à ancje il so bon ce fâ Silvestri, che al conferme lis sôs cualitâts mostradis vie pes partidis passadis cuntune parade in doi timps suntune conclusion di Leao e po cuntune rispueste suntun tîr di Ibrahimovic, che prime al veve provât a colpî ancje cuntune punizion di potence alte di pôc, e cuntune deviazion in corner suntun tentatîf di Brahim Diaz. Tal ultin cuart di ore dal prin timp il Milan al vuadagne cjamp, ma l’Udin al ten bot e cuant che la bale e rive in maniere pericolose des bandis de sô puarte al è simpri Silvetri a tirâ jù la sierande.

Pôcs minûts prime de polse al rive il prin dai doi episodis che a crein une cierte tension intal cjamp. Bijol al ferme Leao e al tocje la bale cul zenoli e po ancje cul braç, ancje se in maniere involontarie, Doveri al domande il control dal Var e po al sivile il rigôr. Il tîr dal discut al è il secont dai episodis che a sticin lis boris: Ibrahimovic al tire su la diestre e Silvestri al pare vie la bale che po e ven recuperade di Beto, ma l’arbitri al à il suspiet che l’atacant portughês al sedi jentrât in aree masse adore, al verifiche cul Val e al torne a fâ tirâ il penalty, che Ibrahimovic in cheste ocasion al rive a segnâ. Sottil al reste scaturît pes decision dal arbitri, jal dîs e al cjape il cartelin ros.

L’Udin al rive a rispuindi inte maniere miôr al un a un cjapât in chês cundizions: Udogie al controle e al jentre inte aree dal Milan, dopo un pâr di sghiribiçs i difensôrs le parin vie, ma la bale e ven gafade di Success a çampe che le met tal mieç, là che Beto nol piert l’apontament cul gol e di doi pas al segne. La prime frazion si siere cul Udin in vantaç, intant che il secont timp al viôt, almancul in principi, il Milan che al va al atac cun fuarce, sburtât de esperience dal vecjo Ibrahimovic che al prove ancje a viodi se al rive a vuadagnâ un altri penalty: prime e je une conclusion cul cjâf di Thiaw, su corner di Tonali, parade di Silvestri, e po e rive une bale buine par Ibrahimovic e Ballo-Toure che però e ven cjapade dal puartîr dal Udin in jessude.

Sghindât cence masse fastidis il pericul, la scuadre furlane e torne a fâsi viodi indenant cuntune punizion fûr bersai di Samardzic e po cuntune gnove percussion dilunc de corsie di çampe cun Udogie che al fâs un bie moviment tal mieç de aree, Success che si slargje e i passe la bale par che al tiri di prime intenzion e Ehizibue che di doi pas al tocje il tîr di Udogie e al met la bale tal sac. Doveri al à il dubi che l’esterni dal Udin al sedi in fûr zûc e al verifiche cul Var che impen al conferme la regolaritât de posizion dal zuiadôr e duncje la validitât dal gol. E al è trê a un.

L’Udin al cjape in maniere definitive il Diaul pai cuars e al manten il control de partide fint ae fin.
Pioli al mande in cjamp, dopo Rebic e Krunic tal puest di Saelemaekers e Bennacer, ancje Calabria, De Ketelaere e Origi, ma la scuadre furlane si difint cun sintiment, si fâs viodi in atac ancje cun Thauvin, e dopo passe siet minûts di recupar, si puarte a cjase un risultât impuartanton par tancj motîfs.

Gweltaz Adeux + Algaire + Caxade + Nando Popu + Cumelca = Babêl Europe 06/2023

Cheste setemane su Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât.

Inte gnove pontade de trasmission, in programazion vuê, martars ai 14 di Març a 11 a buinore, miercus ai 15 a une dopo di misdì e sabide ai 18 a une e mieze dopo di misdì, si fevelarà dal gnûf Anuariu de la musica asturiana e de pussbilitât di viodi il cine galizian As Bestas, vincidôr di nûf premis Goya, ancje a Udin ai 24 di Març li dal Visionario.

Il gnûf viaç “babelic” al tocjarà la Bretagne, lis Asturiis, la Galizie e lis comunitâts grecanichis dal Salento e de Calabrie cu la musiche dal rocker breton Gweltaz Adeux, che in curt al fasarà saltâ fûr il so disc gnûf, dai Algaire, grup di ispirazion folk protagonist de sene asturiane, dai galizians Caxade, dal progjet CumElCa e di Nando Popu dai Sud Sound System, che cualchi an indaûr al veve fat une version particolâr di une cjante par griko adun cun Emanuela Gabrieli e Alessia Tondo.

Dopo des trê emissions sui 90 Mhz, sui 90.200 Mhz, sui 105.600 Mhz e in streaming, ancje cheste pontade di Babêl Europe si podarà scoltâle (o tornâ a scoltâle) su Spreaker, su Deezer e su Spotify.

Empoli – Udinese 0-1

Dopo passe un mês e mieç dal sucès in cjase de Sampdoria, biadelore l’Udin al torne a vinci. A Empoli la scuadre di balon furlane e zuie une partide discrete, cun ordin e cun atenzion in difese e cuntune cierte decision indenant, sburtade di Udogie, Pereyra e Lovric.
La scuadre furlane e rive a segnâ cun Becao tal imprin dal secont timp e di in chê volte e manten il vantaç fint ae fin, ancje in gracie di une gnove buine prestazion di Silvestri, che al è simpri tal puest just tal moment just cuant che i parons di cjase a rivin a fâsi vîfs in atac. I blancs e neris vistûts di zâl no son bielonons di viodi e in atac no somein jessi cetant produtîfs, ma a son concrets e ordenâts, no fasin erorats clamorôs daûr e a rivin a puartâ a cjase une vitorie impuartante pe classifiche e soredut pal spirt de scuadre e dai tifôs.

A Empoli l’Udin si presente cul so 3-5-2 “tradizionâl”, metût adun cui zuiadôrs che a son a disposizion. A tornin in cjamp da principi Pereyra, impleât tant che interni di centricjamp, e Ehizibue tant che esterni di diestre, intant che in atac il tecnic al conferme la cubie Beto-Success, intant che a son infermarie Masina e Nestorowski. I parons di cjase no rivin a recuperâ Vicario e intal so puest si presentin cun chel altri puartîr furlan che al fâs part de lôr rose, Perisan. Par ce che al tocje la prime linie, invezit, Zanetti al ponte su Caputo e Satriano cu la poie dal dinamic Baldanzi, tant che mieze ponte.

La partide si invie cun ritmis no masse alts. Lis dôs scuadris a son une vore atentis a no lassâ busis, massime indaûr e tal mieç dal cjamp. La prime iniziative significative e viôt Ezibuhe indenant che al ven fermât in maniere decise di Parisi: al somee rigôr, ma il contat tra i doi al è fûr de aree e par Cosso al è regolâr. L’Empoli si fâs viodi des bandis di Silvestri cuntune punizion di Marin che e ven tocjade di Eizibuhe in bariere, e mude la sô traietorie in maniere pericolose ma si distude fûr no masse lontan dal pâl ae çampe dal puartîr dal Udin.

Plui indenant la scuadre furlane si svicine al gol cuntun tîr cul cjâf di Bijol su corner di Lovric e soredut cuntune azion di Udogie, che su la corsie di çampe al ricêf un biel zugjeriment di Eizibuhe, al fâs slalom, al jentre inte aree aversarie e al tire: la bale e passe Perisan ma e ven gafade prime de linie de puarte di Parisi. Ancje i parons di cjase a van dongje dal vanatç prime de polse: punizion ben pinelade di lonta di Marin, bale tocjade cul cjâf tal mieò de aree dal Udin che e finìs dongje dal secont pâl dulà che al rive Caputo, che le tocje ma nol rive a butâle tal sac.

Il prin timp si siere cence goi, intant che dopo nûf minûts di zûc inte seconde frazion al rive il vantaç dal Udin: corner di Lovric, bale tal mieç de aree, Becao al salte ben e al tocje cul cjâf, la sfere e sbat intor di Luperto e po e scjavace Perisan e cussì e finìs in puarte là che nissun al pues fermâle. Il gol al rive dopo trê tîrs fûr bersai di Lovric e al invie la reazion dai parons di cjase che, sburtâts di Baldanzi e Fazzini, a cirin di dreçâ la partide.

Al è propit Baldanzi il prin a fâsi viodi des bandis di Silvestri cuntune acelerazion dilunc de corsie di çampe e une conclusion in diagonâl che ven fermade cence padins dal puartîr. Di chê altre bande dal cjamp Success al met tal mieò une biele bale par Beto che al tire ben, in acrobazie e di prime intenzion, ma no masse fuart, e Perisan al pare.
Plui tart Baldanzi al è ancjemò protagionist di un pâr di conclusions: la prime e finìs fûr di pôc, la seconde e ven parade vie di Silvestro. L’Udin al rispuint cuntun cross di Ebosse par Udogie, che al controle e al tire fuart e ben, ma Perisan al fâs un mieç miracul e al pare vie la bale.
Cussì il risultât al reste chel fint tal ultin, dopo sîs minûts di recupar. Pal Udin e je une vitorie di sostance.

Dopo di vê metût a scuare la difese, rivaraial Sottil a dâi plui fuarce ancje al atac, là che Beto e soredut Success a fasin moviment ma a tirin in puarte avonde pôc?

Atalanta – Udinese 0-0

Ise miôr une pate cence goi ni fats e ni cjapâts in cjase di une scuadre che e lote par concuistâ un puest in Champions o une in cjase cjapant goi ancje un tic a stupit vie, dopo jessi passâts in vantaç, cuntune scuadre che e scombat par no sbrissâ in serie B? La rispueste a une domande di cheste fate e sclarìs parcè che il risultât e la ande de partide di vuê a Bergamo cuintri de Atalante a puedin rapresentâ alc di positîf pal Udin.

I blancs e neris cu la divise zale si presentin in cjase de formazion di Gasperini cence di Deulofeu e Ebosse, che magari cussì no, cemût che si sa, a restaran fûr ancjemò a dilunc, e ancje cence dal scualificât Ehizibue, intant che al torne in cjamp Bijol, che la sô mancjence cul Spezia si veve fate sintî, e Pereyra par vie di un probleme muscolâr al partìs de bancjine. Ancje tra i parons a mancjin in diviers di lôr, di Hatwbour a Scalvini, fintremai al ex Zapata e a Palomino. Sottil al met adun il so 3-5-2 cun Ebosele esterni di diestre e cun Success indenant dongje di Beto e in bancjine a son Samardzic, Thauvin e Pafundi e il tecnic di Grugliasco al imbastìs il so 3-4-3 ator di Højlund.

La Atalanta e partìs cjapant sù la iniziative. L’Udin si difint cun atenzion e al rive a jessi ancje plui pericolôs dai avesaris, prime cun Lovric che al siere un cuintripît puartât indenant di Beto cuntin tîr un tic masse alt, po cun Success che al tire fûr bersai e ancjemò cun Beto che al gafe cun velocitât un passaç indaûr di Djimsiti par Musso e si presente denant dal puartîr, che però al jes sui siei pîts e al siere la puarte. Di chê altre bande i parons di cjase a produsin un tîr telefonât di Lookman, ae fin di une buine azion corâl, un tentatîf fûr dal spieli di Mele, une bale buine tal mieç de aree par Højlund, che al ven fermât di Bijol, e un tîr di lontan di Koopmeiners parât di Silvestri.

Dopo un prin timp cul 70% dal possès de bale pe Atalanta, ma cul Udin plui dongje dal gol, inte seconde frazion i parons di cjase a provin in plui ocasions a passâ in vantaç, ma su la lôr strade a cjatin un Silvestri simpri puntuâl par fermâ lis conclusions plui pericolosis, dal tîr di Ederson a chel di Lookman, e ancje Becao al è decisîf suntun tîr di Pasalic, jentrât in cjamp tal puest di Lookman.

Il timp al passe e la Atalanta e prove ancjemò a rindisi pericolose. L’Udin al va dilunc a difindisi cun sintiment e si fâs vîf indenant cuntune conclusion di Thauvin, jentrât tal puest di Success. I parons di cjase a provin ancjemò a sburtâ ma cuant che a tirin al è simpri Silvestri a dîur di no. Il puartîr al fâs il so dovê ancje tal ultin, svualant par parâ in corner un tîr ben pinelât di Toloi e cussì l’incuintri al finìs cence goi e cuntun pont par om. Pal Udin al è pont bon e meretât.

ÒC Brigada Internacional + Kneecap + Lhi Balòs + Gruff Rhys = Babêl Europe 05/2023

Su Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât.

Inte cuinte pontade dal 2023 di cheste trasmission, in programazion vuê, martars ai 28 di Fevrâr a 11 a buinore, doman, miercus il Prin di Març a une dopo di misdì, e sabide ai 4 di Març a une e mieze, si fevelarà ancjemò di cine “babelics”, dopo de conclusion dal Festival di Berlin.

Par ce che al tocje la musiche, ancje tignint cont dal fat che juste îr su Onde Furlane e je stade memoreade la Zornade Furlane dai Dirits, al sarà spazi pes gnovis produzionsdal supergrup ocitan-catalan ÒC Brigada Internacional e dai ocitans Lhi Balòs. Cun di plui a vignaran tamesâts ancje i repertoriS dal rocker galês Gruff Rhys e dai rappers di Belfast Kneecap.

Dopo des trê emissions di vuê, doman e sabide sui 90 Mhz, sui 90.200 Mhz, sui 105.600 Mhz e in streaming, ancje cheste pontade di Babêl Europe si podarà scoltâle (o tornâ a scoltâle) su Spreaker, su Deezer e su Spotify.

Udinese – Spezia 2-2

Pal Udin, massime in cjase, la vitorie e va dilunc a jessi un câs par “Chi l’ha visto?”. Ancje cuintri dal Spezia i blancs e neris a rivin a cjapâ dome che un pont. Li dôs scuadris a zuin une partide plasevule, cun buinis azions di atac ma ancje cun cualchi distrazion di masse in difese e cun cualchi erorat in zone gol, che ae fin a saran decisîf pal risultât di doi a doi, che nol contente nissune des dôs scuadris e al lasse la bocje garbe soredut ae scuadre furlane e ai siei tifôs.

Lis dôs scuadris a partissin sveltis. La prime ocasion le à l’Udin, cun Pereyra, che però nol rive a tirâle ben dopo de jessude sbaliade di Dragowski. Daûr de regule dal “gol sbaliât, gol cjapât”, a son i ospits che a profitin di un pastroç blanc e neri tal mieç dal cjamp e a cjatin il gol con Nzola che al bruse Becao, al scjavace Silvestri e al segne. Sîs minûts plui tart il Spezia al lenç fintremai la dopleade cuntun tîr fûr bersai di Bourabia. I blancs e neris a reagjissin e a rivin a segnâ juste ae metât dal prin timp cun Beto, che al passe Dragowski e le bute dentri, cjatant fûr chel gol che al mancjave di cinc partidis.

Il ritmi al cale un tic, lis dôs formazions a provin a tornâ a organizâsi e in particolâr l’Udin al prove a cjapâ la iniziative. La scuadre furlane e à dôs oportunitâts par passâ in vantaç: prime e impegne Dragowski cuntun tîr cul tac di Ehizibue e po la bale parade vie dal puartîr e ven recuperade di Beto che le tocje par Pereyra che però nol cjate il spieli de puarte. Il prin timp si siere sul un a un, intant che la seconde frazion si vierç cul Udin che al va al atac.

Al rive cussì il gol di Pereyra, che al siere cun precision e cun fuarce une buine azion, impirant Dragowski. Il Spezia al prove a dreçâ la partide e cun Verde si svicine pardabon al doi a doi, parcè che la sô conclusion e ven fermade di un bon intervent di Masina. Silvestri al è protagonist di un salvament plui indenant: al tocje cui dêts un cross bas di Agudelo e no i permet a Shomurodov di sierâ cul tîr in puarte.

A fuarce di dâi i ospits a segnin il gol dal doi a doi: Agudelo al partìs svelt in cuintripît cence cjatâ ostacui di sorte, cul Udin sbilançât, e al passe la bale a Nzola che al conferme di jessi intune zornade sì e al torne a impirâ Silvestri. L’Udin al mostre di volê vinci e al sburte indenant fint tal ultin, ma su la sô strade al cjate lis paradis di Dragowski, prime suntune punizion di Samardzic e po suntune conclusion acrobatiche di Beto. Plui indenant il puartîr dal Spezia al fâs un mieç erôr, Beto al è dongje di lui e al prove a aprofitâ ma Dragowski lu ostacole e Marchetti nol sivile chel che al varès podût jessi un rigôr e magari il gol dal sucès furlan.

Buine Zornade Internazionâl de Lenghe Mari!

Chê di vuê e je une zornade impuartante par cui che i ten al pluralisim linguistic e culturâl. Cun di fat, a tacâ dal 2000, chê dai 21 di Fevrâr e je la Zornade internazionâl de lenghe mari.

La ricorence, proclamade de bande de Conference Gjenerâl de UNESCO ae fin dal 1999, e à chê di promovi il valôr de diversitât linguistiche e il dirit di doprâ la lenghe proprie.

La rilevance de dimension dai dirits linguistics in cheste iniziative e salte fûr a clâr inte date sielzude de UNESCO, stant che ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl.
Tra lis altris, in chê dì diviers manifestants a forin copâts de bande des fuarcis di polizie dal Pakistan, che in chê volte al cjapave dentri ancje il Bangladesh, deventât indipendent dome tal 1971.

Memoreâ la Zornade internazionâl de lenghe mari al vûl dî vê cussience che lis lenghis e i dirits linguistics a son alc di impuartant simpri, ducj i dîs e par ducj.

Buine Zornade internazionâl de lenghe mari! Pes lenghis e pai dirits di ducj e par ducj i dîs.

Inter – Udinese 3-1

La trasfierte di nossere dal Udin a Milan si siere inte maniere piês. Cunitri dal Inter i blancs e neris, che si presentin tal cjamp di San Siro cun Thauvin e Pereyra titolârs, a rivin a tignî bot dome vie pal prin timp. Inte seconde frazion l’ecuilibri al va al mancul e i parons di cjase a sierin la partide cuntun risultât positîf e taront, che ur permetin di stâ in cualchi maniere daûr dal Napoli e di confermâsi tant che la uniche scuadre in stât di provâ a fâi cuintri ai partenopeus inte corse ae concuiste dal scudet.

La partide si vierç daûr di un copion previodibil cul Inter che al cjape sù la iniziative e l’Udin che si difint cun sintiment. Par un cuart di ore al è un ecuilibri sù par jù perfet, che al ven rot di doi fats: la jessude dal cjamp par infortuni di Ebosse, cui blancs e neris in dîs cuintri undis par cualchi minût, e po un contat inte aree di rigôr udinese tra Walace e Dumfries che al ven calcolât iregolâr de bande di Dionisi, dopo de verifiche cul Var. Lukaku al tire dal discut e Silvestri al pare, ma l’arbitri al viôt che Lovric e Masina, che al à cjapât il puest di Ebosse, a jentrin inte aree ancjemò prime dal tîr e al ordene la ripetizion dal penalty: l’atacant di Antwerp al torne a bati e al rive a impirâ Silvestri.

L’Inter al gjestìs il vantaç e al fâs zirâ la bale, l’Udin al ten bot e al cîr di rompi il possès. A fuarce di dâi, propit di une bale robade dai blancs e neris prime de polse al rive il gol dal un a un. Ehsibue al anticipe Mkhitaryan, al passe la bale a Pereyra che al sburte indenant e al slargje a man çampe là che al è Lovric di bessôl, che al à il timp par jentrâ inte aree di rigôr e di tirâ cun fuarce e cun precision inte puarte di Handanovic.
Il prin timp si siere cul Inter che al prove a impegnâ Silvestri cuntun tîr cul cjâf di Acerbi suntun cross su punizion di Demarco, ma il puartîr dal Udin al bloche cun sigurece, e il risultât parziâl al reste chel di un a un.

La seconde frazion si vierç sù par jù cun chel stes ecuilibri: l’Inter al ten plui la bale, ma nol rive at cumbinâ alc e ce parcè che l’Udin si difint ancjemò cun sintimente cun atenzione al prove a imbastî ancje cualchi iniziative ofensive cun Becao, che il so tîr su cross di Pereyra nol cjate il spieli de puarte, e cun Beto, che al è par sigûr gjenerôs ma al fâs ancje avonde confusion.

L’Inter al à dôs buinis ocasions cun Mkhitaryan e Dzeko, ma Silvestri al siere la sô puarte, intant che la scuadre furlane e rive a meti adun une azion ofensive pardabon pericolose: un cuintripît micidiâl, a mancul di vincj minûts de fin, in superioritât numeriche, inviât e cundusût cun snait di Success, in cjamp tal puest di Thauvin, ma sierât in maniere flape e previodibile de bande dal stes atacant nigjerian.

Daûr de regule dal “gol mangjât, gol cjapât”, dopo vê sghindât il pericul, l’Inter al à la bale bune par tornâ a passâ in vantaç, cun Dimarco chele met tal mieç, al limit de arre, par Mkhitaryan che al fulmine Silvestri cuntune conclusion precise di prime intenzion. Sottil al prove a zuiâ lis cjartis Samardzic, Arslan e Ebosele, che a jentrin in cjap tal puest di Pereyra, Lovric e Beto.
Lis dôs scuadris si slungjin e a crein spazis pes verticalizazions. Lis balis miôr lis à Lautaro Martinez, che intune prime ocasion al tire fûr bersai e inte seconde al rive a tirâle in puarte cun precision e al segne il trê a un definitîf.

Stephane Casalta + Daonet + Oi Polloi + Sés + Roba Estesa = Babêl Europe 04/2023

Su lis frecuencis di Radio Onde Furlane vie par cheste setemane e je in programazion une gnove pontade di Babêl Europe, la trasmission cuindisinâl dedicade a lenghis, musichis, minorancis e nazions cence stât.

Tal apontament di vuê, martars ai 14 di Fevrâr, a 11 a buinore, di doman, miercus ai a une dopo di misdì, e di sabide ai 18 a une e mieze dopo di misdì, in continuitât cun chel di cuindis dîs indaûr, si fevelarà ancjemò di cine e produzion audiovisive intes lenghis minorizadis, dant un cuc al program dal 73m Festival dal Cine di Berlin, là che si cjatin in concors e in altris sezions cines par basc e par galizian.

Ancje pe musiche si larà dilunc in continuitât cu la pontade di Babêl Europe di cuindis dîs indaûr. Cun di fat, il percors musicâl al tacarà de Corsiche e po al tocjarà Bretagne, Scozie, Galizie e Catalogne cun Stephane Casalta, Daonet, Oi Polloi, Sés e Roba Estesa.

Dopo des trê emissions di vuê, doman e sabide sui 90 Mhz, sui 90.200 Mhz, sui 105.600 Mhz e in streaming, ancje cheste pontade di Babêl Europe si podarà scoltâle su Spreaker, su Deezer e su Spotify.

Udinese – Sassuolo 2-2

L’Udin al torne in cjamp tal Stadi Friûl a ore di gustâ cuintri dal Sassuolo. Pai blancs e neris la partide e à almancul dôs musis e duncje e merete dôs diviersis valutazions. Di une bande, in tiermins negatîfs, l’Udin al conferme di vê dificoltâts tal vinci, stant che tes ultimis cutuardis zornadis al à rivât a cjapâ ducj i trê ponts a disposizion dome intune ucasion. Di chê altre, dopo de partide smamide e flape di Turin, vuê in cjase la scuadre furlane è à mostrât dute une altre muse: cun plui grinte, cun plui cualitât di zûc, cun plui tîrs inte puarte aversarie. Cundut achel si palesin ancjemò diviers problemis, de precision in zone tîr che e varès di jessi plui alte ae pocje fortune, che i coste aes scuadre furlane un altri autogol.

Ae fin il risultât al è un doi a doi che al è bon soredut pe formazion emiliane, che cumò a son dîs ponts di distance dal terçultin puest, e che magari cussì no al lasse la bocje garbe ae scuadre di mister Sottil e soredut ai siei tifôs che une part di lôr no à mancjât di palesâ il so displasê, sivilant la scuadre ma forsit soredut contestant la societât, cundut che in chest moment l’Udin si cjate a cuote 30 ponts e tal sietim puest dongje dl Turin.

L’incuintri tra Udin e Sassuolo al è vivarôs e emozionant dal principi ae fin. L’Udin al passe in vantaç daurman cun Udogie che dal limit de aree al fâs partî un diestri che al finìs jeuste si impire tal cjantonut cun Consigli che al reste paralizât e nol pues fâ nuie altri che viodi la bale che e jentre in puarte. La rispueste dal Sassuolo e je imediade e si concretize cul gol dal un a un cinc minûts plui tart, che al rive dopo che i blancs e neris a vevin za riscjât un autogol al tierç minût di zûc, sghindât cuntun salvament di Samardzic. La pate parziâl e ven firmade di Henrique, che a, recupare une balade parade vie di Becao, al tire cun decision e la bale, che e ven deviade di Bijol, e jentre inte puarte di Silvestri.

Il ritmi al va dilunc a jessi alt, a son ribaltaments continuis di front, cun Consigli che prime al è atent suntun diagonâl di Beto deviât di Erlic e po al è reatîf sutune conclusion di Pereyra. Il Sassuolo al piert dopo nancje un cuart di ore Berardi, che al à fastidis ae cuesse çampe e al ven cambiât di Dionisi cun Bajrami. I ospits a cjapin un pâl cun Frattesi dopo di une azion di Marchizza dilunc de corsie di çampe e po al rive il gol dal gnûf vantaç de scuadre furlane: punizion di Samardzic sul secont pâl e Bijol che al profite di une durmide colossâl de difese aversarie e al impire Consigli. La gjonde dal vantaç e dure sù par jù un cuart di ore, stant ceh i ospits juste prime de polse a cjatin il gol dal doi a doi cuntun cross di Bajrami inte aree di rigôr che al ven tocjât di Perez e al lasse cence redenzie Silvestri.

La seconde frazion si vierç cu lis dôs scuadris che a àn fat une sostituzioon par om: tal Udin al jentre Thauvin tal puest di Pereyra, intant che te formazion ospite la gnove e je chê de jentrade di Maxime Lopez tal puest di Obiang.

L’Udin al à une marcje in plui e al impon la sô iniziative. I blancs e neris a sburtin indenant e a cirin in dutis lis manieris di concuistâ la vitorie però, magari cussì no, a pain une cierte imprecision tai tîrs in puarte, soredut cun Beto, e cuant che a centrin la puarte a cjatin simpri Consigli tal puest just, in particolâr suntun tîr di Lovric, e cuant che nol riuve il partîr al met un blec cualchi altri so compagn: par esempli Frattesi che al salve su la ribatude seguitive ae conclusion di Lovric, che e ven fate di Beto.

Il Sassuolo al pense soredut a difindisi e lu fâs cun snait e cun sintiment, ma al à ancje une buine ocasion cun Bajarami, che il so diagonâl al lenç il pâl. Si rive cussì ae fin de partide cul Udin ancjemò al atac, ma cence mudaments tal risultât che al reste chel di doi a doi. Sodisfazion pai ospits che a van dilunc a fâ ponts striche positive, intant che la Udinese e scuen ancjemò rimandâ l’apontament cu la concuiste dai trê ponts tal cjamp dal Stadi Friûl.