L’alenadôr al è gnûf, ma la musiche e reste chê e l’Udin al piert intai minûts di recupar ancje cuintri de Rome. La partide suspindude dopo dal mancjament di Evan Ndicka di dîs dîs indaûr si torne a zuiâ tal Stadi Friûl par chei sùù par jùù vincj minûts che a mancjavin ae fin.
I blancs e neris a àn une dibisugne mostre di fâ ponts e di no pierdi ponts e il gnûf mister Fabio Cannavaro al à la necessitât di segnâ un cambiamemt ripsiet ae situazion di prime. La scuadre di balon furlane e cîr di difindisi cun sintiment e di provâ a jessi pericolose des bandis di Svilar, che al intervent cun puntualitât suntun tentatîf di Lucca. Ancje i ospits a provin a segnâ e une conclusion di Azmoun e ven fermade di Okoye.
La partide e somee indreçade viers di une conclusion che e conferme l’un a un che al jere impins dai 14 di Avrîl. Magari cussì no, però, tai minûts di recupar, al rive un tîr di Pellegrini che, ancje in gracie di une deviazion, al fâs vignî i sgrisui ai tifôs furlans, ma soredut, plui indenant, la Rome e segne il doi a un: gol di Cristante, che al tire in puarte cul cjâf suntun corner batût di Dybala e al impire Okoye.
Vie pai minûts di zûc diviers zuiadôrs, di Bijol a Perez e a Ferreira, a fasin erorons. Cuistion di pîts o cuistion di cjâf? In cualsisedi maniere cannavaro al varà il so bon ce fâ. La posizion dal Udin in classifiche e reste grivie e penze. La uniche consolazion – se si à voie di vê une – e je chê che il gol al Udin lu à fat un zuiadôr furlan: Bryan Cristante di San Vît dal Tiliment.
Storie, memorie e atualitât, tra gnovis produzions e zornadis impuartantis di memoreâ. Al è ce che e propon la gnove pontade di Babêl Europe, la trasmission dedicade a lenghis, musichis, minorancis e nazions cence stât, in programazion su Radio Onde Furlanevuê a 11 a matine, doman a une dopo di misdì e sabide ai 27 di Avrîl a une e mieze dopo di misdì.
La trasfierte dal Udin a Verone e finìs inte maniere piês. Lant daûr di une cierte ande che e je zaromai deventade une tradizion, ancje tal stadi Bentegodi i blancs e neris a pierdin juste tai ultins minûts. Dilunc vie dal scuintri diret pe salvece lis dôs scuadris a scombatin, cuntune lungje rie di fai e di cartelins, e a provin ognidune a passâ in vantaç. Ae fin a son i zâi e blu chei che a rivin a puartâ a cjase ducj i ponts, tignint bot, ancje cuntun tic di fortune, denant de pression dai blancs e neris e po sburtant di plui, massime inte seconde frazion, cjapant ancje doi pâi, prime di segnâ il gol de vitorie tai minûts di recupar.
L’Udin al somee partî cul pît just. La scuadre furlane, cul so 3-5-1-1 si difint cun sintiment e al imbastìs lis primis azions ofensivis de partide, che però a van a sbati intor des bariduris difensivis dai parons di cjase. Montipò al è protagonist di un intervent decisîf, che al siere la puarte zale e blu in ocasion di un tîr di Lucca sui disvilups di un corner. Passade la prime mieze ore di zûc, Samrdzic al bat une biele punizion: la bale e ven pinelade ben cul çampin ma e finìs fûr, in bande dal prin pâl, Prime de polse ancje il Verone si svicine al vantaç cuntune conclusion cul cjâf di Noslin. In chest câs la bale tirade dal zuiadôr zâl e blu e va a sbati sul pâl.
Sierât il prin timp cence goi e za cuntune schirie di amonizions, la seconde frazion si invie sù par jù cun chê stesse ande, segnade di fisicitât e agonisim, e cui chei stes vincjedoi protagoniscj. Ancje tal secont timp la prime ocasion di gol e je dal Udin, cun Lucca che ae fin di une azion corâl al ricêf di Samardzic une bale golose e al tire cun fuarce ma cence la precision che e covente, mandant la bale masse adalt. Nol cjate il spieli de puarte nancje Bijol, che si presente inte aree aversarie in ocasion di un corner, al è puntuâl par tirâ in puarte la bale cul cjâf, ma nol è avonde precîs.
Baroni al prove a mudâ la fisionomie de sô scuadre par fâi cuintri ae pression ofensive de formazione furlane e cussì al clame fûr Mitrovic e Dani Salva e al mande in cjamp Swiderski e Bonazzoli. L’impat dal mudament nol è inmediât, stant che a son ancjemò i blancs e neris a jessi pericolôs. Pereyra al rive fintremai a sghiribiçâ Montipò e a butâ la bale tal sac, ma il so gol nol ven fat bon parcè che la posizion dal Tucu e ven ricognossude tant che di fûr zûc.
La musiche e cambie plui tart cuant che al è il Verone a jessi pericolôs cun Cabal che al recupare une bale parade vie de difese blancje e nere e al tire a colp, ma Okoye no si scompon e al bloche une bale che e je fuarte ma centrâl. Il puartîr blanc e neri al interven ben ancje suntune concljusion di Serdar. L’Udin al rispuint ma al torne a sbati intor des murais tiradis sù dai parons di cjase cun chê di protezi Montipò.
La partide e je daûr a finî e il Verone al lenç il gol cuntun tîr cul cjâf che al sbat intire de travierse. A tachin i minûts di recupar e al rive il gol di Coppola: un tîr cul cjâf che al impire Okoye, che al esalte i parons di cjase sburtantju indenant in classifiche e che al see lis gjambis ai blancs e neris, che no vegnin passâts in classifiche dome de bande dai zâi e blu ma ancje dal Empoli, che al vinç cuintri dal Napoli. Cumò l’Udin si cjate inte posizion numar 17, a cuote 28, cuntun pont di plui dal Frosinone e cun doi ponts in plui dal Sassuolo. Une situazion grivie e penze.
Un mancjament di Evan Ndicka a mancul di vincj minûts de fin, cul zuiadôr de Rome che al va fûr dal cjamp in barele e al passe dal Stadi Friûl al ospedâl, e la decision cjapade sù cun sintiment de sospension de partide. L’incuintri tra Udin e Rome di îr al vignarà ricuardât soredut par chel episodi, che par fortune al somee che nol vedi efiets masse pençs su la salût dal difensôr zâl e ros, e pe reazion ecuilibrade e condividude di scuadris, arbitri e tifôs. Cundut achel, no si pues dismenteâ ce che al è sucedût prime: une partide discrete, zuiade de bande de scuadre di balon furlane cul intindiment di fâ ponts e di tignî bot denant di une scuadre plui titolade e cun valôrs tecnics e tatics miôr di chei dai blancs e neris par no patî une altre disfate compagne di chê di lunis stât cuintri dal Inter.
La partide si invie cun ritmis avonde bas. L’Udin al scuen fâ di mancul di Thauvin e si presente in cjamp cu la cubie di atac Pereyra-Lucca, intant che il so 3-5-2 al viôt ancje Perez, Bijol e Kristensen denant di Okoye e Ehizibue, Samardzic, Walace, Payero, Kamara in mediane. La Rome, cuntune formazion une vore diferente di chê dal “derby” european cul Milan, e ten di plui la bale ma no rive a rindisi pericolose. L’Udin si siere e al prove a zuiâ in cuintripît, disfrutant i erôrs dai aversaris. Al è cussì che juste ae fin dal prin cuart di ore di zûc une bale pierdude de bande di Llorente e invie une iniziative che e puarte Ehizibue al tîr, ma Svilar al interven e al pare vie la bale in corner. Inte azion seguitive, inviade dal tîr de bandierute, al è Bijol che al prove a impirâ Svilar: al salte ben e al tire cul cjâf bande il secont pâl, ma la bale e finìs fûr di pôc.
La rispueste dai ospits pal moment si limite a une conclusion di fûr di Baldanzi, un tîr fuart e precîs che al ven parât vie di Okoye cuntun intervent biel e puntuâl. Une bale gjestide mâl di Huijsen e devente la ocasion par passâ in vantaç par Pereyra, che al profite de situazion, al scate indenant, si presente di bessôl denant di Svilar e lu impire. De Rossi al mude l’implant tatic de sô scuadre cun chê di rindile plui atente indaûr e plui dinamiche indenant, ma la uniche gnove ocasion dai zâi e ros prime de polse e je une conclusion cul cjâf di Lukaku che nol cjate il spieli de puarte.
La seconde frazion si vierç cun De Rossi che al rinfuartìs la prime linie cun Dybala. I ospits a rivin a rindisi pericolôs dome cuntun tentatîf di Paredes, intant che l’Udin al rispuint cuntune conclusion di Samardzic fûr bersai. La pression romaniste e cjate la strade dal gol dopo passade la metât dal secont timp cuntun cross di Cristante par Lukaku che si cjate tal puest just tal moment just e al segne. Cualchi minût plui tart Ndicka si tocje il pet e al cole par tiere. Al ven socorût daurman. Pairetto, dopo vê fevelât De Rossi e Cioffi, al sivile la sospension. Il public dal Stadi Friûl al palese comprension e solidarietât. Ca di cualchi dì si savarà cuant che la partide e vignarà recuperade.
Vie par cheste setemane su Radio Onde Furlane e je in programazion une gnove pontade di Babêl Europe, la trasmission dedicade a lenghis, musichis, minorancis e nazions cence stât.
Tal apontament in onde vuê a 11a buinore in direte la atenzion e vignarà pontade in particolâr su Suite, il disc gnûf dal compositôr e producer Arrogalla, une misture sauride di dub, eletroniche, cumbia, musiche popolâr sarde e sonorizazions ambientâls, che al salte fûr cu la etichete furlane La Tempesta.
Al sarà spazi ancje par altris declinazions “babelichis” dal dub, tra Gales, Catalogne, Paîs Basc e Friûl, cun Llwbyr Llaethog, Chalart 58 adun cun Fermin Muguruza, e R.Esistence in Dub adun cun Dj Tubet. Si fevelarà ancje des gnovis in cont de gnove e edizion dal festival Suns Europe, di concierts e di sport.
La pontade numar 8 dal 2024 di Babêl Europe dopo de prime emission di vuê, e torne “in onde” doman, miercus ai 10 di Avrîl a une dopo di misdì, e ancjemò sabide ai 13 a une e mieze dopo di misdì su lis frecuencis analogjichis e virituâls di Radio Onde Furlane: 90 Mhz, 90.2 Mhz, 105.6 Mhz e www.radioondefurlane.eu.
La partide cuintri dai prins in classifiche pal Udin e finìs inte maniere piês. Cundut che il prin timp si siere cui blancs e neris in vantaç, vie pe seconde frazion l’Inter al cjate il gol dal una a un e po, dopo cinc minûts di recupar, juste tal ultin i ospits a segnin il gol dal sucès, che ju puarte ancjemò plui dongje de concuiste dal scudet e che al lasse la scuadre furlane intune posizion une vore dongje de code de graduatorie.
L’Udin si presente tal cjamp dal Stadi Friûl par zuiâ cuintri dal Inter cun cualchi novitât inte formazion: Kristensen in difese dongje di Bijol e Perez; Zarraga in mediane, dongje di Walace e Samardzic, cun Ehizibue e Kamara esternis, e Pereyra mieze punte daûr di Thauvin. I ecuilibris tatics a son avonde clâr: l’Inter al cjape sùù il control de partide e al ten plui la bale, l’Udin si difint e al ten bot e cussì i ospits a rivin a rindisi pericolôs des bandis di Okoye dome dopo passe vincj minûts di zûc cuntune conclusion di Çalhanoglu, che e ven parade vie in corner de bande dal puartîr de scuadre furlane.
Il duel tra Çalhanoglu e Okoye si torne a ripeti dîs minûts plui tart: iniziative di Mkhitaryan dilunc de corsie di çampe, bale a Lautaro inte aree blancje e nere e passaç indaûr a vantaç dal zuiadôr todesc di divignince turche che al rive di corse e al tire une bombe dal limit, ma al cjate su la sô strade il numar cuarante dal Udin. Cundut de pression dai ospits, prime de polse al rive il gol de scuadre furlane: zuiade in orizontâl di Kamara par Pereyra e di dal Tucu par Samardzic, bale tai pîts di Lazar che al disegne un tîr cross a fîl di prât che in diagonâl al tresse la aree interiste, al ven tocjât di Carlos Augusto, al ipnotize ducj cuancj e al finìs la sô corse tal cjantonut in bande dal secont pâl. L’Inter al rispuint daurman cuntune azion in velocitât che e ven sierade di un cross di Dimarco, di un tîr cul cjâf di Lautaro e di un intervent strepitôs di Okoye e cussì il prin timp al finìs cul Udines in vantaç.
La seconde frazion e tache cui ospits al atac. Carlos Augusto al cjate il gol dopo trê minûts, ma Piccinini no lu fâs bon parcè che, cemût che al conferme ancje il Var, al è in fûr zûc. L’Inter al segne l’un a un cualchi minût plui indenant: azion corâl dai ospits, assist in verticâl di Dimarco par Thuram, intervent di Okoye in jessude, contat tra il puartîr e l’atacant, Piccinini al sivile il rigôr, e Çalhanoglu (ancjemò lui…) al tire dal discut e al firme il mudament dal risultât. La pression ofensive dai ospits e sbat intor des bariduris tiradis sùù dai blancs e neris, che si rinfuartissin indaûr cui cambis ordenâts di Cioffi – fûr Ehizibue e Samardzic e dentri Lovric e Joao Ferreira – e cuntune azion di cuintripît di Kamara si svicinin fintremai a un gnûf vantaç; cross tal mieç par Thauvin e anticip decisîf di Mkhitaryan.
Il timp al passe, ma l’Inter nol somee in stât di tornâ in vantaç e al rive a produsi dome un pâr di ocasions che no crein masse fastidis par Okoye. La partide e somee indreçade in direzion de spaertizion di ponts e di goi, ma juste tal ultim, dopo cinc minûts dai siet che a son proviodûts pal recupar, i ospits a segnin. Arnautović al tocje la bale cul tac in direzion di Lautaro, che al tire cun fuarce e cun precision, Okoye al tocje la bale, che e sbat intor dal pâl, e Frattesi al è il plui svelt di ducj, al met la çate e le bute tal sac. I ospits a rivin cuote 82, intant che l’Udin al reste cun 28 ponts, a dôs lungjecis de zone retrocession.
Chê di vuê e je une zornade impuartante pal Friûl, pe sô storie e ancjemò di plui pal so presint e pal so avignî.
Pe storie, chel dai 3 di Avrîl al è l’inovâl dal conferiment al patriarcje di Aquilee, Siart, de bande dal imperadôr Indrì IV, dal titul di “Comes Fori Julii. Dux et Marchio” e duncje dal podê “temporâl” suntun teritori che dilunc vie di passe trê secui al varà une gjeometrie variabile ma che al varà il so centri simpri tal Friûl. Anzit, si pues dî che il Friûl, intindût tant che comunitât teritoriâl unitarie, tant che “Patrie”, cemût che al vignarà clamât par tancj secui, al sedi stât definît ad in plen inte sô fisionomie propit in graciis di chê situazion politiche e istituzionâl.
Propit par chest chê dai 3 di Avrîl e je une ricorence che e permet di resonâ soredut in cont de atualitât e dal avignî. Il Patriarcjât di Aquilee al deventave, inte suaze dal Imperi, un stât par so cont, che al mantignive e al disvilupave relazions cui diviers teritoris e soredut cun chei a nord, a est e a sud est.
La “Fieste de Patrie”, che di uns pôcs di agns e gjolt fintremai di un ricognossiment uficiâl de bande de Regjon aministrative dal Stât talian che e ten dongje la plui part dal Friûle la zone di Triest, no je – e no à di jessi – ni une ocasion nostalgjie ni un moment di… mitologjie. Ni pal “Friûl in Friûl”, ni pal Friûl che al è pal Mont.
Si pues vê ancje une cierte braùre dal fat che propit chel dal stât patriarcjâl al è un dai Parlaments plui antîcs de Europe. Cundut achel, ce che al è plui interessant al è cognossi e ricognossi lis lidrîs de specificitât, de unitât e de unitarietât teritoriâl dal Friûl dutun cun chês de sô specifiche pluralitât linguistiche e culturâl e in cheste suaze de specificitât e de unitarietât de lenghe furlane, massime cul intidiment di cjapâ cussience che chês a son lis fondis no dome par jessi se stes ma ancje par jessi in relazions positivis cun ducj chei altris.
Dut chest al è ce che esercits, podês e ideologjiis a àn cirût di dineâ, di scombati e di scancelâ, soredut di un secul e mieç incà. Dut chest al è ce che al forme, in maniere dinamiche, particolâr ma no esclusive, la identitât furlane: chê vere, chê libare, chê che si cognòs, chê che si fâs cognossi e ricognossi e chê che e ricognòs.
Dut chest al è ce che il Friûl al à o almancul ce che al pues vê ancjemò. Soredut al è ce che i covente par jessi Friûl e jessi cussì part de Europe e dal Mont. Par doprâ dôs peraulis che nus plasin: «lidrîs» e soredut «butui».
Par cui che al vîf in Friûl e pai furlans pal Mont l’inovâl dai 3 di Avrîl al è la ocasion par fâ fieste par une Patrie che no à etichetis: che no a voie di jessi ni “frontiere”, ni “colonie, ni “confin”. E duncje che no je ni “piçule” ni “extralarge”.
Un inovâl e une Fieste di memoreâ cun snait e cun sintiment, cun cognossince e cun cussience. Cui voi vierts e stant in vuaite cuintri cualsisedi tentatîf di presumude nostalgjie e di esplicite mistificazion.
Buine Fieste de Patrie dal Friûl a dutis e a ducj, al Friûl in Friûl e al Friûl che al è pal Mont.
La sperance dai tifôs dal Udin e jere chê di fâ fieste par une vitorie, sei cjalant la classifiche sei in prospetive de ricorince dai 3 di Avrîl. E je finide un a un: un gol e un pont par om pai blancs e neris e pal Sassuolo. Almancul pe scuadre furlane, tignint cont de situazion in graduatorie, si pues dî “alc al è alc e nuie al è nuie”: ducj cuancj o varessin vût miôr une vitorie, ma almancul par cumò o podìn ancje contentâsi di chel risultât…
In cjase dai neris e verts, che a van dilunc a no podê zovâsi dal contribût di Berardi, l’Udin si presente cun Samardzic e Pereyra in cjamp fin dal principi. In puarte al è Okoye, in difese a son Ferreira, Bijol e Perez, in mediane, dongje dal Tuc e dal talent serp todesc, Cioffi al met Lovric, Walace e il cursôr Kamara, intant che e cjate conferme la cubie di atac Thauvin-Lucca.
La scuadre furlane e promet ben: atente indaûr e cun cualitât indenant. Ancje i parons di cjase a mostrin une muse di chê fate e la partide e partìs avonde ben di dutis dôs lis bandis dal cjamp, cun iniziative e cun atenzion.
I parons di cjase a tegnin di plui la bale e a son i prins a rindisi pericolôs prime cuntune conclusion di Laurienté, che al controle e al tire bande il secont pâl, ma la bale e ven parade vie di Okoye, e po cun Pinamonti che si cjate tes cundizions di disfrutâ daurman un tap-in a puarte vueide ma nol cjate il spieli e al mande la bale fûr.
L’Udin al rispuint plui indenant cun Lovric che al à une bale golose ma al tire mâl cuasit compagn di Pinamonti e cussì Consigli al intervent cence padins. L’ecuilibri tra lis dôs scuadris, che al cjape dentri sei il zûc che lis ocasions straçadis, al ven rot passade la prime mieze ore di zûc cuant che i blancs e neris a metin Lucca tes cundizions di impirâ Consigli. L’atacant di Moncalieri al è svelt e nol piert l’apontament cuntun cross a fîl di jerbe che al rive di diestre, il puartîr dal Sassuolo i va incuintri, lu disturbe e al rive a tocjâ la bale tirade dal blanc e neri di chel pôc che al baste par fâle lâ mancul svelte in direzion de puarte e par permeti a Tressoldi di meti un blec.
Prime de polse dutis dôs li scuadris a rivin a segnâ. I parons di cjase a passin in vantaç cun Defrel che al ricêf un bon assits in profonditât di Matheus Henrique, al controle ben, al tire cun precision e al impire Okoye. L’Udin al rispuint daurman cuntune combinazion imbastide di Thauvin cun Pereyra e sierade a bersai dal atacant francês.
La seconde frazion si vierç cuntune gnove iniziative metude adun di Thauvin e Pereyra: la bale e rive tai pîts di Lovric che al controle e al tire ben in diagonâl, ma la bale e passe in bande dal secont pâl e il risultât al reste chel. Plui indenant al è protagonist Okoye che al ferme in doi timps une conclusion di Pinamonti.
Il timp al passe. Il Sassuolo al fâs zirâ di plui la bale cun chê di vierzi trois bogns in direzion de puarte di Okoye, ma l’Udin si difint cun sintiment e al siere ducj i spazis. Cuant che i neris e verts a rivin al tîr – ancjemò cun Pinamonti, che nol cjate il spiueli de puarte, e cuntune conclusion cul cjâf di Racic che e ven parade di Okoye – no crein problemis particolârs pai blancs e neris.
Ancje la scuadre furlane, inte fase mezane de seconde frazion, e prove a imbastî cualchi azion, ispirade di Samardzic e Pereyra. La ocasion miôr e je chê costruide cuntun cross tal mieç dal serp todesc e disvilupade cuntun assist cul cjâf di Lucca par Lovric: il sloven al tire cun fuarce e cun precision e la bale e sbat intor de travierse.
Al somee che il destin al vedi decidût che la partide e vedi di finî un a un. Cun di fat vie pai ultins vincj minûts i doi tecnics a provins a mudâ la muse des lôr scuadris cun chê di disblocâ il risultât, ma no si viôt nuie di gnûf fin aes trê siviladis di Fabbri. Cussì il Sassuolo al reste tal so penultin puest, intant che l’Udin nol rive a vinci, ma almancul nol piert e si manten fûr de zone rosse de graduatorie, almancul par cumò. Alc al è alc…
Zornadis impuartantis, inovâi, omaçs, ricuarts, gnovis produzions e “classics” babelics. A podaressin jessi chestis lis peraulis clâf in stât di presentâ i contignûts de gnove pontade di Babêl Europe, la trasmission dedicade a lenghis, musichis, minorancis e nazions cence stât, in programazion vie par cheste setemane, vuê, doman e sabide, su Radio Onde Furlane.
Cun di plui al sarà spazi ancje pe cjantante bretone Nolwenn Leroy, pal grup che al è espression des valadis ocitanis e francoprovenzâls dal Piemont Blu l’Azard pai nostrans Alvise Nodale e Pit Ryan, che tal so disc gnûf si fâs clamâ Ian Tryp, e pe innomenande cjantautore americane Joan Baez, che tal so repertori e à ancje une cjançon par basc di Mikel Laboa.
La pontade numar 7 dal 2024 di Babêl Europe e je in programazion vuê, martars ai 26 di Marça 11 a buinore, doman, miercus ai 27 a une dopo di misdì, e ancjemò sabide ai 30 a une e mieze dopo di misdì su lis frecuencis analogjichis e virituâls di Radio Onde Furlane: 90 Mhz, 90.2 Mhz, 105.6 Mhz e www.radioondefurlane.eu.
Se par talian si dîs che «non c’è il due senza il tre», par ce che al tocje lis sconfitis dal Udin nus tocjarâ gloti che par furlan si disi ancje «nol è il siet cence il vot». Magari cussì no, la partide cuintri de Lazio e conferme ad in plen la tindince negative dai blancs e neris. La scuadre di Rome e je fuarte, però l’Udin – che par sigûr al à fat ancje alc di plui che in altris ocasions – al à fat masse pôc e ancjemò masse pôc ben par pretindi di jonzi un risultât diferent.
La partence dai blancs e neris no je stade nancje mâl, anzit. La formazion di Oddo, cun Bizzarri in puarte, cun Danilo, Samir e Nuytinck in difese, cun Balic tal mieç de mediane, cun Jankto e Barak dongje di lui, cun Larsen e Alì Adnan tes corsiis laterâls e cun Lasagna che al torne a jessi il pont di riferiment dal atac dongje di Maxi Lopez, e partìs cul pît just. La Lazio e somee strache e flape e e patìs il dinamisim dai parons di cjase. Cundut de pression e dal ritmi, lis conclusions de scuadre di balon furlane a son pocjis e par nuie pericolosis. Però, dopo nancje un cuart di ore di zûc e rive la combinazion juste: scat di Larsen su la corsie di diestre, cross tal mieç de aree par Lasagna che al tocje la bale cul cjâf e le bute dentri inte puarte di Strakosha.
Il gol dal Udin al fâs sunâ la svearine de Lazio, che e scomence a imbastî cualchi azion, e alce la linie dal so zûc e si fâs viodi des bandis di Bizzarri cuntun tîr fûr bersai di Immobile, cuntune conclusion deviade in corner di Milinkovic e cuntun tîr cul cjâf di Lucas Leiva che il puartîr blanc e neri al scuen fermâlu in doi timps. A fuarce di dâi, i ospits a segnin: Felipe Anderson si slargje a man çampe e i passse la bale a Lulic che al fâs partî un tîr-cross che al devente un assist par Immobile, che i met la çate e le bute tal sac.
Pal Udin al è un brut pataf, no dome par vie de pierdite dal vantaç ma ancje parcè che la azion dal gol e je condizionade di un intervent di Marusic su Jankto che nol somee masse regolâr. La reazion de scuadre furlane, par fortune, no si limite aes protestis cuintri di Rocchi, ma si palese ancje in cualchi iniziative in verticâl, cun Maxi Lopez che al fâs chel dal assist e cun Lasagna che al scombat, ancje se par Strakosha nol è masse ce fâ.
Il prin timp si svicine ae fin e al viôt la Lazio che e segne il secont gol: verticalizazion te aree di rigôr di Immobile e tîr sigûr di Luis Alberto che Bizzarri nol rive a fermâlu.
La seconde frazion si vierç cul Udin al atac e cuntun cross di Alì Adnan par Maxi Lopez che cul cjâf al va avonde dongje dal doi a doi. Al è dome un moment: cul passâ dal timp la Lazio e scjafoie cualsisedi manovre blancje e nere, cence masse sfuarçs, stant che la scuadre di Oddo si cuiete di bessole.
I ospits provin a jessi ancjemò pericolôs, ma ur mancje une buine dose di precision. Oddo al met dentri Widmer al puest di Samir, al sposte Larsen in difese e al mande il svuizar a fâ il cursôr de bande diestre. L’Udin al prove a fâ alc, ma nol rive a impegnâ pardabon Strakosha, ancje par vie dai blecs che e rive a meti la difese celeste. La Lazio e rispuint e i blancs e neris indaûr in cualchi ocasion a clopin e in cualchi altre a fasin miracui, cun Danilo al ferme un tîr di Murgia e cun Bizzarri al salve suntun tîr di Marusic.
A passin i minûts, la Lazio e manten il control de partide ancje se l’Udin nol somee ancjemò fûr dai zûcs, cun De Paul e Ingelsson che a jentrin cun chê di rinfuartî la pression ofensive.
Cuant che Lasagna al pinele un cross par Jankto, juste ae fin dal incuintri, la scuadre di balon furlan e pâr fintremai in stât di dreçâ il risultât, ma la bale tocjade cul cjâf dal boem no jentre in puarte e cussì pe formazion di Oddo e je la sconfite numar vot.
E la code de classifiche e je mancul lontane.
LIDRÎS E BUTUI 