Ultravox + The Alarm + Dixebra + Arbe Garbe + Adrià Mor + Brick a Drac = Babêl Europe 10/2024

Ancjemò datis impuartantis di memoreâ e ancjemò selezions musicâls metudis dongje daûr di criteris tematics. Vie par cheste setemane su Radio Onde Furlane e je in programazion une gnove pontade di Babêl Europe, la trasmission cuindisinâl dedicade a lenghis, musichis, minorancis e nazions cence stât.

Chel che si pues scoltâlu vuê (martars ai 7 di Mai) a 11 a matine, doman (miercus ai 8) a une dopo di misdì e sabide ai 11 di Mai a une e mieze dopo di misdì al è l’apontament numar 10 dal 2024 e si presente in plene continuitât cun chel di cuindis dîs indaûr, che si sierave cul classic dal repertori dal cjantautôr ocitan Mans de Breish, “Los carboniers de la Sala”, selezionade par memoreâ la Fieste dal lavôr e dai lavorents.

Cun di fat si scoltarà une gnove version, par cure dai Brick a Drac, di chê poesie di Joan Bodon che e jere deventade une cjançon e si memorearan ancjemò il Prin di Mai e Sa Die de Sa Sardigna, cence dismenteâ l’inovâl de muart dal militant nazionalitari republican irlandês Bobby Sands, chel dal taramot in Friûl, la Zornade de Europe e fintremai i cuarante agns di Festintenda.

Par chel si scoltarà ancje la gnove cjançon dal rocker catalan Adrià Mor, che al propon une sô version un pôc par catalan algherês e un pôc par tabarchin, par galurês e par sassarês di une cjançon di Woody Guthrie, che al è calcolât tant che un dai paris de cjançon di autôr e cun contignûts politic a nivel planetari.

Cun di plui, fasint un salt indaûr tal timp, e sarà la ocasion par scoltâ un dai tocs par galês dal repertori dai Alarm, ricuardant il so impegn dongje dai minadôrs in siopar tai agns Otante dal Nûfcent, la uniche cjançon dai Ultravox che e à une part dal test par gaelic, cun chê di memorâ il bassist de band Chris Cross, che al è muart un mês e mieç indaûr.

Si scoltaran ancje un toc gjavât dal disc dai nostrans Arbe Garbe, regjistrât dal vîf a Festintenda ai 24 di Avrîl dal 2006, e une selezion dal repertori dai asturians Dixebra.

Babêl Europe e Onde Furlane si scoltin in modulazion di frecuence sui 90 Mhz, sui 90.2 Mhz e sui 105.6 Mhz e in streaming ae direzion web www.radioondefurlane.eu.

Bologna – Udinese 1-1

L’Udin a Bologne al ten bot, al rive fintremai a passâ in vantaç prime de polse, ma vie pal secont timp si fâs ricjapâ dai parons di cjase, che cundut che a restin in dîs cuintri undis a rivin a segnâ il gol dal un a un.
Il risultât al reste chel fin tal ultin, cuant che l’Udin si svicine ae vitorie ma chê che e varès di jessi la bale di aur e va a sbati intor dal pâl. Si sfante cussì la pussibilitât, pai blancs e neris, di puartâ a cjase ducj i trê ponts a disposizion e di no pierdi contat in graduatorie cu lis trê scuadris a cuote 31: Empoli, Frosinone e Verone.
La scuadre furlane e reste tal tierç ultin puest cuntun pont in plui: cumò a son 29. Dopo cuatri sconfitis une daûr di chê altre, i blancs e neris a rivin a no pierdi (e soredut a no pierdi intai ultins minûts di zûc). Alc al è alc…

La partide tal stadi Dall’Ara e tache cun ritimis avonde flaps. L’Udin di Cannavaro si presente cuntune gnove fisionomie tatiche: impen dal 3-5-2, il scheme sielzût de bande dal gnûf alenadôr al è une sorte di 3-4-2-1, cun Okoye in puarte, cun Perez, Bijol e Kristensen in difese, cun Payero, Kamara, Ehizibue e Walace in mediane e cun Samardzic e Pereyra daûr di Lucca prime e uniche ponte. Thiago Motta al rispuint cul 4-1-4-1.

Lis ocasions di gol a son pocjis. Cundut che a son i parons di cjase chei che a tegnin di plui la bale, a son i ospits chei che si rindin pljui pericolôs. Il prin colp al è chel di Ehizibue, che si cjate intune buine posizion, ma impen di tirâ in puarte al sielç di metile tal mieç par Lucca, cun Beukema che al slontane il pericul. Juste ae fin dal pin timp la scuadre furlane e cjate il gol dal vantaç: il Bologne a al fâs un erôr inte fase di costruzion dal zûc, l’Udin al aprofite, al mande Lucca in zone tîr, la sô conclusion, tocjade di un difensôr, e devente un assist tal mieç de arre par Payero, che al tire in puarte e cussì al impire Skorupski.

Dopo dal gol i blancs e neris si svicinin ancje al doi a zero cuntun tîr cul cjâf di Perez, che però nol cjate il spieli de puarte. Dopo trê minûts di recupar Sacchi al mande lis dôs scuadris tai camarins. La prime frazion si siere cul un a zero pal Udin.

Il secont timp si invie cul Bologne che al cîr il gol dal un a un, sburtant indenant ancje se in maniere disordenade. Plui indenant e rive unea conclusion di Ndoye che si fâs spazi inte aree blancje e nere e al tire cjatant su la sô strade Okoye.

Il Bologne al reste in dîs par vie dal secont cartelin zâl par Beukema. Cundut de inferioritât i parons di cjase a van dilunc a sburtâ indenant. Jentrâts intal ultin cuart di ore de partide, i parons di cjase a àn une punizion in posizion decentrade. Le bat Saelemaekers che al fâs une sorte di tîr cross che al rive a impirâ Okoye fûr posizion.

Il gol fat al da ancjemò plui fuarce ai parons di cjase che a provin a jessi pericolôs ancjemò cun Saelemaekers, che prime al impegne Okoye, che in chest câs al è atent e puntuâl, e po al tire fûr bersai.

Il timp al passe e la partide e somee jessi inviade inte direzion de conferme dal un a un, ma juste tal ultin ,Davis, in cjamp di passe dîs minûts tal puest di Lucca, al à la bale buine par tirâ in puarte. Lu fâs ben ma nol è masse fortunât, stant che al cjape il pâl. La bale e torne in zûc e Brenner, jentrât di pôc tal puest di Payero, al prove la conclusion ma nol cjate il spieli de puarte e la partide si siere cul un a un.

Udinese – Roma 1-2

L’alenadôr al è gnûf, ma la musiche e reste chê e l’Udin al piert intai minûts di recupar ancje cuintri de Rome. La partide suspindude dopo dal mancjament di Evan Ndicka di dîs dîs indaûr si torne a zuiâ tal Stadi Friûl par chei sùù par jùù vincj minûts che a mancjavin ae fin.

I blancs e neris a àn une dibisugne mostre di fâ ponts e di no pierdi ponts e il gnûf mister Fabio Cannavaro al à la necessitât di segnâ un cambiamemt ripsiet ae situazion di prime. La scuadre di balon furlane e cîr di difindisi cun sintiment e di provâ a jessi pericolose des bandis di Svilar, che al intervent cun puntualitât suntun tentatîf di Lucca. Ancje i ospits a provin a segnâ e une conclusion di Azmoun e ven fermade di Okoye.

La partide e somee indreçade viers di une conclusion che e conferme l’un a un che al jere impins dai 14 di Avrîl. Magari cussì no, però, tai minûts di recupar, al rive un tîr di Pellegrini che, ancje in gracie di une deviazion, al fâs vignî i sgrisui ai tifôs furlans, ma soredut, plui indenant, la Rome e segne il doi a un: gol di Cristante, che al tire in puarte cul cjâf suntun corner batût di Dybala e al impire Okoye.

Vie pai minûts di zûc diviers zuiadôrs, di Bijol a Perez e a Ferreira, a fasin erorons. Cuistion di pîts o cuistion di cjâf? In cualsisedi maniere cannavaro al varà il so bon ce fâ. La posizion dal Udin in classifiche e reste grivie e penze. La uniche consolazion – se si à voie di vê une – e je chê che il gol al Udin lu à fat un zuiadôr furlan: Bryan Cristante di San Vît dal Tiliment.

Xavi Sarrià + Sandra Monfort + Zetak + Fillas de Cassandra + Lou Dalfin + Sustraia + ‘Zuf de Žur + Tržaški Partizanski Pevski Zbor Pinko Tomažič + Les Ramoneurs de Menhirs + Mans de Breish + Chava Alberstein + Dr. Drer & CRC Posse = Babêl Europe 09/2024

Storie, memorie e atualitât, tra gnovis produzions e zornadis impuartantis di memoreâ. Al è ce che e propon la gnove pontade di Babêl Europe, la trasmission dedicade a lenghis, musichis, minorancis e nazions cence stât, in programazion su Radio Onde Furlane vuê a 11 a matine, doman a une dopo di misdì e sabide ai 27 di Avrîl a une e mieze dopo di misdì.

E sarà la ocasion par scoltâ il risultât de colaborazion, tra Paîs Catalans e Pais Basc, jenfri Xavi Sarrià, Sandra Monfort e Zetak: un singul che al è saltât fûr la setemane stade cu la etichete catalane PropagandaPelFet.

Cun di plui a vignaran memoreadis la Zornade Internazionâl de Tiere, la Fieste de Liberazion dal Fassisim e dal Nazisim, Sa Die de Sa Sardigna e il Prin di Mai, Fieste dal lavôr e dai lavorents, cu la musiche des Fillas de Cassandra, dai Lou Dalfin cui Sustraia, dal Tržaški Partizanski Pevski Zbor Pinko Tomažič, dai ‘Zuf de Žur , dai Les Ramoneurs de Menhirs, di Chava Alberstein, di Mans de Breish e di Dr. Drer & CRC Posse.

La pontade numar 9 dal 2024 di Babêl Europe si pues scoltâle su lis frecuencis analogjichis e virituâls di Radio Onde Furlane: 90 Mhz, 90.2 Mhz, 105.6 Mhz e www.radioondefurlane.eu.

Verona – Udinese 1-0

La trasfierte dal Udin a Verone e finìs inte maniere piês. Lant daûr di une cierte ande che e je zaromai deventade une tradizion, ancje tal stadi Bentegodi i blancs e neris a pierdin juste tai ultins minûts. Dilunc vie dal scuintri diret pe salvece lis dôs scuadris a scombatin, cuntune lungje rie di fai e di cartelins, e a provin ognidune a passâ in vantaç. Ae fin a son i zâi e blu chei che a rivin a puartâ a cjase ducj i ponts, tignint bot, ancje cuntun tic di fortune, denant de pression dai blancs e neris e po sburtant di plui, massime inte seconde frazion, cjapant ancje doi pâi, prime di segnâ il gol de vitorie tai minûts di recupar.

L’Udin al somee partî cul pît just. La scuadre furlane, cul so 3-5-1-1 si difint cun sintiment e al imbastìs lis primis azions ofensivis de partide, che però a van a sbati intor des bariduris difensivis dai parons di cjase. Montipò al è protagonist di un intervent decisîf, che al siere la puarte zale e blu in ocasion di un tîr di Lucca sui disvilups di un corner. Passade la prime mieze ore di zûc, Samrdzic al bat une biele punizion: la bale e ven pinelade ben cul çampin ma e finìs fûr, in bande dal prin pâl, Prime de polse ancje il Verone si svicine al vantaç cuntune conclusion cul cjâf di Noslin. In chest câs la bale tirade dal zuiadôr zâl e blu e va a sbati sul pâl.

Sierât il prin timp cence goi e za cuntune schirie di amonizions, la seconde frazion si invie sù par jù cun chê stesse ande, segnade di fisicitât e agonisim, e cui chei stes vincjedoi protagoniscj. Ancje tal secont timp la prime ocasion di gol e je dal Udin, cun Lucca che ae fin di une azion corâl al ricêf di Samardzic une bale golose e al tire cun fuarce ma cence la precision che e covente, mandant la bale masse adalt. Nol cjate il spieli de puarte nancje Bijol, che si presente inte aree aversarie in ocasion di un corner, al è puntuâl par tirâ in puarte la bale cul cjâf, ma nol è avonde precîs.

Baroni al prove a mudâ la fisionomie de sô scuadre par fâi cuintri ae pression ofensive de formazione furlane e cussì al clame fûr Mitrovic e Dani Salva e al mande in cjamp Swiderski e Bonazzoli. L’impat dal mudament nol è inmediât, stant che a son ancjemò i blancs e neris a jessi pericolôs. Pereyra al rive fintremai a sghiribiçâ Montipò e a butâ la bale tal sac, ma il so gol nol ven fat bon parcè che la posizion dal Tucu e ven ricognossude tant che di fûr zûc.

La musiche e cambie plui tart cuant che al è il Verone a jessi pericolôs cun Cabal che al recupare une bale parade vie de difese blancje e nere e al tire a colp, ma Okoye no si scompon e al bloche une bale che e je fuarte ma centrâl. Il puartîr blanc e neri al interven ben ancje suntune concljusion di Serdar. L’Udin al rispuint ma al torne a sbati intor des murais tiradis sù dai parons di cjase cun chê di protezi Montipò.

La partide e je daûr a finî e il Verone al lenç il gol cuntun tîr cul cjâf che al sbat intire de travierse. A tachin i minûts di recupar e al rive il gol di Coppola: un tîr cul cjâf che al impire Okoye, che al esalte i parons di cjase sburtantju indenant in classifiche e che al see lis gjambis ai blancs e neris, che no vegnin passâts in classifiche dome de bande dai zâi e blu ma ancje dal Empoli, che al vinç cuintri dal Napoli. Cumò l’Udin si cjate inte posizion numar 17, a cuote 28, cuntun pont di plui dal Frosinone e cun doi ponts in plui dal Sassuolo. Une situazion grivie e penze.

Udinese – Roma 1-1 (sospindude)

Un mancjament di Evan Ndicka a mancul di vincj minûts de fin, cul zuiadôr de Rome che al va fûr dal cjamp in barele e al passe dal Stadi Friûl al ospedâl, e la decision cjapade sù cun sintiment de sospension de partide. L’incuintri tra Udin e Rome di îr al vignarà ricuardât soredut par chel episodi, che par fortune al somee che nol vedi efiets masse pençs su la salût dal difensôr zâl e ros, e pe reazion ecuilibrade e condividude di scuadris, arbitri e tifôs. Cundut achel, no si pues dismenteâ ce che al è sucedût prime: une partide discrete, zuiade de bande de scuadre di balon furlane cul intindiment di fâ ponts e di tignî bot denant di une scuadre plui titolade e cun valôrs tecnics e tatics miôr di chei dai blancs e neris par no patî une altre disfate compagne di chê di lunis stât cuintri dal Inter.

La partide si invie cun ritmis avonde bas. L’Udin al scuen fâ di mancul di Thauvin e si presente in cjamp cu la cubie di atac Pereyra-Lucca, intant che il so 3-5-2 al viôt ancje Perez, Bijol e Kristensen denant di Okoye e Ehizibue, Samardzic, Walace, Payero, Kamara in mediane. La Rome, cuntune formazion une vore diferente di chê dal “derby” european cul Milan, e ten di plui la bale ma no rive a rindisi pericolose. L’Udin si siere e al prove a zuiâ in cuintripît, disfrutant i erôrs dai aversaris. Al è cussì che juste ae fin dal prin cuart di ore di zûc une bale pierdude de bande di Llorente e invie une iniziative che e puarte Ehizibue al tîr, ma Svilar al interven e al pare vie la bale in corner. Inte azion seguitive, inviade dal tîr de bandierute, al è Bijol che al prove a impirâ Svilar: al salte ben e al tire cul cjâf bande il secont pâl, ma la bale e finìs fûr di pôc.

La rispueste dai ospits pal moment si limite a une conclusion di fûr di Baldanzi, un tîr fuart e precîs che al ven parât vie di Okoye cuntun intervent biel e puntuâl. Une bale gjestide mâl di Huijsen e devente la ocasion par passâ in vantaç par Pereyra, che al profite de situazion, al scate indenant, si presente di bessôl denant di Svilar e lu impire. De Rossi al mude l’implant tatic de sô scuadre cun chê di rindile plui atente indaûr e plui dinamiche indenant, ma la uniche gnove ocasion dai zâi e ros prime de polse e je une conclusion cul cjâf di Lukaku che nol cjate il spieli de puarte.

La seconde frazion si vierç cun De Rossi che al rinfuartìs la prime linie cun Dybala. I ospits a rivin a rindisi pericolôs dome cuntun tentatîf di Paredes, intant che l’Udin al rispuint cuntune conclusion di Samardzic fûr bersai. La pression romaniste e cjate la strade dal gol dopo passade la metât dal secont timp cuntun cross di Cristante par Lukaku che si cjate tal puest just tal moment just e al segne. Cualchi minût plui tart Ndicka si tocje il pet e al cole par tiere. Al ven socorût daurman. Pairetto, dopo vê fevelât De Rossi e Cioffi, al sivile la sospension. Il public dal Stadi Friûl al palese comprension e solidarietât. Ca di cualchi dì si savarà cuant che la partide e vignarà recuperade.

Arrogalla + Llwybr Llaethog + Chalart 58 + Fermin Muguruza + R.Esistence in Dub + DJ Tubet + Suns Europe = Babêl Europe 08/2024

Vie par cheste setemane su Radio Onde Furlane e je in programazion une gnove pontade di Babêl Europe, la trasmission dedicade a lenghis, musichis, minorancis e nazions cence stât.

Tal apontament in onde vuê a 11 a buinore in direte la atenzion e vignarà pontade in particolâr su Suite, il disc gnûf dal compositôr e producer Arrogalla, une misture sauride di dub, eletroniche, cumbia, musiche popolâr sarde e sonorizazions ambientâls, che al salte fûr cu la etichete furlane La Tempesta.

Al sarà spazi ancje par altris declinazions “babelichis” dal dub, tra Gales, Catalogne, Paîs Basc e Friûl, cun Llwbyr Llaethog, Chalart 58 adun cun Fermin Muguruza, e R.Esistence in Dub adun cun Dj Tubet.
Si fevelarà ancje des gnovis in cont de gnove e edizion dal festival Suns Europe, di concierts e di sport.

La pontade numar 8 dal 2024 di Babêl Europe dopo de prime emission di vuê, e torne “in onde” doman, miercus ai 10 di Avrîl a une dopo di misdì, e ancjemò sabide ai 13 a une e mieze dopo di misdì su lis frecuencis analogjichis e virituâls di Radio Onde Furlane: 90 Mhz, 90.2 Mhz, 105.6 Mhz e www.radioondefurlane.eu.

Udinese – Inter 1-2

La partide cuintri dai prins in classifiche pal Udin e finìs inte maniere piês. Cundut che il prin timp si siere cui blancs e neris in vantaç, vie pe seconde frazion l’Inter al cjate il gol dal una a un e po, dopo cinc minûts di recupar, juste tal ultin i ospits a segnin il gol dal sucès, che ju puarte ancjemò plui dongje de concuiste dal scudet e che al lasse la scuadre furlane intune posizion une vore dongje de code de graduatorie.

L’Udin si presente tal cjamp dal Stadi Friûl par zuiâ cuintri dal Inter cun cualchi novitât inte formazion: Kristensen in difese dongje di Bijol e Perez; Zarraga in mediane, dongje di Walace e Samardzic, cun Ehizibue e Kamara esternis, e Pereyra mieze punte daûr di Thauvin. I ecuilibris tatics a son avonde clâr: l’Inter al cjape sùù il control de partide e al ten plui la bale, l’Udin si difint e al ten bot e cussì i ospits a rivin a rindisi pericolôs des bandis di Okoye dome dopo passe vincj minûts di zûc cuntune conclusion di Çalhanoglu, che e ven parade vie in corner de bande dal puartîr de scuadre furlane.

Il duel tra Çalhanoglu e Okoye si torne a ripeti dîs minûts plui tart: iniziative di Mkhitaryan dilunc de corsie di çampe, bale a Lautaro inte aree blancje e nere e passaç indaûr a vantaç dal zuiadôr todesc di divignince turche che al rive di corse e al tire une bombe dal limit, ma al cjate su la sô strade il numar cuarante dal Udin. Cundut de pression dai ospits, prime de polse al rive il gol de scuadre furlane: zuiade in orizontâl di Kamara par Pereyra e di dal Tucu par Samardzic, bale tai pîts di Lazar che al disegne un tîr cross a fîl di prât che in diagonâl al tresse la aree interiste, al ven tocjât di Carlos Augusto, al ipnotize ducj cuancj e al finìs la sô corse tal cjantonut in bande dal secont pâl. L’Inter al rispuint daurman cuntune azion in velocitât che e ven sierade di un cross di Dimarco, di un tîr cul cjâf di Lautaro e di un intervent strepitôs di Okoye e cussì il prin timp al finìs cul Udines in vantaç.

La seconde frazion e tache cui ospits al atac. Carlos Augusto al cjate il gol dopo trê minûts, ma Piccinini no lu fâs bon parcè che, cemût che al conferme ancje il Var, al è in fûr zûc. L’Inter al segne l’un a un cualchi minût plui indenant: azion corâl dai ospits, assist in verticâl di Dimarco par Thuram, intervent di Okoye in jessude, contat tra il puartîr e l’atacant, Piccinini al sivile il rigôr, e Çalhanoglu (ancjemò lui…) al tire dal discut e al firme il mudament dal risultât.
La pression ofensive dai ospits e sbat intor des bariduris tiradis sùù dai blancs e neris, che si rinfuartissin indaûr cui cambis ordenâts di Cioffi – fûr Ehizibue e Samardzic e dentri Lovric e Joao Ferreira – e cuntune azion di cuintripît di Kamara si svicinin fintremai a un gnûf vantaç; cross tal mieç par Thauvin e anticip decisîf di Mkhitaryan.

Il timp al passe, ma l’Inter nol somee in stât di tornâ in vantaç e al rive a produsi dome un pâr di ocasions che no crein masse fastidis par Okoye. La partide e somee indreçade in direzion de spaertizion di ponts e di goi, ma juste tal ultim, dopo cinc minûts dai siet che a son proviodûts pal recupar, i ospits a segnin. Arnautović al tocje la bale cul tac in direzion di Lautaro, che al tire cun fuarce e cun precision, Okoye al tocje la bale, che e sbat intor dal pâl, e Frattesi al è il plui svelt di ducj, al met la çate e le bute tal sac.
I ospits a rivin cuote 82, intant che l’Udin al reste cun 28 ponts, a dôs lungjecis de zone retrocession.

3 di Avrîl, Fieste de Patrie dal Friûl. Fieste di dutis e di ducj. Di memoreâ cun snait e cun sintiment. In vuaite cuintri di nostalgjiis e di mistificazions

Chê di vuê e je une zornade impuartante pal Friûl, pe sô storie e ancjemò di plui pal so presint e pal so avignî.

Pe storie, chel dai 3 di Avrîl al è l’inovâl dal conferiment al patriarcje di Aquilee, Siart, de bande dal imperadôr Indrì IV, dal titul di “Comes Fori Julii. Dux et Marchio” e duncje dal podê “temporâl” suntun teritori che dilunc vie di passe trê secui al varà une gjeometrie variabile ma che al varà il so centri simpri tal Friûl. Anzit, si pues dî che il Friûl, intindût tant che comunitât teritoriâl unitarie, tant che “Patrie”, cemût che al vignarà clamât par tancj secui, al sedi stât definît ad in plen inte sô fisionomie propit in graciis di chê situazion politiche e istituzionâl.

Propit par chest chê dai 3 di Avrîl e je une ricorence che e permet di resonâ soredut in cont de atualitât e dal avignî. Il Patriarcjât di Aquilee al deventave, inte suaze dal Imperi, un stât par so cont, che al mantignive e al disvilupave relazions cui diviers teritoris e soredut cun chei a nord, a est e a sud est.

La “Fieste de Patrie”, che di uns pôcs di agns e gjolt fintremai di un ricognossiment uficiâl de bande de Regjon aministrative dal Stât talian che e ten dongje la plui part dal Friûle la zone di Triest, no je – e no à di jessi – ni une ocasion nostalgjie ni un moment di… mitologjie. Ni pal “Friûl in Friûl”, ni pal Friûl che al è pal Mont.

Si pues vê ancje une cierte braùre dal fat che propit chel dal stât patriarcjâl al è un dai Parlaments plui antîcs de Europe. Cundut achel, ce che al è plui interessant al è cognossi e ricognossi lis lidrîs de specificitât, de unitât e de unitarietât teritoriâl dal Friûl dutun cun chês de sô specifiche pluralitât linguistiche e culturâl e in cheste suaze de specificitât e de unitarietât de lenghe furlane, massime cul intidiment di cjapâ cussience che chês a son lis fondis no dome par jessi se stes ma ancje par jessi in relazions positivis cun ducj chei altris.

Dut chest al è ce che esercits, podês e ideologjiis a àn cirût di dineâ, di scombati e di scancelâ, soredut di un secul e mieç incà. Dut chest al è ce che al forme, in maniere dinamiche, particolâr ma no esclusive, la identitât furlane: chê vere, chê libare, chê che si cognòs, chê che si fâs cognossi e ricognossi e chê che e ricognòs.

Dut chest al è ce che il Friûl al à o almancul ce che al pues vê ancjemò.
Soredut al è ce che i covente par jessi Friûl e jessi cussì part de Europe e dal Mont.
Par doprâ dôs peraulis che nus plasin: «lidrîs» e soredut «butui».

Par cui che al vîf in Friûl e pai furlans pal Mont l’inovâl dai 3 di Avrîl al è la ocasion par fâ fieste par une Patrie che no à etichetis: che no a voie di jessi ni “frontiere”, ni “colonie,  ni “confin”.
E duncje che no je ni “piçule” ni “extralarge”.

Un inovâl e une Fieste di memoreâ cun snait e cun sintiment, cun cognossince e cun cussience.
Cui voi vierts e stant in vuaite cuintri cualsisedi tentatîf di presumude nostalgjie e di esplicite mistificazion.

Buine Fieste de Patrie dal Friûl a dutis e a ducj, al Friûl in Friûl e al Friûl che al è pal Mont.