Inadaptats + Rafael Subirachs + Malasorti + Shega + Pont Aeri + Apocalyptica = Babêl Europe 19/2021

Vuê a undis a buinore, doman a une dopo di misdì e sabide a une e mieze tal palinsest di Radio Onde Furlane al cjate spazi un gnûf apontament cun Babêl Europe, il program cuindisinâl dedicât a lenghis, musichis, minorancis e nazions cence stât.
Chê che e je la pontade numar 19 dal 2021 e vignarà dedicade ae atualitât, no dome cun riferiment a gnovis produzions e progjets in divignî ma ben ancje cun riferiment ae cronache e al contest politic e sociâl.

In cheste ocasion il percors babelic si disviluparà jenfri Sardegne, Arberie, Catalogne e Finlandie. Di une bande si scoltarà une cerce dal repertori dal progjet Malasorti e alc dai Shega, formazion di Hora/Piana degli Albanesi, in Sicilie, che e cjape sù la ereditât dal grup dai The Daggs, in ativitât cualchi an indaûr, e e à metût adun la sô prime produzion juste tai ultins mês. Di chê altre la atenzion e vignarà pontade su la Diada Nacional de Catalunya, la fieste nazionâl catalane memoreade sabide stade, ai 11 di Setembar, scoltant lis versions dal imni catalan fatis di Rafael Subirachs, di Pont Aeri e de band finlandese Apocalyptica e recuperant un “classic” dai Inadaptats.

This image has an empty alt attribute; its file name is malasorti_sardicity.jpg


Dopo des trê emissions sui 90 Mhz te plui part dal Friûl, sui 90.2 Mhz in Cjargne e in dut il mont in rêt li des direzions www.radioondefurlane.eu e ondefurlane.eu/player.html, ancje cheste pontade di Babêl Europe si podarà tornâ a scoltâle su Spreaker, su Spotify e su Deezer.

This image has an empty alt attribute; its file name is logo_rof.png

Pordenone – Parma 0-4

This image has an empty alt attribute; its file name is pordenone-calcio.png

Il Pordenon al à cambiât alenadôr, ma magari cussì no, almancul pal moment, la cure Rastelli no puarte nissun zovament. I sborfs a pierdin ancje la tierce partide di campionât e a restin in code cun zero ponts, nissun gol fat e dîs goi cjapâts.

A Lignan no je partide. Il Parma al cjape il control dal incuintri za in principi, sburtât di Mihaila. I neris e verts a rispuindin cun Magnino, che al prove a disfrutâ une spuinde di Tsadjout, ma al ven anticipât di Schiattarella.
Passât il prin cuart di ore di zûc, cul Parma che al mostre di vê une marcje in plui, i parons di cjase a somein in stât di tignî bot e di rispuindi ai aversaris.

Chê dal ecuilibri e je dome che une ilusion, stant che al rive in curt il prin gol dai emilians, che a passin in vantaç cun Vazquez, cuntun tîr precîs cul cjâf sui disvilups di un corner.
I sborfs a provin a reagjî daurman cuntune conclusion di fûr di Falasco, che però e ven parade indaûr di Bufon e slontanade di Danilo. I ospits, sghindât il pericul, a tornin al atac e a segnin cun Juric, chr al impire Perisan zovantsi di un assist di Cobbaut.

Sierât il prin timp sul doi a zero pai ospits, i neris e verts a screin la seconde frazion cuntune altre ande. Rastelli tai camarins al à di vê fat sunâ la svearine e i sborfs a masanin zûc e a provin a ridusi il vantaç massime cun tîrs di fûr, però il timp al passe e il risultât nol cambie.

Il Parma al ten bot e al rispuint, confermant lis sôs cualitâts. Prime Brunetta al cjape la travierse, plui tart al segne Inglese, jentrât tal puest di Mihaila, che al disfrute un assist di Juric, e dîs minûts prime de fin Man al firme il poker.
Il passîf pal Pordenon al podarès jessi ancjemò plui pesant se nol fos Perisan, che al met blecs ca e là e al fâs un miracul suntune conclusion di Delprato.

Spezia – Udinese 0-1

This image has an empty alt attribute; its file name is bandieris-friuul.jpg

Tierce partide di campionât, seconde vitorie, tierç risultât positîf, siet ponts in graduatorie e cuinte posizion in classifiche. L’Udin al va dilunc a zuiâ, a scombati, a segnâ, a difindisi, a fâ rindi zûc, cualitâts individuâls, spirt di scuadre e ancje un tic di fortune. Dopo de pate cu la Juventus inte prime zornade e de vitoria taronde vuadagnade cun snait a VIgnesie, la scuadre di balon furlane e rive a vinci ancje in cjase dal Spezia.

L’Udin si presente sul prât dal “Alberto Picco” cul so “classic” 3-5-2: Silvestri in puarte; Becao, Nuytinck e Samir in difese; Molina, Arslan, Walace, Pereyra e Stryger Larsen in mediane, e Pussetto e Deulofeu in atac. Cuintri dal 4-3-3 dai parons di cjase la formazion di Gotti e scomence cul pît just, cjapant sù la iniziative, vuadagnant corners e svicinantsi ae puarte di Zoet in maniere avonde pericolose.

Ancje il Spezia si fâs viodi daurman des bandis di Silvestri cuntun tîr di Antiste che al va fûr di pôc, Dopo undis minûts di zûcs, Pussetto al cole inte aree aversarie suntune jessude sui siei pîts di Zoet, dopo che al veve gafât une bale passade indaûr di Ferre. Guida al sivile il rigôr, ma dopo consultât il Var al cambie idee: nuie penalty e cartelin zâl pal atacant argjentin par simulazion.

Il ritmi al cres, massime par merit dal Udin, e cun chel al salte fûr ancje un ciert gnervosisim di dutis dôs lis bandis. Guida nol sparagne i cartelins, l’Udin al sburte, cirint Pussetto e Deulofeu in profonditât, ma lis sôs zuiadis no son simpri cussì ordenadis e precisis, e il Spezia inte ultime part dal prin timp al torne indenant cun Gyasi, intant che la scuadre furlane e siere il prin timp cuntune biele conclusion di Pussetto, parade vie di Zoet, e cuntun tentatîf di Deulofeu.

Intai minûts di recupar prime de polse ancje i parons di cjase a tornin a provâ a tirâ in puarte cun Sala, ma cence sucès. Dopo un prin timp a ritmis avonde alts, la seonde frazion e tache cuntune ande plui cuiete. Cundut achel l’Udin al prove a sburtâ cun Deulofeu, cun Molina e cun Pereyra, ancje se nol rive a impirâ Zoet.

Gotti e Thiago Silva, cul passâ dal timp, a scomencin a fâ cualchi sostituzion, ognidun cul intindiment di dâ energjiis gnovis ae sô scuadre. Tal Udin Makengo e Beto a cjapin il puest di Walace e di Pussetto, tal Spezia a jentrin Agidelo e Verde e a vegnin clamâts fûr Kovalenko e Colley.
Inte fase mezane dal secont timp a cressin i parons di cjase che i dan di lavorâ a Silvestri cun Agudelo e Verde e cuant che nol rive il puartîr al è Nuytinck che al tire jù la persiane. Cul savê di dopo chei intervents a saran determinants.

Decisive ancje la sielte di Gotti di mandâ in cjamp Samardžić tal puest di Deulofeu, cundut de buine prestazion dal catalan.
Al sarà propit il zovin atacant todesc di divignince serbe a cjatâ juste tal ultin la bale buine par schiribiçâ Antiste e Hristov e tirâ in puarte a bersai. Prime dal gol di Samardžić, che al met la sô firme in chê che e sarà la vitorie finâl, l’Udin al à une buine ocasion cuntune combinazion tra Beto e Makengo ma la conclusion no je precise. Segnât il gol, la scuadre furlane si difint cun sintiment e i ultins tentatîfs dai parons di cjase no rivin a cambiâ il risultât.

Negu Gorriak + Lin Ton Taun + Anestesia + Anari ta Petti + Selektah Kolektiboa = Babêl Europe 18/2021

Inte programazion di Radio Onde Furlane di cheste setemane, che e segne il passaç dal mês di Avost a chel di Setembar, al torne Babêl Europe, il program cuindisinâl dedicât a lenghis, musichis, minorancis e nazions cence stât.

La pontade numar 18 dal 2021 de trasmission, in direte vuê ai 31 di Avost (h. 11) e po in repliche doman al 1n di Setembar (h. 13) e sabide ai 4 (h. 13.30) e sarà dedicade ad in plen ae storiche etichete discografiche basche Esan Ozenki. L’intidiment al è chel di memoreâ la sô ativitât, impuartantone e preseose, e par chel si scoltarà une cerce dal repertori di cualchidun dai artiscj presints tal so catalic: dai “fondadôrs” Negu Gorriak ai Lin Ton Taun, passant pai Selektah Kolektiboa, pai Anestesia e pe colaborazion tra Anari e Petti.

Si fevelarà ancje di atualitât, tra premis, festivals e concierts”, in spiete de gnove rivade in Friûl di Manu Chao e de gnove fase di chê che e ven clamade la “involuzion” (o ben “derive”) da La Notte della Taranta, rapresentade ad in plen dal conciert di Melpignano dai 28 di Avost stâts che al è deventât un event pop pe television (al vignarà trasmetût cheste sabide su Rai 1).

Dopo des trê emissions sui 90 Mhz te plui part dal Friûl, sui 90.2 Mhz in Cjargne e in dut il mont in rêt li des direzions www.radioondefurlane.eu e ondefurlane.eu/player.html, ancje cheste pontade di Babêl Europe si podarà tornâ a scoltâle su Spreaker, su Spotify e su Deezer.

This image has an empty alt attribute; its file name is logo_rof.png

Spal – Pordenone 5-0

This image has an empty alt attribute; its file name is pordenone-calcio.png

La seconde di campionât dal Pordenon e va ancjemò piês de prime. La Spal i da cinc patafons ae scuadre dal Friûl ocidentâl, che cussì si cjate tal ultin puest in graduatore cu la diference rêts piês.

I neris e verts a patissin fin dal principi la fuarce e il dinamisim dai parons di cjase. Cun di plui, dopo i prins cuindis minûts di zûc, dominâts de scuadre di Pep Clotet, il Pordenon al reste in dîs par vie de espulsion di Camporese che al cjape il cartelin ros par zûc pericolôs.

La partide, che e je za scuilibrade a pro de Spal, e cjape une direzion definitive. La formazion emiliane e cjate il gol cuasi daurman cun Mancosu che al tire di fûr de aree e al impire Perisan, zovantsi ancje di une deviazion di Petriccione.

La Spal e je parone dal cjamp e e va di lunc a imbastî azions di atac, il Pordenon al cîr di tignî bot, ma tal ultin cuart di ore dal prin timp prime al rive un grant tîr di Colombo che si ficje sot de travierse daûr di Perisan e po tal recupar Capradossi al segne il tierç gol.

Inte seconde frazion la musiche e je sù par jù compagne. Il Pordenon nol rive a reagjî e la Spal e manten il control de partide, cjatant la cuarte rêt cun Viviani e po il cuint gol cun Latte Lath.

Udinese – Venezia 3-0

This image has an empty alt attribute; its file name is bandieris-friuul.jpg

Seconde partide di campionât e prime vitorie. Dopo de pate cu la Juventus di domenie stade, l’Udin cuintri dal Vignesie al segne trê goi e al puarte a cjase trê ponts. La scuadre blancje e nere e zuie une buine partide, e palese ecuilibri, concretece e fuarce, e scombat e e ten bot denant di aversaris che a mostrin di vê un bon potenziâl ma a patissin la esperienze e la organizazion miôr dsi parons di cjase.

Luca Gotti al mande in cjamp une formazion sù par jù compagne di chê de prime partide: il modul al è ancjemò il 3-5-1-1 e la uniche variazion e je la presince di Stryger Larsen dal principi tal puest che cuintri de Juve al jere stât chel di Udogie, su la corsie di çampe. Pal rest, inte linie mediane, dongje dal danês, a son Walace, Arslan, Makengo e Molina, cursôr a man drete, in puarte al è Silvestri, in difese a son Becao su la diestre, Nuytinck tal mieç e Samir su la çampe, in atac Pussetto al è la uniche ponte, intant che Pereyra al à libertât di moviment daûr di lui e denant dai centricjampiscj. Il Vignesie al rispuint cul 4-3-3 che al viôt Lezzerini tra i pâi, Mazzocchi, Caldara, Svovoda e Ceccaroni in difese, Busio, Črnigoj e Heymans tal mieç e Okereke, Henry e Johnsen in atac.

L’Udin al partìs cul pît just e al imbastìs daurman une buine azion cun Arslan e Pussetto. Al rispuint par ordin ancje il Vignesie prime cun Johnsen, servît ben di Henry, che al tire in puarte ma al cjate Silvestri che al pare vie la bale cuntune biele jessude, e po cun Mazzocchi che al tire ma nol cjate il spieli de puarte. Plui indenant al à il so bon ce fâ ancje Lezzerini prime sierant su Stryger Larsen e po cuntune deviazion decisive suntun diagonâl di Arslan.

La partide e va dilunc cuntun ritmi alt, cuntune cualitât plui che discrete e cun diviersis emozions. Tal secont cuart di ore di zûc i ospits a incressin la lôr pression ma juste prime dal passaç tal tierç cuart di ore al rive il gol dal Udin. La azion e ven inviade di Walace che al vierç par Molina, che al cor indennat e al fâs un cross par Pussetto che al controle la bale e le tire dentri cun precision. Disblocât il risultât, l’Udin al prove a dopleâ daurman cun Makengo e plui indenant cun Pereyra, cun Samir e cun Arslan, intant che di chê altre bande dal cjamp Caldara al impegne Silvestri.

Sierât il prin timp sul un a zero, l’Udin prime si difint cun Silvestri suntun tîr di Okereke e po al segne cun Pussetto, che al interven su la ribatude di Lezzerini dopo di un grant tîr di Makengo, ma Marinelli al sivile la posizion di fûr zûc dal atacant blanc e neri. Dopo un cuart di ore de polse, Gotti al clame fûr Makengo e al rinfuartìs l’atac cun Deulofeu. La sielte e je chê juste, stant che, dopo di un tentatîf fûr bersai di Henry, l’atacant catalan al firme il gol dal doi a zero: al è lui che i robe la bale a Busio e le zire a Pussetto che al tire in puarte, Lezzerini le pare fûr e lui le recupare e le bute dentri.

Sot di doi goi, Zanetti al prove a cambiâ alc te so scuadre, prime clamant fûr Črnigoj e Johnsen e mandant dentri Vacca e Sigurdsson e po cu lis sostituzions di Svoboda par Schnegg e di Henry per Forte. Ancje Gotti al mude la sô formazion: fûr Pussetto e Arslan e dentri Okaka e Jajalo.
Deulofeu si fâs ancjemò viodi cuntune biele conclusion, ma Lezzerini al intervent cuntune biele parade. I tecnics a cambiin ancjemò, in cjamp si scombat e juste ae fin, tai minûts di recupar, l’Udin al segne il so tierç gol cun Molina, che il so çampin fuart e precîs al sbat cuintri de travierse e al finìs tal sac.

Udinese – Juventus 2-2

Doi goi e un pont par om tra Udin e Juventus. La prime partide di campionât i da une cierte sodisfazion ae scuadre furlane che e fâ un bon risultât e al zuie une partide discrete, massime vie pal secont timp. Se vie pe prime frazion la formazion di Gotti e lasse masse spazi ai ospits, che a profitin de situazion e a rivin a segnâ doi goi, dopo de polse i blancs e neris a mostrin di vê plui cûr e plui sintiment e cun chestis carateristichis e a rivin a dreçâ la partide, zovants ancje dai erôrs dai juventins.

L’Udin al scomence la partide cun Pussetto in atac, cun Pereyra daûr di lui cun libertât di moviment e cul dovê di tignî i contats tra la prime linie e la mediane formade di Walace cun Arslan e Makengo e cun Molina e Udogie tes corsiis esternis, intant che in difese a son Becao, Nuytinck e Samir e Silvestri al è tra i pâi. Allegri al sielç di lassâ in bancjine Ronaldo e al ponte su Szczesny in puarte, su Danilo, Di Ligt, Bonucci e Alex Sandri in difese, su Cuadrado, Bentancur, Ramsey e Bernardeschi tal centricjamp e su Morata e Dybala in atac.

La partence e je dai ospits, che a cjatin la vie dal gol dopo trê minûts cun Dybala, che al siere inte maniere miôr une azion imbastide di Cuadrado e Bentancur. La Juve e à un pas plui decîs di chel dal Udin, che al somee un tic imberdeât e lent indaûr e masse pôc incisîf indenant, ancje se al rive a fâsi viodi des bandis di Szczesny cun Molina e cun Arslan. Juste ator de metât dal prin timp i gobons a segnin il secont gol: verticalizazion di Dybala e control e tîr precîs di Quadrado che al impire Silvestri dopo vê schiribiçât Nuyntick. Prime de polse la scuadre di Allegri e je ancjemò avonde pericolose cun Bentancur e cun Morata, intant che di chê altre bande dal cjamp si viôt dome une punizion di Molina.

La seconde frazion si vierç cuntune musiche diferente. L’Udin, sburtât di Pereyra, al frache il pedâl dal aceleradôr e dopo cinc minûts une combinazion tra Arslan e l’argjentin si siere cul tîr dal todesc di divignince turche che al ven parât vie di Szczesny, la bale e torne tai pîts dal centrocampist blanc e neri che al ven butât jù dal puartîr juventin, Pezzuto al sivile e Pereyra al segne dal discut.

La scuadre furlane e torne a vierzi la partide. La Juve e rispuint daurman e si svicine al tierç gol cun Morata che cul so tîr cul cjâf al cjape il pâl ae diestre di Silvestri. Gotti al mande in cjamp Larsen etal puest di Udogie e Deulofeu tal puest di Makengo cun chê di vê plui velocitât e plui iniziative in atac, intant che Allegri al clame fûr Morata e Ramsey e al met dentri Ronaldo e Chiellini cul intindiment, in chel istès, di rinfuartî la difese e di incressi lis pussibilitâts di tîr in puarte.
A àn reson ducj i doi i tecnics. Deulofeu al è daurman pericolôs e ancje CR7 si met in mostre cuntune conclusion cul cjâf che e finìs fûr di pôc. Cun di plui Betancur al cjape un altri pâl, intant che Deulofeu al impegne Szczesny intune parade dificoltose cuntun grant diestri dal limit de aree.

L’Udin, sburtât dal atacant catalan e di Pereyra e dai riforniments laterâi di Stryger Larsen e Molina, no mole il vues. Di une bande Allegri al mande in cjamp ancje Chiesa, par fâur pôre ai aversaris, e di chê altre Szczesny al gjestìs inte maniere piês un passaç indaûr, si fâs puartâ vie la bale di Okaka, a pene jentrât tal puest di Pussetto, e Deulofeu al controle e al tire a colp sigûr.
Gafât il doi a doi, l’Udin nol mole e al prove a cirî il vantaç cun Samir e cun Jajalo. La Juve e je un tic in confusion, ma e prove a recuperâ tal ultin, cul batisim dal cjamp di Locatelli e cuntune conclusion di Ronaldo su cross di Chiesa: la bale e passe Silvestri, ma il portughês al è in fûr zûc e il gol nol pues vignî fat bon. Risultât just cussì, tra polemichis in cjase Juve e une cierte sodisfazion de bande dai blancs e neris furlans, che a son clamâts a fâ compagn e ancjemò miôr vinars ai 27 cuintri dal Vignesie, ancjemò tal Stadi Friûl.

Pordenone – Perugia 0-1

This image has an empty alt attribute; its file name is pordenone-calcio.png

La prime di campionât dal Pordenon e je sùù par jùù compagne de prime di Cope Italie. Ancje cuintri dal Perugia la scuadre verde e nere no rive a vinci e la partide di siere cul sucès dai ospits, che a screin inte maniere miôr il gnûf campionât cul gol di Murano e trê ponts tal scansel.

Il prin timp al è marcât de iniziative de scuadre furlane che e prove a fâ la partide. Dopo di un pâr di atacs par bande, il Perugia al à la prime vere ocasion dongje de fin de prime frazion cuntune punizion dal ex neri e vert Burrai.

E je une sorte di anticipazion di ce che al sucedarà juste prime de polse, cuant che sui disvilups di un corner un tîr cul cjâf di Santoro al devente un assist par Murano che al è svelt a tocjâ la bale prime di Perisan e a butâle tal sac.

Vie pal secont timp il Pordenon al prove a dreçâ l’incuintri, cun Cambiaghi e cun Ciciretti e cun Petriccione, che Paci al met dentri propit cul intindiment di dâi un svolt ae partide. Prime Dall’Orco al riscje l’autogol (55′) suntune iniziative di Tsadjout e plui tart Folorunsho al cjape un pâl su punizion.

Il risultât nol cambie e anzit dongje de fin i umbris si svicinin al secont gol cun Bianchimano, che al tire fûr dal spieli. Al è un erôr che nol pese, compagn de espulsion di Kouan. Ancje cuntun om in mancul i ospits a puartin a cjase i trê ponts.
Il Pordenon al à cetant ce fâ par fâ rindi il so potenziâl, ma almancul al à fat alc di miôr che cuintri dal Spezia.

Jansky + X4U + Lou Seriol + Arbe Garbe + Nando Popu + Dr Drer & CRC Posse + Madrac + Perynn = Babêl Europe 17/2021

Inte programazion di Radio Onde Furlane  di cheste setemane e cjate spazi ancje la pontade numar 17 dal 2021 di Babêl Europe, il program cuindisinâl dedicât a lenghis, musichis, minorancis e nazions cence stât.

L’apontament di vuê ai 17 di Avost (h. 11), di doman ai 18 (h. 13) e di sabide ai 21 (h. 13.30) si presente cuntun formât particolâr, “a misure di Astât”, ven a dî chel dal dj set, cuntune selezion di cjançons metudis adun cul intindiment di compagnâ une sorte di fieste di bal “virtuâl”.

Lis danzis babelichis si disviluparan lant daûr dai ritmis e des musichis che a rivin dai Paîs Catalans, dal Friûl, de Ocitanie, de Grecìe Salentine, de Bretagne e de Sardegne.

Pe ocasion Babêl Europe al sarà un mismas di techno, patchanka, rap, jungle, rock, folk e crossover cu la musiche di Jansky, X4U, Lou Seriol, Arbe Garbe, Nando Popu cun Nandu Popu cun Emanuela Gabrieli e Alessia Tondo, Madrac, Perynn cun TekMao e Dr Drer & CRC Posse.

Dopo des trê emissions sui 90 Mhz te plui part dal Friûl, sui 90.2 Mhz in Cjargne e in dut il mont in rêt li des direzions www.radioondefurlane.eu e ondefurlane.eu/player.html, ancje cheste pontade di Babêl Europe si podarà tornâ a scoltâle su Spreaker, su Spotify e su Deezer. Lis danzis babelichis… a laran dilunc.

This image has an empty alt attribute; its file name is ondefurlane.jpg

Cu la Cope Italie si scree la stagjon, l’Udin al vinç ma al piert il Pordenon

bandieris-friuul

Il prin turni di Cope Italie al scree in maniere uficiâl la gnove stagjon agonistiche dal fobal dal Stât talian. Udin e Pordenon a scomencin il lôr percors in maniere diferente: i blancs e neris a vincin 3-1 cul Ascoli, intant che i neris e verts a pierdin cun chel stes risultât cuintri dal Spezia.

Tal cjamp dal Stadi Friûl la formazion vuidade di Luca Gotti e fronte la scuadre marcjesane cun Silvestri in puarte, cun Stryger Larsen, Nuytinck e Samir in difese, cu la linie mediane componude di Molina, Pereyra, Walace, Makengo e Udogie e cun Cristo Gonzalez e Pussetto in atac.
La partence de scuadre di balon furlane e je buine e dopo undis minûts di zûc al rive il gol di Pereyra, che al è svelt a intervignî su la rispueste clopadice di Leali ae conclusion di Pussetto.

Il vantaç parziâl al sburte i blancs e neris a lâ dilunc cu lis iniziativis ofensivis, in particolâr cun Molina, cun Pussetto e cun Udogie, che al cjape il pâl. L’Ascoli al cîr di tignî bot e dopo de prime conclusion di Fabbrini, parade ben di Silvestri, dome ae fin dal prin timp al prove a rispuindi cuntun tîr di Dionisi che al ven fermât dal puartîr.

La seconde frazion si vierç cuntune buine ocasion dal Ascoli, che al tire in puarte cun Bidaoui, e cuntun altri bon intervent di Silvestri, che al siere la puarte cuntun intervent di pît. La rispueste dai parons di cjase di chê altre bande dal cjamp e rive daurman cuntune iniziative di Pussetto e po cuntune combinazion inviade di Makengo, disvilupade di Cristo Gonzalez e sierade di Pereyra che i da la bale buine a Molina che al tire e al segne. Trê minûts plui tart Pereyra al firme il 3-0 e vie pal secont timp Gotti al fâs cualchi cambi e cualchi spostament, intant che l’Ascoli al prove a dreçâ l’incuintri ma al rive a segnâ dome tal ultin cun D’Orazio.

L’Udin al passe il turni e tal mês di Dicembar al zuiarâ cuintri de vincidore dal incuintri tra Crotone e Brescia, ma soredut al zuie une buine partide, là che al mostre cualitât sei tant che coletîf sei in tiermins individuâi.

E je diferente la musiche sunade dal Pordenon a Lignan, là che la scuadre dal Friûl ocidentâl e patìs la organizazion dal zûc dal Spezia, che si pues dî che al siere la partide za ae fin de prime frazion, cui goi di Erlic e di Nikolau. I Sborfs a provin a tornâ a vierzi l’incuintri dopo de polse cun Folorunsho che al segne dal discut, ma ancje i ospits a rivin a vuadagnâ un rigôr e cun Colley dai undis metris a sierin in maniere definitive la cuistion e a vuadagnin il passaç al turni seguitîf.