Cope Italie, l’Udin al va indenant e il Pordenon si ferme

bandieris-friuul

Il tierç turni di Cope Italie, pes scuadris furlanis, al va ben dome pal Udin. Inte partide zuiade nossere la scuadre blancje no à fastidis a bati il Vicenza. I blancs e neris si presentin in cjamp cuntune fisionomie tatiche diferente – il 4-3-3 a puest dal 3-5-2 – e cun cualchi novitât in formazion, tacant di Scuffet in puarte e des trê pontis Pussetto, Nestorovski e Deulofeu.

L’incuintri di Cope Italie al devente la ocasion par fâ cualchi esperiment e par recuperâ cjâf, cûr e pîts ancje pal campionât. L’Udin al passe in vantaç dopo sù par jù vincj minûts cuntun assist di Deulofeu par Nestorovski, che al tire in puarte, Perina le pare fûr ma la bale e finìs des bandis di Forestieri che al segne in tap-in.

Il vantaç al ven dopleât intal secont timp. Passât un cuart di ore de polse al rive il prin gol in blanc e neri intune partide uficiâl di Deulofeu, che al ricêf di Pussetto, al schiribice un aversari e al segne.

This image has an empty alt attribute; its file name is udin_neri.png

Cuatri minûts plui tart al rive ancje il tierç centri blanc e neri, che al puarte la firme di Pussetto, che al zuie inte maniere miôr un biel sugjeriment di De Paul, al scate su la corsie a man drete e al tire in puarte a colp sigûr. Dome tal ultin il Vicenza al rive a segnâ l il gol de bandiere cun Gori.

Îr l’altri e je lade a finîle in maniere diferente pal Pordenon, che cul Monza nol à rivât a dopleâ la prestazion e il risultât dal secont turni cuintri dal Casarano.

A Lignan i neris e verts e i blancs e ros a scombatin par dôs oris cence rivâ a segnâ. La partide e ven decidude dai rigôrs e dai undis metris a son plui brâfs chei dal Monza – tra l’altri in inferioritât numeriche de fin dal prin timp pe espulsion di Colferai – che a vincin 4-1 e a passin il turni.

This image has an empty alt attribute; its file name is pordenone-calcio.png

Vôs de Basse 2020, la culture furlane e la scriture par furlan no àn pôre dai virus

La lenghe furlane, la culture furlane e la scriture par furlan no àn pôre di nussun virus: ni dal Covid-19 e nancje di chei dal prejudizi. Lu conferme la tierce edizion dal concors leterari in lenghe furlane Vôs de Basse, inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal Sportel associât pe lenghe furlane e cul patrocini de Societât Filologjiche Furlane e de Cooperative Informazione Friulana / Radio Onde Furlane.

Sabide ai 24 di Otubar, inte sale conferencis di Vile Dora si son davueltis, in sigurece, lis dôs cerimoniis di premiazion, une intal prin dopomisdì, pai fantats, e chê altre aes 6 e mieze sot sere, pai grancj che a vevin partecipât intes sezions “Poesie” e “Narative” e framieç di une e chê altre al è stât il spetacul di musiche e peraulis “Un lenghe, un doman” cul atôr Michele Polo e il musicist Giorgio Parisi.

Ancje par chest an il concors al à stiçât centancj di lôr a scrivi par furlan.
Inte sezion “Students” a son stâts premiâts Davide Fogolini e Luca Turolo de Scuele secondarie di prin grât “Italo Svevo” di Vildivar, cu la poesie “Il mâr” (tierç premi), Giorgio Pivetta, ancje lui di Vildivar, cun “L’Autun” (secont premi) e Sofia Pinto, di Palme, cul componiment “La mê mame” (prin premi).

La classifiche finâl de sezion “Poesie”, invezit, e viôt Giacomo Vit, cun “Mê mari e il mâr” (tierç
premi), Chiara Savorgnan, cun “Nono” (secont premi) e Stefano Lombardi, cun “Lagrimis” (prin premi), intant che pe “Narative” a son stâts premiâts David Ballaminut, cun “Un storie piçule” (segnalazion), Diego Navarria, cun “La crepe” (tierç premi), Astrid Virili, cun “Fueis” (secont premi) e Gianfranco Pellegrini, cun “Torse Sand Creek” (prin premi e premi dal public)

Vie pe cerimonie di premiazion la ostarie leterarie di Contecurte e à let lis contis vincidoris, biel che lis poesiis a son stadis metudis in musiche di bande di Davide Sciacchitano e Jacopo Casadio dai Luna e un Quarto.

Pe ocasion e je stade presentade ancje la antologjie cui vincidôrs di dutis lis edizions passadis, publicade de Societât Filologjiche Furlane dentri de golaine “Agâr”.

La cerimonie e je stade inmaneade inte suaze de Setemane de Culture Furlane e cu la poie de ARLeF – Agjenzie Regjonâl pe Lenghe Furlane.

Bujumannu + Gwenno + Llwybr Llaethog + The Skarnivals + Jitiizer + Brût & Madone = Babêl Europe 22/2020

Dal dub ae eletroniche, dal reggae al ska punk fintremai al hard core punk e al metal. Al è ce che e ufrìs la gnove pontade di Babêl Europe, il program cuindisinâl di Radio Onde Furlane dedicât ae produzion musicâl intes lenghis minorizadis de Europe, che e siere il mês di Otubar.

L’apontament al è fissât par vuê, martars ai 27 di Otubar, a undis a buinore, doman, miercus ai 28, a une dopo di misdì, e po sabide ai 31, a une e mieze dopo di misdì.

In cheste ocasion il viaç di Babêl Europe a torzeon tra lenghis, musichis, minorancis e nazions cence stât si disviluparà dilunc di un percors che al ten dongje il Gales, la Sardegne, la Galizie, la Frisie e il Friûl.

Si scoltarà la musiche dai Llwybr Llaethog, storiche formazion galese, di bessôi e in compagnie di Gwenno, dal sart Bujumannu, dai galizians The Skarnivals, dai frisons Jitiizer e dai furlans Brût & Madone.

Cun di plui si fevelarà di dirits linguistics e tutele des minorancis a nivel european cui inzornaments in conte des Iniziativis dai Citadins Europeans Minority SafePack e SignItEurope.

Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), ancje cheste pontade di Babêl Europe e sarà a disposizion in rêt, sul Spreaker e sul Spotify de radio libare dai furlans.

This image has an empty alt attribute; its file name is logo_web.png

Fiorentina – Udinese 3-2

This image has an empty alt attribute; its file name is udin_neri.png

Nuie ce fâ. Dopo de bocjade di aiar bon de vitorie cuintri dal Parma, l’Udin al torne a pierdi. Cuintri de Fiorentina la scuadre di balon furlan e paie la determinazion dai aversaris, che a partissin cul pas just e a mantegnin a dilunc la lôr superioritât teritoriâl, massime inte prime frazion.

Pe ocasion Gotti al mande in cjamp Nicolas tra i pâi, Becao, De Maio e Samir in difese, Molina, De Paul, Arslan, Pereyra e Ouwejan in mediane e Lasagna e Okaka in atac, intant che la formazion dai parons di cjase e je marcade de mancjance di Ribery e dal debut di titulâr di Callejon.

L’inviament de partide al è avonde clâr: il scuintri tra dôs scuadris che si presentin tal cjamp cul 3-5-2 al promet zûc, spetacul e emozions e la Fiorentina e mostre di vê alc di plui dai blancs e neris, sei sul plan tatic gjenerâl che cun riferiment ae fuarce ofensive. Inte prime metât dal prin timp la Fiorentina e fâs zûc, e sburte indenant e e cjate spazis su lis corsiis laterâls. L’Udin nol rive a tignî bot e cussì dopo di dîs zîrs di speris dal orloi al rive il gol di Castrovilli che al siere une biele azion corâl disfrutant un passaç di Biraghi cuntunt tîr ben petât tal mieç de aree di rigôr che al impire Nicolas.

La scuadre di Iachini no si ferme, l’Udin al imbastìs une reazion cence masse fuarce e cussì, passade une altre desene di minûts, al è ancjemò protagonist Castrovilli, che al pinele un biel cross par Milenkovic, che al cjate il tîr di cjâf precîs e al segne.
Sot di doi goi, finalmentri l’Udin si dismôf, sburtade di De Paul e di Lasagna. In particolâr KL15 al à une buine ocasion: al scate indenant, al bruse Caceres e al jentre inte aree florentine, ma il so tîr sul prin pâl al ven fermât di Dragowski che al cuvierç benon il spieli de puarte.
La scuadre di balon furlane e cjate finalmentri il gol prime de polse cuntun colp cul cjâf di Okaka che al profite inte maniere miôr di un cross deliziôs di De Paul.

La seconde frazion si vierç ancjemò cui parons di cjase in evidence. Dopo di un tîr cul cjâf cence sucès di De Maio al rive il tierç gol de Fiorentina e lu segne ancjemò Castrovilli, cence dubi il miôr zuiadôr de partide, che al à il timp di jentrâ in aree, di diliberâsi di un aversari e di tirâ in puarte cun fuarce e soredut cun precision: nuie ce fâ par Nicolas.

L’Udin al torne sot di doi goi. Gotti al cambie Arslan cun Walace e Owejean cun Pussetto e i blancs e neris a alcin la liniei dal lôr zûc. A metin cûr, cjâf e gjambis e i efiets si viodin. Prime e je une punizion di De Paul, che al cjate la deviazion sot puarte di Okaka, che e ven alçade in corner di Dragowski. Po dopo a son il tentatîf fûr bersai di Pereyra e un cross di Pussetto che nol cjate la deviazion di Lasagna.

A vincj minûts de fin al jentre Deulofeu tal puest di Lasagna. L’atacant catalan si met in mostre daurman cuntune conclusion che e oblee il puartîr florentin a fâ une paradone, intant che un tîr cul cjâf di Samir al finìs masse adalt. Gotti al mande in cjamp ancje Forestieri e Bonifazi par Pereyra e Samir e l’Udin al va dilunc a atacâ: prime al è un cros di Deulofeu che però nol cjate nissun terminâl inte aree e po un sugjeriment di Forestieri che al ven butât dentri di Okaka e al è trê a doi.

Tra timp regolâr e recupar a son ancjemò almancul vot minûts: l’Udin al sburte ancjemò, ma al rive a tirâ in puarte dome cun De Paul, che il so tîr nol cjate il spieli de puarte. La Fiorentina e vinç e cussì si tire sùù il morâl e e comede la classifiche, L’Udin al cjape la cuarte sconfite su cinc partidis di campionât e al reste a cuote trê.

Pordenone – Reggina 2-2

This image has an empty alt attribute; its file name is pordenone-calcio.png

Il Pordenon nol rive a vinci ma almancul nol torne a pierdi, cemût che al veve fat cul Cittadella. A Lignan la scuadre di Tesser e à chê di cirî la prime vitorie in campionât, ma almancul pal prin timp a somee mancul in partide de Reggina. Inte seconde frazion la formazion furlane si dismôf e cussì e torne a cjapâ il control de partide, e ribalte il risultât ma ae fin lis dôs scuadris si spartissin i ponts a disposizion. La Reggina impen e à chê di fâ un pas indenant rispiet al derby impatât cuintri il Cosenza.

La partide e scomence cuntun bon ritmi. Il Pordenon al socmence ben, ma cul passâ dai minûts a vegnin fûr i ospits, che dopo ve sghindât un pâr di pericui prontâts di Ciurria e di Zammarini si fasin vîfs des bandis di Peresan cun Bellomo e po a rivin a segnâ cun Liotti. Concuistât il vantaç i calabrês a mantegnin il control de gare, i sborfs a provin a imbastî cualchi azion ma no rivi a spostâ pardabon i ecuilibris in cjamp.

La seconde frazion si vierç cun Butic al puest di Scavone e cul Pordenon che al mude la sô muse tatiche intes primis liniis: Zammarini si sposte a çampe, Ciurria al passe di seconde ponte a trecuartist e Butic al va in atac dongje di Diaw. I neris e verts a frachin il pedâl dal aceleradôr e a rivin a segnâ in mancul di cuatri minûts cun Diaw ce che al jentre inte aree di rigôr aversarie, al salte Loiacono e Cionek e cul diestri al trai daûr di Guarna.

Il gol fat al vierç un senari gnûf pai parons di cjase, che a tegnin alte la linie dal zûc e vincj minûts plui tart a passin in vantaç cun Ciurria che cul pît çamp al tire un balon che Guarna nol pues rivâ a tocjâlu in nissune maniere e al è gol.

La prospetive di cjapâ ducj cuancj i trê ponts e somee ae puartade de scuadre furlane, ma juste ae fin, a pene jentrâts tai minûts di recupar, al rive il doi a doi finâl: tîr di lontan di Folorunsho, deviazion di Bassoli che e tradìs Perisan e bale che e finìs intal sac.

Cittadella – Pordenone 2-0

This image has an empty alt attribute; its file name is pordenone-calcio.png

Par latin si disarès “quartum non datur”. Dopo trê ponts vuadagnâts in trê partidis, il Pordenon al piert cuintri dal Cittadella, che cussì al met inte sachete il tierç sucès in cuatri partidis e si ten strente
la prie posizion in graduatorie.

La prime sconfite de stagjon dal Pordenon e coincît cu la prime partide cence i goi di Davide Diaw, che nol rive a impirâ la sô ex scuadre. I verts e neris a scomencin avonde ben e a son i prins a vê ocasions di gol: cun Musiolik che cul cjâf al tire fûr di pôc suntun cross di Falasco; cun Diaw che al ven fermât di Maniero e ancjemò cun Musiolik, che al rive ancje a butâle dentri su cornet di Calò, ma Volpi al sivile il fûr zûc.

I parons di cjase a cressin cul passâ dal timp e a àn une grande ocasion cun Tavernelli, che passade la prime mieze ore al alce masse la bale su la jessude di Perisan. Il puartîr de formazion furlane al è protagonist di un bon intervent suntune prime conclusion di Gargiulo, ma nol rive a fâ nuie, juste prime de polse, cuant che il stes Gargiulo cul cjâf le zire tal cjantonut là che Perisan nol pues rivâ

La seconde frazion si vierç cul Pordenon in dificoltât e cui parons di cjase che a sburtin par incressi il vantaç. Il Cittadella al jonç l’obietîf in curt cun Tavernelli che al recupare un intervent difensîf di Diaw e al cjate il tîr de zornade. I ospits a provin a fâ alc par dreçâ la partide ma no rivin a combinâ alc e ce, intant che il Cittadella al è plui concret. Sigûr indaûr e decîs in atac, al lenç plui voltis la tierce segnadure e se nol fos par une biel salt di Perisan al cjatarès il tris cuntune punizion di Benedetti.

Udinese – Parma 3-2

bandieris-friuul

L’Udin al zuie, al segne, al scombat e al vinç. Finalmentri, dopo trê partidis pierdudis cence fâ nancje un gol, i blancs e neris che si presentin in blu e zâl a rivin a fâ ponts.
Cuintri dal Parma Gotti al sielç di meti in puarte Nicolas. Denant di lui a son Becao, De Maio e Samir in linie difensive, intant che inte mediane si cjatin Ter Avest, Di Paul, Arslan, Pereyra e Ouwejan e in atac e ven confermade la cubie Lasagna-Okaka. Liverani al scuen disegnâ une formazion di emergjence, che però in cjamp e mostre ecuilibri e caratar.

L’intindiment dal mister e dai zuiadôrs al è clâr fint dal principi: zuiâ, segnâ e tirâsi sù de code de classifiche. La scuadre di balon furlane e partìs cul pas just, si svicine al gol cun Samir che al interve cul cjâf sul secont corner de partide ma al tire un tic masse alt e cuntune buine iniziative di De Paul che i da une bale di aur a Okaka, che però nol rive a tirâ inte maniere miôr e Sepe al pare cence fastidis.

Daûr de regule dal gol mangjât gol cjapât, i parons di cjase dopo cualchi minût si cjatin prime cun Nicolas che al à di fâ un intervent in doi timps par fermâ un bon diestri di Kucka e po cun Hernani che al cjape la bale tal mieç dal cjamp e si svicine ae aree furlane, al tire ben in diagonâl e la sô conclusion, che e à ancje la fortune di cjatâ il pît di Samir, e cjape la traietorie juste par finî juste dongje dal pâl a man drete di Nicolas, là che il puartîr nol rive a cjapâle.

L’Udin al rispuint daurman e al cjate la pate cun Samir, che in cheste ocasion al à la smicje juste e il so gnûf tîr cul cjâf su corner al impire Sepe. Inte ultime part dal prin timp a son un pâr di tentatîfs par bande e in particolâr l’Udin al riscje suntune jessude a vueit di Nicolas cun Kurtic al è tal puest just ma nol rive a tirâ in puarte.

La seconde frazion si vierç cui parons di cjase al atac e cul Parma che al rispuint in cuintripît e al va al tîr, fûr bersai, ancjemò cun Hernani che si zove di un assist perfet di Gervinho. L’Udin al torne in vantaç cualchi minût plui tart cun Pereyra che al robe une bale ai aversaris e al scate in profonditât e il so tîr cross al cjate la deviazion di Iacoponi che al met bale inte puarte di Sepe.

L’incuintri al va dilunc cuntun bon ritmi e cuntune schirie di ocasions e di emozions. Il Parma al prove a dreçâ la partide cuntun tîr – masse alt – di Pezzella, intant che la scuadre di balon furlane no mole il vues e e met adun ancjemò cualchi azion ofensive cun Pereyra, cun De Paul, cun De Maio e cun Pussetto, jentrât tal puest di Lasagna, adun cun Makengo in sostituzion di Arslan.

Il Parma al ten bot e vincj minûts prime de fin al rive a segnâ cun Karamoh, che al jentre tal cûr de aree furlane e al impire Nicolas. Il doi a doi al va benon ae scuadre di Liverani, ma par sigûr nol è avonde pal Udin. Lu conferme Gotti, che al clame fûr Pereyra e Owejean e al met dentri ancje Deulofeu e Forestieri cun chê di zontâ fuarcis frescjis ae manovre ofensive. Cussì, a fuarce di dâi, juste tal ultin, e rive la conclusion a fîl di pâl di Pussetto, che al siere une azion imbastide di De Paul e di Okaka e al met la sô firme sul risultât finâl: la prime vitorie furlane de stagjone.

Pordenone – Spal 3-3

This image has an empty alt attribute; its file name is pordenone-calcio.png

Il Pordenon al zuie la sô prime partide in cjase a Lignan e no si fâs mancjâ nuie: prime al fâs il paron di cjase cuntun dopli vatanç, dopo si fâs rimontâ e fintremai passâ de Spal e juste tal ultin al rive a jonzi la paritât.

Furlans e ferarês a son protagoniscj di une gare siore di emozions e di nivel tecnic e tatic avonde bon. I sborfs a segnin daurman, juste dopo i prins cinc minûts, cuntune iniziative personâl di Diaw. A tornin a segnâ mancul di un cuart di ore plui tart, cuntune biele conclusion cul cjâf di Barison.

La partide e somee inviade intune direzion clare e sigure, ma in realtât nol è cussì. La Spal e prove a cambiâ la sô ande cun Castro, ancje lu in gol cul cjâf. Il doi a doi al rive juste dopo de polse, cun Strefezza che al impire Peresan cuntun tîr bielonon.

Il Pordenon al patìs il colp, al piert ordin e caratar, intant che la Spal e mostre di volê profitâ de situazion e cun Paloschi, che al disfrute inte maniere miôr une azion inviade di une punizion. Il gol cjapât al sune la svearine pe scuadre di Tesser, che e recupare snait, ordin e cjamp. La pression dai verts e neris e cjate sodisfazion dome intai minûts di recupar: inte aree de Spal Murgia al tocje la bale cu la man, Sacchi al sivile il penalty e Diaw al segne dal discut.

Xavi Sarrià + Alexian Group + Tri Bleiz Die + 12 Canti per 12 Lingue + KroaTarantata = Babêl Europe 21/2020

Events, manifestazions, mobilitazions, premis, festivals, gnovis produzions, storie, memorie. A son i contignûts di riferiment de gnove pontade di Babêl Europe, il program cuindisinâl di Radio Onde Furlane dedicât ae produzion musicâl intes lenghis minorizadis de Europe.

Vie pe trasmission, in direte vuê a undis a buinore e po in repliche tal dopo di misdì di doman, a une, e in chel di sabide, a une e mieze, si fevelarà de novesime edizion de Zornade des minorancis linguistichis storichis ocitane, francoprovençâl e francese de ex provincie di Turin, inmaneade ai 3 di Otubar stâts a Ols/Oulx, e des diviersis manifestazions a pro dai dirits linguistics e dal insegnament des lenghis minorizadis intal Stât francês che a son stadis metudis adun sabide stade, ai 10 di Otubar.

Si ricuardarà ancje la consegne, a Casteddu/Cagliari, ai 2 di Otubar, dal premi Emilio Lussu pe cariere al scritôr, musicist, studiôs e ativist de lenghe e de culture des comunitâts Rom, Alexian Santino Spinelli, e la jessude dal cine catalan La Mort de Guillem, che al conte la storie di Guillem Agulló i Salvador, zovin sportîf, militant antifassist e indipendentist, che al jere stât sassinât di un trop di fassiscj ai 11 di Avrîl dal 1993 a Montanejos, tal Paîs Valenzian: une ocasion ancje par tornâ indaûr tal timp ae fin di Avost, cuant che inte suaze de edizion di chest an di Suns Europe, e jere stade fate la presentazion di Guillem, il libri de gjornaliste catalane Núria Cadenes, che al fronte chel stes argoment.

Par chel si scoltarà la cjançon di Xavi Sarrià che e compagne il cine La Mort de Guillem e une cerce dal repertori dal Alexian Group, dai rockers bretons Tri Bielz Die, dai KroaTaranta, espression musicâl de minorance cravuate dal Molîs, e dal spetacul 12 Canti per 12 Lingue.

La gnove pontade di Babêl Europe, dopo dai passaçs di cheste setemane
inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), e sarà a disposizion in rêt, su Spreaker e su Spotify.

Udinese – Roma 0-1

This image has an empty alt attribute; its file name is udin_neri.png

No va ben nancje la tierce partide. Dopo vê pierdût a Verone e in cjase cuintri dal Spezia, l’Udin al piert ancje cu la Rome. I zâi e ros a capitalizin la lôr superioritât tecniche e tal possès de bale e ancje se a stracin plui di cualchi bale gol a rivin a segnâ e a puartâ a cjase i trê ponts. L’Udin al imbastìs zûc ancje cuntune cierte continuitât, ma un pôc al stente dongje de puarte aversarie e un pôc al cjate Mirante simpri tal puest just tal moment just e cussì al paie la sô sterilitât ofensive.

Gotti al met dentri Pereyra dal principi e al recupare Arslan inte linie mediane, intant che Fonseca al conferme i undis che a àn impatât cu la Juve, cun Pelegrini in regjie e Pedro e Mkhitaryan daûr di Dzeko. La partide e scomence cuntun ritmi avonde alt, cui ospits e che a tegnin di plui la bale e l’Udin che al ten bot, ispirât di De Paul e cun Lasagna che al cîr di cjatâ spazi jenfri dai difensôrs aversaris.

Lis primis ocasions a son dai ospits, cun Pellegrini che nol rive a tirâ in puarte in graciis di un intervent di Pereyra e po cuntun lanç in verticâl di Ibanez par Dzeko cul bosgnac che si cjate di bessôl denant di Musso ma al tire fûr. Ancje l’Udin al met adun cualchi buine bale, in particolâr par Lasagna e Ouwejan, ma nissune di chês e ven stramudade intun gol.

La seconde frazion si vierç sù par jù cun chê stesse musiche dal prin timp, ancje se e je une diference che, ae fin e sarà, fondamentâl. Dopo nûf minûts de polse Becao al zuie mâl une bale in orizontâl, Pedro al profite par gafâle e par tirâ in puarte, impirant Musso. La Rome e passe in vantaç e in curt e segne un altri gol, cun Mkhitaryan, che però nol ven fat bon parcè che al è in fûr zûc.

Gotti al cambie Ter Avest e Arslan cun Molina e Forestieri e al sposte De Paul tal mieç, denant de difese, cul intidiment di incressi la cualitât tal mieç dal cjamp e i furniments aes pontis.
La sielte e je chê juste. Mirante al à il so bon ce fâ prime suntun tîr di Lasagna e po sul tap-in di Forestieri. L’Udin al va dilunc a meti dongje ocasions, ma Okaka al strace malamentri une buine bale cuinçade di Molina, intant che Ouwejan i fâs vignî i sgrisui ae Rome cuntune conclusion di fûr.

La cjace al gol de pate, che pal Udin al sarès ancje il prin gol dal campionât, no si ferme, ma Mirante al pare vie dut, ancje il tentatîf di di Molina. A passin i minûts, a jentrin ancje Nestorowski e Coulibaly, pal assalt finâl, ma i blancs e neris no àn plui la fuarce propulsive che e covente e cussì la Rome e ten bot fint ae fin e si puarte a cjase la sô prime vitorie stagjonâl. Intant che l’Udin al reste ancjemò a cuote zero: zero ponts e zero goi fats.