Udinese – Cagliari 2-0

Il 2018 dal Udin si siere inte maniere miôr, no dome cuntune vitorie, doi goi e trê ponts che a son aiar bon pai polmons, pal cûr, pal sintiment e soredut pe classifiche, ma ancje, finalmentri, cuntune partide zuiade dal prin al ultin minût.

La scuadre blancje e nere e scuen frontâ l’incuintri cence De Paul, che fint cumò al è stât il so om plui impuartant, in gjenerâl inte economie dal so zûc e ancje pai siei sîs goi. Cence l’argjentiun, Nicola al met adun une scuadre compate, cu la difese a trê cun Ekong, Opoku e Nuytinck denant di Musso, cu la mediane a cinc cun D’Alessandro, Fofana, Mandragora, Behrami e Stryger-Larsen e cu la cubie di atac formade di Pussetto e Lasagna.

Cuintri di un Cagliari cun plui di di cualchi novitât te formazion, a tacâ di Cerri e di ponte di Pisacane laterâl difensîf, intune posizion che in passât e jere stade ocupade ancje de bande dal furlan Padoin, l’Udin al prove daurman a fâ valê la sô predominance teritoriâl e a palesâ la sô voie – e la sô dibisugne – di vinci.

La scuadre di balon furlane e cîr di rompi l’ecuilibri cul dinamisim di Fofana e Pussetto. La formazion sarde e cîr di tignî bot e pe plui part dal prin timp e rive a fâlu ancje par vie che Fofana nol è cussì precîs tes sôs conclusion. Al è plui pericolôs Stryger-Larsen, che i scjalde i pugns a Cragno, intant che di chê altre bande dal cjamp al è Cerri che i da un pôc di lavôr a Musso cuntune conclusion cul cjâf su assist di Joao Pedro.
Il svolt de partide al rive cuntune azion imbastide di Opoku e Stryger-Larsen a pro di Pussetto che al bat Cragno cuntun biel diagonâl.

La reazion dal Cagliari, dentri dal prin timp, si limite a une triangolazion tra Joao Pedro e Bradaric, sierade dal prin dai doi cuntun tîr fûr bersai. Te seconde frazion al è ancjemò l’Udin a decidi i timps de partide e a cjapâ sù iniziativis ofensivis, che a son pericolosis in maniere direte o indirete, cemût che al sucêt za pôcs minûts dopo de polse cuntun scat di Pussetto che al oblee Ceppitelli a fermâlu in maniere decise e iregolâr, obleant Mariani a parâlu fûr cul cartelin ros.

Cuntun om di plui, pal Udin la partide e devente plui facile. Al rive cussì il gol di Berhami che al sbuse la puarte di Cragno e pai blancs e neris e je ancje la pussibilitât di segnâ il tierç cun Lasagna dal discut, ma il puartîr dal Cagliari no jal permet.

Te ultime part dal incuintri ancje l’Udin al reste in dîs, cu la espulsion di Mandragora. Cundut achel al manten il control de partide e si svicine ancjemò al trê a zero cuntun biel tîr di Fofana che al ven tocjât fûr di Cragno.

Tal 2019 l’Udin al à di lâ indenant cussì, o ancjemò miôr. Augurons di bon finiment e bon principi.

Spal – Udinese 0-0

Si dîs che la pôre e fâs novante. Tal zûc dal balon la pôre di pierdi e fâs saltâ fûr une partide smamide e flape che par solit e finìs in paritât, magari ancje cul risultât di zero a zero. Une conferme di dut chest e je rivade dal incuintri di Ferrara jenfri Spal e Udin, là che lis dôs scuadris a son stadis atentis prin di dut a no riscjâ di cjatâsi sot di un gol e par chel a àn rivât a meti adun pocjis azions ofensivis e ancjemò di mancul ocasions par tirâ in puarte.

L’Udin si à presentât cun cualchi novitât inte formazion: denant di Musso in puarte, la linie difensive e à viodût Opoku, Ekong e Nuytinck, intant che la mediane a cinc e à mostrât De Paul plui indenant cun chê di inventâ e di sapontâ lis dôs pontis, ven a dî Lasagna e Pussetto, Fofana e Mandragora tal mieç e D’Alessandro e Stryger-Larsen tes corsiis laterâls.

La Spal, tant che parone di cjase, e palese un tic di intenzion ofensive in plui, massime te prime part de partide. Chest ategjament nol prodûs robononis, a part un “risultât” di siet corners a pro, cuintri dai trê vuadagnâts de scuadre di balon furlane, ma al merete ricuardât, almancul par dâur sodisfazion ai tifôs emilians.

E rive cussì, dopo un cuart di ore di zûc, la punizion di Petagna che e tocje la part alte de travierse e e scjalde i cûrs dal public di cjase. Dopo une altre iniiative dal atacnt blanc e blù al tache a viodisi ancje l’Udin, massime par merit di De Paul che al oblee Gomis a slungjâsi chel che al covente par parâ vie un so tîr, fat dopo di une iniziative individuâl puartade indenant in solitarie vie par dut il cjamp cu la bale tai pîts.

Tal secont timp la scuadr blancje e nere e mostre plui determinazion, par esempli cuntune conclusion cul cjâf di Ekong che si distude fûr bersai. La Spal, che e scuen pierdi Lazzari che si infortune intun contrast cun D’Alessandro, e torne a fâsi viodi tal ultin cuart di ore di zûc proime cun Schiattarella e po cul ex dal Udin, Felipe. Tal prin câs Al è Musso che al dîs di no intant che intal secont il tîr al è fûr dal spieli de puarte.

Stant che nol è nuie ce fâ ni di une bande e ni di chê altre, lis dôs scuadris a compagnin la partide viers de fin cun chê di no fâsi mâl une cun chê altre, cul intindiment e cu la sperance di tignî energjiis in bande pe ultime partide dal an, sabide ai 29, cuant che i emilians a varan di zuiâ cuintri dal Milan e l’Udin al varà di fâ la partide cuintri dal Cagliari.

Plui lenghis, plui auguris (ancje par chest an)

stelecom

Bon Nadâl e bon an
Vesel Božič in srečno novo leto
Ein frohes Weinachtfest und ein glückliches Neues Jahr
Buon Natale e felice anno nuovo
Bonas pascas de Nadale e prosperu annu nou
Pulit Nadal e bona anada
Bon Tsalendre e Treinadan
Joyeux Noël et bonne année
Zorionak eta Urte Berri On!
Nedeleg laouen na bloavezh mat
Bon Nadal i un Bon Any Nou!
Nadelik looan na looan blethen noweth
Pace è salute
Noflike Krystdagen en in protte Lok en Seine yn it Nije Jier
Nadolig Llawen
Bon Nadel y Bon Ann Nuef
Nollick ghennal as blein vie noa
Bachtalo krecunu Thaj Bachtalo Nevo Bers
Buorrit Juovllat
Nollaig chridheil huibh

leb

Udinese – Frosinone 1-1

Une altre partide marcade di chel che zaromai di masse timp o cognossin tant che efiet Mer…Dacia Arena. Cuintri dal Frosinone l’Udin al fâs une partide flapute, cun pocjis conclusions in puarte, al passe in vantaç vie pal prin timp, ma te seconde frazion si fâ rimontâ dai ospits, in gol in graciis di un rigôr une vore discutibil.
La buine gnove e je chê che i bancs e neris non pierdin e a metin tal cos un pont. Chê brute e tocje la cualitât e la intensitât dal zûc de scuadre di balon furlane e cun chê il risultât finâl che no i permet di slontanâsi de zone plui basse de classifiche dal Campionât di Serie A.

I blancs e neris si presentin tal cjamp dal Stadi Friûl cun chê stesse formazion che domenie stade e veve pierdût cuintri dal Inter, fale che pe presince dal prin minût di Lasagna, tal puest che a Milan al jere stât di Pussetto. Dongje di lui al è De Paul, che al à libertât di moviment e di creazion di zûc, intant che la linie mediane dal 3-5-2 e viôt Behrami tal mieç cun Mandragora ae sô çampe e Fofana ae sô diestre e D’Alessandro e Ter Avest laterâi estrenis, intant che in difese, denant di Musso, a son Stryger Larsen, Ekong e Nuytinck. Il Frosinone, pe prime partide sot de vuide di Baroni, al à metût tal cjamp cuntun scheme gjenerâl che al è sù par jù compagn di chel dal Udin: Ciofani e Ciano in atac, cinc zuiadôrs te seconde linie e difese a trê denant di Sportiello.

Lis dôs scuadris si neurralizin une cun chê altre e par chel a cirin culchi verticalizaion in velocitât, ancje se cence masse risultâts. La prime conclusion dal incuintri e je un tîr cul cjâf di Chisbah, che al ven parât di Musso cence fastidis. La rispueste dai blancs e neris e je une conclusion fûr bersai di Fofana.

A passin i minûts e nol sucêt nuie di speciâl ni di une bande ni di chê altre, fale che par une bale golose pinelade di De Paul par Nuytinck che nol profite cemût che al covent e po par un cross di Larsen che cuntune deviazion di Lasgana i permet a Mandragora di tirâ une biele tonade di prime intenzion che e sbuse la puarte di Sportiello de bande dal prin pâl.

Dopo dal gol dal vantaç l’Udin al prove ancjemò a fâ alc, ma al rive dome a imbastî doi tîrs fûr bersai cun Fofana e De Paul, intant che la reazion dai ospits si palese cuntune biele conclusion di Ciano che al cjape il pâl esterni ae diestre di Musso. Sierât il prin timp sul un a zero, i blancs e neris a provin a confermâ il vantaç cun De Paul e cun Mandragora, che però ur mancjin sei la precision che la fortune.

Baroni al cambie Ciofani cun Pinamonti. La cjarte zuiade dal gnûf alenadôr si dimostre chê juste, stant che i zâi e blus a vuadagnin dinamisim in atac. Al rive cussì un bpn sugjeriment par Ciano, che al cole par tiere te aree di rigôr furlane. L’atacant al denuncie un contat iregolâr di Ekong, l’arbitri Valeri al è convint che al sedi propit cussì, massime dopo vê fevelât cul assistent pal Var, Ghersini, e cundut che al sedi pardabon dificil viodi un fal, al decît di dâur il penalty ai ospits cence nancje cjalâ il monitor. Ciano al tire dal discut e al segne.

La paritât e oblee Nicola a mudâ la struture da blancs e neris: fûr Fofana e dentri Pussetto, che al va a fâ la seconde ponte dongje di Lasagna, intant che De Paul ur stâ daûr cun libertât di moviment e cun licence di assist. La idee e sarès ancje buine, però no prodûs robononis.
Prime de fin dutis dôs lis scuasdris a àn la pussibilitât si tornâ in vantaç – il Frosinone cun Pinamonti e l’Udin cun Lasagna – ma il risultât nol cambie. Insom al è just cussì, cundut dal rigôr fantasime. Però i tifôs dal Udin a domandin di plui, a sivilin e a contestin la societât. E a àn reson.

Inter – Udinese 1-0

L’Inter al cîr di tornâ a vinci in campionât, dopo de eliminazion in Champions League, e l’Udin al cîr di fâ almancul un pont. Dutis dôs lis scuadris a àn – ognidune te sô situazion specifiche – lis lôr buinis intenzions, ma dome la formazion di Spalletti e rive adore a jonzi il so obietîf.

L’Udin al patìs il strapodê dai aversaris e soredut la sô ande masse spaurose e rinunziatarie. Vie pal prin timp, cundut dal dinamisim di De Paul e Fofana, i blancs e neris a combinin avonde pôc in atac: nancje un tîr in puarte. La scuadre furlane si concentre su la difese. Par chel vie pe prime frazion l’Inter al va al tîr cun Keita e Icardi, ma Musso no si scompon.

Dopo de polse i blancs e neris, viodût che l’Inter nol è cussì implacabil, a provin a fâ alc di plui. Prime al è Mandragora che al bute vie une ocasionone: assist di Fofana e tîr fûr bersai. Po dopo al è De Paul che par dôs voltis nol rive a incuadrâ il spieli de puarte, intant che ancje Ter Avest al à une biele ocasion, ma al tire fûr di pôc.

Il moment miôr dal Udin al coincît cun chel piês dal Inter, che però cul passâ dal timp al recupare precision tal ultin passaç e ritmi te impostazion de manovre.
Cun di plui i parons di cjase a àn ancje un tic di fortune. Suntun corner di çampe al somee che Fofana al tocji la bale cul braç. La impression e ven confermade de Var e Abisso al sivile il rigôr che al ven segnât di Icardi.

L’Inter al met tal cos il vantaç ma al scugne sufrî fint insom, tra un gol di Icardi che nol ven fat bon pe sô posizion di fûr zûc e une iniziative di Pussetto che ur fâs cjapâ un spac ai interiscj e ai lôr tifôs.
Cussì, dome cu lis trê siviladis finâls di Abisso i parons di cjase a rivin a vê conferme di puartâ a cjase i trê ponts, intant che l’Udin al piert une altre volte e al reste impantanât tes zonis bassis de gradutorie di Serie A.

Anteprime Balentia + Lou Seriol + Gwenno + Jansky + Rodeo + Suns Europe (the days after…) = Babêl Europe 25/2018

A mancjin pocjis oris ae prime emission de pontade numar 25 dal 2018 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane. L’apontament al è par vuê, martars ai 11 di Dicembar a 11 a buinore in direte, e po in repliche ancje doman, miercus ai 12, a une dopo di misdì e sabide ai 15, ancjemò a une e mieze.

Ancje cheste e sarà une altre trasmission siore di contignûts. In particolâr al sarà spazi par une anteprime preseose, chê di Nieddu l’album gnûf dai rappers sarts Balentia, che ju viôt tornâ dongje dopo cualchi timp e che Babêl Europe al jere stât daûr des gnovis in cont de sô produzion, massime cun riferiment ae iniziative di crowfunding inviade un pâr di mês indaûr. Cumò il disc al è pront e sabide ai 15 al vignarà presentât in maniere uficiâl cuntun conciert a Mogoro, in Sardegne, e almancul une prime cerce si podarà fâle daurman su Radio Onde Furlane.

E sarà ancje la ocasion par scoltâ alc altri di di Occitan, il disc gnûf dai Lou Seriol che al è saltât fûr in Otubar e che al jere stât proponût ancje chel in anteprime nazionâl (furlane) dentri di Babêl Europe. Cui che no lu sa bielzà, al discuvierzarà che ta chel disc al è ancje alc di furlan.

Cun di plui, dopo nancje dîs dîs de sô conclusion, si tornarà a fevelâ de edizion 2018 di Suns Europe, il Festival european des arts in lenghe minorizade inmaneât di Radio Onde Furlane cu la poie di ARLeF, Regjon Friûl-VJFondazion Friuli e cul patrocini dal Consei de Europe e dal NPLD. Si fasarà, in struc, une sorte di belanç de manifestazion, si fevelarà di cine, teatri e leterature e si tornarà a scoltâ il grup che al à vût vinçût il concors de sezion musicâl – la cubie dai Paîs Catalans Janski – e almancul un altri dai nûf protagoniscj dai concierts e de serade che je stade fate li dal teatron di Udin sabide al 1n di Dicembar, ven a dî la rock band basche Rodeo.
E stant che e jere a Udin par Suns Europe ancje jê, tant che inviade de television galese BBC Cymru, dentri di Babêl Europe si scoltarà ancje un toc dal repertori de cjantante e musiciste galese di divignince corniche Gwenno.

Si pues scoltâ Babêl Europe e plui in gjenerâl Radio Onde Furlane sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e cun Spotify.

Udinese – Atalanta 1-3

Stadi Friûl plen e scarsele vueide. La tierce partide dal Udin cu la conduzion tecniche di Davide Nicola si siere cuntun risultât negatîf. I blancs e neris a patissin la fuarce de Atalanta, che dopo vê pierdudis dôs partidis une daûr di chê altre e veve chê di tornâ a vinci, e la precision chirurgjiche di Zapata, che daûr di chê che le clamin la leç dal ex al segne trê goi te puarte di Musso, ma cul sintiment che al à di vê un professionist e cul rispiet che al merete il public furlan nol fâs carnevaladis par pandi la sô sodisfazion pai bersais centrâts.

Il prin gol al rive juste tal imprin de gare, dopo nancje doi minûts di zûc: corner di Gomez, deviazion cul cjâf di Toloi e corezion in puarte dal atacant colombian che al scate, al profite de confusion te aree di rigôr là che la bale e baline cuntune traietorie strambe, le tocje te maniere juste e al segne. L’Udin al patìs il colp ma al reagjìs avonde ben e cuntune formazion disponude sul cjamp intune maniere speculâr cun chê dai aversaris, ven a dî cuntune sorte di 3-4-2-1, cun Lasagna prime ponte e De Paul e D’Alessandro, pe prime volte titolâr a sapontâlu lateralmentri e un tic plui indaûr di lui, al prove a rispuindi e dopo une desene di minûts al gafe la paritât cuntune combinazion Larsen – D’Alessandro – Lasagna cul atacant che al cjate il troi just jenfri Toloi e Palomino e tirâ in puarte cun sucès.

Il prin timp al va indenant slis, cence grancj pericui ni di une bande e nancje di chê altre e cul Udin che al somee in stât di tignî bot denant dai aversaris e fintremai di imbastî cualchi biele azion ofensive. La seconde frazion si vierç sùù par jùù in maniere compagne, ancje se cul passâ dal timp, massime dopo de sostituzion di Rigoni cun Barrow, la Atalanta al vuadagne metris e al incrès la sô convizion e la continuitât de sô manovre.

Intant che al aumente il numar dai zîrs dal motôr dai ospits, al va al mancul chel dai parons di cjase. La scuadre di balon furlane e cjape pôre e e à ancje une buine dose di sfighe cuant che un erorat di Barrow al met in crisi Fofana e al permet a Zapata di cjatâsi une altre volte tes cundizions di segnâ cence masse fastidis. Nicola al prove a cambiâ alc te sô scuadre, che però no rive a fâ alc e ce e cuant che si svicine al gol, cuntune iniziative personâl di Fofana, no je nancje fortunade, stant che il francoivorian al cjape il pâl.

La mancjade concuiste de paritât si stramude cul passâ dal timp intune conferme rinfuarcide de superioritât tecniche e tatiche dai ospits, che a rivin a segnâ un altri gol, ancjemò cun Zapata, che al siere ben une azion inviade di Hateboer. E mancul mâl che il Bologna al à pierdût, parcè che se nol fos stât cussì la situazion de classifiche e sarès ancjemò piês. Sabide ai 15 trasfiertte a Milan cuintri de Inter.

Sassuolo – Udinese 0-0

Un altri pontut metût in bande, cence cjapâ goi e cence nancje segnâju. La seconde partide dal Udin cun Davide Nicola in bancjine e finìs avonde ben. I blancs e neris si presentin a Reggio Emilia cun chê di neutralizâ il Sassuolo, cuntun 3-5-2, che pe plui part dal incuintri si stramude intun 5-3-2 ben taponât e atent. Di chê altre bande i parons di cjase a varessin di sburtâ di plui dai ospits, ma no rivin a fâ alc e ce, par merit de scuadre di balon furlane e ancje parcè che a van dilunc a no jessi masse pôc incisîfs. Cussì, vie pal prin timp nol sucêt cuasi nuie, se si gjavin dôs conclusions dai neris e verts: un tîr di Duncan parât di Musso e une bale metude dentri dal stes atacant ghanês, che però al ven anulât par vie che al è in fûr zûc e la sô posizion iregolâr e e ven regjistrade de bande de Var.

Tal secont timp il zûc al è un tic plui vivarôs, massime in tiermins di confront cu la prime frazion. Il Sassuolo al frache l’aceleratôr e si môf di plui, cun Matri e Babacar, ma nol rive a impegnâ masse il puartîr blanc e neri. Ancje l’Udin al imbastìs cualchi iniziative ofensive, ma al rive a fâsi vîf pardabon des bandis di Consigli dome tai ultins dîs minûts cun Mandragora che si svicine al gol.

Ae fin dutis dôs lis scuadris a fasin un passut indenant in classifiche e in particolâr pal Udin la partide e devente la ocasion par lâ dilunc cul lavôr di ricostruzion de scuadre, che pal moment si contente di jessi plui ordenade daûr e di difindisi miôr. Sperìn che dongje di chest si rii a viodi ancje alc di plui in atac, magari za domenie che e ven, cuant che al Stadi Friûl e rivarà la Atalanta.