Udinese – Torino 1-5

udin_neri

Cinc patafs che a fasin une vore mâl. Inte partide cul Toro, che e veve di jessi chê de sigurece de permanence in serie A – cuntune vitorie o almancul cuntun pont – l’Udin al mostre il piês di se e al zuie in perfet stîl Mer…Dacia Arena, cemût che al disarès cualchidun.

I blancs e neris a àn dome doi moments bogns, sul imprin de partide e te viertidure dal secont timp, intant che pe plui part dal incuintri l’unic colôr vivarôs che si viôt al è chel granât.
Il risultât finâl al è pesanton e just tes sôs dimensions e la situazion e torne a jessi avonde grivie e penze: a chest pont si à di sperâ che la Sampdoria e vinci cuintri dal Palermo, par che nol sedi masse di sgrisulâsi.

La partence e somee avonde buine. Intant che il Stadi Friûl al ricuarde i cuarante agns dal Orcolat e la schene drete dai furlans te ricostruzion, l’Udin al mostre di vê cussience de necessitât di fâ une biele partide. Denant di Karnezis, De Canio al met Heurtaux, Danilo e Felipe, te linie mezane a son Kuzmanovic e Badu, cun Fernandes che al poie lis dôs pontis Thereau e Matos e cun Edenilson e Adnan impegnâts tes corsiis laterâls: no son Wague, Zapata e Widmer e la lôr mancjance – soredut chê dal svuizar – si le sintarà a fuart.

Tai prins minûts i parons di cjase a riscjin alc suntun erôr di Heurtaux e duncje suntune iniziative di Martinez, ma a rivin ancje a meti dongje une buine ocasion cun Edenilson par Matos, che però no le siere cemût che al covente. Al è il principi de fin: l’Udin al cale cul passâ dal timp, in tiermins di zûc e di caratar, e il Toro al cjape ad in plen il control de partide.

I turiniscj a àn il balin in man, ma a àn di metile dentri dôs voltis par rivâ a fâ la prime segnadure: il prin tentatîf lu fâs Bellotti suntun cross di Acquah, cun Fabbri e i siei colaboradôrs che a calcolin la sô tant che une posizion di fûr zûc;  il secont, chel bon, lu firme Jansson, che suntun corner tirât di Gaston Silva al salte plui indalt di ducj e al bat Karnezis.

L’Udin al stente tal meti adun une cualsisedi forme di reazion, intant che il Toro al manten la sô posizion di dominance. Cussì i ospits a rivin a dopleâ il vantaç cu Acquah prime de polse: ancje in chest câs, compagn dal un a zero, dongje dai merits dai zuiadôrs dal Turin a son i demerits di chei blancs e neris, che in difese si indurmidissin un tic masse dispès.

Il secont timp al somee prometi alc di miôr de bande de scuadre furlane. Cun di fat al rive il gol di Felipe e la formazion blancje e nere e mostre di vê plui snait e plui determinazion.
Magari cussì no, e je dome une impression: chel e chê si sfantin in curt e prime che l’Udin al cjati la strade dal doi a doi al è ancjemò il Toro chel che al segne, cun Martinez che al gjestìs te maniere miôr un balon golôs prontât di Acquah, al fâs fûr Felipe e Danilo e al firme il tierç gol de sô scuadre.
No je ancjemò finide: no par vie che i blancs e neris a rivin a dreçâ la partide te sô ultime part, ma parcè che il Turin al jemple il sac daûr di Karnezis ancjemò dôs voltis, prime cun Bellotti in cuintripît e po cun Martinez.

Dal blanc e neri al grîs e dal grîs al neri plui neri.
Mâl e vonde. Nus tocje di sperâ che no sedi ancjemò piês.

PS. O savìn ancje che almancul par cualchidun la partide e à vût alc di bon: il fat che il Toro al vedi vinçût.

Advertisements

Inter – Udinese 3-1

udin_neri

L’Udin al partìs benon, al va in vantaç, ma al ven cjapât dal Inter, che ae fin al vinç cuntun risultât taront. Cundut dal esit finâl, che al premie la cualitât dai parons di cjase e soredut la zornade buine di Jovetic, motôr autentic dal Inter, il belanç de partide nol è cussì negatîf. Ciert che se i blancs e neris a vessin rivât a puartâ a cjase un pontut… al sarès stât miôr.

La scuadre di balon furlane e scomence la partide inte maniere miôr, cun serenitât, cun determinazion e cun ordin. Al rive cussì il gol di Thereau, che dopo nûf minûts di zûc si fâs cjatâ al apontament cuntun biel lanç confezionât di Badu e al tire in puarte: nuie ce fâ par Handanovic.

Il gol al conferme i ecuilibris tal cjamp, l’Udin al rinfuartìs il so ategjament tatic e l’Inter sul imprin al stente a imbastî une vere reazion, fale che cun cualchi scat di Kondogbia, ma cul passâ dal timp la situazion e cambie, cu la scuadre di Mancini che e vuadagne ritmi e cjamp, e fâs zirâ la bale plui svelte e e cjape sùù la iniziative.

L’Udin al patìs la pression aversarie, i interiscj si movin ben in dutis lis zonis dal cjamp e a rivin a segnâ in graciis di une iniziative di Icardi che al manten il control de bale te aree blancje e nere, al scjavace Wague e al servìs Jovetic, autôr dal un a un che si manten fintremai ae fin dal prin timp.

Dopo dal interval la partide e torne a tacâ in maniere dinamiche e ecuilibrade. L’Inter al continue la pression de ultime part dal prin timp, ma l’Udin al rispuint cun Widmer e Bruno Fernandes. Intune ocasion al è decisîf l’intervent di Juan Jesus e ta chê altre la bale e sbat su la travierse, cussì lis iniziativis de scuadre di balon furlane no rivin a mudâ il risultât.

Di chê altre bande dal cjamp al è Karnezis che i dîs di no a Brozovic, intant che la coraçade interiste e torne al atac cuntune determinazion plui fuarte e cul efiet di sierâi  la strade aes manovris dal Udin, che al è constrenzût a sierâsi indaûr cun chê di tignî bot ai sugjeriments di Icardi e ai inseriments dai atacants interiscj.

Karnezis al pare dut, o cuasi:al rive a meti in blec ancje suntun tîr di Perisic, ma nol pues fâ compagn suntune deviazion di Jovetic suntun cros di Biabainy. L’Inter al passe in vantaç e lu manten cun cualchi patiment. Tal cuart minût di recupar Zapata al impegne Handanovic, che al salve la puarte e il risultât. Te azion seguitive al rive il gol di Eder.

Domenie l’Udin al zuiarà cul Turin: al à di mostrâ il bon fat viodi cuintri dal Napoli, de Fiorentina e, almancul in part, ancje dal Inter e al à ancje di cjapâ chi ponts che a coventin  par no vê altris patiments in classifiche. Rivarial?

Usgnot a S. Marc di Merêt di Tombe al è un event di ‘Culture Furlane Fuarte’

cjastrons

Un vinars di fieste là che la protagoniste e je la creativitât par furlan. Si pues definîlu cun chestis peraulis – o ben tant che un event di ‘culture furlane fuarte’ – l’apontament di usgnot, ai 22 di Avrîl, a S. Marc di Merêt di Tombe, inte suaze de Fieste dal Paîs di San Marc.

La ocasion e je la scree uficiâl de Sale de Comunitât, il spazi là che si davuelzaran dutis lis iniziativis de Fieste, che e larà indenant fintremai al Prin di Mai. A tacâ di sîs sot sere, la Pro Loco di S. Marc e Radio Onde Furlane a presentin une lungje serade siore di peraulis, di imagjins, di ideis e di musiche.

Il-famei-Checo-Tam-300x227

E sarà la pussibilitât di discuvierzi alc di gnûf in cont di Friûl Revolution, il progjet audiovisîf dai Cjastrons che al saltarà fûr sui schermis chi di cualchi timp. I trê animadôrs multimediâi, che di cualchi setemane a son tornâts ancje in onde su la radio libare dai furlans, a mostraran une cerce de lôr opare che, tra realtât e finzion, e conte il Friûl rivoluzionari di vuê e di doman.

Cun di plui, al sarà spazi ancje pe leterature e par une altre ecelence creative e agregative furlane: la ostarie leterarie Contecurte e l’incuintri Ce contino a San Marc?. L’ Ostîr, il Berlon, il Famei e altris autôrs e letôrs di contis curtis a prometin di meti dongje une biele selezion di scrituris, leturis e… efiets speciâi: il titul al è ambigui (contino o contìno?), il divertiment al è sigûr.

laiplessness4

Il finâl de serade al sarà cui LaipNessLess, la sfolmenade band de Basse Furlane autore di une misture potente di rock, blues e ironie visionarie. Tes setemanis passadis a àn puartât la lôr musiche e il lôr imagjinari “bestiâl” ator pe Italie, di Milan a Vignesie.
E sarà ancje la ocasion di fâ fieste pe gnove ristampe dal lôr disc di esordi Bestiis Forestis, che al torne a saltâ fûr cuntune grafiche divierse e cun cualchi altre sorprese.

s_marc

Udinese – Fiorentina 2-1

fuarceudinees

Doi goi fats, dôs traviersis, un gol cjapât e trê ponts pesantonons che a puartin aiar bon in classifiche e a svicinin la scuadre al obietîf salvece. L’Udin cuintri de Fiorentina al zuie, al cor, al spude balins e al mostre caratar e personalitât. I blancs e neris a frontin la scuadre di Florence cence sudizion e a fasin chel che cualchidun in curve i domande suntun strisson: «Mangjin chê fiorentine. O sin furlans, migo vegans!».

Cun Danilo, Heurteaux e Wague in difese, cun Widmer e Adnan a sburtâ e a cuvierzi su lis corsiis laterâls, cun Badu, Kuzamanovic e Bruno Fernandes tal mieç e cu la cubie di atac Zapata/Thereau in zornade sì, la scuadre di De Canio e palese di vê cussience de necessitât di fâ cuintri de Fiorentina une partide almancul compagne di chê cuintri dal Napoli. I ospits a mostrin di vê cualitât, ma ancje di jessi un tic masse supierbeôs e cun pocje atenzion in difese e cence ordin de metât dal cjamp insù.

L’Udin al cjate il gol daurman, tal zîr di doi minûts: corner di Bruno Fernandes e conclusion a bersai di Zapata. La Fiorentina e patìs il colp, intant che i blancs e neris a cjapin cussience de lôr supremazie e del disorientament dai aversaris, che ur mancje a fuart la bussule di Borja Valero, che al è stât lassât fûr de bande di Paulo Sousa. Par sùù par jùù vincj minûts si viôt dome l’Udin, stant che i ospits a jessin fûr de eclissi dome cuntune iniziative di Tello, cuntun contrast te aree blancje e nere tra Danilo e Alonso e cuntune dople conclusion di Zarate, che al secont tentatîf al rive a passâ Karnezis.

La paritât parziâl e da un svolt ae partide: lis dôs scuadris si sliungjin e l’incuintri al devente plui vivarôs. L’Udin al sburte cun Zapata e cun Thereau, al ten bot denant dal dinamisim di Zarate e al met dongje un pâr di ocasions par sierâ il prin timp in vantaç, ma sei la conclusion di Badu che chê di Thereau a sbatin cuintri de travierse. Cussì il prin timp si siere sul un a un.

keep-calm-and-fuarce-udin-2

Dopo de polse, l’Udin al torne daurman al atac e intun cuart di ore al see lis gjambis ai aversaris. Bernardeschi al piert la bale tal mieç dal cjamp, Badu le concuiste e le zire a Widmer, che le met tal mieç a pro di Thereau: il francês al è puntuâl tal gjoldi dal sugjeriment, al tire di prime intenzion e al sglonfe la rêt daûr di Tatarusanu.

La Fiorentina e je in zenoglon e Zapata si svicine al tierç gol in almancul dôs ocasions. Paulo Sousa, par dâur une scjassade ai siei, al prove a zuiâ la cjarte Ilicic, che al zonte energjie ma al fâs ancje confusion, intant che l’Udin no si scompon denant des iniziativis dal zuiadôr sloven e di chês di Zarate. I minûts a passin e il risultât nol cambie. Une vitorie meretade, une vitorie che e coventave.

‘I ricordi del fiume’ al rive tai cines, doman la anteprime alì dal Massimo a Turin

fiume

I ricordi del fiume al rive tes salis a tacâ di doman, ai 21 di Avrîl. Il film plui resint dai regjiscj turinês Gianluca e Massimiliano De Serio, che al jere stât presentât cun sucès a Vignesie te edizion dal an passât de Mostre internazionâl de art cinematografiche e che al à cjapât diviers ricognossiments ator, al jentre te programazion di diviers cines dal Stât talian tra cheste setemane e la prossime.

La anteprime uficiâl e je chê che si fâs a Turin alì de sale un dal Cinema Massimo, cu la presince dai doi autôrs.
L’apontament al è a vot e mieze, cemût che al ven sclarît culì.

fiume_deserios

I ricordi del fiume al conte la storie dal Platz, chê baracopoli grandonone che si cjatave a nord di Turin, dongje dal flum Stura.
Il film al conte in particolâr i ultins mês de esistence dal cjamp e duncje al da cont de sô int, cu lis sôs storiis, cui siei problemis, cu lis sôs sperancis. Un documentari fat cun snait, cun umanitât e cence retoriche.

I ricordi del fiume al sarà in programazion alì dal Massimo fintremai ai 27 di Avrîl.
Sù par jù in chei stes dîs si podarà viodilu ancje inaltrò, a tacâ di Rome e di Milan.

Un altri viaç cun Babêl Europe: Resistence, atualitât e memorie, dal Gales ae Catalogne

swnami2

Al è martars e in direte su Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe.

Il program cuindisinâl dedicât a lenghis, musichis, minorancis e nazions cence stât, che al va in onde in direte vuê, martars ai 19 di Avrîl, a undis a buinore e in repliche doman, ai 20, a une dopo di misdì, al presente une mieze ore di musiche e peraulis cun novitâts discografichis, storie, storiis e atualitât.

Si fevele di Resistence e Liberazion, di memorie, di dirits, di imnis nazionâi e plui in gjenerâl di cjançons, cu la musiche dai galês Swnami, dai arbereshe Spasulati Band, di Sinead O’Connor, de innomenade cjantante catalane Marina Rossell  e dai Lou Dalfin.

logo_web_ROF_new

Dopo des dôs emissions in modulazion di frecuence e in internet – là che la radio libare dai furlans si pues scoltâle ancje cuntune aplicazion di pueste – ancje cheste gnove pontade di Babêl Europe si podarà cjatâle e tornâ a scoltâle in rêt.

Te pagjine web dedicade si puedin scoltâ ancje chês altris trasmissions di Babêl Europe, a tacâ di chê di dôs setemanis indaûr, cuant che si veve tacade la esplorazion dal album gnûf dai Lou Dalfin, Musica Endemica, e il viaç babelic al veve cjapât dentri ancje la Sardegne cun Claudia Aru, la Ladinie cun Grenz & Friends e il Paîs Basc, adun cu la Luisiane, cun Fermin Muguruza.

rosell

 

 

Udinese – Chievo 0-0

udin_neri

Nissun gol, doi cartelins ros, un pontut par om, cualchi sgrisul e diviersis sossedadis. L’Udin cul Chievo al prove a vinci, ma nol rive, stant che al mostre di no vê chel minim di morbin che al covente par cjapâ i trê ponts che a domandin la classifiche e il morâl, massime dopo de partide smamide di domenie passade cuintri de Sampdoria.

ll risultât al premie il Chievo, rivât a Udin cun chê di no lâ a cirî fastidis e cuntune struture tatiche e atletiche solide e oneste, e soredut il so puartîr, Bizzarri, che al è stât simpri tal puest just tal moment just, in ocasion des pocjis veris conclusions blancjis e neris.

Il zero a zero al marche un altri viaç la inconsistence struturâl de scuadre di balon furlane, cundut des prestazions buinis di Widmer, di Thereau e di Pasquale, che al torne in cjamp dal prin minût e al zuie in maniere plui che oneste. No fasin compagn Bruno Fernandes, plui che altri gnervôs e confusionari, e Zapata, che la sô mancjance concrete indenant si le viôt une vore, in misure sù par jù compagne de sô fuarce tes zornadis buinis.

Tal prin timp l’Udin al mostre di volê fâ alc di plui dai aversaris e di fâ valê la sô supremazie teritoriâl, però nol rive a fâ alc e ce, par merit dai aversaris – e di Bizzarri in particolâr – e par demerit so. Tal secont timp la situazion e je sù par jù compagne, cuntun pâr di conclusions di Zapata e Bruno Fernandes, cun Bizzarri simpri atent. Viers de fin il zûc al cale 8ancjemò) e il gnervôs al cres, cun Felipe che si fâs butâ fûr a mone vie, stant che propit sot dai voi di Gavillucci i da un pataf a Radovanovic, che al zonte dal so cuntune enfasi teatrâl il colp, e cun Meggiorini che al cjape il cartelin ros parcè che al fâs une jentrade brute su Bruno Fernandes.

La vitorie dal Milan su la Sampdoria e la sconfite dal Palermo a rindin il pont cjapât avonde bon. Cundut achel, i sucès di Carpi e Frosinone a mostrin che la lote pe salvece no je ancjemò finude e che par chel a coventin il snait e il caratar mostrâts cuintri dal Napoli.

De Canio e i siei zuiadôrs a varan di preparâsi par ordin. Alc altri al varès di fâlu ancje la societât, che e podarès fâ compagn dai 3 di Avrîl e tornâ a convocâ, prime de partide cu la Fiorentina, DJ Tubet e magari ancje Dek Ill Ceesa.

I fats a mostrin che se al è plui Stadi Friûl e mancul Dacia Arena, ancje l’Udin al fâs miôr.

Sampdoria – Udinese 2-0

udin_neri
‘Tertium non datur’. Dopo doi risultâts positîfs, la tierce partide cun Di Canio in bancjine si siere cuntune sconfite. A Gjenue cuintri de Sampdoria, intun scuintri fondamentâl pe lote pe salvece, l’Udin al piert: al zuie dome tal prin timp, tal secont al patìs la pression dai parons di cjase e dome tal ultin al prove a fâ alc, ma al è masse pôc e masse tart.

I blancs e neris a àn sù par jù chê stesse fisionomie tatiche de partide cul Napoli, ma la formazion e je diferente: daûr al è Piris al puest di Felipe, te fasse mezane al è Halfredsson al puest di Badu e si torne a viodi ancje Lodi dongje di Kuzmanovic e denant al mancje un dai protagoniscj de vitorie cul Napoli, Bruno Fernandes.
La Sampdoria e à une disposizion tal cjamp sù par jù compagne di chê dal Udin, ma e mostre di vê une marcje in plui – il supuart dal public – e… un Fernandes cuintri di mancul.

Cundut de motorizazion plui potente de Sampdoria, la prime frazion de partide e va indenant in maniere avonde ecuilibrade. Lis dôs scuadris a tegnin bot une cun chê altre e a metin adun cualchi biele ocasion sei des bandis di Karnezis che di chês di Viviano. I prins tîrs in puarte a son dal Udin, cun dôs conclusions cul cjâf di Hertaux e di Zapata che a van fûr bersai di pôc. Di chê altre bande si fasin viodi i ex Quagliarella e Muriel. Soredut il prin al mostre di jessi in grande forme, cuntune acrobazie che e ven blocade di Karnezis, cuntune travierse cjapade cuntun biel tîr di prime intenzion  di vincjecinc metris di distance e cuntun altri tîr, che al finìs fûr de puarte, ator de mieze ore di zûc. Muriel si lu viôt ae fin dal prin timp: suntun cross golôs di Soriano, il colombian al tocje cul cjâf ma le tire masse alte.

Muriel al rive a segnâ, cul jutori involontari di Armero, dome tal minût 12 dal secont timp. Propit Armero, juste sul imprin de seconde frazion al veve fat un golon, che però nol è stât convalidât di Russo par vie di un fal di Thereau su Ranocchia. La Sampdoria, in vantaç, e cjape il svol su lis alis di Quagliarella e Soriano, inta che l’Udin al patìs la pression aversarie, che te ultime part de gare si zove ancje dal contribût di Cassano, metût dentri di Montella al puest di Muriel.

Al rive cussì il doi a zero, segnât di Fernando che al siere une biele iniziative imbastide di Cassano e Quagliarella. Finalmentri l’Udin al à un scat di caratar e di braùre e al prove l’assalt finâl par dreçâ la partide, ma nol rive a cambiâ ni il risultât ni i ecuilibris, stant che la Sampdoria e rispuint in cuintripît e tal ultin Quagliarella al mangje une ocasion di aur.

Si sperave che la tierce partide cu la vuide tecniche di De Canio e les miôr, pal zûc e pa risultât. Alc nol à funzionât tal centricjamp, sei in cuvierzidure che in impostazion. Tal secont timp la scuadre e je someade un tic smamide, ancje se in cundizions miôr di tantis partidis de ete Colantuono.

L’incuintri di Gjenue al podeve lâ miôr, ma al podeve lâ ancje piês, se chei altris risultâts des scuadris che si cjatin in code a fossin stâts diferents. La prossime partide in cjase cul Chievo e sarà determinante, no dome pe trancuilitât in classifiche ma ancje par viodi se  e je stade parade vie pardabon chê maledizion clamade Dacia Arena.

Friûl di contâ e di discuvierzi in mostre a Udin a tacâ dai 8 di Avrîl

etnografic

Inte suaze des celebrazions de Fieste de Patrie dal Friûl, a Udin si vierç un barcon su la mitologjie popolâr furlane, sui siei personaçs e su li sôs storiis. L’apontament al è pai 8 di Avrîl, cuant che a 5 sot sere alì dal Museu Etnografic, in Borc di Greçan, e vignarà screade la mostre Viaç tal Friûl di Magance.

L’alestiment al è stât metût adun, pe cooperative Serling, de bande di Sandri Carrozzo e di Carli Pup pai tescj e di Luigino Peressini pes ilustrazions, e al è un piçul viaç tal mont des creaturis magjichis de tradizion furlane, tant che orcui, aganis, maçarots, salvans, striis e diaui.

La mostre e je fate di doi panei grancj cu la riproduzion di une mape complete dal Friûl e dal so imagjinari fantastic e di vincjecinc cubiis di panei plui piçui cuntun test descritîf e une figure in grant par ogni personaç.

aganis

Se une volte chestis crodincis a jerin contadis dongje dal fûc o in file, vuê e je la ocasion di svicinâsi a cheste realtât cu la scree de mostre.  I siei contignûts a vignaran presentâts de bande di Peressini e di Carrozzo vie pal incuintri dal titul Friûl di contâ e di discuvierzi.

La mostre, che si podarà visitâle tai oraris di vierzidure dal Museu di Palaç Giacomelli, e siere il program di iniziativis Friûl, Patrie di ducj. Udin 2016, che al jere stât batiât ai 2 di Avrîl cul incuintri dal titul Friûl di lei e di pensâ: ‘Ripensare la nazione’,  confront cun plui vôs sul Friûl di îr, di vuê e di doman e che al à cjapât dentri l’event leterari di martars ai 5, Friûl di scrivi, di lei e di contâ: Contecurte, la disfide.

Patrie_di_Ducj001

Al torne Babêl Europe cul gnûf disc dai Lou Dalfin e altris musichis fuartis e babelichis

lou_dalfin_musica_endemica_1

Une mieze ore di novitâts discografichis, storie, storiis e atualitât. Al è ce che e promet a cui che al à voie di scoltâle su Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion http://www.ondefurlane.eu) la gnove pontade di Babêl Europe, il program cuindisinâl dedicât a lenghis, musichis, minorancis e nazions cence stât in onde in direte vuê, martars ai 5 di Avrîl, a undis a buinore e in repliche doman, ai 6, a une dopo di misdì.

A doi dîs de Fieste de Patrie dal Friûl, a nûf dîs dal Aberri Eguna e trê dîs dopo de scree uficiâl dal gnûf disc dai Lou Dalfin, Musica Endemica, si fevelarà di fats e apontaments e si scoltarà musiche fuarte e babeliche des Valadis ocitanis dal Piemont, de Ladinie, de Sardegne e dal Paîs Basc, cuntun salt fintremai a New Orleans.

logo_web_ROF_new

Dopo des dôs emissions in modulazion di frecuence e in internet – là che la radio libare dai furlans si pues scoltâle ancje cuntujne aplicazion di pueste – ancje cheste gnove pontade di Babêl Europe si podarà cjatâle e tornâ a scoltâle in rêt.

Te pagjine web dedicade si puedin scoltâ ancje chês altris trasmissions di Babêl Europe, a tacâ di chê di dôs setemanis indaûr, prime di Pasche e cuntun ricuart dal Éirí Amach na Cásca / Easter Rising: un viaç tra Irlande, Ocitanie, Kurdistan, Paîs Basc, Paîs Catalans, in compagnie di Gráinne Holland, McOnak, Hasan Zirak e Obrint Pas.

babel