Udinese – Milan 2-1

FuarceUdinees

Par latin si disarès «Quartum non datur». Dopo trê partidis pierdudis, l’Udin al veve di cambiâ musiche e risultât e al è rivât adore a fâlu cuintri dal Milan: al à cjapât il diaul pai cuars e al à puartât a cjase trê ponts.

La scuadre di balon furlane si presente cul so classic 4-3-3: denant di Karnezis la linie difensive e viôt Danilo e Felipe tal mieç, Faraoni a man drete e Samir a man çampe; tal mieç dal cjamp a son Hallfredsson; Fofana e Jankto; i trê in atac a son Thereau, Zapata e DePaul. La formazion vuidade di Gigi Delneri e tache cul pît just par ce che al tocje il zûc ofensîf, stant che si fâs viodi daurman des bandis di Donnarumma cuntun assist di Samir par Thereau e cu la conclusion dal atacant di Privas, ma e palese in curt une gnove amnesie in difese, che e puarte al cross di Suso e al gol di Bonaventura.

Il sucès parziâl dai ospits nol see lis gjambis ai blancs e neris, che no molin e a rispuindin al Milan, cul masanâ zûc dilunc des fassis laterâls cun Faraoni, Samir; Fofana e Jankto e cun Hallfredsson in posizion di interdizion e di ispirazion des manovris. A rivin une conclusion flape di Jankto, un cross dal stes Jankto par Faraoni che le tocje cul cjâf masse planc e fûr bersai e po une combinazion tra De Paul e Halfredsson che e ven concludude di Therau: gol e un a un.

L’Udin al frache ancjemòil pedâl dal aceleradôr e a cressin la pression ofensive e il dinamisim di Fofana, Jankto e De Paul, intant che il Milan al cale e si fâs pericolôs dome cuntun cross di Kucka tor de fin dal prin timp.

Tal secont timp al è ancjemò l’Udin che al mostre determinazion e snait, a tacâ di une iniziative di Thereau, che al met adun une biele conclusion par Zapata, che però nol gjestìs la bale inte maniere miôr e al ven fermât cence fastidis de bande di Donnarumma.

I blancs e neris a àn altris ocasions par segnâ: dôs punizions di Halfredsson fûr bersai, un altri tentatîf cence sucès di Zapata e finalmentri un diagonâl di De Paul, che al siere une azion inviade di Jankto e Thereau, che al finìs tal sac daûr di Donnarumma.

I milaniscj si lamentin – e forsit no àn nancje ducj i tuarts – par vie che prime dal gol propit De Paul al veve fat un fal su De Sciglio, sanzionât di Banti cuntun cartelin zâl e no cu la espulsion cemût che a varessin volût i ros e neris e la lôr reazion si limite a une conclusion di Lapadula che e tocje la part esterne dal pâl.

Di chê altre bande l’Udin al mostre di meretâsi il sucès cul tignî il control de partide e cul tornâ a jessi pericolôs des bandis di Donnarumma cun Halfredsson, Thereau e Zapata. Il trê a un nol rive, ma il doi a un al reste e i blancs e neris a vuadagnin trê ponts impuartants pe classifiche ma soredut pal spirt de scuadre, che e à fat la partide la partide juste cuintri dal aversari just.

L’Udin al è tornât a sgarfâ. Mancul mâl…

Al torne Babêl Europe cui 30 agns dai Dixebra e discs gnûfs di Ocitanie e Friûl

Pieter_Bruegel_the_Elder_-_The_Tower_of_Babel_Rotterdam

Si scree vuê il 2017 di Babêl Europe, la trasmission cuindisinâl dedicade ae produzion musicâl tes lenghis minozadis dal continent, che e fâs part de programazion di Radio Onde Furlane.

Dopo de polse obleade di cuindis dîs indaûr, il viaç a torzeon tra grups, soliscj, discs, concierts, lenghis, musichis, storiis, teritoris, minorancis e nazions cence stât al torne a tacâ a 11 a buinore di vuê, martars ai 24 di Zenâr, in direte, e po doman, miercus ai 25, in repliche a une dopo di misdì.

gran-bal-dub

Tal prin apontament dal an gnûf si fevelarà di novitâts discografichis, tant che il gnûf ep Gran Bal Dub di Sergio Berardo e Madaski e l’album Rivoluzion Rosa dai Trabeat, e di grups storics tant che i asturians Dixebra, che ai 6 di Zenâr a àn finût i lôr prins trente agns di ativitât e che a memorearan chest inovâl cuntune schirie di iniziativis vie par dut il 2017.

L’itinerari babelic proponût aes scoltadoris e ai scoltadôrs di Onde Furlane al tocjarà, dongje des Asturiis, dal Friûl e de Ocitanie, ancje la Sardegne e la Galizie, cun Su Maistu Alessio Mura e il grup di Alonso Caxade.

dixebra-1

Babêl Europe si pues scoltâle in modulazion di frecuence (Radio Onde Furlane si cjape sui 90 Mhz te plui part dal Friûl e sui 90.2 Mhz in Cjargne) o ben in rêt, in dut il mont, ae direzion www.ondefurlane.eu. Cun di plui, dopo des dôs emissions di doman e di miercus, la trasmission e sarà a disposizion in rêt.

rof_suns2016

Empoli – Udinese 1-0

udin

Tierce partide dal 2017 e tierce sconfite. L’Udin al va dilunc a sgarfâ masse pôc e par chel al continue a pierdi e salacor – ancjemò piês – a smamîsi. Ancje a Empoli il blanc e neri de scuadre di balon furlane al devente un grîs cence anime, cundut che la formazion toscane no somee un aversari impussibil e che l’Udin al è protagonist di un bon prin timp.

Delneri al met in cjamp une formazion ecuilibrade, cun Karnezis tra i pâi, cu la difese a cuatri formade di Faraoni, Felipe, Danilo e Samir, la linie mediane cun Hallfredsson, Fofana e Jankto e l’atac a trê, a gjeometrie variabile, cun Zapata, De Paul e Thereau. in regjie. L’Empoli al rispuint in maniere sù par jù speculâr e tai prins vincj minûts di zûc dutis dôs lis scuadris a metin adun cualchi azion ofensive e une ocasion par bande, cun Bellusci e Zapata.

La organizazion di zûc dal Udin e somee vê alc di plui e la sô superioritât relative che e tache a saltâ fûr cul passâ dal timp e cjate la sô rapresentazion intune biele conclusion di potence di Jankto suntun cross di De Paul, che e cjate la rispueste ancjetant spetacolâl di Skorupski.

Tal prin timp nol è nuie altri ce ricuardâ, intant che la seconde frazion e tache cun ritmis un plui alts, ancjemò cul Udin che al sburte indenant. L’Empoli al ten bon, cence scomponisi masse, cun ordin e cun atenzion e ancje par vie che i blancs e neris a zuin di plui ma a stentin tal creâ ocasions di gol e nancje la sostituzion di Zapata cun Perica al mude la situazion.

I minûts a passin, la bale e zire tal mieò dal cjamp e no si viodin tîrs in puarte ni di une bande ni di chê altre. La partide e somee indreçade viers di un zero a zero, ma a vot minûts de fin Mchelidze al cjate la bale juste di tocjâ cul cjâf par metile tal sac daûr di Karnezis. Fiestione grande pai empolês e avilizion pai blancs e neris, in cjamp e fûr.

Par fortune che la classifiche e reste trancuile, ancje se si ridusin une vore chês piçulis prospetivis europeanis che a vevin tacât a ingolosî i tifôs blancs e neris prime di Nadâl.
Cundut achel, si torne a sintî un tic masse l’efiet MerDacia Arena.
Sperìn di viodi alc di diferent, la setemane che e ven, li dal Stadi Friûl cuintri dal Milan.

Udinese – Roma 0-1

udin_neri

Seconde partide dal 2017 e seconde sconfite pal Udin. Compagn che cuintri dal Inter la setemane stade, la scuadre di balon furlane e piert cuintri di une altre des scuadris ‘grandis’ dal campionât. Dal confront cu la partide di domenie ai 8 di Zenâr a saltin fûr diviersis diferencis, a tacâ dal fat che cui interiscj l’Udin al veve imponût la sô iniziative sin dal principi de partide, al veve segnât, al jere lât dongje dal secont gol in plui ocasions e al veve calât vie pal secont timp cuant, intant che cu la Rome al è sucedût il contrari, cui ospits che a imponin il lôr zûc e i lôr timps e i parons di cjase in dificoltât e almancul sul imprin fintremai in sudizion, che a recuperin, ma ae fin masse pôc, cul passâ dal timp.

La scuadre di Spalletti e mostre daurman di jessi determinade, a tacâ de prime conclusion di El Sharawi, là che Karnezis al è pront e atent.
Il gol romanist al rive ancjemò prime de fin dal prin cuart di ore di zûc, cun Nainggolan che al siere une azion inviade di Peres e rifinide di Strootman cuntune biele conclusion. I blancs e neris no palesin nissune forme di reazion e a confermin une cierte instabilitât difensive, cussì la Rome si svicine al doi a zero cun Džeko, che prime al tire fûr di pôc e po si mangje il rigôr assegnât di Damato par un colp di man di Faraoni.

I doi pericui passâts a fasin sunâ la svearine tra i zuiadôrs dal Udin, che si metin in moviment e i dan di lavorâ a Szczesny, prime cuntun colp cul cjâf di Felipe e po cun dôs conclusions di De Paul, cuntun tentatîf fûr bersai di Thereau e cun Zapata che al cole te aree di rigôr par vie di un contat suspiet cun Fazio.

Dopo de polse l’Udin al continue a fâ il so zûc. La bale e zire, ma la Rome e ten bot, e rispuint cuntune conclusion di Džeko e no si scompon masse, nancje dopo che Delneri al clame dentri Perica par provâ a dâi plui pevar ae azion ofensive.

Di chê altre bande Spalletti al mande in cjamp Totti al puest di El Sharawi e il ‘pupone’ al confezione un pâr di assists interessants pai siei compagns, che però no vegnin disfrutâts avonde, intant che cul cambi Hallfredsson-Zapata, l’Udin al torne a mandâ a scombati in prime linie De Paul, protagonist di un pâr di iniziativis, compagn di Džeko di chê altre bande dal cjamp. Stant che se Szczesny che Karnezis a fasin il lôr. il risultât nol cambie.

Cumò l’Udin al varà di tornâ a fâ ponts. Par chel i covente jessi plui atente in difese, là che però Samir al conferme lis cualitâts za mostradis cul Inter, plui ordenade tal mieç, là che lis prestazions dai zuiadôrs, a tacâ di Fofana, a son stadis un tic deludentis, e plui perciolose indenant, tal setôr dulà che finalmentri si à tornât a viodi un bon De Paul.

In sumis, al covente sgarfâ. Di plui e plui fuart…

Domenie l’Udin al zuiarà a Empoli.

Udinese – Inter 1-2

udin

Il 2017 dal Udin al tache ben dome par ce che al tocje il zûc. Cun di fat, la partide di îr cuintri dal Inter e à mostrât une scuadre furlane in cundizions buinis in tiermins tatics, tecnics e atletics, ancje se il risultât finâl al è stât negatîf, cu la vitorie dai milanês.

I ospits a son stâts bulos a no molâ e a provâ fint tal ultim a cirî – e a cjatâ – il gol dal sucès. La scuadre di Pioli e je stade ancje une vore fortunade, parcè che vie pal prin timp e à riscjât di lâ sot di trê goi, ma e je rivade sierâ sul un a un.

Propit vie pe prime frazion l’Udin al à mostrât di vê une marcje in plui, in particolâr su la corsie di çampe cun Samir in difese, che i fâs tocjâ pardabon pôcs balons a Candreva, e cun Jankto, che al vinç ducj i duei cun Brozovic e al dialoghe in maniere costrutive cun Thereau.

Lis conclusions plui pericolosis a son  chês dai blancs e neris Fofana e Jankto. Propit il median boem, dopo 17 minûts di zûc, al vierç lis segnaduris: si zove di une iniziative di Samir, si cjate di bessôl denant di Handanovic e lo supere cun snait e cun fredece.

Dopo pôc al è Zapata che si slargje a çampe e al servìs De Paul, che al cjape il pâl, e doi minûts indenant al è ancjemò Jankto a svicinâsi al gol. La bale e jentre ancjemò te puarte interiste cuntune conclusion di Zapata, ma Doveri al sivile un fal di Thereau su D’Ambrosio e al fâs compagn, di chê altre bande, suntune conclusion di Perisic in fûr zûc.

Il prin timp si siere ancjemò cuntune conclusion di Widmer – altre ocasion pierdude pal Udin – e po cul gol interist, tai minûts di recupar: assist di Icardi par Perisic, che al segne.

Il secont timp al partìs cul Inter plui determinât. Murillo, Borzovic e Candreva – flaps e smamîts te prime frazion – cumò a somein vivarôs e atents. L’Udin al ten bot ma des bandis di Danilo e Felipe al patìs la pression dai aversaris, sburtâts di Joao Mario.
Si scombat te zone mezane dal cjamp e cul passâ dal timp lis scuadris si slungjin e a somein strachis e sfladadis.

Al passe il timp e Delneri al clame fûr De Paul e Thereau e al met dentri Perica e Matos, ma la situazion no cambie. Joao Mario al profite di une jessude falade di Karnezis, ancje se Widmer al rive a salvâ. Cualchi minût plui tart, une vore dongje de fin, Eder al vuadagne une punizion, Joao Mario le tire cuntun cross par Perisic e il cravuat le tocje cul cjâf e al segne. Pal Udin nol è plui timp par tornâ a dreçâ la partide, che cussì si siere cu la vitorie dai interiscj.

Mandi, prof. De Mauro, om di culture e amì dal Friûl, dal furlan e dai furlans

foto_large

Al è muart Tullio De Mauro, il linguist talian plui innomenât e plui impuartant almancul a tacâ de seconde metât dal Nûfcent.
La brute gnove le vin lete cualchi ore indaûr, compagn di tancj altris, sul sît di Internazionale, il setemanâl di informazion e di aprofondiment direzût di so fì Giovanni.

Il professôr De Mauro al veve otantecuatri agns e al à insegnât tes universitâts di Napoli, Chieti, Palermo, Salerno e Rome. Alì de Sapienza par trente agns al è stât docent di Filosofie dal lengaç e po di Linguistiche gjenerâl. Al à fat e coordenât un grum di progjets di ricercje e al è stât autôr di une sdrume di publicazions. Jenfri lis oparis che a puartin la sô firme a son la innomenade Storia linguistica dell’Italia unita, la Storia linguistica dell’Italia repubblicana e il Dizionario italiano dell’uso.

storia-linguistica-dellitalia-repubblicana-dal-1946-ai-nostri

Cun di plui, lant daûr dai siei studis su lis lenghis, al à palesât une atenzion gradonone pe culture in gjenerâl e duncje pe int, pes personis che lis lenghis lis doprin, lis imparin, lis scrivin, lis lein, o che a volaressin fâlu, ma no rivin, par vie di plui motîfs.
Cheste atenzion e chest interès a àn cjapât sùù ancje la forme de cussience civiche e dal impegn politic, che lu à puartât a deventâ Conseîr e Assessôr regjonâl tal Lazi tai agns Setante dal secul passsât e Ministri de istruzion tra il 2000 e il 2001.

I siei interès sientifics, culturâi e politics lu àn puartât a vê a ce fâ in plui ocasion cul Friûl, cu la sô pluralitât linguistiche, cu la lenghe furlane e duncje cui furlans, o almancul cun tancj di lôr, impegnâts tal cjamp de difese e de promozion dal furlan tant che patrimoni culturâl, dirit di fonde e oportunitât educative, formative, sociâl e economiche.

A tacâ dai prins agns Setante dal secul stât fintremai a pocjis setemanis indaûr si puedin vualmâ diviersis formis di contats, di confronts e di colaborazions jenfri De Mauro e il mont furlan. La prime ocasion e je stade la iniziative dal parlamentâr comunist Mario Lizzero, che ju veve coinvolzûts lui e il jurist Alessandro Pizzorusso par viodi di fâ alc a pro de metude in vore in concret dal articul 6 de Costituzion de Republiche taliane, par che la tutele des minorancis linguistichis e fos garantide par dutis chês comunitâts, indipendentementri de esistence o mancul di acuardis internazionâi e duncje di un «stât santul» di chê altre bande dal confin.

GDBTF

Ator de seconde metât di chel deceni al jere stât ancje cualchi furlan che, in non de democrazie linguistiche, al veve marcât cualchi ambiguitât des posizions che in chê volte a vignivin clamadis de «linguistiche democratiche» fatis indenant de bande dal mont academic plui viert e plui iluminât. La cuistion e veve cjatade une sô sintesi cualchi an plui indenant e za vie pai agns Otante e ancjemò di plui dopo de jentrade in vore de leç regjonâl 15/1996 e duncje cul inviament di une politiche linguistiche positive a pro dal furlan.
Di in chê volte Tullio De Mauro al è stât un interlocutôr impuartant, massime pe progjetazion e pe realizazion dal Grant Dizionari Bilengâl Talian Furlan (GDBtf), che di chel al è stât consulent sientific e autôr de jentrade di une sô version su cd rom tal 2005, cence dismenteâ la sô cualificade partecipazion ae presentazion de sô version su cjarte fate a Udin ai 29 di Otubar dal 2011.

Par dut ce che al à fat e ancje su la fonde dai contats personâi che cualchidun di noaltris al à vût cun lui, preseant lis sôs cualitâts sientifichis e umanis, si permetìn di ricuardâlu e di saludâlu: mandi, professôr De Mauro, om di culture e di sience e amì de diversitât linguistiche e par chel ancje amì dal Friûl, dal furlan e dai furlans.

libri_stolfo_arfe