Cagliari-Udinese 0-1

FuarceUdinees

E cuatri! E va indenant ancje cul Cagliari la serie positive dal Udin. La partide di Sabide a Triest e conferme il moment bon de scuadre furlane.
L’Udin cumò si cjate tal siest puest in classifiche, denant di Inter e Lazio e a un pont de Rome, che e je cuinte, e al fâs un biel pas indenant in direzion de Europa League.

L’Udin al mostre fin dal principi personalitât e iniziative. Il Cagliari al è ruspiôs e “barricadero” – tra lis altris al è la scuadre che e veve drazât l’Inter dôs setemanis indaûr – e si difint cul curtìs tra i dincj. Cussì pe scuadre blancje e nere lis ocasions di gol no son tantis e la plui eclatante e je la travierse cjapade di Pereyra juste nûf minûts dopo dal inviament de gare.

Il prin timp si siere sul zero a zero. A passin pôcs minûts de fin dal interval e Guidolin al decît di fâ jentrâ Muriel al puest dal zovin Zielinski, che al somee mancul in forme che tes zornadis passadis. Cul savê di dopo chel cambi si pues calcolâlu in cualchi maniere determinant, stant che juste trê minûts plui indenant al rive il gol di Pereyra.

L’Udin al gjestìs il vantaç, il Cagliari nol rive a rindisi pericolôs des bandis di Brkič, un pôc pai siei limits ma soredut par vie de condote de difese furlane. Ancje cheste e je une biele gnove, stant che a son trê partidis che l’Udin nol cjape goi.

Cussì, cun dut che Di Natale no si lu viôt masse, che la intese denant cun Muriel e à ancjemò di jessi regolade, chê di Sabide e ufrìs segnâi positîfs no dome in cont dal risultât ma ancje par ce che al tocje la cundizion atletiche, tecniche e psicologjiche: la difese e ten bot e inte zone centrâl dal cjamp a cressin simpri plui personaçs tant che Allan e il stes Pereyra, che nol somee par nuie il Pereyra dal an passât e al fâs goi pesants.

Cun di plui, ancje Guidolin si sbelance e al pant otimisim, intan che “il paron” Pozzo al promet (o al spere…) di no vendi (o di no vendi masse?) par tignî e magari par rinfuartî cheste scuadre inte prospetive de Europa League. Viodarìn ce che al nas.

Prossime pontade: Udinese-Sampdoria.

Friûl, Piemont, Resistence

BANDIERE

La memorie de Resistence e lis celebrazions de Liberazion a son, par plui motîfs, alc che al ten dongje il Friûl e il Piemont.

Chest leam si fonde ancje su tantis storiis di emigrazion. Esemplis di chest a son lis storiis di chei antifassiscj furlans che a jerin emigrâts tal Stât francês intant dal “ventennio” e che po a vevin scjavaçât lis Alps par fâ i partigjans in Piemont, tal Ossola o tal Canavês o a Turin o in provincie di Cuneo, e dopo de Liberazion si son fermâts achì.

La comemorazion fate vuê a Çarvignan e permet di cognossi une altre storie, chê di Antonio Sandrigo “Lampo”, che e merete contade e che ten dongje la Basse Furlane e la zone di Bra.

Pierluigi Visentin tal so libri “Romano il Mancino e i Diavoli Rossi” (Kappa Vu, 209) al scriveve: «una sera “Lampo” e Rino De Sario Germano, mentre stavano tornando in bicicletta da una requisizione, erano stati sorpresi da tedeschi al ponte di Chiarisacco. “Lampo”, che precedeva l’amico, era stato arrestato, mentre Germano si era buttato nel fiume Corno. Pur fatto segno di un nutrito lancio di bombe a mano, era riuscito a salvarsi, nuotando fino al macello di S. Giorgio, dove l’avevano nascosto. “Lampo” verrà fucilato per rappresaglia a Pradati di Cervignano il 22 marzo 1945, assieme a Idilio Cappelletto, un altro “Lampo” di Chiarano (TV), residente a Monfalcone, a Derno Paravano “Milo” di Torsa di Pocenia e al milanese Giorgio De Santi “Milan”».

Antonio Fedrigo al veve 18 agns e al jere a stâ a Cjarlins, cu la sô femine e cuntun frut, nassût ae fin dal 1944, che cuant che “Lampo” al fo copât tai Pradats di Çarvignan, al veve sù par jù cuatri mês.

Chel frut di in chê volte al è un om che al è a stâ in Piemont. Il so non al è Romano e chest an, compagnât di un grup di partigjans di Bra, al è lât in Friûl pe comemorazion di so pari e di chei altris che a jerin stâts fusilâts a Çarvignan.

La iniziative par memoreâ chel fat e chês personis e je stade cjapade sù a tacâ dal an passât dai Comuns di Cjarlins e di Çarvignan adun cu la ANPI.

Buine Fieste de Liberazion!

Partigjans

Chê di vuê e je une zornade impuartante par ducj i citadins dal Stât talian. E je la Fieste de Liberazion: impuartante par no dismenteâ; impuartantone par cjalâ indenant.

Resistence, Liberazion, Costituzion, Democrazie no son – e no àn di jessi – peraulis vuedis. O vin di jessi “plens” di memorie e duncje “plens” di cussience in cont di ce che al è stât, di cui che al à fat ce e parcè e cemût.
Magari cussì no, a son za un pôcs di agns che, par plui motîfs, si è fate indenant la idee che al è miôr lassâ in bande masse discors su lis responsabilitâts storichis e su lis diferencis di ideis, di ideâi e di esperiencis, tant a dî: «Scordiamoci il passato».
La convinzion che cul revisionisim, cul dismenteâ e cul dâ mancul impuartance ai fats a aes responsabilitâts si rivi a vê plui armonie, plui unitât e plui coesion e je falade. Se une cualchi unitât e coesion si rivàs ancje a jonzilis a saressin dome unitât e coesion fondadis su la bausie e sul vueit di memorie, di cognossince, di cussience.
Magari cussì no, ator pal Stât talian, cheste tendence viers de bausie e viers dal vueit e salte fûr ogni dì.

Fâ fieste pe Resistence e pe Liberazion al è un dirit e salacor ancje un dovê. Un dovê di memorie e di ricognossince par cui che al à lotât cuintri dal fassisim e dal nazisim. Un dovê di atenzion e cussience, par che chês o altris formis di bausie, di injustizie, di prevaricazion, di violence, di ditature no tornin a fâsi indenant.

Chel vueit di memorie, magari cussì no, si lu cjate ancje in ciertis istituzions de Republiche “nassude de Resistence”. Une storie brute e je chê di un ordin dal dì revisionist fat bon dal Consei de Circoscrizion 9 Lingotto-Nizza Millefonti-Mercati Generali di Turin, cemût che si lei achì.
Une altre e je chê des cjoltis di posizion dal comissari prefetizi di Alassio, in Ligurie, che di chês al à cjapât ispirazion Massimo Gramellini par un so biel coment su La Stampa.

Udinese-Lazio 1-0

fuarceudinees

Tierce vitorie in trê partidis une  daûr di chê altre, cemût che nol jere mai sucedût vie par cheste stagjon. Chel  cuintri de Lazio si pues calcolâlu un sucès impuartant, no dome par chest motîf statistic, ma soredut parcè che al vierç pardabon la strade viers de Europe.

Fintremai a cualchi setemane indaûr la ipotesi che la scuadre furlane e podès cirî un puest te Europa League e jere dome un sium. Cumò nol è plui cussì.

La vitorie in cjase cuintri de scuadre romane e rive in graciis di un numar di Totò Di Natale: cross di Pereyra e tîr di prime intenzion che Marchetti al pues dome viodi passâ e lâ a finî tal sac.
Il prin timp al è avonde involuçât. Sul imprin la Lazio e à plui iniziative, cun Ledesma te cabine di regjie e l’ex Candreva che al sburte su la corsie a man drete, ma no rive a rindisi pericolose des bandis di Brkič e dopo vê cjapât un gol e piert l’orientament. L’Udin al cjape fuarce de marcadure, si difint cun sintiment e al rispuint cul tignî di plui la bale e cuntun pâr di ocasions di gol.

Dopo dal interval la situazion no cambie e chest al va dut a pro dal Udin, che si svicine al doi a zero cul so zuiadôr miôr de partide, il zovin Zielinski, che si cjate in buine posizion denant di Marchetti ma nol rive a scjavaçâlu.
A son ancjemò Zielinski e Di Natale a dâ fastidi ae scuadre ospite, che no rive a concludi nuie in atac, intant che il ritmi de partide al va al mancul e l’Udin al gjestìs lis ultimis fasis de partide e al puarte a cjase trê ponts impuartantons.

A part il risultât, l’Udin al pues stâ content pe prove di caratar di dut il coletîf e pe gnove “zornade sì” di diviers siei zuiadôrs di Zielinski, Di Natale, Allan, Pereyra e Basta. Talent e fantasie denant e concretece daûr i àn permetût di vinci une partide avonde ecuilibrade e di crodi ancjemò plui di cualchi setemane indaûr ae possibilitât di rivâ in Europe.

“Occitania, Friuli, Europa…” a Saluzzo ai 19 di Avrîl

CoverOccitaniaJPG

Friûl e Ocitanie si cjatin adun inte suaze di Paraulas en Musica, il cicli di incuintris inmanetât de Scuola di Alto Perfezionamento Musicale di Saluce (Saluzzo) e Chambra d’Oc dedicâts ae musiche ocitane.

Doman ai 19 di Avrîl a 9 sot sere, li de sale Verdi in vie dell’Annunziata 1, la  rassegne e previôt une serade in cont dal rapuart tra produzion musicâl e lenghis, cu la presentazion de publicazion dade fûr de associazion Lidrîs e Butui, “Occitania, Friuli, Europa. La mia lingua suona il rock”.

Il libri cul cd in zonte al vignarà presentât dal so autôr, il gjornalist e ricercjadôr Marco Stolfo.

Occitania, Friuli, Europa. La mia lingua suona il rock” al fâs indenant une esplorazion profondide e organiche des realtâts ocitane e furlane, de fin dai agns Sessante al dì di vuê, e le met in relazion e in comparazion cun chês che si son disvilupadis inaltrò.

Dongje de musiche contemporanie in lenghe d’oc e dal Friûl che al cjante par furlan, par sloven e par todesc, il volum al ufrìs une panoramiche slargjade di lenghis, sunôrs, ritmis e artiscj, de Ocitanie ae Sardegne, dal Paîs Basc ai Grisons, de Corsiche al Gales, dai Paîs Catalans ae Scozie, de Galizie ae Ladinie, des Asturiis ai sami dal Circul Polâr Artic e fintremai ai grecanics e ai albanês de Basse Italie.

La presentazion di Saluce e vignarà fate cun chê stesse atenzion multidissiplinâr che e sta daûr dal libri, là che si cjatin musiche, storie, politiche, societât, dirits linguistics, leterature e tutele des minorancis.
Vie pal incuintri si podarà ancje scoltâ cualchi cerce dal cd che al è in zonte dal libri, che al ten dongje une selezion di tocs de musiche contemporanie plui “fuarte” de Ocitanie e dal Friûl.

La jentrade e je libare. Par savênt di plui: apm@scuolaapm.it.

Parma – Udinese 0-3

FuarceUdinees

Trê goi e trê ponts, un pas indenant in classifiche, il superament dal tabù di Parma, là che l’Udin nol vinceve di vot agns, une biele zornade pal coletîf e pai singui e una dediche particolâr.
Il sucès de scuadre furlane di îr al è bon e just, sei dal pont di viste dal zûc e des prospetivis di classifiche che sul plan dal morâl, si insuaze te serie positive des ultimis partidis e al fâs someâ mancul utopiche la possibilitât di rivâ a jentrâ te Europa League.

Muriel al fâs maraveis, Brkič si fâs cjatâ tal puest just cuant che al covente, de metât dal cjamp indenant a  mostrin cualitât e continuitât Allan e la novitât Zielinski (classe 1994) e un Udin in forme al vinç cun personalitât cuintri di un Parma flaput e deludent.

La scuadre di Guidolin e impon la sô iniziative e il so zûc fin sul imprin. In atac Muriel al mande in tilt la difese emiliane, cui siei moviments, cui siei numars e in graciis dai riforniments che i rivin di Zielinski, Allan e Pereyra.
Dopo 12 minûts la ponte colombiane e vierç lis marcaduris, suntun assist di Zielinski, e si ripet ai dams di Mirante prime dal interval. La musiche sunade tal secont timp e je sù par jù compagne: i blancs e neris a àn simpri la iniziative, il Parma al patìs i efiets de superioritât dai furlans sei sul plan tatiche che su chel atletic. Il tierç gol di Pereyra, su sugjeriment di Muriel, e l’intervent puntuâl su la conclusion di cjâf di Amauri, a conferme chel che al è il rapuart des fuarcis in cjamp.

Un sucès impuartant pe scuadre furlane e pal so alenadôr, Francesco Guidolin, par plui motîfs.
La vitorie di îr e rive tal prin inovâl de muart dal ex blanc e neri Piermario Morosini: une biele maniere par ricuardâlu.
La vitorie di îr e slargje il troi viers de Europe. Di cemût che e larà la prossime partide cu la Lazio si podarà capî se chel troi al pues deventâ pardabon une strade che e puarte te Europa League.

Europe, avignî e democrazie. A Turin

laura-boldrini

“Utopico? Possibile” al è il titul de edizion 2013 de “Biennale della democrazia”, che si davuelç a Turin, in diviersis bandis de citât, di vuê fintremai a Domenie ai 14 di Avrîl.

La manifestazion, che il so president al è l’innomenât costituzionalist Gustavo Zagrebelski, e ten dongje une schirie di apontaments, tra conferencis, dibatiments, incuintris e spetacui.

Il program al previôt ocasions di riflession e cognossince là che si tignaran dongje dirits e tecnologjiis, podê e trasparence, economie e ambient, sience e cussience, democrazione direte e rapresentative, promozion e ricognossiment des diferencis e prevenzion e superament dai conflits e des violencis.

La scree di dut e vignarà fate vuê a 6 sot sere cuntune lezion fate de presidente de Cjamare dai Deputâts, Laura Boldrini, li dal Teatro Regio.

Ducj i events a son a jentrade libare fin che a son puescj e par partecipâ al covente ritirâ i biliets che a vegnin dâts fûr a tacâ di une ore prime di ogni apontament. No son previodudis prenotazions.
Dutis lis informazions che a coventin in cont de “Biennale della democrazia” si cjatin achì.

Par ce che al tocje lis iniziativis cu lis scuelis, invezit, a son achì.

Simpri vuê, ma a tacâ des 4, li de “Fondazione Einaudi” il “Centro Studi sul federalismo” al inmanee l’incuintri dal titul Il futuro dell’Europa: un dialogo su solidarietà, democrazia e integrazione. A fevelin Guido Montani de Universitât di Pavia e Philippe van Parijs de Université catholique de Louvain, cul coordenament dal diretôr dal “Centro studi”, Flavio Brugnoli.

Udinese – Chievo 3-1

totolunazzi

 L’Udin al zuie cun personaliât  e cussì al vinç cun merit cuintri di un aversari che nol è someât alc e ce. La zornade e je “sì” pe scuadre e soredut pal so cjapitani. Lis dôs robis si tegnin sù tune cun chê altre, cemût che al è saltât fûr in diviersis ocasions vie pe stagjon.

Di Natale al cjate la strade dal gol une prime volte cun cinisim, disfrutant l’erorat dal puartîr dal Chievo, Puggioni, che al fâs une robe cence sens, e une seconde cuntun tîr maraveôs – un gol di cineteche – su sugjeriment di Pereyra.

In principi la partide e je un tic imbalade, ma cu la prime marcadure l’Udin le cjape in man in maniere decise e autorevule. Il Chievo al ridûs lis distancis prime dal interval cun Papp e al vierç la seconde frazion di zûc cuntune cierte pression ofensive. Pelissier e Thereau si rindin pericolôs ma a cjatin su la lôr strade un Brkič simpri pront.
L’Udin al gjestìs la partide e il tierç gol di Benatia al garantìs il risultât.

Une vitorie che e mancjave di sù par jù doi mês e che e fâs ben al cûr e al cerviel.

Probabilmentri la Europe e reste lontane, ma al è biel pensâ che nol sedi propit cussì e che, se no je une strade, al sedi almancul un troi ancjemò viert in chê direzion.

La prossime partide l’Udin le zuiarà cul Parma, ma no saran ni Di Natale ni Benatia, che a saran scualificâts par vie dai cartelins zâi cjapâts intant dal incuintri cul Chievo.

Musiche, leterature e editorie. Il Friûl al fâs fieste te Basse

luna-e-un-quarto

Il Friûl al è une “Patrie” che e cjante, che e sune, che e lei, che e scrîf e che e vîf.
Chest al salte fûr a clâr soredut in cualchidun dai apontaments inmaneâts in chescj dîs inte Basse Furlane in ocasion dal inovâl de istituzion dal Stât patriarcjâl.
Di chês bandis a àn metût adun events là che pardabon e je la “fieste” e al è il “Friûl”, chel vêr e dinamic.

La zornade di doman, Sabide ai 6 di Avrîl, si vierç a Muçane cuntun apontament dedicât ae leterature, cuntune selezion di tescj che a vignaran lets di Claudio Moretti, Mauro Daltin e Renzo Stefanutti li de Sale parochiâl a 11 a matine. Prime di sere, li di “Villa Muciana”, a 6, al sarà il conciert di Lino Straulino ator pes vilotis”, là che l’om di Sudri, cun vôs e godine, al presentarà un viaç tes melodiis, tes lirichis e tes struturis armonichis dal cjant furlan tradizionâl tant che patrimoni di tornâ a discuvierzi e tant che risultive par gnovis composizions.

Domenie al Tor di Zuin, invezit, e sarà une zornade interie di events e iniziativis, inte suaze de “Prime mostre marcjât de editorie multimediâl furlane”. Tra i apontaments, animazion e leturis pai fruts cun “Libris e Zûcs” sul misdì, “Gjalut Postin” a 4 e mieze  e “Viaç tal Friûl di Magance” a 6 sore sere.
In program ancje leturis di tescj gjavâts fûr de riviste  “La Comugne”, la presentazion dal tradutôr automatic “Jude”, la proiezion di  “Felici ma Furlans” e il conciert dai Luna e Un Quarto.

Buine Fieste de Patrie dal Friûl. Pal avignî e par ducj

bandieris

Chê di vuê e je une zornade impuartante pal Friûl, pe sô storie e ancjemò di plui pal so avignî.

Pe storie, chel dai 3 di Avrîl al è l’inovâl dal conferiment al patriarcje di Aquilee, Siart, de bande dal imperadôr Indrì IV, dal titul di “Comes Fori Julii. Dux et Marchio” e duncje dal podê “temporâl” suntun teritori che dilunc vie di passe trê secui al varà une gjeometrie variabile ma che al varà il so centri simpri tal Friûl. Anzit, si pues dî che il Friûl, intindût tant che comunitât teritoriâl unitarie, tant che “Patrie”, cemût che al vignarà clamât par tancj secui, al sedi stât definît ad in plen inte sô fisionomie propit in graciis di chê situazion politiche e istituzionâl.

Propit par chest chê dai 3 di Avrîl e je une ricorence che e permet di resonâ soredut in cont de atualitât e dal avignî. Il Patriarcjât di Aquilee al deventave, inte suaze dal Imperi, un stât par so cont, che al mantignive e al disvilupave relazions cui diviers teritoris e soredut cun chei a nord, a est e a sud est.

Cun di fat, la “Fieste de Patrie” no je – e no à di jessi – ni nostalgjie ni mitologjie. Ni pal “Friûl in Friûl”, ni pal Friûl che al è pal Mont.

Si pues vê ancje une cierte braùre dal fat che propit chel dal stât patriarcjâl al è un dai Parlaments plui antîcs de Europe, ma ce che al è plui interessant al è cognossi e ricognossi lis lidrîs de specificitât, de unitât e de unitarietât teritoriâl dal Friûl dutun cun chês de sô specifiche pluralitât linguistiche e culturâl e in cheste suaze de specificitât e de unitarietât de lenghe furlane. E cjapâ cussience che chês a son lis fondis no dome par jessi se stes ma ancje par jessi in relazions positivis cun ducj chei altris.

Dut chest al è ce che esercits, podês e ideologjiis a àn cirût di dineâ, di scombati e di scancelâ, soredut di un secul e mieç incà. Dut chest al è ce che al forme, in maniere dinamiche, particolâr ma no esclusive, la identitât furlane: chê vere, chê libare, chê che si cognòs, chê che si fâs cognossi e ricognossi e chê che e ricognòs.

Al è dut ce che il Friûl al à o almancul ce che al pues vê ancjemò.
Soredut al è ce che i covente par jessi Friûl e jessi cussì part de Europe e dal Mont.
Par doprâ dôs peraulis che nus plasin: «lidrîs» e soredut «butui».

Pe “Fieste de Patrie” e par cemût che e je nassude la sô celebrazion si pues doprâ la categorie de “invenzion de tradizion”, compagn che par tantis altris ricorencis deventadis “fiestis” di popui e comunitâts.
Però, al contrari di tantis fiestis patriotichis e nazionâls ator pal mont (massime dentri dai stâts nazionâi e nazionaliscj), chê “invenzion” no je chê di un “primât” spirituâl, culturâl o, piês ancjemò, “di sanc”. E in chê si cjatin sei la negazion di ducj i “primâts” di sorte sei diviers elements di fonde che acoventin propit par ribaltâ lûcs comuns e mistificazions.

Al è par chest, par esempli, che a Turin, dal 2003, pe associazion Lidrîs e Butui chê dai 3 di Avrîl e je une “fieste” e duncje une ocasion par fâ fieste cussì.

Plui in gjenerâl, par cui che al vîf in Friûl e pai furlans pal Mont l’inovâl dai 3 di Avrîl al è la ocasion par fâ fieste par une Patrie che no à etichetis: che no a voie di jessi ni “frontiere”, ni “colonie,  ni “confin”.
E duncje che no je ni “piçule” ni “extralarge”.

Sul argoment, ve chi cualchi riferiment interessant:
http://www.istitutladinfurlan.it/fiestedepatrie/
http://www.friulinelmondo.com/assets/files/anni_2000/570-03-2002.pdf
http://ladinsdalfriul.blogspot.it/
http://www.lapatriedalfriul.org/wp-admin/http://www.lapatriedalfriul.org/?p=8777/