Friûl@Europe, vinars ai 27 a Udin si fevele di dirits linguistics e tutele

Friul@EuropeXdoc

Une gnove ocasion par fâ il pont de situazion su lenghis, dirits e tutele, tra Friûl e Europe. E je chê che e ven ufierte de taule taronde dal titul Friûl@Europe che si tignarà a Udin ai 27 di Març tal dopomisdì.

L’incuintri, che si insuaze tal modul Jean Monnet MuMuCEI (Multilingualism, Multicultural Citizenship and European Integration) de Universitât dal Friûl, al met dongje studiôs, rapresentants istituzionâi e esponents de societât civîl che a fasin part des comunitâts di lenghe furlane, slovene e todescje de regjon Friûl-VJ.

La taule taronde di Udin e rive intun moment une vore particolâr, a doi dîs dal inovâl (che al cole vuê) de firme dai Tratâts di Rome dal 1957 e soredut intant che il Senât al è daûr a tornâ a discori de ratifiche taliane de Cjarte europeane del lenghis regjonâls.

Cun di plui la cunvigne e conferme cemût che cirî la Europe al vûl dî cirî e cjatâ il Friûl, che al è une part di chê Europe che e je e che e vûl jessi «unide inte diversitât».

Dentri dal program de taule taronde si fasarà ancje la presentazion dal libri  Lingue, diritti, cittadinanza / Languages, rights, citizenship: Friuli-Venezia Giulia, Italia, Europa, Mediterraneo.

 

cover_libri

 

Advertisements

Udinese – Fiorentina 2-2

fuarceudinees

Un pont par om, emozions par ducj e un tic di bocje garbe pal Udin, che tal prin timp al met sot la Fiorentina e al fâs compagn te ultime part de partide, rivant dongje de vitorie finâl, intant che si piert un pôc te prime part de seconde frazion, cuant che al va sot di un gol e al riscje di restâ in cheste cundizion.

Ae fin il belanç al è avonde positîf sei pal zûc che pal caratar mostrât de bande dai zuiadôrs de scuadre di balon furlane, che e partìs ben, cul solit 3-5-1-1, che al devente 3-4-2-1 te fase ofensive.
I parons di cjase a mostrin di vê plui convinzion e plui atenzion dai ospits. La iniziative e je dal Udin, che però sul imprin nol è particolarmentri pericolôs, ancje se al vuadagne trê corners in nancje un cuart di ore.
Dal tierç tîr de bandierine al salte fûr il gol dai blancs e neris: cross di Di Natale, colp cul cjâf di Guilherme e conclusion di Wague, che si cjate tal puest just tal moment just e cussì al met la bale tal sac daûr di Neto.

La reazion de Fiorentina no somee alc e ce, ancje parcè che l’Udin si difint ben za su la linie mediane e al rispuint in cuintripît in maniere avonde pericolose. Dopo mieze ore di zûc Guilherme al servìs ben Kone, che però nol met a fûc la puarte e al tire fûr. Pôc timp plui indenant Widmer al fâs une galopade des sôs e al cîr di servî Di Natale tal mieç de aree di rigôr, ma la azion no si siere.
I ospits si fasin vîfs des bandis di Karnezis dome tal ultin cuart di ore, prime dal interval: Danilo al ferme Gomez in buine posizion; Basanta al tire dal limit e la sô conclusion e vâ fûr di pôc; i violas a jentrin te aree dal Udin,  juste tal timp di recupar, ma Irrati ju ferme par off-side.

Tal secont timp la Fiorentina e somee plui determinade e l’Udin al patìs la pression relative che e ven metude adun dai aversaris. Tal zîr di cinc minûts il risultât al torne in paritât, cun Mario Gomez che al mande in gol il sugjeriment su punizion di Ilicic. Doi minûts plui indenant l’atacant todesc si cjate une altre volte pal apontament cul gol e al siere une triangolazion che si zove di un brut erôr di Guilherme.

La situazion pal Udin si fâs grivie e penze, però Stramaccioni al mostre di vê cûr e snait: fûr Gabriel Silva e dentri Thereau, seconde ponte intun scheme che al cambie e al devente 4-3-1-2.
L’impat dal mudament si viôt, ancje se une buine ocasion tai pîts di Guilherme, lontan ma a puarte vueide, no ven disfrutade cemût che al coventarès. A passin altris cinc minûts e un biel numar di Di Natale al ispire l’inseriment di Kone che al segne il so prin gol de stagjon e al fâs doi a doi.

I blancs e neris a provin a cirî il tierç gol e si svicinin une vore al obietîf prime cun Thereau, che al siere ben une azion inviade di Allan, e dopo cun Widmer che al partìs su la corsie a mandrete, su sugjeriment di Guilherme, e al tire a colp sigûr, cun Neto che si salve cul jutori de travierse.

La Fiorentina si siere e e prove a mudâ i ecuilibris cu la jentrade tal cjamp di Salah, ma al è ancjemò l’Udin a puartâsi indenant, ancje se intune maniere che no je masse incisive. La pression ofensive furlane e cres tai ultins minûts, cuant che a jentrin ancje Bruno Fernandes e Geijo, che si fasin viodi des bandis di Neto, protagonist assolût tra i ospits in particolâr tai ultins minûts. E il risultât al reste inclaudât sul doi a doi.

Atalanta – Udinese 0-0

udin_neri

Tra il blanc e neri dal Udin e il neri e blu de Atalanta il colôr dominant al è il grîs di une partide flape e smamide. L’Udin nol vinç e (almancul chê…) nol piert: al cjape un pont che al è mancul di ce che si spietâvisi dopo de vitorie di domenie stade cuintri dal Toro ma al è avonde par tignî bot in classifiche e lâ indenant cence fastidis te ultime part dal campionât. Magari, cun plui trancuilitât al rivarà ancje un pôc di zûc, un pôc di spetacul e risultâts positîfs e taronts. Magari…

La scuadre di Stramaccioni e chê di Edi Reja, a tacâ dal imprin de partide, a somein plui impegnadis tal cirî di no fâsi dal mâl. I parons di cjase, che in teorie a àn plui motîfs par fracâ il pît sul aceleradôr, no rivin a fâlu. A mantegnin dome il control de bale par plui timp e vonde.

L’Udin, cence Kone e cun Bruno Fernandes daûr di Di Natale, unic atacant, al bade soredut a no fâ busis tal mieç dal cjamp, cun Pinzi, cun Allan e cun Guilherme, che a cuvierzin la difese a trê. Cussì te prime frazion a son dome dôs lis veris ocasions di gol: un colp cul cjâf di Denis dopo cuatri minûts e il pâl cjapât di Widmer suntun biel sugjeriment di Guilherme nûf minûts plui indenant. Se propit si à voie di ricuardâ alc altri, si puedin menzonâ cualchi tîr di fûr de aree di rigôr cence masse pretesis di Carmona e di Cigarini, il bon dinamisim di Gomez e Morales, un fal su Allan al limit de aree di rigôr che nol ven sivilât e un colp cul cjâf fûr bersai di Dramè.

Tal secont timp la musiche e reste chê. Reja nol cambie ni scheme ni organic ofensîf e la Atalanta e continue a pontâ su Denis, che nol combine alc e ce, a part une conclusion cul cjâf che no cree problemis a Karnezis. Strama al fâs compagn, almancul pal prin cuart di ore, ven a dî fintremai ae sostituzion di Di Natale cun Thereau, che in concret no mude la gjeometrie dal 3-5-1-1.

Cualchi minût plui indenant e rive une biele conclusion di Gomez, che e ven fermade cence fastidis di Karnezis e po dome sossedadis almancul fint ai ultins vincj minûts, cuant che Widmer al fâs partî un tîr insidiôs che si stramude intun cross par Bruno Fernandes, che però nol rive a fâlu rindi, e cuant che Rocchi al tire fûr il cartelin ros cuintri di Carmona par une sô jentrade brute cuintri di Allan e la Atalanta e reste in dîs.

L’Udin al prove a profitâ de superioritât numeriche, intant che Reja al rinfuartìs la linie mediane cu la sostituzion di Gomez cun Migliaccio, ma nol rive a cumbinâ masse. La iniziative miôr e je un cross di Piris cuntun colp cul cjâf di Wiedmer che però nol cjate il spieli de puarte, sù par jù cinc minûts prime de fin.

Cussì si rive ae fin cence goi ni fats e ni cjapâts. Pal Udin al pues lâ ancje ben cussì, almancul in cheste ocasion.

 

Une leç pe Fieste de Patrie?

22_03_014_udin_friul

Si torne a fevelâ de “Fieste de Patrie dal Friûl”. No dome parcè che i 3 di Avrîl si svicinin ma ancje par vie che e je rivade in Consei regjonâl une propueste di leç che e tocje propit la “Fieste de Patrie”.

In Friûl e a Triest si à inviât un ciert dibatiment su la cuistion. La impression e je che e sedi un pocje di confusion, tal stes test de propueste di leç e tal cjâf di plui di cualchidun.

Par fortune al è ancje cui che al fronte la cuistion cun cussience e cun cognossince.
Al è il câs dai sindics che si dan dongje tal Laboratori di Autonomie, che al à dâr fûr un comunicât, che si pues leilu di plui bandis, là che al ven fat indenant un resonament di sest.

Une riflession sul argoment si le cjate ancje achì.

Il test de propueste di leç al varès di rivâ te aule dal Consei martars ai 17 di Març. Sperìn in ben.

Culture polache a Udin, dai 13 ai 18 di Març a tornin lis Zornadis

DOUBLE_LIFE_VERONIQUE-7

Cualchi an indaûr a vegnin inmaneadis a Turin lis “Giornate polacche”.

A tacâ dal 2014 une iniziative di cheste fate e ven metude dongje ancje in Friûl.
Si clame Giornate della cultura polacca e le inmanee la associazion Polonik cul jutori e cul patrocini di tancj sogjets publics e privâts.

locandina-giornate-JPEG2

La seconde edizion de rassegne e tache vuê e e va indenant fintremai ai 18 di Març.
Tal program a son une schirie di apontaments che a tocjin il cine, la musiche, la poesie, la filosofie, la narative e la promozion turistiche.

Tal cartelon de manifestazion a son ancje un omaç ae produzion dal regjist Krisztof Kieslowski, un incuintri cul poete Ryszard Krynicki e un conciert dal cjantautôr Andrzej Sikorowski.

kieslowski

Udinese – Torino 3-2

fuarceudinees

La vitorie juste, tal moment just, cul aversari just. L’Udin al vinç cuintri dal Toro, une des scuadris plui in forme in cheste fase dal campionât, e al jonç chest risultât dopo di une setemane di passion e di une rie di prestazions avonde smamidis, in cjase e fûr.
Il sucès cuintri de scuadre, che dome une setemane indaûr e veve fermât il Napoli e e veve passât il turni di Europa League cuntune vitorie in cjase dal Athletic Bilbao, al creve une astinence de vitorie in cjase che e leve indenant dai 26 di Otubar stâts.
Par sigûr e je une bocjade di aiar bon, tes setemanis seguitivis si viodarà se chest risultât si pues calcolâlu ad in plen un svolt positîf e decisîf, e no dome pe classifiche.

La gare si vierç cuntune ande avonde lente. Toro e Udin si studiin e a pensin soredut a tignî il cjamp cun ecuilibri in ducj i setôrs. Cussì la prime conclusion e rive dopo une desene di minûts cuntun tîr fûr dal spieli di Pasquale.
La rispueste dal Toro no si fâs spietâ masse: i granatas a imbastissin e une biele azion che e met Farneud tes cundizions di fâ un cross par Quagliarella che cul cjâf le bute dentri te puarte di Karnezis. Il gol dal ex, in dute la partide une vore preseât de bande dai tifôs furlans, al sune la svearine pai blancs e neris. Tal zîr di doi minûts al rive il gol di Totò Di Natale che al indrece de bande juste un balon confezionât su la linie Pinzi-Wiedmer: nuie ce fâ par Padelli.

I doi goi a fasin cambiâ ritmi ae partide e soredut l’Udin al devente plui coragjôs.
Prime Wague al impegne Padelli e po al rive il doi a un pe formazion furlane: corner di Di Natale, bale tocjade di Pasquale e ancje di Kone e deviazion decisive e disfortunade di Molinaro.
Di chê altre bande, il Toro al torne al atac cun Quaglairella e Maxi Lopez. La difese e ten bot, al fâs compagn ancje Karnezis, che al cjate ancje la colaborazion dal pâl, e il prin timp si siere cul Udin in vantaç.

Te seconde frazion la musiche no cambie. L’Udin nol à un biel zûc, ma al prove a zuiâ, al fâs zirâ la bale e al rive a costruî cualchi ocasion cun Wague.
Propit il zuiadôr dal Mali al è l’element plui pericolôs dai furlans, stant che al torne a impegnâ Padelli e, cuatri minûts dopo dal interval, al segne il trê a un.

La partide no si siere achì. Il Toro al mostre di jessi une buine scuadre e di vê pardabon il cûr granata, ancje se al bat mancul fuart che in altris ocasions.

Ventura al da energjiis frescjis ae sô scuadre, butant dentri El Kaddouri e Benassi, intant che l’Udin al tire sùù lis baricadis, cirint di difindi il sucès.
A fuarce di dâi, i ospits a segnin cun Benassi. L’Udin al sufrìs e al patìs, ma al ten dûr, poiantsi in particolâr su lis dôs colonis, Piris e Danilo.

I.BI.S., dai 7 di Març a Udin si resone su plurilinguisim e integrazion

multilingual

Cognossi dôs lenghis al è miôr che cognossi une sole e cognossi trê al è miôr ancjemò.
La ultime buine gnove in cont dal valôr e de impuartance dal pluralism linguistic e de educazion bi- e plurilengâl e je saltade fûr dome cualchi dì indaûr.

Cundut achel a son ancjemò in tancj di lôr che a àn chê brute malatie che cualchidun in rêt al à scomençât a clamâle «monalinguismo»  e che in Friûl e cjape sù ancje la conotazion di friulanofobie.

Par chel al merete segnalât il progjet I.BI.S., metût adun de associazions dai polacs in Friûl, Polonik, cu la colaborazion di tancj di lôr (e tra chescj e je ancje la nestre associazion).
La iniziative, che si disvilupe vie par dut il 2015, e ven screade sabide a i 7 di Març, cemût che si lei ancje achì.

IBISweb

Ecumenisim e federalisim, un incuintri a Turin

visserthoof

Doi libris, un incuintri. Ai 4 di Març a Turin, li de Biblioteca europea Gianni Merlini (L.go Dora Siena 100), a tacâ di cuatri e mieze dopomisdì, si davuelç l’incuintri W.A. Visser’t Hooft. Dalla primavera dell’ecumenismo alla federazione europea.

L’apontament al ten dongje la presentazion di doi libris dedicâts ae figure e al pinsîr dal teolic neerlandês Willem Adolph Visser’t Hoof: un al è par cure di Filippo Maria Giordano e Stefano Dell’Acqua e chel altri al è firmât di Franco Giampiccoli.

A son previodûts i intervents dal storic e politolic de Universitât di Turin, Massimo L. Salvadori, e dal teolic de Facoltât valdese di teologjie di Rome, Paolo Ricca.

Ducj i detais in cont dal apontament si cjatin achì .

Cesena – Udinese 1-0

udin_neri
Tal zûc dal balon no je vere che al gjolt cui che si contente. Al gjolt e al vinç cui che al prove a fâ di plui. Al è par chest che l’Udin al piert in cjase dal Cesena: parcè che si contente, al cîr di tignî sot control la partide, cence masse sfuarçs, e ae fin le cjape tal comedon.

Pal Cesena, denant dai siei tifôs, par resons di classifiche e par no peirdi dutis lis sperancis di salvece, al esist dome un risultât: la vitorie. L’Udin al à dôs pussibilitâts e za sul imprin de partide al sielç la seconde, ven a dî chê di no sburtâsi masse indenant e di no discuvierzisi masse indaûr. Par sù par jù une mieze ore l’incuintri al reste in belance, cul Udin che al prove a fâ alc in atac cun Di Natale e Thereau, il Cesena che al imbastìs cualchi azion ofensive sburtade di Brienza e nissune des dôs formazions che e rive a jessi pardabon pericolose.

Lis primis veris ocasions a rivin tal ultin cuart di ore dal prin timp e a son pai parons di cjase, cuntun tîr di Defrel su sugjeriment di Brienza, parât di Karnezis, e cuntune cross di Brienza par Capelli, neutralizât cence fastidis ancjemò dal puartîr dal Udin. L’Udin al rispuint cun Di Natale e cun Danilo, che a cirin di profitâ di un pâr di indecisions di Leali.

Tal secont timp la situazion in sostance no cambie: i atacs no atachin, i puartîrs no àn nuie ce fâ e ta chei altris setôrs tra i blancs e neris furlans e chei romagnûi il colôr dominant al è il grîs, a part cualchi iniziative di Allan e di Brienza.
Salacor, cul passâ dal timp, lis robis pal Udin a van ancjemò in piês, stant che il Cesena si zove de frescjece di Rodriguez, mandât in cjamp di Di Carlo al puest di Defrel, che inte vierzidure dal ultin cuart di ore di zûc si cjate tal puest just, tal moment just e cu la bale juste: pinelade di Brienza, conclusion cul cjâf e balon tal sac daûr di Karnezis.

Badu, Danilo e Bruno Fernandes a provin a dreçâ la partide, ma al è masse tart e a rivin a fâ masse pôc. Cussì il risultât nol cambie e l’Udin al siere in neri une partide grise. E mancul mâl che i risultâts di chês altris scuadris no van masse mâl pe scuadre di balon furlane.