Atalanta – Udinese 2-0

udin
Une altre zornade no pal Udin. A Bergamo la scuadre furlane e conferme di no rivâ a vinci fûr di cjase e di vê problemis atletics, tatics e psicologjics. Che e sedi la classiche ande dal imprin dal campionât che dopo al viôt la scuadre cressi, zuiâ ben, fâ ponts e rivâ a lâ in Europe, compagn dal an passât? Sperìn, ma di une formazion che e à tacât la preparazion in Lui par vie dai impegns europeans si si spietisi alc di plui, massime sul plan de tignude fisiche e dal zûc. Cun di fat, ancje in cjase de Atalanta, compagn che a Verone e almancul in part ancje in Friûl cuintri dal Genoa, l’Udin al è flaput, nol à iniziative e al à pardabon pocje grinte, soredut vie pal prin timp, nancje che al ves chê di contentâsi daurman di puartâ a cjase dome un pontut. In confront la Atalanta e somee une siore scuadre.

Dopo di sù par jù vincj minûts dal prin timp plens di erôrs di dutis dôs lis bandis, la Atalanta e cjape in man il comant des operazions: ben cuvierte daûr e organizade miôr de metât dal cjamp indenant. L’Udin al clope in difese, cun Heurtaux e Naldo che a patissin la pression e il dinamisim di Denis, e no si lu viôt in atac, a part un cuintripît di Maicosuel. La Atalanta e sburte e i blancs e neris si sierin. Cussì, a fuarce di dâi, cun Stendardo, Moralez e Denis, prime de polse al rive il gol dai bergamascs: corner e incuarnade dal Tanque. Gol dal ex e un a zero.

Tal secont timp l’Udin al è miôr – o, almancul, mancul piês – che tal prin timp. Par un moment al somee che la ocasion par patâ e rivi su rigôr: e je dome une ilusion, stant che il fal di Stendardo al è ma al è ancje un fûr zûc e pal assistent di Giacomelli, Faverani, cheste e je la robe plui impuartante. Nuie ce fâ.
La scuadre di Guidolin e cres pe intensitât dal so zuiâ ma no pal so zûc, che no si viôt e se si viôt al mostre une muse disordenade in ducj i setôrs. Cun di plui i blancs e neris a pierdin Badu, infortunât, e i aversaris no si scomponin e si mantegnin ordenâts e decîs. E cussì al rive il doi a zero, ancjemò firmât di Denis, che al profite di une durmide di Naldo.

La partide pal Udin si fâs ancjemò plui di rive sù. Al jentre Nico Lopez e al prove a dâ fastidi ae difese aversarie ma nol è masse fortunât, intant che Di Natale no si lu viôt e nancje i ultins tentatîfs a van a segn. E vinç la scuadre miôr, la Atalanta.

L’Udin al à tant lavôr ce fâ par tornâ a plomp. La prossime partide e je chê cul Cagliari.

Advertisements

Il Friûl al mostre la musiche e la lenghe ancje a Milan e a Dia/Die

djtubetok

Al è stât un lunc fin di setemane là che la lenghe furlane e la musiche par furlan si son confermadis prodots di esportazion. Dut al è tacât Joibe ai 26 di Setembar, cuant che Lino Straulino al è tornât li dal circul La Scighera. Tal mês di Mai si veve fermât propit alì, su la strade par Pinerolo, là che al è stât protagonist di un dai incuintris di La mia lingua suona…IN TOUR. In cheste ocasion il so al è stât un conciert di presentazion dal so gnûf disc, Gorai, e un passaç in direzion nordovest, viers Dia/Die, tal Stât Francês.

Propit in cheste citât, a tacâ dai 25 di Setembar e fintremai al 1n di Otubar, al è in plen davuelziment il festival Est Ouest, che chest an al è dedicât a Triest e al Friûl: une biele rassegne che e ten dongje musiche, leterature e storie e là che il Friûl al mostre la muse e la lenghe propit cun Lino Straulino, cui Arbe Garbe e cun DJ Tubet.

Magari cussì no tal sottitul de manifestazion il Friûl no si lu viôt, ma si menzonin dome Triest e la Italie dal nordest: al vignarès di comentâle tant che une robe tipiche taliane se no fos ancje tipiche francese…

Cun dut achel o pensìn che dopo dai concierts e di chês altris performances di Lino Straulino, Arbe Garbe e DJ Tubet ancje a Dia/Die, che tra lis altris si cjate intun dipartiment là che si fevele ancje par ocitan e par francoprovençâl, a varan discuviert che tra Triest e la Italie dal nordest al è ancje alc altri…

Udinese – Genoa 1-0

fuarceudinees

L’Udin al vinç ma al convinç une vore pôc. La partide di nossere cuintri dal Genoa e segne un svolt par ce che al tocje i risultâts e la classifiche, ma no ancjemò in cont de cundizion psicofisiche e dal ategjament tatic de formazion furlane. La fantasime de crisi nere che si veve fate indenant inte partide cul Chievo e je stade parade indaûr, però al è ancjemò tant ce fâ par viodi la scuadre che nus plasarès viodi, cuntune cierte continuitât.

I blancs e neris si presentin in cjamp, tra lis altris, cu la cubie Maicosuel-Di Natale denant e cun Naldo al puest di Bubnjic in difese. La partide si ivie cuntune ande avonde lente cun l’Udin che al cîr di fâ valê la sô supremazio teritoriâl e il Genoa impegnâts oredut a no fâsi mâl, sierât indaûr par rispuindi in câs in cuintripît.
Dopo di un cuart di ore e rive la prime azion degne di chest non che e puarte al tîr prime
Heurtaux e dopo Basta, ma la bale e bat intor dai ros e blu Perin e De Maio. L’Udin al fâs zirâ la bale ma al rive a jessi pericolôs dome cun cualchi iniziative individuâl: par esempli cun Maicosuel, che però nol centre la puarte. Ator de mieze ore al rive il prin pericul pe puarte difindude di Kelava, che al mande in corner une conclusion di Konate. Pal ultin cuart di ore de prime frazion nuie altri ce contâ.

La seconde frazion e somee la fotocopie de prime: flape e brutute. Dopo siet minûts Guidolin al decît di tirâ fûr chel che fin in chel moment al è someât il miôr dai siei, Maicosuel, e al so puest al met dentri Muriel.
La musiche no cambie e si viôt dome une conclusion dal stes Muriel. Il destin de partide al somee segnât: sossedadis in tribune e risultât blocât. Par fortune nol è cussì. Al 77n Di Natale al bat une punizion e in graciis di une deviazion la bale e va tal sac. Al è un a zero e cussì al reste fintremai ae fin.

Zornade europeane des lenghis, a Udin une cunvigne su dirits e identitât

palaçantonini

Chê dai 26 di Setembar e je la Zornade europeane des lenghis. Cheste dade e je stade definide passe dîs agns indaûr, ai 6 di Dicembar dal 2001, de bande dal Consei de Europe – cemût che al ven ricuardât ancje achì – cun chê di promovi il pluralisim linguistic tes sôs diviersis espressions.
Ogni an e ven memoreade ator cun iniziativis di pueste. O pensìn che nol sedi un câs, par esempi, che propit ai 26 di Setembar a Udin si davuelzi une cunvigne dal  titul Od zakona do identitete preko jezika? – Dalla legge all’identità attraverso la lingua?.

L’incuintri, che al tache a 9 a buinore li de sale “Roberto Gusmani“ di Palaç Antonini (Universitât dal Friûl), al è inmaneât dal circul culturâl Ivan Trinko di Cividât, inte suaze dal progjet Interreg ‘Lex  – Analisi, metude in vore e disvilup de tutele des minorancis tal Stât talian e in Slovenie (2011-2014)’.

Il program de zornade e altris informazions ancjemò in cont de cunvigne si cjatin achì: http://www.skgz.org/convegno-lex-dalla-legge-allidentit-attraverso-la-lingua.

Chievo – Udinese 2-1

udin

Zornade di campionât negative pal Udin che cuintri dal Chievo nol rive a puartâ a cjase nancje un pont.

La partide e tache ben pe scuadre di Guidolin, che e va in gol dopo nancje un minût: il Mago Maicosuel al fâs un blitz suntune bale zuiade mâl di Cesar, al salte Puggioni e le met dentri a puarte vueide. Il Chievo, però, al reagjìs daurman e intun cuart di ore al rive al un a un cun Pellissier, dopo che za par un pâr di ocasions i venits si vevin fat viodi in maniere pericolose des bandis di Kelava.

Scuadris in cjamp a ‘nd è dome une une: il Chievo. I aversaris dal Udin a mostrin une cundizion psicologjiche e atletiche une vore miôr de scuadre di Guidolin, che daûr, soredut cun Heurtaux e Bubnjic, e patìs la vivarosetât di Pelissier e in gjenerâl e ven metude sot dal snait dai zâi e blu. Il rapuart di fuarcis tra lis dôs formazions si palese prime de fin dal prin timp, cuant che al 40esim al rive il gol di Rigoni che, cul jutori involontari di Danilo le met tal sac, daûr di Kelava.

La uniche reazion dal Udin e je chê dal gnervôs, cu lis amonizions par Danilo e Basta, intant che devant Lazzari no si viôt, a Muriel no rive une bale e ancje Maicosuel al disparìs.

Tal secont timp Guidolin al mude la disposizion dai siei zuiadôrs cun Di Natale che al cjape il puest di Lazzari. La jentrade di Totò si sint, cun Puggioni che al ven impegnât propit dal numar 10. L’Udin nol è plui la fantasime al prin timp: al è plui atent in difese e plui dinamic indenant, ma al clope te metât dal cjamp. Il Chievo al ten bot aes iniziativis de scuadre furlane, che pe plui part a son azions individuâls e no il risultât di schemis o di orchestrazions coletivis. I parons di cjase a àn ancje un tic di fortune, al 72esim, cuant che Basta al cjape la travierse. La pression dal Udin e lis ocasions par rivâ al doi a doi a van in cressi, cun Heurtaux e Di Natale, ma la puarte di Puggioni no si vierç, il Chievo no si scompon e si concuiste i trê ponts.

Il secont timp dal Udin al è discret, ma nol è avonde. Il ko patît al è just e il Chievo al à meretât di vinci.
In chescj agns l’Udin al è simpri partît malut e si à dreçât, e ben, vie pe stagjon. Fasaraial compagn ancje chest an? Al è ce che a sperin i tifôs ancje se i motîfs di preocupazion, de jessude de Europa League a vuê, a son tancj e salacor a son ancje daûr a cressi. La prossime partide e sarà cul Genoa.

Volpares. Tiere, solidarietât e fieste

volparesfieste

Te Basse Furlane al è un puest dulà che si lavore la tiere e si fâs un servizi sociâl. E je la Fatorie Sociâl Volpares, che si cjate tal teritori dal Comun di Palaçûl: un progjet di solidarietât metût adun di un trop di sogjets, a tacâ de A.S.S. 5 “Basse Furlane” e dal Consorzi di Cooperativis Sociâls “Il Mosaico”.

Ce che e je e ce che e fâs la ‘Fatorie Sociâl’ al ven contât ta chest articul, jessût su Il Fatto Quotidiano un mês indaûr, e alc in cont di cheste iniziative si lu cjate ancje su La Patrie dal Friûl.

Une ocasion par cognossi plui di dongje il progjet, almancul par cui che al è in Friûl, e je la Fieste di fin Istât che si fâs domenie ai 22 di Setembar, dilun vie pe zornade. Cemût che si lei chi disore e ancje achì, si tache a 11 di buinore e si va indenant tal dopodimisdì cu la presentazion dal numar gnûf de riviste La Patrie dal Friûl e cuntun conciert di FLK e Lino Straulino.

Informazion in cont de fieste e dal progjet si cjatin ancje achì.

La mê lenghe e sune il rock…a Remanzâs ai 18 di Setembar

cover_la_me_lenghe_e_sune_il_rock

La produzion musicâl te lenghe proprie e je une des manifestazions plui interessantis de esistence, de resistence e de vivarositât culturâl des minorancis e des nazions cence stât. Chest aspiet al vâl ancje tal câs dal Friûl, là che za di timp la lenghe furlane e ven doprade in musiche in maniere continuative e cun bogns risultâts.

Cheste situazion in moviment e cjate une sô prime descrizion analitiche tal libri di Marco Stolfo, La mê lenghe e sune il rock (e no dome chel). Friûl, Europe.

La publicazion, metude adun  cuntune atenzion multidissiplinâr che e ten dentri ancje storie, politiche, societât, dirits linguistics, leterature e tutele des minorancis, al met dongje dâts, informazions, riferiments e testemoneancis e presente une une esplorazion organiche e detaiade de realtât furlane, de seconde metât dal secul passât al dì di vuê.

Dongje di chê, il libri al fâs indenant une panoramiche slargjade suntune schirie di altris esperiencis ator pe Europe, tra lenghis, sunôrs, ritmis e artiscj, de Ocitanie ae Sardegne, dal Paîs Basc ai Grisons, de Corsiche al Gales, dai Paîs Catalans ae Scozie, de Galizie ae Ladinie, des Asturiis ai sami dal  Circul Polâr Artic fintremai ai grecanics e ai albanês de Basse Italie. Cun di plui, musiciscj, gjornaliscj e operadôrs che a fasin part des comunitâts furlane, sarde, ocitane, basche, catalane, slovene, ladine, bretone, albanese e frisone si cjatin adun intune taule taronde virtuâl, di dulà che a saltin fûr riflessions, valutazions e ideis.

La publicazion (par furlan e par talian) e da cont di un lavôr di ricercje e di documentazion che nol è dome di lei, ma ancje di scoltâ, stant che al ten dongje un cd cun cercis di musiche furlane «gnove» e «fuarte» e di chê cjantade par sart, par sloven, par ocitan, par todesc, par ladin e par albanês. Chel lavôr al è stât ancjemò disvilupât in altris oparis, a tacâ di Occitania, Friuli, Europa. La mia lingua suona il rock, e di chel e je saltade fûr ancje la trasmission cuindisinâl Babêl, Europe, che si pues scoltâle su lis frecuencis analogjichs e digjitâls di Radio Onde Furlane.

Miercus ai 18, a  a tacâ di 9 mancul un cuart, a Remanzâs, li de aree gnove di Vicul Italico, e sarà une presentazion di ‘La mê lenghe e sune il rock (e no dome chel). Friûl, Europe’ cul autôr, cun Pauli Cantarut e cun DJ Tubet. La partecipazion e je libare. Altris informazions si cjatin achì.

Udinese – Bologna 1-1

udin

Si sperave che e fos la seconde vitorie in campionât e in cjase e impen e je saltade fûr une pate che di une bande e da avonde sodisfazion e di chê altre e fâs pensâ parsore. De partide dal Udin cuintri dal Bologna, dopo de vitorie di dôs setemanis indaûr cul Parma e di cuindis dîs di polse, si si spietavisi une prestazion positive sei sul plan dal zûc che dal pont di viste dal risultât, par parâ vie i nui scûr dal inviament de stagjon, marcât de jessude dolorose de Europa League, ma no je lade propit cussì. Anzit. La scuadre di Guidolin, cence Brkic, Heurtaux, Pinzi e Basta e cun Di Natale che ancjemò nol somee masse in forme (ancje se al segne il gol dal un a un: fuarce Totò!), no rive a butâ jù lis bariduris fatis sù dai ros e blu emilians, che a rivin in Friûl cun chê di non cjapâlis, e fintremai e riscje di pierdi.


Tal prin timp la formazion furlane e mostre di vê un potenziâl tecnic plui alt dai aversaris, che a cirin soredut di no vê fastidis, di rompi la iniziative dal Udin e di rispuindi in cuintripît cun Diamanti, ma no rive a esprimilu in concret e a imponi il so predomini. I zuiadôrs blancs e neris a somein lâ indenant cul fren a man tirât e in gjenerâl la partide e je flapute. Lis conclusion plui pericolosis dal Udin a son un tîr di Muriel, che Curci al rive a parâ in bande, e un colp cul cjâf di Pereyra, fûr di pôc. Des bndis di Kelava pôc o nuie, a part Moscardelli che al proteste par un conta inte aree di rigôr.

Il secont timp si vierç cul Bologna che al mostre une propension ofensive plui fuarte che te prime frazion, cun dôs conclusions di Moscardelli tal prin cuart di ore, ma in gjenerâl ritmis, emozions e iniziativis no son alc e ce. Il svolt al rive in graciis di une punizion tirade benonon di Diamanti: un a zero pai ospits.
L’Udin al patìs il colp e la sô reazion si le viôt dome cu la (tardive?) jentrade tal cjamp di zûc dal ‘Mago’ Maicosuel. Il Bologna si difint e l’Udin al stente a rindisi pericolôs. Cussì l’un a un al rive a sîs minûts de fin: lu segne Di Natale, che cun mistîr al concretize inte maniere miôr la ispirazion di Maicosuel.
Tai ultins minûts l’Udin al prove a viodi di vierzi un altri viaç il troi just che al puarte il gol, ma no i rive. Al finìs un a un e al è just cussì, pal Bologna che si difint e ch al riscje di vinci e pal Udin che al riscje di pierdi – e par chest la paritât finâl e à un valôr positîf – e che nol da masse sodisfazions ai siei tifôs ni pal zûc ni pes cundizions atletichis e psicologjichis. Che i mancjino grinte e convinzion?

Vençon e Piobesi, dal 1977 zimulament in musiche

domovençon

A son tancj i elements di contat tra il Piemont e il Friûl: di chei di caratar culturâl, storic e economic a chei che a divegnin dai flus migratoris fintremai ae necessitât di fâ cuintri al savoltament dal teritori, cemût che si lei ancje achì.
Leaments un vore fuarts, peâts ancje ae presince di imigrâts furlans in Piemont, a son chei che a son nassûts e che si son disvilupâts in ocasion dal taramot dal 1976 in Friûl e de ricostruzion.

Un esempli di chestis relazions di solidarietât e amistât al è chel dal rapuart jenfri lis comunitâts di Piobesi Torinese e Vençon. Dal 1977 al esist un zimulament che in particolâr al ten dongje la Filarmonica Piobesina e la Bande Musicâl di Vençon. Vuê e doman a Vençon i doi complès bandistic a fasin fieste cuntune prime sfilade ator pal paîs des bandis e des majorettes tal dopodimisdì e une seconde parade doman prime de messe grande. Altris informazions si cjatin achì.

Friuli Doc par furlan (almancul alc…)

friulidoc

E tache vuê la edizion 2013 di Friuli Doc. Une des novitâts plui interessantis de innomenade rassegne enogastronomiche che si davuelç a Udin tal mês di Setembar e je chê che e tocje la presince de lenghe furlane e de produzion culturâl par furlan, che chest an e je un pôc plui rilevante dai agns passâts.

Al è ancjemò cetant ce fâ par viodi Friuli Doc pardabon ‘Friuli’ e ‘Doc’, ven a dî cu la lenghe furlane e chês altris lenghis ‘altris’ dal Friûl – il sloven e il todesc – dopradis in maniere normâl e continue tant che lenghis di comunicazion de manifestazion. Dut câs al è za stât fat un pas indenant, ancje avonde interessant.

Udin par furlan

In cheste direzion al à tacât a movisi il Comun di Udin: inte suaze di Udin par Furlan, il progjet integrât di comunicazion istituzionâl in lenghe furlane fat de cooperative Informazione Friulana par cont de aministrazion comunâl, di doman a domenie, di 10 a buinore a misdì, Friuli Doc al vignarà contât in direte su lis frecuencis di Radio Onde Furlane (90 Mhz te plui part dal Friûl; 90.2 e 106.5 in Cjargne; 96.6 a Colonia Caroya in Argjentine; in dut il mont in streaming ae direzion www.ondefurlane.eu) e sul sît www.udinparfurlan.eu, cun trasmissions di pueste che a vignaran fatis li de postazion de “radio libare dai furlans” che si cjate in Place dai Grans.
Udin par Furlan al cjape dentri ancje resoconts e articui che a vegnin publicâts sul cuindisinâl Il Diari e rubrichis televisivis specifichis che a van sù su Telefriuli. Altris informazions par furlan si cjatin ancje intune altre pagjine web dal Comun, chê di Furlan in Comun.

gorai-300x285

In cont de produzion culturâl a meretin segnalâts in particolâr doi apontaments cu la musiche.
Il prin al è usgnot a tacâ di nûf sot sere. In Place dai Grans al rive il ‘mestri’ dai cjantautôrs furlans, Lino Straulino, che al presente il so il gnûf, ‘Gorai’, un album dal sunôr cjalt e ‘vintage’, regjistrât in analogjic e stampât ancje su vinîl. Cun lui sul palc ancje Jonokognos e Stefano Fedele.
Il secont al è doman, cuant che tal chel stes spazi e vignarà fate la presentazion di “Suns, antologjie de gnove musiche furlane”. Al incuintri, che al vignarà moderât dal diretôr de ARLeF – Agjenzie regjonâl pe lenghe furlane, William Cisilino, a parteciparan  i curadôrs dai trê volums,  Luigi Gregoris e Marco Stolfo, il coordenadôr dal progjet Valter Colle e i gjornaliscj Nicola Cossar e Andrea Ioime.

suns.copertina.antologia-260x300

La antologjie e vignarà distribuide propit a tacâ di Friuli Doc, li dal spazi de ARLeF, simpri in Place dai Grans, in contemporanie cul inviament di un scandai su la gnove musiche furlane. 500 copiis de opare a son a disposizion di cui che al partecipe ae iniziative: si à di cjoli la schede, votâ l’artist furlan preferît e consegnâle al personâl de Agjenzie. De setemane che e ven, la stesse operazion si le fasarà ancje vie internet.

testatazPDF

Par ce che al tocje la editorie par furlan, propit tes zornadis di Friuli Doc cui che al à voie di provâ a lei il mensîl in lenghe furlane La Patrie dal Friûl al podarà vê un abonament gratuit a la riviste par trê mês, fin a la fin dal 2013. Par ricevi il gjornâl, cemût che al ven ricuardât ancje achì, si podarà ritirâ une schede di pueste e consegnâle compilade li di trê ponts di difusion: il pont informatîf de de ARLeF, il stand Friûlpoint e la ostarie Pieri Mortadele in vie Bartolini.

Tal program di Friuli Doc a son ancje dôs iniziativis inmaneadis de Societât Filologjiche Furlane: ai 14 di Setembar a 11 a matine e je une conference dal titul Il bon mangjâ dal Friûl e a 5 sore sere al è un incuintri cun Ulderica Da Pozzo e Enos Costantini.