Bobby Sands e i siei compagns, il cjant de lodule e il ricuart di Radio Onde Furlane

This image has an empty alt attribute; its file name is bobby-sands.jpg

Tra i mês di Mai e di Avost dal 1981 dîs fantats irlandês a pierderin la vite inte preson di Long Kesh, pôc fûr di Belfast, intun siopar de fam inviât par domandâ che ur fos ricognossût il status di presonîrs politics. Tra di lôr al jere ancje Bobby Sands (Robert Gerard “Bobby” Sands – Roibeard Gearóid Ó Seachnasaigh), ricuardât inmò in dì di vuê ator pal mont tant che simbul de lote pe libertât e de resistence dai popui cuintri de opression nazionâl e sociâl.

A son passâts cuarante agns di in chê volte e in ocasion di chest inovâl “taront” Radio Onde Furlane e ricuarde chei fats cuntune serie di trasmissions di pueste dal titul Al jevâsi de lune.

Dopo de prime part dal progjet, screade ai 28 di Fevrâr cuntun speciâl che al contave lis lidrîs e il davuelzisi di chê vicende, e lade indenant dal prin ai 17 di Març cu la leture des pagjinis dal diari che Bobby Sands al scrivè di scuindon intant des primis disesiet zornadis dal siopar de fam, la seconde si invie vuê, ai 5 di Mai, juste cuarante agns dopo de muart di Bobby Sands, cuntune trasmission dedicade ae sô persone, a ce che al pensave e a ce che al faseve, e e larà dilunc fintremai tal mês di Avost.

This image has an empty alt attribute; its file name is logo_web.png

Cun di fat, intes zornadis là che al cole l’inovâl de muart di ognidun dai dîs militants republicans, si ur dedicarà une trasmission là che si conte cui che a jerin cu la zonte, là che al è pussibil, di cjançons o altris materiâi sonôrs che ju rivuardin. Se Bobby Sands al reste il plui innomenât, no si pues dismenteâ chei altris zovins che a àn pierdût la vite ta chê lote.

Dopo dal prin apontament, par ordin, si fevelarà di Francis Hughes miercus ai 12 di Mai, di Raymond McCreesh e di Patsy O’Hara vinars ai 21 di Mai, di Joe McDonnell joibe ai 8 di Lui, di Martin Hurson martars ai 13 di Lui, di Kevin Lynch domenie prin di Avost, di Kieran Doherty lunis ai 2 di Avost, di Thomas McElwee domenie ai 8 di Avost e, par finî, di Micky Devine vinars ai 20 di Avost.

Dutis lis pontadis a laran in onde tor 8.15, 14.40 e 18.10 dopo dal radiogjornâl, fûr che chês che a colin di domenie che a laran invezit in onde cun chescj oraris: 8.00, 13.30 e 17.30.

Radio Onde Furlane si pues scoltâle sui 90 Mhz inte plui part dal Friûl, sui 90.200 Mhz in Cjargne e in streaming in dut il mont. Dopo des trê emissions dtis lis pontadis di Al jevâsi de lune si podarà tornâ a scoltâlis in podcast sul Spreaker e sul Spotify di Radio Onde Furlane.

Lis trasmissions a son curadis di Carli Pup, che al jere za stât daûr de prime serie di programs e che vincj agns indaûr al veve fat la traduzion par furlan dal diari scrit di Bobby Sands vie pai prins dîs dal so siopar de fam.

This image has an empty alt attribute; its file name is diari-bobby-sands.jpg

Par Bobby Sands la lodule e jere un dai simbui de libertât. Si pues sierâle intune scjaipule, torturâle e fâi dut il mâl pussibil, ma no cjantarà mai par cui che le à impresonade. Se si vûl sintîle a cjantâ, bisugne lassâle libare.

Bobby Sands al è muart cuarante agns indaûr. Cun lui a àn pierdût la vite ancje chei altris nûf volontaris republicans.
E je une feride che e bruse ancjemò.
Dut câs, la lodule e va dilunc a cjantâ e, se si le scolte ben, si visisi che e cjante propit la sô cjançon di libertât:

Tiocfaidh ár lá – La nestre dì e vignarà

Gran Bal Dub + Alidé Sans + Perynn Bleunven + Musicos pola Oficialidá + Alan Stivell (interviste) = Babêl Europe 7/2021

La gnove pontade di Babêl Europe, la trasmission cuindisinâl dedicât a lenghis, musichis, minorancis e nazions cence stât, in programazion su Radio Onde Furlane vuê, martars ai 30 di Març a 11 a buinore, e po doman, miercus ai 31, a une dopo di misdì, e sabide ai 3 di Avrîl a une e mieze, e je une repliche dal episodi numar 7 dal 2019.

Cussì e sarà la pussibilitât di tornâ a scoltâ la interviste cun Alan Stivell, fate a Mestre in ocasion dal so conciert di vinars ai 22 di Març dal 2019, là che il cjantant, arpist e polistrumentist di divignince bretone al fevele di musiche, di lenghis, di dirits, di Bretagne, di Catalogne e di Europe.

This image has an empty alt attribute; its file name is gran-bal-dub.jpg

Si scoltarà ancje la musiche di Gran Bal Dub, progjet di contaminazion jenfri la musiche tradizionâl ocitane e la eletroniche là che si dan dongje Sergio Berardo dai Lou Dalfin e Madaski dai Africa Unite, e dai Musicos pola Oficialidá, une sorte di rapresentative dai musiciscj asturians, e lis versions speciâls dai imnis nazionâi de Ocitanie e de Bretagne, interpretadis de cjantante aranese Alidé Sans e de cjantante bretone Perynn Bleunven adun cun tancj siei conazionâi, tacant dal stes Alan Stivell.

Radio Onde Furlane si scolte sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, e su Facebook.

Dutis lis pontadis  di Babêl Europe si cjatin ancje in podcast su Spreaker e su Spotify.

Fermin Muguruza + Xavi Sarrià + Akelarre + Ane + Doctors de Trobar + Adwaith + Massimo Silverio = Babêl Europe 06/2021

Musiche di scoltâ e di… cjalâ. Inte gnove pontade di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât, si fevelarà ancjemò di gnovis produzions musicâls, ma al sarà spazi ancje pal cine e plui in gjenerâl pe produzion audiovisive.

La atenzion e vignarà pontade prin di dut in direzion dal Paîs Basc. Si scoltarà alc di gnûf dal repertori di Fermin Muguruza, che al è daûr a lavorâ sul so gnûf cine di animazion Black is Beltza II – AINHOA, e si fevelarà dai diviers premis Goya 2021 vinçûts dai cines bascs Ane (atore protagoniste miôr, atore rivelazion miôr e senegjature adatade miôr) e Akelarre (direzion artistiche, trucadure, costums, efiets speciâi e coment musicâl). Cussì al saràa spazi par almancul une cerce dal coment musicâl premiât, firmât des composidoris Aránzazu Calleja e Maite Arroitajauregi.

Il sest viaç babelic dal 2021 al cjaparà dentri ancje i Paîs Catalans, cun Xavi Sarrià e i siei gnûfs progjets tra musiche e audiovisîf, e la Ocitanie, cuntun piçul salt indaûr tal timp par tornâ a cjatâ i Doctors de Trobar. Cun di plui, in continuitât cu la trasmission dai 2 di Març stâts, si scoltarà la seconde version de cjançon par furlan e par galês, che e je il risultât de colaborazion tra lis rockers galesis Adwaith e il cjantautôr cjargnel Massimo Silverio, che juste in chescj dîs al scree ancje il so gnûf disc solist.

L’apontament di cheste setemane cun Babêl Europe al è in direte vuê, martars ai 16 di Març, a 11 buinore e po in repliche tal dopo di misdì di doman, miercus ai 17 (h. 13), e di sabide ai 20 (h.13.30).

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu). Dopo des sôs trê emissions vie pe setemane, ancje cheste gnove pontade si podarà tornâ a scoltâle in rêt su Spreaker e su Spotify.

This image has an empty alt attribute; its file name is logo_web.png

Il Parlament european ur gjave la imunitât a trê eurodeputâts indipendentiscj catalans. What Europe has made of Europe?

Lunis ai 8 di Març il Parlament European al à votât a maiorance a pro dal ritîr de imunitât garantide fin cumò ai trê eurodeputâts catalans Carles Puigdemont, Toni Comín e Clara Ponsatí.
L’ex President de Generalitat, Puigdemont, e i doi ex consellers (ven a dî “ministris” o “assessôrs”) dal guvier catalan, Comín e Ponsatí, a son acusâts tal Stât Spagnûl di reâts grâfs che a àn a ce fâ cul lôr rûl inte organizazion e inte gjestion dal referendum pe indipendence dal 1n di Otubar dal 2017. Par chel a son stâts “libars di scugnî lâ” inte Belgjiche e in Scozie e intant dal lôr esili si son candidâts aes elezions europeanis dal 2018 e a son stâts elets inte assemblee di Strasburc e Brussels.

Lis acusis fatis indenant a son dutis di caratar politic, cundut a chel – o ben, magari cussì no: juste par chel – i eurodeputâts a maiorance a àn a votât per che ur vegni gjavade la imunitât, lant daûr de votazion fate inte Comission juridiche dal Parlament European ai 23 di Fevrâr.
Tal câs di Puigdemont, a àn votât a pro de revoche in 400 di lôr, intant che si son esprimûts cuintri 245 e altris 45 si son astignûts e son sù par jù compagn i numars par Comín e Ponsatí: 404 a pro, 247 cuintri e 42 astignûts.

Il vôt al jere segret e fasint doi cont si viôt che a àn votât a pro de revoche i popolârs, la massime part dai conservadôrs e la plui part (ma no ducj, cualchidun al è lât plui daûr de sô cussience che dai ordins di scudarie) dai socialiscj e dai liberâi. Ur àn votât cuintri cun convinzion i eurodeputâts dai grups dai Verts/Aleance Libare Europeane e de Çampe Europeane, chei di altris grups plui piçui e uns pôcs di “dissidents”.

E je une vore significative la maniere che, in cheste ocasion, si son dividûts i esponents dai partîts che a poin il guvier spagnûl: di une bvande i socialiscj dal premier Pedro Sanchez a àn votât adun cu lis diestris spagnolistis dal PP, di Ciudadanos e di Vox; di chê altre i rapresentants di Podemos a àn votât a pro dal manitigniment de imunitât.

Il risultât dal vôt al è che a tornin a vignî inviadis lis proceduris pe estradizion dai trê europarlamentârs, che a son stâts elets regolarmentri tes ultimis elezions europeanis, par che a vegnin judicâts de justizie spagnole. Cumò la bale e passe ai tribunâi de Belgjiche, dulà che a son a stâ in esili Puigdemont e Comín, e de Scozie, là che si è rifugjade Ponsatí.

Timp indaûr, la magjistrature belghe e veve dineât a la estradizion tal Stât Spagnûl di un altri ex conseller catalan, Lluis Puig, ancje lui rifugjât a Brussel, contestant lis fondis dome che politichis des acusis cuintri di lui. Simpri la magjistrature belghe e veve blocât la estradizion di Josep Valtonyc, un rapper catalan condanât a trê agns e mieç di reclusion par vie dai tescj des sôs cjançons.

Cun chel vôt, il Parlament European al à dât la sô poie ae strategjie persecutorie che e ven puartade indenant de bande de classe politiche e dai tribunâi dal Ream di Spagne e plui in gjenerâl al à mostrât dipendence e salacor sotanance rispiet ai Stâts e ai lôr guviers.

Ancje par chel, magari cussì no, la votazion di lunis si pues calcolâle tant che une gnove brute figure de Union Europeane, dongje de sielte fate doi mês indaûr de Comission Europeane di no cjapâ sù lis propuestis fatis indenant cu la iniziative dai citadins Minority SafePack e in linie cul ategjament mantignût des istituzions europeanis intant che Madrid al mandave polizie e militârs a petâ milions di eletôrs in file ai seçs par partecipâ al referendum su la autodeterminazion dal prin Otubar 2017.

L’unic dât positîf dal vôt di lunis stât al è chel de consistence de oposizion: tra vôt contraris e astignûts a son sù par jù 300 di lôr.
Pal rest, lis istituzions europeanis a pierdin (ancjemò) crodibilitât e autorevolece e in cont de idee di Europe “unide inte diversitât” (e intai dirits di fonde e intes libertâts), al vignarès di dî, recuperant a miezis un viers di William Wordsworth: “What Europe has made of Europe?”

Massimo Silverio + Adwaith + Eneritz Furyak + Kneecap + Dr. Drer & CRC Posse + Peppa Marriti Band = Babêl Europe 05/2021

La atualitât des produzions di discs e videos e chê des iniziativis culturâls e politichis, cence dismeneteâ zornadis impuartantis, storie e inovâi. Al è ce che e promet la cuinte pontade dal 2021 di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât.

Il gnûf viaç ator pe Europe de diversitât linguistiche e de creativitât musicâl puartât indenant su la “radio libare dai furlans” al tocje Paîs Basc, Friûl, Gales, Irlande dal Nord, Sardegne e Arberie.

Si scoltarà une altre cerce di Emadan, il disc gnûf di Eneritz Furyak, za presentât in anteprime un mês indaûr su Onde Furlane, che al è jessût ai 18 di Fevrâr, e il risultât de colaborazion tra il cjargnel Massimo Silverio e lis rockers galesis Adwaith.

Si fevelarà dai cuarante agns dal siopar de fam dai volontaris di IRA e INLA in preson a Long Kesh, che al ven memoreât su Radio Onde Furlane cuntune gnove trasmission, dal libri di Filosofia de Logu che al fâs indenant une schirie di resonaments interessants in conte de Sardegne e al vignarà presentât ai 4 di Març, dai inzornaments in cont dal câs di Pablo Hasél e de situazion in Catalogne dopo des elezions de domenie di Sant Valantin e dal video gnûf de Peppa Marriti Band.

Par chel si scoltarà ancje un toc di cheste che e je la formazion di ponte de sene musicâl de minorance albanese in Italie, dai sarts Dr. Drer & CRC Posse e dai rappers nordirlandês Kneecap.

This image has an empty alt attribute; its file name is peppa_marriti_band.png

Il gnûf viaç babelic ator pe Europe de diversitât linguistiche e de creativitât musicâl al è in programazion vuê, martars ai 2 di Març, a 11 in direte e po in repliche doman, miercus ai 3 (h. 13), e sabide ai 6 (h. 13.30)

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu). Dopo des sôs trê emissions vie pe setemane, ancje cheste gnove pontade si podarà tornâ a scoltâle in rêt su Spreaker e su Spotify.

This image has an empty alt attribute; its file name is logo_web.png

Eneritz Furyak + Pablo Hasél + Klunk + Guido Carrara e Lussia di Uanis + Kosovni Odpadki + The Dubliners + Sign It Europe = Babêl Europe 03/2021

Un viaç tra storie, memorie, atualitât, novitâts discografichis e fintremai anteprimis. Al è ce che e promet la tierce pontade dal 2021 di di Babêl Europe, il program cuindisinâl di Radio Onde Furlane dedicât a lenghis, musichis, minorancis e e nazions cence stât.

Tal apontament di cheste setemane – in direte vuê, martars ai 2 di Fevrâr a 11, e po in repliche tal dopo di misdì di miercus ai 3 a une e in chel di sabide ai 6 a une e mieze – si scoltarà une anticipazion dal disc gnûf de cjantante basche Eneritz Furyak e une altre cerce in anteprime de racuelte di cjançons dedicadis ai setante agns des Lotis dal Cormôr, che e je daûr a saltâ fûr ca di pôc: il toc metût adun di Guido Carrara e Lussia di Uanis.

Cun di plui si fevelarà de gnove condane par insolencis cuintri de monarchie e par apologjie dal terorisim, confermade de Audiencia Nacional cuintri dal rapper catalan Pablo Hasél, cence dismenteâ i gnûfs inzornaments in cont des iniziativis dai citadins europeans a pro di lenghis, dirits e minorancis, Minority SafePack e di SignItEurope, l’inovâl de Domenie di Sanc dai 30 di Zenâr dal 1972 a Derry, inte Irlande dal Nord, e la Zornade de Memorie. Par chel si scoltaran ancje un classic de cjançon popolâr irlandese inte version dai Dubliners, un toc dal repertori de band yiddish rock Klunk e un dai gurizans Kosovni Odpadki.

Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), ancje cheste pontade di Babêl Europe e sarà a disposizion in rêt, su Spreaker e su Spotify.

This image has an empty alt attribute; its file name is logo_web.png

Mauresca Fracas Dub + Alessio Velliscig + Claudi Martì + Adwaith + Sa Ratapignata = Babêl Europe 26/2020

Gnovis produzions discografichis, inovâi impuartants, atualitât e un piçul belanç de anade che e je daûr a finî. Al è ce che al propon la ultime pontade dal 2020 di Babêl Europe, il program cuindisinâl di Radio Onde Furlane dedicât a lenghis, musichis, minorancis e e nazions cence stât.

Intal apontament di cheste setemane – in direte vuê, martars ai 22 di Dicembar, a 11 a buinore e in repliche tal dopo di misdì di doman, miercus ai 23, a une e in chel di sabide ai 26, a une e mieze – si fasarà un viaç musicâl jenfri Ocitanie, Friûl, Gales e Sardegne.

Adwaith Interview

Si scoltarà une cerce di Bartàs Party, il gnûf disc dal vîf dai ocitans Mauresca Fracas Dub, e plui o mancul in anteprime la cjançon fate di Alessio Velliscig in ocasion dai setante agns des Lotis dal Cormôr. Cun di plui al sarà spazi pe musiche di Claudi Martì, des Adwaith e di Sa Ratapignata.

Si fevelarà ancje de edizion 2020 di Suns Europe, de risoluzion fate buine joibe stade de bande dal Parlament European a pro dai dirits linguistics, de tutele des minorancis e plui in detai dai contignûts dal Minority SafePack, dal inovâl de Cjarte di Chivasso, il storic document su autoguvier e minorancis prontât ai 19 di Dicembar dal 1943 di un grup di antifassiscj valdostans e des valadis valdesis e ocitanis de Provincie di Turin e di un articul jessût su Filosofia de Logu, segnalât ancje di Ethnos & Demos.

Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), ancje cheste pontade di Babêl Europe e sarà a disposizion in rêt, su Spreaker e su Spotify.

This image has an empty alt attribute; its file name is logo_web.png

Mikel Laboa + Kortatu + Os Resentidos + Brût & Madone + DJ Tubet + Maradona = Babêl Europe 25/2020

Gnovis produzions e classics dal passât, atualitât e inovâi impuartants e… Diego Armando Maradona.
Al è chest il “menù” de gnove pontade di Babêl Europe, la trasmission cuindisinâl di Radio Onde Furlane dedicade ae produzion musicâl intes lenghis minorizadis dal continent, in programazion martars ai 8 di Dicembar a 11 a matine, miercus ai 9 a une dopo di misdì e ancjemò sabide ai 12 a une e mieze.

In chê che e je la prime pontade dal mês di Dicembar il viaç babelic tra lenghis, musichis, minorancis e nazions cence al cjape dentri Friûl, Paîs Basc e Galizie. E sarà la ocasion par scoltâ une cerce di Fin Cumò, il prin disc uficiâl tant che solist di DJ Tubet e par segnalâ il gnûf video di Brût & Madone. Si memorean ancje doi inovâi impuartants che a tocjin la produzione musicâl in lenghe basche: chel de muart dal storic cjantautôr Mikel Laboa (al prin di Dicembar dal 2008) e chel de jessude dal prin vêr album dai Kortatu, ae fin di Novembar dal 1985.

This image has an empty alt attribute; its file name is bruut-madone-2ok.jpg

Cun di plui si fevelarà ancje dal zuiadôr di balon argjentin, Diego Armando Maradona, che al è muart ai 25 di Novembar stâts, des sôs divignincis nativis amerecanis, cravuatis, baschis e galizianis e propit par chel si scoltarà un “classic” dal repertori de band ‘galega’ dai Os Resentidos.

Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), ancje cheste pontade di Babêl Europe e sarà a disposizion in rêt, su Spreaker e su Spotify.

This image has an empty alt attribute; its file name is logo_web.png

Loris Vescovo + Mike Peters + The Alarm + Gruppo Rubanu + Peppa Marriti Band + Mans De Breish = Babêl Europe 24/2020


Tiere, lavôr, dirits e libertât. Al podarès jessi chest il titul specific de gnove pontade di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât.

Par cheste setemane – vuê a 11 a matine in direte e po in repliche tal dopo di misdì di doman, miercus ai 25 di Novembar a une, e in chel di sabide ai 28 a une e mieze – la trasmission e cjape ispirazion dal fat che vinars ai 27 si fasarà une cunvigne sui setante agns des Lotis dal Cormôr.

This image has an empty alt attribute; its file name is 05_07-lotisdalcormoor.jpg

E sarà la ocasion par fâ un viaç jenfri storie e atualitât, tra Friûl, Ocitanie, Gales, Sardegne e Arberie. Si scoltarà une gnove cjançon di Loris Vescovo, une anticipazion de racuelte di tocs e di tescj che a fasin riferiment propit al siopar par ledrôs inte Basse Furlane tal 1950, e si ricuardaran i siopars dai minadôrs dal Gales (tra il 1984 e il 1985) e de Ocitanie (tra il 1961 e il 1962) e la lote di Pratobello in Sardegne tal 1969 cu la musiche di Mike Peters e The Alarm, di Mans De Breish e dal Gruppo Rubanu, intant che in continuitât cul consei di leture fat inte pontade passade di Babêl Europe al sarà spazi ancje par une cerce dal repertori de Peppa Marriti Band.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu). Dopo des sôs trê emissions vie pe setemane, ancje cheste gnove pontade si pues tornâ a scoltâle in rêt su Spreaker e su Spotify.

This image has an empty alt attribute; its file name is logo_web.png

Lou Dalfin (in anteprime) + Kenze Neke + Eina + Mitili FLK + Vanilla Resident = Babêl Europe 23/2020

Une cerce in anteprime di une gnove produzion, sugjestions che a rivin dal lunari e si stramudin in musiche, tra storie, atualitât e storiis di disertôrs, di anarchics e rivoluzions e fintremai un consei di leture. Al è ce che e propon la gnove pontade di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât.

La anteprime e je chê di une gnove cjançon dai Lou Dalfin, che in curt e vignarà compagnade ancje di un video. La cjançon si clame L’Ostal de Bart e al è un omaç a Bartolomeo Vanzetti, anarchic nassût a Villafalletto, un paîs che si cjate des bandis di Cuneo e avonde dongje des Valadas Occitanas, di dulà che e rive il grup vuidât dal polistrumentis Sergio Berardo.

La storie di Sacco e Vanzetti, i doi anarchics talians incusâts in maniere injuste di omicidi e copâts in Massachussets su la cjadree eletriche ai 23 di Avost dal 1927, si incrose cun chê dal anarchic sart Michele Schirru, ancje lui emigrant in Americhe e ancje lui condanât a muart, ma a Rome tal 1931 par vie dal so progjet di copâ Mussolini, che al ven ricuardât in musiche dai Kenze Neke.

La musiche – chê dai Mitili FLK e dai Vanilla Resident che a recuperin un classic dal Povolâr Ensemble – e permet ancje di ricuardâ, in maniere furlane e babeliche, ancje la date dai 4 di Novembar. Cui catalans Eina si memorearà la Rivoluzion di Otubar in Russie (ai 7 di Novembar dal 1917) , intant che si fevelarà ancje dai vincjevot agns de adozion de Cjarte Europeane des Lenghis_Regjonâls o Minoritariis dal Consei de Europe e, lant indaûr tal timp fintremai ai 8 di Novembar dal 1366, si memorearà l’inovâl des Constituziones de Patrie dal Friûl.

EINA - Home | Facebook

Si fasarà ancje un scjampon in librarie, par dâi un cuc al libri di Tiziana Barillà, Quelli che Spezzano. Gli arbereshe fra municipalismo libertario e anarchia.

La gnove pontade di Babêl Europe si pues scoltâle vuê, martars ai 10 di Novembar, a undis a buinore, doman, miercus ai 11, a une dopo di misdì, e po sabide ai 14, a une e mieze dopo di misdì. Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), la stesse trasmission e sarà a disposizion in rêt, su Spreaker e su Spotify.

This image has an empty alt attribute; its file name is logo_web.png