Inter – Udinese 5-1

This image has an empty alt attribute; its file name is udin_neri.png

L’Udin, magari cussì no, al conferme lis previsions de vilie. Ancje a Milan la scuadre blancje e nere e zuie une partide grise e smamide, e patìs la superioritât dai aversaris e cussì e fâs la vitime sacrificâl pe fieste pal scudet dal Inter.
Il campionât al finìs malamentri, ma almancul a son dôs buinis gnovis, che za si savevin ancjemò prime de partide: l’Udin al zuiarà in serie A ancje inte prossime stagjon e par sigûr la setemane che e ven nol pierdarà ancjemò une altre volte…

Pe ultime partide di campionât Gotti si rimet ancjemò al 3-5-1-1 cun Musso tra i pâi, cun Becão, Bonifazi e Samir in difese, cun Molina, De Paul, Walace, Stryger Larsen e Zeegelaar in merdiane e cun Pereyra daûr di Okaka, uniche ponte. Conte al mande in cjamp Handanovic in puarte, D’Ambrosio, Ranocchia e Bastoni in difese, Hakimi, Vecino, Sensi, Gagliardini e Young in mediane e Pinamonti e Lautaro Martinez in atac.

I parons di cjase a cjatin il gol dal vantaç dopo nancje vot minûts di zûc: scambi inte aree di rigôr tra Lautaro e Young cul inglês che al impire Musso. L’Udin al prove a imbastî une reazion cun De Paul e cun Pereyra, ma nol rive a fâsi viodi pardabon des bandis di Handanovic. I minûts a passin, il ritmi nol è masse alt e la tension e cres dome par vie di un scuintri tra Becão e Lautaro cul atacant che si inrabie e cun Conte che al mande daurman Lukaku a scjaldâsi.

La ande de partide e va dilunc a jessi avonde smamide, tra un tîr fûr bersai di De Paul e une conclusion cun chel stes destin di Vecino.
Ae fin dal prin timp la scuadre furlane e prove a svicinâsi ae pate cuntun colp di cjâf di Stryger Larsen, che però nol cjate la puarte, ma juste prime de polse al rive il doi a zero pai parons di cjase: punizion di Eriksen, jentrât di cualchi minût tal puet di Sensi, e bale che e finìs tal sac, daûr di Musso.

La seconde frazion si vierç cu la sostituzion di Handanovic cun Padelli. Une azion Pereyra-De Paul, fermade di Hakimi, e fâs pensâ che l’Udin al puedi provâ ancjemò a fâ alc. Magari cussì no, e je une ilusion: l’Inter dal secont timp al à voie di sierâ l’incuintri in bielece. Cussì al rive il tierç gol: Hakimi al ven tocjât malamentri di Zeeglaar eal vuadagne un rigôr, che al ven tirât cun sucès di Lautaro Martinez.

La partide no à plui storie. L’Udin si sfante dal dut e al rive il poker dai neris e celescj, cuntun tîr spetacolâr di Perisic, su assist di Vecino, che al passe Musso e al va a finî in puarte dongje dal pâl plui lontan. Al jentre in cjamp ancje Lukaku e al segne ancje lui un gol, cuntune deviazion fortunose suntune conclusion di Sanchez. Gotti al met dentri Forestieri e Llorente tal puest di Zeeglaar e di Okaka e plui indenant al clame fûr ancje De Paul par Makengo, ma nol cambie nuie.
L’Udin al segne il gol de bandiere juste te ultime part dal incuintri: Eriksen al tocje la bale cu la man inte aree di rigôr, Volpi al sivile e Pereyra al tire a bersai dal discut. L’Inter al fâs fieste pal scudet cu la sô int, i tifôs furlans a scugnin contentâsi de fin de partide e dal campionât. Alc al è alc…

Udinese – Sampdoria 0-1

This image has an empty alt attribute; its file name is udin_neri.png

Ancjemò une partide smamide, ancjemò une sconfite decidude intal ultin par efiet di un penalty. Dopo dai cinc patafons cjapâts a Napoli, l’Udin al veve la pussibilitât di sfrancjâsi cuntune partide degne e un risultât bon in cjase cu la Sampdoria, ma i à lade strucje ancje in cheste ocasion. I blancs e neris a gjestissin avonde ben il print timp, i ospits a cressin vie pe seconde frazion e ae fin a rivin a vuadagnâ un rigôr e a segnâ. L’Udin al è salf, ma al va dilunc a jessi pôc san e ancje pôc fortunât. E la maluserie dai tifôs e cres.

Cul intindiment di tornâ a vinci in cjase l’Udin si presente cu la stesse formazion e cul stes modul de partide di Napoli: il 3-5-1-1, cun Musso in puarte, cun Becao, Bonifazi e Zeegelaar, cun Molina, De Paul, Walace, Makengo, Stryger Larsen in mediane, cun Pereyra tra le seconde e la prime linie e ancjemò cun Okaka uniche ponte. La Sampdoria si inschirie cul 4-4-2: tra i pâi al è Audero, la linie difensive e je formade di Bereszynski, Yoshida, Colley e Augello, tal centricjamp a son Candreva, Ekdal, Thorsby e Leris, in atac a son Gabbiadini e Keita.

La partide si vierç cuntun fal di Molina su Thorsby e cul Udin che al cjape la iniziative cun Pereyra in version sei di sugjeridôr che di tiradôr, ancje se pôc precîs. La Sampdoria e rispuint cu la sô manovre, dopo un cuart di ore di zûc, intant che De Paul e Pereyra a sburtin i blancs e neris indenant, che però no rivin a jessi pardabon pericolôs.
Il ritmi al cres passade la metât dal prin timp. Di une bande al è un tîr di Candreva che al ven parât di Musso cence padins, di chê altre e je une buine azion che i fâs rivâ la bale a Okaka, che cul tac le zire a Makengo, fermât di Colley. Plui tart Musso al pare ben un tîr di Gabbiadini, Molina al met un pò in pinsîr la difese ospite, Augello al tire fûr bersai e Makengo al fâs compagn su corner di De Paul.

Sierade la prime frazion cence goi e cence nancje masse ocasions, il secont timp si vierç cu la Sampdoria in atac, tra un assist di Candreva par Augello che al prove la conclusion ma il so tîr al è debil e al va fûr, un balon di Augello che al ven tocjât di Gabbiadini e po di Bonifazi che cuasi al ingjane Musso e cuntun tentatîf di lontan di Candreva che nol cree problemis al puartîr argjentin.

Dopo un cuart di ore Gotti al mande in cjamp Samir tal puest di Zeegelaar e Forestieri par Makengo, cun Pereyra che si sbasse svicinantsi a De Paul e cun Forestieri seconde ponte dongje di Okaka. La scuadre di balon furlane si fâs viodi des bandis di Audero cuntun pâr di iniziativis di De Paul, ma i sampdorians si salvin, prime cul lôr puartîr e dopo cun Bereszynski che al met un blec par fermâ la conclusion di Pereyra ispirade di un assist dal numar 10.

Gotti al clame fûr un Okaka avonde smamît e al met dentri Llorente, intant che Ranieri al zuie lis cjarteis Quagliarella e Verre, in cjamp tal puest di Gabbiadini e di Keita. La sielte dal mister blucerclât e je chê juste. Cun di fat, dongje de conclusion de partide propit suntun tîr di Verre Bonifazi al tocje la bale cul braç inte aree di rigôr, Gariglio al sivile e Quagliarella al tire e al segne.

I blancs e neris a provin a dreçâ la partide tai pôcs minûts che a mancjin ae fin. Tal recupar a lenzin la pate cuntune grande conclusion di Walace, che al cjate la grande rispueste di Audero, e po a riscjin di cjapâ il secont, cuntun tîr di Quagliarella, che però al cjate la rispueste puntuâl di Musso.
E finìs un a zero pai ospits. La uniche consolazion e je chê che a Napoli e jere lade ancjemò piês. Alc al è alc. O forsit no.

Napoli – Udinese 5-1

This image has an empty alt attribute; its file name is udin_neri.png

Cinc goi cjapâts e une altre sconfite pesante. L’Udin a Napoli, magari cussì no, al conferme inte maniere piês lis previsions di chei tifôs furlans che a vevin pôre che, denant di une scuadre motivade e fuarte tant che chê vuidade di Gattuso, i blancs e neris, cun di plui ancje cence diviers titolârs, a fossin flaps, smonâts e destinâts a fâ lis vitimis sacrificâls.
Se vie pal prin timp, cundut di un scuilibri a pro dal Napoli, l’Udin al è stât avonde presint inte partide, dopo de polse, cjapât il tierç gol, che al nas di un erôr macroscopic, i blancs e neris si sfantin e tal cjamp si viodin dome i celescj napoletans.
Par ridi e par no vaî, si pues dî che l’Udin al à rispietât la “par condicio”, pierdint sei cu la Juve sei cul Napoli. Par consolâsi, o podìn jessi contents par vie che e à vinçût la scuadre che e veve almancul un zuiadôr furlan: il Napoli di Meret.

La scuadre blancje e nere si presente tal stadi Diego Armando Maradona ancjemò cul modul 3-5-1-1: in puarte al è Musso; in difese nol è Nuytinck, signestrât, e a son Becao, Bonifazi e Zeegelaar; in mediane a sono Molina, Di Paul, Walace, Makengo e Stryger Larsen cun Pereyra daûr di Okaka, uniche ponte. Gattuso al mande in cjamp une formazion che e va daûr dal 4-2-3-1, cun Meret tra i pâi, cun Di Lorenzo, Manolas, Rrhamani e Hysaj in difese, cun Bakayoko e Ruiz denant de tierce linie e cun Lozano, Zielinski e Insigne in proiezion ofensive, daûr di Osimhen in atac.

Il Napoli al scomence cul pas just, cirint il zûc tra lis liniis soredut dilunc de direzion Ruiz-Zielinski. I parons di cjase a fasin valê la lôr superioritât tecniche e motivazionâl, si fasin viodi des bandis di Musso, ma almancul in principi no rivin a jessi pardabon pericolôs. L’Udin al ten bot e cu la vuide di De Paul al prove a rispuindi in cuintripît. Chê di Fuorigrotta e somee, in part, ae partide cu la Juve, cun trê diferencis di fonde: il Napoli nol è smamît tant che la scuadre di Pirlo viodude ai Riçs, l’Udin nol à la fuarce mostrade in chê partide e nol à nancje la pussibilitât di segnâ, cundut dal dinamisim di Molina e di Pereyra, che al prove ancje a tirâ in puarte cence cjatâ il bersai.

Il Napoli al manten la sô pression e le concretize cualchi minût plui tart cul gol dal ex blanc e neri Zielinski, che al impire Musso, recuperant un balon parât vie dal puartîr argjentin suntun tîr di Osimhen. Si svicine la prime mieze ore di zûc e al è ancjemò Osimhen a jessi pericolôs cuntune conclusion che e cjate la deviazion providenziâl di Bonifazi. I va miôr a Fabian Ruiz che cuntun biel tîr al cjate il cjantonut adalt in bande di Musso e al firme il doi a zero.

Sot di doi goi, l’Udin al prove a alçâ la linie dal so zûc, cence grancj efiets, fale che il pericul di lassâ spazis ai aversaris, che a cirin il tierç gol cun Bakayoko, che però al tire masse adalt. Cundut achel, prime dal interval, i blancs e neris a rivin a smiezâ il disvantaç e a tornâ a vierzi la partide cun Okaka che, servît in aree di Di Paul, al scombat cun Manolas e al cjate une biele zirade che e mande la bale intal cjantonut bas.

Sierât il prin timp sul doi a un, lis dôs scuadris a tornin in cjamp pe seconde frazion. La musiche e je sù par jù chê di prime: il Napoli al è paron dal cjamp, l’Udin al cîr di di difindisi e Musso al rispuint par ordin cuant che i aversaris a tirin in puarte. Gotti al prove a mudâ la muse de sô scuadre, clamant fûr Becao e Walace e mandant in cjamp Forestieri e Owejan, cun Stryger Larsen che si sposte a diestre, cun Molina che al va plui indenant e cun Owejan che i ven dât il compit di cori su la corsie di çampe.

Nol è il timp par viodi se la gnove struture tatiche dai blancs e neris e je in stât di judâju a dreçâ la partide parcè che al rive daurman l’erorat che al met il Napoli intes cundizions di segnâ ancjemò e di sierâ la partide in maniere definitive: cul intindiment di passâle a De Paul, Musso i regale la bale a Lozano e il messican al porfite de situazion e le bute dentri pal trê a un.

L’Udin al imbastìs une reazion cuntun pâr di iniziativis di Owejan cence sucès e il Napoli i da ancjemò di lavorâ a Musso cun Osimhen, prime di segnâ il cuart gol cun Manolas cul cjâf. I blancs e neris a deventin un câs par “Chi l’ha visto?” e di chel moment indenant si viodin dome i parons di cjase che cun Insigne prime a cjapin la travierse e plui indenant, intal recupar, a segnin il gol dal cinc a un.

L’Udin al è salf, ma nol è masse san. Sperìn che al fasi miôr tes ultimis dôs partidis, tacant dal incuintri cu la Sampdoria.

Pordenone – Cosenza 2-0

bandieris-friuul

Doi goi fats e trê ponts cjapâts e il Pordenon al vinç e al vuadagne la salvece direte. A Lignan i neris e verts a rivin a gafâ chel miôr dai doi risultâts bogns che ur permetin di restâ in serie B. Il Cosenza al pues dome che vinci par vê ancjemò cualchi sperance: tal prin timp al rive a tignî bot, ma inte seconde frazion al cjape i doi goi che a valin l’incuintri e la stagjon.

La partide e je delicade par dutis dôs lis formazions. Ancjemò di plui pai ospits, che la lôr situazion in graduatorie e je plui penze e dificile. I sborfs a partissin cul pît just e dopo trê minûts a metin adun la lôr prime ocasion, cuntun diestri centrâl di Zammarini che al ven parât vie in corner di Falcone. Inte azion seguitive al è un pôc di batibui inte aree rosse e nere che si siere cu la conclusion di Bassoli che e ven fermade ancjemò dal puartîr cosentin.

Il timp al passe cence grandis emozions, massime des bandis di Perisan, che al reste disocupât almancul par dute la prime mieze ore di zûc, cuant che al scuen tignî di voli un tîr dal ex Termolada che si sfante parsore de travierse. Il Pordenon no si scompon e al manten il control de partide, intan che il Cosenza juste prime de polse al prove a tignî di plui la bale, cence però rivâ a produsi alc di sostanziôs in atac.

La seconde frazion si vierç cence cambis e cul Pordenon indenant, compagn che in principi di partide: Magnino al tire di posizion angolade ma nol rive a incuadrâ la puarte.
A passin i minûts e al cres il gnervôs, tra protestis, cartelins e contrascj. Occhiuzzi al zuie la cjarte Trotta, che al jentre tal puest di Sueva signestrât. L’efiet dal mudament al è une azion inviade di Carretta, che al crosse tal mieç par Crecco che cul cjâf al anticipe Camporese ma la sô conclusion e va fûr di pôc.

Di chê altre bande al è propit part Camporese che al salte e cul cjâf al tire e al cjape la travierse, ma al è in posizion di fûr zûc. I minûts a passin e il Cosenza al prove in dutis lis manieris a cjatâ un troi par sbusâ la difese de scuadre furlane. Al cjate il pertûs just sù par jù a metât dal secont tomp cun Trotta che si bute suntun cross di Sciaudone e al rive a deviâ cul cjâf il balon che si piert di pôc ae diestre di Perisan.

La regule de ocasion pierdude che e devente un gol cjapât e cjate conferme cualchi minût plui indenant cun Ciurria che al jentre in aree e al fâs un assist per Butic, a pene jentrât tal puest di Musiolik, che di doi pas al impire Falcone. Il Cosenza al prove a dreçâ la partide, cun Occhiuzzi che al clame fûr Legittimo e al mande in cjamp Mbakogu, ma nol rive tal so intidiment, parcè che al scuen restâ in dîs dopo dal secont cartelin zâl di Tiritiello. In inferioritât numeriche il Cosenza nol à plui sperance e in plen recupar al rive l’autogol di Crecco che al fisse il doi a zero finâl cu la salvece dai sborfs e la retrocession dal Cosenza.

Udinese – Bologna 1-1

This image has an empty alt attribute; its file name is udin_neri.png

E podeve jessi une vitorie biele e buine pal Udin, ma tal ultin si à stramudade intune pate e al è stât il pericul che al fos ancjemò alc di piês. Ae fin i blancs e neris a jonzin cuote cuarante – e e fâs compagn ancje il Bologne – però ancjemò une volte si sfante la pussibilitât di viodiju vinci une partide in cjase.

La scuadre di balon furlane e fronte il Bologne mostrant il so miôr e il so piês. Di une bande al è un prin timp discret, cun iniziative e cun personalitât, soredut chê di De Paul che al fâs une altre grande partide, inte prime frazion al firme un gol che al è un zoiel e lunc di dut l’incuintri nol sbrisse inte ingjenuitât fate cuintri de Juve di metisi a zuiâ di bale a svol. Di chê altre un secont timp plui flap, cul Bologne che al zuie di plui, cun Musso che dongje di un pâr di bielis paradis al fâs une jessude fûr timp di Palacio: fal, rigôr e gol dal un a un.

Gotti al ponte ancjemò sul 3-5-1-1. La formazione je chê di domenie stade, fûr che par Musso in puarte, là che cuintri de Juve si veve tornât a viodi Scuffet. La partence no à un ritmi cuissà ce alt: il Bologne, che Mihajlovic al met adun daûr de struture dal 4-2-3-1. al prove a sburtâ un tic di plui, ma l’Udin al ten il control de partide, stant che de pression relative dai aversaris aburissin fûr dome uns pôcs di corner.

Cun De Paul, impen, l’Udin al cjate il gol ae sô prime ocasion. Rodrigo al concuiste la bale, si inserìs framieç des tra lis maiis de difese aversarie, e cuant che Skorupski al prove a sierâi il cjamp visîf, lui al tire cul esterni diestri sul pâl plui lontan e al segne. I blancs e neris a mentegnin il vanat° cence masse preocupazions, stant che i tentatîfs di Soriano e di palacio a cjatin Musso tal puest just tal moment just.

Il secont timp si vierç cul Udin che al controle la situazion, cun chê di rispuindi eventualmentri in cuintripît e par un cuart di ore al sucêt pôc o nuie. A chel Mihajlovic al cambie trê dai siei oms – fûr Schouten, Skov Olsen e Barrow par Orsolini, Svamberg e Sanson – cun chê di dreçâ la partide.

La proiezion ofensive dai ospits e cres, ancje se no prodûs alc e ce, intant che sul cuader dal cronist a cjatin spazi lis conclusions di Okaka e Arslan. La situazion e mude intal ultin cul episodi che al puarte al rigôr pal Bologne, che al ven tirât cun sucès di Orsolini. A son ancjemò dîs minûts di zûc, l’Udin al prove a rispuindi, ancje cu la metude in cjamp di Forestieri tal puest di Arslan, ma al è dome sbelançât indenant cence jessi concret. Il Bologne al prove a profitâ, ma ae fin il risultât nol cambie e al è just cussì, par dutis dôs lis scuadris che si tegnin a distance di sigurece de zone retrocession.

Venezia – Pordenone 0-0

This image has an empty alt attribute; its file name is pordenone-calcio.png

Nissun gol e un pont par om. Si siere cussì la partide tra Vignesie e Pordenon e dutis dôs lis scuadris a decidaran dal lôr avignî inte prossime partide: i parons di cjase inte part plui alte de classifiche, la scuadre furlane inte zone playout.

L’incuintri al è avonde ecuilibrât. I parons di cjase a àn alc di plui, ma il Pordenon nol mostre di vê pôre e lu palese ad in plen inte vierzidure dal incuintri cuntun cross di Falasco par Butić che al prove atiâ in puarte cul cjâf ma la sô conclusion e je fûr bersai. Plui indenant a àn il stes destin, des bandis de puarte di Perisan, i tentatîfs di Mazzocchi, Di Mariano e Maleh, intant che Ciurria al prove a passâ Mäenpää ma nol rive. Ae fin i doi puartîrs a àn pôc ce fâ e il pri timp si siere cence goi.

La seconde frazion si vierç cul Vignesie indenant. Tal prin cuart di ore dopo de polse la iniziative e je dai lagunârs, fale che par un pâr di azions imbastidis di Ciurria e Zammarini. Inte fase mezane dal secont timp al torne indenant un ciert ecuilibri, i tîrs in puarte a son ancje tal spieli, di une bande e di chê altre, e Perisan e Mäenpää si scjaldin lis mans.

Intensitât di zûc, ocasions e e emozions a cressin intal ultin cuart di ore, che al ven screât di une grande conclusion di Črnigoj che al impegne Perisan intune deviazion in corner e po di Ciurria che al à une buine bale ma il so diagonâl si piert in bande de puarte. Domizzi al mande in cjamp Calò tal puest di Scavone par provâ a cirî i trê ponts. Il Vignesie al prove a fâ compagn cun Aramu, che al ponte la smicje e cul çampin al tire in puarte, al impire Perisan ma l’arbitri nol fâs bon il gol parcè che al viôt il fûr zûc di Bocalon.

Lis ultimis ocasions a son dai neris e verts, ma il risultât nol cambie: un tîr di Berra che però al è debil e al ven parât di Mäenpää cence fastidis e une barafuse denant de linie di puarte là che però Barison nol rive a deviâ la bale in rêt.

Pal Pordenon e sarà decisive la partide di lunis cuintri dal Cosenza.

Pordenone – Salernitana 1-2

This image has an empty alt attribute; its file name is pordenone-calcio.png

Il Pordenon al piert ancje a Lignan, cundut che al zuie miôr di sabide stade a Reggio Emilia. Prime al patìs la superioritât e la determinazion de Salernitana, po al cres e al segne l’un a un vie pal secont timp e juste tal ultin, ae fin dal recupar, al ven impirât di Tutino dal discut, in chel istès che la partide e someave indreçade viers dal un a un finâl.
Cu la vitorie inte sachete i ospits a concuistin la seconde posizion in graduatorie, intant che pai sborfs la classifiche e reste avonde clopadice.

Il Pordenon si presente tal prât dal Teghil cun chê di tignî ben il cjamp e di no permeti ae Salernitana di imponi il so zûc. I parons di cjase a partissin ben, no dome in fase di interdizion ma ancje in atac, stant che e je lôr la prime conclusion: une zirade di Zammarini che e ven parade di Belec.

Sghindât il pericul, la Salernitana e passe in vantaç cuntune parabule di Gondo che e scjavace Perisan fûr dai pâi e e finìs tal sac. Plui tart Falasco al ven tocjât inte aree aversarie, ma par Marini al è dut regolâr. Gondo e Casasola a provin ancjemò a passâ Perisan, però i lôr tentatîfs o a van fûr bersai o a vegnin fermât cence masse fastidis.

Passade la metât dal prin timp il Pordenon al lenç la pate cuntun tîr cul cjâf di Ciurria fûr di pôc. Plui indenant Perisan al fâs un bon intervent suntune conclusion di Casasola e i parons di cjase a rispuindin prime de polse ancjemò cun Ciurria, protagonist di un altri tîr che al va une vore dongje dal bersai e po di une colade inte aree aversarie che Marini le calcole regolâr.

Tal secont timp il Pordenon al prove a incressi il ritmi e a alçâ la linie dal zûc. Il risultât si lu viôt daurman cuntun tîr di Butic cu la bale che e va fûr. Di chê altre bande dal cjamp al è Di Tacchio che al tire cul cjâf di pôc parsore de travierse, intant che pal Pordenon Butic al impegne ancjemò Belec, che si salve in corner.

Domizzi al mande in cjamp Misuraca e Musiolik tal puest di Scavone e di Mallamo e la scuadre furlane a fuarce di dâi e cjate il gol cun Misuraca che di fûr aree al firme une conclusion di potence e di precision che e finìs inte rêt passant Belec dongje dal prin pâl.

Tal ultin cuart di ore Castori e Domizzi a fasin ducj i cambis che a coventin. Il Pordenon al à chê di tignî bot e la Salernitana e volarès jonzi il sucès. I neris e verts a vant di lunc a tignî di plui la bale e cun Camporese si svicin al vantaç, ma la sô conclusion e ven parade vie parsore de travierse di Belec.

Si rive tai cinc minûts di recupar, cuant che Kristoffersen, a pene jentrât tal puest di Gondo, al impegne daurman Perisan, e po Tutino al ven tocjât inte aree di Barison. In chest câs par Marini al è rigôr: al tire il stes Tutino, che al profite de ocasion e al segne.

Udinese – Juventus 1-2

This image has an empty alt attribute; its file name is udin_neri.png

Cuintri de Juve l’Udin al convinç, ma nol vinç. Anzit: al piert. Passade in vantaç dopo dîs minûts, la scuadre di balon furlane e manten il control de partide, e siere ducj i spazis e i lasse pocjis pussibilitâts di iniziative ae Juventus, che e stente a meti adun azions di sest. Chest al sucêt vie pal prin timp e vie pe plui part de seconde frazion, cuant che la formazion di Gotti e lenç ancje il secont gol. Tai ultins dîs minûts, però, doi episodis a dan il svolt ae partide a pro dai ospits. Un svolt che pal Udin e pai siei tifôs al è un ribalton: par talian si dîs «Dalle stelle alle stalle».

Gotti al mande in cjamp il 3-5-1-1 cun Okaka uniche ponte, cun Pereyra daûr di lui, cun Molina, De Paul, Walace, Arslan, Stryger Larsen, cun Becao, Bonifazi e Nuytinck in difese e – uniche novitât a pet de partide cul Benevento – cun Scuffet in puarte tal puest di Musso, scualificât. Pirlo al sielç il 4-4-2: Szczesny tra i pâi; Danilo, Di Ligt, Bonucci e Alex Sandro in difese; Cuadrado, Bentancur, McKennie e Bernardeschi in mediane; Dybala e Ronaldo in atac.

L’Udin al partìs cul pît just. I blancs e neris a metin cûr e polmons e a mostrin di vê snait e caratar. La Juve e je smamide e no rive a meti dongje une azion di sest. Dopo dîs minûts la scuadre furlane e passe in vantaç: De Paul al bat une punizion a sorprese e al servìs Molina che al profite de disatenzion de difese aversarie e al tire in puarte un diagonâl potent che al impire Szczesny.

La Juve e prove a imbastî une reazion, cun Alex Sandro che al sburte dilunc de corsie di çampe e cul dinamisim di Mc Kennie. L’Udin al neutralize la massime part des iniziativis de scuadre di Pirlo, che al rive a tirâ in puarte in trê ocasions, ma simpri fûr bersai, cun McKennie, cun Di Ligt e cun Ronaldo, intant che intun pâr di balons pericolôs Scuffet si fâs cjatât tal puest just tal moment just e po al pare in doi timps une conclusion di Dybala.

Il prin timp si siere cul vantaç de scuadre furlane, che si difint cun sintiment e cun spirt di sacrifici, vuidade indaûr di Nuytinck cun Walace tal mieç a recuperâ balons e Arslan e De Paul a fasin ancje un bon lavôr in cuvierzidure. In atac Okaka al ten il balon e al vuadagne teren a vantaç di Pereyra e de sô mobilitât. La seconde frazion si scree cun chê stesse musiche dai prins cuarantecinc minûts: Dybala e Ronaldo a son doi câs par “Chi l’ha visto?”, imberdeâts inte tele di ragn des liniis dal Udin.

I blancs e neris a van dilunc a blocâ cualsisedi tentatîf di azion dai aversaris. Cun di plui a lenzin il doi a zero cun Arslan che di une buine posizion al tire fûr di pôc. A passin i minûts e l’Udin al manten il control de partide. Pirlo al prove a dâ une scjassade ae sô scuadre e al clame fûr Bernardeschi e Dybala par Kulusevski e Morata. Lis ocasions miôr al va dilunc a vêlis l’Udin: dopo dal tîr di Arslan e rive une biele conclusion de distance di Stryger Larsen, ancje chê fûr di pôc.

La partide e somee indreçade ben, a pro dal Udin. La Juve e je in confusion e no rive a jessi pericolose des bandis di Scuffet. Tai ultins dîs minûts al sucêt alc che al cambie la ande dal incuintri. Il prin fat al è un contrast tra Stryger Larsen e Cuadrado fûr de aree di rigôr dal Udin: il zuiadôr juventin al scambie il prât bagnât dl Stadi Friûl par une pissine e si bute par tiere compagn che al ves di fâ un scjuc e Chiffi al sivile il fal. La punizion le tire Ronaldo e De Paul in bariere al salte e al tocje la bale cul braç, cussì la Juve e vuadagne il penalty: dal discut al bat CR7 e Scuffet nol pues fâ nuie altri che viodi la bale dentri tal sac.

L’un a un al dismôf i ospits e al see lis gjambis al Udin che dopo vê fat cetant al somee jessi daûr a pierdi energjiis. Ronaldo, che nol segnave di trê partidis, juste ae fin al à une altre bale golose, che i rive cuntun biel cross pinelât di Rabiot, e le bute dentri cul cjâf profitant ancje de incierte marcjadure di Samir.
La partide si siere inte maniere piês pal Udin che al reste cu la bocje garbe e no cjape nancje un pont, cundut che a’nt varès meretâts trê. Grande fieste pe Juve, che cui trê ponts no piert il contat cun chês altris scuadris che a pontin a vuadagnâ un puest in Champions League.

Reggiana – Pordenone 1-0

This image has an empty alt attribute; its file name is pordenone-calcio.png

Il Pordenon a Reggio Emilia al piert. I parons di cjase a àn une dibisugne mostre di pont e a’nt cjapin ducj chei a disposizion inte partide di vuê. La scuadre furlane e patìs la determinazion de Reggiana, che e rive a segnâ dome tal imprin dal secont timp e e manten il vantaç fint ae fin, cundut che inte ultime mieze ore si cjate cuntun om di mancul.
I sborfs a probin ancje a fâ alc par jonzi la pate ma a scugnin fâ i conts cu Venturi, che al pare dut chel che al è di parâ.

Vie pal prin timp i neris e verts a àn ancje cualchi ocason par passât i vantaç. Dopo disesiet minûts a lenzin il gol a ripetizion Misuraca, Zammarini e Ciurria, ma Ajeti e Venturi a disin di no. Sghindât il pericul, i parons di cjase a alcin la linie dal lôr zûc e, passade la prime mieze ore de partide, a cjapin il pâl cun Lunetta.

Il prin timp si siere cence goi, intant che la seconde frazion si scree cuntune buine conclusion di Musiolik e cuntune otime parade di Venturi. La regule no scrite dal gol no fat che al devente gol cjapât e cjate conferme a dam dal Pordenon cualchi minût plui indenant, cuant che Rozzio al cjape il pâl cuntun tîr cul cjâf e Ajeti al è il plui svelt di ducj tal recuperâ las bale e tal butâle intal sac.

La espulsion di Yao e lasse la Reggiana in dîs. La scuadre furlane e prove a cirî l’un a un cun Falasco e cun Butic, ma i parons di cjase a tegnin bot e soredut Venturi al è simpri puntuâl tai siei intervents, certificant la vitorie meretade de sô scuadre.


Benevento – Udinese 2-4

bandieris-friuul

Al torne in cjamp De Paul e l’Udin al torne a vinci. A Benevento la scuadre di balon furlane e segne cuatri goi e e cjape ducj i trê ponts a disposizion. I blancs e neris a rivin daurman a imponis sui parons di cjase, si complichin la vite inte ultime part dal prin timp, ma a mantegnin il vantaç fint ae fin de partide, intant che la scuadre di Pippo Inzaghi no rive a dreçâ la gare, e cussì e va dilunc a clopâ e a pierdi posizions in classifiche.

L’Udin si presente tal cjamp dal stadi Vigorito cun Musso in puarte, cun Becao, Bonifazi e Nuytinck in difese, cun Molina, De Paul, Walace, Arslan e Stryger Larsen in mediane, cun Okaka uniche ponte e cun Pereyra daûr di lui cun massime libertât di moviment tra centricjamp e atac: Gotti al torne al 3-5-1-1. Il Benevento al rispuint cul 3-5-2 che al viôt Montipó tra i pâi, la linie difensive cun Glik, Caldirola e Barbe, la mediane cun Depaoli, Dabo, Viola, Hetemaj e Improta, e Sau e Lapadula in atac.

I blancs e neris a partissin cul pît just e in mancul di cuatri minûts a rivin a segnâ, cun De Paul che al ispire in verticâl Molina, che al firme il so prin gol in serie A cuntun grant diagonâl. I parons di cjase a provin a reagjî ma Musso al dinee il gol a Glik cuntune biele parade. La scuadre furlane e va dilunc cu lis azions vuidadis dal talent di De Paul, che al prove ancje la conclusion di lontan, ma Montipò le bloche cence padins.

Passâts i prins vincj minûts di zûc Inzaghi al scuen clamâ fûr Sau, che al à problemis muscolârs, e tal so puest al met Gaich. I parons di cjase a àn di tornâ a organizâsi, intant che l’Udin al manten une cierte costance, che lu puarte a dopleâ il vantaç cun Arslan che al ricêf di Pereyra e al siere inte maniere miôr une azion inviade ancjemò une volte di De Paul.

Dopo segnât il gol Arslan al fâs une falope, dant indaûr a Musso une bale che e devente un assist par Lapadula che al ven tocjât dal puartîr in jessude: Mariani al sivile e Viola al tire e al segne. Scurtât il disvantaç, i zâi e ros a insistin par cirî la pate, ma l’Udin, dopo cualchi erorut di masse, al ten bot, la pression dal Benevento no à nissun efiet particolâr e il prin timp si siere cul doi a un pe formazion furlane.

Inte seconde frazion Inzaghi al mande in cjamp Schiattarella tal puest di Viola, ma la partence e je buine soredut pal Udin che al cjate daurman il gol dal trê a un cun Stryger Larsen che al rive inte aree di rigôr aversarie e al salte plui indalt di ducj par zirâ in puarte cul cjâf il cross pinelât par lui di De Paul.

La prime reazion dal Benevento si concretize intune punizion di Lapadula che e sbat cuintri de bariere e in pocjis conclusions in puarte che no crein problemis a Musso, a part une conclusion di dongje di Gaich che il puartîr al rive a parâ vie cun tempisim perfet.

Il timp al passe e i doi alenadôrs a fasin ducj i cambis che ur coventin: Inzaghi al mande dentri Insigne par rinfuarcî l’atac e Gotti al ponte a mantignî il vantaç e a no pierdi fuarce ofensive. Par chel al clame fûr un Okaka avonde smamît e al mande dentri Braaf, che juste dopo doi minûts al impire Montipò.

L’Udin al met la partide in cassefuart, cundut che il Benevento inte ultime part dal incuintri al prove ancjemò a cirî il gol. Lu cjate cun Lapadula, lu cîr ancjemò cun Gaich ma cence sucès, intun finâl di partide cun intensitât di emozions che nol mude il risultât finâl. L’Udin al vinç e ancje par efiet dai risultâts di chês altris scuadris vie pe zornade al vuadagne posizions in classifiche, passant ancje il Bologna, intant che il Benevento al sbrisse jù tal tierç ultim puest.