Premi Friûl Ator, dai 31 di Avost ai 8 di Setembar

PfAtoran

Si vierç la part centrâl de edizion 2013 dal Premi Friûl. Il concors inmaneât di Radio Onde Furlane cun chê di promovi la creativitât musicâl par furlan e ta chês altris lenghis minorizadis dal Friûl al jentre intal vîf, dopo de racuelte des adesions e de selezion dai cuindis semifinaliscj.

La manifestazion, imbastide cu la poie de ARLeF (Agjenzie Regjonâl pe Lenghe Furlane), chest an e mostre une muse gnove e torzeone. Si clame, di fat, Premi Friûl Atore si disvilupe su cuatri semifinâls e suntun event di sierade.

Intes primis cuatri seradis si varà un confront dal vîf tra i cuindis semifinaliscj a grups di trê / cuatri sfidants par date. Il premi finâl e je la produzion di un cd de etichete Musiche Furlane Fuarte, nassude propit de esperience di Onde Furlane e dal Premi Friûl par poiâ i progjets «che a sburtin, che a sperimentin, che a disfin e a tornin a fâ la musiche e la lenghe furlane».

Ancje chest an il Premi Friûl al mostre un bon cuadri de produzion musicâl in lenghe furlane dal dì di vuê. La musiche e tire fûr la lenghe cuntune grande varietât di stîi e e di lengaçs. Rock, blues, folk, hard, metal, pop, eletroniche, cjançon di autôr, ricercje…: a ‘nd è di ogni sorte e par ducj i guscj, tant par marcâ che, massime ta chest cjamp, il furlan al è une lenghe vive che e cjalde indenant.Par vê une cerce des propuestis in concors baste clicâ achì. A cheste direzion si pues scoltâ un toc par ognidun dai partecipants, votâ il grup o il solist che al plâs di plui e contribuî cun osservazions e coments.

In plui di votâ vie internet, il public al partecipe a sielzi i finaliscj dalPremi Friûl che si sfidaran po te serade finâl dai 30 di Novembar alì dal Palamostre di Udin ancje cu la sô poie intant des esibizions dal vîf che si davuelzaran jenfri la fin di Avost e i prins di Setembar.

Lis cuatri semifinâls si tignaran a Cjasarse ai 31 di Avost, a Muçane il prin di Setembar, a Cormons ai 7 di Setembar e a Comelians la dì dopo. In dut si fevele di cuindis sfidants, cuatri ospits speciâi, cuatri cubiis diviersis di presentadôrs e duncje cuatri events speciâi, ducj cun jentrade libare.

Intant de serade di Cjasarse, sabide ai 31 di Avost intai zardins di Palaç Brinis a tacâ di nûf di sere (21.00), si confrontaran Magic Lunch Double Crunch, Residui di Chernobyl, Terenzio Blues Band e Tarvos. Ospits speciâi i Pantan, rockers potents e di sostance preseâts ancje fûr dal Friûl pal lôr sun madûr. A presentâ a saran Isabelle Grattoni e il ‘Cjastron’ Enrico Vueli di Clap.

PFMuzW

A Muçanedomenie prin di Setembar, intal parc di Vile Muciana, a tacâ di nûf di sere(21.00) a sunaran Sunriot, Ensemble d’Anjou, Mataleao e Berto Celot. A rapresentâ tant che ospit la gnove musiche furlane al è il sbilf dal rap e dal ragamuffin DJ Tubet. La serade e sarà presentade di Mojra B. e Gigi “Er Geggio” Patruno.

Cormons il Premi Friûl Ator al rive sabide ai 7 di Setembar inte suaze de Fieste de Ue. In chest câs si tache a sunâ za a vot e mieze (20.30) cun El Scuadron de la Muerte, Aldo Sbadiglio, The Hanus Pranus e Sons of a Gun. Ospit speciâl il supergrup formât dal incuintri tra il bluesom Fabian Riz e i Orko Trio. La condusi la serade e sarà la cubie Karolina Cernic e Daniel Samba.

Domenie ai 8 di Setembar si rive in Cjargne dulà che a tacâ di nûf di sere (21.00) alì de Sale L’Alpina di Comelians a sfidâsi a saran Ad Plenitatem Lunae, Matteo Segrado e Truc. Dopo di lôr e sunarà La Bande Eletriche, la formazion cjargnele vincidore de edizion 2012 dal Premi Friûl che e misclice cjançon di autôr, rock e blues e che pe ocasion e presente il so prin lavôr. A presentin Isabelle Grattoni e il rapper DeK Ill Ceesa.

Ae fin di cheste setemane lungje e penze, une jurie di esperts e sielzarà i cuatri finaliscj, intant che il cuint al sarà decidût dal vôt dal public sul sît  http://www.ondefurlane.eu/premifriul/.

Prime de serade finâl di Udin, il Premi Friûl Ator al previôt ancje une zornade dute dedicade ae produzion musicâl par furlan tra passât, presint e avignî, confronts cun altris esperiencis europeanis e leams cu la tradizion musicâl e la poesie. Si trate di un laboratori cun musiciscj e esperts che si tignarà ai 6 di Otubar a Vuanis e che il so titul al è za dut un program:  E jo o cjanti (e o sai parcè).

Advertisements

Slovan Liberec – Udinese 1-1

udin

Nuie ce fâ: l’Udin al va fûr de Europa League. Ai 29 di Avost a Liberec si sfantin in maniere definitive, almancul par chest an, lis ambizions europeanis de scuadre furlane. I trê goi cjapâts la setemane stade si son confermâts masse pesants.

Il Liberec in cjase al fâs la sô oneste partide di contigniment, par difindi il tesaur concuistât a Triest. L’Udin i met il cûr, lis gjambis e il çurviel che al à e al palese, salacor ancjemò di plui de prime partide, i siei limits, massime sul plan atletic. Cun di plui, al cjape ancje un gol, par merit di Delarge, che al profite di une defaillance difensive, cun Heurtaux in zornade no e Kelava in zornade ni.

La partide cussì e je ancjemò di plui di rive sù: i goi di scugnî fâ a cressin e la bale des bandis de puarte boeme e rive dome in pocjissimis ocasions. Lazzari al puarte in paritât la partide e Maicosuel al impegne Kovar, che al mostre di vê chê atenzion e chê serenitât che a mancjin al Udin e soredut al so puartîr.

Al Udin lis robis no i van mâl dome tal cjamp di balon. I va strucje ancje la possibilitât di vignî ripescjât par cjapâ il puest dal Fenerbahce, scualificât par un an, stant che i bussolots a àn decidût che il puest dai turcs te Europa League lu cjaparà la Apoel di Nicosie.

La jessude di sene de Europe e ufrìs diviers elements di riflession, che a tocjin sei lis condizions tecnichis, atletichis e psicologjichis di diviers zuiadôrs, a tacâ di Kelava, sei la gjestion tecniche che l’asset de scuadre. No volaressin che, pierdude la Europe, cumò l’Udin al ves di pierdi par strade ancje cualchi zuiadôr impuartant.

Cumò al covente tignî dûr, no fâsi cjapâ des striis in nissun setôr, ni te aministrazion ni tal cjamp. Jessi stâts parâts fûr de Europa League in cheste maniere al dûl. Par cirî un aspiet positîf di chest moment, si pues dî che cumò la concentrazion di ducj e varà di jessi pontade sul campionât.

Cualchidun, in cont di une iniziative – avonde interessante di un ciert pont di viste, une vore discutibile sot di une altre cjaladure – fate in bande di Udin-Liberec une setemane indaûr, al à comentât che chê che e je lade fûr de Europa League e je la Triestinese…

E alore al è miôr cjalâ di une altre bande. Domenie l’Udin al zuie in cjase cuintri dal Parma: la scuadre no je intes cundizions miôr e i emilians a somein avonde bulos, ma de seconde partide di campionât si sis spietisi ducj une reazion positive. Viodarìn.

“JNK-Oltri la ultime frontiere”

d'agostini

Par cui che al è in Friûl chel di doman al è un apontament che no si pues pierdilu. Cun di fat, ai 28 di Avost, a tacâ des 7 e mieze sot sere, li dal cine Visionario di Udin, si presente il film di Marco D’Agostini, “JNK-Oltri la ultime frontiere”.

Il documentari al è la gnove opare di un dai regjiscj furlans plui bulos de gnove gjenerazion, che in chescj agns al à doprât il lengaç dsal audiovisîf par contâ storiis interessantis, soredut di musiche e di migrazions.

Il film al conte dal viaç fat dal grup dai JoNoKognòs dal Friûl aes Asturiis e de lôr partecipazion al Liet International dal 2012 a Xixon/Gijon, tal Stât Spagnûl.

L’incuintri si vierç cuntun conciert de band, che e je une des miôr dal panorame de gnove musiche furlane dai ultins cuindis agns, cul so rock melodic e ben petât, in belance tra Seattle, Athens e il Friûl di Mieç.

Dopo de musiche dal vîf, a 9 sot sere si fasarà la prime proiezion publiche dal documentari che dongje di contâ un viaç tal spazi e tal timp, al fronte ancje altris argoments e al vierç prospetivis di profondiment su diviersis cuistions: la amicizie, il conflit tra gjenerazions, il vivi intun teritori lontan dai grancj centris, lis lenghis minoritariis e i dirits linguistics.

La jentrade e je sore nuie.


Lazio – Udinese 2-1

udin

Un timp par om e trê ponts pe Lazio. L’Udin a Rome al scomence il campionât cul pît sbaliât e soredut al partìs mâl tal prin timp de partide, cuant che la scuadre di Petković no fâs nancje masse fature par imponi il so zûc e il so predomini.

Cun di fat, dopo nancje un cuart di ore la scuadre di balon furlane si cjate za sot di doi goi: Hernanes al segne cuntune biele canonade al 12′ e l’ex Candreva al met dentri un rigôr doi minûts plui tart. La reazion dai blancs e neris e je limitade – la robe miôr e je un tîr di Basta – intant che la Lazio e gjestìs il cjamp e la bale e si rint inmò pericolose des bandis di Kelava, svicinantsi al 3-0 cun Klose.

Dute une altre partide dopo dal interval, ancje se sul imprin dal secont timp e je ancjemò la Lazio a tignî il balin in man, cun Hernanes e Lulic al tîr. Il cambiament al rive dopo passe une desene di minûts, cuant che Muriel, che al à cjapât il puest di Di Natale, al tache a fâur vignî i sgrisui aes acuilis romanis. Al 61′ il sostitût di cjapitani Totò al cjate la strade par meti la bale te puarte di Marchetti. Pal puartîr de Lazio il lavôr al cres cul passâ dai minûts e Zielinski si cjate la ocasion di aur par fâ 2-2, ma no rive a disfrutâle inte maniere miôr e il dut al va a pro de Lazio, che si libere in cualchi maniere de fantasime de sconfite patide une setemane indaûr cuintri de Juve te finâl de Supercoppa taliane.

Divierse la situazion dal Udin, che al è fûr fase vie par dut il prin timp, al palese problemis un pôc dapardut, a tacâ de puarte, e cumò al à di viodi di fâ un meracul in Cechie, cheste joibe che e ven, te Europa League.

E somee une mission impussibile, massime se no rive a cjapâ la iniziative daurman, in viertidure de partide, cemût che al è sucedût a Rome.

Se l’Udin al fos pardabon dome chel dal prin timp di îr, al sarès di ce jessi preocupâts.

Udinese – Slovan Liberec 1-3

udin

Serade no pal Udin, che al zuie avonde ben, ma al paie cjarissim cualchi erôr di masse in difese. I numars a fevelin a clâr: dodis tîrs in puarte, un gol fat e trê lens; trê tîrs in puarte dal Slovan e trê goi cjapâts. Tant a dî che il nivel cualitatîf dal zûc de scuadre furlane al è bon e al è plui alt di chel dai cecs, che però a àn mostrât plui continuitât e une tignude atletiche e psicologjiche miôr. E magari ancje che, almancul in cheste ocasion, il cjamp di Triest al puarte sfighe e in chest sens si pues dî che al è un ben che par ribaltâ il risultât – une imprese che e je dificile ma in teorie no impussibile – si varà di provâ a fâlu in Cechie.

L’Udin al scomence la partide cul pît just. A parin bon sei il zûc dal coletîf che lis zuiadis individuâls, a tacâ di chês di Muriel, che dopo cuatri minûts al fâs un slalom tra i aversaris e al tire a colp sigûr: travierse. La superioritât furlane e va indenant sù par jù par un cuart di ore, cuant che al rive il gol di Rybalka. Al è un biel tîr, un folc, e un pugn tal stomi, ma l’Udin al somee in stât di tirâsi sù e al reagjìs ben, cu la britule in man, e a fuarce di dâi al rive ancje (o almancul?) l’un a un di Gabriel Silva su assist di Di Natale.

La paritât si manten fintremai ae fin dal prin timp. Al cuart dal secont timp al rive l’erôr fatâl di Danilo e Hertaux e cun chel la bale di aur par Delarge, che al segne. Di chel moment la partide dal Udin e je dute di rive sù: la scuadre e zuie, si fâs viodi dispès des bandis dal puartîr cec, ma no rive a metile tal sac, un pôc par imprecision, un pôc par sfortune e un pôc par vie dai aversaris, che a tegnin bot cun snait e cun caratar. Se e finìs cussì al sarès avonde mâl, in prospetive cualificazion. Magari cussì no, e va ancjemò piês, stant che a mancul dîs minûts de fin al rive ancje il tierç gol dai cecs: lu segne Kusnar.

Apontament european Joibe che al ven. Par intant domenie al tache il campionât, cuintri de Lazio, maltratade domenie stade de Juve inte finâl de Supercoppa taliane.

Si zuie a Rome. Intant che a tacâ dal prin di Setembar (cun Udinese-Parma) lis partidis in cjase si zuiaran a Udin e cheste e varès di jessi za une buine gnove. Viodarìn.

Udinese – Siroki Brijeg 4-0

FuarceUdinees

Vitorie in Bosnie e vitorie a Triest. L’Udin al siere inte maniere miôr la pratiche dal preliminâr di Europa League.Une setemane indaûr la scuadre blancje e nere e veve puartât a cjase un bon 3-1, intant che nossere a Triest e à fat ce che al coventave par lâ indenant inte competizion europeane.

La partide si vierç cul Udin che al impon daurman il so zûc e la sô superioritât tecniche e tatiche. Dopo nûf minûts al rive il gol di Di Natale, che al bute dentri une bale ben zuiade di Muriel. Vie par dut il prin timp la scuadre furlane e fâs zirâ il balon e e fâs zûc e moviment. Soredut cun Di Natale, cun Muriel, cun Gabriel Silva e cun Basta, la scuadre di Guidolin e mostre cualitât e cuantitât, forme e sostance. L’Udin al manten il control de operazions, cn dut dal cjaldonon che al è fastidiôs par cui che al cjale e ancjemò di plui par cui che al zuie e che al côr: si fâs avonde pericolôs des bandis dal puartîr bosgnac, salvât de travierse suntune punizion di Di Natale al minût 37, e no met i aversaris in condizions di fâsi viodi des bandis di Kelava.

E somee une partide di alenament, cul ritmi che al cale tal secont timp, sot dal sburt dal cjalt, cul Siroki che al mostre di no jessi in stât di ribaltâ la situazion e cul Udin che al gjestìs la situazion.

A vot minûts de fin il golon di Lazzari, cuntun tîr di passe cincuante metris, al torne a vierzi la strade pe puarte dal Siroki. A van daûr dal so esempli Basta, il miôr dal Udin adun cun Di Natale, e il zovin boem Vydra. Un bon inizi di stagjon, un Udin plui che discret.

‘Friuli nel Mondo’: “2.0” o zero e vonde?

immagine_programma

Ai 20 di Lui stâts al colave il 60esim inovâl de costituzion dal Ente Friuli nel Mondo (EFnM).

La ricorince e je stade memoreade tai dîs passâts a Udin.

La sielte dal puest no je casuâl: no dome par vie che la citât di Udin e je calcolade tant che la “Capitâl dal Friûl” – e avonde dispès si sint tâl – e duncje, cemût che al à vût scrit ancje il sindic Honsell, «Capitâl dal Friûl che al è in Friûl e dal Friûl che al è pal Mont», ma ancje parcè che propit a Udin, tal Salon dal Parlament dal Cjistiel, l’EFnM al è stât fondât in chê dì dal 1953.
No je casuâl nancje la date, stant che ogni an, ai prins di Avost, in chel che pai emigrants al è il timp des feriis e de tornade in Friûl, l’innomenât ent al inmanee un pâr di dîs di fieste intun puest a rotazion tra lis trê provincis furlanis.

Colonia_-Caroya

No si pues dineâlu: chel dai sessante agns al è un inovâl impuartant che al merete memoreât no dome cun enfasi ma ancje cun profonditât. La prime e je stade, cui events inmaneâts tra vinars ai 2 e domenie ai 4 e soredut cu la casse di risonance ufierte dai media locâi. La seconde no, o avonde pôc, almancul daûr di ce che si à viodût, che si à scoltât e che si à let ator.
No si pratindeve che chel inovâl al deventàs daurman une ocasion di riflession e di studi in cont de storie di EFnM, stant che la materie e je penze e che chest al è alc che si pues fâlu ancje plui indenant e cun plui calme. Però si si spietavisi almancul l’inviament di un resonament in cont de ativitât plui resinte di chê associazion e des sôs prospetivis e – plui in gjenerâl – in cont des politichis cui/pai furlans pal mont, i emigrants, i lôr dissendents, la gnove emigrazion – chê che e je e chê che e je daûr a cressi – e l’associazionisim.

Impen, la cussì clamade “Convention” (sic!) dai “Furlans tal (sic!) Mont”, che si à davuelte sabide ai 3 in Cjistiel, no je stade tant divierse di chês fatis cun chel stes titul tai agns passâts. In cheste suaze, cun chê di cirîju cuntune cierte dedizion, si puedin vualmâ un pâr di elements positîfs (alc al è alc, al disarà culchidun).

ico_60_anni

Il prin al è stât chel che tal program dai lavôrs a àn vût plui spazi i furlans che a son pal Mont e i lôr intervents, intant che chei che a son in Friûl, soredut cierts sorestants, a àn vût di scoltâ, o almancul di provâ a fâlu, plui che di fevelâ dome lôr.
Il secont al tocje la disparizion – forsit in graciis dai cambiaments politics che a son stâts a nivel regjonâl – dal mantra tipic di chestis cunvignis, almancul tai ultin agns, ven a dî chel de contraposizion tra la “valîs digjitâl” dai gnûf emigrants e la “valîs di carton” di chei di une volte.

Al va dit che e je stade dome une disparizion testuâl, stant che nissun al à doprât chestis espressions, ma si à palesade ancje chest an la vision che e sta daûr di chês peraulis: la contraposizion antitetiche tra la gnove emigrazion, cul so alt nivel di “professionalizazion” e chê vecje, calcolade in maniere plui o mancul implicite tant che “puare” e “sfigade”.

Si permetìn di no jessi in cunvigne cun cheste vision.
Cun di fat, a son professionalitâts e professionalizazions diviersis, ma tal lôr mistîr ducj i emigrants a àn (e a àn vût) la lôr professionalitât e la lôr professionalizazion: i gnûfs “managers” ben scuelâts, compagn dai contadins, magari analfabetis, che passe un secul indaûr son lâts a fâ sù lis coloniis te Pampa argjentine o tal Rio Grande do Sul; i zovins ricercjadôrs di cumò, compagn dai muradôrs lâts pal mont cu lis lôr valîs di carton, plenis di martiei, clauts, cjace e fratàs plui che di vistîts, par lavorâ te edilizie o magari par stramudâsi in operaris, a Toronto, in Svuizare o a Turin; i tecnics e i inzegnîrs dal dì di vuê, compagn dai minadôrs te Belgjiche, dai “canecutters” in Australie, dai boscadôrs in Romanie o in Slavonie, dai operaris de Transiberiane e ancje di chei che levin vie dal Friûl ancje une volte par studiâ e par fermâsi inaltrò a vore, in cjamp sientific, tecnic o burocratic.
E daûr de sielte di “lâ pal mont”, dongje de dibisugne e des dificoltâts, a jerin ancje capacitât, cûr, sintiment. Compagn che cumò.

ico_60_anni

Chel scheme si insuaze ad in plen inte linie (esibide) di modernitât (presumude) che e je tipiche di dutis chestis “Conventions”.
E je une linie che e ten dentri lûcs comuns in cont sei dal passât che dal presint e dal avignî, a tacâ di une concezion avonde vecje di Friûl, di Mont, di Friûl pal Mont e di rapuarts tra il Friûl in Friûl e il Friûl pal Mont e di une schirie di banalitâts in cont de globalizazion, de economie e dal “2.0”.
Cussì, se di une bande no si pues che jessi in cunvigne sul ricognossiment dai furlans pal mont tant che ambassadôrs dal Friûl, di chê altre al reste di sclarî miôr “cui”, “cemût”, “parcè” e “par fâ ce”. E achì al salte fûr il limit di fonde des “Conventions”, di ce che ur sta ator e des azions associativis e istituzionâls cui/pai furlans pal Mont di tancj agns e soredut dai ultins timps. E je une vore di atenzion pal “business”, pes “storiis di sucès”, pai “managers”, pai “global players” intant che la dimension identitarie o che e ven dineade o che e ven fossilizade – e sù par jù al è compagn – dentri di nostalgjie, passât e puaretât, calcolade tant che alc di fis, di fer, di vecjo, di inutil.
Par no fevelâ des formis e dai contignûts de comunicazion e des iniziativis culturâls. E soredut de presince e dal ûs de lenghe furlane, des lenghis dal Friûl, des lenghis dal Friûl pal Mont e de informazion in cont de produzion culturâl furlane e par furlan.
La vision di Friûl, di furlan e di lenghe furlane puartade indenant dal EFnM e reste vecje e limitade e no rive a lâ plui inlà de “piccola patria” e duncje de “piccola lingua”.

Chest al salte fûr sei di diviersis cjoltis di posizion publichis de bande dal president di chê associazion cuintri dal furlan e soredut dal so ûs tant che lenghe normâl, magari cuinçade ancje de contraposizion tra il furlan «inutil» (ma alore a ce coventino lis pirulis di Blecs?) e l’inglês «fondamentâl», sei ancjemò di plui de pratiche: di trop e di cemût che al ven doprât te comunicazion dal EFnM. Ven a dî: une vore pôc – e je esemplâr la ultime Convention – e in chest sens il furlan al è in buine compagnie (pe assence e o pe presince unevore limitade), cul inglês, cul spagnûl, cul francês e cul todesc, che a son lis lenghis principâls dal Friûl pal mont – e mâl, cuntune ande “dialetante”, no dome pai contignûts ma ancje pe mancjance di cualsisedi minime atenzion pe forme scrite (Par capîsi: se, cemût che al è just, la peraule taliane «acqua» si à cure di scrivile «acqua» e no «accua» o «aqua» o «akua», parcè lis peraulis furlanis «benvignûts» e «ducj» tal gjornâl de associazion si scrivino «benvignus» e «duc»?).

TORONTO

Propit se si à voie di fâ e di jessi rêt, di creâ e di disvilupâ relazions di ogni sorte – personâls, culturâls, sociâls e economichis – e se si à chê di fâ business e di jessi 2.0, no si pues fâ di mancul di vê e di disvilupâ une identitât dinamiche, vivarose, moderne, plurâl e in chest sens furlane.Al è dome cussì che si è ambassadôrs di alc.

La lenghe e je un valôr, un dirit e une oportunitât ancje par chest. E pal mont lu àn capît ancjemò di plui che in Friûl, cemût che si lei achì, cemût che e contave une ministre canadese di divignice furlane cualchi an indaûr (un esempli di chês “ecelencis” e di chei “ambassadôrs” che di lôr si fevele tant) e cemût che e à ricuardât, propit sabide stade a Udin, une des reladoris de “Convention”, Isabella Lenarduzzi.

Lis sôs peraulis a son stadis la tierce robe interessante de “Convention”.
Sperìn che si visin di ce che e à dit. Tra lis altris cheste e je une riflession che e je stade inviade za un pôcs di agns indaûr, che propit in chest moment e merete disvilupade inte pratiche e che cualchi politic al somee v
ê almancul mostrât di capî alc.
Viodarìn se al sarà pardabon cussì.

internet

No volaressin someâ masse autoreferenziâi, ma par jessi antenis e ambassadôrs  a coventin lidrîs e butui.
E il Friûl pal Mont e tal Mont al à di jessi ancje Friûl e duncje ancje furlan. Se di no, al è p
ôc ce fâ par meti dongje une comunitât di relazions, di interès e di afârs.
No tant par che il nono al conti e il nevôt al scolti (stant che al è il pericul che il nono nol rivedi plui a contâ e il nevôt nol vedi plui voie di scoltâ…), ma soredut par che nonos, fîs, nevôts e altris parincj plui o mancul lontans a vedin alc ce contâ, ce scoltâ e ce fâ.
Ducj adun. All together. Todos juntos. Alles zusammen. Tutti insieme.