Eina + Fermin Muguruza & The Suicide of Western Culture + Jansky + “La sfida catalana” = Babêl Europe 07/2020

Martars ai 31 di Març a 11 a buinore, miercus al 1n di Avrîl a une dopo di misdì e sabide ai 4 a une e mieze, intal palinsest di Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât.

Ancje par cheste setemane, lant daûr di ce che a proviodin, in cont des restrizions de mobilitât des personis, i decrets dâts fûr par fâi cuintri ae difusion dal virus Covid-19, Babêl Europe no vignarà fate in direte. Par chel la gnove pontade de trasmission e je la repliche dal episodi numar 10 dal 2019.

Cussì e sarà la pussibilitât di tornâ a scoltâ la interviste cun Marco Santopadre, autôr dal libri La sfida catalana. Cronaca di una rivoluzione incompiuta, che al jere stât presentât ai 13 e ai 14 di Mai dal 2019 a Cividât e a Udin. Inte pontade di Babêl Europe, che e sarà tornade a mandâ in onde vie par cheste setemane si fevelarà de Catalogne e ancje di altris libris che a fevelin dal câs catalan, tacant di I giorni della Catalogna di Bojan Brezigar.

Il dut al vignarà compagnât de musiche di Eina, Fermin Muguruza & The Suicide of Western Culture e Jansky.

Ancje cheste pontade di Babêl Europe si pues scoltâle sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dutis lis pontadis di Babêl Europe si pues tornâ a scoltâlis in podcast cun Spreaker e cun Spotify.

 

ARLeF, Radio Onde Furlane, Patrie dal Friûl e ancjemò altris risorsis che si cjatin in rêt. La lenghe furlane ai timps dal Covid-19

Par fâi cuintri al infet dal Covid-19 o vin di stâ cjase. Lis limitazions ae mobilitât a son dificilis di rezi ma si scuen fâlu pal ben di ducj e a puedin judâ a sopuartâ cheste situazion grivie e penze ancje i mieçs e i prodots di informazion, comunicazion, formazion e intratigniment in lenghe furlane.

In graciis de rêt, dapardut e duncje ancje a Turin e in Piemont, si pues scoltâ, lei e cjalâ alc di bon e di interessant par furlan. Un esempli fuart e clâr al è chel di Radio Onde Furlane, che za di tant timp si pues scoltâle in internet, in streaming, su Facebook e fintremai cui telefonuts ancje doprant une app specifiche. Cun di plui i siei programs a vegnin archiviâts in rêt e par chel si puedin cjatâ su Spreaker e Spotify.

In chest moment particolâr Radio Onde Furlane e va dilunc cul so servizi e cu la sô programazion, che però e ven puartade indenant in studi dome di pôcs di lôr. Tancj colaboradôrs e tancj ospits, impen di jessi presint intai studis de emitente, a intervegnin vie telefon o cun altris colegaments esternis. Cualchi trasmission – par esempli Gerovinyl 55/80 – e à cjapât sùù une gnove fisionomie “di emergjence”, di cualchi altre invezit – un câs al è chel di Babêl Europe – a vegnin tornadis a proponi vecjis pontadis gjavadis fûr dal archivi de radio.

Une altre presince impuartante de lenghe furlane su internet e je chê da La Patrie dal Friûl. Tal sît di chel che tacant dal principi dal 2020 si presente ancje cul sproc “il gjornâl dai furlans che no si rindin” si cjatin ducj i articui des anadis plui resintis e a son archiviadis lis jessudis di diviersis rubrichis specifichis. Cun di plui la Patrie e à une pagjine Facebook siore di contignûts e cun passe 25mil di lôr che i stan daûr. Juste in chest moment che ducj o scugnìn stâ cjase, la Patrie e à inviât une gnove iniziative: une selezion di articui dal mensîl e ven proponude ancje in version audio cu la lôr leture de bande dai colaboradôrs dal gjornâl.

Par ce che al tocje l’associazionisim, lis risorsis in rêt, la produzion culturâl in Friûl e almancul in part ancje in lenghe furlane, a meretin segnalâts ancje il gnûf puartâl Riviste Friulane, inmaneât de bande de Societât Filologjiche Furlane. Une altre gnove interessante, cun riferiment aes istituzions e al cjamp de ricercje e de formazion, e je chê de scree, juste cualchi setemane indaûr, di UniUd par Furlan, la pagjine Facebook in lenghe furlane de Universitât dal Friûl. Ponts di riferiment sigûrs inte navigazion in rêt par furlan, di une bande cun riferiment ae narative contemporanie e di chê altre par ce che al tocje la lenghe e i servizis linguistics, a son i sîts de ostarie leterarie Contecurte e des cooperativis CLAAP e SerLing, intant che al merete simpri dâ un cuc aes produzions par furlan de cjase editore KappaVu.

Une vore siore – e guai se no fos – e je la ufierte in rêt de ARLeF, la Agjenzie Regjonâl pe Lenghe Furlane, jenfri sît istituzionâl e social media. Cun di plui, juste intal moment che si à tacât a scugnî stâ cjase par sghindâ l’infet dal Covid-19, l’organisim di politiche linguistiche pal furlan de Regjon Friûl-VJ al à inviât dôs gnovis iniziativis cun chê di ufrî moments di divertiment e di straviament a plui piçui, imprescj par cognossi e imparâ ancje pai adults e ocasions par rinfuartî la cussience de impuartance de lenghe furlane tant che patrimoni, dirit e oportunitât par ducj.

La prime e je la metude a disposizion, inte sezion Fruts dal sît www.arlef.it e sul so canâl YouTube dedicât, di un centenâr di cartons animâts par furlan, tacant de gnove serie Rite & Cjossul, vincjesîs episodis che a contin lis zornadis di Rite, une frute di cinc agns, e dal so cjan Cjossul, pegri e cuiet, che al è bon di fevelâ. Il carton animât al è une produzion gjaponese, gjavade fûr dai libris ilustrâts “Rita et Machin”, publicâts par francês di Gallimard Jeunesse.
La serie si zonte a chês altris za a disposizion: Omenuts, la version furlane dai Little People de Fisher-Price; Tui e Tuie, che e conte di doi gjatuts simpatics, fradi e sûr, che midiant di une scjate magjiche e di une imagjinazion ferbinte a vegnin traspuartâts lontan di cjase e a vivin aventuris plenis di sorpresis e di scuviertis, e La Pimpa, la simpatiche cjiçute blancje a balins ros, nassude dal lapis di Altan.

La seconde e je Dut par furlan, un cors di base indreçât sei a chei che a fevelin furlan, ma no lu san scrivi, sei a chei che lu capissin, ma no lu fevelin. Ideât di Adriano Ceschia, il cors al è fat di vincj lezions, ognidune spartide in trê sezions tematichis: la sezion Ortografie e Gramatiche e analize lis regulis de gramatiche e de ortografie de lenghe, insegnant a scrivi in maniere corete daûr des regulis de grafie uficiâl; la sezion Bocons di Narative e propon leturis di autôrs furlans impuartants (cun traduzion par talian in bande), ancje midiant di esercitazions pratichis e cul sugjeriment di peraulis e espressions che l’ûs dal talian al à puartât a dismenteâ; infin, la sezion Scaiis di Poesie dal 1945 incà e met dongje, pal plasê de leture e no dome par imparâ la lenghe, cetantis poesiis di poetis innomenâts dal nestri teritori (ancje chestis cu traduzion par talian in bande).

Alan Stivell (interviste) + Gran Bal Dub + Alidé Sans + Perynn Bleunven + Musicos pola Oficialidá = Babêl Europe 6/2020

La gnove pontade di Babêl Europe, la trasmission cuindisinâl dedicât a lenghis, musichis, minorancis e nazions cence stât, in programazion su Radio Onde Furlane vuê, martars ai 17 di Març a 11 a buinore e po doman, miercus ai 18, a une dopo di misdì, e sabide ai 21 a une e mieze, e je une repliche dal episodi numar 7 dal 2019.

Nol è un câs: in osservance di ce che a proviodin, in cont des restrizions de mobilitât des personis, i decrets dâts fûr par fâi cuintri ae difusion dal virus Covid-19, Babêl Europe no vignarà fate in direte. Al so puest si tornarà a scoltâ une pontade lade in onde sù par jù un an indaûr.

Cussì e sarà la pussibilitât di tornâ a scoltâ la interviste cun Alan Stivell, fate a Mestre in ocasion dal so conciert di vinars ai 22 di Març dal 2019, là che il cjantant, arpist e polistrumentist di divignince bretone al fevele di musiche, di lenghis, di dirits, di Bretagne, di Catalogne e di Europe.

Si scoltarà ancje la musiche di Gran Bal Dub, progjet di contaminazion jenfri la musiche tradizionâl ocitane e la eletroniche là che si dan dongje Sergio Berardo dai Lou Dalfin e Madaski dai Africa Unite, e dai Musicos pola Oficialidá, une sorte di rapresentative dai musiciscj asturians, e lis versions speciâls dai imnis nazionâi de Ocitanie e de Bretagne, interpretadis de cjantante aranese Alidé Sans e de cjantante bretone Perynn Bleunven adun cun tancj siei conazionâi, tacant dal stes Alan Stivell.

Ancje in chest timp une vore particolâr, Radio Onde Furlane e va dilunc a fâ il so servizi cuotidian di informazion, intratigniment e culture, sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, e su Facebook.

Dutis lis pontadis  di Babêl Europe si cjatin ancje in podcast su Spreaker e su Spotify.

 

Pordenone – Juve Stabia 2-1

Il Pordenon al torne a vinci ancje tal Stadi Friûl. Dopo dal sucès di domenie in cjase dal Empoli la formazion nere e verde e vuadagne ducj i ponts a disposizion ancje cuintri de Juve Stabia. Lis jespis a rivin in Friûl cun chê di recuperâ ponts pe salvece, intant che i sborfs a àn l’intindiment di mostrâ che chel di domenie nol è stât un câs e che a son jessûts ad in plen dal letarc dal imprin dal 2020.

La scuadre di Tesser si presente sul cjamp dsi Riçs cul so scheme di simpri, un ecuilibrât 4-3-1-2, intant che Casert al opte pal 4-2-3-1.
La prime miezore di zûc no ufrìs cetantis emozions. Il scuintri al è fisic, a son diviers i erôrs de bande di dutis dôs lis formazions e ancjetantis lis interuzions.

Passade la miezore e rive la prime vere ocasion di gol de partide. E je dal Pordenon, che le disfrute inte maniere miôr: Gasbarro si libere de marcadure statiche di Melara e al crosse tal mieç, là che Gavazzi al salte prime di Troest e cul cjâf al impire la puarte di Provedel.

Doi minûts plui tart i neris e verts a provin a fâ il bis: ancjemò un cross de çampe di Gavazzi che Burrai al tocje prime di ducj, ma Provedel al interven in maniere providenziâl. I ospits si fasin viodi des bandis di Di Gregorio dome ae fin dal prin timp cuntun passaç in verticâl di Calò par Melara, che le met tal mieç a vantaç di Rossi, che al prove a intervignî cul tac, però la sô conclusion e ven fermade di Bassoli.

Intal principi dal secont timp la Juve Stabia e je pericolose cuntune combinazion che e tache dal corner batût di Ricci, tocjât di Melara in direzion di Troest che al tire fûr bersai. La rispueste dal Pordenone je une azion in velocitât che si siere cun Ciurria che al rive al tîr dal limit che al va fûr no di tant ae diestre di Provedel. Ancje Gavazzi al à une bale buine, ma la sô conclusion e cjape l’esterni de rêt.

Casert, dopo de jentrade di Canotto par Melara, al met dentri Bifulco tal pues di Ros, cun Di Mariano che al ven spostât tal mieç, poiât ancje di Mallamo, inte posizion di false ponte. L’obietîf al è chel di gjavâur i ponts di riferiment ai aversaris. L’impat des sieltis dal tecnic al è relatîf, ma positîf. Al è propit Canotto che al jentre inte aree di rigôr, obleant Gasbarro a intervignî par daûr: Illuzzi al sivile e Di Mariano al segne dal discut.

La pate e pues lâ ben pe Juve Stabia, ma par sigûr no i da sodisfazion al Pordenon, che al alce la linie dal so zûc e al mande Ciurra in zone gol. Il so tîr al è biel, ma e je ancjemò plui biele la parade di Provedel. Il gol al rive cuasit ae fin, cun Strizzolo che al ricêf la bale di Burrai dal corner e al tire cul cjâf a colp sigûr.

Il Pordenon al rive cussì a jonzi la vitorie, che i permet di considerâsi bielzà salf e di tornâ a indreçâsi viers de zone play off.

Mari Boine + Lou Seriol + Brût & Madone + Diabolika + Torp = Babêl Europe 05/2020

Un viaç che al ten dongje il Circul Polâr Artic, la Scandinavie e il Mediterani. Al è ce che e promet la cuinte pontade dal 2020 di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane.

Inte trasmission che e va in onde in direte vuê a undis a buinore e po, in repliche, tal dopo di misdì di doman a une e in chel di sabide ai 7 di Març a une e mieze, al sarà spazi pe musiche che e rive de tiere dai Sami, de Ocitanie, dal Friûl, de Catalogne e des isulis Åland.

Il percors musicâl di Babêl Europe al miscliçarà sunôrs une vore diferents e al varà tant che portagoniscj la regjine dal joik, Mari Boine, la innomenade band ocitane dai Lou Seriol e une buine dose di metal pesant (e no dome di chel) cui furlans Brût & Madone, cui catalans Diabolika e cui Torp, grup espression de comunitât svedese in Finlandie che al cjante ancje par catalan.

Si pues scoltâ Babêl Europe su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming o fintremai in video su Facebook ).
Dopo des sôs trê emissions vie pe setemane si pues tornâ a scoltâ ancje cheste pontade in rêt su Spreaker e su Spotify.

Gwenno + Lou Dalfin + Massimo Silverio + Caxade + Dixebra + Xune Elipe + O que arde = Babêl Europe 3/2020

Gnovis produzions, inovâi impuartants, cine e libris jenfri Friûl, Gales, Cornualie, Ocitanie, Asturiis e Galizie. Al è il menù de tierce pontade dal 2020 di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane.

Inte trasmission che e va in onde in direte vuê a undis a buinore e po, in repliche, tal dopo di misdì di doman a une e in chel di sabide ai 8 di Fevrâr une e mieze, a vignaran memoreâts i prins cuarante agns de radio libare dai furlans e si fevelarà di Ø, il disc gnûf dal cjantautôr cjargnel Massimo Silverio e de sô tournée ator pe Europe.

Il percors musicâl di Babêl Europe al incrosarà ancje une cerce di Le Kov, il disc par cornic dât fûr juste doi agns indaûr de galese Gwenno e cercis dal repertori dai ocitans Lou Dalfin, dai galizians Caxade e dai asturians Dixebra. Lis Asturiis a saran protagonistis ancje dal spazi dedicât ae scriture e ae leture babelichis cul libri dal cjantant dai Dixebra, Dende la casa conceyu, e cu la edizion dal 2019 dal Anuariu de la Música Asturiana. Cun di plui si tornarà a fevelâ dal cine galizian O Que Arde, che al va dilunc a vinci premis ator pe Europe: dopo Cannes, ancje in Catalogne e a Madrid.

Si pues scoltâ Babêl Europe su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming ae direzion www.ondefurlane.eu o fintremai ancje in video su Facebook ). Dopo des sôs trê emissions vie pe setemane si pues tornâ a scoltâle in rêt su Spreaker e su Spotify.

Cuarante agns a pro dal Friûl, de sô int, dai siei dirits. Tancj auguris, Onde Furlane

Cuarante agns di informazion, di musiche, di intratigniment, di culture, di agregazion e di mobilitazions a pro dal Friûl e de sô int: a pro di un Friûl vîf, vêr, dinamic, plurâl, cussient di se e in stât di metisi in relazion positive cul rest dal mont. Al è ce che e à fat fint cumò Radio Onde Furlane, che vuê e finìs cuarante agns.

Juste ai 2 di Fevrâr dal 1980 si meteve adun la cooperative di Informazion Furlane, che e je la editore de radio, e a tacavin in maniere uficiâl lis sôs primis emissions. Di in chê volte Onde Furlane e va dilunc a fâ un servizi public (comunicazion e informazion par furlan) e a jessi un spazi di libertât, un lûc di sperimentazion di lengaçs e un catalizadôr di creativitât e di partecipazion.

La sô storie e rimonte a chê zornade di cuarante agns indaûr e salacor ancjemò a cualchi timp prime. Si inlidrise, di une bande, in chel moment che al scomence a lâ al mancul il monopoli statâl tal cjamp de radiofonie e de television e a tachin a saltâ fûr, ator par dut il Stât talian, lis radios libaris e, di chê altre, inte situazion specifiche dal Friûl dai agns Setante. A son i timps des mobilitazions a pro de creazion de Universitât dal Friûl, che e rivarà – cul non di Universitât di Udin – tal 1978, e cuintri des servitûts militârs. E a son i timps dal taramot dal 1976 e dal inviament de ricostruzion, juste cuant che, tacant de esperience di autogjestion metude in vore tes tendopolis e tes baracopolis e po dal control diret su la ricostruzion che al ven cjapât sù de bande des comunitâts locâls, a vegnin indenant formis significativis di afermazion identitarie e di protagonisim sociâl.

La cooperative e la radio a son il risultât di chê situazion e plui in detai di un procès che si invie in particolâr vie pal 1979, cuntun grup di personis, di estrazion politiche e culturâl diferente e di plui gjenerazions, che si dan dongje daûr di une cierte vision di Friûl e de volontât di meti adun un imprest di comunicazion e di informazion libare, alternative e «par furlan».

A tacâ dal so prin program Onde Furlane e je la radio che e conte il Friûl e il mont doprant la lenghe furlane, cui notiziaris, cui spazis di aprofondiment cuotidians di atualitât e cun rubrichis specifichis, dedicadis a tematichis leadis in maniere plui o mancul direte al contest furlan, che a tocjin l’ambient, lis migrazions, la economie, il sport, la politiche aes migrazions, de economie ae politiche internazionâl e la situazion di minorancis e nazionalitât in Europe e inaltrò pal mont.

E je ancje la radio zovine e alternative, cui siei programs dedicâts ae musiche di ducj i gjenars e di ogni dontri. Ancje in chest contest l’ûs de lenghe furlane al è fondamentâl, no dome par contâ lis espressions artistichis di chei altris, ma ancje par esprimi la proprie creativitât. Al è cussì che al nas il Premi Friûl, metût adun e prime volte 1984 cun chê di promovi la produzion artistiche par furlan in setôrs diferents, de grafiche al teatri, de fotografie ae musiche. Di chê strade e ven sù ancje la etichete discografiche Musiche Furlane Fuarte, che a tacâ dal 1999 e bute fûr passe cincuante discs.

Se la scuadre di balon dal Barcelona si presente cul sproc “mes que un club” (plui che un club), si pues dî par sigûr che Onde Furlane e je “plui che une radio”.
Chest al vâl pe ativitât de cooperative inte organizazion di events e manifestazions – l’esempli plui impuartant, intai ultins agns al è chel di Suns Europe, il festival des arts intes lenghis minorizadis che di un pôcs di agns al puarte la Europe in Friûl e il Friûl in Europe e intal mont – e ancje in altris setôrs: de produzion audiovisive – cul prin telegjornâl par furlan e diviers lavôrs di fiction, di documentazion e fintremai di jutori pe didatiche – ai prins progjets di linguistiche aplicade e aes gnovis tecnologjis, stant che si pues scoltâ la radio ancje in graciis di une App di pueste.
Onde Furlane si pues calcolâle ancje une sorte di sogjet politic no convenzionâl se si ten cont de sô azion di sensibilizazion e di mobilitazion su ciertis cuistions, tant che l’autoguvier dal Friûl, i dirits linguisics, l’ambient, la normative di tutele des minorancis…
Sei tant che “radio” che tant che “plui che une radio”, Onde Furlane e je impuartantone par inviâ, par mantignî e par disvilupâ relazions tra il Friûl che al è in Friûl e chel che al è pal mont.

Dai 2 di Fevrâr dal 1980 al dì di vuê – e ancjemò par tant timp, o sperìn – Onde Furlane e je une farie di professionalitât, di creativitât, di identitât e di libertât: la vôs libare di un Friûl che al vûl jessi libar e jessi Friûl: un Friûl cence confins, une Patrie cence adietîfs, une tiere di incuintri, di convivence e di scambi tra individuis, popui, lenghis e culturis diferentis.

Tancj auguris, Radio Onde Furlane!
Tancj auguris, Friûl!
Tancj auguris, furlans (in Friûl e pal Mont)!

La Basu + Brieg Guerveno + Gruff Rhys + Dissociative TV + Blu l’Azard + Riu Mannu = Babêl Europe 02/2020

Un altri viaç a torzeon jenfri musichis, lenghis, minorancis e nazions cence stât.  Al è ce che e promet la gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une e in chel di sabide a une e mieze.

Intal secont episodi dal 2020 dal program, che si pues scoltâlu doman, miercus e sabide su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming ae direzion www.ondefurlane.eu o fintremai ancje in video su Facebook ), si fevelarà ancjemò di discs e di libris, in continuitât cu la prime pontade dal an.

In particolâr e sarà la pussibilitât di scoltâ in anteprime une cerce di ‘Vel Ma Vin, l’album gnûf dal rocker breton Brieg Guerveno, che al vignarà presentât in maniere uficiâl sabide ai 25 di Zenâr cuntun conciert a Naoned/Nantes.  Al sarà spazi ancje par une gnove selezion di Gerra, il disc de rapper basche La Basu, che al è stât screât juste doi mês indaûr, pe gnove produzion dai cjargnei Dissociative TV e par scoltâ ancjemò alc di Pang!, l’album plui resint dal innomenât artist galês Gruff Rhys, e di Enfestar, il prin disc, jessût tal 2015, de formazion ocitane e francoprovençâl dai Blu l’Azard.

Intal spazi dedicât ae scriture e ae leture babelichis si fevelarà dal romanç in lenghe sarde Riu Mannu. The Lan(d)guage Grabbing di Micheli Ladu.

Ancje cheste pontade di Babêl Europe, dopo des sôs trê emissions vie pe setemane (doman in direte, miercus e sabide in repliche), si pues tornâ a scoltâle in rêt su Spreaker e su Spotify.

Xavi Sarrià + Banda Beni + Imlé + Fermin Muguruza + LaipNessLess + libris di lei = Babêl Europe 01/2020

Al è scomençât zaromai di une setemane il 2020 e su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming ae direzion www.ondefurlane.eu o fintremai ancje in video su Facebook ) e je rivade la ore di screâ la gnove serie di Babêl Europe, il program cuindisinâl dedicât ae produzion musicâl intes lenghis minorizadis dal nestri continent.

Intal apontament di vuê, in direte a 11 a buinore, e po di doman e di sabide, in repliche a une e a une e mieze dopo di misdì,  si fevelarà di discs e di libris, di storie e di atualitât.

Inte trasmission che e puarte il so public a torzeon tra lenghis, musichis, minorancis e nazions cence stât, la segnalazion di cualchi publicazion “babeliche” di lei e vignarà compagnade di selezions musicâls di pueste, intun percors che al va dai Paîs Catalans ae Sardegne e de Irlande al Paîs Basc e che al tocje fintremai il Friûl.

E sarà la ocasion par scoltâ alc dal repertori di Xavi Sarrià, de Banda Beni, dai Imlé, di Fermin Muguruza e dai  LaipNessLess.

 

Ancje cheste pontade di Babêl Europe, dopo des sôs trê emissions vie pe setemane,  si podarà tornâ a scoltâle in rêt su Spreaker e su Spotify.

LaipNessLess + Paolo Fresu + Magalì Sare + Mocker’s + Y Sybs = Babêl Europe 24/2019

Vuê, doman e sabide su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming ae direzion www.ondefurlane.eu o fintremai ancje in video su Facebook ) al torne Babêl Europe, il program cuindisinâl dedicât ae produzion musicâl intes lenghis minorizadis dal nestri continent.

In chê che e podarès jessi la ultime pontade dal 2019 si tornarà a fevelâ de ultime edizion di Suns Europe e in particolâr de serade finâl dai 30 di Novembar stâts. E sarà la ocasion par tornâ a scoltâ la vincidore dal concors musicâl, la cjantante catalane, Magalì Sare, e chei altris doi grups segnalâts de jurie internazionâl, i bascs Mocker’s e i galês Y Sybs.

E sarà ancje la ocasion par scoltâ i LaipNessLess, che juste sabide stade a àn screât il lôr disc gnûf, Cormôrra, e l’innomenât trombetist e flicornist Paolo Fresu, che domenie stade al jere in Friûl, a Pordenon, adun cun Daniele Di Bonaventura par une serade inmaneade de Accademia Naonis.

Ancje cheste pontade di Babêl Europe, dopo des sôs trê emissions vie pe setemane (vuê in direte a 11 a buinore, doman in repliche a une dopo di misdì e ancjemò sabide in repliche a une e mieze dopo di misdì),  si podarà tornâ a scoltâle in rêt su Spreaker e su Spotify.