Spezia – Udinese 0-1

bandieris-friuul

L’Udin cuintri dal Spezia al zuie, al scombat e al vinç. I blancs e neris a rivin in Ligurie cun chê di lâ dilunc a meti dongje risultâts positîfs e magari ancje di tornâ a vinci dopo des buinis patis fatis cuintri de Atalanta e dal Inter. Ancje i parons di cjase a àn chê di tornâ a fâ ponts dopo de ultime sconfite e di scomençâ inte maniere miôr la seconde part dal campionât. In chestis cundizions lis dôs scuadris a son protagonistis di une partide ecuilibrade e scombatude, cemût che a testemoniein i doi cartelins ros par dople amonizion, chei altris sîs zâi e il rigôr, sivilât e segnât, che al sarà determinant pal risultât finâl, che al premie la cualitât plui alte de formazion furlane.

Gotti al sielç une altre volte il 3-5-1-1, cun Musso tra i pâi, cun Becao, Bonifazi e Nuytinck in difese, cun Stryger Larsen, Di Paul, Walace, Arslan, Zeegelaar in mediane e cun Pereyra daûr di Deulofeu, ponte uniche. In particolâr Nuytinck al torne in cjamp dal prin minût, Mandragora al è in bancjine, compagn di Llorente, l’atacant basc a pene rivât dal Napoli. Italiano al rispuint cuntun 4-3-3 che al viôt Provedel in al puarte, Vignali, Chabot, Erlic e Bastoni in difese, Maggiore, Agoume e Pobega in mediane e Gyasi, Galabinov e Farias in atac.

La partide si invie cuntun ritmi che nol è masse alt e cu lis dôs scuadris che a somein impegnadis soredut a no concedi spazis une a di chê altre. La prime ocasion e je dai parons di cjase, dopo trê minûts di zûc: Maggiore al anticipe Walace e al bat a rêt dal limit de aree, cun Musso che al pare cun sigurece. Il Spezia al ten di plui la bale, ma il so possès al è sterp parcè che l’Udin no i permet di lâ indenant cu la sô manovre. I blancs e neris a rispuindin cuntune punizion di De Paul par Becao, che e ven fermade di Provedel. Ator de metât dal prin timp, di chê altre bande dal cjamp, un biel cross di Bastoni nol ven disfrutât di Gyasi cemût che al covente e Musso al rive a parâ vie la bale in corner.

Inte ultime part dal prin timp l’Udin al vuadagne cjamp e zûc, rivant a jessi ancje pericolôs des bandis di Povedel. Prime De Paul al pinele un altri cross par Becao, che cul cjâf le mande adalt parsore de travierse e po dopo si met in evidence Deulofeu, che intune ocasion al ven fermât cuntun biel intervent in sbrissade di Erlic e in chê altre al cjape il pâl esterni dopo une azion personâl, e Arslan al rive a segnâ su assist di Pereyra, ma Di Martino al sivile il fûr zûc e nol fâs bon il gol.

La seconde frazion si vierç daruman cuntun tîr di Maggiore blocât di Musso e cuatri minûts plui tart al rive il svolt. Magjie di De Paul che al salte un pâr di aversaris e al servìs Pereyra denant di Provedel, cul puartîr che pare fûr la bale tirade in puarte dal argjentin. Deulofeu al torne a concuistâ la sfere, Chabot lu bute jù in aree e l’arbitri nol à dubis: al è rigôr pal Udin e dal discut al tire De Paul, che al segne.

Il Spezia al fâs fature a reagjî e al paie lis assencis di Nzola e di Piccoli. L’Udin si difint cun ordin, zovantsi des energjiis frescjis di Mandragora che al jentre par Arslan e di Llorente che al cjape il puest di Deulofeu. Ancje Italiano al fâs doi cambis: fûr Farias e Galabinov, dentri Saponara e Agudelo.

I parons di cjase no rivin a cjatâ la organizazion tatiche juste par meti in pinsîr i blancs e neris. Un cuart di ore prime de fin De Paul, za amonît, al cjape un altri cartelin zâl par un fal su Acampora e par chel al ven butât fûr. La scuadre di cjase e prove a profitâ de superioritât numeriche, ma la formazion furlane e va dilunc a difindisi cun ordin e cun sintiment.

Tal ultin ancje Saponara al ven butât fûr par dople amonizion. In dîs cuintri dîs, i parons di cjase si mantegnin te metât dal cjamp dai blancs e neris, ma no rivin a passâ la muraie blancje e nere che si rinfuartìs cul contribût di De Maio e di Molina, in cjamp tal puest di Bonifazi e di Zeegelaar. E il risultât al reste chel: pal Udin une vitorie sufierte e meretade, che i permet di vuadagnâ posizions in graduatorie.

Pordenone – Lecce 1-1

This image has an empty alt attribute; its file name is pordenone-calcio.png

Pordenon e Lecce a fasin un gol par om e a cjapin un pont par om. I neris e verts a zuin la sô prime partide cence Diaw, che al è passât al Monza, e si presentin cuntune formazion cun diviersis assencis, di Berra a Bassoli e di Pasa a Camporese. Il Lecce al rive in Friûl cun chê di fâ ponts par vuadagnâ posizions in graduatorie, ma ancje i parons di cjase a àn l’intindiment di lâ dilunc cu la lôr rie di risultâts positîfs e la partide e rapresente ad in plen chest ecuilibri.

I ospits a partissin al atac. La prime ocasion pe formazion salentine e je un tîr di fûr di Nikolov che nol cjate il spieli de puarte. I zâi e ros a rivin a impirâ Perisan cun Coda, ma Massa nol fâs bon il gol parcè che al viôt un fal di Hjulmand. L’apontament cu la rêt dal ex zuiadôr dal Benevento al rive dentri dal prin cuart di ore di zûc, cuant che tal mieç de aree di rigôr dai Sborfs al controle, al salte un pâr di aversaris e al tire a colp sigûr.

Il Lecce si gjolt il vantaç meretât e al cîr di fermâ lis iniziativis dai parons di cjase che a provin daurman a tornâ a dreçâ la partide. I va strucje, stant che juste cinc minûts plui tart il Pordenon al segne. Butic al tire in puarte un biel diagonâl, Gabriel al rive a tocjâ la bale e a parâle vie e però Musiolik si cjate tal puest just par tocjâle e butâle dentri. Il Pordenon al prove a ribaltâ i ecuilibris, prime cun Butic, che al profite di un erôr di Lucioni e al tire cence cjatâ la puarte, e po cun Calò e cun Zammarini, ancje lôr fûr bersai, e ancje cun Misuraca, che juste prime de polse al cjate su la sô strade Hjulmand.

La seconde frazion par vincj minûts no regjistre grandis emozions e tal cjamp al regne une ciert ecuilibri. Il Lecce, prime cun Lucioli e po cun Pisacane, nol rive a cjatâ il gol. I ospits a pierdin Adjapong, infortunât, che il so puest al ven cjapât di Paganini, e in chel stes moment Corini al mande in cjamp ancje Rodriguez e Henderson, tal puest di Stepinki e di Nikolov.

Cu lis gnovis energjiis i ospits a provin a fracâ sul aceleradôr, ma il Pordenon, cun Ciurria tal puest di Scavone, al ten bot e no si scompon, ancje parcè che i salentins si fasin viodi in atac dome cuntun tîr cul cjâf di Pisacane che al finìs adalt. La scuadre dal Friûl Ocidentâl e rispuint cun Misuraca, cence sucès, e po i vegnin i sgrisui suntun tîr di Mancosu, che par fortune al sbat sul pâl e nol jentre in puarte.

La fin de partide si svicine e il Pordenon al lenç il gol de vitorie juste tal ultin: conclusion di Morra a puarte vueide, ma Pisacane al rive a meti la sô çate e il risultât al reste chel di un a un. Il Pordenon si manten tal otâf puest in classifiche, juste daûr dal lecce, a doi ponts di distance.

Udinese – Inter 0-0

This image has an empty alt attribute; its file name is udin_neri.png

L’Udin al veve di cjapâ almancul un pont e l’Inter al veve chê di vinci ancjemò, dopo dal sucès cuintri de Juve di domenie stade. La scuadre di balon furlane e à jonzût il so obietîf, tirant sù bariduris altis e fuartis e zuiant cun atenzion e cun dignitât, intant che la scuadre di Antonio Conte, par merit dai aversaris e ancje un tic par colpe sô, no à rivât a puartâsi a cjase ducj i trê ponts che i coventavin par scjavalgjâ il Milan e gafâ il prin puest in classifiche e il titul di Campion di Invier.

Cuintri dal Inter Gotti al torne al 3-5-2 cun Musso in puarte, Becao, Bonifazi e Samir in difese, Stryger Larsen, De Paul, Arslan, Pereyra e Zeegelaar in mediane e Lasagna e Deulofeu in atac. Conte al conferme i undis che àn metût in zenoglon la Juve cun Handanovic tra i pâi, Skrniar, De Vrij e Bastoni in difese, Hakimi, Barella, Brozovic. Vidal e Young in mediane e Lautaro e Lukaku di ponte.

La partide e scomence cuntun sgrisul pe Inter, cun Bastoni che al rilance mâl un balon che al bat su Lasagna e par pôc e nol sblefe Handanovic. I ospits si salvin in extremis e a rispuindin cuntune conclusion di Lautaro, su lanç di De Vrij, che al tire in puarte e al impire Musso ancje se Maresca nol fâs bon il gol par vie de partence dal argjentin in posizion di fûr zûc.
Si zuie soredut tal centricjamp, Lautaro e Lukaku a son bandonâts in atac, cul Udin che si difint cun sintiment e in chel istès al ten alt il baricentri dal zûc, obleant i aversaris a stâ lontan de de aree blancje e nere.

Ator de metât dal prin timp l’Udin al met dongje une biele azion di atac, cuntun cross perfet di De Paul par Srtyger Larsen che al salte benon ma il so tîr cul cjâf al va masse adalt, e un brut erôr in difese cun Becao che i regale il balon a Lautaro: mancul mâl che sul tîr angolât dal interist Musso al intervent cun puntualitât e cuntun mieç miracul.
L’Inter al aumente i zîrs dal so motôr e si fâs viodi plui dispès des bandis di Musso, cun Young e Hakimi che a sburtin dilunc des corsiis laterâls e cui tentatîfs di Barella e Vidal, che però no crein problemis al puartîr de scuadre furlane.

La seconde frazion si vierç cul Inter che al va daurman al atac. L’Udin al ten bot, cun snait e cun caratar, e i opsits no rivin a imbastî cuissà ce azions di gol. Par sù par jù vincj minûts si viodin dome dôs incursions: une e je dal blanc e neri Pereyra, chê altre di Lukaku e nissune des dôs no cjate la fortune sperade.

Gotti al clame fûr Bonifazi e Deulofeu e al met dentri De Maio e Mandragora, cun chê di rinfuartî ancjemò di plui difese e interdizion. Juste tal mieç dal secont timp l’Udin al lenç il vantaç cun De Paul, che al ricêf di Pereyra e dal limit al tire in puarte cu la bale che e finìs fûr di un nuie.
Conte al mande in cjamp ancje Perisic, Sanchez e Sensi cun chê di scancarâ la difese furlane, che però e manten alte la sô atenzion. L’Inter nol cjate spazis par zuiâ dilunc de corsie centrâl e al prove ancjemò chês laterâls, par esempli cun Hakimi che al scate su la diestre e su assist di Sensi al tire a fîl di tiere un diagonâl che al va fûr di pôc.

E je la ultime bale gol pai ospits: la tele di ragn dal Udin e imbrene l’Inter, che nol rive plui a creâ pericui a Musso. La scuadre di balon furlane si difint, e strenç i dincj e no ur permet ai aversaris di dâi nancje une bale buine a Lukaku. Prime de sivilade finâl di Maresca al è ancjemò il timp par viodi il cartelin ros svintulât dal arbitri a Conte e Oriali, butâts fûr par protestis, e l’Udin che al vuadgne timp cirint di tignî il plui pussibil il control de bale fin tal utin.

Cosenza – Pordenone 0-0

This image has an empty alt attribute; its file name is pordenone-calcio.png

Il Pordenon a Cosenza al scuen contentâsi dome di un pont. I parons di cjase a scombatin e a tegnin bot, i Sborfs no rivin a disfrutâ lis ocasions di gol che a metin dongje, un pôc par vie di une cierte dose di sfortune e in cualchi câs de scjarse precision e une vore par merit di Falcone che al siere la puarte calabrese cun snait e cun mistîr. Se si calcole il volum dal zûc produsût, i neris e verts a meretavin di vinci, ma la grinte dal Cosenza e lis paradis di Falcone a valin la spartizion dai ponts.

Lis dôs scuadris si presentin in cjamp cun cualchi novitât, motivade soredut de emergjence. Di une bande Occhiuzzi al scuen fâ di mancul dai scualificâts Petrucci, Sciaudone e Kone e di chê altre Tesser al à di fâ i conts cu lis assencis pesantis di Bassoli, Pasa, Gavazzi e Ciurria. Cundut achel, il Cosenza al à une voie mostre di vinci, stant che la sô ultime vitorie e rimonte ai 15 di Dicembar, e il Pordenon al à chê di zontâ un altri sucès a chei puartâts a cjase intes ultimis trê partidis.

La scuadre di balon furlane e ocupe cun plui determinazion il cjamp e e je protagoniste des primisi iniziativis ofensivis. Dopo siet minûts di zûc il Pordenon al rive a butâle dentri cun Butic che al devie in puarte un cross di Falasco, però Meraviglia nol fâs bon il gol parcè che al viôt che l’atacant dal Pordenon al partìs di une posizion di fûr zûc.
La pression ofensive dai Sborfs ju puarte a vuadagnâsi un rigôr pal contat in aree tra Vera e Diaw. Dai undis metris al tire il stes Diaw, ma la bale e va a sabati sul pâl e il risultât al reste fer sul zero a zero.

Prime de interval il Cosenza al reste in dîs oms par vie de espulsion di Corsi, che al fâs une brute jentrade su Scavone. In superioritât numeriche, inte seconde frazion il Pordenon al va dilun a tignî il comant de partide, obleant il Cosenza a sierâsi indaûr. La pression de scuadre furlane, però, no somee jessi masse produtive e a son i parons di cjase che si fasin viodi in atac, cuntune conclusion cul cjâf di Bittante, che Perisan al pare cence padins, e cuntun tîr centrâl di Baez che al ven controlât ancje chel cence dificoltâts de bande dal puartîr di San Vît dal Tiliment.

La scuadra di Occhiuzzi, dopo costruidis chês ocasions e prove a alçâ la linie dal so zûc, ma il Pordenon no si scompon e inte ultime part dal incuintri al torne al atac cun plui viamence di prime e al lenç il gol almacul intun pâr di ocasions, cun Musiolik e cun Camporese che a provin a segnâ cul cjâf, ma a cjatin Falcone che al fâs miracui. Il risultât al reste zero a zero e juste intal recupar si ristabilìs ancje la paritât numeriche par vie de espulsion di Berra par vie di un so fal cuintri di Baez.

Udinese – Atalanta 1-1

This image has an empty alt attribute; its file name is udin_neri.png

Alc al è alc e nuie al è nuie. Massime se che alc al è un pont puartât a cjase dopo dôs sconfitis une daûr di chê altre e dopo une rie di risultâts che, cu la ecenzion di dôs patis, di juste doi mês a son dome che partidis pierdudis, e se chel alc al è un pont cjapât zuiant cuintri di une scuadre fuarte tant che la Atalanta.

Inte partide di recupar de diesime zornade di campionât l’Udin al passe in vantaç daurman e po al cîr di tignî bot denant de viamence de pression ofensive de scuadre aversarie, rivade ai Riçs cun chê di provâ a vinci par fâ un salt indenant in graduatorie fint tal tierç pont. Ae fin lis dôs scuadris si spartissin un pont par om. Pal Udin l’incuintri cul Atalanta al rapresente une piçule bocjade di aiar bon, un segnâl di vite e di resistence e une ponte che e ten impins la bancjine di Gotti.

Ancje in cheste ocasion il tecnic dal Udin al è libar di scugnî sielzi ancjemò une volte di meti in cjamp une scuadre cu la stesse fisionomie des ultimis partidis: un 3-5-1-1, là che la uniche novitât al è Arslan tal puest di Walace, intan che Musso al è in puarte, Becao, Bonifazi e Samir a son in difese, in mediane, dongje dal todesc di divignince turche, a son i laterâi Stryger Larsen e Zeeglaar e Mandragora e De Paul, Pereyra al fâs al mieze ponte daûr di Lasagna, unic atacant blanc e neri. Gasperini invezit al pues permetisi rotazions sostanziosis e al lasse fûr il difensôr Djimsiti, i centicjampiscj Freuler e Gosens a centricjamp e soredut Ilicic e Zapata. Il tecnic al mande in atac Muriel, sapontât di Malinovskyi e Miranchuk, titulâr pe prime volte.

La partence dal Udin e je fenomenâl. Dopo pôc plui di vincj seconts la scuadre furlane e passe in vantaç: Lasagna si libere de pression di Romero e al passe la bale a Pereyra, che al segne, sghindant l’intervent di Palomino, profitant de buse lassade di Toloi e tirant a colp sigûr. Fat il gol, l’Udin al difint il risultât, sierantsi ben e pontant su verticalizazions in cuintripît fondadis su la velocitât di Lasagna. Lis bariduris fatis sù dai blancs e neris a tegnin avonde ben e Malinovskyi e Muriel a fasin fature tal passâlis. Lis ocasions miôr lis an Maehle e Toloi, ma Musso al è simpri tal puest just e di chê altre bande Gollini al ferme in maniere dure e suspiete un atac in aree di Pereyra, ma par Calvarese e par Giacomelli al è dut regolâr.

La Atalanta e cjate il gol dal un a un juste un minût plui tart dal pericul scjampât: bale par Muriel che si cjate cu la schene viers de puarte, al rive a zirâsi, al bruse Bonifazi e nol perdone Musso, segnant il so setim gol personâl cuintri de sô ex scuadre e sierant la prime frazion sul un a un. Il gol fat al sburte la Atalanta a zuiâ il secont timp al atac, ancje se no rive a esprimi dut il so potenziâl par vie che e à il so bon ce fâ tal disberdeâsi inte tele di ragn blancje e nere.

Une buine ocasion par passâ in vantaç e je chê che si cjate Miranchuk nûf minûts dopo de polse, ma il so tîr al finìs masse adalt. Une altre conclusion e je chê cul cjâf di Romero suntun cross de diestre di Maehle, che e va fûr dal spieli de puarte di Musso (26′), intant che cul passâ dal timp la jentrade in cjap di Gosens, di Ilicic e di Zapata no à i efiets sperâts di Gasperini.
L’Udin al va dilunc a difindisi cun grinte e cun sintiment. Gotti al cambie Mandragora cun Walace, che un cuart di ore plui tart al scuen lassâ il puest a Deulofeu, che si puarte dongje di Lasagna e intal finâl Bonifazi al va a fâ il median tal puest di Arslan, cun De Maio che al jentre tal so puest, adun cun Molina, che al cjape il puest di Stryger Larsen. I blancs e neris a tegnin bot e tal ultin Lasagna al ven servît in profonditât e al prove a passâ Toloi che al rive a fermâlu e ancjemò plui tart Zeegelaar le bute dentri suntun cross di Deulofeu, ma l’arbitri nol fâs bon il gol parcè che al viôt un fal su Gollini.

Joan Baez + Barricada + Misiva + Muyeres + Anuariu de la Música Asturiana + Minority SafePack = Babêl Europe 02/2021

De Catalogne ae Galizie, passant pal Paîs Basc e pes Asturiis. Al è il percors che al vignarà fat inte seconde pontade dal 2021 di Babêl Europe, la trasmission cuindisinâl di Radio Onde Furlane, dedicade a lenghis, musichis, minorancis e nazions cence stât, in programazion vuê, martars ai 19 di Zenâr, a 11 in direte e po in repliche miercus ai 20 (h. 13) e sabide ai 23 (h. 13.30).

Si darà un cuc al gnûf Anuariu de la Musica Asturiana, scoltant un pâr di cercis dal cd che al compagne chê publicazion: i ruspiôs Misiva e il progjet Muyeres. Cun di plui, al vignarà ricuardât Boni – pe anagrafe Francisco Javier Hernández Larrea – il cjantant e ghitarist dal storic grup basc Barricada, muart ai 8 di Zenâr stâts, e i prins otante agns di vite di Joan Baez a saran la ocasion par scoltâle cjantâ par catalan, par basc e par galizian.

Si fevelarà ancjemò des Iniziativis dai citadins europeans Minority SafePack, dopo de risoluzion di poie fate buine dal Parlament European un mês indaûr, e SignItEurope, che al è timp par firmâle fintremai ai 7 di Fevrâr, e si ricuardarà l’inovâl de Domenie di Sanc dai 30 di Zenâr dal 1972 a Derry, inte Irlande dal Nord.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu). Dopo des sôs trê emissions vie pe setemane, ancje cheste gnove pontade si podarà tornâ a scoltâle in rêt su Spreaker e su Spotify.

This image has an empty alt attribute; its file name is logo_web.png

Sampdoria – Udinese 2-1

This image has an empty alt attribute; its file name is udin_neri.png

Une partide discrete che e somee indreçade inte maniere juste e che ae fn sinsiere inte maniere piês. L’Udin a Gjenue cuintri de Sampdoria e mostre il miôr e il piês dal so repertori: azions svelitis in verticâl, bielis paradis di Musso, cualchi numar di De Paul, ma ancje un tic di sfighe, pocje precision tal moment di tirâ in puarte e masse ingjenuitâts in difese. La scuadre di balon furlane e zuie un prin timp bon, e alce i zîrs dal motôr tal imprin de seconde frazion, e segne e però prime si fâs recuperâ dai parons di cjase e tal ultin cuart di ore e cjape il gol che al marche la vitorie de scuadre di Ranieri, cul efiet di sbrissâ indaûr in classifiche a trê ponts de zone retrocession.

Gotti al à pocje sielte e a Marassi al presente une formazion sù par jù compagne di chê che e veve pierdût cul Napoli: Musso tra i pâi, Becao, Bonifazi e Samir in difese, Stryger Larsen, Di Paul, Walace, Mandragora e Zeegelaar in mediane, Lasagna unic atacant cun Lasagna trecuartist daûr di lui. cun Pereyra che al varà di agjî daûr de uniche ponte Lasagne.
Dutis dôs lis scuadris a àn fam di ponts e la partide e scomence cuntun ritmi bon e cul Udin in bombe. La prime azion di atac e je de Sampdoria, cuntun cross di Augello par Quagliarella che al ven recuperât de difese udinese. I blancs e neris, in divise zale e blù, a mostrin di jessi in stât di fâi cuintri ai parons di cjase e di jessi ancje avonde insidiôs in atac cun Lasagna, che al impegne Audero su cross di Zeegelaar, e cun De Paul che al fâs di sugjeridôr par Pereyra e par KL15.

Dopo de partence viamente dal Udin, la Sampdoria e cîr di fâ valê la sô supremazie teritoriâl. Verre i da il so bon ce fâ a Musso che al è pront a parâ un so tîr dal limit de aree, e Quagliarella al lasse partî un diagonâl che nol ingjane il puartîr argjentin, che al interven, zovantsi ancje de colaborazion di Walace. Inte ultime part dal prin timp l’Udin al torne a jessi pericolôs cun Lasagna, che al cjate la rispueste pronte di Audero, cun Mandragora, che il so tap in al è masse debil, e cun De Paul che al cjape la travierse. Il belanç parziâl pe scuadre di Gotti al è avonde bon: vivarose e che al covente in atac, cun verticalizazions in velocitât, sierade avonde ben indaûr, ancje se in cualchi ocasion Quagliarella al à masse libertât di moviment.

Dopo de polse la musiche no cambie alc e ce. La Sampdoria e cîr di tignî di plui la bale, intant che l’Udin al siere i spazis e al ripuint cun verticalizazions su lis corsiis esternis e ancje dilunc di chê centrâl. Il gol dal vantaç furlan al rive juste di une azion di cheste fate: De Paul si fâs spazi tal mieç e prime al tire intor di un difensôr, po al impegne Audero, che le pare fûr, e ae fin al torne a recuperâle e le bute dentri.
L’un a zero al è meretât. La Sampdoria e prove a sburtâ cun chê di jonzi la pate, ma l’Udin no si scompon, si ten ben sierade indaûr cun chê di rispuindi in cuintripît.

Il zûc dal Udin al somee che al funzioni. Pecjât che vincj minûts dopo de polse Mandragora impen di liberâ la aree di rigôr al tire cence volê un rip a Candreva e Sacchi al sivile il penalty. Al va sul discut il stes Candreva e al segne cuntune pinelade che e ingjane Musso. La pate e somee dâi sodisfazion ai parons di cjase, che no son masse agressîfs e De Paul al firme une altre conclusion insidiose che no finìs masse lontan de travierse.
Tal ultin cuart di ore la Sampdoria e frache il pedâl de acelerazion e al cîr la strade dal gol de vitorie cun Colley, blocât di Musso cence problemis, e cun Keita, che al cjate su la sô strade Srtyger Larsen. Il ribalton al rive plui tart, cun Torregrossa che suntun cross di çampe al salte plui indalt di ducj e le bute dentri cul cjâf.

L’Udin nol mole e al prove ancjemò a rivâ a cjapâ un pontut, ma nol è nuie ce fâ, stant che Nestorowski, jentrât tal ultin tal puest di Walace, par pôc al piert l’apontament cul gol de pate suntun biel cross di Lasagna, intant che Musso al à ancjemò alc ce fâ intai minûts di recupar par neutralizâ un atac di Keita.

Pordenone – Venezia 2-0

bandieris-friuul

Il Pordenon al vinç ancjemò. Dopo une setemane di polse, i Sborfs a continuin la rie di risultâts plens. A Lignan la scuadre dal Friûl Ocidentâl e bat il Vignesie cun chel stes risultât che e veve fat a Salerno cuintri di chê che e jere la prime in classifiche. I neris e verts a fasin valê la lôr buine organizazion di zûc e un ciert utilitarisim, profitant ancje de zornade no dal puartîr aversari Lezzerini, e fasin un salt indenant in classifiche rivant inte otave posizion in classifiche.

La partide e scomence ben. E je ecuilibrade e gjolidibile. Lis dôs scuadris a fasin zirâ la bale e tal prin cuart di ore nissune des dôs formazion e rive a tirâ in puarte. Cul passâ dai minûts il Vignesie al incrès il so possès de bale e al alce la linie dal sô zûc, intan che il Pordenon al siere ducj i spazis cun chê di rispuindi in cuintripît. Dopo di un scuintri zenoli cuintri zenoli tra Vacca e Ciurria il zuiadôr dal Vignesie al reste par tiere e al scuen lassâ il cjamp in barele, cussì tal so puest al jentre Taugourdeau. Propit il marsiliês al è un dai protagoniscj de prive vere bale gol de partide cul so cross par Ceccaroni che le passe a Forte, che la sô conclusion e ven parade vie di Perisan.

Nol mostre chel stes snait dal puartîr furlan Lezzerini, che al pastrocje zuiant la bale cui pîts, Diaw je puarte vie e lui lu bute jù: Meraviglia al sivile il penalty, il stes Diaw al tire e al segne. Sot di un gol, il Vignesie al prove a dreçâ la partide prime de polse, cun Forte e cun Taugoudreau, ma nol rive a jonzi l’obietîf. Inte seconde frazion i opsits a tornin al atac, cul Pordenon che al ten bot, si difint ben e al pues contâ sui riflès di Perisan, che al tire jù la sierande suntun tîr cul cjâf di Johnsen. Ancje Chrzanowski al fâs un intervent di salvament suntun corner di Taugourdeau, il Vignesie al va dilunc a insisti indenant, ma nol rive pardabon a jessi pericolôs. Tal ultin cuart di ore al rive il secont gol dal Pordenon, cun Ciurra che al siere la cuistion. Al è ancjemò timp par une conclusion di Di Mariano che e ven parade vie parsore de travierse di Perisan e par un tîr di Butic che al ven fermât ben di Lezzerini.

Udinese – Napoli 1-2

This image has an empty alt attribute; its file name is udin_neri.png

Une buine partence dal Napoli, une discrete tignude dal Udin, bielis paradis di Musso e di Meret e il gol dai ospits che tal ultin minût ur regale il sucès e i trê ponts. La partide di vuê tal Stadi Friûl si siere inte maniere piês pai blancs e neris di mister Gotti, che cussì a fasin un pas indaûr in graduatorie svicinantsi ae zone pericolose de code.

Dopo de pate di Bologne. Gotti al mude formazion e fisionomie de sô scuadre, stant che al puest dal 3-5-2 al presente 3-5-1-1 cun Musso tra i pâi, Becao, Bonifazi e Samir in difese, Molina, De Paul, Arslan, Mandragora, Stryger Larsen, Pereyra mieze ponte e Lasagna unic atacant. Gattuso al rispuint cuntune scuadre ben metude indenant, cun Insigne pont di riferiment pe manovre, e tornade a inventâ indaûr, là che dongje di Manolas si viôt Rrahmani, prime di vuê impleât dome par trê minûts cul Cagliari, e a çampe al è Hysaj.

I ospits si confermin chei che a partissin cul pît just e a àn un prin cuart di ore che al è micidiâl. Il prin tîr di Insigne, fûr di pôc, al rive dopo doi minûts e i partenopeus a cirin di tignî la bale e di zuiâle in maniere insidiose. L’Udin al ten bot e al cîr di rispuindi cun Stryger Larsen e Molina che a sburtin dilunc des corsiis laterâls, cul dinamisim di De Paul e di Pereyra e cun Lasagna che al è pront a ricevi e a scatâ. Lis iniziativis dai blancs e neris a produsin daurman un tîr debil di Molina che al ven parât cun facilitât di Meret e plui indenant une conclusion di De Paul che e va fûr parsore de travierese de puarte napolitane e un tentatîf di Mandragora che al à il stes destin.

Il Napoli al passe in vantaç dopo che Pasqua al sivile il rigôr par un fal di Bonifazi su Lozano: Insigne al tire dal discut e al impire Musso. La reazion de scuadre furlane e ven puartade indenant di De Paul e Pereyra, intant che Musso al fâs doi biei intervents sui tîrs di Di Lorenzo e Petagna. Dongje de prime mieze ore di zûc e cres la pression dal Udin, prime cuntune conclusion di Mandragora che Meret al ferme cence fastidis e po cun Lasagna che al profite di un balon zuiât malon di Rahmani indaûr, lu gafe, al salte Meret e al segne.

Cualchi minût plui tart De Paul i da une biele bale a Lasagna che al jentre in aree de bande diestre e al tire cjatant la rispueste di pît di Meret in jessude. Tal ultin cuart di ore la partide e je ecuilibrade e vivaorse e l’Udin al imbastìs un pâr di conclusions cun Bonifazi, che nol cjate la puarte, e cun Stryger Larsen, che al ven fermât dal puartîf furlan dal Napoli.

Dopo de polse i ospits a tornin a fâ zirâ la bale cun chê di vierzi cualchi spazi e a rivin a jessi pericolôs daurman cuntun tîr di Zielinski che al ven mandât indaûr di Musso e cun Insigne che al recupare la bale ma al tire di pôc fûr e po cun Maksimovic che al tocje une punizion di Insigne e al mande la bale sul esterni de rêt.

L’Udin si libere de pression dai aversaris e al impegne Meret cun Stryger Larsen, cun Lasagna e cun De Paul. Il Napoli al va al mancul cul ossigjen, cu lis gjambis e cul cjâf e i blancs e neris a provin a fâ valê la lô supremazie teritoriâl e a profitâ des busis e dai spazis che si crein tra la seconde e la tierce linie dai aversaris.

Tai ultins vincj minûts Gotti al clame fûr Stryger Larsen e Arslan e al mande dentri Walace e Zeegelaar e plui indennat al met Nestovski tal puest di Lasagna. Di une bande Insigne al à dôs ocasions ma cuant che la bale e je tal spieli Musso al pare cun sigurece, di chê altre a provin la conclusion Mandragora e Zeeglaar cence sucès e la partide e somee indreçade viers di une pate avonde buine e juste par dutis dôs is scuadris. Magari cussì no, juste tal nonantesin minût al rive il gol di Bakayoko che cul cjâf al impire Musso e al regale la vitorie ae sô scuadre. Un risultât che al fâs paiâ al Udin i siei erôrs in difese e in atac.

Bologna – Udinese 2-2

This image has an empty alt attribute; its file name is udin_neri.png

L’Udin al romp la rie des dôs sconfitis une daûr di chê altre cul Benevento e cu la Juve, vuadagnant un pont a Bologne. La scuadre di balon furlane e rive a gafâ la pate juste ae fin de partide, dopo vê patît la supremazie teritoriâl dai parons di cjase vie pal prin timp e in conclusion di une seconde frazion zuiade dute al atac, zovantsi ancje dal fat di cjatâsi in superioritât numeriche par vie de espulsion di Svanberg pôcs minûts dopo de polse.

Cul intindiment di dreçâ la situazion dopo de disfate patide a Turin domenie stade, i blancs e neris in divise zale e blu si presentin tal cjamp dal Dall’Ara cun Musso tra i pâi, Becao, Bonifazi e Samir in difese, Stryger Larsen, De Paul, Walace, Pereyra e Zeegelaar in mediane e Lasagna e Forestieri in atac. Cemût che si viôt, Gotti, che al è cence Pussetto, Okaka e Deulofeu, al prove une gnove cubie ofensive, plaçant Forestieri dongje di KL15.

L’inviament de partide al è segnât de iniziative dal Bologne. Cundut achel lis primis ocasions a son dal Udin, cuntun tîr di Pereyra che al va fûr di pôc e cuntun diagonâl di De Paul che al ven parât vie in corner di Da Costa. I parons di cjase cul passâ dai minûts a imponin il lôr zûc cul efiet di dâi cun Svanberg une bale di aur a Orsolini, che però nol rive a zirâle ben in puarte. Il zuiadôr si fâs perdonâ dal erôr cualchi minût plui tart cuntune biele punizion pinelade pal cjâf di Tomyatsu, che al segne il gol dal vantaç.

L’Udin nol rive a reagjî daurman e par dâi une sveade ae sô scuadre Gotti al clame fûr Forestieri, che inte prime mieze ore di zûc nol da segnâi di vite particolârs, e al met Nestorovski tal so puest. Un minût plui tart al rive il gol dal un a un, cun Pereyra che al è il plui svelt a tocjâ cul cjâf il balon, parât fûr di Da Costa in rispueste a une conclusion di De Paul, e cussì lu bute dentri.
Il Bologne al torne al atac, Musso si met in mostre cuntun bon intervent suntun tîrt di Svanber, ma po al ven impirât propit dal svedês che al tire a colp sigûr su assist di Barrow, sierant inte maniere miôr une azion inviade su la corsie di diestre di Palacio.

Finût il prin timp in vantaç, il Bologne al scomence la seconde frazion in difese. L’Udin al mostre daurman che nol à nissune voie. Un scat di Nestorovski al ven fermât in maniere iregolâr di Svanberg, che al cjape la seconde amonizion e al ven butât fûr cul cartelin ros di Ayroldi.
Mihajlovic pal moment nol fâs sostituzions e al domande ai siei atacants di dâ une man indaûr. L’Udin al invie chel che si pues clamâlu un assedi. Surian, Barrow e Orsolini a fasin i difensôrs e i parons di cjase a tirin sùù murais e bariduris.

Da Costa al à il so bon ce fâ, tra un tîr di De Paul, un scjuc sui pîts di Lasagna e altris tentatîfs dal Udin. Là che nol rive il so puartîr, il Bologne si salve cuntun tic di fortune: al è ce che al sucêt in particolâr in ocasion di un biel tîr di Mandragora, jentrât tal puest di Walace in cubie cun Arslan in sostituzion di Zeegelaar, che al passe Da Costa ma al sbat sul secont pâl.

Intal ultin cuart di ore Gotti al bute dentri ancje Molina e Ouwejan, tal puest di Stryger Larsen e Samir, cun chê di cirî di fâ rindi il plui pussibil inte fase ofensive la superioritât numeriche. A fuarce di dâi, ancjemò cun De Paul in evidence, l’Udin al rive a cjatâ il gol dal doi a doi, tal secont minût di recupar, cun Arslan che al jentre inte aree di rigôr e al tire cun decision une bale che forsit e ven ancje tocjade di Hickey e in cualsisedi maniere e va a finîle tal sac daûr di Da Costa. Un risultât just che al rilance almancul in part la scuadre furlane, che si pues dî che fintremai e vinç, almancul se si calcole il possès de bale e il numar di tîrs in puarte.