Ai 27 di Fevrâr su Onde Furlane si ricuarde la Joibe Grasse dal 1511 e si fâs fieste pe Zornade Furlane dai Dirits

lengate12

Chê dai 27 di Fevrâr par Radio Onde Furlane e je une zornade speciâl, intal stes timp di fieste e di riflession. Al è l’inovâl de innomenande celebre Joibe Grasse dal 1511, cuant che al vignive inviât il riviel popolâr furlan plui impuartant che, massime intes campagnis, al veve à cjapât sù un caratar di rivendicazion dai “dirits antîcs” des comunitâts rurâls.
Par cheste reson, sui 90 Mhz inte plui part dal Friûl e sui 90.200 e sui 106.500 Mhz in Cjargne e ancje in streaming sul sît web www.ondefurlane.eu, chê date e ven memoreade tant che Zornade furlane dai dirits.

A son za tancj agns aromai che la radio libare dai furlans e presente pe ocasion une programazion specifiche che, tra selezions musicâls a teme e trasmissions di aprofondiment, e à chê di stiçâ la riflession in cont dai dirits dai furlans e des bataiis in at par difindiju e garantîju. Dut chest al sucedarà ancje chest an, in particolâr des 9 a buinore a 7 sot sere.

1511

La Zornade e vignarà introdusude de bande dal diretôr responsabil dal emitent, Mauro Missana, e dal responsabil di redazion Carli Pup, che aes 9 e mieze a lassaran spazi ae prime rubriche musicâl ‘a teme’, une edizion speciâl di Babêl Europe, trasmission dedicade ae produzion musicâl intes lenghis minorizadis di Europe par cure di Marco Stolfo, pe ocasion caraterizade di une scjalute di cjançons dutis pontadis su lotis e dirits.

Des 10 aes 11 e mieze il teme dai dirits al vigfnararà declinât cun riferiment specific al autoguvier teritoriâl. Inte suaze de rubriche di aprofondiment gjornalistic Dret & Ledrôs la cuistion e sarà frontade cun riferiment particolâr al dibatiment in cont des riformis istituzionâls a nivel regjonâl: cun Mauro Missana a discutaran de cuistion Giorgio Cavallo, Pier Mario Zanin, Rodolfo Ziberna, Massimo Moretuzzo e Cristiano Shaurli.

microfon_ROF

Une des cuistions clâf che e ven frontade dilunc de celebrazion de Zornade e je chê dai dirits des minorancis linguistichis storichis furlane, slovene e todescje. In particolâr, des 11 e mieze fint a misdì, Carli Pup al dialogarà cun redatôr dal setemanâl Novi Matajur, Antonio Banchig, su la situazion de comunitât slovene. Cun misdì a saran difondudis lis intervistis racuetis di Enrico Turloni in cont dal ûs public de lenghe furlane e dal gnûf progjet ARLeF dai sportei linguistics regjonâi decentrâts.

A misdì e mieze al sarà spazi pe rievocazion storiche de Joibe Grasse, cu la leture par cure di Barbara Minen, che e lassarà spazi ae musiche fint aes 3 e mieze dopo di misdì, cuant che Mauro Missana e Carli Pup a vierzaran la programazion pomeridiane.

aradio

A 5 sot sere, dopo des replichis des pontadis speciâls di Babêl Europe e Dret & Ledrôs za proponudis vie pe buinore, si fasarà il pont de situazion des politichis che a rivuardin la lenghe furlane, tornant a cjapâ sùù lis relazions presentadis a Udin intal ambit de seconde Conference Regjonâl de bande di Patrizia Pavatti, Marco Stolfo, Erika Adami e Donato Toffoli, dedicadis in maniere rispetive a scuele, aministrazion publiche, medie e planificazion linguistiche.

«Al è passât plui di un an de Conference Regjonâl – al sotlinee al rivuart il diretôr di Onde Furlane, Mauro Missana – ma chês relazions a son ancjemò di grande atualitât e si che duncje o vin decidût di tornâi a trasmeti in ocasion de Zornade furlane dai dirits».

Des 7 sot sere al sarà dât di gnûf spazi ae musiche «cence confins».

Il segnâl de ‘radio libare dai furlans‘ si pues cjapâlu dapardut ancje su smartphone, tablet, iPhone e iPad cu la aplicazion di pueste di discjamâ de rêt.

logo_web

Advertisements

Zornade internazionâl de lenghe mari + Músicos pola Oficialidá + Gruff Rhys + Elena Ledda + Gorky’s Zygotic Mynci + Franco Giordani = Babêl Europe 4/2019

Zornadis impuartantis di memoreâ, tra storie e atualitât. La pontade numar 4 dal 2019 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane, e rive juste inte setemane dai 21 di Fevrâr, che ae fin dal 1999 e je stade proclamade de bande de Conference Gjenerâl de UNESCO tant che Zornade internazionâl de lenghe mari, cun chê di promovi il valôr de diversitât linguistiche e il dirit di doprâ la lenghe proprie.
La date sielzude de UNESCO, stant che ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl, cun diviers manifestants che a forin copâts de bande des fuarcis di polizie dal Pakistan, e conferme propit la rilevance inte Zornade de dimension dai dirits linguistics.

La Zornade internazionâl de lenghe mari no je la uniche Zornade di interès ‘babelic’ che si cjate tal lunari vie pal mês di Fevrâr. A’nd è almancul altris dôs che a vegnin ricuardadis inte trasmission che e va in onde in direte vuê, martars ai 19 di Fevrâr a 11 a buinore, e po in repliche ancje doman, miercus ai 20 a une dopo di misdì, e sabide ai 23, ancjemò a une e mieze.
Lis datis segnadis tal lunari (cence dismenteâ la Zornade furlane dai dirits che e cole la setemane che e ven, miercus ai 27) a son chês dai 8 di Fevrâr, Zornade de musiche in lenghe galese, e dai 15 di Fevrâr, vinars stât, cuant che a Caerdydd/Cardiff si à davuelt il conciert a pro de indipendence dal Gales Gellir Gwell! / Yes Is More!.

Juste par chel inte scjalute de gnove pontade di Babêl Europe al sarà spazi par une formazion storiche dal rock galês, i Gorky’s Zygotic Mynci, e par Gruff Rhys, altre innomenade personalitât dal panorame de creativitât (te musiche e te produzion audivisive) in Gales e par galês e tra i protagoniscj de manifestazion di vinars stât. Cun di plui si podaran scoltâ lis vôs de cjantante sarde Elena Ledda, che e sarà in conciert a Tresesin ai 26 di Fevrâr e a Turin ai 28, dal cjantautôr furlan Franco Giordani, che di resint al à zontât al so repertori ancje un toc pr sloven, e dal ‘supergrup’ asturian Músicos pola Oficialidá, metût adun cun chê di promovi lis mobilitazions a pro de uficialitât de lenghe asturiane e dal galego-asturian.

Ancje cheste pontade di Babêl Europe si pues scoltâle sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.
Dopo des trê emissions de setemane ancje cheste trasmission si podarà tornâ a scoltâle in podcast cun Spreaker e cun Spotify.

Udinese – Chievo 1-0

L’Udin al vinç, al tire il flât ma nol convinç. Cuintri dal Chievo i blancs e neris a rivin a jonzi l’unic risultât che al coventave par tignîsi un pôc “mancul dongje” de zone retrocession – la vitorie – ma lu fasin plui cul cûl che cul sintiment. La scuadre di Nicola e à pôre di pierdi e ancje di vinci, no rive a produsi masse in atac e in plui di cualchi moment e patìs il dinamisim dai ospits, che salacor a rivin a fâ plui zûc e plui azions ofensivis di lôr, e dome tal ultin a rivin a sbusâ la puarte di Sorrentino.

La scuadre di balon furlane e scomence cuntun 3-5-2 che al somee plui un 3-4-1-2: Musso in puarte, Opoku, Ekong e Nuytinck te tierce linie, Fofana e Mandragora tal mieç e Larsen e D’Alessandro laterâi, De Paul plui indenant daûr des pontis, che a son Okaka e Lasagna. La intenzion e somee buine, ancje la partence juste e je chê dal Chievo, che dopo trê minûts al viôt Depaoli in zone gol che cul cjâf al tire fûr bersai. Sghindât il pericul i blancs e neris a provin a rispuindi cuntune biele conclusion di Nuytinck, ma il so tîr potent al sbat cuintri dal pâl.

La prime frazion e va dilunc intune cundizion di ecuilibri. Lis dôs formazions a scombatin soredut tal mieç dal cjamp e a saltin fûr pôcs tîrs in puarte. Pai ospits i tentatîfs a son chei di Giaccherini, che al prove la azion personâl ma la sô conclusion e vene fermade di Musso cence padins, di Rigoni, che cuntun tîr di fûr al oblee il puartîr dal Udin a parâ in doi timps, e di Leris, che cinc minûts prime de polse al prove il colp a sorprese di lontan ma nol cjate il spieli de puarte. Pai blancs e neris a son une punizion di De Paul che no i met pôre a Sorrentino, un cross di Zeegelaar, che intant al à cjapât il puest di D’Alessandro, e un tîr di Okaka masse centrâl.

Tal secont timp la musiche e je sù par jù compagne. Prime il Chievo al prove cun Djordjevic e po l’Udin al rispuint cun De Paul che al ispire Mandragora, che però il so tîr nol à nissune sperance.
La scuadre blancje e nere e je masse lungje e il so sburt al è masse debil. Cun di plui, in cheste maniere, ur permet ai aversaris di ocupâ chei spazis par meti adun cualchi combinazion cun Skepinski e Leris, che par fortune no crein nissun fastidi par Musso.

Nicola al mande in cjamp Pussetto al puest di Okaka cun chê di dâi plui snait al atac e Fofana si svicine al gol cuntune bombe che e oblee Sorrentino a fâ il miracul. Il svolt al rive sùù par jùù dîs minûts plui indenant: te aree di rigôr Djordjevic al poche Pussetto, Valeri no si inacuarç dautman e dome un moment dopo al decît di consultâ il Var, daûr di chel al decrete il penalty, Teodorczyk al tire dal discut, Sorrentino al rive a parâle fûr ma l’atacant polac al torne a tirâ in puarte e al segne.

Pal udin une bocjade di aiar bon in classifiche e la pussibilitât, ca di cuindis dîs, stant che la partide cu la Lazio e je stade rinviade, di preparâsi par ordin par fâ alc di bon in cjase cuintri dal Bologna.

Torino – Udinese 1-0

Il Toro al vinç e al torne a fâsi viodi in zone Europe, l’Udin al piert e si svicine ancjemò di plui ae zone plui basse e pericolose de classifiche. La partide zuiade vuê tal stadi Grande Torino si siere malamentri pai blancs e neris, che vie pe partide a rivin a tignî bot denant dai aversaris e fintremai ur fasin ancje pôre in cualchi ocasion. Cun di plui, massime tal secont timp, la scuadre furlane e je ancje pôc fortunade, se no piês.

Nicola a Turin al ponte su Musso in puarte, De Maio, Ekong e Nuytinck in difese, Mandragora tal mieç al puest di Berhami, dongje di Fofana e cun D’Alessandro e Stryger Larsen laterâi, e De Paul daûr de cubie di atac Pussetto-Okaka. La scuadre e partìs avonde ben e dopo cinc minûts ur fâs vignî i sgrisui ai granatas cun Pussetto che al profite di un pastroç di Djidji e al tire in puarte a colp sigûr ma al cjate Sirigu che i dîs di no cun snait. I parons di cjase, passât il pericul, par un pôc a stentin e po, planc plancut, a vuadagnin cjamp.

Il prin tentatîf dal Toro al è un tîr fûr bersai di Ansaldi e dopo al è Bellotti che al impegne Musso su corner di Lukic. Il puartîr dal Udin nol rive a fâ co pagn uns dîs minûts plui indenant cuant che Ansaldi al pinele un biel cross par Aina, che al profite de libertât che i lassin Nuytinck ed Ekong e cul cjâf al segne. Il gol al fâs cressi il ritmi e la tension agonistiche di dutis dôs lis bandis dal cjamp cuntune interessante secuence di emozions, de punizion di De Paul neutralizade di Sirigu al tentatîf di Iago Falque, dal tîr di Fofana ae gnove conclusion dal galizian che e sbat intor di Larsen, cul Toro che al domande il rigôr e Guida che nol à dubis in congt de regolaritât dal contat tra la bale e il laterâl blanc e neri.

La seconde frazion si vierç cul Toro che si svicine al secont gol prime cun Berenguer e po ancjemò cun Iago Falque su assist dal basc, intant che Mazzarri che si fâs butâ fûr di Guida. A passin i minûts e dopo des primis flamadis il ritmi si manten avonde bassut. Il Toro al cambie Lukic cun Baselli, Nicola al clame fûr Fofana e Pussetto par Ingleson e Lasagna.

L’Udin al incrès la so pression ofensive cun Okaka, che al ven tocjât in maniere iregolâr di Djidji, Guida al consulte il Var e al sivile il penalty: al tire De Paul e Sirigu al pare. La ultime part de gare, che si siere cun siet minûts di recupar, e je un crescendo blanc e neri. La scuadre di balon furlane e met dongje azions e ocasions ma no rive a butâle drenti e ancje cuant che al rive al è alc che nol va.
Tal cuader dal cronist a cjatin spazi une biele zirade di Lasagna, ancje se fûr bersai, su cross di D’Alessandro, doi goi anulâts – un di Lasagna in fûr zûc e un di Okaka, che dopo verifichis cul Var Guida al considere condizionât indiretamentri di un altri offside di Lasagna – e la travierse di Ingelson, cence dismenteâ la espulsion di De Maio.

Te prossime partide cul Chievo l’Udin nol pues permetisi altris erôrs.

Lou Seriol + Oi Polloi + Les Ramoneurs de Menhirs + Dissociative + La Banda Trapera del Rio + Coffeeshock + François Fontan = Babêl Europe 3/2019

Punk, vinîl, libris, storie e atualitât. A son lis cinc peraulis clâf che a permetin di definî in struc i contignûts de tierce pontade dal 2019 di Babêl Europe, il program cuindisinâl dedicât a lenghis, musichis, minorancis e nazions cence stât, che al cjate spazi intal palinsest di Radio Onde Furlane il martars in direte a 11 a buinore e po in repliche il miercus a une dopo di misdì e la sabide a une e mieze.

Inte trasmission che e va in onde vuê ai 5 di Fevrâr e po ancje doman, miercus ai 6, e sabide ai 9 al sarà spazi par musiche ruspiose e plene di snait che e rive de Scozie, de Bretagne, de Ocitanie, de Catalogne, dal Friûl e dal Burgenland.

Si scoltarà un altri toc gjavât fûr di Occitan, il disc plui resint dai Lou Seriol, che di cualchi dì al è disponibil ancje in vinîl. Cun di plui al sarà spazi par dôs formazion “storichis” tant che i scozês Oi Polloi e i bretons Les Ramoneurs de Menhirs, pai furlans di esportazion Dissociative, pe prime cjançon punk rock par catalan che si cjate tal album di esordi de La Banda Trapera del Rio jessût cuarante agns indaûr e pai Coffeshock Company, grup crossover espression de minorance cravuate de Austrie orientâl.

Si fevelarà ancje di un libri, Etnismo. Verso un nazionalismo umanista, la gnove edizion par talian di chel scrit di François Fontan, jessût te sô version definitive tal 1975, che al ven calcolât tant che une sorte di manifest dal ocitanisim politic moderni. La publicazion e je stade prontade di Diegu Corraine e Fredo Valla e e ten dongje ancje il dvd di E i à lo solelh, il videodocumentari dedicât a Fontan, fat juste vincj agns indaûr di Fredo Valla e Diego Anghilante. Jenfri vinars e domenie chê iniziative editoriâl e vignarà presentade tes valadis ocitanis dal Piemont.

Si pues scoltâ Babêl Europe  sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.

 

Udinese – Fiorentina 1-1

Une partide flape, massime vie pal prin timp, che si siere in paritât: un gol par om e un pont par om. Dopo i cuatri patafons cjapâts a Gjenue cu la Sampdoria la setemane stade, l’Udin in cjase si preocupe soredut di no pierdi une altre volte, stant che la Fiorentina e rive ai Riçs cui siet goi fats in Cope Italie cuintri de Rome, e par chel Nicola al sielç une scuadre che e sedi in stât di no colâ intune altre vuate. Ancje i ospits no mostrin grande iniziative, forsit par no riscjâ masse cuintri di une scuadre che par sigûr i covente fâ ponts e fâ biele figure denant de sô int o ben cu la cussience che la maniere miôr par segnâ e fâ risultât e je chê di lassâ la iniziative ai aversaris e po di colpîju in cuintripît.

L’Udin al vierç la partide cun Musso in puarte, cu la difese a trê cu la gnove di De Maio dongje di Ekong e Nuytinck, cun Behrami, Mandragora e Fofana tal mieç, cu la poie su lis fassis laterâls di D’Alessandro e Stryger Larsen e cun De Paul e Pussetto in atac. La Fiorentina e rispuint cuntun 4-3-3 là che Muriel e Chiesa a àn il compit di sburtâ indenant dut il coletîf.

I ospits a mostrin daurman di vê alc di plui tes gjambis, tai pîts e tal cerviel e a vuadagnin il pri corner dopo cinc minûts. L’Udin al cîr di tignî bot e al prove a rispuindi cun De Paul, che al zuie ben une bale golose prontade di Mandragora, al salte Milenkovic ma al tire malamentri. L’argjentin al è protagonist ancje plui indenant, vie pe prime frazion, di un pâr di iniziativis in cubie cun Pussetto, che par so cont si svicine al gol ancje cuntun tîr cul cjâf suntun cross di Mandragora, intan che intune ocasion si fâs viodi indenant ancje Ekong ma il so tîr al debul. La Fiorentina cul passâ dai minûts e alce la linie dal so zûc ancje se no rive a cumbinâ alc e ce, stant che D’Alessandro e Mandragora a dan une man indaûr cun chê di scjafoiâ i scats di Chiesa. Cussì lis unichis ocasions dai ospits prime de polse a son doi tîrs cul cjâf: un di Muriel fûr bersai e un di Pezzella che al oblee Musso a rispuindi a colp.

Vie pal secont timp il ritmi al cres. La Fiorentina si manten plui alte, ma no rive a imbastî azions ciun costance, e l’Udin si difint cun atenzion, ancje se vêrs pericui no’nd è, e al rispuint in cuintripît.
Al rive cussì dopo undis minûts il gol de scuadre blancje e nere: iniziative di Pussetto che al jentre te aree aversarie e al imbastìs un tîr-cross che Stryger Larsen al tocje inte maniere juste par bati Lafont.

Cu la sô scuadre sot di un gol, Pioli al decît che si à di scombati par tornâ a pâr e magari ancje par vinci e il 4-3-3 al devente un 4-2-4 cu la jentrade di Pjaca al puest di Gerson, che e rive dopo dal cambi Simeone-Mirallas dai prins minûts dopo de polse. Cussì si crein lis cundizions par chel che al sarà il risultât finâl: il gol dal un a un lu segne Edimilson, cuntun diagonâl potent a fîl di tiere che al jentre dal unic spazi de puarte là che Musso nol pues rivâ. Però il vantaò no lu gafe nissun, ni i ospits, che a provin cun Muriel e cun Chiesa, ni l’Udin, che al torne a vê une pôre mostre di pierdi e si contente di difindi chel pontut che i permet di no sbrissâ ancjemò plui in bas inte classifiche.