Babêl Europe 04/2018 al memoree la Zornade Internazionâl de Lenghe Mari

imld17

Vuê al è martars e o sin ai 2o di Fevrâr e tal palinsest di Radio Onde Furlane a 11 a buinore in direte, al torne in direte Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât.
La trasmission e sarà dedicade pe plui part ae Zornade Internazionâl de Lenghe Mari, che e cole doman ai 21. Al è l’inovâl de coparie de bande fuarcis di polizie dal Pakistan di diviers students de Universitât di Dhaka che in chê dì dal 1952 a manifestavin a pro dal ricognossiment de lenghe bengalese (‘bangla’) tant che lenghe uficiâl, e par chel al è stât sielzût de UNESCO cun chê di promovi la diversitât linguistiche tant che patrimoni, dirit e risorse par ducj.

Lant daûr des sugjestions dal lunari e cuntune cierte atenzion ancje pes novitâts discografichis e pe cronache, il viaç babelic di Onde Furlane al tocjarà la Ocitanie, lis Asturiis, i Paîs Catalans, la Bretagne e il Friûl furlan e sloven.
E sarà la ocasion par fâ une altre cerce di Eyjafjalljökull, il disc gnûf dal rocker breton  Gweltaz Adeux, e di Amb l’esperança entre les dents, il prin album solist di Xavi Sarrià, e par scoltâ i asturians Soncai System, i slovens Sons of a Gun, i ocitans Aire de Prima e il furlan Franco Giordani.

Dopo de direte di vuê, cheste pontade di Babêl Europe e torne ‘in Onde’, in repliche, ancje doman a une dopo di misdì e po sabide a une e mieze su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di vuê e vignarà archiviade su internet.

Advertisements

Il disc gnûf di Gwenno + novitâts di Paîs Basc e Catalogne + classics di Ocitanie, Scozie e Arberie = Babêl Europe 3/2018

Atualitât, storie, novitâts discografichis e fintremai une anteprime. Al è ce che e promet la tierce pontade dal 2018 di Babêl Europe, il program dedicât a lenghis, musichis, minorancis e nazions cence stât che si pues scoltâlu ogni cuindis dîs su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

In particolâr e sarà la ocasion par scoltâ une anticipazion di Le Kov, il disc gnûf de musiciste galese di divignince corniche Gwenno, che al saltarà fûr in maniere uficiâl e complete ai 2 di Març. Al larà dilunc ancje il viaç ator pes dîs citâts che il lôr non al tache cu la letare B, protagonistis dal album  B-Map 1917 + 100, dât fûr di Fermin Muguruza eta the Suicide of Western Culture ae fin di Novembar stât.

Cun di plui al sarà spazi ancje par un pâr di classics plui o mancul cognossûts e ricognossûts: une cjançon dal repertori di Claudi Martì, non di ponte de cussì clamade nova cançon occitana dai agns Sessante e Setante dal secul stât e un toc de punk band scozese Oi Polloi. Il percors babelic al tocjarà ancje la Arberie cuntune selezion de produzion musicâl de Spasulati Band, formazion che di passe cuindis agns e met dongje la lenghe de minorance albanese de Calabrie cui ritmis e cu lis vibrazions che a rivin de Gjamaiche.

oi polloi

L’apontament cun Babêl Europe al è par vuê, in direte, a 11 a buinore e po, in repliche, par doman, miercus ai 7, a une e par sabide ai 10, a une e mieze dopo di misdì.

Dopo des emissions in direte e in repliche, ancje cheste pontade di Babêl Europe e sarà disponibile in podcast.

logo_web

Vôs de Basse, buinis gnovis in cont de produzion leterarie par furlan

Une conferme dal fat che i concors leteraris a puedin jessi une ocasion par valorizâ il lavôr creatîf di tancj di lôr e rive de Basse Furlane, là che te ultime part dal an passât i Comuns di Cjarlins, Gonârs, Muçane, Porpêt, Prissinins e Sant Zorç di Noiâr, cu la poie de sezion locâl de Universitât de Tierce Etât, de Filologjiche e di Radio Onde Furlane, a àn inmaneât la prime edizion dal Concors Vôs de Basse.

La iniziative, coordenade de bande dal Sportel associât de lenghe furlane dai sîs Comuns, si à sierade chê altre sere – ai 31 di Zenâr – cu la cerimonie di premiazion des trê sezions dal concors.

Ta chê specifiche pai students des scuelis, il prin premi al è lât a Rossella Dosso de VB dal liceu classic Dante Alighieri di Gurize, intant che il secont e il tierç a son stâts assegnâts a doi grups di students de IIA de scuele secondarie di prin grât Italo Svevo di Vildivar.
Inte sezion dedicade ae poesie il prin premi al è lât a Giacomina De Michieli, il secont a Egle Taverna e il tierç a Checo Tam.
Inte sezion pe narative il prin premi al è stât assegnât a Gianluca Franco, il secont a Raffaele Serafini e il tierç a Alessandro Di Pauli.

I organizadôrs si son mostrâts contents sei pal numar di partecipants, sei pe varietât e pe cualitât dai lavôrs rivâts. L’interès pal progjet si à palesât ancje cu la partecipazion de int ae serade finâl che si à tignude li de Biblioteche civiche di Sant Zorç.

Al rive WordPress par Furlan. Doprâ la lenghe in rêt al sarà plui facil par ducj

Une biele gnove pe lenghe furlane, pe sô difusion, pe sô promozion e soredut pal so ûs inte rêt. In graciis de iniziative de ARLeF (Agjenzie Regjonâl pe Lenghe Furlane) e dal lavôr di Ensoul, societât di disvilup di software e di comunicazion logade a Udin, cumò al esist ancje la version par furlan di WordPress, un dai gjestionâi plui doprâts pal mont par meti adun sîts internet e blogs.

In particolâr a son disponibii ancje par furlan il backend dal program, i temis TwentySixteen, TwentySeventeen e Rosetta e il plugin Qtranslate X. Di une bande al devente plui facil doprâ chel program gratuit di progjetazion e di costruzion di sîts web propit par jessi presints in rêt cun pagjinis e blogs par furlan e di chê altre al cres il status del lenghe, che cussì al jentre te liste di chês che a vegnin dopradis par gjeolocalizâ WordPress. In chest sens il furlan si cjate in compagnie cu lis lenghis plui dopradis pal mont e cuntune schirie di altris idiomis in cundizion di minorance, che a àn za fat chel passaç, tant che il basc, il galês, il frison, il catalan, il galizian e il breton.

La iniziative e je stade presentade îr in Regjon a Udin e si insuaze intune azion di politiche linguistiche a pro dal furlan e dal dirit di cognossi e doprâ la lenghe, che al è di dutis lis personis che a vivin in Friûl e plui di di ducj I furlans, che vie par chescj agns e à indotât il furlan di struments une vore impuartants, tant che il Grant Dizionari Bilengâl Talian-Furlan (GDBTF) , la aplicazion che e permet di doprâ il stes GDBTF cui dispositîfs mobii, la Tastiere Furlane (TF), il Coretôr Ortografic (COF) e il tradutôr Jude.

WordPress par Furlan al è il risultât di un lavoron, cemût che al à contât Fulvio Romanin, aministradôr delegât di Ensoul cuntune esperience impuartante di creativitât par furlan tai cjamps de musiche e de leterature: «O vin vût il nestri bon ce fâ, stant che i sin stâts daûr ae traduzion par passe un an. Al è stât un lavôr sù par jù compagn che fâ la traduzion di un dai romançs di Harry Potter. A àn coventât competencis tecnichis e linguistichis e un confront cu la comunitât di WordPress, che e à palesât atenzion e interès par cheste iniziative, e une comparazion cu lis traduzions fatis in altris lenghis di minorance tant che il basc, il frison, il galizian, par viodi in ce maniere che a jerin stadis frontadis ciertis peraulis clâf tant che post o widget e par sielzi chê che e jere la soluzion lessicâl miôr, tra la adozion di une peraule furlane patrimoniâl, la creazion di un neologjisim o il mantigniment de peraule origjinâl par inglês, cemût che o vin fat in chescj câs».

Vie pal incuintri di îr a son stâts presentâts ancje i trê videotutorials che si cjatin sul sît de ARLeF e che a judin a doprâ miôr il GDBTF, la Tastiere Furlane (TF) e il Coretôr Ortografic (COF) .

WordPress par Furlan si cjate diretamentri sul sît di WordPress o ben si pues discjamâlu di chel dal organisim regjonâl pe politiche linguistiche pal furlan.

Ve chi la interviste cun Fulvio Romanin e Ferdinando Passone fate îr tai studis di Radio Onde Furlane.

Guillem D’Efak + Zebda + Gweltaz Adeux + Blu l’Azard + Tartaruga + Zornade de Memorie = Babêl Europe 2/2018

Vuê al è martars e a 11 a buinore su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne in direte Babêl Europe, il program dedicât a lenghis, musichis, minorancis e nazions cence stât. La seconde pontade dal 2018 de trasmission che ogni cuindis dîs e à chê di puartâ lis scoltadoris e i scoltadôrs de ‘radio libare dai furlans’ a torzeon, tal spazi e tal timp, pe Europe de diversitât linguistiche e de creativitât musicâl.

Il percors sielzût par chest apontament al cjape dentri storie e atualitât, tra gnovis produzions discografichis e ‘classics’ plui o mancul cognossûts e ricognossûts, lant daûr ancje dai trois batûts cuindis dîs indaûr, e cence dismenteâ che si svicine la Zornade de Memorie.

L’itinerari di musichis, peraulis, storiis e gnovis si disviluparà tra il Cjanton dai Grisons, la Bretagne, i Paîs Catalans, il Friûl, la Ocitanie e la Arpitanie, cun cjançons par rumanç, par breton, par yiddish, par ocitan e par francoprovençâl. E sarà la ocasion par fâ une altre cerce di Eyjafjalljökull, il disc gnûf dal rocker breton  Gweltaz Adeux, e par lâ indaûr tal timp fintremai tal 1965 cuant che al saltave fûr il disc Blues di Guillem D’Efak, un dai protagoniscj de Nova Cançó Catalana, che la sô figure e ven memoreade intun documentari che al è stât presentât la setemane passade tes televisions publichis de Catalogne e des Isulis Baleârs.

Simpri in argoment di Nova Cançó Catalana e cui voi pontâts in direzion de Catalaogne, si scoltarà ancje la version de L’Estaca fate dai tolosans Zebda e par memoreâ la Zornade dai 27 di Zenâr (cuant che Babêl Europe al tornarà tal palinsest di Radio Onde Furlane pe seconde repliche a une e mieze dopo di misdì, intant che la prime e sarà doman, miercus ai 24, a une dopo di misdì) al sarà spazi ancje pai Zuf de Žur in cubie cun Moni Ovadia.

Altris protagoniscj de trasmission a saran i Blu l’Azard, espression de tradizion e de reinvenzion musicâl des ‘tieris altis’ dal Piemont di lenghe e culture francoprovençâl, ocitane e francese, e i Tartaruga, band rumance une vore ative cualchi an indaûr.

Dopo de prime emission in direte e des replichis, ancje cheste pontade di Babêl Europe si podarà cjatâle archiviade in rêt.

Discs gnûfs + personaçs storics + ‘classics’ plui o mancul antîcs = Babêl Europe 1/2018

Al è tacât il 2018 e su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe, il program dedicât a lenghis, musichis, minorancis e nazions cence stât. Vuê al è martars e l’apontament in direte cu la trasmission cuindisinâl che e fevele di diversitât linguistiche e creativitât musicâl al è, come par solit, a 11 a buinore.

In continuitât cu la ultime pontade dal 2017 si larà ancjemò dilunc a cerçâ alc di cualchi disc saltât fûr vie pai ultins mês, pes ultimis setemeanis e pai ultins dîs. La atenzion e sarà pontade, in particolâr, su la produzion plui resinte di trê personaçs storics che di tancj agns a pensin, a scrivin, a sunin e a cjantin te lôr lenghe proprie, ven a dî Fermin MuguruzaXavi Sarrià e Gweltaz Adeux.

A saran selezions dai discs B-Map 1917 + 100, dât fûr di Fermin Muguruza eta the Suicide of Western Culture ae fin di Novembar stât, Amb l’esperança entre les dents, album solist, jessût ae fin dal mês di Setembar dal 2017, dal cjantant, musicist e scritôr dai Paîs Catalans, che par tant timp al è stât la vôs e la ghitare dai Obrint Pas, e Eyjafjallajökull, la gnove produzion di un dai protagoniscj de produzion musicâl par breton di passe trentecinc agns incà, prime cu la storiche band dai EV e po di bessôl.

Si scoltarà ancjemò alc altri, indaûr tal timp e a torzeon tal spazi, dal Gales ae Sardegne.

Dopo de prime emission in direte, si podarà tornâ a scoltâ Babêl Europe tal dopodimisdì di doman ai 10 di Zenâr, a une, e di sabide ai 13 di Zenâr, a une e mieze.

 

 

La ultime pontade dal an di Babêl Europe. Novitâts discografichis di vuê e di doman

Al è passât Nadâl, al rive Sant Stiefin e al torne Babêl Europe, il program cuindisinâl dedicât a lenghis, musichis e nazions cence stât. Vuê al è martars e l’apontament babelic su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al è a undis a buinore. Cun di plui si podarà tornâ a scoltâ la trasmission ancje tal dopodimisdì di doman ai 27, a une, e di sabide ai 30, a une e mieze.

Te ultime pontade dal 2017 si fevelarà di discs jessûts vie par chest an e ancje di cualchi produzion che e saltarà fûr tal 2018. E sarà la ocasion par tornâ a scoltâ alc di Cabudanni di Dr. Drer e CRC Posse e par une dople cerce di Amb l’esperança entre les dents, il disc solist di Xavi Sarrià, innomenât cjantant, musicist e scritôr dai Paîs Catalans, par passe vincjecinc agns vôs e ghitare dai Obrint Pas.

Si tornaran a memoreâ ancje i trente agns di ativitât dai Dixebra e si fevelarà dai Lou Seriol che a son daûr a prontâ un album gnûf: cun chê scuse si scoltaran ancje dôs covers babelichis dai Sex Pistols gjavadis fûr dal repertori dal grup storic asturian e di chel dai sghirats des Valadis Ocitanis dal Piemont, che nus ricuardin che «anarquista» al fâs rime cun «occitanista».

 

Ai 23/12 e ai 24/12 su Radio Onde Furlane la Fieste e je dople e la Vilie e je Vi_NI_lie

Nadal

Si svicine il Nadâl e su Onde Furlane, daûr di chê che e je zaromai une vere e proprie tradizion, si fâs fieste in direte radio, cuntune programazion speciâl, cui intervents di colaboradôrs, ospits e scoltadôrs e cuntun grum di musiche dal vîf.

La Fieste de Vilie de radio libare dai furlans par chest an e sarà une fieste dople, par vie che e tache za ai 23 di Dicembar a 9 e mieze cuant che al sarà il diretôr de emitente, Mauro Missana, a screâ e a puartâ indenant la direte là che par almancul trê oris la radio e la sô int si da adun tai studi di Vie Volturno 29, in modulazion di frecuence e in rêt.

E sarà ancje la ocasion par scoltâ la band cjargnele dai Dissociative e par gjoldi dal omaç in musiche ae poesie di Pierluigi Cappello, Leo Zanier e Federico Tavan cu lis vôs di Elsa Martin, Lino Straulino e Franco Giordani.

franco giordani a onde furlane

La Fieste de Vilie e larà dilunc ancje vie pal dopodimisdì de sabide cu la cuinte edizion speciâl di GabiTeRAPia OneLove: trê oris di hip hop, dutis dedicadis ae memorie dal artist Luciano Lunazzi, cul miôr dai dj e dai rappers, dai balarins e dai grafitârs dal Friûl e cun cualchi ospit che al rive ancje dal Venit e di Triest.

La Fieste de Vilie e toLa Fieste de Vilie e torne ‘on air’ domenie ai 24 di Dicembar, juste pe vilie di Nadâl, che pe ocasion si stramudarà in ViNIlie, cuntune maratone radiofoniche pe libertât di esisti, almancul fin a 3 a matine, cuinçade di une schirie di djsets fats cui discs in vinîl, tra pop, rock, punk, dark, noise, metal, sperimentazions e ibridazions di ogni sorte cun Piotre, SuperEzio DJ, Francis, Hadrianus, Nichi D’Andrea, Cristiano Deison, Mara Sala e Marilena Moroni.

La fieste e je za tacade lunis di sere cu lis sperimentazions musicâl di Buio Omega, pontade speciâl dal Hybrida Show, che e cjape ispirazion dal solstizi di invier.

Par cui che al è in zone l’invît al è ancje chel di passâ tai studis di Onde Furlane «cun alc di bon di bevi o di mangjâ».
Par ducj cuancj – ancje cui che al è plui lontan – al è chel di scoltâ la radio e di fâ fieste in maniere virtuâl in modulazion di frecuence (90 Mhz e 90.200 Mhz), in streaming ae direzion www.ondefurlane.eu, cu la App o in direte Facebook.

E tancj auguris!

logo_web_ROF_new

Suns Europe 2017. Lenghis vivis, comunitâts solidariis e sunôrs e visions di cualitât

La diversitât linguistiche e je alc di biel, di bon e di just. Lu à tornât a marcâ ancje chest an Suns Europe, il festival des arts tes lenghis minorizadis dal continent, che si à davuelt a Udin dai 30 di Novembar ai 2 di Dicembar.

La manifestazion, inmaneade des cooperativis Informazione Friulana e Puntozero, cu la poie de ARLeF (Agjenzie Regjonâl pe Lenghe Furlane), della Regjon Friûl-VJ, dal Comun di Udin e de Fondazione Friuli, cu la colaborazion de Fondazione Teatro Nuovo Giovanni da Udine e dal Babel Film Festival e cul patrocini dal Consei de Europe, e je stade coerente cu la sô storie e cui siei intindiments di fonde. Il festival al à metût dongje une schirie di concierts, proiezions, incuintris e events speciâi par promovi la diversitât linguistiche tant che dirit di fonde e risultive di creativitât. A son stâts trê dîs plens di sunôrs, di visions e di peraulis di cualitât. Suns Europe 2017 al à fat cjantâ, balâ, pensâ, scrivi e fevelâ cu lis lenghis ‘altris’ de Europe e in cont des lenghis ‘altris’ de Europe.

Il viaç che al è tacât vie pe buinore di joibe ai 30 di Novembar cu la prime trasmission speciâl su Radio Onde Furlane al à vût un grum di moments interessants. Tra chescj e merete ricuardade la proiezion di Missus, il cine di Massimo Garlatti Costa che al conte la bataie puartade indenant di passe cuarante agns dai predis di Glesie Furlane pe afermazion dai dirits linguistics tal cjamp de religjon e de liturgjie. Une storie particolâr che e ven contade cuntune biele combinazion di imagjins e peraulis, cuntune fotografie sflandorose che e esalte i paisaçs dal Friûl e cun snait e sensibilitât, che e à tocjât il cûr e il cerviel di chei cinccent di lôr che lu àn cjalât te sô prime proiezion in Friûl te sale dal ‘teatron’.

Tra cines, concierts e altris incuintris, tal foyer dal ‘teatron’ e je stade la pussibilitât, tra l’altri, di cjalâ une cerce de gnove serie di documentaris sui zovins creatîfs furlans e di preseâ il film di Dylan Goch e Gruff Rhys, Separado!, un diari di viaç che al partìs di une memorie di famee e al devente une sorte di documentari cuinçât di elements sureâi che al conte la emigrazion galese in Patagonie, intant che cul apontament dedicât al Premi S. Simon si à fat il pont su la leterature furlane contemporanie e sabide a buinore la sale dal ‘Giovanni da Udine’ si è jemplade di students pe seconde edizion di Scuele Europe, incuintri formatîf in cont de diversitât linguistiche tant che patrimoni, dirit e oportunitât par ducj, tra i artiscj di Suns Europe e i zovins di chenti.

Un altri moment une vore rilevant al è stât l’incuintri dal dopo di misdì di sabide, cul confront in cont di identitât, creativitât, dirits, autoguvier e Europe jenfri il gjornalist american Ariel Yerushalami, il musicist, scritôr e cineaste galês Gruff Rhys, il gjornalist e operadôr culturâl frison Onno Falkena e il poete e scritôr furlan Maurizio Mattiuzza.

E po e je rivade la serade finâl, screade cuntun omaç ae memorie dal poete trastolon Raff BB Lazzara e presentade cun snait e cun stîl di Michele Polo e Natalie Norma Fella, cui siet artiscj finaliscj, espressions dal Gales, dal Paîs Basc, de Bretagne, de Galizie, dal Cjanton dai Grisons, dal Friûl e de Basse Sassonie, e i trê ospits di gale, dai Paîs Catalans, dal Gales e de Buriazie.
Cussì a son stadis lis esibizions des Adwaith, cul lôr indierock melodic e diret, da La Basu, a scjavaç tra rap, raggamuffin e crossover, dai Ebel Elektrik, rockers granitics e ruspiôs, dai Esposa, cul lôr ‘gal-pop’ melodic e dinamic, di Tumasch è, in balance tra rock e cjançon di autôr, di Franco Giordani, cuntune biele version de sô cjançon dedicade al zuiadôr di balon clautan Ruggero Revelli Grava, e di Isa Zwart, cul so pop melodic e coreografic.  E po, intant che il public al votave e la jurie e faseve lis sôs valutazions, il palc al è stât jemplât des sugjestions musicâls des maiorchinis Joana Gomila e Laila Vallès dal grup Joana Gomila Folk Souvenir, de cjançon visionarie par galês di Gruff Rhys e dai rivocs inmagants de Buriazie dai Namgar.

Cun di plui la serade si à veirte cuntun omaç ae memorie dal poete trastlon Raff BB Lazzara e la partecipazion  dal grup Joana Gomila Folk Souvenir e je stade la ocasion par palesâ la solidarietât di Suns Europe cu la Catalogne cu la proiezion sul schermi dal messaç «No Esteu Sols» (No sês di bessôi) che e je stade compagnade dal batiman de int.

Par ce che al tocje il concors, la sintesi tra il vôt dal public, indreçât viers di Isa Zwart, di Tumasch è, dai Ebel Elektrik e da La Basu, e chel de jurie che e à mostrât di preseâ soredut il cjantautôr rumanç e i rockers bretons, e à puartât ae atribuzion dal premi finâl propit al artist dal Cjanton dai Grisons. Sul podi virtuâl di Suns Europe ancje Ebel Elektrik e La Basu.
Vie pe serade al è stâ dât ancje un premi speciâl a Gruff Rhys, «pe maniere che al à doprât e che al dopre la lenghe galese, te sô musiche visionarie e tes sôs visions musicâls, e pal snait e pe cussience che al palese tes sôs ativitâts, là che pardabon indentitât e fâs rime cun libertât».

 

Su Onde Furlane, in spiete di Suns Europe, si scoltin lis ultimis gnovis di Babêl Europe

A mancjin aromai pôcs dîs ae tierce edizion di Suns Europe, che si fasarà a Udin dai 30 di Novembar ai 2 di Dicembar e Babêl Europe, il program cuindisinâl di Radio Onde Furlane dedicât ae produzion musicâl tes lenghis minorizadis dal nestri continent, al va dilunc a presentâ cualchi cerce dal repertori dai artiscj che a partecipin ae sezion musicâl de manifestazion.

Tal apontament ‘babelic’ di cuindis dîs indaûr si veve za tacât a scoltâ cualchi toc di chei dai vot finaliscj. In particolâr – dongje di une selezion dal gnûf progjet dal cjantant e musicist (e un grum di altis robis) dal Paîs Basc, Fermin Muguruza, adun cul coletîf catalan The Suicide of Western Culture, che no àn nuie a ce fâ cun  Suns Europe ma a meretavin scoltâts – la scjalute e veve fat indenant lis propuestis dai galizians Esposa, des galesis Adwaith, dal rumanç Tumasch è e dai ocitans Uèi, che però juste cualchi dì indaûr a àn scugnût dâ forfait e duncje no saran in Friûl.

Te pontade di Babêl Europe che si podarà scoltâle in direte doman, martars ai 28 di Novembar a 11 a buinore, e po ancje in repliche tal dopo di misdì di miercus ai 29, a une, e di sabide ai 2 di Dicembar, a une e mieze, la scjalute ur darà spazi ae musiche di chei altris partecipants al concors cuntun viaç musicâl che al cjaparà dentri i Paîs Catalans, cun Joana Gomila Folk Souvenir, il Paîs Basc, cu la rapper La Basu, la Bretagne, cui rockers Ebel Elektrik, il Friûl, cul cjantautôr Franco Giordani, e la Basse Sassonie, cu la cjantante pop Isa Zwart. Cun di plui al sarà spazi ancje pai ospits speciâi: il cjantant, ghitarist e cineast galês Gruff Rhys e il grup Namgar che al rive de Buriazie, republiche de federazion russe che si cjate sul confin cu la Mongolie.

Radio Onde Furlane – e cun chê Babêl Europe – si scolte sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu. Al pues stâi che si rivi ancje a scoltâle e a cjalâle in direte fintremai su Facebook.

Dopo de prime emission in direte e des replichis di miercus e di sabide, ancje cheste gnove pontade di Babêl Europe si podarà tornâle a scoltâ tal sît internet de radio libare dai furlans.