‘I partiti europei’, une cunvigne a Gjenue

bandeu

Ai 30 e ai 31 di Zenâr a Gjenue si fevele di Europe.
Il Dipartiment di Siencis Politichis de Universitât di Gjenue al inmanee un ‘seminari dedicât ai partîts europeans.

La iniziative si disvilupe dilunc vie di dôs zornadis là che l’argoment al ven frontât intune prospetive storiche, cu la presentazion dai diviers partîts europeans, e cjalant ae ativitât dal Parlament european e dai siei grups. Si fevelarà ancje dal sisteme european dai partîts e di cemût che lis fuarcis politichis a son daûr a preparâsi pes gnovis elezions europeanis cun intervents di esperts e di europaorlamentârs.

Dutis lis informazions in cont de iniziative si cjatin achì.

Advertisements

Parma – Udinese 1-0

udin_neri

Cuatri partidis e cuatri sconfitis. Dopo des “luci a San Siro” dai cuarts di finâl di Cope Italie al torne il scûr plui scûr dal campionât, là che la situazion si fâs simpri plui grivie.
A Parma l’Udin al à a ce fâ cuntune scuadre in salût, ecuilibrade e vivarose, e al patìs dal prin al ultin minût e soredut inte prime frazion. Ma no je dome la diference jenfri i emilians e il Milan zombie di miercus passât: e je soredut la diference tra l’Udin di chê altre sere e chê dal Tardini.

La scuadre di Donadoni si fâs sburtâ indenant di Cassano, Parolo e Amauri; chê di Guidolin no rive a jessi avonde combative e tal moment che e rive a metisi a scuare e cjape il gol che al marche la supremazie teritoriâl dai parons di cjase e al torne a mandâ a patràs i blancs e neris, che dome tal secont timp a provin a alçâ il cjâf ma nol è avonde.

Brkič si scjalde lis mans za sul imprin de gare, cu lis conclusions di Gargano e Acquah. Plui indenant la pression de scuadre emiliane e continue a fâsi sintî, ancje se no si concretize in conclusions. Il gol al rive suntune iniziative di Cassano, che al partìs su la corsie di mandrete e al met tal mieç par Amauri: Brkič al jes ma al sbat cuintri di Heurtaux e cussì il brasilian al rive a butâle in puarte cence fastidis.

Tal secont timp l’Udin al prove a fâ alc di plui, ma Muriel al è une fantasime e Nico Lopez al rive des bandis di Mirante dome intune ocasion e la musiche no cambie cuant a che a jentrin Maicosuel e Di Natale. Di chê altre bande i aversaris, dongje di difindis ben, a rispuindin in cuintripît e a riscjin di fâi ancjemo mâl al Udin cun Biabiany e cu la matricule Mauri. Mancul mâl che Brkič al ten bot.

Cussì la partide e finìs, la zone pericul e je simpri a trê ponts e la prossime partide cul Bologne e devente une sorte di dispate. Al è cui che si lamente che a son masse zuiadôrs forescj – ducj i totolârs di domenie – e che no rivin a capîsi e a zuiâ, stant che a somein plui atents viers des indicazions dai procuradôrs e des sirenis dal marcjât che di ce che ur domande il mister. Ce che al è sigûr al è che dome in cualchi moment a rivin a fevelâ la lenghe dal balon. Sperìn che ur vegnin dadis ripetizions vie pe setemane e che la scuadre e torni a jessi chê che si à viodude in Cope Italie o in campionât cuintri di Napoli, Juve e Fiorentine. Se no je cussì, i ponts di distance dal foran no saran plui trê.

Milan – Udinese 1-2

bandieris

L’Udin al torne a cjase di Milan cu la cualificazion aes semifinâls de Cope Italie. La scuadre blancje e nere si conferme biele di gnot, compagn che cuintri dal Inter inte stesse competizion e cuintri dal Napoli in campionât passe un mês indaûr. No si sa se e je une vere resurezion, par sigûr chê di nossere e je stade une serade storiche e une ocasion par gjavâsi vie la maluserie des ultimis zornadis e par frontâ, cun energjiis gnovis, lis prossimis partidis in campionât e par vê gole di scombati par rivâ ae finâl di Rome.

Guidolin al presente une scuadre zovine e frescje, che e scomence malamentri e e cjape un patafon di Balotelli dopo sîs minûts, ma no si piert pai trois, e masane corse e balons e e rive a mandâ in tilt un Milan flap e cence morbin.
Il disorientament dal Udin al dure sù par jù un cuart di ore e ae scuadre furlane i coventin ancjetancj minûts par rivâ al tîr cun Badu e par cjapâ il control dal incuintri, fâi pôre al Milan e sierâ il prin timp cul risultât di paritât.

Bruno Fernandes al prove con sucès a zuiâ di fin, Muriel al zire a corint alternade ma cuant che al lûs al è sflandorôs, daûr la difese e siere ben sui tentatîfs di dialic strent di Balotelli e Kakà, intant che Allan, Badu e Widmer cul passâ dai minûts a fasin cressi pression e dinamisim in verticâl.
L’un a un al rive propit di une percussion dal zuiadôr svuizar, che al bruse Emanuelson e lu oblee a fermâlu in maniere iregolâr: rigôr, realizazion di Muriel e Milan in zenoglon.

Il secont timp si vierç cul Udin che al manten il control des operazions: il Milan al è smamît, intant che Bruno Fernandes, Muriel e Lazzari a tirn in puarte cun pocje precision. La reazion milaniste e je dute tes iniziativis di Balotelli, ma Brkič al rispuint ben, soredut in ocasion di une punizion sparade cun fuarce e precision de bande di SuperMario.

L’Udin al manten la sô supremazie, che zi zove de energjie e de iniziative puartade de jentrade in cjamp di Pereyra al puest di Bruno Fernandes e, cualchi minût indenant, di Nico Lopez al puest di Muriel. Propit il zovin uruguaian al controle inte maniere miôr une bale une desene di metris dopo de linie mezane e al partìs in verticâl te corsie centrâl e al mole un tîr in diagonâl che al finìs là che Abbiati nol rive: doi a un.

In altris ocasions – par esempli domenie stade cuintri de Lazio – l’Udin intune situazion di cheste fate al sarès stât bon di sierâsi indaûr e di fâsi travanâ dai aversaris. Nossere no je lade cussì, soredut par merit dal Udin, che si à mantignût alt cun Nico Lopez e Pereyra, sapontâts des incursions di Widmer su la corsie di drete, e no si à fat cjapâ des striis in difese e tra i pâi, ma ancje par vie che il Milan nol à rivât a imbastî nissune azion di atac, a part un pâr di tentatîfs di Balotelli che però no i fasin pôre a Brkič.

E cussì la partide e finìs in glorie pai blancs e neris che a mandin il diaul milanist al infier e a parin vie ancje cualchi altre fantasime.
La ultime cartuline di San Siro e je une biele inmagjin che e fâs pensâ e sperâ ben: ducj cuancj i zuiadôrs dal Udin sot de curve dai tifôs furlans, daûr de solecitazion di Di Natale, che al mostre cemût che si pues zovâ ae scuadre, cun personalitât e cun snait, ancje cuant che no si zuie e si reste in bancjine cu la gjachete intor.

Udinese – Lazio 2-3

udin_neri

Si sperave che e fos une vitorie, si spietavisi zaromai che e finìs in paritât e ae fin e à vinçût la Lazio. La prime zornade de seconde part dal campionât si siere inte maniere piês, cul Udin che si svicine ae code de classifiche. Il sucès di un alenadôr furlan, il gurizan (di Lucinîs) Edi Reja che di pôc al à cjapât in man la conduzion tecniche de scuadre romane, nol è par sigûr une consolazion, ma salacor al fâs incressi il marum.

L’Udin al continue a jessi clopadiç: il caratar nol è, il zûc no si lu viôt, la tignude dal cjamp e je smamide e dome i erôrs a son tancj, in ducj i setôrs. La Lazio no je alc e ce, però e à snait e grinte. La scuadre furlane, al contrari, in cualchi moment e mostre chel che al sarès il so potenziâl ma pe plui part de partide e rive a fâ saltâ fûr dome i siei difiets.

L’incuintri nol partìs mâl, almancul par ce che al tocje lis emozions: Klose al è protagonist dal prin atac, ma Douglas lu ferme, intant che l’Udin al prove a movisi cun velocitât su lis fassis laterâls e al cîr di disfrutâ lis potenzialitâts dal so 3-5-2. Cussì Maicosuel al rive a jentrâ te aree di rigôr e Cavanda lu bute jù e al è penalty: al tire Di Natale e al segne.
La Lazio e reagjìs cul cûr e cu lis gambis, cun Klose che si môf cuntune cierte continuitât e al fâs vignî i sgrisui al Udin, che al rispuint cuntun pâr di iniziativis di Basta e Di Natale. La Lazio e va al mancul e i blancs e neris a recuperin supremazie teritoriâl e te ultime part dal prin timp si fasin viodi indenant, ma a stracin une buine ocasion cun Maicosuel.

Il secont timp al scomence cence mudaments tes dôs scuadris. L’Udin al frache sul aceleradôr, cun Di Natale in fuzion di om dal assist bon, Badu che al mostre di jessi il zuiadôr che al dopre miôr i sugjeriments dal cjapitani cuant che si puarte indenant, ancje se intune ocasion al piert il moment just par metile dentri, e Pereyra che al è protagonist positîf in fase sei di costruzion che di interdizion.
La espulsion di Onazi e varès di judâ l’Udin te aministrazion dal risultât e de partide, ma nol è cussì. La gare, che e continue a no jessi particolarmentri biele, e viôt la Lazio ancjemò sburtade indenant di Klose, che si vuadagne un rigôr suntune ingjenuitât di Domizzi e forsit cu la colaborazion di Rocchi: tîr di Candreva e un a un.

L’Udin al rispuint dopo cinc minûts inte maniere miôr cun Badu, che al segne un biel gol juste te metât dal secont timp, intant che cualchi minût plui indenant Klose al mancje l’apontament cul doi a doi intune posizion une vore favorevule e al fâs compagn Candreva.
Il gol laziâl al rive in maniere confusionade, cuntun cross che, cun Brkič che al jes mâl de puarte, al bat su la schene di Lazzari e al finìs tal sac.
L’Udin nol rive a fâ plui nuie. La Lazio, invezit, cun Hernanes, che al fâs dut just (control, sghiribiç e tîr in puarte), al cjate il gol de vitorie tal ultin minût. La sô scuadre e puarte a cjase trê ponts di aur e l’Udin al è a mancul trê de tierçultime.

Lis preocupazions a cressin, ancje se a meretin ricuardadis lis buinis prestazions di Douglas, Badu e Pereyra, la zornade miôr di Di Natale, almancul par 50 dai 58 minûts zuiâts.

Sampdoria – Udinese 3-0

udin_neri

E cumò o sin dal gjat! La prestazion dal Udin cuintri dal Inter in Cope Italie e jere pardabon dome un sium di une gnot di invier, une ilusion che si à sfantade tal zîr di pôcs dîs.
Nossere cuintri de Sampdoria, intune partide brute e gnervose, l’Udin al à zuiât malon, cence morbin, cence schemis, cence cûr, e al à rivât a fâ un tîr sôl in puarte in novante minûts.

La scuadre e finìs la prime metât dal campionât cun vincj ponts, a cuatri lungjecis de tierçultime in classifiche: une situazion che par cjatâ une compagne al covente tornâ indaûr tai agns; une situazion che e fâs vignî i sgrisui; une situazion che nissun si spietavisi e che al covente intervignî in maniere decise par no sbrissâ ancjemò plui injù.

Inte serade di Marassi l’Udin nol piert dome une partide, ma e piert ponts, puescj in classifiche e credibilitât. La Sampdoria, che no je une scuadre alc e ce, e scombat dal principi ae fin de partide e si puarte a cjase trê ponts che a son pesantons.

L’incuintri al scomence plancuç, ancje se e salte fûr daurman une cierte predominance teritoriâl de bande de scuadre di Mihajlović, che cun Eder i fâs pôre ae difese blancje e nere. L’atacant dorian, suntun passaç di Soriano, si cjate tes cundizions di jentrâ te aree di rigôr e di frontâ di bessôl Kelava, che lu bute jù: rigôr, cartelin zâl pal puartîr dal Udin e gol dai undis metris dopo sedis minûts.
Al è il prin svolt de partide. La Sampdoria e mostre di meretâsi il vantaç, cun Soriano e Eder che si rindin ancjemò pericolôs. L’Udin nol rive a imbastî une reazion degne di chest non. I blancs e neris si segnalin dome che par erôrs e fâi che Mazzoleni al punìs a colps di cartelins, cemût che al sperimente al minût 35 Allan, che al scuen lassâ il cjamp par une dople amonizion.
Chest al è il secont passaç. La inferioritât numeriche e marche ancjemò di plui lis caratteristichis negativis dal Udin: indenant Di Natale e Maicosuel a confermin che no rivin a cumbinâ nuie e il Mago al vinç la gare par cui che al è plui smamît, stant che al ven lassât fûr tal interval; indaûr al è simpri masse spazi par Eder, che al segne il secont gol sul imprin dal secont timp; te fasse mezane i blancs e neris no rivin ni a rompi il zûc dai aversaris ni a fâ sù un straç di manovre.

Il secont timp al è ancjemò plui brut e plui gnervôs: Soriano al ven butât fûr di Mazzoleni dopo di une jentrade killer su Domizzi e in dîs cuintri dîs L’Udin al rive almancul a meti un pît te aree doriane, là che Hertraux al vuadagnarès ancje un rigôr se al fos un arbitri a viodilu.
Mazzoleni al cjale miôr cuant che Gabriel Silva al poche De Silvestri e l’Udin al reste in nûf: piês cun piês, stant che cuntun om di mancul l’Udin al rive a cjapâ ancje il tierç gol.

E Cumò? O che si drecisi, ma pardabon, o che si riscje la retrocession!

Udinese – Inter 1-0

fuarceudinees

Une discuvierte dople: e esist la Cope Italie e soredut e esist ancjemò une scuadre che si clame Udinese. Dut chest al salte fûr de partide di nossere dal Udin cuintri dal Inter, vinçude dai blancs e neris par un a zero.
La scuadre di Milan si conferme la vitime miôr dai blancs e neris, compagn che sù par jù un an indaûr in campionât. Tal incuintri dai Otâfs di finâl l’Udin al mostre une muse une vore diferente di chê de partide di lunis cuintri dal Verone e di chê di tantis altris ‘zornadis no’ viodudis vie par cheste stagjon. Al vignarès di dî: dute une altre muse, dute une altre scuadre.

Guidolin al imbastìs une scuadre ben struturade, fuarte te fasse mediane cun Pinzi, Badu e Allan, cun Widmer e Allan tes laterâls, in difese cun Heratux, Domizzi e Danilo, cun Kelava tra i pâi e Nico Lopez e Maicosuel in atac.
L’Udin al partìs ben, al masane zûc e si rint pericolôs indenant cun Nico Lopez e cul Mago. L’Inter al patìs e al rispuint ae scuadre furlane cence rivâ a fâsi viodi des bandis di Kelava.

Doi minûts dopo de prime mieze ore di zûc al rive il gol dal Udin: Allan al zire la bale su Nico Lopez che al viôt Maicosuel, il brasilian al ricêf il sugjeriment e cussì lu concretize cence masse fastidis.
Il gol al da la svearine al Inter, che al rispuint cuntun pâr di conclusions, al cjape une travierse cun Kuzmanovic, ma nol rive a cjatâ la strade pal gol.

Tal secont timp al jentre Palacio e chest al zove ae pression ofensive dai ospits. L’Udin al ten bot, si difint e al rispuint prime cun Maicosuel in cuintripît che al servìs Pinzi e plui indenant cun Badu, Nico Lopez e Widmer.
L’Inter al è in confusion tatiche: Mazzarri al cambie la fisionomie de sô scuadre ma nol rive a cjatâ nissune maniere par dreçâ la partide, intant che l’Udin al difint il vantaç, al puarte a cjase la cualificazion e – sperìn – ancje la cussience di jessi une scuadre in stât di zuiâ, di scombati, di vinci, di no vê pôre di nessun.

Cumò al è impuartant che cheste cussience e cheste cundizion agonistiche, tatiche e tecniche a vegnin mantignudis tai prossims impegns di campionât e di Cope Italie. Par che nol sedi dome un biel sium di une gnot di invier.

Udinese – Verona 1-3

udin_neri

No podeve lâ piês. L’Udin cuintri dal Verone nol piert dome la partide ma ancje chê usance che di un pôcs di agns incà lu viodeve scomençâ ben la anade e al mostre di jessi ancjemò plen di problemis di gjambis, di cjâf e di cûr, cun ‘desaparecidos’ tal cjamp e declarazions ultimativis ae fin de partide.
La scuadre furlane e conferme ancje la tindince di chest an di no rivâ a vinci dôs partidis une daûr di chê altre, e manten une ande schizofreniche, cun delusions grandis e sperancis di resurezion tradidis daurman, e e torne a lâ indaûr in classifiche, ancje se – par fortune e par vie che a son formazions ancjemò piês – no cussì indaûr.

Si spietavisi dute une altre partide, par plui resons: daûr de prove di cûr che la scuadre e veve fat cuintri dal Livorno; parcè che a jerin i precedents positîfs de prime partide dal an; par vie che la scuadre di Mandorlini, cemût che e mostre la sô posizion in classifiche, e je une scuadre biele che e zuie ben e par solit l’Udin di chest an al à mostrât la muse miôr cuintri dai aversaris plui fuarts.
Si pensave che l’unic fastidi de partide al fos chel de sô definizion ‘a media unificâts’ di «derby triveneto» (triveneto? Ma il Friûl al è Friûl e nol è ni veneto, ni triveneto, ni pentaveneto!!!!!!!!),
ma dongje di cheste overdose ‘trivenetiste’ al è stât ancjemò alc altri di negatîf.

L’Udin al vierç la gare cuntune cierte autorevolece, ma il Verone al somee in stât di jessi plui pericolôs. Cun di plui a chei dal Hellas la difese blancje e nere e rive ancje a dâur une biele man. Al è ce che al sucêt dopo siet minûts cuntune bale gjestide mâl de bande di Basta che Martinho le stramude intun passaç par Toni che al met Brkič ko: un a zero.

L’Udin al reagjìs, ma Rafael al mostre di jessi intune zornade miôr di chê dal so coleghe dal Udin suntune conclusion di Nico Lopez e une biele zirade di Di Natale si distude plui innà de puarte dal Verone. I veronês a tegnin bot cence masse fastidis, la scuadre furlane no rive a cumbinâ sot puarte e Toni, forsit in fûr zûc, al segne il doi a zero. Il prin timp al regale ancjemò il gol di Pereyra, che al mostre che l’Udin al esist, un rigôr une vore probabil pai furlans dineât de bande dal arbitri e la espulsion di Guidolin.

La seconde frazion e mostre un Udin che al volarès dreçâ la partide ma che nol rive a fâlu. Di Natale, in cundizions (dome un pôc) miôr che timp indaûr, al prove a fâ alc, ma al è masse pôc. Alc di plui si lu viôt dopo de jentrade in cjamp di Bruno Fernandes, il miôr dai blancs e neris che al cjape ancje un pâ, ma nol è avonde. Cussì il Verone, che no si scompon indaûr, cundut dai atacs di Di Natale, Gabriel Silva, Maicosuel e Bruno Fernandes, no si dismentee di zuiâ ancje indenant e al rive a segnâ un tierç gol cun Iturbe, che al profite di un erôr di Danilo.

In struc, pal Udin, une altre partide segnade di limits tecnics, tatics e carateriâi de scuadre interie e dai singui zuiadôrs, tra dificoltâts in atac, distrazions in difese, pocje costance e scjarse determinazion.

In spiete di un mudament positîf, vêr e decîs. Rivaraial?