Ocitanie e Friûl si dan adun in musiche a Ravasclêt ai 2 e ai 3 di Setembar

louseriol

I sghirats ocitans a rivin in Cjargne. Vinars ai 2 di Setembar a Ravasclêt, dentri dal program de rassegne MusiCarnia, inmaneade de bande de associazion Euritmica di Udin, al è un conciert dai Lou Seriol, par sigûr une des bands plui innomenadis di chê che o podaressin clamâle «musiche ocitane fuarte».

La formazion che e rive de Val d’Estura, che cui che al frecuente il nestri blog al cognòs avonde ben, no dome pai tancj concierts fats ator in chescj agns ma ancje pe sô presince cuntun toc dentri dal cd che al compagne il libri Occitania, Friuli, Europa. La mia lingua suona il rock, e varà il compit di screâ il gnûf palaçut polifunzionâl de localitât turistiche cjargnele dongje dal Çoncolan. Si tache a vot e mieze sot sere.

La serade seguitive, sabide ai 3, MusiCarnia e va indenant cuntun altri conciert di gale: simpri a Ravasclêt, tal palaçut polifunzionâl, simpri a tacâ di vot e mieze, al sunarà e al cjantarà Luigi Maieron, cjantautôr cjargnel une vore cognossût e innomenât sei in Patrie che inaltrò.

Luigi-Maieron

Un biel incuintri in musiche tra Ocitanie e Friûl che al vierç la ultime part de rassegne rassegne MusiCarnia, tacade ancjemò ai 29 di Avrîl, che vie pe Sierade e proviôt altris apontaments dedicâts ae musiche, ae comunicazion e ae creativitât in lenghe furlane.

Ai 22 di Otubar a Dimpeç e sarà une performance di Hybrida Light Show  e DJ Tubet, tra hip hop, reggae, dub e sperimentazions musicâls e visivis, ai 12 di Novembar a Tumieç i FLK  a presentaran dal vîf il lôr omaç al poete Federico Tavan, Adieu Monsieur Federicó, e di Otubar dicembar Lino Straulino, i Carnicats e i speakers di Radio Onde Furlane a coordenaran une schirie di laboratoris su musiche, creativitât e comunicazion cui fantats des scuelis superiôrs de Cjargne.

Udinese – Empoli 2-0

fuarceudinees

L’Udin al vinç la prime di campionât in cjase. Cun doi goi e une buine dose di soference la scuadre blancje e nere e fâs onôr al Stadi Friûl e si gjave vie dal ultin puest in classifiche.

La partide e tache inte maniere miôr. La scuadre di balon furlane e palese daurman une cierte supremazie terioriâl, e cjape sùù la iniziative e cussì e rive in curt a cjatâ la strade dal gol. Dopo trê minûts di zûc e rive la rêt segnade di Felipe, che si cjate tal puest just tal moment just e sui disvilups dal prin corner blanc e neri al fâs la robe juste: al tire in puarte e al jemple il sac daûr di Pelagotti.

Tai minûts seguitîfs l’Udin al è ancjemò pericolôs cuntune biele iniziative personâl di badu e cuntun tîr di De Paul. Tor de mieze ore e ven fûr la reazion dal Empoli, cun Saponara che in maniere discontinue al cjante e al puarte la crôs, cun sugjeriments pai compagns e cun conclusions in prime persone. Il dinamisim so e chel di Gilardino nol rive a puartâ l’Empoli sul un a un.
Ducj i doi a scugnin fâ i conts cun Karnezis, che in cinc minûts al fâs trê intervents di soremestri, confermant un altri viaç la sô cualitât. Cun di plui cuant che nol rive lui, al è il pâl a dî di no a Saponara.

Dopo di chest spetacul pirotecnic des bandis de puarte dal Udin, par fortune cence dams pai blancs e neris, la partide e cognòs une fase di polse, prime e dopo dal interval. Tal secont timp l’ecuilibri de sossedade al ven rot dome dopo vincj minûts:conclusion cul cjâf di Gilardino e ancjemò un altri meracul di Sant Orestis di Atene.

L’Empoli al prove a imbastî cualchi zuiade direzude di Croce e l’Udin si difint e al rispuint in cuintripît cun Perica, che in atac al è jentrât al puest di un Zapata pardabon flap e smamît. A passin i minûts, i ospits a restin in dîs, par vie de espulsion di Laurini che al fâs une jentrade brute e triste a dam di Perica, e juste ae fin, tai minûts al rive il gol dal atacant cravuat.

Une vitorie che e da ossigjen al Udin e ai siei tifôs, ma ancje une conferme dai tancj limits tecnics e tatics che la scuadre di mister Iachini e à, almancul par cumò. Vê un grant tant che Karnezis in puarte al è ben, ma nol è avonde par zuiâ, par segnâ e duncje par fâ risultât. Sperìn che la tornade di Thereau e un pôc di lavôr soredut su la fasse mezane, là che e varès di rivâ a meti un pôc di ordin  la rivade di Kums, a fasin cressi pardabon la formazion blancje e nere.

Babêl Europe dai 23.08, la novitât discografiche e regne de Ladinie ae Sardegne

martinaiori448x245

Doman in direte a 11 a buinore e miercus ai 24 di Avost, in repliche a une dopo di misdì, al torne su lis frecuencis di Radio Onde Furlane il program cuindisinâl dedicât ae produzion musicâl tes lenghis minorizadis dal continent che si clame Babêl Europe.

La gnove pontade de trasmission, che si pues scoltâle sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu, e varà un tai ‘avostan’ e ‘di splaze’.

Soracuerta_CD_Martina

Dongje di cualchi informazion e segnalazion, no dome di caratar musicâl, te scjalute di Babêl Europe a saran protagonistis principâls lis novitâts discografichis, a tacâ dal disc de cjantante ladine fassane Martina Iori, dal titul Amore e Buscofen, che al è saltât fûr juste ai prins di Avost.

Cun chê di lâ daûr des jessudis discografichis dai ultins mês, il viaç cun Babêl Europe al tocjarà ancje Galizie, Ocitanie e Sardegne, cu lis produzions plui resintis di Caxade, Lou Dalfin, Arrogalla e Claudia Crabuzza.

Pieter_Bruegel_the_Elder_-_The_Tower_of_Babel_Rotterdam

Roma – Udinese 4-0

udin_neri

L’Udin al scree il campionât cun cuatri patafons cjapâts a Rome. Dopo jessi stade butade fûr dal Spezia tal prin turni di Cope Italie, la scuadre blancje e nere e piert ancje la prime partide di campionât.
Cuntri de ‘Maggica’ i blancs e neris a tegnin bot dome par un timp, il prin, cuant che la formazion vuidade di Spalletti e stente a fâ il so zûc un pôc par colpe sô e un pôc par merit de scuadre furlane, che no i permet di meti dongje azions di atac che a sedin pardabon pericolosis.

La prime frazion de partide e je avonde ecuilibrade e salacor ancje un tic noiose, cun pocjis conclusions di une bande e di chê altre: chês dai romaniscj Bruno Peres e Dzeko e chê dal blanc e neri De Paul.
Dopo de polse la musiche e cambie: i parons di cjase a tornin tal cjamp di zûc cuntun altri pas e a palesin chel snait e chê grinte che ur domandavin i tifôs; i zuiadôrs di Iachini a mantegnin chel stes ategjament tatic di prime ma cul passâ dai minûts e cu la incressite de pression ofensive dai aversaris a pierdin luciditât e ordin e la Rome e cjate la vie dal gol.

I prins tentatîfs a son chei di Nainggolan, fûr bersai, di Dzeko, meracul di Karnezis, e di Salah, fûr di pôc. Cenece fevelâ dal salvament su la rie di puarte di Widmer sui disvilups di un corner di Bruno Peres.

Il gol romanist al è ‘madûr’ ancje se al rive dome suntun penalty. Il contat tra Danilo e Dzeko al somee dubi sù par jù te stesse maniere di chel tra Emerson e Widmer tal prin timp, ma Di Bello, cu la stesse sigurece che nol veve calcolât chel in chê volte, al decît di dâi il penalty ae Rome: al tire Perotti e al segne.

Propit Perotti, tignût fûr di Spalletti tral prin timp, al è l’element che i da ordin e fuarce a dute la scuadre romane, che e continue a masanâ zûc, inta che l’Udin al stente a imbastî une reazion ae situazion di disvantaç.
Tal moment che finalmentri i blancs e neris a tornin a fâsi vîfs des bandis di Szczęsny, al rive il doi a zero romanist. L’udin nol concretize il so atac e si fâs infilâ in cuintripît, cuntune iniziative di Perotti che al libere Salah, che al ven fermât di Badu in maniere iregolâr: Di Bello al sivile, Perotti
al tire e al segne ancjemò.

L’ultin cuart di ore al viôt l’Udin che al prove a fâ alc – masse pôc… – e la Rome che e complete il poker cun Dzeko e Salah.

A Rome e cuintri de Rome si pues ancje pierdi. Par sigûr, dopo di un prin timp dignitôs, de scuadre di balon furlane si spietavisi alc di plui. Magari cussì no, pal moment l’Udin di chest an al somee masse chel dal an passât, model… (mer)Dacia Arena, cemût che al disarès cualchidun.

Sperìn che alc al ledi miôr te prossime partide in cjase cuintri dal Empoli.

‘Tra le rocce e il cielo’, di vuê a domenie in Vallarsa si resone dal mont e de mont

tra_le_rocce

Storiis, memoriis, identitâts, teritoriis. A son uns pocjis des peraulis clâf che a permetin di ricognossi i argoments e il program
di Tra le rocce e il cielo, festival che si davuelç in Trentin, in Vallarsa, di vuê a domenie 21 di Avost.

La manifestazion e à chê di meti dongje esperiencis, ideis e resonaments in cont dal mont e de mont, des ‘tieris altis’, tant che part dal mont. Si partìs dal Trentin, de sô storie e de sô situazion dal dì di vuê, par cjalâ ancje inaltrò: si si slargjisi su dut l’Arc des Alps e ancjemò in direzion dal Mediterani, dal Afghanistan  o des zonis cjaldis des vueris e dai conflits dal dì di vuê, cu la memorie des vueris dal passât e in particolâr dal maçalici de Prime vuere mondiâl.

Il cartelon de rassegne al cjape dentri incuintris tematics, mostris, escursions, spetacui, proiezions di cines, presentazions di libris  e taulis tarondis.

Vie pe zornade dai 19 di Avost, par esempli, si fevele di feminis e vueris, cuntune cjaladure specifiche ancje viers des minorancis linguistichis tes regjons des Alps.

Sabide ai 20, impen, vie pe buinore e po ancje dopo di misdì, l’argoment principâl al sarà chel des frontieris, dai confins, des migrazions
e de Europe.

Il program complet di dute la manifestazion si pues leilu achì.

Par savênt alc altri ancjemò, al baste dâ un cuc in rêt: achì, achì  e achì.

Babêl Europe in version avostane. Cjançons pal Istât e segnalazions di events e leturis

Pieter_Bruegel_the_Elder_-_The_Tower_of_Babel_Rotterdam

Babêl Europe al va indenant ancje vie pal mês di Avost. Doman, martars ai 9 a 11 a buinore, e po ancje miercus ai 10, in repliche a une dopo di misdì, te programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) e torne la rubriche cuindisinâl dedicade ae produzion musicâl tes lenghis minorizadis dal continent.

La prime pontade avostane dal viaç musicâl a torzeon tra lenghis, minorancis e nazions cence stât, in onde su lis frecuencis de radio libare dai furlans, e met dongje musiche e informazion, cuntune selezion di “cjançons pal Istât” e cualchi segnalazion.

NeRe-la une-7-2016

In particolâr si fevelarà dal numar gnûf de riviste Nazioni e regioni. Studi e ricerche sulla comunità immaginata, che dal 2013 e salte fûr dôs voltis ad an cuntune biele dotazion di saçs, di articui, di rassegnis e di recensions, e dal festival Tra le rocce e il cielo, che si davuelç in Trentin dai 18 ai 21 di Avost.

Par ce che al tocje la musiche, l’itinerari proponût di Babêl Europe al cjape dentri Corsiche, Sardegne, Ladinie, Burgenland e Udmurtie, cu lis vôs di feminis babelichis fuartis e melodichis tant che chês di Diana Saliceti (in cubie cun Petru Guelfucci), di Claudia Aru Carreras e des cjantantis dal progjet ladin fassan Grenz & Friends e cu la energjie di Coffeshock Company e Silent Woo Gore.

coffeeshock