Torino – Udinese 2-0

turin_lamoleantoneliane

Il Toro al è biel e Immobile, l’Udin al è brut e impussibil. Chê di Turin e je forsit une des partidis piês di dute la stagjon de scuadre blancje e nere e il fat che al vedi vinçût il Toro e je une piçule consolazion dome par cualchidun di chei che a àn a ce fâ cun chest blog.

La diference tra lis dôs scuadris sul cjamp e je grandonone: di une bande un grup che al masane zûc, al mostre di vê buinis cualitâts e al à ancjemò inte smicje l’obietîf di un puest in Europa League; di chê altre une formazion flape, individualitâts che no somein in stât di esprimi nancje une part dal lôr potenziâl, zuiadôrs sentâts sul obietîf minim de salvece che no rivin nancje a disfrutâ la ocasion par dreçâ cuntune biele prestazion tantis zornadis grisis, smamidis e di dismenteâ.

Il Toro al partìs al atac, fuart di motivazions grandononis, de poie di un public cuntun cûr grant cussì e di un moment, in gjenerâl, positîf. L’Udin al ten bot, no si scompon masse e si difint in maniere ordenade e ordenarie. Dopo nancje un cuart di ore al rive il gol di El Kaddouri e i ecuilibris a tachin a saltâ. Il Toro al sburte, par rinfuartî il so vantaç, e l’Udin al scuen fâ alc di plui che difindisi, ma se pai granatas la mission e je pussibile, la scuadre blancje e nere e mostre une altre volte di no vê ni gjambis, ni cûr e ni cerviel.

La manovre de scuadre di Guidolin e je lente e proviodibile e la pression ofensive e je inesistente, stant che se si gjave une punizion fûr scuare di Muriel  l’Udin nol fâs un tîr in puarte in dut il prin timp. Di chê altre bande Scuffet al à di stâ in vuaite su Cerci, Moretti e El Kaddouri e la musiche e je simpri chê ancje te seconde frazion, cuant che a rivin lis gnovis conclusions di Cerci e Immobile.

Al minût 56 Immobile,  servît ben di Maksimovic, al cjate la bale juste par meti in zenoglons Scuffet. L’Udin, che za dopo dal interval al veve tornât a mostrâ in atac polac Zielinki al puest di Bruno Fernandes, al imbastìs un alc che clamâlu reazion al è doprâ une peraule masse gruesse: cualchi passaç, cualchi tentatîf, cualchi scat e nuie plui. Intant il Toro al gjestìs cjamp e balon, al manten il control de situazion e al puarte a cjase une vitorie pesante pe classifiche e insom lizere pal sfuarç fat par concuistâle.

Par ce che al tocje l’Udin l’unic element positîf si lu cjate te cussience di un pôc ducj chei che a son stâts intervistâts che e je stade une partidate, zuiade mâl o salacor no zuiade par nuie. Se al pues coventâ par alc…

 

 

Advertisements

Udinese – Napoli 1-1

udin_neri
In confront cun chê cuintri de Juve, chê cul Napoli e je stade une partidone. In confront cu la partide di chest invier al San Paolo, chê di Udin e je stade une gare di sgrisulâsi. Si pues strucâ cun chestis peraulis il sens de partide dal 19 di Avrîl, là che pe scuadre furlane i elements positîfs a son trê: il fat di no vê pierdût, il pont cjapât che al conferme la posizion in classifiche e cualchi fruçon di zûc.


Tal prin timp la ande de partide e je avonde ecuilibrade, cun dôs scuadris che no somein vê nuie ce domandâ al campionât, almancul par ce che al tocje la classifiche. Ta cheste suaze il Napoli al mostre di volê fâ alc di plui e ancje di jessi in stât di fâlu e l’Udin al mostre di no vê pôre e di tignî bot denant dai aversaris. Scuffet si cjate tal puest just tal moment just suntune punizion di Insigne e une conclusion di Bruno Fernandes e un colp cul cjâf di Badu a fasin viodi che ancje l’Udin al prove a fâ alc in atac (cence concretizâ masse, cemût che i tifôs furlans a son stâts usâts vie par dut l’an). La pression un tic plui fuarte e dal Napoli e ven premiade dopo 37 minûts cun Callejon che al segne e il prin timp si siere cul vantaç dai ospits.

Tal secont timp la reazion dal Udin e je avonde smavide. E cjape sostance dome dopo dal gol dal un a un: bale robade di Pinzi che le mande indenant in direzion di Bruno Fernandes e conclusion a segn dal zovin portughês. Di chel moment l’Udin al cres e il Napoli al cale e a un cuart di ore de fin al rive ancje un gol di Muriel, che però al ven anulât justementri parcè che si cjate in fûr zûc.

Finude la partide, i esperts de moviole a disaran che ancje il gol di Bruno Fernandes nol veve di jessi convalidât. Forsit chest al è just cul voli eletronic e cui replays: cuntun voli uman al jere dificil inacuarzisi di cheste eventuâl iregolaritât, che insom no i regale nuie al Udin e no i gjave nuie al Napoli. Un pont par on par dôs scuadris che vie pal an a àn fat viodi ancje alc di miôr e magari cussì no, in particolâr pal Udin, ancje alc di piês.

Udinese – Juventus 0-2

udin_neri

 

In tancj si spietavin une prove di caratar dal Udin cuintri di une Juve che te partide di Turin, te prime part dal campionât, i blancs e neris furlans a vevin rivât fintremai a fâi un tic di pôre.
La scuadre di Guidolin no veve nuie ce pierdi e dut ce vuadagnâ, presentantsi denant dai gobos cuntune muse vierte e cun energjie e snait.
Pal Udin al sarès stât dificil vinci, ma al sarès stât biel almancul mostrâ di provâi, no dome par meti ancjemò un pôc di pevar al campionât, ma ancje – e soredut – par dâur une sodisfazion inmediade ai siei tifôs e par lassâ a ducj un tic di sperance pal avignî. Invecit, la scuadre di balon furlane e à mostrât la sô muse piês: flape, lente, cence snait e cence gjambis, cûr e cjâf.
I blancs e neris a àn fat la vitime sacrificâl de Juve, cence nancje imbastî cualchi forme di oposizion, di resistence e di reazion, fale che il pâl cjapât di Muriel tal recupar finâl.

Il scheme al è simpri chel, 3-5-1-1, cun Di Natale prime e uniche ponte, dibessôl e impegnât plui che altri a porconâ e a lamentâsi, cemût che al sucedeve un pôcs di mês indaûr. Ta chei altri reparts, nuie in particolâr che al mereti marcât: la difese no se gjave nancje masse mâl, ancje se e patìs il dinamisim di Giovinco, intant che la mediane e ven metude in zenoglons dal strapodê dai varis Pirlo, Pogba e Marchisio, che a cjatin ancjemò plui spazis par vie de zornade no di Pereyra e Gabriel Silva.

Par cuindis minûts nol sucêt cuasit nuie, dopo al rive il gol di Giovinco, che al met fûr cause Scuffet cuntune biele parabule e zovantsi ancje de posizion di diviers zuiadôrs che i taponin la viste al puartîr furlan. Di chel moment, la Juve e devente parone de partide, e segne il secont gol cun Llorente e si met te sachete incuintri e risultât.
Ce che al mostre l’Udin, par mudâ la situazion, al è masse pôc e masse scjars, ancje ator de fin dal prin timp, cuant che al vuadagne cualchi metri di cjamp e si svicine des bandis di Buffon.

Tal secont timp la musiche e reste chê, ancje cuant che Guidolin al decît di butâ dentri Muriel, par dâi une trazion ofensive plui marcade ae sô scuadre. Nuie ce fâ e no dome par merit de Juve.
E podeve jessi une serade memorabile, e je stade une serade di dismenteâ. O, miôr, une serade di visâsi par che no’nt sedin plui altris compagnis.

Fiorentina – Udinese 2-1

 

udin_neri

L’Udin al piert doi a un a Florence. La scuadre furlane e fâs une partide a corint alternade, cun moments di dinamisim indenant, durmidis in ducj i setôrs e soredut in difese e scjarse capacitât di tirâ in puarte. Cence Di Natale, Guidolin al manten il solit 3-5-1-1, cun Muriel prime ponte, intant che la Fiorentina e fâs valê la sô buine cundizion tecniche e tatiche e soredut si zove de potence di Cuadrado, dai erôrs difensîfs dal Udin e di un regâl dal diretôr di gare che al sivile un rigôr che clamâlu discutibil al è fâi un compliment.

La scuadre di Montella e cîr di imponi za sul imprin la sô predominance, ma l’Udin al mostre di no vê pôre de Fiorentine. Si viôt daurman che Cuadrado al sarà un dai protagoniscj dal incuintri, ma ancje Bruno Fernandes al mostre che al è in zornade sì.
La “viola” e masane zûc ma no rive masse dispès a dâi di lavorâ a Scuffet. Tal prin cuart di ore al sucêt dome une volte, cun Matos, ma il puartîr furlan al è tal puest just e al fâs la robe juste. L’Udin al rispuint in cuintripît, ma sot puarte nol è avonde pericolôs.

Il gol de Fiorentina al rive dopo vincjecinc minûts: Cuadrado al tire di fûr, Danilo cence volê al tocje la bale di ce che al convente par ingjanâ Scuffet e i parons di cjase a van in vantaç. Dopo un pôcs di minûts si viôt un altri viaç Muriel, ma la situazion no cambie, ni di une bande ni di chê altre.

Il secont timp si vierç cuntune cierte pression dal Udin, sburtât di Widmer e Bruno Fernandes, che al cjape sù une biele iniziative dopo trê minûts. Muriel al è masse di bessôl e nol rive a fâ alc e ce, te fasse mediane i blancs e neris a fasin zirâ la bale pal plui in orizontâl. Nol rive l’un a un e al rive il doi a zero: ancjemò Cuadrado protagonist, in aree di rigôr, che si inçopede di bessôl, denant di Danilo, e al ven premiât di Celi: penalty di Rodriguez e nuie ce fâ par Scuffet.

Il gol ur da fuarce ai parons di cjase, ma nol see lis gjambis ai blancs e neris, che a scurtin lis distancis cuntun biel tîr di Bruno Fernandes. In atac l’Udin al prove ancjemò a sburtâ, ma si vierç daûr e al met Cuadrado in cundizions di tirâ in puarte e cjapâ la travierse.
Par sù par jù dîs minûts l’Udin al zuie cun dôs pontis – al jentre Nico Lopez al puest di Badu – e cun Heurteaux al prove a cjapâ un pontut tal finâl, ma nol è nuie ce fâ: il balon si piert pôc plui innà dal pâl a man drete di Neto.

 

Friûl 2014, la fieste di une Patrie che no je ni “piçule” ni “extralarge”

22_03_014_udin_friul

La date dai 3 di Avrîl…e torne ducj i agns.  E cun chê al torne ancje il moment di fâ fieste pe Patrie dal Friûl.

In cont di cheste zornade e de sô impuartance pal Friûl, pe sô storie e ancjemò di plui pal so avignî, o vevin scrit za l’an passât.
Nus somee che chês stessis riflessions a ledin ben ancje chest an. Anzit, salacor a son ancjemò plui impuartantis e atuâls.
Us invidìn a leilis o a tornâ a leilis. Cun dut achel, i tignìn a marcâ daurman un aspiet: la “Fieste de Patrie” no je – e no à di jessi – ni nostalgjie ni mitologjie. Ni pal “Friûl in Friûl”, ni pal Friûl che al è pal Mont.

Par chest o segnalìn cualchi iniziative di chês che si davuelzin ator pal Friûl e no dome par cheste ricorence, memoreade no dome cjalant ae storie ma soredut cuntune prospetive di atualitât e di avignî.
Cheste vision dinamiche e positive si le cjate in particolâr tal program inmaneât de bande dal Comun di Udin, a tacâ dal apontament dai 3 di Avrîl, a 3 dopodimisdì, li de Biblioteche civiche “V. Joppi”, là che si davuelç une taule taronde dal titul  Friûl 2014. Datis, Storiis, Simbui, Visions .

banner0304014

Cemût che si pues lei ancje achì e achì, e vignarà fate indenant une riflession cun plui vôs: une ocasion par cognossi e ricognossi lis lidrîs de specificitât, de unitât e de unitarietât teritoriâl dal Friûl, dutun cun chês de sô specifiche pluralitât linguistiche e culturâl e in cheste suaze de specificitât e de unitarietât de lenghe furlane, e par cjapâ cussience che chês a son lis fondis de esistence e de vivarositât dal Friûl. Altris iniziativisi inmaneadis de bande dal Comun di Udin a laran inendant fintremai ai 30 di Avrîl.

Un cuadri des tantis iniziativis metudis adun ator pal Friûl  pe “Fieste de Patrie” si cjate ancje tal sît internet de Provincie di Udin.

Une maniere par restâ inzornâts su ce che si fâs in chescj dîs pe Fieste de Patrie dal Friûl e par tirâ dongje informazions e elements di cognossince e riflession su chescj argoments e je chê di lâ sul sît di Radio Onde Furlane, là che si puedin scoltâ i files audio des trasmissions dedicadis a chest inovâl e a chescj apontaments.

Altris segnalazions si cjatis su lis pagjinis Facebook de ARLeF (Agjenzie Regjonâl pe Lenghe Furlane)  e dal mensîl La Patrie dal Friûl.

Par cui che al volès fâ ancjemò cualchi aprofondiment, o segnalìn ancjemò i riferiments za indicâts l’an passât  e dongje di chei ancjemò chescj articui cjatâts in rêt:

3 di Avrîl. Sino acuilis o poleçs?
3 di Avrîl, Fieste de Patrie: un Friûl di incuintri e confront
3 di Avrîl, un Friûl diferent che al cjale indenant

Par cui che al vîf in Friûl e pai furlans pal mont l’auguri al è compagn:
Buine Fieste dal Friûl!
Buine Fieste de Patrie: une Patrie che no à etichetis, che no je ni “piçule” ni “extralarge”.

Udinese – Catania 1-0

fuarceudinees

Une altre partide brutute che e finìs ben pal Udin. Salacor, pe scuadre furlane, chê cul Catania e je une gare ancjemò piês di chê cul Sassuolo, e propit par chest il sucès finâl al è ancjemò plui impuartant. Il gol di Di Natale, a metât dal secont timp, al permet ae formazion di Guidolin di puartâ a cjase i trê ponts che a coventin par rivâ a cuote 38, intune posizion che si pues calcolâle tant che une ipoteche su la permanence inte serie A.
Dongje dal risultât, chei altris elements positîfs dal posticip di nossere a tocjin i pôcs salustris di biel zûc in atac, la buine tignude de difese e la gnove prestazion positive di Simone Scuffet.

Il prin timp al mostre un Catania ben metût tal cjamp cun trê pontis, la difese a cuatri e la linie mediane a trê, che al scugne sburtâ indenant par cirî di vierzi la partide a so bon pro. L’Udin al à il solit 3-5-1-1, cun Di Natale e Nico Lopez in atac, e rispiet ae scuadre aversarie al palese un nivel di vivarositât plui bas. Tai prins dîs minûts nol sucêt nuie, dopo a rivin trê conclusions dai sicilians: un prin tîr di Plasil cun Scuffet che al mande la bale in corner, un secont tentatîf ancjemò di Plasil cuntune gnove rispueste ancjemò di Scuffet e tai disvilups dal intervent dal puartîr furlan il tîr di Bergessio cun Allan che al salve la puarte dal Udin.

Il prin tîr in puarte dal Udin, cun Basta, al rive sù par jù dopo mieze ore di zûc, ma nol è alc e ce. Il Catania al continue a jessi il potagonist de partide, intant che la scuadre furlane si limite a zuiâ in difese. Cun dut achel, par vie di un erôr di Gyombar, i blancs e neris a àn ancje une biele oportunitât par lâ in gol, ma Di Natale nol rive a profitâ cemût che al covente, e prime de fin dal prin timp al fâs compagn Nico Lopez.

Tal secont timp il Catania al è mancul agressîf, ma l’Udin almancul sul imprin nol cambie il so ategjament avonde smamît in cont de partide. L’efiet positîf de jentrade di Bruno Fernandes al puest di Nico Lopez si lu viôt plui indenant, cuant che ancje Andujar al scugne mostrâ di jessi atent.

La incressite relative de pression ofensive dal Udin e puarte al gol di Di Natale: Fernandes al mande in profonditât Pereyra che le met tal mieç par Totò che al segne cul cjâf.
Il gol i da fuarce al Udin e al mande in crisi il Catania, che al torne a fâsi viodi des bandis di Scuffet dome te ultime part de partide, ma nol è nuie ce fâ ni par Monzon ni par Bergessio ni par Barrientos: Sant Simon di Remanzâs al è simpri tal puest just al moment just e al da la sô benedizion ae vitorie finâl.