Prin di Mai e Sa Die de Sa Sardigna + Tazenda + Joseba Tapia + Mans De Bresh + Gwenno + Transjoik = Babêl Europe 9/2019

Ancjemò zornadis impuartantis di memoreâ, tra storie e atualitât. La pontade numar 9 dal 2019 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane, e rive juste inte setemane dal Prin di Mai, Fieste dal Lavôr, e pôcs dîs dopo de Sa Die de Sa Sardigna, la fieste nazionâl sarde, e des elezions politichis fatis domenie stade intal Stât spagnûl. Par chel la scjalute de trasmission e tignarà dentri la musiche dai sarts Tazenda, dal cjantautôr ocitan Mans De Breish e dal musicist basc Joseba Tapia.

Cun di plui il percors proponût di di Babêl Europe al cuvierç ancje Gales, Cornualie e Sapmi, cu la musiche di Gwenno e dai Transjoik.

Ancje cheste pontade di Babêl Europe si pues scoltâle sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.
Dopo des trê emissions de setemane ancje cheste trasmission si podarà tornâ a scoltâle in podcast cun Spreaker e cun Spotify.

Atalanta – Udinese 2-0

La Atalanta e je une des scuadris miôr dal campionât e lu conferme ancje cuintri dal Udin, che si presente a Bergamo cul obietîf categoric di tignî bot denant dai aversaris e di scombati par jonzi un risultât positîf.

Par une otantine di minûts la formazion di Tudor e rive a lâ daûr di chel obietîf. La Atalanta e je plui presinte in atac ma su lis conclusions di Gosens, di Zapata e di De Roon Musso al è simpri tal puest just e al fâs la robe juste che e covente. L’Udin al rispuint in cuintripît e al met adun cualchi conclusion.

Tal prin timp la plui pericolose e je une pinelade di Lasagna che si distude fûr bersai di pocjissim. Te seconde frazion, che in gjenerâl e à un ritmi plui bas, al è De Paul chel che si svicine al gol, cuntun tîr di fûr che al sbat cuintri dal pâl. Daûr de regule no scrite dal zûc dal balon che e dîs che cuant che, magari ancje dome pe sfortune, no tu rivis a fâ rindi inte maniere miôr une ocasion golose dopo a rivin a segnâ i tiei aversaris, tai ultins dîs minûts i parons di cjase a rivin a fâ valê la lôr predominance teritoriâl.

Magari cussì no la Atalanta e ven judade di une ingjenuitât di Sandro che inte aree di rigôr al fâs fal su Masiello: Giacomelli al sivile e De Room al tire e al segne. Cuatri minûts plui tart Pasalic al cjate la bale juste par bati Musso cuntune biele conclusion che si zove ancje de deviazion involontarie di Nuytinck. Al è il colp dal kappaò: l’Udin nol rive a reagjî e i parons di cjase si svicinin ancje ae tierce segnadure.
Sabide cuintri de Inter l’Udin al scugnarà jessi ancjemò plui atent e plui concret.

Sport furlan di sucès, cu la vitorie di nossere il Pordenon al è za sigûr di lâ sù in serie B

Inte stagjon 2019/2020 il Pordenon e zuiarà il campionât talian di serie B. La scuadre di balon furlane e à concuistât chest risultât storic cun trê zornadis di anticip in graciis dal sucès di nossere par 3 a 1 sul Giana Erminio.

Sburtade dai 3 mil tifôs che a àn jemplât il stadi Bottecchia, la formazion nere e verde e à fissât il risultât za tal prin timp. A vierzi il cont dai goi al è stât Candellone al 13′, intant che Ciurria al 32′ al à puartât i parons di cjase sul 2 a 0. Doi minûts plui tart Perna al à scurtât lis distancis, ma al 38′ Barison al à metût dentri il gol dal 3 a 1 che al è restât compagn ancje tal secont timp.
La seconde frazion e je tacade cuntun cuart di ore di ritart par vie des cundizions dal cjamp di zûc, imbombât al limit de praticabilitât par vie de ploie bondante. Dopo altris cuarantecinc minûts di passion si à discjadenade la fieste dentri e fûr dal stadi cui tifôs che si son spostâts tal centri de citât là che si son zontâts cun chei che, cundut de ploie, a vevin cjalât la partide intal schermi gjigant metût fûr in place Sant Marc.

La fieste e à fat passâ par un pôc in secont plan la pôre che la scuadre e lassi la citât. Il president Mauro Lovisa, che al à cjapât in man la societât intal 2007 cuant che il Pordenon al zuiave in Ecelence, al à fat capî che a son saltâts fûr diviers elements positîfs sei par fâ sù a Pordenon un stadi adat par un campionât di serie B, sei par infuartî la societât e mantignîle in Friûl, dopo che par cualchi timp e zirave fintremai la gnove di une pussibile – e pardabon une vore discutibile – fusion cul Trevîs.

Diviersis istituzions, e no dome a Pordenon, a àn mostrât interès pal progjet di rinfuartiment de societât nere e verde, che tra lis altris juste tal 2020 e finìs cent agns de sô fondazion, ma si spiete di capî se ancje i imprenditôrs locâi a saran bogns di puartâ il lôr contribût. In particolâr Lovisa al à chê di fevelâ cu la famee Pozzo par viodi di imbastî un percors che, in plui di poiâsi sul stadi Friûl fintremai che Pordenon nol varà une struture adate ae serie B, al cjali ancje a di une colaborazion cul Udin par ce che al tocje i zuiadôrs de scuadre.

Sperìn che la robe e ledi indenant inte maniere juste e soredut che il Pordenon al sedi la uniche scuadre di balon furlane a zuiâ in serie B te stagjon 2019/2020.

bandieris

La Fieste de Liberazion di vuê, la Resistence di ducj i dîs. Buine Zornade dai 25 di Avrîl

Partigjans

Vuê e je la zornade dai 25 di Avrîl. Chest an al è ancjemò plui impuartant memoreâ la Fieste de Liberazion. Cul aiar che al tire, ator par Stât talian e ancje inaltrò, al è impuartantons jessi “plens” di memorie in cont di ce che al è stât, di cui che al à fat ce e parcè e cemût e duncje “plens” di cussience storiche, civiche e democratiche.

Resistence, Liberazion, Costituzion, Democrazie no son – e no àn di jessi – peraulis vuedis. No je dome une cuistion di memorie storiche, che magari cussì no e ven mistificade simpri plui ancje (e soredut) de bande dai rapresentants des istituzions republicanis. E je ancje une cuistion di cussience e di sensibilitât civiche, sociâl, politiche e umane.
Cognossi e ricuardâ al vûl dî savê, capî e stâ in vuaite, pronts a fâi cuintri al fassisim e al nazisim, in dutis lis lôr manifestazions, e duncje a dutis chês formis di bausie, di injustizie, di prevaricazion, di violence, di intolerance, di razisim, di fanatisim nazionalist che a tornin a fâsi indenant.

Fâ fieste pai 25 di Avrîl al vûl dî jessi pronts, ognidun, a puartâ indenant la nestre Resistence di ogni dì.Cussi fâ fieste pe Resistence e pe Liberazion al è un dirit e salacor ancje un dovê. Un dovê di memorie e di ricognossince par cui che al à lotât cuintri dal fassisim e dal nazisim. Un dovê di atenzion e cussience in direzion di ce che al sucêt tal mont e te chês piçulis parts di mont là che si cjatìn a vivi. Un dovê di solidarietât cun cui che achì o inaltrò al lotte, al scobant e al resist.

Buine zornade dai 25 di Avrîl, fieste civiche taliane, fieste furlane, fieste europeane, fieste umane.

Buine Resistence.

 

Udinese – Sassuolo 1-1

Miôr che cuintri de Lazio, ma ancjemò masse pôc sul plan dal zûc, dal caratar e de tignude atletiche. Cul Sassuolo l’Udin nol piert, al cjape un gol, a’nt segne un altri e al puarte a cjase un pont, che al devente pesantonon soredut in graciis dal fat che l’Empoli al piert cu la Spal e al reste indaûr. L’obietîf minim al jere chel di fermâ la gnove tindince a pierdi, tornade in vore cu lis dôs partidis di Rome, e al è stât jonzût, però al covente fat par sigûr alc di plui e alc di miôr. Tant a dî che pe vere resurezion blancje e nere si scugnarà spietâ che e passi la Pasche.

L’Udin si spresente sul cjamp dal Stadi Friûl cun Musso in puarte, cu la difese a trê cun De Maio, Ekong e Samir, cun Mandragora tal mieç dongje di Fofana, dai laterâi D’Alessandro e Larsen e di De Paul, proietât indenant a sapontâ la cubie di atac formade di Pussetto e Okaka. La partide si vierç cence grandis emozions: lis primis conclusions di Okaka, De Maio e Berardi a son fûr bersai.

Cul passâ dal timp il Sassuolo al incres la fuarce des sôs verticalizazions in velocitât e juste passade la prime mieze ore di zûc i emilians a imbastissin une azion di cuintripît che e met Sensi, su assist di Berardi, tes cundizions di sbusâ la puarte difindude di Musso. La reazion dal Udin e je avonde flape e Consigli nol à nuie ce fâ fint aei fin de prime frazion.

Dopo de polse l’Udin al somee un tic plui decîs in atac e il sburt su lis corsiis esternis di D’Alessandro e Larsen al tache a rindi alc, ancje se des bands di Consigli nol rive ancjemò nissune bale pericolose. Dopo une conclusion pôc precise di Berardi, Tudor al cambie De Maio cun Lasagna cul intindiment di incressi la pression ofensive. L’atacant di San Benedetto Po al impegne Consigli e al fâs bogns moviments cu la bale e cence. A provin a tirâ in puarte, ma cence ni precision ni fortune, ancje Pussetto e De Paul.

La azion plui pericolose dai parons di cjase e rive juste prime dal ultin cuart di ore de partide cuntune combinazion tra Okaka, Pussetto e De Paul, che e ven neutralizade dal intervent di Demiral . Il gol de paritât al rive cinc minûts plui tart cuntun corner che al cree confusion te aree dal Sassuolo e une conclusion di Okaka che si zove ancje de deviazion di Lirola. La intensitât e cres tal finâl cul Sassuolo che al prove a cirî di tornâ in vantaç in particolâr cuntun cross di Duncan par Berardi che però nol rive a sierâle inte maniere miôr. L’Udin si difint e la paritât e ven garantide fint insom.

Lazio – Udinese 2-0

L’Udin al torne a Rome pal recupar di campionât cuintri de Lazio, ma si dismentee di zuiâ. La formazion metude in cjamp di Tudor cuintri dai blancs e celescj e somee une fantasime in confront cun chê che e veve zuiât sabide cuintri de “maggica”. Chê furlane e je une scuadre flape, smamide e salacor rassegnade e par chel destinade a pierdi.
La Lazio e fâs il so e dopo vincj minûts al rive il gol di Caicedo al 21′. Cun di plui, almancul dal pont di vite dl Udin, e je ancje un tic di sfighe, stant che trê minûts plui tart i parons di cjase si zovin ancje dal autogol di Sandro.
Tal secont timp la formazion furlane e prove a fâ alc di plui, ma cence grancj risultâts. La ocasion miôr par tornâ a vierzi la partide le à De Paul che però si fâs parâ il rigôr causât di un fal di Lulic su Lasagna.
Sierade malamentri la gnove trasfierte romane, cumò l’Udin nol pues permetisidi fâ pas fals, a partî dal scuintri diret in program sabide cul Sassuolo.

Familia Caamagno + Une Patrie che e cjante + La Gossa Sorda + Maladecia + Galwad y Mydydd = Babêl Europe 8/2019

Une gnove pontade di Babêl Europe cuntune novitât discografiche frescje frescje de Galizie e cun selezions musicâls che ator pal spazi e pal timp a rivin ancje dal Gales, dai Paîs Catalans, de Ocitanie e dal Friûl, par ricuardâ la Resistence e la Fieste de Liberazion e par dâ cont, ancje se in struc, de iniziative Une Patrie che e cjante, che si à davuelte vinars stât a Tavagnà.
Il program cuindisinâl dedicât a lenghis, musichis, minorancis e nazions cence stât, che al cjate spazi intal palinsest di Radio Onde Furlane al torne inte setemane di Pasche – vuê, martars ai 16 di Avrîl, in direte a 11 a buinore e po in repliche doman, miercus ai 17, a une dopo di misdì e ancje sabide ai 20 a une e mieze – e al promet ancjemò une volte di frontâ argoments interessants e di proponi musiche babeliche di cualitât.

La gnove produzion che e vignarà presentade juste pôcs dîs dopo de sô scree uficiâl, fate sabide passade a Sant Jacum di Galizie / Santiago de Compostela, e je il disc gnûf de Familia Caamagno, Había que Intentalo, une racuelte di cjançons par galego che e conferme la capacitât dal grup di messedâ cun snait ritmis e melodiis, tra rock’n’roll, beat, pop e surf.
E sarà ancje la ocasion par scoltâ i valenzians La Gossa Sorda
, i pionîrs dal folk rock psichedelic par galês Galwad y Mynydd e i Maladecia, grup des Valadis Ocitanis dal Piemont che tal so repertori al à ancje une cover di un toc di une formazion storiche che e ven simpri di chês bandis, L’Estorio Drolo, dedicât a un partigjan de Val Maira.

Cun di plui al sarà spazi ancje par une cerce dal incuintri tra diviersis gjenerazions di musiciscj furlans, inmaneât la setemane stade inte suaze des manifestazions pe Fieste de Patrie dal Friûl.

Si pues scoltâ Radio Onde Furlane e duncje Babêl Europe sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.

Roma – Udinese 1-0

Par latin si disarès “quartum non datur”. La serie positive dal Udin screade cu la gnove rivade di Tudor tant che alenadôr si ferme a Rome, almancul par ce che al tocje i risultâts. Cuintri de “maggica” i blancs e neris a zuin une partide discrete, massime vie pal prin timp e po ancje sul imprin de seconde frazion. Pe plui part de partide l’Udin al somee plui ordenât e concret dai parons di cjase che salacor ancjemò plui de scuadre furlane ur covente fâ ponts e soredut cirî di vinci ma a palesin cualchi dificoltât di struture che a rivin a comedâ dopo de polse. Ae fin la scuadre di Ranieri e cjate la strade dal gol cun Dzeko e si puarte a cjase ducj i trê ponts a disposizion che i coventin par tornâ a sperâ di gafâ une des posizions in graduatorie che a van ben par lâ in Champions League. Al Udin a restin il marum par no vê rivât a cjapâ almancul un pont e la cussience che miercus ancjemò a Rome cuintri de Lazio al varà di fâ alc di plui e di miôr.

I blancs e neris si presentin cun Musso in puarte, cu la difese a trê componude di De Maio, Ekong e Samir, cun Fofana e Mandragora tal mieç, compagnâts tes corsiis laterâls di Larsen e di D’Alessandro e plui indenant di De Paul, in jutori des dôs pontis Okaka e Lasagna. Ranieri al mande a scombati Schick e Dzeko, cu la sperance di viodi l’atacant bosgnac che al torni a segnâ dopo un an a dizun, cul El Sharaawy mieze ponte laterâl a çampe, cun De Rossi a dâi cûr a dute le scuadre, poiât inte mediane dal furlan Cristante, e cuntune tierce linie inedite fate sùù ator di Jesus e Marcano.

L’Udin al partìs cul pît just e al profite dal fat che la Rome e je involuçade e clopadice. I blancs e neris si fasin vîfs daurman des bandis di Mirante cun De Paul che al tire fûr bersai, cun Mandragora che al impegne il puartîr romanist e cun Lasagna che nol cjate la puarte. La formazion furlane e fâs un bon pressing sui zuiadôrs che a varessin di inviâ lis azions aversariis e par passe vincj minûts la Rome no rive a cumbinâ alc e ce, intant che une combinazion tra De Paul e Lasagna e ven neutralizade di Manolas.
Il ritmi nol è masse alt, la ploie e aumente e al devente simpri plui dificil zuiâ di fin. I parons di cjase a rivin a fâ alc di plui sù par jù ator de prime mieze ore di zûc cuntun scat di Zaniolo, cuntun cross di Dezeko par El Shaarawy, che al tocje cul cjâf ma nol cjate la puarte, ancjemò cuntune conclusion dal zuiadôr di divignince egjiziane fermade di Musso, che al torne a jessi protagonist suntun tentatîf di Marcano, e cun Schick prime de polse.

La seconde frazion si vierç cu la fisionomie tatiche de Rome che e ven mudade di plante fûr, cu lis sostituzions di Schick e di Jesus cu la jentrade tal cjamp di Pellegrini e di Florenzi e cul passaç dal 4-4-2 al 4-2-3-1. L’Udin al manten la sô muse e il so ategjament positîf cul efiet di impegnâ Mirante cun Okaka, cuntun tîr cross di D’Alessandro e cuntune conclusion cul cjâf di De Maio che , magari cussì no, si distude sul pâl.
La Rome e prove a rispuindi, prime cuntune iniziative di Cristante che no cree problemis a di nissun e po cuntun pâr di conclusions, une fermade di Musso e chê altre salvade di Fofana. Al rive cussì il gol di Dzeko che si cjate tal puest just tal moment just e sul fîl dal fûr zûc al profite inte maniere miôr di un biel assist di El Shaarawy, intant che la difese furlane si foerme forsit par un ecès di fairplay denant dal infortuni di De Rossi.

La Rome e difint il vantaç, e piert De Rossi che al scuen lâ fûr e si siere indaûr. L’Udin al prove a dreçâ la partide cun Tudor che al met dentri daurman Pussetto al puest di D’Alessandro e po ancje Teodorczyk par De Maio. La reazion dai blancs neris e je buine in tiermins di cerviel e di cûr, ma Mirante nol à masse fastidis e cussì e rivin lis trê siviladis di Di Bello e a fasin fieste dome i tifôs dai zâi e ros.

Udinese – Empoli 3-2

Soference e sodisfazion. Dopo de vitorie cul Genoa e de paritât cul Milan, l’Udin al torne al Stadi Friûl, al scombat, al spude balins e al vinç ancje cul Empoli. Grancj protagoniscj De Paul, che al firme doi goi e al fâs assists e moviment, e Okaka, che in cualchi maniere al met la sô çate in ducj i goi, intune scuadre che in gjenerâl e mostre di vê cûr e cerviel. Bielonone ancje la atmosfere dal Stadi: ancjemò cun tantis bandieris dal Friûl dapardut e cuntune curve nord che e memoree la Fieste de Patrie. Une sorte di esorcisim coletîf cuintri dal diaul dal efiet Mer…Dacia Arena che al sburte inte maniere miôr la scuadre a vuadagnâ altris trê ponts di aur su la strade viers de salvece.

Chê di vuê e je une disfide tra dôs scuadris che a scugnin fâ ponts e par chel a scugnin zuiâ. Si lu viôt fint dal imprin: i blancs e neris a son atents, dinamics e vivarôs e al mostre une muse compagne e salacor ancjemò miôr ancje l’Empoli. Dutis dôs lis formazions si presentin cul 3-5-2. La scuadre furlane e viôt Musso in puarte, Opoku, Ekong e Samir in difese, Mandragora tal mieç denant de tierce linie, dongje di Fofana e De Paul, che al sta daûr de cubie di atac formade di Okaka e Lasagna, cun Stryger Larsen e Zeegelaar cursôrs laterâi. L’Empoli al rispuint cun Farias e Caputo a scombati, sapontâts di Bennacer, di Krunic e di Pajac.

Il ritmi al è decîs, la partide e je daurman divertente e emozionante. I ospits a somein in stât di meti adun un zûc corâl che al è biel di viodi e ancje produtîf. L’Udin si môf dilunc des liniis verticâls, poiantsi, almancul in principi, plui su iniziativis individuâls che su manovris coletivis. L’Empoli al segne dopo undis minûts – e dopo un prin tentatîf in vierzidure di Farias fermât di Musso – cuntun scheme inviât di Bennacer su punizion e perfezionât di Krunic par Caputo che al sbuse la puarte dal Udin. Trê minûts plui indenant i parons di cjase a drecin la situazion cun Okaka che al fâs cuarante metris di cjamp cu la bale tai pîts e al libere De Paul che al disegne la parabule juste par superâ Dragowski.

La paritât riconcuistade e sburte l’Udin in direzion dal vantaç, cui tentatîfs di Lasagna – cun Dragowski che al pare – e di Stryger Larsen, ispirât di De Paul, che al tire fûr bersai, ma il sorpàs lu fâs l’Empoli cun Krunic che al siere inte maniere miôr une triangolazion imbastide cun Caputo.
I blancs e neris no molin e a provin daurman a tornâ a meti i numars in paritât ancjemò cun Lasagna, che però la sô conclusion no cjate il spieli de puarte, intant che l’Empoli nol cambie ategjament tatic e ju oblee a stâ in vuaite ancje indaûr.

Te ultime part dal prin timp De Paul e Lasagna a tornin al atac de puarte di Dragowski, ma no rivin a metile dentri. Cundut achel a rivin a meti in agjitazion la difese dal Empoli, cun Maietta che tal mieç te aree di rigôr al colaude la elasticitât dal tessût de maie di Lasagna, Orsato al sivile e dal discut De Paul nol perdone. Prime de polse al rive ancje il vantaç de scuadre furlane: punzion di De Paul, bariere che e pare indaûr il balon e Mandragora che lu recupare e lu tire là che Dragowski nol rive a tocjâlu.

La seconde frazion e va dilunc cun chel stes ritmi. L’Empoli al à voie di recuperâ, l’Udin no si sente e al prove a jessi ancjemò pericolôs. A rivin cussì i tîrs fûr bersai di De Paul e di Krunic, la iniziative di Opoku e il salvament di Stryger Larsen suntune azion di corner e la biele paradone cul pît fate di Musso su Antonelli, che inte contabilitât de fin de partide e varà un valôr speciâl.

Ancjemò prime de metât dal timp Zeeglaar al cjape la seconde amonizion e al ven parât fûr di Orsato. Cuntun om di mancul Tudor al scugne clamâ fûr Okaka e fâ jentrâ dentri De Maio par tirâ sùù lis baricadis. A passin i minûts, la difese blancje e nere e ten bot e l’Udin si svicine al cuart gol, cuntune bale di aur di Samir par Fofana che l’ivorian nol rive a butâle dentri. L’Empoli al va ae ricercje dal gol dal trê a trê cun Di Lorenzo e cun Farias, che però, par fortune, no son masse precîs e cuant che lu son a cjatin Musso tal puest just tal moment just.
Si zuin ancjemò cinc minûts di recupar cui blancs e neris che a strenzin i dincj e che a mantegnin il vantaç fin ae fin: trê goi fats, trê ponts cjapâts, tantis emozions, tante soference e tante sodisfazion.

Friûl, Patrie di ducj. Buine Fieste de Patrie dal Friûl (ancje pal 2019)

La Fieste de Patrie dal Friûl e je une fieste impuartante sei pal Friûl che al è in Friûl sei pal Friûl che al è pal mont.

Memoreâ l’inovâl de invistidure dal patriarcje di Aquilee Siart, che ai 3 di Avrîl dal 1077 al riceveve de bande dal imperadôr Indrì IV il titul di «Comes Fori Julii, Dux et Marchio», al è une ocasion di fieste e di riflession che e tocje il Friûl che al è in Patrie e chel che al è ator pal mont.

Ricuardâ il moment che il Patriarcjât di Aquilee al deventave, inte suaze dal Imperi, un «stât» par so cont nol vûl dî vê nostalgjie pe ete di Mieç. Al vûl dî vê cussience de unitât storiche e gjeografiche dal Friûl, dutun cu la sô specifiche pluralitât linguistiche e culturâl e in cheste suaze cu la peculiaritât e cu la unitarietât de lenghe furlane, e duncje cjalâ indenant, viers il Friûl (in Patrie e ator pal mont) dal dì di vuê e viers il Friûl (in Patrie e ator pal mont) di doman.

Cun di fat, cognossi e ricognossi la unitât storiche e gjeografiche dal Friûl, la sô specifiche pluralitât linguistiche e culturâl, la peculiaritât e la unitarietât de lenghe furlane e la vocazion storiche e salacor naturâl dal Friûl a metisi in relazions cul rest dal mont al è une afermazion positive di identitât, di unitât e di comunitât che ur zove a cui che al vîf in Friûl e a cui che, di divignince dal Friûl, al è a stâ inaltrò pal mont, e che e varès di judâ chei e chei altris a cognossisi e a ricognossi miôr e a cognossisi e a ricognossisi miôr tant che part di chê stesse unitât, plurâl, composite, articolade ma unide, cuntun passât in comun daûr e soredut cuntun avignî di spartî, di inventâ e di vivi devant.

lengate12

Soredut par cui che al è pal mont la Fieste de Patrie dal Friûl e je la fieste di une Patrie cence confins, di un Friûl che al à cussience di se e nol à pôre des sôs specificitâts e de sô alteritât e che par chel al domande rispiet e al fâs indenant rivendicazions di dirits, di libertât e di identitât cence sudizion e cence vê pôre di chei altris e dai lôr dirits, de lôr libertât e des lôr identitâts.

L’auguri par dutis e par ducj al è, ancje pal 2019, che la Fieste de Patrie e sedi pardabon une ocasion di riflession, di cognossince e di condivision. Par resonâ in cont dal Friûl di vuê e dal so avignî, de sô pluralitât linguistiche e culturâl e de sôs relazions cul rest de Europe e dal mont. Par cognossi e ricognossi la dimension teritoriâl unitarie dal Friûl, la complessitât de sô storie e de sô identitât e la impuartance des sôs diviersis specificitâts. Par spartî ideis, cognossincis e cussience.

La Fieste de Patrie dal Friûl, ancje tal 2019, e je la Fieste di une Patrie che e je di ducj, inclusive, plurâl e rispietose. E par chel e je une Fieste di ducj e par ducj. Di ducj e par ducj chei che i tegnin al Friûl, ae sô unitât teritoriâl, ae sô pluralitât linguistiche e culturâl, ae sô esistence, ae sô resistence e al so avignî.

E je la fieste di une Patrie che par chel no à ni agjetîfs ni etichetis.
E je la fieste di une Patrie che no je ni «piçule», ni «extralarge».
E je la nestre fieste.

Buine Fieste de Patrie a dutis e a ducj!
Al Friûl che al è in Friûl e al Friûl che al è pal Mont.
Cun lidrîs saldis e fuartis e soredut cun tancj butui colorâts.