Udinese – Sampdoria 1-0

Un prin timp al atac e une seconde frazion di resistence. L’esordi dal Udin in cjase al è bon, almancul in part pe cualitât, ma soredut pal caratar, pal risultât e pe prestazion di cualchi zuiadôr. Cuintri de Sampdoria i blancs e neris a scombatin, a fasin zûc, a corin e a tegnin bot cuant che al covente difinidisi dai aversaris, che tal secont timp si dismovin e a deventin pericolôs.
Chê de scuadre di balon furlane, e je une vitorie buine e juste. Par sigûr un biel pas indenant rispiet ae prime di campionât cul Parma e ancjemò di plui se si fâs un confront cu la partide di Cope Italie cul Benevento. Al è par sigûr cetant ce fâ, ma juste ae fin de zornade de muart di Carletto Della Corna, il mitic puartîr blanc e neri de dople promozion de serie C ae serie A, che al è stât onorât cuntune buine prove de scuadre, usgnot ai Riçs si à respirât un aiar diferent: un aiar di Stadi Friûl. Sperìn che e sedi dome la prime di tantis voltis, vie pe gnove stagjon.

La partence dal Udin e je buine: il 4-2-3-1 di Velasquez al somee plui un 4-3-3, che tal moment di difindisi si stramude in 4-5-1. Denant di Scuffet a son Ekong e Nuytinck tal mieç, Larsen a man drete e Samir a man çampe, la mediane e je formade di Mandragora, Fofana e Berhami, al puest di Barak, e in atac dongje di Lasagna al è spazi par De Paul e Machis. I blancs e neris a frachin daurman il pedâl dal aceleradôr e i fasin pesâ ae Sampdoria la lôr superioritât teritoriâl.
Dopo di un tentatîf fûr bersai di Machis e di un biel tîr di Fofana, parât di Audero, al rive il gol di De Paul, che al profite ancje di une durmide coletive de difese sampdoriane. La seconde segnadure in campionât dal argjentin e marche l’inviament di une fase di zûc a sens unic: Udin in atac e ospits sierâts indaûr.
Lis ocasions par incressi il vantaç no mancjin, cun Lasagna, cun Berhami, cun Machis e cun Fofana, ma un pôc al è brâf Audero a meti blecs ca e là e un pôc a son pôc precîs i zuiadôrs blancs e neris, in particolâr Lasagna, che nol rive a concretizâ inte maniere miôr dôs ocasions golosis.

Tal secont timp la musiche cambie. Vie pal interval Giampaolo al à di vê fat sunâ la svearine e la Sampdoria e somee pardabon une altre scuadre: svelte, dinamiche e cun personalitât. Dongje di un tîr di Mandragora tal imprin de seconde frazion, tal cuader dal cronist al è spazi dome pes conclusions dai ospits. La prime e je chê di Defrel che ur fâs vignî i sgrisui ai tifôs furlans, cuntun tîr che al sbat cuintri dal pâl. Plui tart a rivin chês di Bereszynski, di Kownacki e di Linetty, che Scuffet ur rispuint cun atenzion e cun mistîr.
L’Udin al somee sfladât e al dopre dutis lis sôs energjiis dome che par difindisi. Lu fâs cun sintiment, cul cûr e ancje cuntun tic di fortune e cussì al rive a mantignî il vantaç e a puartâ a cjase ducj i trê ponts a disposizion.

Advertisements

Mauresca Fracas Dub + Balt Hüttar + Cyres Matthews + Imlé + un ricuart di Aretha Franklin = Babêl Europe 17/2018

A mancjin pocjis oris ae prime emission de pontade numar 17 dal 2018 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence che al cjate spazi tal palinsest di Radio Onde Furlane vuê, martars ai 21 di Avost a 11 a buinore in direte, e po in repliche ancje doman, miercus ai 22 a une dopo di misdì, e sabide ai 25 ancjemò a une e mieze.

Vie par cheste trasmission al sarà spazi pe atualitât e pe storie, tra gnovis produzions, omaçs e ricuarts. In particolâr si podarà scoltâ une altre cerce di Big Sur, l’album gnûf dai Mauresca Fracas Dub, saltât fûr cuatri te prime part di chest an, là che il grup di Montpelher al misclice cun risultâts interessants la lenghe ocitane, chê francese, il reggae, il raggamuffin, il rock, il pop e il dub, e di Trinkh Met Miar, il secont disc dai Balt Hüttar, formazion che e rive des bandis di Slege/Asiago e che e cjante par cimbar e par talian, a scjavaç jenfri folk, rock e epic metal.

Dentri di Babêl Europe si ricuardarà ancje Aretha Franklin, la regjine dal soul, che e je muarte la setemane stade, cuntun omaç scalembri gjavât fûr dal repertori classic dai bascs Negu Gorriak. Il viaç babelic al tocjarà ancje la Irlande cu la musiche dai Imlé  e il Gales cuntune cjançon di Cerys Matthews, za cjantante e ghiariste dai Catatonia e di passe cuindis agns impegnade intun progjet solist.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di cheste setemane e vignarà archiviade su internet, cun Spreaker e cun Spotify.

Parma – Udinese 2-2

Doi goi fats, doi goi cjapâts e un pont in classifiche. Massime se si ten cont di cemût che e je lade la partide, il belanç dal esordi in campionât dal Udin al è avonde positîf. A Parma la scuadre di balon furlane e rive a sfrancjâsi almancul in part de brute figure fate une setemane indaûr in Cope Italie cul Benevento. Cuintri de formazion di mister D’Aversa i blancs e neris a palesin plui di cualchi dificoltât, ma a mostrin ancje di vê almancul un pôc di snait e un pôc di cûr. Cussì, sot di doi goi dopo sù par jù une ore di zûc, l’Udin te ultime mieze ore al rive a ribaltâ la situazion e fintremai al riscje di vinci juste tal ultin.

La scuadre di balon furlane si presente sul cjamp dal Tardini cul classic 4-2-3-1 di Velasquez: in puarte al torne Scuffet, la linie difensive e viôt Stryger a man drete, Samir a man çampe e Ekong e Nuytinck tal mieç; te mediane a son Mandragora e Fofana, daûr di Machis, De Paul e Barak, e in atac al è Lasagna.

Vie pal prin timp, sul plan tatic e dal caratar, si viôt che lis dôs scuadris a cirin prin di dut di no vê masse fastidis une di chê altre. Cundut achel il Parma paron di cjase al fâs alc di plui in atac, sburtât indenant dal dinamisim di Inglese e Del Gaudio. Scuffet al à il so bon ce fâ propit suntun tîr di Del Gaudio dopo dîs minûts di zûc e l’atacant parmesan al prove ancjemò plui indenant, su assist di Siligardi, ma la sô conclusion e je fûr bersai. L’Udin si fâs vîf in atac cun cualchi azion in cuintripît, cun Machis e po cun Fofana, che al impegne Sepe cuntun tîf fuart ma centrâl. La scuadre di D’Aversa e rive a capitalizâ i siei sfuarçs dongje de fin dal prin timp, che si siere cul vantaç marcât di Inglese che al controle ben, al sghiribice Nuytinck e al bat Scuffet in diagonâl.

La seconde frazion e mostre daurman un Udin che al cres in tiermins di incisivitât ofensive, ancjemò cun Machis e Fofana e po ancje cun De Paul, ancje se nissune des lôr conclusions e je tal spieli de puarte. Daûr de regule no scrite dal “gol mancjât = gol cjapât”, dopo dai tentatîfs dal Udin di sbusâ la puarte di Sepe al rive il secont gol dai parons di cjase: cross di Siligardi, intervent di Scuffet che però nol rive a fermâ la bale e Barillà che al è il plui svelt di ducj tal meti la çate e tal butâle dentri.

Doi goi di passîf a son pardabon masse. L’Udin par fortune nol mole. La sô pression ofensive e la atenzion di Clavarese, che al verifiche cul Var che Grassi al tocje la bale cul comedon tal mieç de aree di rigôr, i fasin vuadagnâ un penalty: lu tire De Paul e al segne. E je une bocjade di aiar bon pe scuadre e pai siei tifôs, che za a tacavin a sgrisulâsi e a sintî odôr di Mer…Dacia Arena.

Trê minûts plui indenant al rive ancje il gol di Fofana, che al siere inte maniere miôr une combinazion inviade di De Paul e Samir. La concuiste de paritât ur da ancjemò energjie ai blancs e neris e ur see lis gjambis ai parons di cjase. Cumò al è Sepe che al à di vuadagnâsi il pagnut par sghindâ il pericul di une sconfite. Lu fâs cun sucès suntun tîr di Lasagna e al rive a salvâ la puarte cul jutori decisîf di Gagliolo che al cjape il so puest suntune dople conclusion di Fofana e al dinee al Udin la sodisfazion di gafâ trê ponts e di completâ la “remuntada”.
E sarès stade une vitorie biele e buine, ma forsit no cussì juste pal Parma. Un pont par om e ducj cuancj avonde contents.

Domenie che e ven tal Stadi Friûl si zuiarà Udin-Sampdoria.

Udinese – Benevento 1-2

La stagjon uficiâl 2018/2019 dal Udin si vierç cuntune sconfite e cuntune eliminazion. La scuadre di balon furlane e ven butade fûr de Cope Italie de bande di un Benevento che al mostre di vê plui gjambis, plui flât, plui cûr e plui snait.

La partide e tache ancje avonde ben. L’Udin al passe in vantaç dopo sù par jù siet minûts di zûc cun Machis che al segne un biel golon suntun cross di Pezzella. I blancs e neris a gjestissin il vantaç e il Benevento si fâs vîf des bandis di Nicolas dome dopo mieze ore cuntun tîr di Coda che al cjape il pâl.

Te ultime part de prime frazion l’Udin al prove a jessi pericolôs in atac cuntun pâr di inziativis di De Paul e Mandragora, intant che i ospits a cjapin un altri pâl cuntune biele tonade di Viola.

Tal secont timp l’Udin al masane cualchi zuiade di sest e cuntune combinazion tra Fofana e De Paul al va dongje dal secont gol, cu la bale tirade dal argjentin che e finìs di un et fûr de puarte difindude di Puggioni. Al passe un cuart di ore e il Benevento al met te scarsele i doi pâi cjapâts vie pal prin timp cun Viola, che si cjate di bessôl denant di Nicolas e al segne cence fastidis.

Velazquez al prove a mudâ l’implant de sô scuadre e a zontâi velocitât al so zûc cu lis sostituzions di Barak e Pezzella cun Pussetto e Alì Adnan, ma la situazion no cambie masse. A passin i minûts e zûc e risultât a restin simpri chei. Par chel si scuen lâ ai timps suplementârs, cussì l’Udin al cale e po al cole, stant che Tello al cjate la bale juste e al segne il doi a un, che al pare fûr i blancs e neris de Cope Italie e che al fâs pensâ che ancje par chest nol mancjarà l’efiet Mer…Dacia Arena.

Sperìn che nol sedi cussì, però pal moment l’aiar chel al tire nol è masse bon. O viodarìn in campionât: prime partide domenie ai 19 di Avost cuintri dal Parma in trasfierte.

Alidé Sans + Claudia Crabuzza + DJ Tubet + Joan Baez + Mill a h-Uile Rud = Babêl Europe 16/2018

Gnovis produzions discografichis, concierts e events speciâi, cualchi salt indaûr tal timp e ancjemò musiche babeliche “extrateritoriâl”. Al è ce che e promet la pontade numar 16/2018 di Babêl Europe, la trasmission che ogni cuindis dîs su Radio Onde Furlane e propon un viaç ator pe Europe tra lenghis, musichis, minorancis e nazions cence stât. L’apontament al è par martars ai 7 di Avost a 11 a buinore, pe prime mission, e po, in repliche, par miercus ai 8 a une dopo di misdì e ancjemò par sabide ai 11 a une e mieze.

crabuzza_coM-Un_soldat

In cheste ocasion il percors babelic al incrosarà punk rock, cjançon di autôr, reggae e folk tra Friûl, Catalogne, Ocitanie, Scozie, Sardegne, Frisie e Americhe. In particolâr, inte prime pontade dal mês di Avost dal 2018 di Babêl Europe si podarà tacâ a scoltâ une cerce di Henerécla, l’album gnûf di Alidé Sans, cjantante talentuose che e rive de Val d’Aran, chel toc di Ocitanie che si cjate dentri dal Stât spagnûl, te Comunitât autonome de Catalogne, e si scoltarà la vôs di Claudia Crabuzza, cjantante di L’Alguer/Alghero, une des rapresentantis miôr de produzion musicâl de citât catalane de Sardegne.

OLYMPUS DIGITAL CAMERA

Si fevelarà ancje des gnovis iniziativis in cont di diversitât linguistiche e creativitât, che si fasin a Ljouvert/Leeuwarden, la capitâl de Frisie che vie par chest an e je Capitâl europeane de culture, là che DJ Tubet al rapresentarà il Friûl, intant che la rivade a Udin di Joan Baez ai 8 di Avost inte suaze di Folkest e sarà la ocasion par tornâ a scoltâ une des cjançons plui babelichis dal so repertori.

Cun di plui, lant daûr dai percors di emigrazion des minorancis e des nazions cence stât de Europe, in continuitât cun ce che al jere stât fat cuindis dîs indaûr, cuant che Babêl Europe al veve compagnât il so public in Argjentine par cjatâ il cjantautôr e ghitaris di divignince galese Renè Griffiths, si scoltaran ancje i Mill a h-Uile Rud, formazion di Seattle che cjante par gaelic scozês.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Dopo des trê emissions de setemane, ancje cheste trasmission si podarà tornâ a scoltâle in podcast cun Spreaker e cumò ancje cun Spotify.