Udinese – Parma 4-2

bandieris-friuul

La bande Stramaccioni e va indenant a sunâ la sô musiche cun caratar, cualitât di zûc e concretece ancje cuintri dal Parma. No son mancjâts nancje cualchi erôr e cualchi ingjenuitât, ma propit tai moments di dificoltât la scuadre e à tignût bot e e à tirât fûr lis ongulis e i talents. Cussì e je finide 4 a 2 pai blancs e neris, che si confermin te tierce posizion in classifiche.

L’Udin si presente cuntun arbul di nadâl flessibil – difese a cuatri e Di Natale di bessôl in prime linie, che in cierts moments si zove dal avanzament di Thereux che al stramude il 4-3-2-1 intun 4-3-1-2 – cuintri dai emilians che Donadoni al met in cjamp cul  modul 4-3-3.
Tal prin cuart di ore lis dôs scuadris si studiin e si controlin. La prime iniziative ofensive che e merete segnalade e je chê che si disvilupe sù par jù al minût numar 19 su la linie Badu-Totò, ancje se al è il Parma, mancul di cinc minûts plui indenant, a vierzi lis segnaduris cun Mauri, che al profite di une distrazion difensive de scuadre furlane.
L’Udin al reagjìs cemût che al covente: Badu al confezione un balon saurît pal un a un di Di Natale, Karnezis al siere la puarte ai cuintriatacs dai ducâi e di une acelerazion di Widmer al nas il gol dal prin vantaç temporani dai furlans cul cross dal zuiadôr svuizar che al rive a Totò, che al segne. Al somearès che il prin timp si sieri cul 2 a 1 pai parons di cjase, ma nol è cussì. Widmer al bute jù Mauri in maniere ingjenue: rigôr e gol di Cassano.

Tal secont timp l’Udin nol cambie ni struture tatiche ni formazion. La scuadre di Stramaccioni e incrès la sô pression ofensive cun Kone, Di Natale, Thereux e cui inseriments di Hertaux. Propit di une acrobazie dal difensôr francês cun licence di lâ in atac al rive il 3 a 2 che al see lis gjambis ai aversaris. A chest pont l’Udin al rinfuartìs lis liniis difensivis, cun Domizzi al puest di Kone, e al lasse Di Natale di bessôl a tignî in vuaite la difese dal Parma. Tai ultins vincj minûts e je glorie ancje par Muriel, che – compagn di Di Natale che al va a sostituî – al mostre di vê recuperât dopo des pachis cjapadis cu la Lazio e al palese energjie e dinamisim, intant che il Parma al reste in dîs cu la espulsion di Acquah.
Dal contribût dal colombian si zove dute la scuadre, atente indaûr e vivarose indenant, e in particolâr Therau che al rive a meti tal sac il balon dal 4 a 2 finâl.

E je fieste grande: gjoldìn, stin «calmuts» e anìn dilunc.
Domenie che e ven: Udin-Cesena.

‘Una Balla Laika Festival’, Musiche furlane fuarte e solidarie

cormor2709

Al è in plen davuelziment ‘Cormôr Salvadi’, la rassegne dedicade ae creativitât in lenghe furlane e al incuintri tra lis culturis dal mont, inmaneade de bande dal circul Il Cantîr di Mortean cu la colaborazion di Radio Onde Furlane.

Dopo de scree, ai 14 di Setembar, sabide ai 27 di Setembar a tacâ di nûf sot sere, te aree demaniâl di Festintenda a Cjasielis, la manifestazion e va indenant cuntun apontament che al tocje la musiche e la solidarietât. L’event sot dal tendon zâl e blu si clame ‘Una Balla Laika Festival’ e al ten dongje doi concierts, la presentazion di un disc gnûf pe etichete Musiche Furlane Fuarte e une iniziative umanitarie.

Il disc che al ven presentât al è ‘Ljuba Toast Cricket Club’, il gnûf cd di Aldo Sbadiglio & la Famiglia Ananas in vacanza a Dresda, la band che e à vinçût la edizion dal an passât dal Premi Friûl.

La formazion de Basse, che e met dongje rock, folk e blues cun tescj ironics e visionaris, no je la uniche protagoniste dal spetacul dal vîf di Sabide. Cun di fat a Cjasielis di Mortean a sunaran ancje i Mad Men Blues, storic grup che al misclice lis sugjestions musicâls che a rivin dal delta dal Mississippi e chês tiradis sù tai Cuei e dongje dal Judri.

La partecipazion ae serade e je a ufierte libare. I bêçs tirâts dongje a laran a pro de comunitât di Majevac, te Bosgne dal nord, che e à patît une vore par vie de diluvion che e je stade tal mês di Mai di chest an. Trentevot fameis a son restadis cence nuie e di in chê volte il circul Balalaika di Udin al à inviât une ricuelte di bens di prime necessitât e di risorsis, in colaborazion cu la aministrazion di chel paîs.

Lazio – Udinese 0-1

FuarceUdinees

Cuarte partide di campionât e tierce vitorie, salacôr chê plui biele. L’Udin a Rome al vinç cuintri de Lazio parcè che al met dongje personalitât, zûc, caratar e ancje un tic di cinisim. Tal prin timp l’arbul di Nadâl cun Muriel te spice al palese une biele compatece: sierât daûr e te fasse mezane par rompi lis iniziativis dai aversaris e imberdeâ Klose cun Danilo e Heurteux; elastic su lis corsiis laterâls par creâ cun velocitât cualchi pericul des bandis di Marchetti.

Il puartîr de Lazio nol à nuie ce fâ pe prime metât dal prin timp, maal minût numar 22 la sô puarte e ven sierade di Novaretti suntun tîr di Muriel e po, al minût numar 26, al ven batût de conclusion di Thereau, che al met in puarte il balon saurît servît di Wiedmer ispirât dai disvilups di un numar di Muriel, pardabon in serade sì.
La reazion dai parons di cjase si le viôt dome intal ultin, prime de polse, ma no rive a cambiâ il risultât parziâl a pro de scuadre furlane.

Tal secont timp l’Udin, che al veve za mudât scheme dopo de sostituzion di Muriel cun Bruno Fernandes dal 4-3-2-1 al 4-2-3-1, si cjate a vê a ce fâ cuntun atac laziâl che si zove de zonte di Djordjevic e al rive a tignî bot cence masse fastidis. Al rive ancje il moment de jentrade tal cjamp (al puest di Thereau) di Di Natale, che cemût che si saveve za prime de trasfierte a Rome, nol jere tra i undis titolârs di Stramaccioni, e Totò al fâs pesâ la sô esperience e la difese laziâl e scuen stâ in vuaite ancje se l’atacant blanc e neri nol rive a vê masse balons di zuiâ.

Plui indenant l’Udin al zonte un om ae linie difensive – Nicola Belmonte al puest di Bruno Fernandes – cun chê di rinfuartî ancjemò di plui lis bariduris cuintri dai atacs disperâts dai laziâi, che però  a rivin a imbastî dome un pâr di ocasions guviernadis ben dal atent Karnezis. Cussì e finìs un a zero e l’Udin si place di bessole in tierce posizion.

Udinese – Napoli 1-0

fuarceudinees

Una vitorie strente e pesante. Te tierce partide di campionât l’Udin al sufrìs, al resist e al met te sachete trê ponts impuartants che a tornin a puartâle de bande alte de classifiche. Il Napoli, che par sigûr al à a sô disposizion une dotazion di zuiadôrs di nivel tecnic plui alt, nol rive a fâju rindi cemût che si spietisi e al piert.

La formazion di Benitez, cun dut che tal prin timp e fâs zirâ a di lunc la bale, no mostre di vê avonde personalitât par imponi ad in plen il so zûc, par vie che lu fâs soredut tes liniis orizontâls e soredut in graciis de atenzion costante dal Udin inte fase difensive. La scuadre di balon furlane, tal prin timp, e patìs la pression dai aversaris, no rive a cjapâ sù nissune iniziative ofensive e si contente di tignî bot, intant che tal secont timp e cres te fasse mezane, no sburte masse indenant, ma e cjape plui fuarce, cul lâ al mancul dai napoletans, soredut sul plan psicologjic e tatic.

Pe cronache, te prime frazion i ospits a cjapin un pâl cun Gargano intant che l’Udin nol fâs nancje un tîr in puarte e Di Natale al è di bessôl, sbandonât e cence riforniments. Tal secont timp la partide e je un pôc plui vivarose, ancje parcè che al è dificil fâ piês dai prins 45 minûts.  L’Udin al fâs plui moviment te metât dal cjamp, sot de direzion di Allan, il Napoli al fâs  un pôc di pressing ma nol rive a concretizâ, stant che al cjate Danilo e Hertaux inte zornade juste, simpri tal puest just tal moment just, soredut a dam di Higuain che al reste imberdeât framieç dai doi centrâi blancs e neris.

Alc al cambie dome cu la jentrade tal cjamp di Callejon, che al oblee Karnezis a fâ il so intervent plui dificil e preseôs, ma nol è avonde. Tal moment che il Napoli al scomence a pensâ di jessi in stât di sierâ la partide, cu la jentrade di Mertens, l’Udin al cjate la strade juste pal gol: punizion di Di Natale, deviazion di  Koulibaly e inseriment di Danilo che le bute dentri. A chel pont la formazion di Benitez e imbastìs une reazion, ma l’Udin si difint cun sintiment e il risultât nol cambie.

In altris ocasions, une partide brutute compagn di cheste si varès sierade cuntun risultât negatîf. Chest viaç no je lade cussì. La difese e à tignût e si à viodude une buine personalitât, sei a nivel coletîf che pes singulis individulitâts, a tacâ di Karnezis, Allan e Danilo.

Joibe la scuadre di Stramaccioni e zuiarà a Rome cuintri de Lazio, che e zuie avonde ben ma e à un fuart deficit di ponts e risultâts. Une trasfierte delicade e dificile, che si à di frontâle cun dignitât e cence sudizion.

Tutele des minorancis, il Comitât 482 al fâs sintî la vôs dal Friûl a Rome

lengate1

Il Friûl al mostre la lenghe e al fâs sintî la sô vôs a Rome in cont de tutele des minorancis e dai dirits lingusitics de sô int. Martars ai 16 di Setembar, a Rome, li dal Senât de Republiche taliane al è stât un incuintri tra une delegazion espression des comunitâts di lenghe furlane, slovene e todescje dal Friûl e des istituzion di chenti e il senatôr Francesco Palermo, prin firmatari dal gnûf disen di leç di ratifiche de Cjarte europeane des lenghis regjonâls o minoritariis.

Vie pal incuintri, inmaneât de bande dal Comitât/Odbor/Komitaat/Comitato 482, che al à vuidât la delegazion cu la professore Silvana Schiavi Fachin, si à fevelât dai problemis che a son inte metude in vore de Leç 482/99 e dai contignûts dal disen di leç di ratifiche de Carte europeane.

A son stadis frontadis ancje lis cuistions che a tocjin la formazion dai insegnants di e in lenghe minoritarie, il ricognossiment des lôr competencis, la gnove riforme dal Titul V de Costituzion e la atribuzion ae Regjon Friûl-VJ de competence primarie in cont de istruzion. Par une regjon speciâl, che e je tâl par vie de rilevance de presince di citadins che la lôr lenghe e je diferente di chê taliane, e covente une scuele speciâl, che e sedi in stât di dâ garanziis ai siei citadins dal dirit ae istruzion te lenghe proprie e tes lenghis dal teritori.

Al incuintri e je intervignude ancje al presidente de Regjon Friûl-VJ, Debora Serracchiani.

La iniziative e somee jessi stade plui concrete di altris sù par jù compagnis cjapadis sù cualchi an indaûr. Cun dut achel il so impat si podarà valutâlu dome denant di risultâts concrets che a tocjin lis competencis de Regjon tal cjamp de istruzion e lis risorsis e lis azions a pro di di une presince normâl des lenghis furlane, slovene e todescje tes scuelis, tai media e te vite publiche.

In cont de ratifiche de Carte europeane de bande dal Stât talian, al è impuartant che cheste ‘pratiche’ e vegni sierade,  ma soredut al covente che la ratifiche e sedi une ratifiche buine, ven a dî che i impegns cjapât sù a sedin almancul ai nivei di intervent previodûts des leçs statâls 482/1999 e 38/2001.
Su chest argoment al merete ricuardât che il Stât talian al à za ratificade, ancjemò tal 1997, une altre convenzion dal Consei di Europe su la tutele des minorancis –  la Convenzion di suaze pe protezion des minorancis nazionâls – ma magari cussì no al stente une vore tal rispietâ i impegns cjapâts sù.

Altris informazions in cont dal incuintri dai 16 di Setembar si cjatin achì, achì e achì.

‘A giru a giru’, Claudia Aru ‘live’ in Friûl e te Italie dal nord

Claudia_Aru

Di usgnot a domenie ai 21 di Setembar la cjantante sarde Claudia Aru, compagnade di Matteo Muntoni al liron e Ivan Melis ae ghitare, e presente dal vîf il so gnûf disc A giru a giru cun cinc concierts ator pe Italie dal nord e pal Friûl.

La iniziative e je interessante par plui resons.
Prin di dut pes cualitâts di Claudia Aru, tant che cjantante e autore, che a saltin fûr ad in plen propit intes cuindis cjançons che si cjatin tal disc che al è jessût ae fin dal an passât  e che lis veve palesadis ancje inte suaze di altris progjets musicâi, a tacâ de preseade cubie electro dub dai Bentesoi, metude adun agns indaûr cun Frantziscu Arrogalla Medda.  I tocs che si cjatin dentri di A giru a giru, che tai mês passâts a son jentrâts inte programazion di Radio Onde Furlane e in particolâr in chê de trasmission Babêl, Europe, a fasin indenant une biele misture di cjançon di autôr, folk, blues e swing. Cercis dal disc si puedin scoltâ e viodi achì.

Cun di plui la tournee e je inmaneade de bande de associazion Brincamus  – che e je la gnove ‘muse’ operative dal progjet Brinca, metût adun di un trop di zovins di dignince sarde propit cun chê di puartâ ator la gnove produzion musicâl e culturâl de Sardegne – e de FASI , la federazion dai circui dai sarts ator pal Stât talian. Un biel esempli di colaborazion tra circui de emigrazion, cuntune atenzion specifiche pai plui zovins, pai lôr interès e pal lôr protagonisim atîf tal associazionisim, e altris sogjets, a tacâ de Nootempo Indie Factory.

Il tour al tache usgnot li dal circul Ichnusa di Mestre. Ai 18 di Setembar Claudia Aru e sarà in Cjargne, li dal circul sart di Tumieç, intant che vinars ai 19 e fasarà il so spetacul a Udin li dal MissKappa.
Sabide ai 20 e sarà la date plui dongje di Turin, li dal circul ‘Su Nuraghe’ di Alessandria. Ultin apontament tal circul FASI di Bologne ai 21.
Ducj i conciert a son a jentrade libare e a tachin sù par jù a 9 e mieze di gnot.

Juventus – Udinese 2-0

udin_neri

L’Udin al piert a Turin e si fâ passâ in classifiche de Juve, che ae fin de seconde zornade di campionât si cjate ae vuide de graduatorie adun cul Milan e cu la Rome.

I zuiadôrs di mister Stramaccioni sul imprin de ‘soirée’ di sabide a somein no vê pôre dai parons di cjase, ancje se si viôt bielzà la diference di pas e di potenziâl ofensîf tra lis dôs scuadris, che dopo vot minûts di zûc  e ven marcade dal gol di Tevez.
Cul vantaç te sachete, la Juve e manten il control de partide, daûr dal sburt di Pogba e dal ‘ex’ Pereyra , intant che la scuadre furlane e cîr di difindisi cun chê di rispuindi in cuintripît, ancje se e rive dome a no vê masse fastidis de manovre de scuadre di Allegri ma no mostre di jessi in stât di meti in vore une cualsisedi iniziative, cu Di Natale sbandonât e Muriel distudât.

Tal secont timp, cun Bruno Fernandes al puest di Muriel, l’Udin al fâs alc di plui te costruzion des azions e al mostre par sigûr une pocje plui di vivarositât. Cun dut achel, si scugne spietâ sessantesîs minûts par viodi un tîr in puarte de bande de scuadre furlane: la conclusion a bersai di Bubnjic, che no ven convalidade par vie de posizion di fûr zûc.
Al è il moment miôr pal Udin, che al somee in stât di recuperâ il disvantaç e di fâi pôre ai parons di cjase, ma cualsisedi sperance e ven distudade in curt di une biel conclusion di Marchisio. Di chel moment indenant al è masse facil pe Juve tignî in man la partide e masse dificil pal Udin provâ a cjatâ la strade dal gol.

Tal prossim incuintri, cuntun Napoli inrabiât par vie dai doi patafs cjapâts cul Chievo, a coventaran snait, grinte e atenzion.

«Diada» in Catalogne e viaçs, lenghis, culturis, bevi e mangjâ in fieste a Udin e a Turin

diada

Vuê i catalans a fasin fieste: e je la «Diada nacional».
L’inovâl (tresinte agns taronts!) de sconfite di Barcelone dal 1714 al à cjapât sù significâts ancjemò plui impuartants tai ultins agns, inte suaze de gnove domande di autodeterminazion fate indenant di une part impuartante de societât catalane.
Chest an, in spiete dal referendum pe indipendence dai 9 di Novembar, che Madrid nol ricognòs, la «Diada» e je la zornade dal V 11 : l’intindiment al è chel di jemplâ di int par undis chilometris lis dôs stradis diagonâls di Barcelone – la Gran Via e la Diagonal, che si incrosin a forme di – cun chê di marcâ la v di volontat , di votar e di victoria, lant daûr de mobilitazion dal an passât, la Via Catalana.

B_Par_furlan2

Si fâs fieste, ma par altris motîfs, ancje in Friûl.
A cinc e mieze prime di sere e je la scree uficiâl de edizion numar vincj di Friuli Doc.
La supersagre furlane, cuntune ufierte siore di robe di mangjâ e cuntun programe musicâl che nol somee alc e ce (Ma no podevino fâ almancul un biel conciert cun cualchi grup di Musiche Furlane Fuarte?), e va indenant fintremai domenie.
Tal cartelon de manifestazion il Sportel linguistic dal Comun di Udin, Furlan in Comun, e la Agjenzie Regjonâl pe Lenghe Furlane (ARLeF) a àn metût adun une schirie di events là che la lenghe furlane, la dimension identitarie, la diversitât culturâl e i dirits linguistics si dan dongje cu la tipicitât, la promozion dal teritori e dai siei prodots e cu la voie di fâ fieste, di cjatâsi e di capî.
Chel metût adun al è «un program speciâl par une lenghe normâl»: si lu capìs dal titul – Friuli Doc par Furlan – e ancje dal sproc che lu compagne, ven a dî «Doc par ducj… Ancje pai fruts».
Par savênt di plu, si pues dâ un cuc achì e achì.

gnognos_friulidoc

Mangjâ, bevi, cognossi, pensâ e viazâ a son lis peraulis clâf no dome di cheste maniere di vivi Friuli Doc, par furlan e duncje in relazion positive cul mont, ma ben ancje di une biele manifestazion che si davuelç dai 12 ai 14 di Setembar a Turin li dal Borgo Medievale, tal parco del Valentino.
Si clame Mappamondo e cheste e je la sô tierce edizion. Le inmanee chel che almancul un pôcs di nô lu calcolin un mestri o salacor une sorte di vuide spirituâl, il mitic Chef Kumalè, cu la colaborazion dal Borgo Medievale
e dal Circolo dei Lettori di Turin.
Ducj i detais in cont de manifestazion si cjatin achì.

Bon Voyage

Cui che al è a Turin e al à voie di lâ a viodi Mappamondo, ma i ten ancje a savê ce che al nas a Friuli Doc, al podarà tignîsi in contat cun chê manifestazion, cun Radio Onde Furlane, che si scolte ancje cun internet, inte suaze des trasmissions in direte metudis adun dentri dal progejt di comunicazion dal Comun di Udin, Udin par Furlan.

Udinese – Empoli 2-0

fuarceudinees

Trê ponts, doi goi e un grant Di Natale. Il campionât 2014/2015 nol podeve tacâ intune maniere miôr. La prime volte dal Udin di Stramaccioni al è sucès pal risultât e almancul in part ancje pal zûc e pe prestazion complessive de scuadre.

Scomençâ cuntune vitorie al fâs simpri ben. Ancjemò di plui se si zuie in cjase cuntune scuadre che e je frescje di promozion in serie A e che e mostre di vê snait e cualitât.

Salacor il sucès di nossere li dal stadi Friûl al devente inmò plui impuartant par trê motîfs. Prin di dut parcè che l’Udin al rive a vinci ancje se nol zuie masse ben in ducj i novante minûts e anzit al patìs la frescjece dai aversaris te fase centrâl dal prin timp, cuant che a rivin a fâ zirâ la sfere miôr dai blancs e neris e cussì ju metin in dificoltât.
Cun di plui, soredut tal secont timp, si viôt un bon Muriel, inte vieste di “assist man”, e dongje dai “classics” Badu, Widmer e Allan, al mostre di vê cualitât e cûr ancje il gnûf Guilherme.
La tierce reson di sodisfazion e à il non e il cognon di Totò Di Natale, che si gjolt la fieste dai siei dîs agns a Udin cun doi goi e une biele prestazion in tiermins atletics, di zûc e di personalitât.

Chê altre muse de medaie de buine serade di Totò al è il pericul che l’Udin al sedi masse dipendent dal so preseôs cjapitani. Al è ce che al sucedût te stagjon passade e nol è stât un ben, cemût che o vin viodût.
I tocjarà a Stramaccioni fâ in maniere che Di Natale e l’Udin a zuin ben e cence dipindi masse chel di chel altri.

Viodarìn cemût che al larà indenant il tecnic roman, che par intant al pues stâ content dal risultât e de prestazion dai siei zuiadôrs, massime dal cjapitani, di Guilherme e di Muriel, che in particolâr al è clamât a mostrâ tal cjamp di zûc che al à voie di fâ e che al fâs cun continuitât.

Dopo di une setemane di polse, ai 14 di Setembar l’Udin al sarà a Turin par zuiâ cuintri de Juve. Pal moment a àn i stes ponts e anzit l’Udin al è plui indenat te classifiche, stant che al à fat un gol di plui…