Bologna – Udinese 1-2

fuarceudinees

Al Udin i coventavin ponts, caratar e zûc. A Bologne la scuadre blancje e nere e à cjatât chei, chel e chel altri, almancul in part. Cuintri de formazion emiliane l’Udin e à mostrât fin dal principi un ategjament tatic positîf, cirint di fâ zirâ la bale e di blocâ lis iniziativis aversaris metudis adun su lis corsiis esternis. La formazion furlane il miôr lu à fat viodi tal secont timp, cuant che, sot di un gol, e je rivade a rimontâ il disvantaç e a ribaltâ il risultât.

Za tes primis fasis de partide si rive a preseâ la zornade sì di Zapata, che al sarà un pont di riferiment pai siei compagns dal principi ae fin. Cun dut de buine ande de scuadre di Colantuono,
Cul passâ dal timp i parons di cjase a vuadagnin cjamp e balons. L’Udin al sufrìs un pôc la pression aversarie, al è lent tes sôs azions di cuintripît e al palese cualchi disatenzion di masse te fase difensive, ancje se par fortune dut chest nol à efiets negatîfs imediâts. Propit di un erôr di Iturra, che si fâs fâ un tunnel di Rizzo, al rive la azion dal vantaç dai undis di Delio Rossi.

L’Udin al patìs il colp, ma al imbastìs almancul dôs ocasions par tornâ in paritât, ancje se nol rive a concretizâlis pardabon. Di chê altre bande, Wague al romp une biele combinazion inviade di Brienza e il prin timp si siere cul sucès parziâl, sostanzialmentri meritât, dai parons di cjase.

Dopo de polse, la condote de partide dal Udin no somee tant divierse di chê de ultime part dal prin timp, cuant che i blancs e neris a vevin sbassât la linie dal lôr zûc, e il Bologne al prove a fracâ il pedâl dal aceleradôr par meti in sigurece la vitorie. Lis robis a mudin in miôr pal Udin dopo de jentrade tal cjamp di Di Natale, al puest di Thereau: al è un moment di svolt, cuntun cambiament di ritmi e di ategjament che si concretize daurman cuntune buine percussion verticâl di Badu, che al rive a segnâ ancje se cun cualchi dificoltât di realizazion.

La paritât e je il spieli de gnove situazion: dal prin minût dal secont timp al puest di Iturra al è Lodi e la scuadre e vuadagne gjeometriis e ecuilibri, intant che cu la jentrade di Di Natale la pression ofensive si zove de cualitât e de fantasie di Totò. Il Bologne al cale e l’Udin al cres, in sens sei tatic che soredut agonistic: al à plui morbin, in ducj i reparts, ae stesse maniere dal secont timp de partide cul Milan.
Cussì, dopo di un biel intervent di Karnezis suntun tîr di Brienza al cjate il gol dal doi a un cun Zapata, che cinc minûts prime de fin al gjolt di une biel pinelade di Di Natale e al met la sô firme, dopo vê corût e scombatût cun snait e cun continuitât, suntune vitorie preseose.

Une vitorie che e coventave, pe classifiche e no dome par chê.

Buine Zornade europeane des lenghis!

gdw_euro_day_of_langs_logo

Chê dai 26 di Setembar e je une zornade impuartantone pe Europe e pai siei citadins: e je la Zornade europeane des lenghis.

A tacâ dal 2001 e je une ocasion particolâr par promovi la cussience di ducj in cont dal valôr dal pluralisim linguistic, dal dirit di cognossi e doprâ plui lenghis e des pussibilitâts di disvilup culturâl, democratic, sociâl e economic che a divegnin propit de cognossince e dal ûs des lenghis.

La Zornade e je pa sigûr une des ricorincis che a sclarissin miôr lis fondis de Europe «unide te diversitât».
Ogni an e je une ocasion par inmaneâ iniziativis di promozion de diversitât linguistiche, de educazion plurilengâl e dal dirit ae lenghe e aes lenghis.

La nestre maniere di memoreâ la Zornade europeane des lenghis e je chê di tornâ a lei un pôcs di articui saltâts fûr juste in ocasion dai 26 di Setembar, a tacâ di chel publicât tal nestri blog.

Altris articui interessants a son chei che o vin cjatât, sgarfant in rêt:

Di «Mamma, ho perso il friulano» a «Mamma, ho perso il Friuli»

Furlan a scuele. E je ore di cambiâ e si pues fâlu

Plui lenghis, plui musichis, plui Europe // Več jezikov, več glasbe, več Evrope // Più lingue, più musiche, più Europa

Ancjemò Macroregjons, ancjemò micropolitics

flumisel1

A jerin i 19 di Fevrâr dal 2013 e dopo vê let dal incuintri tra i presidents di in chê volte des regjons Piemont, Venit e Friûl-VJ e chel che cumò al è il president de regjon Lombardie e dal lôr acuardi pe creazion de cussì clamade «macroregione del nord» o vevin scrit un articul dal titul Macroregjons e micropolitics.

Cumò denant o vin dât un cuc al sît internet di chel chel al risulte jessi gjornâl plui let in Friûl, là che o vin cjatât un articul che tal so titul al fevele di «Una macroregione a Nordest» e «Triveneto unito», che al da cont des ideis dal cjâf grup dal Pd alì de Cjamare dai deputâts, Ettore Rosato, pandudis intun incuintri public a Flumisel.

A part la critiche juste – che però e je dome tal metodi e no ancje tal merit de cuistion… – fate indenant di Rosato cuintri dal emendament su la citât metropolitane prontât dal so coleghe di partît e so concitadin, il senatôr Francesco Russo, ce che al salte fûr des sôs peraulis al fâs vignî i sgrisui, se no piês.

Lei che al fevele di «Triveneto a statuto speciale», dongje de domande (par inglês, cussì al è plui “cool”)  «What’s Triveneto?» e de constatazion che al è plui di cualchidun che al vîf tal 2015 ma al dopre un lengaç degn dai timps di chei dal manarin, nus oblee a tornâ a tirâ fûr chel articul di passe doi agns indaûr e soredut il so titul.

Lu fasìn cun grant displasê.
Al è brut viodi che chel titul e chel test a son ancjemò di atualitât. Che o sin ancjemò alì.
Ancjemò.

Premi Gozzano, tra i finaliscj e je ancje Luigina Lorenzini

lorenzini_top_di_travees

Vinars stât o scrivevin in cont de edizion 2015 dal Concors talian di poesie e narative Guido Gozzano.

Dopo vê dât un cuc ae comunicazion uficiâl de segreterie dal concors cu la liste dai finaliscj, o vevin marcât il fat che in finâl a jerin trê furlans: Giacomo Vit, Laurin Zuan Nardin e Maurizio Mattiuzza.

O vin tornât a cjalâ miôr chê stesse liste, scjavaçant tra lis diviersis sezions, e o vin discuviert che tra i nons di cui che al veve passât la prime selezion al ancje chel di Luigina Lorenzini, autore di Pielunc che e scrîf cun snait e cun ispirazion tal so furlan asìn e che in cualchi ocasion e à ancje incrosât i siei viers cu la musiche dal grup (H)ausbau.

Cun plasê o podìn dî che tra i finaliscj pal premi inmaneât a Terzo, dongje di Acqui Terme, no son dome trê furlans, ma e je ancje une furlane!

Ai 18 di Otubar e sarà la premiazion.

Concors di poesie, trê furlans in finâl pal Premi Gozzano

maurizio-mattiuzza

Domenie ai 18 di Otubar a Terzo, in provincie di Alessandria, si fasarà la premiazion de edizion 2015 dal Concors talian di poesie e narative Guido Gozzano.

La manifestazion che e cjape il non dal innomenât poete turinês, vivût tra la ultime part dal Votcent e l’imprin dal secul XIX, e je rivade ae sô edizion numar vincjesîs.
Juste cualchi dì indaûr i siei organizadôrs a àn dât fûr la liste dai autôrs finaliscj. Te sezion dedicade ai libris edits si cjatin ben trê firmis furlanis: Giacomo Vit cun Trin Freit, Laurin Zuan Nardin cun La carretta sfavillante. La briscje sflandorose e Maurizio Mattiuzza cun La Donna del Chiosco sul Po.

In gjenerâl, e je une gnove conferme dal valôr de scriture poetiche dai autôrs dal Friûl, sei par furlan che cun altris lengaçs.
In particolâr tal câs dal poete e scritôr furlan e babelic, Maurizio Mattiuzza, e je une gnove conferme de esistence di une leam specific tra ce che al scrîf e il Piemont.
Cun di fat, cemût che o vevin za contât achì , tal 2014 une selezion di dîs composizions ineditis dal autôr di divignince trastolone e veve vinçût il concors  InediTo – premio Colline di Torino, e propit chel risultât lu veve puartât ae publicazion de La Donna del Chiosco sul Po,  presentât un pôcs di mês indaûr a Turin, dentri de edizion 2015 dal Salon internazionâl dal Libri.

Chi di un mês o viodarìn cemût che e larà a finîle.

Visca Catalunya!

visca

Vinars stât a jerin i 11 di Setembar, ven a dî la ‘Diada’, la Fieste nazionâl catalane.

Cheste ricorince, che za par so cont e je plene di valôrs simbolics, vie pai ultins agns e à cjapât sù ancjemò plui significât, no dome in tiermins di memorie storiche e di afermazion positive di identitât ma ancje tant che rivendicazion di dirits, di autodeterminazion, di libertât.

Si lu à viodût a clâr l’an passât, juste tresinte agns dopo di chê dì dal 1714 cuant che la citât di Barcelone e veve di rindisi aes trupis francesis e spagnolis.

Si à tornât a viodilu ancjemò di plui chest an, cundut che la plui part dai media talians a àn cirût di dâ ae ‘zornade’ e a dute la cuistion une leture minimaliste e minimâl. Par chel al merete let l’articul
su chest argoment che al è saltât fûr su Q Code Mag, parcè che al met dongje cronache, storie, politiche e resonaments fats cun sintiment e cun cognossince.

A proposit di informazion, di sintiment e di cognossince, dongje dal intervent di Andrea Geniola su la ‘Diada’ di chest an, al merete tornât a lei ancje il resocont su la manifestazion dal an passât che si cjate su Internazionalitari.

In spiete di viodi ce che al nassarà chi di une desene di dîs, ai 27 di Setembar, in Catalogne, sgarfant in rêt, un pôc cun chê di rinfrescjâsi la memorie e un pôc par fâ un pensament ancje su la Europe e sul Friûl, si pues tornâ a cjapâ sù un altri toc di Internazionalitari e doi articui saltâts fûr su La Patrie dal Friûl dopo dal innomenât 9/N e dal referendum pe indipendence de Scozie che si à davuelt ai 18 di Setembar dal 2014.

Catalunya

Lazio – Udinese 2-0

udin_neri

Tierce partide di campionât e seconde sconfite. A Rome cuintri de Lazio l’Udin al zuie dome in part inte stesse maniere de scree de stagjon cu la Juve e al piert in maniere piês che cuintri dal Palermo.
La afinitât parziâl cul incuintri dal Juventus Stadium si cjate te ande «catenacciara» dai undis vuidâts di Colantuono, intant che lis diferencis cun chê altre gare in trasfierte a son la mancjance di continuitât e di atenzion in difese, la plui limitade capacitât di rispuindi in cuintripît e salacor la assence di fortune, che però par solit e je dome par judâ cui che al è ardît e stant che îr l’Udin nol veve cuissà ce ardiment… al è just cussì.

Il prin timp de partide dal Olimpico, sot di une ploie mostre, al presente une Lazio cuntun pôcs di infortunâts – tra chescj Klose, Djordjevic e De Vrij – e cuntune cierte voie di fâ valê il fat che e zuie in cjase e che i ten a vinci ancjemò. L’Udin al mostre a clâr che no i ten a fâ la vitime e al ferme lis iniziativis dai aversaris cence fâ masse scjas.
Lis primis conclusions a son dôs punizions, une di Bruno Fernandes e chê altre dal laziâl Candreva, che no crein problemis ni a Marchetti ni a Karnezis.
Ator de metât de prime frazion e rive une altre conclusion di Candreva, avonde pericolose, che e ven mandade in corner. Sot da ploie e dentri dal pantan l’Udin al ten bot e al vuadagne metris indenant e dome tai ultins minûts prime de polse a son i parons di cjase a fracâ l’aceleratôr, cence rivâ a mudâ l’ecuilibri formâl e sostanziâl che al marche dut il prin timp.

Tal secont timp alc al cambie e, magari cussì no, chest nol è a pro dal Udin. La Lazio e je plui decise indenant e lu mostre a clâr za cun Keita dopo trê minûts e po cu il cambi dopli fat di Pioli, che al clame fûr Candreva e Lulic e al bute dentri Felipe Anderson e Matri. Colantuono al rispuint cun Badu al puest di Bruno Fernandes e l’Udin si svicine al vantaç cuntune biele conclusion di Thereau, che però al cjate Marchetti tal puest just tal moment just, e cuntun tîr fûr di Adnan.
Daûr de regule “gol mancjât, gol cjapât” al rive chel de Lazio cui doi gnûf jentrâts: cross di Felipe Anderson su la corsie di çampe a pro di Matri che le bute dentri cul cjâf .
L’Udin al patìs il colp ma al prove a dreçâ la situazion, cun Kone che in dôs ocasions al oblee Marchetti a vuadagnâsi il pagnut.
Colantuono al mande dentri Di Natale, cu la sperance che il cjapitani al cjati la bale juste pal un a un, intant che al continue a sglavinâ e che la Lazio si zove ancjemò dai numars di Matri, che dopo de conclusion cul cjâf dal prin gol al mostre di vê ancje une buine dose oportunisim, stant che al rive a butâ dentri la bale parade indaûr di Karnezis suntun tîr di Keita.
L’Udin al prove a viodi di fâ alc ancje cun Aguirre, ma la Lazio no si scompon, e difint il sucès fint insom e si puarte a cjase ducj i trê a disposizion.

Pal Udin, cumò, a son dôs partidis in cjase – cul Empoli e cul Milan – là che al covente zuiâ e fâ ponts.

Friûl, un Ben Comun di difindi e di vivi. Apontament ai 5 di Setembar a Zeanut di Trep Grant

laiplessness4

La radio libare dai furlans e va «fûr de radio» cun chê di promovi un dibatit cun plui vôs su paisaç, aghis, eletrodots e economie solidarie. L’apontament al è ai 5 di Setembar tal prât de famee Odorico-Bellina tal biel borc di Zeanut di Trep Grant, di 7 sot sere indenant.
La serade, inmaneade di Radio Onde Furlane, si clame Friûl Ben Comun e, in plui di un moment di riflession, e vûl jessi ancje une ocasion di fieste.

Il program al ten dongje un ghiringhel (il ben e il bon dal Friûl, cun prodots «a km zero»), la musiche dal vîf dai Laipnessless, lis provocazions creativis dai Cjastrons e une schirie di intervents di rapresentants di comitâts e istituzions che a son espression di chel Friûl che al lavore ogni dì par che il teritori al sedi vivût ma no disfrutât e par che lis sôs risorsis a vegnin dopradis cun rispiet e par un disvilup sostignibil e solidari.

Il diretôr di Onde Furlane, Mauro Missana, al fevelarà di energjie, di paisaç e di eletrodots cun Aldevis Tibaldi dal Comitât pe vite dal Friûl rurâl, al tocjarà l’argoment de aghe tant che ben comun e tant che risorse economiche cun Franceschino Barazzutti dal Comitât pe difese des aghis dal bacin di mont dal Tiliment, e al frontarà il teme de economie solidarie e sostignibile cun Massimo Moretuzzo, che tant che sindic di Merêt di Tombe al presentarà ancje il progjet Pan e farine dal Friul di Mieç.

I trê moments di aprofondiment e di discussion coletive a saran saurîts cun musiche e imagjins: cu lis cjançons visionariis dai Laipnessless, grup di Muçane che, dal vîf e intal cd Bestiis Forestis, il disc numar 50 dal catalic de etichete Musiche Furlane Fuarte, al conte lis contradizions dal Friûl cun snait e cun ironie; cui intervents dai Cjastrons, che a mostraran ancje une cerce dal progjet audiovisîf Friûl Revolution, produsût de cooperative Informazione Friulana e metût adun cun Marco D’Agostini; cu la proiezion dal documentari di Adriano Venturini, La viate, sul savoltament dal paisaç furlan.

La partecipazion a Friûl Ben Comun e je libare e sore nuie.