Get APP, Stand APP…for your RIGHTS

Buine Zornade Furlane dai Dirits a dutis e a ducj!
Vuê, ai 27 di Fevrâr, al cole l’inovâl de Joibe Grasse dal 1511, il riviel popolâr plui impurtant di dute la storie dal Friûl e il prin de Europe dal Cinccent, che al sclopà a Udin e si slargjâ inte plui part de Patrie.

A tacâ dal 2004, stant che il riviel dal 1511 al jere stât fat cuintri de prepotence dai nobii e pe difese dai “dirits antîc” des comunitâts rurâls, lis associazions e chês altris entitâts des comunitâts furlane, slovene e todescje dal Friûl, che si dan dongje tal Comitât/Odbor/Komitaat/Comitato 482 a àn sielzude cheste date tant che Zornade Furlane dai Dirits.

Cun chest ategjament, che al cjale ae storie e soredut ae atualitât, ancje chest an la ricorence e ven memoreade di Radio Onde Furlane cuntune programazion speciâl che e larà indenant par dute la zornade, cemût che si pues lei achì: ZFD2015luncITAok.

Tra i apontaments principâi, dongje dal aprofondiment classic su la situazion dai dirits linguistics e nazionâi des comunitâts furlane, slovene e todescje dal Friûl e dai spazis musicâi specifics, a meretin segnalâts, a misdì, la pontade speciâl di Dret e Ledrôs sul teme Comunitâts locâls tra gnovis formis associativis e rinassince identitarie, là che Mauro Missana al dialogarà cun Giorgio Cavallo e cui sindics di Merêt di Tombe e di Cjarlins, Massimo Moretuzzo e Diego Navarria, daûr de gnove esperience dal Laboratori di Autonomie, e a sîs sore sere la interviste cul assessôr pe agricolture dal Comun di Muçane, Denis Nardon, che al fevelarà di dirits, ûs civics e tieris coletivis, tra storie e atualitât.

La Zornade Furlane dai Dirits dal 2015 e siere ancje lis celebrazions dai 35 agns di ativitât di Onde Furlane. Cussì, dentri de programazion di vuê, a vignaran presentâts il gnûf sît internet e la App che e permetarà di scoltâ «la radio libare dai furlans» di ogni bande dal mont cui smartphones e cui I-phones.

Une iniziative di gale pal dirit ae lenghe, pal dirit ae informazion e pal dirit…ae radio, ancje pai furlans che a son pal mont.

Se Bob Marley & the Wailers nus al permetin…, nus ven voie di cjantâ «Get APP, stand APP, stand APP for your RIGHTS».

 

Al rive “Âf blu”, sperìn che nol sedi une moscje blancje

Il prin carton animâ produsût pal 100% in Friûl al è une opare par furlan. Si clame Âf blu e al è stât metût adun inte suaze des iniziativis editoriâls di cualitât in lenghe furlane promovudis de ARLeF (Agjenzie Regjonâl pe Lenghe Furlane).

Il carton al è stât prontât dal CTA  (“Centro Teatro Animazione e figure”) di Gurize e i à lavorât parsore une scuadre che e ten dongje Serena Di Blasio pe scriture e pe senegjature, Giulia Spanghero pai dissens, Giorgio Cantoni  pe animazion, Michele Polo pe revision dai tescj, adun cul compositôr Matteo Sgobino, la atore Nicoletta Oscuro e i musiciscj Didier Ortolani e Alessandro Turchet.

La idee e je interessante, stant che il carton al conte lis aventuris di une âf blu, che propit par vie dal so colôr e ven calcolade tant che strane e strambe. La âf, juste par chel, e decît di lassâ la sô cjase e di lâ ator pal mont e il so torzeonâ nol è dome une ocasion par cognossi lis tantis creaturis dai prâts (il svuarbecjavai, il çupet, il chebar…), ma ancje par cognossisi e par capî e par fâ capî che la sô specificitât no je alc di ce vergognâsi ma e je alc di bon e di zovevul par dute la societât, cemût al salte fûr in maniere concrete propit intant dal so viaç.

Chê de Âf blu e je une storie che e promôf il valôr de diversitât e lu fâs in maniere plasevule e delicade. Al è ancje un biel esempli di produzion audiovisive par furlan, là che la lenghe furlane e ven doprade cun sintiment, cun professionalitât e tant che lenghe normâl e moderne, cemût che al varès di jessi simpri.

Cun diplui Âf blu al mostre cemût che, par fâ alc di bon e di valevul par furlan, a pro de lenghe e dal dirit ae lenghe, si rive a meti adun un prodot che, par furlan o dopleât o sottitolât in cualsisedi altre lenghe, al pues vignî doprât e gjoldût in ognidontri.

In chest sens Âf blu al è un prodot di esportazion che se nol fos stât fat par furlan no si varès rivât adore a fâlu – stant che al è in assolût la prime produzion di cheste fate metude adun in Friûl – e in chest sens al conferme ce che al conte propit la storie de sô protagoniste.

La realtât e va plui innà de finzion, stant che no mostre dome che la diversitât –  in chest câs chê linguistiche – e je un valôr e un dirit, ma ancje che e je une risorse e une oportunitât in tiermins sociâi e economics. Un bon investiment pe lenghe furlane al devente un bon investiment pe produzion audiovisive in gjenerâl e al promôf cualitât, professionalitât, lavôr e disvilup.

Al è ce che a àn capît, za uns trente agns indaûr, inaltrò in Europe. In Gales, par esempli, la volontât di dâ fuarce ae lenghe galese cul insegnâle a scuele, cul doprâle in ducj i setôrs de vite publiche e cul so ûs tai media e à puartât ae creazion di un vêr e propri sisteme industriâl che si pues calcolìalu tant che un model di disvilup sostignibil. Cun di fat, la dibisugne di produsi contignûts di cualitât pal canâl televisîf public galês S4C e à fat nassi une schirie di piçulis cjasis di produzion locâls, là che a lavorin zovins cuntun alt nivel di professionalitât che par fâ il lôr mistîr no scugnin emigrâ e che anzit lu fasin miôr – cun plui cualitât e cun plui origjinalitât – propit parcè che lu fasin tal lôr teritori e doprant la lenghe proprie di chel teritori.

Si rivaraial a fâ compagn ancje in Friûl? Sperìn di sì. Sperìn che Âf blu nol sedi une moscje blancje.

Ucraine, Russie, Europe

A son trê dîs che al è in vore il fermait il fûc inte Ucraine orientâl.
In cont di cemût e di cetant che al ven rispietât a son informazions une vore diferentis.

Par sigûr la cuistion vierte tra Ucraine e Russie e je grivie e penze e in particolâr, magari cussì no, e met in evidence un dai limits sostanziâi de Union europeane, ven a dî la mancjance di une sô politiche unitarie e autonome tes relazions cul rest dal mont, che e je leade cun altris siei difiets di fonde.

Il prin di chescj difiets al è il fat che la Ue le fasin i Stâts, che a continuin a tignî ad in plen la lôr sovranitât (o a jessi convints di tignîle) ancje in chest cjamp e duncje si movin ognidun par so cont, cemût che si viôt te composizion dal Consei di sigurece de Onu e tes tratativis fatis la setemane passade cun Russie e Ucraine.
Il secont al è il rapuart, che al diven di chê stesse situazion, tra la Ue e la Nato, massime dopo de fin de Vuere frede.

Cumò la nestre atenzion e je za pontade di une altre bande, su la Libie, però nus somee il câs di no pierdi di viste la cuistion de Ucraine.
Cussì, in cont di chel câs o vin cjatât un articul di Lucio Levi, publicât une setemane indaûr sul sît dal Centro studi sul federalismo di Moncalieri, che al merete let e tornât a lei.
Si pues leilu achì.

Udinese – Lazio 0-1

L’Udin al piert cu la Lazio e al sbrisse jù in classifiche in maniere avonde preocupante.
La scuadre di balon furlane e je smamide e disorientade vie par dut il timp regolamentâr. Se sul imprin de partide e cjape sù cualchi iniziative, cjatant su la sô strade lis paradis di Berisha, cul passâ dal timp la formazion di Stramaccioni e patìs il potenziâl tecnic plui alt dai aversaris, che a concuistin un rigôr dopo vincjedoi minûts di zûc, lu segnin cun Candreva e a aministrin il rest de partide, intant che i blancs e neris a provin a tirâsi sù, ma ur mancjin il cjâf, lis gjambis e il cerviel par fâlu.

La partide e tache avonde ben pal Udin, stant che dopo cuatri minûts Di Natale al impegne Berisha, che al mande in corner, e lu imite ator dal prin cuart di ore Widmer. La Lazio e supere il moment di dificoltât e al rispuint cjapant sù il guvier de zone nevralgjiche dal cjamp. Suntun cross di Candreva par Klose al intervent in maniere ingjenue Wague e l’arbitri Massa al sivile (in maniere masse gjenerose?) un rigôr pai ospits, che al ven segnât dal stes Candreva.

Il gol cjapât al see lis gjambis al Udin e al met lis alis tai pîts de scuadre di Pioli, che denant di aversaris in dificoltât no fasin masse fature par aministrâ il zûc e il risultât. Il centricjamp dal Udin al è imberdeât di chel laziâl e ancjemò di plui dai siei limits struturâI: dut il repart – comprendût Allan – nol è in zornade e si lu viôt a clâr. Al zire a vueit ancje Bruno Fernandes, intant che Thereau e Di Natale a son bandonâts là indenant.

Sierât il prin timp cuntune conclusion fûr bersai di Candreva, la Lazio e scomence la seconde frazion cun personalitât e energjie gnove, sei in atac ancjemò cun Candreva, che al impegne Karnezis, che in difese, là che Mauricio al neutralize une biele iniziative di Di Natale e Berisha al è presint suntune conclusion di Badu. Si va indenant cussì fintremai ae fin: Stramaccioni al zuie lis cjartis Guilherme e Aguirre al puest di Bruno Fernandes e Thereau, ma la Lazio no si scompon, cun Berisha che al pare chel pôc che al à di parâ, e cussì al puarte a cjase trê ponts impuartants.

Pal Udin chel di îr al è un pas indaûr in graduatorie e une marcje indaûr ancjemò plui fuarte sot di ducj chei altris ponts di viste. Al covente dâsi une dreçade, prin che al sedi masse tart.

Napoli – Udinese 3-1

L’Udin al piert cuintri dal Napoli. Chê che e je une des scuadris miôr dal campionât, che soredut tes ultimis setemanis e je daûr a cori svelte in classifiche, simpri te tierce posizion, cuintri de scuadre di balon furlane, e fâs valê la sô supremazie teritoriâl e i siei mieçs tecnics superiôrs. E si zove ancje di un tic di fortune, che nol fâs mai mâl.

I blancs e neris, cussì, a tornin a cjase cence ponts e cun trê goi cjapâts e cuntun sôl fat. E cuntun tic di marum par vie che un pontut – daûr de partide zuiade de formazion di Stramaccioni – al podeve ancje stâi. Però, propit par chel, dongje dal displasê di tornâ a viodi l’Udin te colone di man drete de classifiche, i tifôs furlans a àn motîf di contentâsi e di jessi otimiscj pal avignî par vie che la scuadre, tal so complès e in tantis des sôs individualitâts, si à compuartade avonde ben, plui o mancul ta chei stes nivei des ultimis partidis. La prossime partide cuintri de Lazio e sarà la ocasion par confermâ cheste tendince gjenerâl, magari inte maniere miôr ancje par ce che al tocje il risultât.

Il Napoli, là che l’ex sampdorian Gabbiadini al mostre di jessi l’om in plui par dinamisim e capacitât di lâ in gol, al partìs fracant l’aceleradôr e dopo vot minûts di zûc al cjate la strade dal gol cun Mertens. Sù par jù une dozene di minûts plui indenant al rive il doi a zero pai parons di cjase, segnât juste di Gabbiadini suntun assist preseôs di Hamsik.

L’Udin al ven colpît ben e no mâl de partence a bombe dai partenopeus, ma impen di tirâ fûr la bandiere blancje al mostre di vê voie di provâ a dreçâ la partide, al tire fûr lis ongulis e al fâs viodi di vê la energjie e lis capacitâts par fâlu.
I blancs e neris a fasin moviment, a fasin zirâ il balon, a mostrin di no vê pôre e si fasin vîfs in maniere pericolose des bandis di Rafael, soredut con Bruno Fernandes, cun Allan, che al cjape la travierse, e cun Thereau, che al segne. Il guvier de partide, fintremai ae fin dal prin timp, lu à l’Udin, che si svicine al doi a doi cun Bruno Fernandes e cun Widmer, intant che il Napoli al scuen contentâsi di cirî di mantignî il so vantaç.

Tal secont timp il ritmi al è mancul fuart e dutis dôs lis scuadris a son protagonistis di buinis iniziativis e ancje di diviers erôrs. Al rive cussì il tierç gol napoletan, là che e je determinante une deviazion disforturnade di Thereau, che cussì al firme ancje une segnadure pai aversaris.

Al è un colpat: l’Udin al continue a sburtâ par cirî di recuperâ, ma la strade e je ancjemò di plui di rive sù. Nuie ce fâ par une biele punizion di Bruno Fernandes, che e varès podût ridusi distancis e… pendencis, e stant che sul finâl nancje De Guzman, di chê altre bande, nol rive a capitalizâ un bon atac celest, la partide si siere cussì. Pal Udin: mâl il risultât, ma avonde ben il zûc, la cundizion atletiche e la voie di fâ. Tra i blancs e neris a zuin ben soredut Allan, Piris e Bruno Fernandes

35 agns di Onde Furlane. Tancj auguris!

Chê dai 2 di Fevrâr e je une date impuartante pal Friûl, almancul dal 1980 incà. Cun di fat, in chê dì di trentecinc agns indaûr e tacave a trasmeti Radio Onde Furlane, che in dut chest timp, cemût che al ven contât ancje in chest articul (zapruder_ondefurlane), saltât fûr sul numar 34 de riviste Zapruder. Storie in Movimento, pal Friûl e pai furlans no je stade dome une radio, ma ancje tant di plui.

O pensìn che se no fos stade – e se no fos, ancjemò in dì di vuê – la «radio libare dai furlans», il Friûl e furlans a saressin (ancjemò?) mancul libars e mancul furlans.

Par sigûr, cence Onde Furlane, la lenghe furlane e sarès mancul “lenghe”: in tiermins di forme, stant che la azion de radio e di ce che si môf ator di jê e à vût une funzion no di pôc a pro dal so ricognossiment public a nivel politic e normatîf; in tiermins di sostance, par vie che il so ûs cuotidian te comunicazion, te informazion e tal intratigniment le à rinovade e rinfuarcide, i à dât une gnove vivarositât e i à dât chel status di lenghe vive, moderne e normâl (o almancul une part di chel) che lis dinamichis di minorizazion no i vevin permetût e dispès no i permetin ancjemò.

E je vere – cemût che a sclarissin su chei altris media dal Friûl il diretôr responsabil de emitente, Mauro Missana, e il president di Informazione Friulana, la cooperative che e je la editore de radio, Paolo Cantarutti – che chel di chest an «nol è un inovâl “taront” compagn dal prin cuart di secul, memoreât dîs agns indaûr, o dal trentenâl, festezât cuntun program siôr di manifestazions, però al è par sigûr un altri travuart impuartant e par chest al merete ricuardât.

Lis celebrazions – se si à voie di clamâlis cussì – a cjapin dentri une schirie di iniziativis dilunc vie dal mês di Fevrâr.
Si scomence doman, sabide ai 7 di Fevrâr, cuntune pontade speciâl di Dret e Ledrôs, l’apontament setemanâl condusût di Mauro Missana a tacâ di 9.30 a buinore, là che si fasarà in struc la storie de radio e di chel Friûl «diferent» che al è stât contât cun costance de emitente, tra rivendicazions di autoguvier e di tutele dai dirits linguistics, informazion cence bavais, musiche, culture e contats cu la Europe e cul mont, cul Friûl emigrant e cun chel imigrât.

Al sarà ancje alc altri di gnûf tal palinsest.
Simpri doman ai 7 di Fevrâr, a 8.30 a buinore, a tachin lis pirulis setemanâls di storie, di memorie, di savietât e di ironie popolâr di Robononis: ridi e riduçâ te Basse Furlane, par cure di Ferruccio Tassin. Impen, lunis 9 di Fevrâr, simpri a 8.30 a buinore, al torne Corais Musicâi, trasmission di divulgazion e aprofondiment musicâl prontade e condusude di Lia Bront cu la colaborazion tecniche di Roberto Gariup.

Pes novitâts plui impuartantis pai 35 agns di Onde Furlane si à di spietâ la fin dal mês, cu la scree dal sît web gnûf e di une app di pueste che e permetarà di scoltâ la «radio libare dai furlans» in ogni dontri cul smartphone e cul I-phone.
O spietìn di viodi – e soredut di doprâ – chel e chê.

Par intant, o sin ancjemò in timp par dî e par scrivi: Tancj auguris, Onde Furlane!

Udinese – Juventus 0-0

L’Udin nol vinç, ma al convinç. La scuadre di balon furlane e fronte la Juventus cun snait e cun caratar, no à sudizion viers dai prins in classifiche e salacor e pues lamentâsi in cont dal risultât, che su la fonde dal volum di zûc e dal numar di ocasions al podeve jessi un altri, plui favorevul ai nestri blancs e neris.

Stramaccioni al mande in cjamp un Udin in formât 3-5-2, cu la linie difensive formade di Piris, Heurteaux e Danilo, cu la cubie ofensive  Di Natale-Thereau e cul pacut dal centricjamp che si stramude intun 4+1, tignint cont des carateristichis e dal zûc di Bruno Fernandes, che al fâs il trecuartist e al à ancje il compit di tignî bot a Pirlo. Te Juve si viôt l’ex Pereyra, che al cjate puest tra i titolârs ancje par vie de dople assence di Marchisio e Vidal, intant che in atac dongje di Tevez al partìs dal prin minût Llorente.

Se la prime conclusion e je dai ospits, cun Llorente, za sul imprin de partide al è l’Udin a masanâ plui zûc. La scuadre furlane e je atente daûr, e ocupe i spazis e cussì e limite lis manovris juventinis te fasse mezane e e rive a puartâsi indenant cun sucès. Lu mostrin ad in plen une conclusion di Allan, che al sarà un dai miôr ae fin de partide, massime tal so duel cun Pogba, e ancjemò di plui la combinazion Thereau-Di Natale-Bruno Fernandes, che al minût numar 12 e puarte il zuiadôr portughês di bessôl denant di Buffon.

Magari cussì no, Bruno si inçopede sul plui biel e cheste ocasion mancjade e condizionarà dute la sô partide, però al è un biel segnâl di personalitât e vivarositât. A rivin cussì altris conclusions dal Udin: un tîr di Thereau fermât di Buffon e un altri fûr scuare ancjemò di Bruno Fernandes.
La Juve e rispuint cun Llorente e cun Pogba, ma l’Udin al manten il control des operazions e il prin timp al finìs cence goi.

Tal secont timp al è ancjemò Bruno Fernandes, dopo sîs minûts, a tirâ in puarte: Buffon al mande il balon in corner e te azion seguitive al prove la incuarnade Danilo, ma il puartîr de Juve i dîs di no. L’Udin al ten il balin in man e il balon tra i pîts, ancje se la Juve e rive a fâsi viodi indenant in maniere avonde pericolose, cu Pereyra che al cjape la travierse  e plui indenant cun Morata, metût dentri di Allegri al puest di un Llorente avonde smamît.
In cheste fase de partide Piris si met in evidence cuintri dal gnûf jentrât, che intun pâr di ocasions al prove il colp dal ko pe scuadre di Allegri ma nol rive a bersai.
Si fâs viodi ancje il so compagn Tevez, te ultime part de partide, ma l’Udin no si scompon e al ten bot ancjemò, cence pôre, cun snait e cun caratar.

E finìs zero a zero: un pont par om e pe scuadre di balon furlane une biele sodisfazion, che e va plui inlà dal risultât.
Un batiman particolâr par Allan, che tal so duel con Pogba al rive ancje a fâi un tunel al zoiel juventin, e al fâs fieste inte maniere miôr pe sô presince numar cent cu la maie dal Udin.