Zornade des Lenghis, ai 30 di Setembar Udin capitâl dal Friûl european e babelic

Chê altre dì, ai 26 si Setembar, o vin ricuardât ancje tal nestri blog la Zornade europeane des lenghis, che le calcolìn par sigûr une ricorence impuartantone pe Europe e pai siei citadins, stant che e je une di chês che a sclarissin miôr il significât di ce che e je pardabon la Europe «unide te diversitât»

Cun di fat, a tacâ dal 2001, cheste Zornade e je une ocasion particolâr par promovi la cussience di ducj in cont dal valôr dal pluralisim linguistic, dal dirit di cognossi e doprâ plui lenghis e des pussibilitâts di disvilup culturâl, democratic, sociâl e economic che a divegnin propit de cognossince e dal ûs des lenghis.

Cun cheste cussience e cun chescj intindiments, za di un pôcs di agns la Zornade europeane des lenghis e ven memoreade cuntune schirie di events e iniziativis particolârs propit in Friûl, tiere marcade a fuart de presince di plui lenghis.

Ancje pal 2017  la Zornade europeane des lenghis e devente une ocasion di fieste e di riflession, di incuintri e di cognossince, di comunicazion e salacor di rivendicazion, par ce che al tocje chei dirits linguistics che, massime pes personis di chenti di lenghe furlane, slovene e todescje (e plui in gjenerâl par ducj i citadins che a vivin in cheste part de Europe e dal mont), no vegnin ancjemò avonde ricognossûts, promovûts e garantîts.

L’apontament al è par doman, sabide ai 30 di Setembar, di 10 di buinore a 10 di sere tal cûr di Udin, sot de Loze dal Lionel.

Par iniziative de ARLeF, cu la colaborazion di Radio Onde Furlane e cu la partecipazion di tantis istituzions, associazions e altris entitâts che a son espression des comunitâts linguistichis furlane, slovene e todescje dal Friûl, a saran incuintris, spetacui, cines e musiche e si fevelarà di didatiche, editorie e media.

La vierzidure de Zornade e sarà in direte radiofoniche. A tacâ di 10 a buinore si fasarà, juste sot de Loze dal Lionel e sparniçade ator su lis frecuencis de radio libare dai furlans, une edizion speciâl de trasmission di Radio Onde Furlane, Dret & Ledrôs, dute dedicade ai temis dal plurilinguisim e de didatiche plurilengâl, cu la conduzion di Mauro Missana e la animazion di Michele Polo (atôr, marionetist, condutôr e colaboradôr di Radio Onde Furlane, che di agns al lavore intal teatri e intes scuelis). La trasmission e sarà struturade tant che une lezion radiofoniche, cul coinvolziment diret dai students e i intervents dai esperts dal setôr e dai coordenadôrs di Docuscuele, il gnûf Centri di documentazion ricercje e sperimentazion didatiche pe scuele furlane.
La direte radiofoniche e larà di dilunc pe buinore cul Ce fâ?, il program dedicât ai apontaments culturâi in Friûl e inaltrò, e cul Gjornâl Radio di Onde Furlane.

Di misdì e mieç indenant la manifestazion e proviôt la proiezion a cicli continui des produzions video in lenghe furlane fatis cul jutori de ARLeF (cun titui tant che, par esempli, INT/ART, Friûl Revolution, Maman! e Âf Blu…).

A trê al sarà il moment de animazion pai fruts par cure di Daria Miani, cun Maman!: leturis animadis, zûcs, cjançons, laboratoris manuâi e videos, daûr dal telâr de trasmission omonime che e va in onde su Telefriuli.

Di cuatri a sîs e sarà la presentazion di une schirie iniziativis editoriâls e audiovisîfs in lenghe furlane e di altris progjets metûts dongje des comunitâts slovenis e todescjis.

Al sarà ancje il spazi pal cabaret di Caterina Tomasulo, di sîs a siet, e po di siet a dîs si fevelarà di creativitât tes lenghis minorizadis de Europe, cun cualchi anticipazion de edizion di chest an di Suns Europe, che si fasarà sul tacâ di Dicembar tal Teatri Gnûf ‘Giovanni da Udine’.

Cun di plui a saran e i intervents dal rapper Doro Gjat e dal cjantautôr Franco Giordani e tante musiche di scoltâ, inte suaze di une version ‘live’ di Babêl Europe, la trasmission cuindisinâl che su Onde Furlane e presente la produzion musicâl contemporanie tes lenghis di minorance dal continent, de Ocitanie ae Sardegne, dal Paîs Basc ai Grisons, de Corsiche al Gales, dai Paîs Catalans ae Scozie, dai Sami dal Circul Polâr Artic fin ae Grecie Salentine.

Sot de Loze dal Lionel e sarà metude dongje ancje la mostre Furlan Lenghe de Europe

Il program complet si pues leilu culì.

Advertisements

Buine Zornade Europeane des Lenghis! (ancje tal 2017)

Vuê o sin ai 26 di Setembar e a tacâ dal 2001 cheste e je la Zornade Europeane des Lenghis.

E je une Zornade impuartante che o memoreìn simpri cun plasê.

Ancje chest an, vie pe zornade di vuê e dilunc di cheste setemane, par cheste ricorence dedicade al pluralisim linguistic tant che ricjece, dirit e oportunitât a vegni inmaneadis diviersis iniziativis in dute Europe.

Tra chestis si pues ricuardâ l’event metût adun dal Centri Linguistic de Universitât di Turin juste te zornade di vuê.
E je une iniziative dedicade soredut ai students e che e ponte la sô atenzion viers un aspiet dal plurlinguisim, chel che al tocje l’insegnament, l’aprendiment e la cognossince des lenghis che, in Europe e pal Mont, si cjatin in cundizion di dominance, a nivel statâl e in cualchi câs ancje intune dimension internazionâl.

La Zornade Europeane des Lenghis, però, e je la Zornade di dutis lis lenghis e duncje anche di chês che si cjatin in cundizion di minorizazion.

Par plui resons nus interesse soredut cheste dimension dal pluralisim linguistic.

O vin sintût che ancje chest an, par esempli in Friûl, al vignarà inmaneât alc di specific tai prossims dîs.

In spiete di savênt alc di plui, ancje pal 2017 il nestri auguri, compagn che agns indaûr, al è chel:
Buine Zornade Europeane des Lenghis a dutis e a ducj!

 

Roma – Udinese 3-1

La partide dal Olimpico e rispiete ad in plen i pronostics plui sempliçs, chei fats indenant su la fonde de posizion in classifiche di Udin e Rome. La scuadre di balon furlane e je flape e smamide, in linie cun chel che plui di cualchidun lo clame efiet Mer…Dacia Arena e cu chê blede di sproc sielzût de bande de societât blancje e nere par promovi la sô campagne abonament pe stagjon 2017/2018, e cussì e piert cuntun risultât taront. La Rome e rive a jonzi il risultât miôr par se cence masse sfuarçs.

Delneri al mande in cjamp une scuadre une vore diferente di chê che miercus e veve zuiât cuintri dal Toro. In puarte al è Bizzarri al puest di Scuffet, te linie difensive a tornin Samir e Angella, dongje di Larsen e Nuytinck, te mediane si torne a viodi Behrani denant de difese e Jankto dal principi adun cun Barak e De Paul, intant che la cubie di atac e je ancjemò chê formade di Lasagna, cun licence di movisi su dut il front, e di Maxi Lopez, prime ponte.

La partence no je mâl, cuntune conclusion pericolose di Jankto daurman, che e ven mandade in corner di Alisson, e cui mecanisims dal zûc de scuadre furlane che a mostrin di funzionâ ben. Magari cussì no, tal zîr di pôcs minûts chê buine impression si sfante e chel dal Udin al devente un câs par «Chi l’ha visto?».

La Roma e tache a masanâ zûc cun costance. Cun di plui e cjate ancje la bale buine par vuadagnâ il vantaç, cun Dzeko che si zove di une imprecision di Nuytinck, si cjate denant di Bizzarri e al segne. E je la certificazion de fin dal moment bon dal Udin e de ande gjenerâl de partide, cu la Rome che e comande e che e dispon, sburtade di Dzeko, Perotti e El Sharawy.

Bizzarri al à il so bon ce fâ e al rive a fermâ almancul un pâr di ocasions de Rome. L’Udin si svicine ae paritât cuntune iniziative di De Paul che al libere Maxi Lopez te aree di rigôr: l’argjentin al controle ben, però nol tire cu la potence che e covente e cussì Alisson si salve. Daûr de regule «gol mancjât, gol cjapât» la Rome e doplee il so vantaç: sugjeriment di Dzeko par El Shaarawy che al tocje ben te indiference de difese furlane.

La Rome e va dilunc a tignî in man il balin de partide, no si scompon denant di une biele azion dal Udin concludude di Jankto, e al siere il print timp cuntun altri gol di El Shaarawy, che al profite di un erorat di Larsen e al segne ancjemò.

Te seconde frazion l’Udin al mude fisionomie tatiche: al jentre Pezzella par Lasagna e in difese a restin in trê di lôr (Samir tal mieç, Angella su la diestre e propit Pezzella su la çampe), intant che Maxi Lopez al reste la uniche ponte e la linie mediane e devente a cinc e cu la jentrade tal cjamp di Fofana al mostre almancul in teorie une cierte propension ofensive.

La Rome e gjestìs la partide cence padins. Se l’Udin al prove a imbastî alc par tirâ in puarte cun Larsen e cun De Paul, i parons di cjase a cirin di incressi ancjemò il botin, ancje se il risultât al reste chel almancul fin tal ultin minût di zûc, cuant che Larsen al scate in verticâl suntun balon parât indenant di Nuytinck e al segne chel gol che no vevin rivât adore a cjatâ ni Bajic, dentri al puest di De Paul, ni il difensôr olandês, che al veve cjapât la travierse cuntun tîr cul cjâf, e nancje, di chê altre bande, Perotti che il so rigôr al finìs sul pâl ae diestre di Bizzarri.

Udinese – Torino 2-3

Chê di nossere e je stade une serade plene di «tremendismo» granata e furlan, tal ben e tal mâl. La partide tra Udin e Turin e à regalât emozions, spetacul e ancje aviliment.

Lis emozions – chês plui bielis – a tachin ancjemò prime de sivilade di Rocchi, cu la proiezion dal video di Revelli, la cjançon di Franco Giordani dedicade a Revelli Ruggero Grava, zuiadôr clautan dal ‘Grande Torino’.

Il «tremendismo» dal Toro si viôt di plui vie pal prin timp, cuant che si palesin ad in plen la fuarce ofensive dal ‘gjal’ Belotti, i sugjeriments di Ljajic, il sburt di Iago Falque su la corsie di çampe e lis gjeometriis disegnadis di Rincon. Chel dal Udin al da il miôr di se te seconde frazion, cu lis sostituzions di Danilo e Hallfredsson cun Angella e Jankto, che i dan une benzine gnove ae scuadre di balon furlane. Cun di plui, dutis dôs lis scuadris vie pe partide a fasin erôrs trements in difese.

L’Udin al mostre cualchi novitât te formazion rispiet aes ultimis partidis, cun Pezzella al puest di Samir, cun Fofana in cjamp dal prin minût, cun Hallfredsson al puest di Berhami e cun Jankto in bancjine, ma la sô partence e je lamie. Il Toro al tache cul pît just e dopo nûf minûts al cjate il gol: tîr di Ljajic, rispueste flape di Scuffet e Belotti che al segne cun snait e cun oportunisim.

La reazion dai blancs e neris no je alc e ce. Cundut achel a vegnin metudis dongje dôs ocasions par dreçâ la partide cun Lasagna e Maxi Lopez. Sirigu al sta in vuaite e nol cambie nuie, intant che daûr l’Udin al è ancjemò clopadiç e cussì al rive il dopli vantaç dai granatas (vistûts di zâl), cun Belotti che al jentre te aree di rigôr furlane, le bute tal mieç e al incrose lis gjambis di Hallfredsson che a mandin la bale te rêt daûr di Scuffet.

L’Udin al somee in zenoglon fintremai ae fin dal print timp. Dopo de polse al salte fûr alc di gnûf e di miôr, in graciis dai cambis fats di Delneri e probabilmentri di un invît coletîf a sgarfâ e a spudâ balins fat ai siei zuiadôrs de bande dal tecnic di Aquilee.

Cussì dopo trê minûts Jankto al vuadagne un penalty e De Paul lu segne e al smieze il svantaç. Lasagna e De Paul si fasin viodi ancjemò des bandis di Sirigu, ma no rivin a segnâ. Al passe il timp e il Toro al cjate il tierç bersai cuntune biele iniziative di Ljajic: sghiribiç e pinelade.

Però l’Udin nol mole e al rive il gol di Lasagna che al tocje cul pet une rispueste de difese aversarie.
Nol è avonde. I blancs e neris a provin ancjemò a sburtâ e a scombati, il Turin nol è cussì a plomp te sô tierce linie e l’Udin si svicine a chel trê a trê che nus varès plasût di plui, ancje se nol rive a gafâlu parcè che Ansaldi i met un blec sul ultin tîr di Jankto, ae fin di une buine combinazion cun Lasagna e Jankto.

Sabide trasfierte dal Udin a Rome e derby di Turin. Sperìn ben…

Babêl Europe tra la Diada, la Zornade Europeane des Lenghis e Joan Baez

Vuê al è martars e su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe, il program cuindisinâl dedicât ae produzion musicâl tes lenghis minorizadis dal nestri continent.

Il secont apontament dal mês di Setembar di chest an cun cheste trasmission al rive juste vot dîs dopo del Diada Nacional, la fieste nazionâl catalane, e une setemane prime de Zornade Europeane des Lenghis. Par chel il viaç a torzeon tra lenghis, musichis e nazions cence stât fat te programazion de radio libare dai furlans al cjaparà isprirazion di chestis ricorencis, lant daûr di un percors che al va des tieris dai Sami e al rive in Friûl e che al tocje ancje la Catalogne, il Paîs Basc e la Galizie.

E sarà la ocasion par scoltâ i Transjoik, la version de cjançon tradizionâl catalane Rossinyol que vas a França fate di Manel Lluis, un ‘classic’ dal repertori babelic dai Kosovny Odpadki, une altre cerce dal gnûf album dai Esposa, Xardin Interior, e fintremai la innomenade artiste americane Joan Baez che e cjante par basc, cu la sô version di Txoria Txori, cjançon di amôr e di libertât di Mikel Laboa, che si cjate tal album Diamond and Rust in the Bullring, jessût tal 1988.

Dopo de prime emission in direte, cheste gnove pontade di Babêl Europe e torne te programazion di Radio Onde Furlane in repliche: doman, miercus ai 20 di Setembar, a une dopo di misdì, e ancjemò sabide ai 23 a une e mieze.

Cun di plui si podarà tornâle a scoltâ tal sît internet de radio libare dai furlans.

 

Milan – Udinese 2-1


Miôr des primis dôs partidis di campionât, ma piês dal incuintri di domenie stade cuintri dal Genoa. L’Udin a San Siro al mostre di vê avonde gjambis, cjâf e cûr, ma al palese ancjemò limits di continuitât, di caratar e di precision.

La partence e je buine. Delneri al conferme l’implant de scuadre metude in cjamp la setemane stade ai Riçs: difese a cuatri cun Danilo e Nuytinck tal mieç, Samir a çampe e Larsen a drete; Behran in mediane daûr di Barak, Jankto e De Paul; Lasagna a miezis tra trecuartist e ponte e Maxi Lopez denant a scombati. La pression de scuadre di balon furlane – cu la maie zale pes trasfiertis – e ven certificade di un gol di Lasagna dopo dîs minûts di zûc, che però al ven anulât au la fonde de rilevazion de VAR.

Il Milan i met pôc par fâ valê la sô superioritât teritoriâl. A rivin cussì une conclusion fûr bersai di Kessie e un cuasi gol di Bonucci, cul salvament su la linie di puarte de bande di De Paul. I ros e neris a mostrin di vê sostance e soredut di podê poiâsi su la fuarce ofensive di Kalinic e su la costance de pression fate di Calabria dilunc de corsie di çampe. Di une combinazion tra i doi al salte fûr il prin gol milanist, che al à la firme dal zuiadôr cravuat.

La rispueste dal Udin e rive daurman, cun Lasagna che al profite di une erôr di Romagnoli e al segne l’un a un. Però il Milan al torne di gnûf al atac: Kalinic al segne il doi a un e Kessie si svicine al tris, cuntune conclusion che e ven fermade di Scuffet e dal pâl.

Il prin timp si siere cul Milan in vantaç e cul Udin che nol rive a reagjî cemût che al covente, intant che la seconde frazion si vierç cu la scuadre di balon furlane che e mostre di volê e di podê fâ alc di miôr. Cundut achel in principi al è ancjemò il Milan a jessi plui pericolôs.

La jentrade tal cjamp di Fofana al puest di Berhami e di Baijc par Maxi Lopez i dan une marcje in plui ae scuadre di Delneri. Donnarumma si met in mostre propit suntune conclusion dal centrocampist francês e il Milan al patìs la ande gnove de scuadre furlane.

Te ultime mieze ore abondante di zûc lis scuadris si slungjin e in chestis cundizions Barak al rive a organizâ miôr la manovre dal Udin, che cussì si svicine al doi a doi cun Baijc e cun Lasagna.
Di chê altre bande dal cjamp al scuen lavorâ ancje Scuffet, che al ferme une punizion di Rodriguez.
A son erôrs, biei numars e emozions e si rinfuartìs la sperance che la scuadre di Delneri e puedi gafâ chel pontut.

L’Udin al mostre une convinzion gnove e plui fuarte, ma dut chest nol è avonde. Te ultime part de gare si zonte ancje Matos, jentrât al puest di Jankto, ma la sielte di zuiâ plui su lis corsiis laterâls e di crossâ tal mieç al puest di sburtâsi indenant dilunc de linie centrâl e rint lis ofensivis furlanis mancul pericolosis. E cussì il Milan, che cun Kalinic al sbuse une tierce volte la puarte di Scuffet, ma par dibant, stant che la VAR no permet la convalidazion dal gol, al rive a puartâ a cjase la vitorie e duncje i trê ponts.

Udinese – Genoa 1-0

Plui Friûl e mancul Mer…Dacia Arena. La tierce partide di campionât – che e je la prime, dopo de fin dal marcjât – e va par sigûr miôr pal Udin, che al scombat e che al vinç.
Cuintri dal Genoa la scuadre di balon furlane si presente cuntune muse gnove, di une bande par vie che in atac dongje di Lasagna al è Maxi Lopez, che tal mieç dal cjamp si viôt ancje la cubie formade di Behrami e Barak e che daûr, dilunc pe corsie di diestre, al cjate spazi Larsen di chê altre parcè che e mostre di vê almancul un pôc di chel cûr e di chel snait che a someavin pardabon disparîts.

La ploie e marche il caratar de partide, che no je masse tecniche e spetacolâr, ma e je scombatude, penze, dure e gnervose. L’Udin al interprete l’incuintri inte maniere juste a tacâ dal principi. Il Genoa tal imprin al ten bot e tal prin cuart di ore la gare e je avonde ecuilibrade, ancje se i parons di cjase a somein in stât di fâ alc di plui.

Dopo cuindis minûts di zûc l’Udin al cjate il gol: punizion di Lasagna, tîr cul cjâf di Nuytinck che al cjape un len e corezion decisive di Jankto dentri de rêt daûr di Perin.
Il vantaç ur da ancjemò plui fuarce ai blancs e neris. De Paul e Jankto a van dilunc a fâ moviment par lôr cont e a pro di Lasagna e Maxi Lopez, i doi atacants a son ponts di riferiment pai lôr compagns e Barak e Behrami a masanin zûc e a metin adun une buine baridure te zone mediane, intant che Larsen e Samir a garantissin un ciert sburt dilunc des corsiis laterâls.

Il Genoa nol rive a fâ alc e ce, al stente te costruzion des azions e al rive a sburtâ un tic dome cun Lazovic. La sô situazion e va in piês tal ultin cuart di ore dal prin timp, cuant che Bertolacci al fâs une jentrade di kung fu su Lasagna e Maresca lu punìs cu la espulsion, dopo de verifiche cul var, e po Lapadula al scuen jessi cambiât di Juric par vie di un fastidi al zenoli.

Il prin timp si siere cul Udin in superioritât numeriche e cun Perin che al salve la sô puarte suntune punizion di De Paul. La seconde frazion si vierç cul Genoa che al prove a imbastî une reazion, cul efiet di rivâ a jessi pericolôs des bandis di Scuffet: scat di Taarabt, che al schiribice Samir, e conclusion fermade dal puartîr furlan.

I minûts a passin, al va dilunc a plovi e il zûc al è dûr e ruspiôs. L’Udin si difint e al prove a rispuindi, par viodi di rinfuartî il vantaç, cun Jankto e Lasagna, che a un ciert pont si cjate tes cundizions miôr par segnâ, judât in maniere involontarie di Rossettini, ma Perin i dîs di no.

Pezzella, che al veve cjapât il puest di Samir, al fâs une jentrade brute su Omeonga, al ven butât fûr cul cartelin ros de bande di Maresca e in chê situazion di paritât numeriche Delneri al sielç di gjavâ vie Maxi Lopez e di cuvierzisi cun Adnan.

Al è il moment di sgarfâ tal pantan e di tignî bot denant dal Genoa che al prove ancjemò a jessi pericolôs. L’Udin al fâs ce che al covente par difindisi, massime denant des iniziativis di Taarabt, che al rive ae conclusion intun pâr di ocasions: te prime nol rive a segnâ in graciis di un salvament di Danilo, te seconde al tire fûr di pôc. E cussì l’Udin al manten il vantaç, lu puarte fint in som de partide e finalmentri al met te sachete i prins trê ponts de stagjon. Alc al è alc.

Mostre dal Cine di Vignesie, ocasions di ‘LeB Pride’ e di braùre furlane

Si svicine la conclusion de edizion numar 74 de Mostre dal Cine di Vignesie, che par sigûr e je une des manifestazions plui innomenadis e plui impuartantis a nivel planetari par ce che al tocje la art cinematografiche.

La Mostre e je in chel istès un event culturâl, di costum e mediatic, tra produzion cinematografiche maistream e inovative, mondanitât, storie dal cine, marketing e iniziativis di ogni sorte.

Chest an, salacor ancjemò di plui che agns indaûr, il festival al à mostrât ancjemò di plui dutis chestis musis diferentis, in particolâr cu la partecipazion significative dal cine american.

A son ancje tancj altris aspiets che a segnin la edizion 2017 de Mostre. Tra chescj si pues menzonâ ancje alc di furlan e che nus tocje di dongje, in cualchi maniere, tant che associazion.

Al è il câs, par esempli, de cussì clamade sigle di cuviertine de manifestazion, che par chest an e je stade prontade di un creatîf furlan une vore cognossût, Tomas Uolli Marcuzzi, cemût che al ven contât achì.

Cun di plui, cuntune braùre e une partecipazion particolârs, nus fâs plasê ricuardâ che sul tapêt ros dal Lido di Vignesie al è passât ancje un dai fondadôrs de associazion Lidrîs e Butui, ven a dî chel che uns pôcs in agns incà, stant che al vîf tai Stâts Unîts, lu calcolìn il nestri «amì american».
O fevelìn di Piero Basso, diretôr de fotografie di Una famiglia, il film di Sebastiano Riso che al è tra chei in concors a Vignesie e che al jentrarà e programazion dai cines ator pal Stât talian a tacâ dai 28 di Setembar.

O sin contetons par lui.

Babêl Europe ‘cence pôre’, de Ocitanie ai Paîs Catalans e de Galizie ae Sardegne

Al rive Setembar e su lis frecuencis di Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât.

Il gnûf apontament in direte al è par doman, martars ai 5 di Setembar, a undis a buinore, sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu.

In cheste ocasion si fevelarà di atualitât, di grups ‘storics’ e di novitâts discografichis. Il viaç musicâl babelic su la radio libare dai furlans al cjaparà dentri  Ocitanie, Paîs Catalans, Galizie e Sardegne, cuntune misture siore di rock, pop, hip hop, jungle e patchanka.

Si tacarà cul scoltâ un toc dal repertori dai Lou Seriol, che juste sabide stade a Aison, te Val d’Estura, a à fat fieste pai lôr prins vincjecinc agns di ativitât, e un dai Obrint Pas, par no dismenteâ ce che al è sucedût pocjis setemanis indaûr a Barcelone e in Catalogne (i atentâts teroristics dai 17 di Avost e la mobilitazion de int cuintri dal terorisim, cu la manifestazion dai 26 di Avost).

Si larà dilunc cu la cerce di trê discs saltâts fûr vie pai ultins mês: Xardín interior dai galizian Esposa, Cabudanni dai sarts Dr. Drer e CRC Posse e Resisténcia dai Goulamas’k.

Dopo de prime emission in direte, Babêl Europe al tornarà in repliche su lis frecuencis di Onde Furlane ancje miercus ai 6 di Setembar, a une dopo di misdì, e sabide ai 9 a une e mieze, simpri dopo di misdì.

Ancje cheste pontade si podarà tornâ a scoltâle sul sît internet de radio libare dai furlans.