Musiche furlane a Milan. LaipNessLess e Fabian Riz il Prin di Avrîl alì dal Cox 18

laiplessness4

L’apontament al è pal Prin di Avrîl ma nol à nuie a ce viodi cui pes. Salacor al à a ce fâ cun altris tipologjis di bestiis, ven a dî lis Bestiis Forestis che a dan il titul al disc di esordi dal LaipNessLess.

Cun di fat, tra i protagoniscj dal event di notâsi in agjende, che si fasarà doman a Milan, e je propit la innomenade formazion de Basse Furlane, che di un pâr di agns incà e met dongje cun efiets simpri plui interessants une biele turbostaiare scalembre, visionarie e penze di rock e di blues.

La band nassude tra Muçane e Ziline e sunarà dal vîf intun dai puescj plui innomenâts de culture alternative a Milan, ven a dî il centri sociâl Cox18.

Cox18_01_apr_2016

Adun cui trê che a àn la ‘nostalgjie dal laip’ al sarà ancje un altri personaç innomenât di chel panorame musicâl che di passe vincj agns al ven clamât ancjemò ‘Gnove Musiche Furlane’, o ben cun non de etichete discografiche nassude in bande di Radio Onde Furlane tal 1999, ven a dî Musiche Furlane Fuarte. Al è Fabian Riz: un non che, di bessôl o in compagnie di altris di lôr, di Orko Trio ai Frontiera, al è une simpri une garanzie di poesie arude e trastolone e di blues salvadi e ruspiôs.

Par cui che si cjate di chês bandis e salacor ancje par cui che al è des bandis di Turin al è un apontament di no pierdi: dut al tache tor undis di gnot.

Ancjemò une volte musiche furlane fuarte e di esportazion.

fabian riz

 

Radio Zastava a Officine Corsare, braùre furlane, babeliche e ‘Slavika’

radio-zastava-02

Bulos e vonde! I Radio Zastava a àn fat une biele zarde chê altre sere a Turin alì dal circul Officine Corsare inte suaze dal festival Slavika.

O vin sintût che  varessin di tornâ a Turin intune altre ocasion avonde in curt.

Par intant, in rêt al è un biel album di fotos de serade di sabide stade. Si cjate achì.

Al torne Babêl Europe, musichis e storiis de Irlande al Kurdistan

Grainne-Holland

Doman ai 22 di Març, in direte a undis a buinore, su lis frecuencis di Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât.

La trasmission, lant daûr dai trois de storie, des storiis e de atualitât, e metarà dongje segnalazions di novitâts discografichis e altris selezions musicâls, dal Paîs Basc ae Irlande e dal Kurdistan ai Paîs Catalans e ae Ocitanie.

babel

Si pues scoltâ Babêl Europe in modulazion di frecuence (sui 90 Mhz te plui part dal Friûl e sui 90.2 Mhz in Cjargne) e in dut il mont in rêt ae direzion www.ondefurlane.eu, no dome doman in direte, ma ancje miercus ai 23 di Març a une dopo di misdì.

Cun di plui, in rêt al è pussibil tornâ a scoltâ ancje chês che a son za ladis in onde, a tacâ di chê dai 8 di Març, dedicade ae Zornade internazionâl des feminis, cuntune cerce di vôs e di musichis di feminis babelichis, di Gwenno a Claudia Aru, fintremai ai Clannad, ai Ilmu e a Valeria Tron.

obrint-pas

Sassuolo – Udinese 1-1

udin_neri

Alc al è alc e nuie al è nuie. La prime partide dal Udin vuidât di Gigi Di Canio si siere miôr des ultimis de ete Colantuono. A Reggio Emilia i blancs e neris no pierdin, a riscjin di vinci e ae fin a puartin a cjase un pontut che nol zove masse, cjalant la classifiche, ma almancul, ancje in graciis dai risultâts di Sampdoria e Palermo, i permet ae scuadre di balon furlane di no impantanâsi ancjemò di plui e di sintîsi un tic plui “vive” e un tic plui “scuadre”.

Vie pal incuintri l’Udin al à mostrât alc di plui e di miôr rispiet ae tendince dai ultins mês soredut tal prin timp, cuant che la formazion blancje e nere e je stade ordenade e dinamiche e dopo jessi passade in vantaç e à mantignût il control de partide, cui aversaris in dificoltât. Tal secont timp il Sassuolo al à fracât il pedâl dal aceleradôr, al à vuadagnât teren e al à costruît plui zûc e plui ocasions, cui blancs e neri che a àn patît la incressite de pression ofensive dai parons di cjase.

L’Udin al partìs cuntune linie difensive a trê, cun Danilo, Felipe e Heurtaux, une linie mezane a cuatri Widmer, Kuzmanovic, Hallfredsson e Armero, e cun Bruno Fernandes daûr des dôs pontis Thereau e Zapata. Il Sassuolo al mostre di jessi une scuadre ecuilibrade, ma e reste un tic sturnît denant de convinzion palesade dai ospits. Dopo vot minûts di zûc Felipe al siere ben suntune conclusion di Defrel, intant che la azion seguitive dal Udin si siere inte maniere miôr: cross di Thereau e tîr di prime intenzion di Zapata che al sbude la puarte difindude di Consigli.

A passin i minûts e la scuadre furlane e justifiche il so vantaç: si difint ben denant dai tentatîfs di atac metûts dongje dal Sassuolo e al rispuint ben, sburtât di Widmer, cun Kuzmanovic e Hallfredsson che a sierin ben tal mieç dal cjamp e a inviin cualchi buine combinazion ofensive. Prime de fin dal prin timp Felipe cul cjâf al impegne in maniere impegnative Consigli, che al rive a meti un blec e po al è Widmer a cjatâsi une altre biele ocasion par dopleâ il vantaç, ma un pôc al è brâf il puartîr vert e neri e un pôc i mancje fredece al zuiadôr svuizar.

Tal secont timp il Sassuolo al partìs cun plui decision, ma l’Udin al ten bot e al rispuint in cuintripît cun cualchi biele combinazion. Dopo di un cuart di ore Widmer al fâs un cross par Zapata che però nol rive a profitâ.
Di Francesco al zuie la cjarte Falcinelli, che al jentre al puest di Pellegrini e al cjape puest dongje di Defrel. Al rive cussì il gol di Politano che, suntun cross precîs di Vrsaljko, al segne l’un a un, zovantsi di une mieze durmide de difese.

Il Sassuolo al sburte par ribaltâ il risultât e si fâs ancjemò pericolôs des bandis di Karnezis cun Politano, intant che De Canio al cambie Zapata cun Di Natale, Thereau al à une bale buine par tornâ a vierzi la partide, ma al tire fûr, e i parons di cjase si puartin ancjemò al atac.
Cussì la partide si siere sul un a un. Un gol e un pont par om che a son masse pôc rispiet a ce che al covente – al Udin pe salvece, al Sassuolo pe Europe  – ma a son il risultât plui just. Alc al è alc e nuie al è nuie.

Usgnot i Radio Zastava a Turin, tal Festival Slavika al è ancje un pôc di Friûl

radio-zastava-02

Une setemane di incuintris, spetacui e concierts ator par Turin cun chê di fâ cognossi lis tantis musis de culture de part “slave” de Europe. Al è ce che al promet ancje chest an, te sô seconde edizion, il Festival Slavika, iniziative inmaneade de bande dal circul Polski Kot cu la colaborazion di une schirie di altris entitâts, circui e locâi de citât, cul jutori dal Consolât Gjenerâl de Republiche di Polonie di Milan, dal Istitût de Culture Polache di Rome e di Casa Polonia e cul patrocini dal Comun di Turin e de Circoscrizion 1.

La manifestazion, che e veve vude une anteprime un mês indaûr cul conciert dai Dubioza Kolektiv alì di Hiroshima Mon Amour, si vierç vuê, sabide ai 19 di Març, e e va indenant fintremai a sabide che al ven, ai 26. Il program al cjape dentri presentazions di libris, performance teatrâls, proiezions di cines, dibatits, seradis di cusine e la consegne di un premi pe tradizon miôr di une lenghe slave al talian, publicade vie pal 2015.

La viertidure di Slavika e je vuê a cinc sot sere alì dal Polski Kot, in vie Massena 19, cu la scree de mostre ‘La classe morta’ di Ruggero Bianchi, par cure di Silvia Bianchi e po cul incuintri cul poete polac Tomasz Rozycki.
Pe serade si spostisi li dal circul Officine Corsare, in vie Pallavicino 19, par une serade musicâl cui Radio Zastava, une formazion che e rive dal Friûl e che di passe dîs agns e interprete cun snait e cun personalitât ritmis e sunôrs di divignince balcaniche.

Il cartelon de rassegne al è siôr di apontaments di ogni sorte. Tra chescj a meretin ricuardâts, in particolâr, miercus ai 23 di Març, l’incuintri cu la scritore cravuate Dubravka Ugrešić, a 6 e mieze sot sere alì dal Circolo dei Lettori, in vie Bogino 9, e la proiezion, in anteprime pe Italie e in lenghe origjinâl cui sottitui par talian, dal cine 11 minuti di Jerzy Skolimowski a 9 di sere alì dal Cinema Massimo.

Altris informazions si cjatin achì.

Doman si scree Spazio Oblò. Culture e servizis a cjatin spazi a Udin

OBL_Casa_Masieri-est1-ctr-200-1

Une biele iniziative che e met dongje recupar edilizi, valorizazion dal patrimoni architetonic, solidarietât, culture, servizis e imprenditorie. E je chê che e ven screade doman, sabide ai 1 di Març, a Udin, cul non di Spazio Oblò.

L’apontament al è a dôs dopo di misdì in Vie Marinoni 11, alì de cjase Giacomuzzi Moore, che e je un dai tesaurs de architeture dal Nûfcent a Udin.
La cjase, progjetade tal 1949 de bande di Angelo Masieri, un dai architets plui impuartants dal Friûl dal secul passât e je stade adatade cuntrune atenzion specifiche pes fameis e pai fruts, cun chê di jessi spazi par ativitâts formativis, didtichis, educativis, agregativis, espositivis, congressuâls e conviviâls.

crot

La ristruturazion e je stade fate par cure de societât Oblò, inte suaze dal progjet PISUS UD CÛR, propit cun chei intidiments. Te cjase e davuelzarà lis sôs ativitâ ancje la associazion CROT Varia umanità , che e met dongje, tra lis altris, ancje il sît di informazion pes fameis www.misurafamiglia.it.

Luigi-Dal-Cin-1-copia

Une cerce di ce che si fasarà alì de cjase Giacomuzzi Moore – Spazio Oblò e vignarà dade vie pe zornade e pe serade di doman cun diviers apontaments, che a tocjin la educazion montessoriane, la danzeterapie e la narative pai fruts e i media, cu la colaborazion di Radio Magica e cu la partecipazion dal scritôr Luigi Dal Cin.
Cun di plui si podaran viodi dôs mostris: chê des ilustrazions fatis di Barbara Jelenkovich pal libri ‘ Apriti notte’ e chê de fotografe Virginie Foubert, dal titul ‘Nutrire il pianeta’.

Altris informazions in cont de iniziative e dal progjet si cjatin achì, achì, achì, achì , achì e achì.

Illustrazione di Barbara Jelenkovich

Il Grant Dizionari Bilengâl Talian-Furlan si insiore di altris 7.077 peraulis

lengate12

A son 7.077 i gnûf lemis (ven a dî lis gnovis peraulis) che a van a inricjî i contignûts e la utilitât dal Grant Dizionari Bilengâl talian-furlan (GDBtf), che si pues consultâlu sul sît de ARLeF – Agjenzie Regjonâl pe Lenghe Furlane. Tra chescj a son ‘svearin’, ‘ecuipolence’, ‘spot’, ‘di alte fedeltât’, ‘scjapinant’, ‘multicanâl’, ‘implant solâr’, ‘turboreatôr’, ‘stroboscopi’, ‘scansionâ’.

«A son soredut lemis tecnics», cemût che al marche il president de ARLeF, Lorenzo Fabbro, che al zonte: «Lis lenghis si evolvin e a van daûr dal cambiament e des dibisugnis dai timps. Ancje il furlan lu fâs e al à di fâlu. Chest gnûf sfuarç de Agjenzie al va juste in cheste direzion: contribuî a fânus deventâ citadins de lenghe che o fevelìn».

Il GDBtf, gjavadis lis gnovis peraulis, al ten dentri plui o mancul 62.000 lemis de bande dal talian, cirche 46.500 di une peraule sole (monorematics) e cirche 15.500 locuzions (polirematics); a chescj i fasin riferiment 63.500 lemis furlans, 45.000 monorematics e 18.500 polirematics.

GDBTF

Il GDBtf al è un strument al servizi dal furlan par ducj chei che a desiderin leilu e scrivilu in maniere corete daûr des regulis de grafie uficiâl de lenghe furlane. Il program nol jude dome inte traduzion dai lemis ma al ufrìs ancje un dizionari dai sinonims e dai contraris, i cuadris flessionâi dai verps e la pussibilitât di verificâ la division silabiche, il gjenar o il plurâl des peraulis.

Cun di plui, doprant la ricercje avanzade, l’utent al pues domandâ di visualizâ ducj i tiermins di une stesse categorie (par esempli chei filosofics) o, ancjemò, individuâ une liste di peraulis che a scomencin o a finissin cuntune cierte silabe. Dutis funzions che a puedin deventâ une vore utilis soredut tal cjamp de didatiche, ma ancje pe autoformazion.

Il GDBtf, compagn ancje dal COF – il Coretôr Ortografic Furlan, che alè un altri strument indispensabil pe lenghe, si pues consultâlu a gratis sul sît de Agjenzie Regjonâl pe Lenghe Furlane.

Udinese – Roma 1-2

udin_neri

La maledizion clamade Dacia Arena e va indenant, ancje in cjase. Dopo vê pierdût la setemane stade cuintri dal Frosinone, l’Udin di Colantuono al piert ancje cuintri de Roma, che cussì e segne la otave vitorie consecutive intal campionât.
Tal prin timp l’Udin al subìs ad in plen la supremazie dai ospit; tal secont al fâs alc di plui, ma ancjemò masse pôc par mostrâ di vê il cûr, il cerviel, lis gjambis e il snait che a coventin par zuiâ di balon in gjenerâl e ancjemò di plui par scombati par no sbrissâ in serie B, intune domenie là che la vitorie dal Carpi cul Frosinone e alce la cuote salvece e e fâs svicinâ inmò la zone retrocession.

I blancs e neris si presentin tal cjamp dal Stadi Friûl (e vonde: ancje se i media talians e la stesse societât Udinese a van indenant doprant une altre denominazion) cuntun 4-3-3 fals, stant che di pontis efetivis a’nd è dome une, Thereau. Cun di fat ni Bruno Fernandes, che al è vonde atîf tal meti in conession la prime cu la seconde linie, ni Edenilson, che al zuie une partide che e va daûr dal so standard piês, no son atacants vêrs. La linie mezane e viôt Lodi a direzi e Badu e Halfredsson in fase di interdizion, intant che daûr Widmer al è l’esterni di diestre, cun licence di sburtâ indenant, tal mieç a son Danilo e Felipe e a çampe al è Ali Adnan.

In teorie e varès di jessi une scuadre eculibrade, in stât di fâi cuintri a une siore Roma, no dome cun chê di ridusi l’impat dal atac zâl e ros, ma ancje par provâ a jessi pericolose des bandis di Szczesny. In pratiche tal cjamp si viodin dome i romaniscj, che a van dongje dal gol za dopo trê minûts cun Dzeko, che cul cjâf al disfrute un cross di El Shataawy (ma Karnezis al pare), e che a disvilupin un zûc ordenât, concret e dinamic, che ju puarte a vierzi lis segnaduris al cuart di ore dal prin timp propit cun Dzeko, dopo di un tentatîf di Perotti mandât in corner dal puartîr blanc e neri e prime di une altre conclusion di Salah.

L’Udin al reagjìs cemût che al rive: al fâs pôc o nuie, a part cualchi iniziative individuâl di Bruno Fernandes, che al veve provât a tirâ in puarte, ma cence precision, ancjemò prime dal gol di Dzeko. La Roma no si scompon e e continue a fâ il so zûc, che al prodûs altris conclusions di Dzeko e di Perotti, intant che l’Udin si fâs viodi des bandis di Szczesny dome cuntun tîr di Lodi.

Tal secont timp i blancs e neris a partissin cuntune marcje in plui, stant che cun Zapata a vuadagnin pês in atac. Dopo trê minûts Bruno Fernandes i da la bale buine a Thereau pe prime vere ocasion dal Udin di dute la partide: il francês al tire in puarte e Szczesny si salve in corner. Te azion seguitive al è Zapata che al tire cul cjâf, ma al cjape il pâl, intant che i blancs e neris a mantegnin almancul par un pôc une tension ofensive preseabile, cul sburt di Widmer e Ali Adnan che a partissin di lontan su lis corsiis esternis, cu la interdizion di Badu e Halfredsson e cu lis conclusions di Thereau e Bruno Fernandes.
La Rome si difint e si organize te fasse mezane, cun chê di no pierdi il control de partide, di alçâ la sô linie di zûc e di tornâ al atac, cul risultât – dopo di une ocasion mancjade di Badu – di fâsi vive des bandis di Karnezis cun El Sharaawy e cun Perotti.

Al somee che la cundizion de Roma e ledi al mancul e che i  ospits a e sintidin il pês de partide cul Real Madrid, ma l’Udin nol rive a profitâ dal moment e cussì e rive la seconde segnadure romaniste cun Florenzi. Pai blancs e neris la situazion si fâs grivie e penze e il public di cjase al sivile smonât e avilît. Al rive il gol Bruno Fernandes e si impie une flamute di sperance, che però si distude cuntun tîr fûr bersai di Matos e cu la conclusion de partide.

Babêl Europe, pai 8 di Març cercis di musichis di feminis babelichis

Gwenno

Al è une altre volte timp di Babêl Europe, il program cuindisinâl dedicât a lenghis, musichis e nazions cence stât, che si pues scoltâlu su Radio Onde Furlane martars in direte a 11 e miercus in repliche a une dopo di misdì.

Chê dai 8 di Març e sarà une pontade dedicade ae Zornade internazionâl de femine, cuntune cerce di vôs e di musichis di feminis babelichis, de Irlande ae Carelie e dal Gales aes Valadis Ocitanis dal Piemont.

logo_web_ROF_new

Il dopli apontament al è in modulazion di frecuence (sui 90 Mhz te plui part dal Friûl e sui 90.2 Mhz in Cjargne) e in rêt, in dut il mont, ae direzion www.ondefurlane.eu. Cence dismenteâ che e je ancje une aplicazion di discjamâ par scoltâ Onde Furlane  cui smartphones, cui tablets, cui iPads e cui iPhones.

Simpri sul sît de radio libare dai furlans si pues tornâ a scoltâ ancje chês altris trasmissions di Babêl Europe, a tacâ di chê che e je lade in onde cuindis dîs indaûr, cuant che si veve fevelât de Zornade internazionâl de lenghe mari e dai contignûts dal numar 6 de riviste Nazioni e regioni. Studi e ricerche sulla comunità immaginata, cu lis selezions musicâls par sloven, par francoprovençâl di Pulie, par catalan algherês, par breton e par euskera, gjavadis fûr dal repertori di Katalena, Abnoba, Claudia Crabuzza, Gweltaz Adeux e dal gnûf disc dai McOnak.

babel-1024x824

Frosinone – Udinese 2-0

udin_neri

La maledizion dal non Dacia Arena e fâs efiet ancje a Frosinone, là che l’Udin al zuie avonde pôc e al piert in maniere clare, nete e juste. Cussì la situazion in classifiche e torne a jessi grivie e penze e la scuadre tierce ultime e je propit chê dal Frosinone a cuatri ponts di distance dai blancs e neris.

I parons di cjase a mostrin di vê lis indeis claris a tacâ dal prin minût de partide. Cu la poie dal so public, il Frosinone al à voie di vinci e di cjapâ i trê ponts che idan ancjemò la sperance di lâ indenant e di provâ a scombati par restâ in serie A. La scuadre di Stellone e ocupe il cjamp cuntun 4-4-2 ecuilibrât, là che Paganini al cjape il puest di Tonev e al sburte cun continuitât in tandem cun
Kragl, intant che l’Udin al rispuint cun chel stes scheme de partide cuintri dal Verona, cun trê pontis (Di Natale, Thereau e Fernandes) e cuntune linie mezane formade di Badu, Guilherme e Kuzmanovic.

Il Frosinone al cjate la strade dal gol dopo dodis minûts cun Daniele Ciofani, che, fûr de aree di rigôr, suntun bon assist di Dionisi, si zire, al sbelance la difese blancje e nere cuntun biel moviment e al tire in puarte: nuie ce fâ par Karnezis.

La reazion dal Udin no si viôt, il Frosinone al manten il control de partide e dome tai ultins minûts, prime de polse, la scuadre di balon furlane e je pericolose cuntune combinazion Di Natale-Thereau, sierade de bande dal atacant francês cuntun tîr parât di Leali.

Tal secont timp la musiche no cambie. L’Udin nol rive a imbastî une azion di atac degne di chest non, sei pai siei limits che pe atenzion dai aversaris, che a sierin ducj i spazis e a lassin Di Natale e Thereau in cundizions di rivâ a fâ pôc o nuie. L’unic protagonist tra i blancs e neris al è Karnezis, che nol rive a fermâ la conclusion cul cjâf di Blanchars, ma al interven ben su trê tîrs di Kragl e suntun tentatîf di Dionisi.

Di chê altre bande dal cjamp Leali al à pôc ce fâ, cundut des sostituzions di Badu cun Matos e di Thereau cun Perica. Salacor l’Udin al è ancjemò plui smamît che tal prin timp. Domenie che al ven, al zuiarà in cjase cuintri de Roma: sunaraie la svearine, finalmentri?