Udinese – Atalanta 1-1

This image has an empty alt attribute; its file name is udin_neri.png

Alc al è alc e nuie al è nuie. Massime se che alc al è un pont puartât a cjase dopo dôs sconfitis une daûr di chê altre e dopo une rie di risultâts che, cu la ecenzion di dôs patis, di juste doi mês a son dome che partidis pierdudis, e se chel alc al è un pont cjapât zuiant cuintri di une scuadre fuarte tant che la Atalanta.

Inte partide di recupar de diesime zornade di campionât l’Udin al passe in vantaç daurman e po al cîr di tignî bot denant de viamence de pression ofensive de scuadre aversarie, rivade ai Riçs cun chê di provâ a vinci par fâ un salt indenant in graduatorie fint tal tierç pont. Ae fin lis dôs scuadris si spartissin un pont par om. Pal Udin l’incuintri cul Atalanta al rapresente une piçule bocjade di aiar bon, un segnâl di vite e di resistence e une ponte che e ten impins la bancjine di Gotti.

Ancje in cheste ocasion il tecnic dal Udin al è libar di scugnî sielzi ancjemò une volte di meti in cjamp une scuadre cu la stesse fisionomie des ultimis partidis: un 3-5-1-1, là che la uniche novitât al è Arslan tal puest di Walace, intan che Musso al è in puarte, Becao, Bonifazi e Samir a son in difese, in mediane, dongje dal todesc di divignince turche, a son i laterâi Stryger Larsen e Zeeglaar e Mandragora e De Paul, Pereyra al fâs al mieze ponte daûr di Lasagna, unic atacant blanc e neri. Gasperini invezit al pues permetisi rotazions sostanziosis e al lasse fûr il difensôr Djimsiti, i centicjampiscj Freuler e Gosens a centricjamp e soredut Ilicic e Zapata. Il tecnic al mande in atac Muriel, sapontât di Malinovskyi e Miranchuk, titulâr pe prime volte.

La partence dal Udin e je fenomenâl. Dopo pôc plui di vincj seconts la scuadre furlane e passe in vantaç: Lasagna si libere de pression di Romero e al passe la bale a Pereyra, che al segne, sghindant l’intervent di Palomino, profitant de buse lassade di Toloi e tirant a colp sigûr. Fat il gol, l’Udin al difint il risultât, sierantsi ben e pontant su verticalizazions in cuintripît fondadis su la velocitât di Lasagna. Lis bariduris fatis sù dai blancs e neris a tegnin avonde ben e Malinovskyi e Muriel a fasin fature tal passâlis. Lis ocasions miôr lis an Maehle e Toloi, ma Musso al è simpri tal puest just e di chê altre bande Gollini al ferme in maniere dure e suspiete un atac in aree di Pereyra, ma par Calvarese e par Giacomelli al è dut regolâr.

La Atalanta e cjate il gol dal un a un juste un minût plui tart dal pericul scjampât: bale par Muriel che si cjate cu la schene viers de puarte, al rive a zirâsi, al bruse Bonifazi e nol perdone Musso, segnant il so setim gol personâl cuintri de sô ex scuadre e sierant la prime frazion sul un a un. Il gol fat al sburte la Atalanta a zuiâ il secont timp al atac, ancje se no rive a esprimi dut il so potenziâl par vie che e à il so bon ce fâ tal disberdeâsi inte tele di ragn blancje e nere.

Une buine ocasion par passâ in vantaç e je chê che si cjate Miranchuk nûf minûts dopo de polse, ma il so tîr al finìs masse adalt. Une altre conclusion e je chê cul cjâf di Romero suntun cross de diestre di Maehle, che e va fûr dal spieli de puarte di Musso (26′), intant che cul passâ dal timp la jentrade in cjap di Gosens, di Ilicic e di Zapata no à i efiets sperâts di Gasperini.
L’Udin al va dilunc a difindisi cun grinte e cun sintiment. Gotti al cambie Mandragora cun Walace, che un cuart di ore plui tart al scuen lassâ il puest a Deulofeu, che si puarte dongje di Lasagna e intal finâl Bonifazi al va a fâ il median tal puest di Arslan, cun De Maio che al jentre tal so puest, adun cun Molina, che al cjape il puest di Stryger Larsen. I blancs e neris a tegnin bot e tal ultin Lasagna al ven servît in profonditât e al prove a passâ Toloi che al rive a fermâlu e ancjemò plui tart Zeegelaar le bute dentri suntun cross di Deulofeu, ma l’arbitri nol fâs bon il gol parcè che al viôt un fal su Gollini.

Sampdoria – Udinese 2-1

This image has an empty alt attribute; its file name is udin_neri.png

Une partide discrete che e somee indreçade inte maniere juste e che ae fn sinsiere inte maniere piês. L’Udin a Gjenue cuintri de Sampdoria e mostre il miôr e il piês dal so repertori: azions svelitis in verticâl, bielis paradis di Musso, cualchi numar di De Paul, ma ancje un tic di sfighe, pocje precision tal moment di tirâ in puarte e masse ingjenuitâts in difese. La scuadre di balon furlane e zuie un prin timp bon, e alce i zîrs dal motôr tal imprin de seconde frazion, e segne e però prime si fâs recuperâ dai parons di cjase e tal ultin cuart di ore e cjape il gol che al marche la vitorie de scuadre di Ranieri, cul efiet di sbrissâ indaûr in classifiche a trê ponts de zone retrocession.

Gotti al à pocje sielte e a Marassi al presente une formazion sù par jù compagne di chê che e veve pierdût cul Napoli: Musso tra i pâi, Becao, Bonifazi e Samir in difese, Stryger Larsen, Di Paul, Walace, Mandragora e Zeegelaar in mediane, Lasagna unic atacant cun Lasagna trecuartist daûr di lui. cun Pereyra che al varà di agjî daûr de uniche ponte Lasagne.
Dutis dôs lis scuadris a àn fam di ponts e la partide e scomence cuntun ritmi bon e cul Udin in bombe. La prime azion di atac e je de Sampdoria, cuntun cross di Augello par Quagliarella che al ven recuperât de difese udinese. I blancs e neris, in divise zale e blù, a mostrin di jessi in stât di fâi cuintri ai parons di cjase e di jessi ancje avonde insidiôs in atac cun Lasagna, che al impegne Audero su cross di Zeegelaar, e cun De Paul che al fâs di sugjeridôr par Pereyra e par KL15.

Dopo de partence viamente dal Udin, la Sampdoria e cîr di fâ valê la sô supremazie teritoriâl. Verre i da il so bon ce fâ a Musso che al è pront a parâ un so tîr dal limit de aree, e Quagliarella al lasse partî un diagonâl che nol ingjane il puartîr argjentin, che al interven, zovantsi ancje de colaborazion di Walace. Inte ultime part dal prin timp l’Udin al torne a jessi pericolôs cun Lasagna, che al cjate la rispueste pronte di Audero, cun Mandragora, che il so tap in al è masse debil, e cun De Paul che al cjape la travierse. Il belanç parziâl pe scuadre di Gotti al è avonde bon: vivarose e che al covente in atac, cun verticalizazions in velocitât, sierade avonde ben indaûr, ancje se in cualchi ocasion Quagliarella al à masse libertât di moviment.

Dopo de polse la musiche no cambie alc e ce. La Sampdoria e cîr di tignî di plui la bale, intant che l’Udin al siere i spazis e al ripuint cun verticalizazions su lis corsiis esternis e ancje dilunc di chê centrâl. Il gol dal vantaç furlan al rive juste di une azion di cheste fate: De Paul si fâs spazi tal mieç e prime al tire intor di un difensôr, po al impegne Audero, che le pare fûr, e ae fin al torne a recuperâle e le bute dentri.
L’un a zero al è meretât. La Sampdoria e prove a sburtâ cun chê di jonzi la pate, ma l’Udin no si scompon, si ten ben sierade indaûr cun chê di rispuindi in cuintripît.

Il zûc dal Udin al somee che al funzioni. Pecjât che vincj minûts dopo de polse Mandragora impen di liberâ la aree di rigôr al tire cence volê un rip a Candreva e Sacchi al sivile il penalty. Al va sul discut il stes Candreva e al segne cuntune pinelade che e ingjane Musso. La pate e somee dâi sodisfazion ai parons di cjase, che no son masse agressîfs e De Paul al firme une altre conclusion insidiose che no finìs masse lontan de travierse.
Tal ultin cuart di ore la Sampdoria e frache il pedâl de acelerazion e al cîr la strade dal gol de vitorie cun Colley, blocât di Musso cence problemis, e cun Keita, che al cjate su la sô strade Srtyger Larsen. Il ribalton al rive plui tart, cun Torregrossa che suntun cross di çampe al salte plui indalt di ducj e le bute dentri cul cjâf.

L’Udin nol mole e al prove ancjemò a rivâ a cjapâ un pontut, ma nol è nuie ce fâ, stant che Nestorowski, jentrât tal ultin tal puest di Walace, par pôc al piert l’apontament cul gol de pate suntun biel cross di Lasagna, intant che Musso al à ancjemò alc ce fâ intai minûts di recupar par neutralizâ un atac di Keita.

Udinese – Napoli 1-2

This image has an empty alt attribute; its file name is udin_neri.png

Une buine partence dal Napoli, une discrete tignude dal Udin, bielis paradis di Musso e di Meret e il gol dai ospits che tal ultin minût ur regale il sucès e i trê ponts. La partide di vuê tal Stadi Friûl si siere inte maniere piês pai blancs e neris di mister Gotti, che cussì a fasin un pas indaûr in graduatorie svicinantsi ae zone pericolose de code.

Dopo de pate di Bologne. Gotti al mude formazion e fisionomie de sô scuadre, stant che al puest dal 3-5-2 al presente 3-5-1-1 cun Musso tra i pâi, Becao, Bonifazi e Samir in difese, Molina, De Paul, Arslan, Mandragora, Stryger Larsen, Pereyra mieze ponte e Lasagna unic atacant. Gattuso al rispuint cuntune scuadre ben metude indenant, cun Insigne pont di riferiment pe manovre, e tornade a inventâ indaûr, là che dongje di Manolas si viôt Rrahmani, prime di vuê impleât dome par trê minûts cul Cagliari, e a çampe al è Hysaj.

I ospits si confermin chei che a partissin cul pît just e a àn un prin cuart di ore che al è micidiâl. Il prin tîr di Insigne, fûr di pôc, al rive dopo doi minûts e i partenopeus a cirin di tignî la bale e di zuiâle in maniere insidiose. L’Udin al ten bot e al cîr di rispuindi cun Stryger Larsen e Molina che a sburtin dilunc des corsiis laterâls, cul dinamisim di De Paul e di Pereyra e cun Lasagna che al è pront a ricevi e a scatâ. Lis iniziativis dai blancs e neris a produsin daurman un tîr debil di Molina che al ven parât cun facilitât di Meret e plui indenant une conclusion di De Paul che e va fûr parsore de travierese de puarte napolitane e un tentatîf di Mandragora che al à il stes destin.

Il Napoli al passe in vantaç dopo che Pasqua al sivile il rigôr par un fal di Bonifazi su Lozano: Insigne al tire dal discut e al impire Musso. La reazion de scuadre furlane e ven puartade indenant di De Paul e Pereyra, intant che Musso al fâs doi biei intervents sui tîrs di Di Lorenzo e Petagna. Dongje de prime mieze ore di zûc e cres la pression dal Udin, prime cuntune conclusion di Mandragora che Meret al ferme cence fastidis e po cun Lasagna che al profite di un balon zuiât malon di Rahmani indaûr, lu gafe, al salte Meret e al segne.

Cualchi minût plui tart De Paul i da une biele bale a Lasagna che al jentre in aree de bande diestre e al tire cjatant la rispueste di pît di Meret in jessude. Tal ultin cuart di ore la partide e je ecuilibrade e vivaorse e l’Udin al imbastìs un pâr di conclusions cun Bonifazi, che nol cjate la puarte, e cun Stryger Larsen, che al ven fermât dal puartîf furlan dal Napoli.

Dopo de polse i ospits a tornin a fâ zirâ la bale cun chê di vierzi cualchi spazi e a rivin a jessi pericolôs daurman cuntun tîr di Zielinski che al ven mandât indaûr di Musso e cun Insigne che al recupare la bale ma al tire di pôc fûr e po cun Maksimovic che al tocje une punizion di Insigne e al mande la bale sul esterni de rêt.

L’Udin si libere de pression dai aversaris e al impegne Meret cun Stryger Larsen, cun Lasagna e cun De Paul. Il Napoli al va al mancul cul ossigjen, cu lis gjambis e cul cjâf e i blancs e neris a provin a fâ valê la lô supremazie teritoriâl e a profitâ des busis e dai spazis che si crein tra la seconde e la tierce linie dai aversaris.

Tai ultins vincj minûts Gotti al clame fûr Stryger Larsen e Arslan e al mande dentri Walace e Zeegelaar e plui indennat al met Nestovski tal puest di Lasagna. Di une bande Insigne al à dôs ocasions ma cuant che la bale e je tal spieli Musso al pare cun sigurece, di chê altre a provin la conclusion Mandragora e Zeeglaar cence sucès e la partide e somee indreçade viers di une pate avonde buine e juste par dutis dôs is scuadris. Magari cussì no, juste tal nonantesin minût al rive il gol di Bakayoko che cul cjâf al impire Musso e al regale la vitorie ae sô scuadre. Un risultât che al fâs paiâ al Udin i siei erôrs in difese e in atac.

Bologna – Udinese 2-2

This image has an empty alt attribute; its file name is udin_neri.png

L’Udin al romp la rie des dôs sconfitis une daûr di chê altre cul Benevento e cu la Juve, vuadagnant un pont a Bologne. La scuadre di balon furlane e rive a gafâ la pate juste ae fin de partide, dopo vê patît la supremazie teritoriâl dai parons di cjase vie pal prin timp e in conclusion di une seconde frazion zuiade dute al atac, zovantsi ancje dal fat di cjatâsi in superioritât numeriche par vie de espulsion di Svanberg pôcs minûts dopo de polse.

Cul intindiment di dreçâ la situazion dopo de disfate patide a Turin domenie stade, i blancs e neris in divise zale e blu si presentin tal cjamp dal Dall’Ara cun Musso tra i pâi, Becao, Bonifazi e Samir in difese, Stryger Larsen, De Paul, Walace, Pereyra e Zeegelaar in mediane e Lasagna e Forestieri in atac. Cemût che si viôt, Gotti, che al è cence Pussetto, Okaka e Deulofeu, al prove une gnove cubie ofensive, plaçant Forestieri dongje di KL15.

L’inviament de partide al è segnât de iniziative dal Bologne. Cundut achel lis primis ocasions a son dal Udin, cuntun tîr di Pereyra che al va fûr di pôc e cuntun diagonâl di De Paul che al ven parât vie in corner di Da Costa. I parons di cjase cul passâ dai minûts a imponin il lôr zûc cul efiet di dâi cun Svanberg une bale di aur a Orsolini, che però nol rive a zirâle ben in puarte. Il zuiadôr si fâs perdonâ dal erôr cualchi minût plui tart cuntune biele punizion pinelade pal cjâf di Tomyatsu, che al segne il gol dal vantaç.

L’Udin nol rive a reagjî daurman e par dâi une sveade ae sô scuadre Gotti al clame fûr Forestieri, che inte prime mieze ore di zûc nol da segnâi di vite particolârs, e al met Nestorovski tal so puest. Un minût plui tart al rive il gol dal un a un, cun Pereyra che al è il plui svelt a tocjâ cul cjâf il balon, parât fûr di Da Costa in rispueste a une conclusion di De Paul, e cussì lu bute dentri.
Il Bologne al torne al atac, Musso si met in mostre cuntun bon intervent suntun tîrt di Svanber, ma po al ven impirât propit dal svedês che al tire a colp sigûr su assist di Barrow, sierant inte maniere miôr une azion inviade su la corsie di diestre di Palacio.

Finût il prin timp in vantaç, il Bologne al scomence la seconde frazion in difese. L’Udin al mostre daurman che nol à nissune voie. Un scat di Nestorovski al ven fermât in maniere iregolâr di Svanberg, che al cjape la seconde amonizion e al ven butât fûr cul cartelin ros di Ayroldi.
Mihajlovic pal moment nol fâs sostituzions e al domande ai siei atacants di dâ une man indaûr. L’Udin al invie chel che si pues clamâlu un assedi. Surian, Barrow e Orsolini a fasin i difensôrs e i parons di cjase a tirin sùù murais e bariduris.

Da Costa al à il so bon ce fâ, tra un tîr di De Paul, un scjuc sui pîts di Lasagna e altris tentatîfs dal Udin. Là che nol rive il so puartîr, il Bologne si salve cuntun tic di fortune: al è ce che al sucêt in particolâr in ocasion di un biel tîr di Mandragora, jentrât tal puest di Walace in cubie cun Arslan in sostituzion di Zeegelaar, che al passe Da Costa ma al sbat sul secont pâl.

Intal ultin cuart di ore Gotti al bute dentri ancje Molina e Ouwejan, tal puest di Stryger Larsen e Samir, cun chê di cirî di fâ rindi il plui pussibil inte fase ofensive la superioritât numeriche. A fuarce di dâi, ancjemò cun De Paul in evidence, l’Udin al rive a cjatâ il gol dal doi a doi, tal secont minût di recupar, cun Arslan che al jentre inte aree di rigôr e al tire cun decision une bale che forsit e ven ancje tocjade di Hickey e in cualsisedi maniere e va a finîle tal sac daûr di Da Costa. Un risultât just che al rilance almancul in part la scuadre furlane, che si pues dî che fintremai e vinç, almancul se si calcole il possès de bale e il numar di tîrs in puarte.

Juventus – Udinese 4-1

This image has an empty alt attribute; its file name is udin_neri.png

L’Udin al scomence il 2021 in chê stesse maniere che al veve finît il 2020: cuntune sconfite. Dopo vê pierdût la ultime partide in cjase, ae fin dal an passât, cuintri dal Benevento, la scuadre di balon furlane e fâs la vitime sacrificâl in cjase de Juventus, che e veve une dibisugne mostre di vinci, par ripiâsi dai trê patafons cjapâts de Fiorentina.

A Turin Gotti al met in cjamp Musso in puarte, Bonifazi, De Maio e Samir in difese, Stryger Larsen, De Paul, Walace, Pereyra e Zeegelaar in mediane e Pussetto e Lasagna in atac. La Juve e mostre daurman che e je la parone di cjase, ancje se, almancul in principi, l’Udin nol somee impressionâsi masse, ni cuant che Ronaldo al prove a tirâ ma nol cjate il spieli de puarte e nancje su la zirade di Ramsey, e anzit si fâs vîf des bandis di Szczesny cuntun tîr cul cjâf di Pussetto, che al è debil e nol cree problemis ae Juve, e po cun De Paul, che le bute dentri, ma Giacomelli, cjalât il Var e viodût il control de bale cu la man dal argjentin, nol fâs bon il gol.

Sfantade la pussibilitât di passâ in vantaç, l’Udin al tache a patî la pression e la iniziative de scuadre di Pirlo. I parons di cjase, a fuarce di dâi, juste passade la prime mieze ore, a segnin cun Ronaldo, che al impire Musso, zovantsi di une bale robade cun mistîr di Ramsey a De Paul, pardabon pôc atent in chê ocasion, e prontade cun precision a pro dal portughês. La scuadre furlane e à daurman la pussibilitât di impatâ, cuant che Ramsey si fâs scjampâ un balon che al sarès bon par Lasagna, che però nol tire cu la fuarce e cu la precision che a coventin.

Sierât il prin timp ancjemò cuntune conclusion di Ramsey che no spaurìs Musso, la Juve e cjate il gol dai doi a zero tal imprin de seconde frazion: assist di Ronaldo e conclusion a bersai di Chiesa cun Musso che nol pues fâ nuie. La bale e jentre ancjemò inte puarte dal Udin cun Ramsey, che intune fase di batibui inte aree di rigôr furlane al tire in puarte sentât par tiere dopo vê tocjade la bale cu la man e par chel ancje in cheste ocasion Giacomelli no fâs bon il gol.

L’Udin al prove a alçâ il cjâf cun chê di dreçâ la partide. Magari cussì no, nol à masse fortune, stant che un tîr cul cjâf di Stryger Larsen al sbat cuintri de travierse. La scuadre di Gotti e stente e e fâs fature, la Juve e à la vitorie inte sachete ma e prove ancjemò a incressi il vantaç, rivant a jonzi il tris ancjemò cun Ronaldo, che al profite di un invît perfet di Bentancur.

La rispueste dal Udin e je une altre travierse: Forestieri, jentrât tal puest di Pussetto, i da la bale a Zeegelaar che il so tîr al sbat cuintri dal len parsore di Szczesny. Pal ultin cuart di ore Gotti al zuie lis cjartis Mandragora e Nestorovski, che a cjapin il puest di Pereyra e Lasagna, e po al cambie Walace cun Makengo. L’Udin al rive a segnâ juste tal ultin, cun Zeegelaar, ma tal recupar al rive il poker dai parons di cjase, firmât di Dybala. Vitorie nete e pesante pai parons di cjase e sconfite che e bruse pai furlans, che a pierdin posizions in graduatorie e, se no rivin a fâ ponts, a riscjin di sbrissâ inte zone retrocession.

Udinese – Benevento 0-2

This image has an empty alt attribute; its file name is udin_neri.png

Nuie fieste di Nadâl. La partide dal Udin in cjase cuintri dal Benevento e finìs inte maniere piês. I blancs e neris a fasin zûc e a imbastissin ocasions ma no rivin a disfrutâlis inte maniere miôr intant che i ospits a son plui concrets, atents daûr e precîs e concrets in atac, e ae fin a vincin: doi goi fats e trê ponts puartâts a cjase.

Gotti al presente sù par jù la stesse formazion titulâr che domenie e veve zuiât cuintri dal Cagliari. Lis variazions a son dôs: Arslan, tal mieç tra Di Paul e Pereyra, là che in Sardegne al jere Walace, e Lasagna tal puest di Deulofeu, dongje di di Pussetto in atac. Confermade la difese a trê cun Becao, Bonifazi e Samir, compagn dai letarâi Strygen Larsen e Zeegelar. Un sôl cambiament par Inzaghi a pet de vitorie cuintri il Genoa: in mediane al torne Schiattarella.

La partide e tache cuntun bon ritmi. La prime ocasion e je pal Udin, cun De Paul che i da une bale di aur a Lasagna che al tire fûf bersai. Al è plui precîs Caprari, doi minûts plui tart: i robe la bale a Arslan e al tire un diagonâl che al finìs tal cjantonut a çampe di Musso e al è un a zero.

Lasagna al à une altre ocasionone, ma nol rive a gafâ l’un a un. L’Udin al alce la linie dal so zûc e i ospits si sierin ben, cirint di rispuindi in cuintripît cun Lapadula. La scuadre furlane e à ancjemò pussibilitâts di segnâ. Il terminâl principâl des azions blancjis e neris al è simpri Lasagna, che al va dilunc a tirâ fûr de puarte. Il prin timp si siere cuntun pâr di conclusions di Caprari che no cjatin il bersai.

Il secont timp si vierç ancjemò cul Udin che al sburte indenant. De Paul al vuide la scuadre e lis primis conclusions dopo de polse a son di Zeegelar, che il so tîr cross al ven tocjât in maniere pericolose di Letizia che al lenç l’autogol, di Pussetto, che al ponte il secont pâl, e di Becao, che in acrobazie al tire masse adalt.

Inzaghi al cambie Ionita e Insigne cun Tello e Dabo tal puest di Ionita e Famose, Gotti al rispuint cun Walace e Deulofeu par Arslan e Bonifazi e l’Udin al passe dal 3-5-2 al 4-3-3. Il catalan al jentre ben inte partide e i da une buine bale a Lasagna, che si fâs fermâ di Montipò. Ancjemò cambis pal Benevento – fûr Lapadula e Improta, dentri Foulon e il zovin Di Serio – e pal Udin, che al scuen rinunciâ a Deulofeu, che il so puest al ven cjapât di Nestorovski, e po ancje a Zeegelar par Ter Avest.

I minûts a passin, la pression dal Udin si smole e il Benevento al respire e al prove a rispuindi ancjemò in cuintripît. Al rive il secont gol: assist di Caprari par Letizia che al jentre in aree de diestre e al spare inte crosere dai pâi cul efiet di rinfuartî il vantaç de sô scuadre e di seâ lis gjambis al Udin, che al piert fuarce ofensive e nol è nancje masse fortunât, stant che su punizion De Paul al cjape in plen la travierse. E cussì il Benevento al vinç e al passe l’Udin in classifiche.

Cagliari – Udinese 1-1

This image has an empty alt attribute; its file name is udin_neri.png

L’Udin al va dilunc a fâ ponts. In cjase dal Cagliari la scuadre di balon furlane e zuie une buine partide, ordenade e ecuilibrade. I parons di cjase a patissin la organizazion e la costance dal blancs e neris, ma a tegnin bot e a rivin fintremai a passâ in vantaç ator de prime mieze ore di zûc. L’Udin al recupare tal prin cuart di ore dal secont timp e al prove a vinci, ancje se ae fin il risultât al reste un a un.

Gotti al mande in cjamp Musso tra i pâi, Becao, Bonifazi, Samir in difese, Stryger Larsen, Di Paul, Walace, Pereyra e Zeegelaar in mediane e la cubie Pussetto-Deulofeu in atac. L’alenadôr dal Udin al sielç Walace in cabine di regjie, intant che Di Francesco al rilance Godin.

La prime iniziative ofensive e je dal Cagliari, cuntun cross di Lykogiannis par Pavoletti che al ven fermât di Musso. L’Udin al rispuint daurman cuntune azion di Samir che al crosse in aree par Pussetto, che al tire ben ma Cragno al pare. I blancs e neris in maie zale no molin, cun Pussetto e Deulofeu in evidence. Il ritmi al è alt, il Cagliari al patìs il pressing furlan, Strygen Larsen al ven butât jù inte aree rosse e blu ma par Piccinini al è dut in regule.

Sghindât in plui ocasions il pericul di cjapâ un gol, il Cagliari al prove a reagjî cuntun tîr di Lykogiannis, cuntune punizion di Marin e cuntune deviazion di Pavoletti che no crein problemis a Musso. Dopo fermât un scat pericolôs di Deulofeu, il difensôr grêc de scuadre sarde al bat une punizion e al segne e Sottil al prove a incressi il vantaç ma Musso i dîs di no.

Sot di un gol, l’Udin al torne a tacâ a masanâ zûc e a fâsi vîf des bandis di Cragno, che al è un pôc clopadiç intes jessudis, ma di chest i blacs e neris no rivin a profitâ, intant che il puartîr dal Cagliari si mostre atent e puntuâl suntune conclusion di De Paul e cussì il risultât nol cambie fin ae polse.

La seconde frazion si vierç cul Udin in bombe: al ten la bale e al imbastìs azions e acelerazions a soprese, tacant cuntun tîr di Bonifazi, cuntun biel cross di Stryger Larsen par Pussetto che al tire cul cjâf ma al mancje il bersai di un et e po cuntune conclusion di Deulofeu fermade di Cragno. Gotti al clame fûr il catalan e al met dentri Lasagna, che al à daurman la ocasion par meti la sô firme su la partide: lanç di Pussetto e scat di KL15, che al bruse Carboni e al segne.

L’Udin no si contente e si puarte ancjemò indenant cuntune azion personâl di De Paul, cuntun tîr di Lasagna che Carboni al mande in corner e cun Becao che al tire cul cjâf pôc adalt parsore la travierse. Il Cagliari al rispuint cuntun pâr di cross di Nandez e di Lykogiannis, che al servìs ben Joao Pedro, ma Samir al salve cuntun grant intervent.

A passin i minûts, il ritmi si manten bon ancje se la precision di passaçs e tîrs e va al mancul. Gotti al met dentri Mandragora e Nestorovski tal puest di Pereyra e Pussetto. I doi gnûfs jentrâts si metin in evidence in zone tîr ma cence sucès, Cragno al pare une punizion di De Paul e juste tal ultin al torne a fâsi viodi in atac Lykogiannis che al tire e al lenç la travierse. E je la ultime ocasion, prime dai cuatri minûts di recupar che a compagnin lis dôs scuadris tai camarins cuntun gol par om e un pont par om. Pal Udin al è il siest risultât positîf in file.

Udinese – Crotone 0-0

This image has an empty alt attribute; its file name is udin_neri.png

L’Udin nol rive a fâ il poker di vitoriis une daûr di chê altre. La scuadre di balon furlane e zuie une buine partide là che e cîr di fâ rindi la sô cundizion buine e la sô supremazie teritoriâl, ma e cjate su la sô strade un Crotone che al scombat, al ten bot e tra i pâi si zove de serade sì di Cordaz.

Gotti al sielç di mandâ in cjamp fin dal principi Nestorovski dongje di Pussetto in atac, Becao tal puest dal infortunât Nuytinck in difese, dongje di Bonifazi e di Samir, e Arslan e Molina in mediane, cun chê di lassâ polsâ almancul un pôc Stryger Larsen, adun cun De Paul, Pereyra e Zeegelar. Di chê altre bande Stroppa al piert il scualificât Magallan e al met dongje difese cun Marrone, Cuomo e Golemic, intant che Petriccione al è in regjie, Messias al passe in mediane e la cubie di atac e je chê cun Riviere e Simy.

La partide e à une buine partence. La prime ocasion e je chê di Bonifazi che al tente la deviazion su corner di De Paul ma la bale e va fûr. Il Crotone al rispuint cuntun tîr cul cjâf di Simy che Musso al bloche cence dificoltâts e pôc plui tart il puartîr argjentin al interven cun sigurece ancje suntune conclusion di Messias, intant che Arslan al prove a impirâ Cordaz cence sucès.

Passâts i prins vincj minûts di zûc, De Paul al cjate Pussetto in aree aversarie e l’atacant la bute dentri, ma il gol nol ven fat bon parcè che Nacho al è in fûr zûc. I blancs e neris a van dilunc a cirî il gol, ma un pôc no son masse precîs intes conclusions lôr e un pôc a son atents i aversaris e cussì il prin timp, ancje dopo des gnovis conclusions di Messias e di Pussetto, si siere cence goi.

La seconde frazion e je segnade di une schirie di ocasions di gol dal Udin e di diviers intervents impaurtantons di Cordaz. I prins tentatîfs dopo de polse a son di Nestorovski e di Molina che a impegnin il puartîr dal Crotone e dopo di lôr a tornin a fâsi viodi indenant ancjemò Pussetto e De Paul. I ospits a fasin sù dutis lis bariduris che a coventin par tignî bot, intant che Gotti al mande in cjamp Deulofeu tal puest di Nestorowski par provâ a scjavaçâlis.

Il catalan si met daurman in evidence sei in zone di tîr che tant che om dal assist. I blancs e neris a imbastissin buinis manovris che a produsin gnovis ocasions, cun Pereyra, cun De Paul, cun Deulofeu e cun Pussetto, ma se la bale e je tal spieli de puarte e ven simpri parade fûr di Cordaz e cuant che Pussetto al rive fintremai a tornâ a butâle dentri su assits di Deulofeu, il gol nol ven fat bon pe posizion iregolâr dal so compagn di scuadre.

A vincj minûts de fin Pereyra al ven butât jù inte aree dai ospits ma l’arbitri nol sivile. L’Udin al prove ancjemò a concuistâ la vitorie fin tal ultin minût di recupar, ma nol rive a jonzi il risultât plen.
La division dai ponts e conferme i blancs eneris inte metât de classifiche e i permet al Crotone, almancul par cumò, di no jessi plui l’ultin in graduatorie di bessôl e di cjatâsi a cuote 6 cul Toro e cul Genoa.

Torino – Udinese 2-3

bandieris-friuul

L’Udin al vinç ancje a Turin. In cjase di un Toro clopadiç i blancs e neris a zuin une partide cun cûr e cun sintiment e a rivin a puartâ a cjase trê ponts impuartants che ju sburtin fintremai inte metât de graduatorie. I parons di cjase a confermin il lôr moment negatîf, a restin impantanâts intal penultin puest e a incressin ancjemò la avilizion dai lôr tifôs.

Tal stadi dedicât al ‘Grande Torino’ Gotti al torne in bancjine e al presente il so 3-5-2 cun cualchi novitât: denant di Musso, in puarte, inte linie di difese a son Bonifazi, Nuytinck e Samir, intant che in mediane si cjatin Stryger Larsen, De Paul, Walace, Pereyra e Zeegelaar e in atac il mister al sielç Pussetto e Deulofeu. La partence de scuadre furlane e je buine: i undis di Gotti a zuin in maniere atente e ordenade. Il Toro al palese ducj i difiets che a segnin lis sôs partidis dal principi de stagjon, tra confusion tatiche, erôrs tecnics e la mancjance totâl di chel che lu clamin ‘tremendismo granata’, par no fevelâ dal fat che almancul trê di lôr – Linetty, Zaza e Meité – a somein jessi ad in plen fûr de partide.

L’Udin al profite de situazion, al fâs zirâ ben la bale e al imbastìs cualchi buine ocasion cun De Paul, Zeegelaar, Pussetto e Deulofeu, ma i intervents di Nkoulou e Sirigu no i permetin di segnâ. A fuarce di dâi il gol al rive: dopo di un contat almancul suspiet cun Walace, che però nol ven rilevât ni di Massa e nancje dal var di Irrati, Meité al piert la bale a vantaç di Deulofeu che le controle e al fâs un assist par Pussetto che al impire Sirigu.
Il gol al sune la svearine pal Toro, che al prove a fâsi vîf des bandis di Musso cuntun cross e cuntun tîr fûr bersai di Bellotti, ma nol rive a fâ nuie plui e cussì il prin timp si siere cul Udin in vantaç.

Dopo de polse il Toro al torne in cjamp cun Izzo, Lukic e Bonazzoli che a cjapin il puest di Nkoulou, Meité e Zaza, però la situazion no cambie di un et. Anzi, l’Udin in curt al rive a tornâ a segnâ cun De Paul, che al profite inte maniere miôr di une buine bale prontade di Pereyra. La partide e somee segnade e sierade e il ritmi al cale, ma in realtât, passâts vincj minûts, il secont timp al torne a impiâsi cun Bonazzoli che al robe la bale a Samir e i passe la bale a Bellotti che al firme il so centesim gol cu la maie granata.

Un minût plui tart al rive il gol di Bonizzoli e i parons di cjase a jonzin la paritât, che però e resist dome un altri minût parcè che al torne a segnâ l’Udin cun Nestorovski. La scuadre furlane e recupare daurman il so blackout e di chel moment indenant e torne in partide, cun atenzion daûr e cun sgrimie in atac. Il Toro al prove a dreçâ l’incuintri ma nol è nancje masse fortunât, stant che Rodriguez su punizion al cjape la travierse, intant che di chê altre bande Lasagna, jentrât tal puest di Pussetto, si si mangje il gol dal cuatri a doi cuntune conclusion fûr scuare dopo vê vinçût un duel in velocitât, juste prime dal recupar, che al dure cinc minûts, e il risultât al reste chel. Sodisfazion furlane e avilizion toriniste.