Udinese – Bologna 4-0

bandieris-friuul

Une vitorie che e vâl il passaç dal turni di Cope Italie e soredut che e puarte une bocjade di chel aiar bon e positîf che al mancje in campionât zaromai di dôs partidis. L’Udin in cjase cul Bologna al zuie ben e al vinç cun merit.
I blancs e neris a sierin la pratiche bielzà intal prin timp cui goi di Barak, che al è brâf a stramudâ intune ocasion un control sbaliât di Lasagna e al profite par metile dentri cuntune pinelade precise e potente, e di De Maio, che i met la çate juste sui disvilups di un tîr di punizion. Il Bologn nol rive a fâ alc e ce.

Intal secont timp la scuadre di Mihajlovic e prove a cumbinâ alc di plui. I siei tentatîfs di impirâ Nicolas no àn sucès. L’Udin al ten bot, no si scompon e al va dilunc a masanâ chel zûc che al covente par tignî sot control aversaris e partide. Al rive cussì il tierç gol, firmât di Mandragora, che al è brâf intal finâl a zovâsi di un biel assist di Fofana e a no lassâ redenzie a Da Costa cuntune biele conclusion che e jentre dongje dal prin pâl.

Intai minûts di recupar e je glorie personâl ancje pal Lasagna, usgnot cu la fasse di cjapitani, che dopo vê cirût il gol vie par dute la partide (e dopo vê cjapât ancje un pâl…) al rive a butâle dentri e a completâ il poker.

Cualificazion meretade pal Udin, che al varà la pussibilitât di sfidâ la Juventus intai otâfs di finâl in program in Zenâr, e un plen di energjie positive par frontâ il Napoli sabide, inte prossime zornade dal campionât.

Lazio – Udinese 3-0

L’Udin a Rome al fâs la vitime sacrificâl pe Lazio che za vie pal prin timp al siere la partide cun trê goi. I blancs e neris, che no rivin in nissune maniere a dreçâ la partide, a sbrissin indaûr inte classifiche e si cjatin inte zone plui pericolose e cuntun calendari che par sigûr nol è di rive jù.

Gotti al mande in cjamp une formazion che e va daûr dal scheme dal 3-5-2. Denant di Musso, inte linie difensive si viodin cun Becao, Ekong e Nuytinck, intal mieç a son Mandragora, Walace e Di Paul, cun Samir a çampe e Larsen a diestre, e in atac e je la cubie Nestorovski-Okaka. Ancje il schiriament de Lazio al va daûr dal scheme 3-5-2, cun Immobile, Correa, Luis Alberto, Milinkovic Savic e compagns che a mostrin daurman di vê une marcje in plui rispiet ae scuadre furlane, cemût che e mostre ad in plen ancje la diference di ponts jenfri lis dôs scuadris.

La prime ocasion pai parons di cjase e rive juste dopo doi minûts, cuntun tîr cul cjâf di Correa che al va fûr. L’Udin ur lasse ai aversaris la iniziative e cussì Correa al prove ancjemò a tirâ in puarte. Dopo di lui si svicine pardabon al gol Luis Alberto su punizion, ma Musso al fâs une des sôs paradonis. A passin ancjemò uns pôcs di minûts e a fuarce di dâi la scuadre di Inzaghi e rive a segnâ cun Immobile che al impire la puarte di Musso su passaç di Milinkovic Savic, che al va vie a Becao e a Larsen par ufrî la bale golose al so compagn.

La reazion dal Udin si palese cuntun tîr alt di Nestorovski e cuntun biel diagonâl che si stude dongje dal pâl. Di chê altre bande al è ancjemò Immobile che al va al tîr. I blancs e neris a provin a creâ alc cun Di Paul e cun Mandragora, ma a Nestorovski-Okaka no ur rive nissune bale gol. Ur va miôr ai atacants de Lazio, sei su azion che su bale ferme, ancje se no rivin a incuadrâ la puarte di Musso.
Passade la prime mieze ore di zûc la Lazio e cjate il gol ancjemò cun Immobile: fal in aree di Ekong su Correa, penalty e tîr dal discut letâl par Musso e par dute la sô scuadre, che e cole in zenoglon e juste prime de polse si viôt sivilât un altri rigôr, segnât di Luis Alberto.

Inte seconde frazion l’Udin, sot di trê goi, al è smonât e flap. La Lazio e ten il balin dal zûc e e gjestìs il risultât cence fastidis. La scuadre blancje e nere e fâs pôc o nuie, no disfrute lis corsiis esternis e si rimet dome ae inventive di Di Paul. Te agjende dal cronist si notin dome une punizion fûr bersai di Walace e un cross di Larsen che nissun dai siei compagn al rive a tirâ in puarte.

Gotti al prove a fâ cualchi cambi, ma la situazion no cambie. La Lazio e ridûs i zîrs, ogni tant e imbastìs une azion di atac e soredut no à problemis daûr, stant che l’Udin al è pôc produtîf e cetant pastrocjon. E cussì la partide e va dilunc cence grandia emozions, sierantsi cul sucès dai parons di cjase e cu la seconde partide pierdude une dopo di chê altre pai blancs e neris che a mostrin di vê diviers problemis.

Sampdoria – Udinese 2-1

Un bon prin timp nol è avonde pal Udin par lâ dilunc a fâ ponts. Passade in vantaç cun Nestorovski, la scuadre di balon furlane e siere il prin timp in paritât par efiet di une biele punizion di Gabbiadini juste prime de polse e ae fin di un recupar di sîs minûts. Vie pal secont timp i blancs e neris a pain cjaronon, cu la espulsion di Jajalo e cuntun rigôr sivilât a Ekong, un pâr di ingjenuitâts, che i permetin ai parons di cjase di respirâ une bocjade di aiar bon e di tirâsi fûr dal pantan de code de classifiche.

La partide si vierç cu la memoreazion di Ermanno Cristin, zuiadôr furlan de Sampdoria dai agns Sessante e Setante dal Nûfcent, che al è muart juste chê altre dì. Inte bancjine dal Udin al è ancjemò Gotti, che al scuen rinunziâ a Okaka e a Sema e al mande in cjamp une formazion che e viôt Musso tra i pâi, De Maio, Ekong e Nuytinck in difese, Mandragora, Jajalo e Di Paul inte mediane, adun cui laterâi Opoku e Stryger Larsen, e Lasagna e Nestorovski in atac.

La partence dai blancs e neris, pe ocasion vistûts di ros, e je buine. Dopo doi minûts a vuadagnin il prin corner e inte azion seguitive a rivin ancje a segnâ: cross di De Maio par Nestorovski, che le bute dentri cul cjâf. Pecjât che, dopo cjalât il Var, Pairetto al decît di no fâ buine la segnadure par fûr zûc. La rispueste dai parons di cjase e rive un tic plui tart cuntun tîr di cjâf di Ramirez, su cross di Jankto, che al sbat cuntri dal pâl ae çampe di Musso.I va strucje ancje a Gabbiadini, che al strace une ocasionone su assist di Ferrari e il puartîr dal Udin si fâl cjatâ pront su lis conclusions di Jankto e di Gabbiadini.

La partide e à une ande plasevule, lis dôs scuadris a fasin zûc e a son emozions dicà e dilà. Tal Udin si fâs notâ il dinamisim di Nestorovski, che juste ae fin de prime mieze ore de partide al robe un balon ai aversaris e si invente un missil dal limit de aree che al cjate la deviazion decisive di Colley e al sbuse la puarte di Audero. A passin i minûts e la reazion dai parons di cjase no rive a produsi nuie di significatîf. Cun di plui al rive ancje il signestri muscolâr di Bertolacci, ma il svolt al rive tal ultin secont dal cuint minût di recupar dal prin timp cuntune biele punizion zoie di Gabbiadini che e impire Musso.

La pate concuistade juste prime de polse e permet ae Sampdoria di tornâ in cjamp tal secont timp cun plui convinzion. Le jude in chel ancje Jajalo che dopo cinc minûts al cjape il secont cartelin zâl par un intervent studpit tal mieç dal cjamp e par chel al ven parât vie, lassant i compagns di scuadre in inferioritât numeriche. Gotti al è costret a clamâ fûr Nestorovski par meti Ter Avest. L’Udin al scuen sbassâ la sô linie di zûc e i parons di cjase a provin a sburtâ, ancje se cence efiet.

In cheste situazion dificile si viôt ancjemò un rai di lusôr pe scuadre furlane, che e va une vore dongje dal gol dal doi a un: tîr di Nuytinck che al ven tocjât di Lasagna e i fâs la barbe al pâl. Daûr de regule no scrite dal gol che nol ven fat che al devente gol cjapât, il vantaç sampdorian al rive juste pôcs minûts plui tart: intervent falât e falôs di Ekong su Quagliarella in aree, Pairetto al sivile il penalty e Ramirez al segne. Tal ultin cuart di ore l’Udin al prove a rispuindi, ma no cumbine alc e ce e la Sampdoria e controle la partide fin ae fin.

Udinese – Spal 0-0

L’Udin al veve di cirî di vinci e soredut nol veve di pierdi. Sù par jù compagne e jere la situazion de Spal, che e jere rivade in Friûl cun chê di tirâsi fûr dal ultin puest in classifiche. Par chel la partide di vuê e je stade scombatude e ecuilibrade. L’Udin al à provât a vinci, al à riscjât di pierdi, tai minûts di recupar, ma Musso al à parât il rigôr che al podeve jessi fatâl.

In spiete di viodi cui che al sarà il gnûf alenadôr titolâr, al puest di Tudor, l’Udin si presente tal prât dal Stadi Friûl ancjemò cun Gotti in bancjine, che pe ocasion al met adun une formazion diferente di chê che e veve vinçût a Gjenue, in particolâr pe difese, che e torne a trê, cun Becao, Ekong e Nuytinck, e pe linie mediane, che e torne a cinc, cul bloc Jajalo-Mandragora-De Paul e cui laterâi Stryger Laresen a diestre e Sema a çampe, intant che in puarte al è simpri Musso e in atac la cubie di partence e je ancjemò chê formade di Nestorovski e Okaka. Di chê altre bande la Spal si rimet al ex blanc e neri Felipe e pal atac Semplici al sielç di lassâ fûr Petagna e di tacâ cul tandem Paloschi-Floccari.

Il prin timp al è grintôs e dinamic. L’Udin al partìs cul pît just e Nestorovski dopo cuatri minûts di zûc al ricêf un cross bas e al tire in puarte cjapant il pâl ae çampe di Berisha. Cinc minûts plui indenant il macedon cul cjâf al rive ancje a segnâ, ma il so gol nol ven fat bon di Massa par vie che la posizion de ponte blancje e nere e je iregolâr.
I ospits a rispuindin cun Kurtic che al oblee Musso a fâ une paradone suntun so tîr cul cjâf e cun dôs conclusions di Strefezza. La scuadre furlane si svicine al gol plui tart cuntun diestri di De Paul che al ven tocjât di Missiroli e par chel al riscje doi impirâ Berisha.

La seconde frazion si vierç cul Udin che al prove a dâi di lavorâ al puartîr de scuadre ferarese. La pression ofensive e je ma tal imprin no prodûs alc e ce, fale che une buine dose di stress pal puartîr ospit, che intun pâr di ocasions al riscje une vore cui pîts in disimpegn, ma Okaka e De Paul no rivin a aprofitâ, intant che e va fûr di pôc une conclusion cul cjâf di Mandragora.

La Spal e prove a ribaltâ i ecuilibris e i tentatîfs di Sala e di Tomovic i dan cualchi fastidi a Musso. Passât il pericul, la scuadre di balon furlane e rispuint cui scats di Lasagna, che al è jentrât tal puest di Nestorovski, e cuntun tîr di Mandragora che al lenç il pâl.
Si lote e si scombat fint tal ultin. Lis emozions a cressin intant che il timp al è daûr a finî cun trê tentatîfs dai ospits Sala, Kurtic e Petagna su balon di angul. Intal recupar Sema al fâs un fal di man inte aree di rigôr. Massa al sivile il penalty, che al ven tirât di Petagna e parât di Musso, un moment prime de fin.

Genoa – Udinese 1-3

Par latin si dîs “Tertium non datur”. No je une cuistion di filosofie, ma dome la constatazion che dopo lis dôs sdrondenadis cjapadis dal Udin cuintri de Atalanta e cuintri de Rome nol jere amissibil un altri tombolon. A àn di vêlu capît ancje i zuiadôrs de scuadre di balon furlane, che îr a Gjenue a àn mostrât finalmentri di vê cûr, gjambis e cerviel e a àn rivât a segnâ trê goi e a puartâ a cjase trê ponts.

E veve di jessi la partide dal riscat e e je lade propit cussì. L’Udin a Gjenue al cor, al spude balins, al masane zûc e in cierts moments al è fintremai biel di viodi. I blancs e neris, dopo dal licenziament di Tudor, si presentin a Marassi cun Luigi Gotti in bancjine, che al mande in cjamp une formazion cuntune muse diferente, par diviers motîfs. Il scheme di partence al è un classic 4-4-2 e denant di Musso la linie difensive e je formade di Di Mai, Ekong, Nuytinck e Opoku, intant che tal centricjamp si dan dongje Mandragora, Walace, Di Paul e Sema e in atac si viôt la cubie Okaka-Nestorovski.

La partence e je buine par dutis dôs lis scuadris. Il Genoa si zove dal fatôr cjamp e si sburte indenant cun plui fuarce, cun Schoene diretôr di orchestre, Pandev pont di riferiment e Kouamé che i da di lavorâ a Opoku. La prime ocasion pe scuadre dal Variûl e je propit dal avolian che al tire cul cjâf ma nol cjate la puarte di Musso.

Dopo vincj minûts i parons di cjase a passin in vantaç cun Pandev che al siere inte manier miôr une biele azion inviade di Romero, che i da la bale a Kouamè, protagonist di un dopli scambi strent cul atacant macedon. L’Udin al rispuint in cuintripît, al profite dai spazis che il Genoa al lasse libars tal mieç e al jonç la paritât cuntune biele pinelade di Di Paul. I ros e blu a calin e i blancs e neris a cressin e prime de polse si fasin vîfs ancjemò des bandis di Radu cuntun pâr di biei tentatîfs di Nestorovski e di Mandragora.

Il secont timp si vierç cul Genoa che al ten di plui la bale, ma nol prodûs alc e ce, fale che un pâr di scats di Kouamè, che intun câs al oblee Musso a intervignî in jessude. Si scombat tal mieç dl cjamp, là che l’Udin, compagn che te ultime part dal prin timp, al cjate i spazis juscj par deventâ plui pericolôs cun Nestorovski, Mandragora e De Paul.

Dongje de fin de partide propit un tîr sporc dal argjentin al devente un assist par Okaka che cun dut dal ecuilibri precari al rive a difindi bale e a zirâle par Sema, che al intive il diagonâl just che al impire Radu e al puarte in vantaç i blancs e neris.

Il Genoa al patìs il colp e i covente cualchi minût par rispuindi cuntune conclusion fûr bersai di Radovanovic in plen recupar. L’Udin al ten bot e passât il pericul al mande in gol Lasagna, che jentrât nancje vincj minûts prime al puest di Nestorovski al schiribice Barreca e nol perdone Radu.

Udinese – Roma 0-4

Al veve di jessi l’incuintri dal cambiament, de reazion e de dignitât. Dopo de partide smamide di Bergamo e dai siet goi cjapâts de Atalanta, ducj a speravin di viodi un Udin che al fos in stât di scombâti, di lotâ e di cambiâ musiche. Impen, cuintri de Rome i blancs e neris a fasin ancjemò piês che domenie stade cuintri de formazion vuidade di Gasperini. Cussi, intant che chê altre dì, in dîs cuintri undis, i blancs e neris a pierdevin e a cjapavin siet patafs, usgnot la scuadre furlane e piert e e cjape cuatri scufiots, fintremai in superioritât numeriche par doi tierç de gare. Al vignarès di dî: dal blanc e neri al “neri e vonde” che al è simpri plui “neri”.

Tudor al mande in cjamp il so 3-5-2 classic: Musso in puarte; Becao, Ekong e Samir in difese; Mandragora, Jajalo e De Paul te linie mediane, compagnâts di Ter Avest e di Sema dilunc des fassis laterâls, e Lasagna e Okaka in atac. I blancs e neris a somein atents e ordenâts intal sierâ il spazi di manovre ai zâi e ros, che però a mostrin daurman di vê plui gjambis, plui cjâf e plui cûr dal Udin.
Jajalo si interesse de prime costruzion de manovre, lu poin Di Paul, che al à spazi di manovre a çampe e Mandragora, che si cjate di chê altre bande. Di chê altre bande si fasin viodi daurman Pastore, Kluivert e Zaniolo.

L’Udin nol rive a combinâ alc e ce. I ospits, invezit, a cjapin sù il control de partide, si svicinin al gol cun Pastore e po lu segnin cun Zaniolo, che al profite di une buse di Samir suntun lanç di Kolarov, al va dret viers de puarte e al impire Musso. I blancs e neris a son sturnîts e incocalîts e no mostrin di jessi in stât di rispuindi. La Rome e profite de situazion e cussì e torne al atac cun Pastore e cun Zaniolo. La scuadre di balon furlane e prove a fâ alc di plui passade la prime mieze ore di zûc e si svicine ae aree di rigôr romaniste cun Okaka, che al ven tocjât in maniere iregolâr di Fazio: par Irrati al è fal e cartelin ros.

La superioritât numeriche no zove al Udin, che al stente ancjemò a imbastî azions di sostance. Dome inte ultime part de prime frazion i blancs e neris a provin pardabon a jessi in cualchi maniere pericolôs des bandis di Lopez cun De Paul. Cun dut des buinis intenzions, i zuiadôrs di Tudor no rivin a fâur pôre ai aversaris e fintremai a lassin cualchi spazi vueit pai lôr cuintripîts.

Dopo de polse l’Udin, cun Barak tal puest di Mandragora, al prove a sburtâ cun plui decision ma l’impat des sôs iniziativis al è pardabon limitât. I blancs e neris a son gnervôs e i lôr intervents a son simpri fûr timp, cun Jajalo e Barak che si fasin amonî, cun Okaka e Lasagna che a somein doi protagoniscj di “Chi l’ha visto?”e cu la difese che e fâs pastroçs.
Juste une bale zuiade mâl dentri de aree blancje e nere si stramude inte ocasion juste par Smalling che al segne il so prin gol cu la maie de Rome. Doi minûts plui tart al rive ancje il tris cun Kluivert, che al siere une biele combinazion inviade di Kolarov e rifinide di Pastore.

La Rome no si ferme, l’Udin no si môf e cussì al rive ancje il poker romanist: Irrati al sivile un rigôr par un fal di man di Becao, Kolarov al tire ben e al bat Musso. La reazion dal Udin no si le viôt in nissune maniere, l’aviliment al cjape la plui part de int che e je tal Stadi Friûl e pe scuadre di Fonseca al è facil tignî la situazion sot control e gjestî il vantaç fin aes trê siviladis finâls.

Atalanta – Udinese 7-1

Siet patafons. La trasfierte dal Udin a Bergamo e finìs ancjemò piês di ce che cuntune buine dose di pessimisim si podeve pensâ. La Atalanta e je une des scuadris miôr dal campionât e par chel la partide di vuê no deve masse sperancis. Cundut achel nissun si varès spietât un risultât di cheste fate. Cumò i blancs e neris a àn pierdût ancje il record dal numar plui bas di goi cjapâts. Mancul mâl che cheste sdrondenade e à efiets avonde limitâts su la classifiche.

La scuadre di balon furlane si presente in cjamp cuntune formazion che e somee compate e in chel instes coragjose, ancje se e je cualchi novitât che in tiermins tatics si stente a capîle: Musso tra i pâi, linie difensive cun Becao, Ekong e Samir, centricjamp cun Mandragora, Jajalo, Di Paul e cun Opoku e Sema su lis corsiis esternis, in atac la cubie Lasagna-Okaka. L’Atalanta in atac si rimet a Ilicic e Muriel cun Gomez a supuart. De Roon e Pasalic a son tal mieç dal cjamp cun Hateboer e Castagne esternis e in difese si viodin Djimsiti, Kjaer e Toloi.

La formazion nere e blu e fâs valê daurman il so rûl di parone di cjase e la fuarce de sô organizazion di zûc, ma l’Udin al ten bot, tra interdizion e costruzion, ispirade di Jajalo e tal imprin al è un ciert ecuilibri.
Dopo une prime azion ofensive di Muriel, fermade di Becao, al rive a sorprese il gol dal Udin, cun Okaka che al robe la bale a Kjaer e le bute dentri cuntun biel diagonâl, che no i permet di fâ nuie a Gollini.

I bergamascs a reagjissin cun Gomez che al impegne Musso. Al minût 21 une biele manovre in velocitât si siere cuntun assist perfet di Di Roon par Ilicic, che al segne cjatantsi intune posizion dubie di fûr zûc, che però e ven calcolade tant che regolâr di Maresca dopo vê fate la prove dal Var.
Concuistade la paritât de bande de Atalanta, un bon intervent di Gollini al gjave la sodisfazion dal gol a Lasagna. Cussì, dopo dal sfantâsi de ocasion par tornâ in vantaç pal Udin, si vierç la fase là che a vegnin metudis lis fondis di chel che al sarà il risultât finâl. Muriel di tac i da une bale golose a Ilicic e Opoku, za amonît, lu tocje cul efiet di permeti a Maresca di sivilâ il rigôr, segnât di Muriel, e di parâ fûr il difensôr blanc e neri.

L’Udin al reste sot di un gol e in dîs cuintri undis. A passin pôcs minûts e Maresca al sivile un altri penalty, ma dopo al verifiche il Var e al cambie idee. Si svicine la fin dal prin timp, ma la Atalanta e rive a segnâ ancjemò: assist di Muriel par Castagne che al tire, buine rispueste di Musso, bale che e sbalce in maniere pericolose e tîr falât di Gomez che al devente un passaç par Ilicic, che al sbuse la puarte blancje e nere.

Tal secont timp Tudor al met dentri Pussetto tal puest di Okaka cul intindiment di provâ a dreçâ la partide, però la Atalanta e torne daurman al atac cuntune combinazion tra Ilicic, Gomez e Muriel che le bute dentri ancjemò. Il poker nol è ancjemò avonde pai parons di cjase: Musso al dîs di no a Gomez che al prove a fâ il cuint, ma nol rive a fâ compagn plui tart cuant che Gomez al fâs un cross par Pasalic che al firme il 5-1.

L’Udin nol da segns di vite, intant che i bergamascs a van dilunc a zuiâ in bombe. Ilicic al cjape la travierse e dopo si fâs fermâ di Musso, che al pare ancje un altri tîr di Muriel. Il colombian al ven tocjât in aree, al è rigôr e l’ex blanc e neri al segne ancjemò.
Ma no je ancjemò finude: Gasperini al decît che al è il moment dal debut in serie A di Amad Diallo Traorè, il fradi piçul di Junior, zuiadôr dal Sassuolo, che al cjape il puest di Ilicic e dopo sîs minûts al met ancje il so non inte liste dai marcjadôrs.

Udinese – Torino 1-0

L’Udin al torne a vinci, par merit so e ancje par demerit dal Toro che tal Stadi Friûl al è smamît e flap, massime vie pal prin timp. I blancs e neris a concuistin chel che pe classifiche e no dome par chê al è l’unic risultât bon. La scuadre di balon furlane e merete la vitorie parcè che e zuie cul cûr e cul cerviel, profitant de eclisse dai ospits e mostrant di vê snait, ecuilibri, sostance e sintiment.

I blancs e neris si presentin cun Musso in puarte, cun Opoku, Ekong e Samir in difese, cun Jajalo, Mandragora e De Paul tal mieç, compagnâts inte linie mediane dai laterâi Ter Avest e Sema, e cun Lasagna e Okaka in atac. Il Toro al à une fisionomie sùù par jù compagne, ancje se la ponte e je dome une, Belotti, cun Verdi che al zuie daûr di lui.

La scuadre di balon furlane e partìs cun decision e e lenç daurman il gol prime cuntun biel tîr di Sema che al cjape il pâl e po cuntune deviazion di Okaka, che al strace une ocasion golose. L’Udin al fâs zirâ di plui la bale e al manten il control de partide e Sirigu al à il so bon ce fâ suntune bombe di Jajalo.

Te fase centrâl dal prin timp il ritmi al cale, ma tal ultin cuart di ore l’Udin al frache l’aceleradôr e al torne a impegnâ Sirigu, ancjemò cun Jajalo e po cun De Paul, par rivâ a passa dopo cualchi minût cun Okaka che al siere inte manier miôr une manovre inviade di De Paul par Sema che de corsie di çampe al met la bale tal mieç par Mandragora: il so tentatîf di butâle dentri al devenet un assist pal atacant che si cjate denant de puarte e al segne.

Te prime frazion il Toro nol rive a cumbinâ nuie se si gjave un tîr di Lukic che no i cree nissun fastidi a Musso. Tal secont timp Mazzarri prove a cambiâ alc e al mande in cjamp une altre ponte, Zaza, al puest di Lukic. I ospits a mostrin plui caratar, a jentrin in partide, a sburtin, e a crein la prime ocasion daurman: cross di Baselli, acrobazie di Belotti e deviazion decisive di Musso, che al tire jù la sierande. A son ancje altris tentatîfs: di Zaza, cence efiet, e di Laxalt, cul puartîr dal Udin che al è ancjemò tal puest just tal moment just.

I blancs e neris i lassin la iniziative al Toro, che cun Iago in cjamp al puest di Verdi al cambie scheme, passant dal 3-5-2 al 4-4-2. L’Udin si adate ae gnove situazion, al ten bot e al rispuint ai ultins tentatîfs di Iago e di Laxalt cuntun pâr di conclusions di De Paul: une e ven parade in corner di Sirigu e chê altre e finìs fûr bersai. Dopo cuatri minûts di recupar Abisso al sivile la fin e l’Udin al pues fâ fieste pai trê ponts e pal gol di Okaka, che cuintri de Fiorentina nol veve esprimût il so potenziâl. Il Toro al zuie dome tal secont timp e nol è avonde.

Fiorentina – Udinese 1-0

L’Udin al fâs une partide discrete ma nol rive a puartâ a cjase nancje un pont. La Fiorentina, sapontade dai siei tifôs, e fâs valê lis sôs cualitâts tecnichis e tatichis – che par sigûr cumò a son plui altis di chês dai blancs e neris – e cussì e scombat, e patìs ancje chel alc di bon metût adun de scuadre furlane e e rive a vinci la tierce partide une daûr chê altre, parant vie in maniere definitive lis fantasimis de crisi che a svoletavin parsore dal cjâf di Montella intes primis zornadis dal campionât. Divierse la situazion dai blancs e neris che a tornin a sbrissâ jù in classifiche, inte zone plui basse.

Tudor a Florence al mande in cjamp une formazion che, daûr di un scheme 3-4-1-2, e mostre in chel instès l’intindiment di difinidisi cun sintiment e di produsi alc di bon e di produtîf indenant: Musso in puarte; la tierce linie formade di Opoku, Troost-Ekong e Samir; Jajalo e Mandragora tal mieç cun Sema e Stryger Larsen laterâi; De Paul, tornât de scualifiche, daûr des pontis, e la cubie di atac formade di Okaka e Nestorovski.

La Fiorentina, sburtade di Castrovilli, di Pulgar, di Chiesa e Ribery, e cîr di esprimi daurman il so strapodê teritoriâl di parone di cjase. L’Udin no si scompon, al ten bot, tignint di voli i atacants colôr di viole, e al rispuint cun De Paul e cun Nestorovski. L’argjentin al firme la prime iniziative ofensive significative pe scuadre di balon furlane, intant che di chê altre bande Chiesa, Castrovilli, Caceres e Pezzella no rivin a dâ masse preocupazions a Musso, e il macedon al cjate ancje la strade dal gol, che però nol ven fat bon di Prontera, par vie che il Var al mostre un colp cu la man di Opoku.

Il gol cjapât, cundut de mancjade convalide, al fâs sunâ la svearine jenfri i parons di cjase che a provin a incressi i zîrs dal lôr motôr. Al rive daurman un altri tîr di Castrovilli, che però al ven parât vie di Nestorovski, tornât indaûr in cuvierzidure sul corner di Pulgar, ma no si viôt nuie altri fintremai ae fin dal prin timp.

La seconde frazion e somee plui vivarose. Il prin colp al è dal Udin cun De Paul che al tire fûr bersai. La Fiorentina e rispuint cun Chiesa, che al profite di un erorat di Troost-Ekong, e cun Ribery, ma in dutis dôs lis ocasions Musso al interven e al siere la puarte. Il ritmi e il tas agonistic a cressin e Stryger Larsen si lamente par un intervent fat cuintri di lui di Dalbert te aree di rigôr dai parons di cjase, ma Prontera nol sivile. L’arbitri al devente protagonist plui indenant e cuant che Tudor al proteste par un fal di Castrovilli che nol ven par nuie calcolât al tire fûr il cartelin ros cuintri dal tecnic blanc e neri.

L’Udin al zuie la ultime mieze ore cence l’alenadôr. Lasagna al cjape il puest di Nestorovski, intant che Montella al met dentri Benassi al puest di Badelj. La Fiorentina e torne al atac cun convinzion e Ribery al è protagonist di un biel slalom inte aree blancje e nere ma il so cross nol ven disfrutât di nissun. Al finìs intune altre maniere il corner di Pulgar, che i parons di cjase a vuadagnin zovantsi de sielte une vore discutibile di Jajalo di lassâ lâ fûr il balon cence intervignî: il cross al è perfet par Milenkovic che al salte ben e le bute dentri cul cjâf.

Cumò i tocje al Udin rispuindi daurman al vantaç dai parons di cjase. Lu fâs cun Lasagna che al tire in puarte, là che però Dragowski al rive a tocjâ la bale di chel et che al covente par che e ledi fûr. Di chê altre bande Ribery al mene la dance e al met ancjemò in dificoltât la difese furlane. Inta ultins minûts i parons di cjase a provin a staronzâ il sucès cun Benassi e cun Dalbert, cence creâ masse problemis par Musso, e i blancs e neris, ancje cul contribût di Barak e di Ter Avest, a cirin ancjemò di gafâ la paritât. Si svicinin une vore al obietîf cun Sema e cun De Paul, ma Dragowski al sta in vuaite e al difint la vitorie.