Empoli – Udinese 1-2

22_03_014_udin_friul

Trê ponts che a pesin tant, pe classifiche in gjenerâl e in cheste classifiche in particolâr, e soredut une vitorie che e mancjave di cinc partidis. Te partide di Empoli no si viôt chel Udin bielon che al à zuiât cul Napoli in Cope Italie, ma une scuadre avonde concrete, che di une bande e à ancje un tic di fortune e di chê altre no i ven dât un rigôr a pro e i ven sivilât un altri rigôr cuintri che nol è. Une formazion che e je mancul dinamiche dai parons di cjase, che però e rive a cjatâ la strade dal gol e cul doi a un finâl al vierç inte maniere miôr la seconde part dal campionât 2014/2015.

L’Empoli al fâs valê une cierte predominance teritoriâl, ma si esprim plui su liniis orizontâls. L’Udin  no si scompon, denant de vivarositât di Saponara e Pucciarelli, e dopo un pâr di conclusions dai toscans al imbastìs une biele manovre cun Kone e Widmer che e met fûr scuare la difese aversarie e i da a Allan la bale juste par un cross milimetric par Di Natale che cul cjâf le bute tal sac daûr di Sepe.

La reazion dai parons di cjase e ven vuidade di Pucciarelli, che cu la sô pression al met in dificoltât Piris. Al è in chest contest che al rive il gol dal un a un: un cross di Pucciarelli al sbat su la spale di Danilo, l’arbitri Ghersini al viôt il balon fermât cuntun braç e al decît pal penalty che Saponara al tire a bersai. Il risultât al reste chel fin ae fin de prime frazion.

Il secont timp si vierç cul Empoli che al frache sul aceleratôr e al rive a zuiâ plui svelt e plui in verticâl, ma nol cjate la strade dal gol, ni cun Vecino ni cun Pucciarelli. I va miôr al Udin che cuntun cross che al devente un tîr di Widmer al pescje il doi a un. A un cuart di ore de fin l’Udin al piert Kone che, za amonît, al ven butât fûr di Ghersini par vie di un colp cul comedon cuintri di Valdifiore. Cualchi minût plui tart al sarès un rigôr pal Udin, ma il diretôr di gare no si inacuarç dal colp cu la man di Rugani. Ae fin i empolês a provin ancjemò a sburtâ indenant, ma l’Udin al ten bot.

Domenie che e ven la scuadre di balon furlane e varà di zuiâ cuintri de Juve. Al è ben e al conven preparâsi par une partide di cheste fate cun trê ponts pesants inte sachete.

Napoli – Udinese 2-2 (7-6)

fuarceudinees

Al à reson mister Stramaccioni: chê di nossere e je la partide miôr fate dal Udin in cheste stagjon. L’Udin al piert ai rigôrs e al ven butât fûr de Cope Italie ma al mostre chel caratar, chel snait e chel dinamisim che in masse ocasions a son mancjâts e a varessin coventât cetant.

L’incuintri cul Napoli al ven decidût dai rigôrs e i tîrs dai undis metris a son protagoniscj ancje dentri dal timp regolamentâr. Cun di fat, dopo trê minûts di zûc un fal su Zapata al met i parons di cjase di gjoldi di un penalty: lu bat Mertens e la bale e sbat su la travierse.
La rispueste dal Udin, che al viôt tal cjamp tancj zovins, a tacâ di Jaadi e Aguirre, e rive cinc minûts plui indenant cuntune conclusion di Thereau.

Il Napoli al à un potenziâl plui fuart ma no lo dopre ad in plen, i blancs e neris a resistin e a scombatin e no àn ni pôre ni sudizion e cussì il zuiçâ dai partenopeus tal mieç dal cjamp nol prodûs masse problemis pe scuadre furlane che impen e rive a disfrutâ lis dificoltâts de tierce linie napolitane. Zapata al è protagonist di une biele zuiade e Gargano al cjape un pâl: il prin timp si siere cence goi.

La seconde frazion si vierç sù par jù te stesse maniere de prime. Dopo dodis minûts Jaadi al imposte une azion di cuintripît a pro di Thereau che al segne. Il vantaç dal Udin al ven azerât in mancul di dîs minûts, cul gol di Jorginho, che al colpìs ancje il cûr de scuadre di Stramaccioni. Te ultime part dai novante minûts l’Udin al reste in dîs pe espulsion di Widmer, ma no si fâs meti tal sac dal Napoli che al cîr di fâ valê la sô superioritât numeriche.

Dopo novante minûts la partide e reste inclaudade sul un a un e si va ai suplementârs, là che il Napoli al va in vantatç cuntun golon di Hamsik. L’Udin nol mole e al rispuint cun Kone dopo cinc minûts, a testemonence che nol patìs masse la inferioritât numeriche. Tal secont suplementâr al è ancjemò Kone a meti pôre ai parons di cjase e intal ultin al è Mertens a svicinâsi al gol decisîf.
Si scuen lâ ai tîrs dal discut: te ultime tornade Allan nol rive a butâle dentri, Higuain invezit al segne e il Napoli al continue la sô corse in Cope Italie.

L’Udin al lasse cheste competizion, ma al cjate alc che fint cumò nol veve: une cierte personalitât.
Sperìn che le mantegni ancje pal campionât.

Udinese – Cagliari 2-2

udin_neri

L’Udin nol rive a vinci in cjase nancje cuintri dal Cagliari, che – cundut dal rispiet che al merete in gjenerâl e ancjemò di plui intune logjiche internazionalitarie – in chest moment nol è par sigûr un grant scuadron.
Se no fossin stâts un fal di man te aree di rigôr di Heurteaux e duncje il rigôr di Avelar ae fin de partide, cumò o fasaressin fieste pe colade di un tabù – chel de vitorie in cjase – che al è in pîts di sù par jù trê mês. Invezit la musiche e reste chê: l’Udin al stente e se di une bande si pues pardabon fevelâ di doi ponts pierdûts, di chê altre al è di jessi contents di no vê pierdût ancje chel unic che al è stât puartât a cjase. Cun di plui la infermerie, za avonde plene prime de partide di domenie (cun assencis di pês, a tacâ di Widmer e Pinzi), si jemple ancjemò di plui, cul infortuni di Domizzi, e dongje dai impegns di campionât la scuadre di Stramaccioni e varà di zuiâ ancje i otâfs di finâl di Cope Italie, joibe che al ven cuintri dal Napoli.

Cussì, ae fin chel cul Cagliari al è un risultât just, che al da cont di cemût che e je lade la partide, cuntun prin timp flaput, là che l’Udin al sburte soredut su la corsie di drete, ma si fâs viodi masse pôc des bandis de puarte aversarie, e il Cagliari al fâs sù par jù compagn, e un secont timp plui vivarôs, almancul in tiermins relatîfs.

Te prime frazion a son dome trê flamadis: un diagonâl di Donsah (al 22′), un tîr di Di Natale sîs minûts plui indenant e il gol di Joao Pedro prime dal interval, cuant che Domizzi al scuen bandonâ la partide.

Tal secont timp l’Udin al è plui dinamic. Allan – il miôr dai blancs e neris – al sburte su la corsie centrâl e propit une sô percussion lu parte a lâ in gol dopo dîs minûts. Daurman e rive ancje la seconde segnadure, che e cambie ad in plen i ecuilibris de partide: cross di Di Natale par Thereau e acrobazie vincente dal francês. L’Udin al somee vê il control plen de partide e al masane cualchi azion biele e buine. Thereau nol rive a concretizâ une buine ocasion intant che su chel altri front la difese de scuadre di balon furlane e à cualchi fastidi, tra un tîr di Avelar e un mieç pastroç di Hallberg.
L’Udin al guvierne il risultât, ma i mancje alc sei denant che daûr, intan che il Cagliari al prove fint intal ultin a dreçâ la partide e cussì al rive a jonzi il doi a doi juste ae fin cul rigôr di Avelar.

Sassuolo – Udinese 1-1

udin_neri
Un pont impuartant concuistât ae fin di une gare dificile, un pôc par merit dai aversaris e un pôc pai problemis dal Udin: chei di zûc solits, ancje se alc di positîf al è saltât fûr ca e là, e chei di organic, stant che tra scualifichis, infortunis e indisposizions di sorte i blancs e neris a son rivât a Reggio Emilia cuntune formazion pardabon di emergjence.

La partide di sabide cuintri dal Sassuolo no à di bon dome il risultât – il cuart positîf consecutîf fûr cjase – e duncje il piçul avanzament in classifiche dopo dal stop cuintri de Rome, ma e presente ancje cualchi indicazion buine par ce che al tocje il caratar dai zuiadôrs e de scuadre e la lôr capacitât di adatament ae situazion. Cumò al è di sperâ che chestis indicazions a cjatin conferme ancje te prossime partide, in cjase, cuintri dal Cagliari.

L’incuintri si vierç cui parons di cjase che, in condizions miôr no dome pal organic ma ancje pal zûc e pal ategjament che si zove ancj dal efiet de vitorie di Milan di martars stât, a menin la danze e a cjatin la strade dal gol cun Zaza, dopo di un cuart di ore di predomini tatic. L’Udin, che al patìs il dinamisim dai aversaris, al è in dificoltât ancje parcè che, juste un minût plui indenant, al piert ancje un dai siei atacants di zornade, Geijo, che al à un fastidi muscolâr.

Stramaccioni al fâs jentrâ Bruno Fernandes cun chê di sapontâ la azion ofensive, lassade dute su lis spalis d Thereau. L’Udin no si piert pai trois in difese e al rispuint tal mieç dal cjamp e in atac cun cualchi buine zuiade disvilupade propit su la linie Allan-Bruno Fernandes-Thereau. Al rive cussì, prime de mieze ore, il gol dal un a un. Allan al pescje Thereau te aree di rigôr verde e nere e l’atacant francês al controle e al tire a colp sigûr: nuie ce fâ par Consigli.

Il gol al mande in crisi i parons di cjase, che a tornin al atac dome ae fin dal prin timp, cuntun tîr di Longhi e cuntune conclusion di Zaza, che però no àn sucès. Tal secont timp Stramaccion al lasse fûr Gabriel Silva, che te prime frazion nol è stât alc e ce, e al mande in cjamp Heurteaux mudant il scheme de tierce linie, che e passe di trê a cuatri zuiadôrs. Il Sassuolo al fâs valê ancjemò la sô supremazie teritoriâl, ma l’Udin si difint cun ordin e al rispuint in cuintripît cun Thereau.

Al è ancje timp pes polemichis, cuant che Berardi al cole dopo di un contrast cun Domizzi dentri de aree furlane: il contat probabilmentri al è, ma Berardi, che al è za stât amonît par simulazion, al esagjere tal evidenziâ i efiets dal impat e l’arbitri Massa al decît di no fermâ il zûc.
Plui indenant Domizzi al è protagonist ancje di un biel salvament su Zaza e Bruno Fernandes al à un pâr di ocasions par dâi un svolt ae partide, ma no lis disfrute cemût che al covente.

Un pâr di ocasions lis à ancje il Sassuolo, che a pôcs minûts de fin al cjape fintremai un pâl cun Zaza.
Il risultât al reste chel: bon pal Udin, avonde bon ancje pe scuadre di Eusebio Di Francesco, che e sperave di vinci ancjemò ma e scuen contentâsi.

Occitania, Friuli, Europa… su Radio 1 Rai ai 8 di Zenâr

CoverOccitaniaJPG

Joibe ai 8 di Zenâr su lis frecuencis pal Friûl e par Triest di Radio 1 Rai, inte suaze de programazion regjonâl pal Friûl-VJ, si fevele di Occitania, Friuli, Europa. La mia lingua suona il rock, il libri dât fûr de associazion di furlans in Piemont Lidrîs e Butui e presentât pe prime volte in Friûl inte suaze di Suns 2014, doi mês indaûr.

Dentri de rubriche par furlan Vuê o fevelìn di…, la condutore Antonella Lanfrit e l’autôr de publicazion, Marco Stolfo, a frontaran diviers argoments dal libri, che al fâs indenant une esplorazion profondide e organiche de produzion musicâl par ocitan e par furlan, de fin dai agns Sessante al dì di vuê, e le met in relazion e in comparazion cun chês che si son disvilupadis inaltrò in Europe.

La publicazion e je stade prontade cuntune atenzion multidissiplinâr, che e ten dentri musiche, storie, politiche, societât, dirits linguistics, leterature e tutele des minorancis, su la fonde di di fonts diferentis e di un trop di intervistis fatis cun musiciscj ocitans e furlans e cun artiscj e esperts sarts, bretons, bascs, catalans, ladins, slovens e albanês, ducj protagoniscj de taule taronde virtuâl che si cjate te tierce part dal libri.

Dongje dal libri al è ancje un cd cuntune selezion di musichis ocitanis e furlanis… fuartis.

L’apontament al a 3 e un cuart dopo di misdì.

Altris informazions sul libri si cjatin achì tal sît di Lidrîs e Butui.

Udinese -Roma 0-1

udin_neri
Un gol fantasime cuintri, un rigôr a pro che nol ven dât e une partide zuiade par sigûr in maniere no masse brilante e cence continuitât.
La prime partide dal 2015 dal Udin e fâs indenant elements za viodûts vie pal an passât, cun decision arbitrâls une vore discutibilis te forme e te sostance e cun limits tecnics, tatics e carateriâi.

In principi la Rome e fâs zirâ di plui la bale, soredut in orizontâl, intant che i parons di cjase a somein jessi in vuaite, a tignî di voli i aversaris, in spiete di colpîju magari cuntune verticalizazion puartade indenant di Widmer. Intal prin cuart di ore chei che si metin plui in mostre a son il romanist Pjanic e il blanc e neri Kone. Doi minûts plui indenant e rive la conclusion cul cjâf di Astori suntune punizion di Totti: la bale e sbat su la travierse e po e cole par tiere. Dentri de puarte o su la rie blancje? Intant che Karnezis le brinche, l’arbitri Guida e il so assistent Maresca sul imprin a mostrin di vê lis ideis claris, stant che il zûc nol ven fermât. Però tal zîr di un doi seconts, sburtât des protestis dai zuiadôrs de Rome, il diretôr de gare al mude ategjament e al decît pe convalide, cundut de opinion diferent dal so colaboradôr che al è dongje de puarte.

L’Udin al patìs il colp ma al prove a cambiâ daurman il risultât: prime une conclusion di Widmer e ven salvade di De Rossi, po dopo a rivin un tentatîf di Kone e soredut une ocasion par Gabriel Silva suntun assist preseôs di Di Natale. Nuie ce fâ: il prin timp si siere sul un a zero pe Rome, che prime de polse e prove in cuintripît cun Iturbe e cun Totti.

Il secont timp al è plui gnervôs e mancul interessant in tiermins tecnics. Te sô prime part a son plui barufis e pachis che zuiadis e azions. Lis robis a van in miôr plui indenant, ma dome in tiermins relatîfs, stant che lis dôs scuadris a rivin miôr a disfâ lis iniziativis aversaris che a meti adun lis azions propriis.
L’Udin al à chê di cirî l’un a un, ma la Rome si difint e e rispuint cun bogns risultâts. I minûts a passin e i ospits a deventin plui pericolôs, cun Iturbe, cun Totti e cun Pjanic, ancje se Karnezis al ten la situazion sot control e di chê altre bande Geijo si fâs viodi in atac.

Cinc minûts prime de fin Emanuelson al bute jù Kone te aree di rigôr e Guida nol viôt e nol sivile.  Evidentementri al è destin che le Rome e vinci… Però dome par un a zero: cun di fat i ultins doi atacs dai ospits – cul stes Emanuelson e cun Florenzi – a vegnin neutralizâts di Karnezis.

La setemane che e ven l’Udin al zuiarà cul Sassuolo.