Furlan e Regjon, «E je ore di dâsi une dreçade»

lengate1

Turin al è avonde lontan dal Friûl, ma nus somee che le vin nasade juste.
La situazion de tutele de minorance linguistiche furlane, de sô lenghe e dai dirits linguistics e je malamentri – pulp, pulp, pulp o ancjemò piês – e il cambiament di guvier regjonâl nol à puartât chei mudaments che si spietavisi e che a coventin.

Al è stât fat alc – la ARLeF e à tornât a tacâ a funzionâ , al è stât fat bon il regolament pe certificazion linguistiche, il Consei regjonâl dal Friûl-VJ al è jentrât tal NPLD, il network pe promozion de diversitât linguistiche in Europe – ma a son un grum di robis di fâ e o sin ancjemò te situazion denunciade de bande dal Comitât/Odbor/Komitaat/Comitato 482 ae fin dal an passât.

Juste îr prin di misdì a Udin e je stade fate une conference stampe là che sedis entitâts associativis, agregativis e informativis di lenghe furlane a àn fat une sorte di belanç de azion de zonte Serracchiani sù par jù dopo un an di cuant che e je jentrade in cjarie e a àn domandât al Guvier de Regjon e al Consei regjonâl di «dâsi une dreçade» e di «cambiare verso».

Parcè che, cemût che si pues lei achì, a coventin garanziis di cualitât, di cuantitât e di continuitât e a coventin strategjie e programazion.

La situazion e je…’pulp pulp pulp’. Viva Onde Furlane!

DAISYCHAIN

Al è finût un altri an scolastic e, magari cussì no, par ce che al tocje il furlan a scuele la situazion no somee par nuie cambiade rispiet al an passât. Cun di fat l’articul che o vevin publicât ai 26 di Jugn dal 2013 al somee bon ancje chest an. Al merete segnalât che par intant alc di gnûf e di bon al è vignût indenant, stant che la Agjenzie Regjonâl pe Lenghe Furlane, ancje se cuntun ciert intart, e à finalmentri tornât a davuelzi la sô funzion di organisim regjonâl di politiche linguistiche. Cun dut a chel, pai dirits linguistics e pe promozion dal pluralisim di lenghis e culturis, la situazion e reste grivie, cemût che al ricuardave il Comitât/Odbor/Komitaat/Comitato 482 ae fin dal an passât, cuant che al saltave fûr che la cuote dal belanç de Regjon destinade pe lenghe furlane tal 2014 e jere dome dal 0,02% .

viva

In Friûl si spietisi che alc al cambi cu lis variazions dal belanç regjonâl, che par solit a vegnin fatis buinis tal mìes di Lui, però pal moment l’aiar che al tire nol è par nuie bon , anzi. Si podarès dî che la situazion e je… pulp pulp pulp, almancul se si ten cont che ai 21 di Lui a Udin si fasarà une gnove edizion di Viva Onde Furlane, la manifestazion inmaneade de bande associazion Lenghis dal Drâc – Amîs di Onde Furlane par tirâ dongje cualchi risorse a pro de “radio libare dai furlans”. L’apontament si clame Viva Onde Furlane Pulp Pulp Pulp e si davuelç li dal Parc dal Cormôr inte suaze di Homepage Festival, a tacâ di vot sot sere. In program un conciert dai Daisy Chain, trê mariachis mascarâts e eletrificâts che a cjapin ispirazion des atmosferis oscuris e “pulp” dai cines di Quentin Tarantino cuntune misture di texmex e surf rock’n’roll, un aperitîf hip hop cun Gabriellina, la crew di Gabiterapia e duncje cun Black Power Gang, Dj Tubet, Luca Mazza & Joe Peltrini, I Mean Acca 10 e NG Zona Est Monster Selecta,  e un afterhour cu lis selezions ruspiosis e punkrock dai dj di Abrasive. Il dut al vignarà coordenât dai Cjastrons, pevarins come par solit e pe ocasion ancje une vore pulp pulp pulp.

Cualchi domande, cualchi buine gnove e cualchi sperance

repital

Passe une setemane indaûr e je stade memoreade la Fieste de Republiche Taliane.
E je une date impuartante che e merete memoreade ben.
O vin la impression che però al sedi alc che nol funzione tes celebrazions e si cjatìn in cunvigne cun cui che su chest argoment, par esempli in Friûl, al fâs indenant cualchi domande.

Salacor i problemis no son dome tes celebrazions. Te Republiche «fondata sul lavoro» e cres la disocupazion, te Republiche che e tutele lis minorancis linguistichis «con apposite norme», dopo vê spietât mieç secul par che a rivassin, chês stessis normis a stentin ancjemò a vignî metudis in vore… par no fevelâ dai gnûfs (???) câs di coruzion che a vegnin indenant.

03-12-013_Cappello

Cun dut achel dal Friûl a rivin ancje un pâr di bielis gnovis.
Di une bande il Guvier talian al à decidût di dâi il vitalizi previodût de cussì clamade Leç Bacchelli ancje al poete furlan Pierluigi Cappello, che sal merete e che par sigûr i covente.
Di chê altre il Consei regjonâl dal Friûl-VJ al à dât la sô adesion ae Rêt europeane pe promozion de diversitât linguistiche (NPLD), tant a dî che al è cualchidun che al à cussience che la diversitât linguistiche de regjon che e ten dongje il Friûl e Triest e je la strade miôr par vê a ce fâ cu la Europe.

Che al sedi rivât il moment che finalmentri si cambie musiche, dopo un pôcs di agns che si à fat di dut par fâi cuintri aes lenghis, ai dirits, ae tutele, ae autonomie speciâl de Regjon, che lis sôs fondis e lis sôs finalitâts a son propit chês?

lengate1