Udinese – Lazio 0-0

udin_neri

Tant gnervôs, pôc zûc, nissun gol e un pont par om. Udinese – Lazio e je une partide grise, cence spetacul e cun tantis emozions che a divegnin dome de tension che e je tal cjamp, dal pês des ultimis trê sconfitis patidis dai blancs e neris, dal anulament di tre goi – ma in ducj i câs Celi al à reson – e de fuarce morâl dai tifôs furlans, che a àn un funzion fondamentâl tal sapontâ la resistence dal Udin, in dîs cuintri unidis par plui di mieç incuintri.

E finìs zero a zero e la scuadre di balon furlane e cjape chel pontut, che al zove almancul un pôc al morâl e ae classifiche. La formazion di Colantuono e mostre ancje une buine dose grinte e caratar, intant che sul plan tatic e tecnic al reste simpri un grum di lavôr ce fâ.

Il prin dât positîf pal Udin al è la sô partence. I blancs e neris si fasin viodi indenant cun Wague, cun Edenilson e cun Badu, intant che la Lazio sul imprin e somee vê dome chê di lassâ che i parons di cjase si sbrochin cence però fâ dams des bandis di Berisha. Il timp al passe, cussì, cence padins ni di une bande ni di chê altre.

Al minût numar vincjesiet al rive il prin moment di svolt de partide: assist di Edenilson pal gnûf blanc e neri Kuzmanovic, conclusion dal serp dentri te puarte di Berisha e gol anulât de bande di Celi dopo de segnalazion, tardive, di un fûr zûc de bande dal so colaboradôr Manganelli.
Probabilmentri vuardeliniis e arbitri a àn reson, ma la lentece des lôr decisions a son tant che benzine sul fûc e la clime si scjalde, massime tra i zuiadôrs dal Udin, cun Thereau che cualchi minût plui indenant al cjape une amonizion par vie des sôs protestis.

La Lazio e profite de situazion: e sburte un tic di plui indenant e cussì si svicine al gol, cuntun biel cross di Candreva, che al ven tocjât no masse ben di Karnezis e al devente une bale di aur par Djordjevic, che si imberdee e nol disfrute la ocasion.
Prime de polse e rive ancje la espulsion di Danilo, che al cjape il secont cartelin zâl par vie di une pidade, che e fâs mâl ma che e somee involontarie, a dam di Djordjevic, che par chel al scuen fâsi cambiâ cun Matri. Cun di plui e je june altre ocasion pai ospits, cun Konko che al tire fûr bersai.

Tal secont timp la Lazio si zove de superioritât numeriche, no no rive a meti dongje masse ocasions, fûr che une conclusion di Cataldi, fermade di Badu, un tîr cul cjâf di Konko che al va fûr e un tîr a bersai di matri, che però nol ven convalidât par fûr zûc. L’Udin no si piert pai trois e al tire sù murais di difese, cun Colantuono che al gjave Zapata par Herteaux, Matri al segne un altri gol che nol è valit, stant che par tirâ si libere di Piris in maniere iregolâr, e la partide e va indenant tra protestis e barufis.
Dongje de fin, Celi al tire fûr il cartelin ros ancje par Matri e al è timp ancje par une barufe tra lis dôs bancjinis, protagoniscj i dirigjents Infurna e Manzini.

Prossime partide miercus a Empoli.

Contecurte Day e ‘Flon Flon e Musute’, bielis gnovis de leterature e de editorie par furlan

lengate

Îr, vinars ai 29 di Zenâr a Udin, il Comun di Udin, la Agjenzie Regjonâl pe Lenghe Furlane e la associazion El Tomât a àn presentât Flon Flon e Musute, la version par furlan di ‘Flon Flon & Musette’, il libri de  autore e ilustradore di divignince polache Elzbieta che tal 1996 al veve vinçût il premi Andersen, il ricognossiment plui impuartant tal cjamp de leterature pe infanzie.

La publicazion e je stade metude adun de bande de associazione culturâl di promozion sociâl El Tomât di Buie, cul jutori de ARLeF. Flon Flon e Musute al è un biel libri pr fruts in lenghe furlane, plasevul di lei e di cjalâ, stant che i tescj a son compagnâts di ilustrazions nininis par furlan, che al conte une storie universâl e che al pues vignî doprât pe promozion de leture e de lenghe e tant che  imprest didatic pe educazion ae pâs e pal insegnament de lenghe furlane.

Flon Flon e Musute, in maniere in chel istès fuarte e delicade, al mostre a clâr la stupiditât de vuere e dai prejudizis e al sburte a mantignî memorie vive e cussiente di vueris, di invasions e di profugancis, massime intune tiere tant che il Friûl, tai ultins cent e cincuante agns masse dispès vitime di invasions, combatiments e devastazions tal cuarp, tal spirt e par chel ancje te memorie.

flonflon

Dongje de biele gnove che e tocje la editorie par furlan, o vin il plasê di segnalâ ancje un event in program in Friûl par doman, ai 31 di Zenâr: al è un apontament par cui che si cjate di chês bandis e plui in gjenerâl une ocasion par ricuardâ une biele iniziative leterarie che e va indenant di timp e che no cognòs confins di sorte, propit cul doprâ la lenghe furlane.

L’event al è il Contecurte day, un spetacul di Contis Curtis in lenghe furlane, inmaneât cu la poie dal Sportel de Lenghe Furlane dal Comun di Listize, che al clame dongje ducj i contecurtârs de Ostarie Leterarie Contecurte e ducj chei che a àn voie di proponi une conte curte in lenghe furlane o divertisi a scoltà un pocje de gnove narative furlane, di chê curte e che si tocje…

Pe ocasion al è stât metût adun ancje une sorte di concors. Cun scjadince ai 28 di Zenâr, a son stadis tiradis dongje gnovis contis, che a vignaran letis in public e in forme anonime de bande de scuadre di Contecurte e il public al sielzarà la miôr, cussì ae sô autore o al so autôr i vignaran dâts premis di pueste e il titul di Cont des Contis. Ae fin al è proviodût un ghiringhel finâl par ducj.

La serade e sarà presentade e metude adun dal Ostîr di Contecurte, Rafaêl Serafin, lis leturis a saran par cure dal funambolic famei de Ostarie Checo Tam, dal magnetic Berlon (Michêl Londar) e de inmagante Camarele (Lussia di Uanis), cul compagnament musicâl dal Cjantôr Bizio Citos.

contecurteday

Babêl Europe di vuê: Zornade de memorie, supergrups e altris inovâi

Pieter_Bruegel_the_Elder_-_The_Tower_of_Babel_Rotterdam

Vuê al è martars e al è timp di Babêl Europe, il program cuindisinâl dedicât a lenghis, musichis e nazions cence stât, che si pues scoltâlu in direte a 11 su Radio Onde Furlane.

La seconde pontade dal 2016, che e vignarà trasmetude ancje doman, miercus ai 27 di Zenâr, a une dopomisdì, e je dedicade ae Zornade de memorie e par chel ancje a lenghis tant che l’yiddish e il romanes (o rromanì).

Si fevelarà ancje di altris inovâi, di novitâts discografichis, di cine (cu la partecipazion di I ricordi del fiume dai fradis turinês Massimiliano e Gianluca De Serio al Trieste Film Festival-Alpe Adria Cinema), de presentazion dal libri Flon Flon e Musute e de jessude dal gnûf numar de riviste Nazioni e regioni.

Il dopli apontament al è in modulazion di frecuence (sui 90 Mhz te plui part dal Friûl e sui 90.2 Mhz in Cjargne) e in rêt, ae direzion www.ondefurlane.eu.

Simpri sul sît de radio libare dai furlans si pues tornâ a scoltâ ancje chês altris trasmissions di Babêl Europe, a tacâ di chê che e je lade in onde cuindis dîs indaûr.

Palermo – Udinese 4-1

udin_neri
«Continuiamo così, facciamo del male». L’Udin des ultimis setemanis al fâs tornâ iniments chê innomenade frase di Nanni Moretti/Michele Apicella tal film ‘Bianca’.
Dopo vê cjapât cuatri patafs cuintri de Juve, îr a’nd à cjapâts ancjetancj a Palermo, cu la diference che almancul un gol lu à fat e che il Palermo, colôr di rose compagn dai juventins a Udin, cumò al à jonzût in classifiche la scuadre di balon furlane.

Cualchidun al dîs che e je colpe di chê scrite – Dacia Arena – che dopo jessi saltade fûr in tancj resoconts de partide dai 17 di Zenâr, cumò si le viôt, a caratars cubitâi, ancje tal Stadi di Udin.
Si pues dî che al è un non che al puarte sfighe. Chest, che al sedi clâr, nol dipent dal fat che la Dacia e sedi rumene, cemût che al scrîf cualchi fenomen in rêt: al sarès compagn, o magari ancje piês, se il main sponsor al fos Fca o Renault. Ce che nol va al è che chel implant al à un altri non, ven a dî Stadi Friûl.

Lis causis di cheste situazion a son ancje altris, ma la telenovela dal non dal stadi e je emblematiche di ce che al sucêt te scuadre e soredut te societât blancje e nere. Za di un pôc di timp in tancj si domandisi, in particolâr, trop che ae dirigjence i interessie pardabon dal Udin e dai siei tifôs…

Ce che al è sigûr al è che… no son sigurecis. L’Udin al clope in atac, in difese, tal mieç dal cjamp e fintremai in puarte, là che ancje Karnezis al sbrisse, cemût che al è sucedût chê altre domenie.

A Palermo il puartîr grêc al è stât un dai miôr, ma nol è stât avonde. Tal prin timp i blancs e neris, cu la cubie di atac Thereau-Perica cui polvars bagnâts e cun pôcs riforniments, a àn cirût prin di dut di no fâsi meti tal sac dai parons di cjase, ispirâts in cjamp di Vazquez e fûr dal gnûf alenadôr Schelotto.

Cun plui grinte e cun plui snait i sicilians a zuin di plui e miôr, intant che l’Udin al imbastìs alc di bon dome su lis corsiis laterâls, soredut in graciis dal dinamisim di Widmer, cu la colaborazion di Badu e Bruno Fernandes. Se pal Palermo al è Girardino chel che al à lis ocasions miôr ma al tire fûr bersai, pal Udin al è Thereau che al fâs sù par jù compagn, intant che Perica al somee une fantasime, e in gjenerâl, a part chês conclusions fûr scuare, la partide e va indenant flapute.

Il svolt al rive passade la mieze ore, cuntune biele azion Vazquez-Gilardino-Hiljermark che si siere cul gol di Quaison, che al certifiche la superioritât dai parons di cjase e al see lis gjambis ae scuadre furlane.

Tal secont timp l’Udin al prove a fâ alc di plui, ma i tentatîfs di Perica e Widmer a cjatin simpri Sorrentino al so puest. Propit l’intervent dal puartîr dai sicilians su la conclusion dal svuizar dal Udin al invie la azion che e puarte al doi a zero: cuintripît di Vazquez, passaç par Quaison e assist par Hiljemark.

Sot di doi goi, finalmentri Colantuono, al bute dentri Zapata (parcè lu vevial tignût fûr??) e si viôt alc di miôr indenant. La incressite de pression ofensive blancje e nere e met in crisi la difese palermitane e Badu al cole te aree di rigôr in maniere une vore suspiete: al varès di jessi rigôr, cu la espulsion di Gonzalez, compagn che la setemane stade a Udin par Danilo, ma Tagliavento no si vise e nol sivile.

Tal ultin cuart di ore l’incuintri al torne a jessi vivarôs. Prime al segne Lazaar, po al rive il gol de bandiere di Thereau, Sorrentino al pare une biele conclusion di Felipe, si sfante cussì la pussibilitât pal Udin di tornâ a dreçâ la partide e Trajkovski al siere il discors cuntun tîr di fûr che al finîs te puarte furlane.

Domenie che e ven l’Udin al zuiarà cu la Lazio. Viodarìn. Intant in rêt al è cui chel domande che l’Udin al vedi un gnûf alenadôr: Oronzo Canà. Si passaraial ae ‘bizona’ e al ‘5-5-5’?

Visca Mara Navarria!

navarria

Ancjemò braùre furlane in ponte di spade. Dopo de vitorie di Doha, tal mês di Dicembar stât, Mara Navarria e torne a vinci ancje a Barcelone.

Te capitâl de Catalogne la schermidore di Cjarlins e concuiste un altri sucès inte Cope dal Mont di spade. La vitorie decisive e je stade chê inte finâl cuintri de francese Lauren Rembi, là che la atlete furlane e à rivât a ribaltâ un risultât parziâl negatîf e a dâi la stocade juste tal ultin: risultât 13-12.

Il percors viers di cheste gnove afermazion al jere tacât cu lis vitoriis cuintri de sudcoreane Yu Jinsil (15-7), de rumene Simona Gherman (15-14), de estone Kristina Kuusk (15-11) e cul superament dai cuarts di finâl cuintri de todescje Alexandra Ndolo (15-9), par rivâ ae semifinâl, impegnative e scombatude, cuintri de atlete romene Ana Maria Branza Popescu (9-8).

Par catalan si scrîf: Visca Mara Navarria!

bandieris

 

Dodis cjants par dodis lenghis, gnûf apontament a Matiës / Mattie ai 23 di Zenâr

12_12

Un spetacul che al conte (e che al cjante) la diversitât lingustiche dentri dal Stât talian. Al è 12 canti per 12 lingue, progjet metût adun za di un pôc di timp de bande de Chambra d’Òc, cun chê di promovi la cognossince des minorancis linguistichis storichis, des lôr lenghis e des lôr culturis e de leç 482/1999, che e varès di garantî la tutele di lenghis, culturis e dirits.

12 canti per 12 lingue al è in chel istès un conciert, un recitale une sorte di lezion multimediâl, che al met dongje sunôrs, visions e identitâts.

Il viaç ator pal Stât talian, tra cjants e lenghis, al cjape dentri albanês, catalan, todesc, grêc, sloven, cravuât, francês, francoprovençâl, furlan, ladin, ocitan e sart. Il public al ven compagnât ator de bande de musiche e des peraulis di Dario Anghilante, Flavio Giacchero, Luca Peluc Pellegrino e Marzia Rey.

Doman ai 23 di Zenâr si pues viodi e scoltâ 12 canti per 12 lingue a Matiës /Mattie, te part di lenghe francoprovençâl de Val di Susa, alì de Sale Polivalente dal Comun, che al inmanee la serade adun cu la Tsambra Francoprovensal e cu la Chambra d’Òc.

Memoriis di politiche linguistiche che a judin a cjalâ indenant

cescje_libri

Une biel incuintri par un libri impuartant, impegnât e salacor ancje impegnatîf. La publicazion e je Memoriis di politiche lingustiche, il volum scrit di Adrian Cescje e editât de KappaVu; l’event al è chel de sô presentazion, che e je stade fate martars ai 19 di Zenâr a Udin te Sale dal Consei provinciâl.

Il libri al conte passe cuarante agns di rivendicazions e di mobilitazions e po di iniziativis, di progjets, di azions e di risultâts, che a tocjin la lenghe furlane e il dirit dai furlans di doprâle in maniere normâl.
Dentri des sù par jù sîscent pagjinis de publicazion si cjatin storie, memorie, riflessions e indicazions validis ancje orepresint e pal avignî.

Tal libri si cjate la politiche linguistiche, che e je un cjamp là che in Friûl Adrian Cescje al à fat cun snait e cun determinazion un lavôr preseôs e impuartant, cemût che al à ricuardât juste intant de presentazion ancje il presidente de ARLeF, Lorenzo Fabbro, ma al è ancje spazi pe linguistiche e soredut pe politiche, chê che i à fat simpri cuintri al furlan e ai dirits linguistics e chê che e à sburtât par che il principi di fonde de tutele des minorancis linguistichis, che si cjate tal articul 6 de Costituzion taliane, al vignìs metût in vore, in gjenerâl e in particolâr in Friûl e pai furlans.

Dut chest al ven contât di Cescje daûr de sô esperience, fate di competence e di militance: in chest sens lis sôs memoriis no presentin dome la lote pe afermazion di un principi e pe sô metude in vore concrete, ma a documentin ancje la plui part dal percors politic dal Moviment Friûl, che di chel e je stade memoreade la fondazion juste ai 9 di Zenâr stâts.

E je une narazion che e ten dongje moments specifics, fats, personis, ideis, tendincis, progjets, lavôrs, prodots, decisions, leçs, regolaments e magari cussì no ancje cualchi polemiche, a testemoneance di cemût che, in passât e ancjemò in dì di vuê, no mancjin i ategjaments «dialetants» viers de lenghe furlane e dal so ûs «normâl» tant che lenghe «normâl».

E al è un test che al da cont de suaze storiche, politiche e sociâl là che a son saltadis fûr la definizion di chê che di sù par jù vincj agns e je la grafie uficiâl de lenghe furlane, la normative regjonâl e statâl di tutele e la realizazion di altris imprescj fondamentâi tant che il Grant Dizionari Bilengâl Talian Furlan o il plui resint imprest didatic plurilengâl Lenghis.

Dongje dal autôr, a àn fevelât dal libri e dai siei contignûts ancje Silvana Schiavi Fachin, innomenade esperte di plurilinguisim e di didatiche des lenghis, il za ricuardât Lorenzo Fabbro, il segretari dal Moviment Friûl, Marco De Agostini, e il scritôr e sagjist Sergio Salvi, che ancjemò tai agns Setante dal secul passât al à provât a fâ capî che chel talian, compagn di altris in Europe, al è un stât multilengâl e plurinazionâl, cui siei libris Le Nazioni proibite. Guida a dieci colonie “interne” dell’ Europa occidentale, Le lingue tagliate. Storia delle minoranze linguistiche in Italia e Patria e matria. Dalla Catalogna al Friuli, dal Paese Basco alla Sardegna: il principio di nazionalità nell’Europa occidentale contemporanea.

Ducj cuancj a àn zontât alc aes Memoriis di Cescje e a àn metût dongje il passât, il presint e l’avignî.
Salvi, in particolâr, daûr dal so lavôr su la lenghe furlane e a pro de lenghe furlane al à paragonât Cescje cul catalan Pompeu Fabra e cul ocitan Lois Alibert.
E je une definizion impegnative, compagn de leture di chest libri che al biel, interessant e penç, ma che al merete let par une vore di motîfs. Però e je une definizion che e rapresente avonde ben l’impegn che al à coventât e che al covente par che une lenghe e puedi jessi lenghe e cussì e puedi vignî doprade… tant che une lenghe, di ducj, par ducj, di dut e par dut.

Udinese – Juventus 0-4

udin_neri

L’Udin al cjape cuatri patafs e al da almancul trê delusions ai furlans. La scree uficiâl dal gnûf stadi dai Riçs cu la prime partide de seconde part dal campionât e va inte maniere piês pe scuadre blancje e nere, e no dome par vie che la Juve che e rive in Friûl no somee nancje di un et a chê che e veve pierdût cul Udin par un a zero e duncje e vinç cence fâ nancje masse fature.

La Juve e je fuartonone par so cont e magari cussì no l’Udin le jude a piturâ di colôr di rose la zornade di Sant Antoni dal Purcit. La scuadre di balon furlane si fâs menâ ator de formazion di Allegri e al ven il dubi che ancje i tifôs furlans a vegnin cjapâts pal boro de societât blancje e nere.

E veve di jessi la fieste dal gnûf Stadi Friûl, ma si à let e si à sintût fevelâ dome di Dacia Arena. E veve di jessi la scree dal implant cu la sô segnaletiche plurilengâl e impen no si à viodût nancje un cartel di chê fate. E veve di jessi la partide dal riscat dai blancs e neris, dopo de prestazion ‘double face’ cuintri dal Carpi, e invezit e je stade une gare a sens unic, marcade – o, miôr, maglade – ancje di erorons decisîfs, ducj a pro di chê altre scuadre di Turin che no je il Toro.

Il prin di cheste serie al è chel di Karnezis, par solit atent e reatîf, che dopo un cuart di ore al reste fer suntune punizion di Dybala e al cjale la bale jentrâ in puarte. Il secont al è la durmide coletive fate de difese bancje e nere trê minûts plu indenant, cun Khedira che al va in gol cence fastidis. Il tierç al è il fal di Danilo su Mandzukic, che al jere za in direzion de segnadure: esplulsion dal brasilian, Udin in dîs e rigôr che al devente il trê a zero, ancjemò par merit di Dybala.

La Juve e je fuarte e cun trê goi te scarsele e cuntun om in plui dai aversaris e rive a fâ valê dut il so strapodê cence masse padins. L’Udin al tartaiave za sul imprin de partide e cumò al fâs ancjemò piês e tal desert blanc e neri lis unichis oasis cuntun tic di snait e di dignitât a son la buine volontât di Thereau, il dinamisim di Badu e l’impegn di Felipe, intant che tal mieç dal cjamp i tentatîfs di interdizion e di impostazion di Lodi no rivin a produsi alc e ce.

Il prin timp si siere cuntun altri gol ancjemò pai ospits – lu segne Alex Sandro – e cuntune salvament di Karnezis, che almancul lui al torne in se, suntun tentatîf di Khedira. La seconde frazion si vierç ancjemò cu la Juve che e comande e cul Udin in zenoglon e lis sostituzions a confermin cheste ande, stant che Morata al cjape il puest di Dybala e al cîr di imitâlu sot puarte (ma  Karnezis i dîs di no). Colantuono al cambie Di Natale cun Zapata e Thereau cun Bruno Fernandez,  ma in atac no son grancj cambiaments, a part une punizion di Lodi che e ven parade cun mistîr de bande di Buffon.

E cussì a restin il poker juventin, la sodisfazion, par cualchidun, che a Udin tal mês di Març si fasarà une partide tra la rapresentative dal Stât talian e chê dal Stât spagnûl e la sensazion, in tribune e denant de television, di jessi stâts menâts ator, cence jessi il purcit di Sant Antoni, che almancul chel al jere par definizion un torzeon (ma no un mone…).

Sperìn che al cambi alc, a tacâ de partide cul Palermo.

Vuê e doman su Onde Furlane si scree il 2016 di Babêl Europe

dixebra

Vuê al è martars e al torne Babêl Europe, il program cuindisinâl dedicât a lenghis, musichis e nazions cence stât, che si pues scoltâlu in direte a 11 su Radio Onde Furlane.

Te prime pontade dal 2016, che e vignarà trasmetude ancje doman, miercus ai 13 di Zenâr, a une dopomisdì, si fevele di atualitât e si scolte cualchi innomenât artist babelic.

ondef

Un viaç ator pe Europe, dal Gales dai Super Furry Animals aes Asturiis dai Dixebra, de Catalogne dai Komando Noguera al celtic punk dai scozês Oi Polloi e ae version di Ruper Ordorika di ‘Sarri Sarri’, il classic dai Kortatu che dopo passe trente agns de sô publicazion i da ancjemò fastidi a cualchidun. Intant che a Londre si tache a memoreâ fintremai in clâf turistiche il cuarantenâl dal punk rock e ancje inaltrò, fintremai in Friûl, al è timp di omaçs pai Clash o pai Sex Pistols.

Il dopli apontament al è in modulazion di frecuence (sui 90 Mhz te plui part dal Friûl e sui 90.2 Mhz in Cjargne) e in rêt, ae direzion www.ondefurlane.eu.

Pieter_Bruegel_the_Elder_-_The_Tower_of_Babel_Rotterdam

 

Carpi – Udinese 2-1

udin_neri

Tal mieç dal percors dal campionât, l’Udin a Modena al zuie par metât e… al piert par intîr.
Dopo des vitoriis a Turin cul Toro e in cjase cuintri de Atalanta si spietavisi un altri risultât e une altre prestazion de bande de scuadre di balon furlane. Impen, cuintri dal Carpi l’Udin al  à pierdût e par almancul un timp si à fintremai dismenteât di zuiâ: de cubie di atac Perica-Thereau a zuiadôrs tant che Widmer, par plui di cualchidun di lôr intant dal incuintri cui emilians al sarès coventât clamâ “Chi l’ha visto?” par savênt alc di lôr, massime dopo de biele prestazion di miercus stât.

Se tai prins vincj minûts di zûc la partide e je stade dome un cjalâsi e studiâsi, te seconde part dal prin timp i parons di cjase a àn cjapât in man il comant des operazions e a àn rivât a cjatâ il gol cun Pasciuti. L’Udin, flap e smamît, al à subît la pression dai aversaris, al è lât dongje di cjapâ il secont cuasit daurman, ma par fortune Di Gaudio le à sbarade fûr, e nol à rivât a rispuindi, ni prime e ni dopo de polse, cuant che Di Natale al à cjapât il puest di Perica.

Ancje te prime part de seconde frazion l’Udin nol è stât alc e ce, ni in atac e ni in difese. Il Carpi al mantignive il balin in man, Karnezis al rispuindeve te maniere miôr aes conclusions dai emilians, ma a vincj minûts de fin de partide al rivave ancje la seconde segnadure dai parons di cjase, cun Di Lollo.

Par fortune e sunave ancje la svearine pai blancs e neris. Za di cualchi minût al jere jentrât tal cjamp Duvan Zapata, al puest de fantasime di Widmer, e cheste, che par so conte e jere za une biele gnove, dopo de lungje infermerie dal colombian, e jere la clâf pal svolt – magari cussì no, dome parziâl – de partide dal Udin.

Dopo di un tîr di Bruno Fernandes, al jere propit Zapata chel che al rivave a meti la bale dentri de puarte di Belec. Di chel moment indenant si viodeve une altre partide, ancje parcè che lis energjiis dal Carpi a levin al mancul e i blancs e neris a cjatavin finalmentri zûc e snait e se la ultime conclusion di Badu e fos jentrade, impen di bati sul pâl, a varessin vuadagnât ancje un pont, cun dut che e sarès stade une mieze robarie par cemût che a jerin ladis lis robis.

Domenie che e ven si vierç il ziron de tornade, l’Udin al torne a zuiâ cu la Juve, che no je plui la scuadre cjatade te prime zornade, e si scree in maniere uficiâl il gnûf Stadi Friûl, che cualchidun al à ancjemò pôre che i cambiaran il non e che in cualsisedi maniere al varès di jessi , finalmentri, almancul un pôc plui furlan.

Sperìn in ben. Sperìn ancje che cu la tornade di Zapata e daûr de esperience modenese l’Udin al mostri une muse miôr cuntri dai juventins.