‘Tra le rocce e il cielo’, di vuê a domenie in Vallarsa si resone dal mont e de mont

tra_le_rocce

Storiis, memoriis, identitâts, teritoriis. A son uns pocjis des peraulis clâf che a permetin di ricognossi i argoments e il program
di Tra le rocce e il cielo, festival che si davuelç in Trentin, in Vallarsa, di vuê a domenie 21 di Avost.

La manifestazion e à chê di meti dongje esperiencis, ideis e resonaments in cont dal mont e de mont, des ‘tieris altis’, tant che part dal mont. Si partìs dal Trentin, de sô storie e de sô situazion dal dì di vuê, par cjalâ ancje inaltrò: si si slargjisi su dut l’Arc des Alps e ancjemò in direzion dal Mediterani, dal Afghanistan  o des zonis cjaldis des vueris e dai conflits dal dì di vuê, cu la memorie des vueris dal passât e in particolâr dal maçalici de Prime vuere mondiâl.

Il cartelon de rassegne al cjape dentri incuintris tematics, mostris, escursions, spetacui, proiezions di cines, presentazions di libris  e taulis tarondis.

Vie pe zornade dai 19 di Avost, par esempli, si fevele di feminis e vueris, cuntune cjaladure specifiche ancje viers des minorancis linguistichis tes regjons des Alps.

Sabide ai 20, impen, vie pe buinore e po ancje dopo di misdì, l’argoment principâl al sarà chel des frontieris, dai confins, des migrazions
e de Europe.

Il program complet di dute la manifestazion si pues leilu achì.

Par savênt alc altri ancjemò, al baste dâ un cuc in rêt: achì, achì  e achì.

‘I ricordi del fiume’ al rive tai cines, doman la anteprime alì dal Massimo a Turin

fiume

I ricordi del fiume al rive tes salis a tacâ di doman, ai 21 di Avrîl. Il film plui resint dai regjiscj turinês Gianluca e Massimiliano De Serio, che al jere stât presentât cun sucès a Vignesie te edizion dal an passât de Mostre internazionâl de art cinematografiche e che al à cjapât diviers ricognossiments ator, al jentre te programazion di diviers cines dal Stât talian tra cheste setemane e la prossime.

La anteprime uficiâl e je chê che si fâs a Turin alì de sale un dal Cinema Massimo, cu la presince dai doi autôrs.
L’apontament al è a vot e mieze, cemût che al ven sclarît culì.

fiume_deserios

I ricordi del fiume al conte la storie dal Platz, chê baracopoli grandonone che si cjatave a nord di Turin, dongje dal flum Stura.
Il film al conte in particolâr i ultins mês de esistence dal cjamp e duncje al da cont de sô int, cu lis sôs storiis, cui siei problemis, cu lis sôs sperancis. Un documentari fat cun snait, cun umanitât e cence retoriche.

I ricordi del fiume al sarà in programazion alì dal Massimo fintremai ai 27 di Avrîl.
Sù par jù in chei stes dîs si podarà viodilu ancje inaltrò, a tacâ di Rome e di Milan.

‘La salût e je di ducj’. Dai 3 di Fevrâr une gnove trasmission su Onde Furlane

ondef

La salût e je di ducj. Al è daûr di chest principi di fonde che al nas un gnûf program che al va a zontâsi cun chei altris che a son tal palinsest di Radio Onde Furlane. Il so titul al è propit La salût e je di ducj e la sô prime pontade e larà in onde ai 3 di Fevrâr.

La rubriche, che e ven curade e condusude de bande di Guglielmo Pitzalis e di Giorgia Zamparo, e à chê di meti in comun e di pandi ator informazions e cognossincis in cont di salût, sanitât e migrazions, cuntun ategjament positîf, che al va daûr dal spirt de “radio libare dai furlans”.

La salût e je di ducj e je una trasmission di servizi, di aprofondiment culturâl e di divulgazion sientifiche, metude adun ancje cu la colaborazion dal GrIS (Gruppo Immigrazione Salute del Friuli-VG) e de SIMM (Società italiana di medicina delle migrazioni).

Ogni apontament al frontarà un argoment specific, simpri cun chê vision complessive de cuistion, che e ven sclaride ben tal sottitul dal program: Migrazions e benstâ dai forescj e de comunitât locâl.

La salût e je di ducj e je une trasmission mensîl, che e va in onde in direte il prin miercus di ogni mês a 10 e mieze a buinore e in repliche ta chê stesse setemane, la sabide a 3 dopomisdì  e la domenie a 11 e mieze, in modulazion di frecuence (90 Mhz pe plui part dal Friûl e  90.2 Mhz in Cjargne) e su internet ae direzion www.ondefurlane.eu.

Onde Furlane si pues scoltâle ancje cul smartphone, cul tablet, cul iPhone e cul iPad cuntune aplicazion specifiche, che si cjate in rêt e che si pues discjamâle sore nuie.

I.BI.S., sabide ai 24 di Otubar une lezion sul bilinguisim infantîl

IBIS_Ot_Nov_15

Al va indenant a Udin il progjet t I.BI.S, Integrazione e Bilinguismo con Successo, metût adun de associazions dai polacs in Friûl, Polonik, cu la colaborazion di tancj di lôr – tra chescj e je ancje e ancje la associazion Lidrîs e Butui – e cul patrocini de ARLeF (Agjenzie Regjonâl pe Lenghe Furlane) e dal Comun di Udin.

Dopo des ativitâts metudis adun te prime part dal an e de scree de ultime rieste di apontaments, cuntune lezion-conference di Franco Fabbro sul aprendiment des lenghis daûr dai siei studis tal cjamp des neurosiencis, la iniziative e va indenant sabide ai 24 di Otubar.

A Udin, alì de Fondazione Collegio della Provvidenza, in vie Scrosoppi 2, a tacâ di 4 dopo di misdì, Jana Sovova e fevelarà di bilinguisim infantîl tes fameis bilengâls, tra dificoltâts, dubis e vantaçs.

Plurilinguisim e educazion, ai 16 di Otubar si vierç la ultime fase dal progjet I.BI.S.

Franc_Fari

Un apontament di no pierdi par cui che al sta in Friûl, soredut des bandis Udin.
Vuê, ai 16 di Otubar, alì dal Palaç di Toppo Wassermann de Universitât dal Friûl, in borc di Glemone a Udin, si scree la ultime serie di incuintris che a fasin part dal progjet I.BI.S, Integrazione e Bilinguismo con Successo, metût adun de associazions dai polacs in Friûl, Polonik, cu la colaborazion di tancj di lôr – tra chescj e je ancje e ancje la associazion Lidrîs e Butui – e cul patrocini de ARLeF (Agjenzie Regjonâl pe Lenghe Furlane) e dal Comun di Udin.

A tacâ di 5 e mieze sot sere e sarà une lezion-conference di Franco Fabbro, professôr di neuropsichiatrie infantîl dal Ateneu furlan, che al fevelarà dal aprendiment des lenghis daûr dai siei studis tal cjamp des neurosiencis.

Il progjet I.BI.S. al cjape dentri ancjemò altris trê apontaments: doi incuintris ai 24 di Otubar e ai 7 di Novembar, a Udin alì de ondazione Collegio della Provvidenza, in vie Scrosoppi 2, e une conference finâl ai 14 di Novembar, ancjemò alì dal Palaç Di Toppo Wassermann.

La partecipazion a ducj i events di I.BI.S. e je libare e sore nuie.

Di Bagnarie a Tarcint e a Cividât, une Onde… furlane, lungje e vivarose

vivaondefurlane

Tra vinars ai 17, sabide ai 18 e domenie ai 19 di Lui, in Friûl o vin vivût un fin di setemane lunc e soredut siôr di apontaments e iniziativis. No si podeve rivâ dapardut e o vin scugnût sielzi. Cussì o vin scugnût fâ di mancul di lâ a Postaja Topolove/Stazione Popolò, che ancje chest an al veve un biel program, e lassâ in bande i doi concierts plui impuartants di domenie – chel di Passarian, cun Gilberto Gil e Caetano Veloso, stant che a jerin za stâts a Chieri une setemane indaûr, e chel dal gaitero asturian Hevia a Tumieç –  e si vin dedicâts a Tarcento Jazz, a Viva Onde Furlane e a Mittelfest. Ogni an la rassegne di Cividât e messede mainstream e sperimentazion, inovazion e alc di za sintût e za viodût. Nus somee che e fasi compagn ancje chest an. Cun di plui, si cjatìn avonde in cunvigne cun cui che al pense (e che al volarès) che sei tes propuestis da so cartelon che te sô comunicazion istituzionâls si viodessin di plui lis lenghis ‘ altris’ dal Friûl. Cun dut che al è ancjemò tant ce fâ, o vin viodût cun plasê che, magari dome tal ultin, te edizion di chest an al è saltât fûr alc di plui in chest sens: cualchi messaç plurilengâl, il spazi dedicât ae poesie furlane contemporanie, cui viers di Tavan, Cappello, Giacomini, Moratto e Mattiuzza dedicâts ae aghe e un pâr di spetacui.

color_aghe

Domenie stade al jere in program un di chescj, ven a dî Colonie, spetacul teatrâl par furlan e par talian di leturis, musiche, bal e bodypainting metût adun di Loris Vescovo e di Giorgio Olmoti, cu lis atoris e cjantantis Saba Anglana e Claudia Grimaz, la balarine Cora Steinsleger, lis proiezions di Cosimo Morelli e i musiciscj Leo Virgili e Ermes Ghirardini. Lu vin viodût e nus à plasût un grum. No lu scrivìn parcè che o vin stime par plui di cualchidun di lôr, che a son coinvolzût tal progjet, e che ju calcolìn tant che amîs, a tacâ di Loris Vescovo, Giorgio Olmoti e Leo Virgili, ma cun obietivitât: la idee di partence e je biele e al è une vore bon ancje l’impat emotîf e senic. O sperìn che Colonie al puedi vignî tornât a fâ, parcè che al merete. Cun di plui, in cheste maniere al podarà inmò rinfuarcî la sô fuarce narative e seniche e magari ancje rifinì cualchi passaç. Colonie al met dongje dôs storiis di colonizazion, di vuere e di emigrazion che si incrosin, scjavaçant lûcs e timps.  Lis protagonistis de rapresentazion a son dôs feminis che a àn memorie vive, in graciis des contis des lôr nonis, di doi fats di violence: un che al è stât patît dai furlans ae fin de Seconde vuere mondiâl, a Clauian il 1n di Mai dal 1945, e un là che i talians a jerin stâts i sassins, intant de colonizazion de Afriche orientâl, li de glesie cristiane-copte di Debre Libanos in Etiopie. Lis dôs – Claudia, furlane che e lavore a Berlin, e Abeba, etiope imigrade tal Stât talian – si cjatin propit devant de glesie di Clauian là che al jere stât metût in vore il svindic de bande dal esercit todesc…

colonie

Il nestri fin de setemane furlan al jere tacât za vinars a Tarcint cui prins concierts de gnove edizion di Tarcento Jazz, la rassegne inmaneade di Hybrida alì di Palaç Frangipane. E je stade la ocasion di viodi dal vîf il biel progejt di vocalês folk jazz di Vocinconsuete, il jazz-core cuinçât di eletroniche dai Martello e la potence policromatiche dal cuartet dai Roots Magic. La sabide di sere no vevin dubits su ce fâ: o sin lâts a Bagnarie a Viva Onde Furlane. Un biel puest, tal mieç dai cjamps e in bande e de autostrade, une biele atmosfere di fieste e une lungje gnotolade di musiche, vierte di Vocinconsuete (simpri lôr: bravis e vonde) e puartade indenant dai Carnicats in version lizere – cence grup, come une volte – che a àn confermât di jessi bulos e professionâi, dai Daisy Chain, pe ocasion cence mascare ma simpri cuntun biel tîr, e dai Volvodrivers, zovins de Basse tirâts sù a dosis fuartis di grunge a hard rock, e sierât dai LaipLessNess, protagoniscj di une performance potente e divertente, visionarie e sfolmenade.

laiplessness4

Vie pe buinore di sabide o vin stât ancje li de Universitât, a Udin, pe cunvigne su Autonomie speciâl e Statût regjonâl dal Friûl-VJ, ma di chel o scrivarìn un altri viaç.

Doi dîs dopo di cheste overdose di Friûl furlan e babelic nus ven sù ancjemò une osservazion. Cul cjalâ in nons di tancj di lôr coinvolzûts ancje in altris events e situazions, al somee pardabon che chê di Onde Furlane e sedi une onde lungje, poliedriche e vivarose.

Al à propit reson Pierluigi Cappello.

La Zornade de Europe pe Europe di ducj e di ducj i dîs

europe

Sabide stade a jerin i 9 di Mai. E je une date impuartantone, stant che e je chê dal inovâl de innomendade “Declarazion Schuman” e par chel, a tacâ dal 1985, e je memeoreade tant che “Zornade” o “Fieste” de Europe.
Cun di fat, in chê dì dal 1950 il ministri pai afârs forescj dal Stât francês di in chê volte, Robert Schuman, al fasè un discors public a Parîs che al tocjeve la pâs e la Europe e in cualchi maniere cu lis sôs peraulis al invià chel procès che, pûr cun cetantis contradizions, al è ancjemò in vore in dì di vuê: il procès de integrazion europeane.
In cont de impuartance e de atualitât de “Declarazion” us conseìn di lei doi articui: un che al è saltât fûr cualchi zornade indaûr  e un altri, publicât l’an passât, che al tocje ancje il Friûl tant che part de Europe.

Di trente agns incà cheste zornade e ven memoreade un pôc dapardut cun chê di marcâ la impuartance de prospetive de unitât europeane. Magari cussì no, al sucêt avonde dispès che l’argoment al vegni frontât cun tante retoriche e cun pocje sostance. Al sucêt ancje alc altri, par fortune, e chel inovâl al devente une ocasion par moments di aprofondiment in cont de situazion de Europe, chê che e je e chê che e mancje.

Un di chescj al è l’incuintri che si davuelç ai 12 di Mai a Turin alì dal Campus Einaudi de Universitât, in Lungo Dora Siena 100.
Inmaneade de bande de riviste Europae  e dal Centro studi sul federalismo
di Moncalieri, la zornade e à tant che titul Ucraina al bivio. Quale sovranità ai confini di quale Europa?.

La crisi ucraine e je une des tantis cuistions viertis che tai ultins agns, di une bande, a son motîf di preocupazion ator pe Europe e, di chê altre, a palesin propit i limits e lis contradizions dal  procès de integrazion europeane e a marchin la dibisugne di vê une Europe plui unide e duncje plui Europe. Sul argoment,  frontât propit cun chê di cjalâ in muse la realtât de Europe tal so complès,  si pues tornâ a lei ancje un articul saltât fûr un an e mieç indaûr.

Une altre cuistion, une vore di atualitât, che si pues calcolâle tant che un altri spieli des contradizions de Europe dai ultins agns, e je chê che si palese ogni dì tal cûr dal Mediterani, cun tancj di lôr che a scjampin des vueris e de fam, cun chei che a speculin su cheste dibisugne di scjampâ e di lâ inaltrò a cirî fortune e cun chei che no àn ancjemò capît ben ce che a àn di fâ denant di cheste situazion.
Ancje su chest argoment o zontìn un articul di lei.

Cui auguris in ritart pe Fieste de Europe. E, cence limits di datis, a pro di une Europe «plui Europe» ducj i dîs. E par ducj.

I.BI.S., ai 9 di Mai a Udin il cuart incuintri su plurilinguisim e integrazion

IBISweb

Cognossi dôs lenghis al è miôr che cognossi une sole e cognossi trê al è miôr ancjemò.
Chest al vâl par ducj – furlans, slovens, talians e polacs… – e in ogni dontri:  a Turin, in Friûl e in  cualsisedi altri puest.

In cont dal plurilinguisim al va indenant a Udin il progjet I.BI.S., metût adun de associazions dai polacs in Friûl, Polonik, cu la colaborazion di tancj di lôr (tra chescj e je ancje la nestre associazion) e ancje cul patrocini de ARLeF (Agjenzie Regjonâl pe Lenghe Furlane) e dal Comun di Udin.

Dopo de tierce lezion-conference dal program fate ai 11 di Avrîl, vie pal mês di Mai a son ancjemò doi apontaments. Chel di sabide ai 9 di Mai al tocjarà il rapuart tra bilinguisim e lengaç dal cuarp e al vignarà condusût de bande di Massimiliano Godeassi.

Dutis lis informazions si cjatin achì.

Plurilinguisim e integrazion, I.BI.S. al va indenant ancje tal mês di Avrîl

IBISweb

Al va indenant il progjet I.BI.S., metût adun de associazion Polonik, che e ten dongje i polacs che a son a stâ in Friûl.

La iniziative, inmaneade cu la colaborazion di tancj di lôr (e tra chescj e je ancje la nestre associazion), si disvilupe vie par dut il 2015, cemût che si lei ancje achì.

Dopo dai doi incuintris fats vie pal mês di Març, sabide ai 11 di Avrîl e je la tierce lezion/conference, simpri a Udin, alì  de Fondazion ‘Collegio della Provvidenza’, in vie Scrosoppi 2, a tacâ di cuatri dopo misdì.

Culture polache a Udin, dai 13 ai 18 di Març a tornin lis Zornadis

DOUBLE_LIFE_VERONIQUE-7

Cualchi an indaûr a vegnin inmaneadis a Turin lis “Giornate polacche”.

A tacâ dal 2014 une iniziative di cheste fate e ven metude dongje ancje in Friûl.
Si clame Giornate della cultura polacca e le inmanee la associazion Polonik cul jutori e cul patrocini di tancj sogjets publics e privâts.

locandina-giornate-JPEG2

La seconde edizion de rassegne e tache vuê e e va indenant fintremai ai 18 di Març.
Tal program a son une schirie di apontaments che a tocjin il cine, la musiche, la poesie, la filosofie, la narative e la promozion turistiche.

Tal cartelon de manifestazion a son ancje un omaç ae produzion dal regjist Krisztof Kieslowski, un incuintri cul poete Ryszard Krynicki e un conciert dal cjantautôr Andrzej Sikorowski.

kieslowski