Pordenone – Casarano 3-0

bandieris-friuul

Il Pordenon al vinç e al va indenant inte Cope Italie. A Triest, cuintri dal Casarano, la scuadre furlane prime e ten bot denant dai atacs dai aversaris e po e impon la sô superioritât tecniche e al segne trê goi.

In principi i sborfs a àn ancje un tic di fortune, cuant che Sansone al tire fûr di pôc e Giacomarro al cjape il pâl. Cul passâ dai minûts a vuadagnin il cjamp e a cjapin il control de partide: juste cul lôr prin atac a cjatin la strade dal gol cun Rossetti. Passade al prime mieze ore i verts e neris a tornin a segnâ: fal di Guarnieri su Banse inte aree dal Casarano, Amabile al sivile e Butic nol perdone.

Inte seconde frazion il ritmi al cale e il Pordenon al manten il control de partide. No si scompon denant dai tentatîfs fûr bersai di Sansone e di Onda e juste a un cuart di ore de fin al segne il tierç gol: cross perfet di Ciurria e conclusion perfete cul cjâf di Seclì che al staronze il risultât.

Udinese – Spezia 0-2

This image has an empty alt attribute; its file name is udin_neri.png

E veve di jessi la prime zornade di campionât dal Udin. E je deventade la seconde partide e la seconde sconfite. Trê dîs dopo dal incuintri smamît ma ancje scombatût, pierdût cul Verona, i blancs e neris a colin malamentri ancje in cjase cuintri dal Spezia, che tal stadi Friûl a concuistin la lôr prime vitorie in assolût in serie A.

Su la cjarte i ospits, che a rivin de sdrondenade cjapade a Cesena cuintri dal Sassuolo, a son aversaris che no fasin pôre, cundut che Gotti al scuen fâ di mancul di Mandragora, di Walace, di Jajalo e di Arslan tal mieç dal cjamp e nol à a disposizion nancje Nuytinck e Stryger Larsen e al è ancjemò masse adore par fâ zuiâ Pereyra e Bonifazi.

I parons di cjase si presentin tal cjamp dai Riçs cun Musso in puarte, cun Becao, De Maio e Samir in difese, cun Ter Avest, Di Paul, Palumbo, Coulibaly, Zeegelaar e cun Lasagna e Okaka in atac.
Italiano nol à voie che la sô scuadre e cjapi altris cuatri scufiots. Cussì al cambie passe metât de scuadre che e à zuiât a Cesena, al recupare Terzi e Maggiore, al ponte tal mieç su Ricci e al torne a dâi fiducie a Gyasi.

Il Spezia al fronte l’Udin cun rispiet, cun atenzion e cun grinte e al scomence cul pas just. Ricci al rive fintremai a butâle dentri daurman dopo nancje un minût e mieç di zûc, ma Prontera al verifiche cu la Var la posizion iregolâr e il gol nol ven fat bon. Dopo di chê sfalamade la partide si distude par passe vincj minûts, stant che no si viodin ni un grant zûc e nancje un straç di emozion. Al vignarès di sossedâ ma par fortune al è alc che si môf, prime de bande dal Udin, cuntun tîr fûr bersai di Okaka e cuntun altri gol che al ven anulât par fûr zûc di Lasagna, e po de bande dai ospits, che a segnoin pardabon: Gyasi al schiribice Becao e le met tal mieç par Galabinov che cul cjâf al impire
Musso.

Il prin timp si siere cui tentatîfs di dreçâ la partide di De Paul e di Lasagna e ancje la seconde frazion si vierç cul Udin che al mostre di vê chê di recuperâ il disvantaç e di fâ ancjemò alc di plui. Magari cussì nol rive a cumbinâ alc e ce, parcè che il Spezia al tire sùù bariduris simpri plui altis e Lasagna, che al à ancjemò un pâr di buinis ocasions, nol rive a butâl dentri.

A passin i minûts, Zoet si fâs mâl e Rafael al cjape il so puest, intant che Gotti al bute dentri Nestorovski par Okaka e Ouwejan par Zeegelaar e il Spezia al reste in dîs cuintri undis, dopo de espulsion di Terzi. La superioritât numeriche e sburte l’Udin a incressi la sô pression ofensive. Rafael nol à fastidis tal fermâ un tîr cul cjâf di De Maio, al viôt dôs conclusions di De Paul e di Becao pierdisi in bande de sô puarte e po al met un blec suntun tîr di Owejean. I ospits a tegnin bot e i blancs e neris no rivin a cjatâ il gol. Ae fin Rafael al rive ancje a fâ ancje l’ispiradôr dal secont gol di Galabinov in cuintripît: il colp dal ko.

L’unic aspiet positîf al è che nissun, in cheste ocasion, al fevelarà di “Derby del Tr…..to”. Alc al è alc.

Toots & the Maytals + Fermin e Iñigo Muguruza + Malasorti + Kenze Neke + Dixebra = Babêl Europe 20/2020

Libri gnûfs, discs tornâts a stampâ, fiestis nazionâls e zornadis di memoreâ e l’omaç ae memorie di doi musiciscj babelics che no son plui. La gnove pontade di Babêl Europe, il program cuindisinâl di Radio Onde Furlane dedicât ae produzion musicâl intes lenghis minorizadis de Europe, che e siere il mês di Setembar e e vierç chel di Otubar si presente une vore siore di contignûts.

Lant daûr di Mala Manera, il libri che al compagne la ristampe dal disc dai Malasorti, S’ArdiCity, de fieste nazionâl asturiane, che e je colade ai 8 di Setembar, e de muart dal innomenât cjantant e musicist gjamaican Frederick “Toots” Hibbert, il viaç musicâl di Babêl Europe al tocjarà la Sardegne, il Paîs Basc e lis Asturiis.

No si scoltaran dome i Malasorti, ma si tornaran a scoltâ ancje i Kenze Neke, che tal lôr repertori a àn ancje un toc che al cjape sù un classic di Toots & the Maytals. Cun di plui si scoltarà il stes Toots, in cubie cun Fermin Muguruza, e al sarà ricuardât ancje Iñigo Muguruza, fradi di Fermin, so compagn tai Kortatu e tai Negu Gorriak e protagonist ancje di altris progjets di rock alternatîf basc, che al murive ai 5 di Setembar dal 2019. E al sarà spazi ancje par un toc dai Dixebra.

La gnove pontade di Babêl Europe si pues scoltâle vuê, martars ai 29 di Setembar, a undis a buinore, doman, miercus ai 30, a une dopo di misdì, e po sabide ai 3 di Otubar, a une e mieze dopo di misdì. Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), la stesse trasmission e sarà a disposizion in rêt, su Spreaker e su Spotify.

This image has an empty alt attribute; its file name is logo_web.png

 

Verona – Udinese 1-0

This image has an empty alt attribute; its file name is udin_neri.png

Il gnûf campionât dal Udin al scomence avonde malut. A Verone la scuadre blancje e nere e zuie une partide un tic smamide, i parons di cjase a rivin a vinci e ae fin dal incuintri, dongje dal displasê de sconfite, massime pai furlans plui sensibii, al è ancje il fastidi che al diven dal fat che la plui part dai media, ancje – e soredut – in Friûl, a tornin a contâ chê dal ors dal “Derby del Triv…to” (Aaaargh!).

Pe prime di campionât Gotti al mande in cjamp Musso tra i pâi, Becao, De Maio e Samir in difese, Ter Avest, Di Paul, Arslan, Coulibaly e Zeegelaar inte mediane e la cubie Lasagne-Okaka in atac.
La scuadre furlane, che inte ocasion e à la maie zale, e prove daurman a imbastî un pôc di zûc.

Sghindâts i pericui relatîfs di un tîr fûr bersai di Zaccagni e di une conclusion cul cjâf di Cetin, la scuadre di balon furlane e met adun une biele combinazion jenfri Coulibaly e Lasagna e un pâr di tentatîfs dal centrocapist senegalês, intant che De Paul al scomence a fâ di ispiradôr de manovre.

Tal ultin cuart di ore dal prin timp l’incuintri si scjalde cul veronês Tamèze che al lenç il pâl, cuntune azion personâl di De Paul che al impegne Silvestri e po, intal recupar, cun Becao che al salte inte aree veronese e cul cjâf le tocje ben ma al à la sfortune di cjapâ la travierse.

Dopo de polse l’Udin al somee ancjemò plui determinât, cun De Paul che al vuide lis danzis. Par chel Juric al decît di meti l’ex blanc e neri Barak fis daûr dal argjentin.
La sielte tecniche e je chê juste, stant che e à l’efiet volût dal alenadôr dal Verone. La scuadre furlane e ven neutralizade e i parons di cjase a provin a fâ alc di plui. Cussì a rivin a cjatâ il gol cuntune biel cumbinazion di sintiment e di… cûl: lanç di Barak, deviazion di muse, involontarie, di Faraoni, che e mande fûr scuare la difese, e conclusion a bersai di Favilli, che cun snait e cun oportunisim al bat Musso.

Passât in vantaç, il Verona al cîr di tignî bot e di gjestî la partide fint in som. L’Udin al prove a dreçâle, tra une barafuse denant di Silvestri, là che no si capìs cui che al tocje la bale cu la man, e Coulibaly che al cjante e al puarte la crôs, prime mancjant di un et un apontament cuntune biele bale alte e po cuntun sugjeriment bielonon par Nestorovski, che le met tal mieç par Okaka e Lasagna, cun KL15 che al tire masse alt.

Inte ultime part dal incuintri il Verona si impegne ancjemò di plui a tignî la bale lontan de aree di rigôr e l’Udin al rive a tirâ in puarte dome une volte cun Nestorovski, che si zire ben ma nol cjate la puarte. Al va ben pal Verona, che al vinç e si cjate prin in classifiche, dongje dal Napoli e dal Milan, intant che pal moment i blancs e neris a son a cuote zero.
Vie pe setemane al sarà ce lavorâ.

Lecce – Pordenone 0-0

This image has an empty alt attribute; its file name is pordenone-calcio.png

Nissun gol e un pont par om. La partide che e scree de gnove stagjon dal Pordenon e dal Lecce e je avonde biele e vivarose. La scuadre di balon dal Friûl ocidentâl e da il miôr di se vie pal prin timp, intant che i parons di cjase a fasin di plui inte seconde frazion: la paritât finâl e je juste, stant che dutis dôs lis formazions si son svicinadis ae segnadure.

Il Lecce si presente cuntun 4-3-3, cun Gabriel in puarte, cun Zuta, Lucioni, Meccariello e Calderoni in difese, cun Petriccione tal mieç, dongje di Majer e Henderson esternis di centricjamp, e cun Coda, Mancosu e Listkowski in atac. Tesser al rispuint cuntun 4-3-1-2 struturât ator de tierce linie cun Vogliacco, Barison, Camporese, Falasco denant di Bindi, cun Calò, Magnino e Rossetti in mediane e cun Mallamo daûr de cubie di atac Diaw-Ciurria.

I sborfs a partissin cul pît just e dopo cuatri minûts di zûc a impegnin Gabriel cun Ciurria, brâf a robâi la bale a Meccariello e a puartâsi in zone tîr. La prime ocasion dai parons di cjase, che a patissin la iniziative dai ospits, e rive vincj minûts plui tart cuntune conclusion di Listkowski che e sbat sul pâl. I zâi e ros si dismovin e a tornin al atac, ma no rivin a cumbinâ alc e ce, intant che prime de polse a son ancjemò dôs conclusions, une par bande: un tîr centrâl di Diaw e un tentatîf di Coda, fermât di Vogliacco.

Il secont timp si vierç cul Lecce che al va dongje dal vantaç cuntun tîr di Calderoni, tocjât di Henderson, che al oblee Bindi a saltâ e a salvâsi in corner. Il ritmi al è avonde alt e lis emozions no mancjin. Prime al è il Pordenon che si svicine al gol cun Mallamo, ma Gabriel al dîs di no, e po pai parons di cjase al rive un tîr fûr bersai di Coda. I neris e verts a provin ancjemò a impegnâ Gabriel cun Diaw, che al scate ben ma al tire fûr di pôc a bande, intant che une conclusion di Mancosu si distude un tic plui indalt de travierse. Tal ultin cuart di ore i salentins a alcin il numar dai zîrs dal lôr motôr, ma il Pordenon no si scompon, si difint cun sintiment e nol è nissun pericul par Bindi.

Sabide che e ven la formazion furlane e zuiarà cul Vicenza, che al à pierdût la prime partide cuintri dal Vignesie.

Buine Zornade Europeane des Lenghis!

Vuê o sin ai 26 di Setembar e a tacâ dal 2001 cheste e je la Zornade Europeane des Lenghis.

E je une Zornade impuartante che o memoreìn simpri cun plasê.

La Zornade Europeane des Lenghis e je une ocasion par visâsi de impuartance dal pluralisim linguistic tant che ricjece, dirit e oportunitât. Une impuartance che e ven ricuardade vie par une Zornade, ma che e vâl ducj i dîs.

La Zornade Europeane des Lenghis nus tocje tant che personis, tant che citadins europeans, tant che personis di divignince furlane che a vivin a Turin e in Piemont, propit parcè che o vin cussience di cetant che il plurilinguisim al è impuartant intes sô diviersis dimensions.

L’insegnament, l’aprendiment e la cognossince des lenghis a son alc che al è ben e al conven.
Chest al vâl pes lenghis che, in Europe e pal Mont, si cjatin in cundizion di dominance, a nivel statâl e in cualchi câs ancje intune dimension internazionâl, e par chel a son cetant dopradis e a àn une grande presince comunicative. Ma al vâl compagn – e salacor ancjemò di plui: massime intune prospetive di emancipazion, di liberazion, di rispiet e di convivence- pes lenghis che, stant che a son stadis – e che a son ancjemò – minorizadis, a vegnin dopradis di mancul e di mancul int e fintremai, juste par chel, si cjatin a jessi “mancul lenghis”.

Cussì al merete visâsi de Zornade Europeane des Lenghis e soredut visâsi che e je la Zornade di dutis lis lenghis e duncje anche di chês che si cjatin in cundizion di minorizazion.

Par plui resons – avonde claris… – nus interesse in maniere particolâr cheste dimension dal pluralisim linguistic.

Cussì ancje pal 2020 il nestri auguri, compagn che agns indaûr, al è chel:

Buine Zornade Europeane des Lenghis a dutis e a ducj!
(pe zornade di vuê e par ducj i i dîs)

Ocitanie, Friûl… e Suns Europe. Sabide ai 19/9 a Trave peraulis e musiche cun Sergio Berardo e cun Angelo Floramo

No ducj a san che il “passepuart” che i à permetût a Leonardo di jentrâ te cort di Milan e di inviâ alì la sô stagjon plui impuartante e je stade la musiche: lis dotis musicâls e un strument origjinâl fat sù di lui,

Plui in gjenerâl la musiche e pues deventâ ancje l’imprest miôr par che une comunitât – cu la sô culture, la sô storie e la sô lenghe – e cjapi cussience di se e si fasi cognossi – e ricognossi – ancje fûr dal so teritori.

Chest al vâl par tantis comunitâts minorizadis ator pe Europe e in particolâr pe Ocitanie. In dutis lis tieris “d’Oc” e massime tes Valadis Ocitanis dal Piemont, la musiche e à judât tancj di lôr a tornâ a scuvierzi la lenghe proprie e la identitât linguistiche, culturâl e teritoriâl e po a fâle cognossi e ricognossi ator, dapardut. La musiche – des melodiis patriarcjinis a Mainerio par rivâ ae gnove musiche furlane – e à zuiât une funzion identitarie impuartante ancje in Friûl.

Sabide ai 19 di Setembar l’ultin apontament cun Suns Europe 2020 al è un viaç inzirlôs par etis e tieris diferentis cu la musiche des peraulis e cu lis peraulis de musiche. Tacant des 9 di gnot, inte place di chê frazion dal Comun di Lauc, in Cjargne, il public al vignarà compagnât in chel percors di dôs vuidis di gale: l’ocitan Sergio Berardo e il furlan Angelo Floramo.

Sergio Berardo al è un innomenât polistrumentis e cjantant ocitan. Al è la vôs e la anime dai Lou Dalfin, il grup plui impuartant des Valadis Ocitanis dal Piemont, e al è cjapât dentri di cetancj progjets di ricercje, di promozion e di reinvenzion de musiche popolâr ocitane. Tra chescj al è Gran Bal Dub, crosere di folk, reggae e eletroniche, metude adun cun Madaski, tastierist dai Africa Unite.

Angelo Floramo al è nassût a Udin, al insegne storie e leterature e al colabore di consulent pe biblioteche Guarneriane di S. Denêl. Al sgarfe tai archivis, al scrîf par rivistis sei par furlan che par talian e al è autôr di cetancj libris: tra chescj a son Balkan Circus (2013), L’osteria dei passi perduti (2017) e La veglia di Ljuba (2018).

Transjoik + Manel Lluis + Kosovni Odpadki + Esposa + Joan Baez + Zornade Europeane des Lenghis = Babêl Europe 19/2020

Martars ai 15 di Setembar su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu) al torne Babêl Europe, il program cuindisinâl dedicât ae produzion musicâl tes lenghis minorizadis dal nestri continent.

Chê di cheste setemane no sarà une trasmission in direte. Si fasarà un salt indaûr tal timp fintremai tal 2017, vot dîs dopo de celebrazion di in chê volte de Diada Nacional, la fieste nazionâl catalane, e passe dîs dîs prime dal referendum pe indipendence dal 1n di Otubar.

Si tornarà a scoltâ  la pontade di Babêl Europe fate ai 19 di Setembar dal 2017: un viaç a torzeon tra lenghis, musichis e nazions cence stât, dedicât a chei events, a chês ricorencis e ae Zornade Europeane des Lenghis, che si disvilupe daûr di un percors che al va des tieris dai Sami e al rive in Friûl e che al tocje ancje la Catalogne, il Paîs Basc e la Galizie.

E sarà la ocasion par scoltâ i Transjoik, la version de cjançon tradizionâl catalane Rossinyol que vas a França fate di Manel Lluis, un ‘classic’ dal repertori babelic dai Kosovny Odpadki, une cerce di Xardin Interior, che in chê  volte al jere l’album gnûf dai Esposa, e fintremai la innomenade artiste americane Joan Baez che e cjante par basc, cu la sô version di Txoria Txori, cjançon di amôr e di libertât di Mikel Laboa, che si cjate tal album Diamond and Rust in the Bullring, jessût tal 1988.

Dopo de prime emission in direte, cheste gnove pontade di Babêl Europe e torne te programazion di Radio Onde Furlane in repliche ancje miercus ai 16 di Setembar, a une dopo di misdì, e ancjemò sabide ai 19 a une e mieze.

Cun di plui si podarà tornâle a scoltâ tal sît internet de radio libare dai furlans, su Spreaker e su Spotify.

This image has an empty alt attribute; its file name is logo_web.png

Kenze Neke + Lalli + Fermin Muguruza + Chalart 58 + Joana Gomila + Paxkal Irigoyen + Gran Bal Dub + Canta U Populu Corsu = Babêl Europe 18/2020

Vuê al è martars e tal palinsest di Radio Onde Furlane al torne Babêl Europe, il program cuindisinâl dedicât ae produzion musicâl intes lenghis minorizadis. Dopo dal prin apontament, a undis a buinore, chê stesse pontade si podarà tornâ a scoltâle tal dopodimisdì di doman, miercus ai 2 di Setembar, a une, e in chel di sabide ai 5 di Setembar, a une e mieze.

Il gnûf viaç a torzeon jenfri musichis, lenghis, minorancis e nazions cence stât al tocjarà ancjemò la edizion 2020 di Suns Europe, il festival european des arts intes lenghis minorizadis, cu la scolte di une cerce dal repertori de artiste dai Paîs Catalans, Joana Gomila, e dal cjantautôr basc Paxkal Irigoyen, che a saran protagoniscj, la prime, dai concierts dai 5 di Setembar a Lavarian e dai 6 di Setembar a Dartigne e il secont dai apontaments dai 12 di Setembar a Puçui e dai 13 di Setembar  a Romans dal Lusinç.

Cun di plui si fasarà un salt indaûr tal timp, inte storie de Corsiche, par memoreâ il 45esim inovâl di chei che ju clamin i fats di Aleria, scoltant une cjançon “classiche” di Canta U Populu Corsu.

Lant daûr dal program di edizion 2020 di Suns Europe, che pai 19 di Setembar al previôt a Trave di Lauc un incuintri su Ocitanie, Friûl e Europe, si scoltarà ancje alc dai Gran Bal Dub, intant che, cul intindiment di segnalâ une riedizion digjitâl e une gnove produzion, si scoltaran ancje i sarts Kenze Neke, adun cu la cjantate turinese Lalli, e il prodot de gnove colaborazion jenfri il basc Fermin Muguruza e i catalans Chalart 58.

This image has an empty alt attribute; its file name is suns-europe-2020-logo.jpg

Ancje cheste pontade di Babêl Europe, dopo des trê emissions di cheste setemane, i podarà tornâ a scoltâle in rêt, compagn di chê altris, sul Spreaker e sul Spotify di Radio Onde Furlane.

La radio libare dai furlans si scolte sui 90 Mhz inte plui part dal Friûl, sui 90.200 in Cjargne e in rêt, par dut il mont, in streaming o in direte.