Al torne Babêl Europe, in spiete di Suns Europe

suns-europe-ok

E je aromai ore di Suns Europe, il Festival european des arts  tes lenghis minozadis che si fasarà a Udin, li dal Teatri gnûf Giovanni da Udine, dal prin ai 3 di Dicembar. Cussì, cuasit ae vilie di chê manifestazion, ancje la gnove pontade di Babêl Europe e sarà une trasmission plene di… Suns.

imle

L’apontament cuindisinâl che al puarte lis scoltadoris e i scoltadôrs di Radio Onde Furlane a torzeon tra grups, soliscj, lenghis, musichis, minorancis e nazions cence stât, vuê in direte a 11 a buinore e doman in repliche a une dopo di misdì, al cjalarà ancjemò une volte in direzion di chê manifestazion e dal so program, cu la scolte di cualchidun dai protagoniscj de sô sezion musicâl ma ancje cuntune voglade viers di chês altris sezions, dedicadis ae produzion audiovisive e ae leterature.

Par chel, si podarà tornâ ancje scoltâ alc dai Obrint Pas, stant che un dai protagoniscj di Suns Europe al è propit Xavi Sarrià, cjantant e ghitarist di chel grup e autôr di contis e di romançs par catalan.

xavisarria

Cun di plui si butarà un voli (e une orele) ancje in altris direzions. Par esempli viers de gnove produzion di Fermin Muguruza o ben – dopo vê savude la brute gnove – cuntun omaç al cjantautôr galizian Narf.

Babêl Europe si pues scoltâle su lis frecuencis di Radio Onde Furlane  (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) e, dopo des dôs emissions di vuê e di doman, ancjemò in rêt.

fm_gnuuf

Cagliari – Udinese 2-1

udin_neri

La uniche consolazion e je chê che – cuntune vision che o podaressin clamâle internazionalitarie – e à vinçût une scuadre sarde, là che al zuie ancje un furlan, Simone Padoin. Magari cussì la trasfierte dal Udin a Casteddu/Cagliari no va inte maniere che si spietavisi. I blancs e neris di Delneri a zuin ancje avonde ben, ma a fasin masse erorats sei in atac che in difese e ae fin ju pain ducj: i goi mangjâts e lis amnesiis difensivis. Cussì e finìs doi a un a pro dai parons di cjase che, cuntune formazion di emergjence, a rivin a puartâ a cjase trê ponts impuartants e a gjavâsi vie il fastidi des ultimis dôs partidis pierdudis une daûr di chê altre.

L’Udin al partìs ben. Al cjape sù il tamon dal zûc, al fâs zirâ la bale, al ocupe il cjamp e i lasse pôc ce fâ ai sarts. A passin i minûts però la superioritât tatiche dai blancs e neris no prodûs alc e ce, par merit di Storari ma soredut pe scjarse incisivitât dal atac. Cussì, dopo passe mieze ore di zûc cun pocjis emozions al rive il gol dal Cagliari che al vuadagne un rigôr cun Farias e lu trasforme. L’Udin, che sul imprin al veve rivât a tirât in puarte cun Fofana e po al veve straçât un pâr di ocasions cun Zapata, al torne a jessi pericolôs cun Widmer, ancje se Storari i met un blec cul pît. E fintremai ae polse nol sucêt plui nuie.

Tal secont timp i prins atacs a son chei dai parons di cjase, che cun Farias no rivin a cjatâ il secont gol. L’Udin al reagjìs e dopo di une prime conclusion di Thereau fermade di Alves al rive il gol di Fofana.

Sul un a un i blancs e neris a frachis sul aceleradôr. La partide e cjape sù un bon ritmi, che però al ven patît de bande de difese de scuadre di balon furlane che suntun cross di isla de bande a man drete si fâs cjatâ fûr pues e Sau si cjate di bessôl tes cundizions di bati Karnezis cuntun colp di tac.
Delneri al clame fûr Matos e Zapata e al met dentri Perica e Peñaranda e la scuadre e vuadagne fuarce ofensive, ma Storari al pare dut e intun pâr di ocasions lu judin ancje i pâi de sô puarte.

Lunis ai 5 di Dicembar  l’Udin al zuiarà in cjase cuintri dal Bologna.

Al covente sgarfâ une vore di plui.

‘Friûl SotSore’, su Onde Furlane il taramot dal 1976 e lis ideis gnovis di Friûl

logo_web

Il taramot dal 1976 al torne «in Onde». Doman, sabide ai 26 di Novembar, la programazion de buinore di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont su internet ae direzion www.ondefurlane.eu) e presente la cuarte pontade di Friûl SotSore, la serie speciâl di Dret & Ledrôs, che e partìs dal cuarantesim inovâl dal sisme che al à sdrumât il Friûl par ricuardâ chei moments, par contâ chê storie e chês storiis e par meti adun une riflession in cont di chê esperience, di soference, di solidarietât e di citadinance ative.

Il program al à chê di recuperâ, cence retoriche, la memorie di chê solidarietât che il taramot al à discjadenât dentri e fûr dal Friûl, des mobilitazions, des lotis popolârs e des esperiencis di autoguvier dal bas, e di ce che al è saltât fûr di chê esperience.

In particolâr, dopo vê frontât un mês indaûr propit il teme dal protagonisim de int, dentris des tendopolis e inaltrò, e chel de solidarietât dentri e fûr des comunitâts, Friûl SotSore al pontarà la atenzion su lis ideis e lis iniziativis buridis fûr propit di chês mobilitazions e di chê solidarietât.

microfonrof

Pe ocasion il diretôr de radio libare dai furlansMauro Missana, cu la colaborazion di Guglielmo Pitzalis, al fevelarà cun Adrian Cescje des rivendicazions in cont de tutele de lenghe furlane e des iniziativis inviadis in chei agns pal so ûs e pal so insegnament tes sculis, cun   Sandro Fabbro, che al insegne planificazion teritoriâl li dal ateneu furlan, de nassite de Universitât dal Friûl,  e cun Enos Costantini, ricercjadôr e za insegnant tes scuele agrarie di Cividât, des conessions tra sience e teritori.

In cheste suaze si fevelarà ancje de fondazion de cooperative Informazione Friulana e duncje di Radio Onde Furlane e plui in gjenerâl di informazion, culture e visions alternativis di Friûl, cun Giorgio Cavallo e Elia Mioni, e des bataiis a pro dal ricognosiment e dal ûs de lenghe furlane in ambit liturgjic, cun pre Romano Michelotti, presidente de associazion Glesie Furlane.

Chest apontament cun Friûl SotSore si podarà tornâ a scoltâlu in repliche domenie ai 27 di Novembar a 8 a buinore e miercus ai 30 a 3 dopo di misdì.

Al merete ricuardât che dongje che in modulazion di frecuence e in internet, Radio Onde Furlane si pues scoltâle su smartphone, Iphone, tablet e Ipad, doprant la aplicazion specifiche che si le discjame de rêt daûr des indicazions che si cjatin ae direzion www.ondefurlane.eu.

bandiere_friul

 

Suns Ladinia. And the winner is… Doro Gjat

doro_gjat

Une altre biele serade di musiche, di lenghis, di fieste e di creativitât. Îr l’altri a Moena, tal Teatri Navalge, Suns Ladinia, la manifestazion dedicade ae produzion musicâl tes lenghis minorizadis de Europe alpine e mediteranie, e à mantignût ce che si spieatavisi in cont de cualitât e de varietât des propuestis musicâls presentadis e dal nivel gjenerâl dal spetacul.

In continuitât cun chê che e je la storie de rassegne nassude in Friûl tal 2009 e che di in chê volte si à davuelte a Udin, tai Grisons tal 2011, in Ladinie – simpri a Moena – tal 2013 e in Sardegne, tal 2015, e je stade une serade plene di… Suns. Trê i elements di fonde: cjançons bielis, cjantadis e sunadis ben; teatri plen cuntun public atent e content; conduzion de manifestazion cun snait e cun passion par cure dal atôr e animadôr furlan Michele Polo e de cjantautore fassane Martina Iori.

suns_ladinia_2016

Sul palc dal Navalge il supergrup ocitan TRIP, il performer sart Arrogalla, il cjantautôr ladin Marco Mattia, il rapper cjargnel Doro Gjat, il cjantautôr de Grecìe Salentine Rocco De Santis, la cjantante rumance She, York e i rockers ladins Berdon a son stâts bulos tes lôr esibizions, che a àn marcât lis diviersis carateristichis di ognidune des propuestis musicâls.

I components de jurie (la ladine Lucia Gross, la furlane Mojra Bearzot, il rumanç Jachen Prevost, l’ocitan Stefano Degioanni, il sart Giancarlo Palermo e il grico Pantaleo Rielli) a àn vût il lôr bon ce fâ par sielzi il vincidôr, ma a àn rivât a cjatâsi in cunvigne sul non di Doro Gjat e su la sô cjançon Discolce, «pe capacitât di contâ une storie contemporanie, cuntune paronance grandonone de metriche, cuntun lengaç musicâl atuâl e lizêr e cuntune presince seniche trative».
Cun di plui a àn dât une menzion speciâl a Is di Arrogalla «pal sunôr potent e alternatîf, che al met dongje lis espressions de tradizion intune produzion di avanguardie europeane».

berdon

Intat che la jurie e jere daûr e fâ lis sôs valutazions, il spetacul al è lât dilunc cun doi moments dedicâts ae musiche contemporanie par ladin: la proiezion dal video Zenza de te dal grup Lingue Morte e je stade in chel istès un omaç dedicât ae ativitât di chê band ironiche e pevarine e un ricuart di Valentino Croce ‘Lere’, innomenât personaç dal panorame de musiche contemporanie par ladin, za cjantant di chê formazion e di altris grups fassans; il piçul conciert di Martina Iori e Stefano Merighi al à palesât la vivarosetât de cjançon ladine.

Chê stesse carateristiche e veve cjatât une rapresentazion concrete za vie pe prime part de serade cu lis esibizions di Marco Mattia e dai Berdon.
Propit i cuatri zovins fassans, che a messedin tescj par ladin e rock ruspiôs, a àn cjapât il premi dal public. Par chel ai 3 di Dicembar a saran ancje lôr a Udin, adun cul vincidôr Doro Gjat  e cun chei altris grups e soliscj che a son stâts selezionâts tra i cincuante di lôr che a àn fat indenant la lôr candidature, pe serade finâl dal festival european des arts tes lenghis minorizadis Suns Europe.

suns-europe-ok

Udinese – Napoli 1-2

udin

L’Udin al zuie une buine partide, ma tal secont timp al patìs la fuarce dal Napoli e al paie cjarononis lis sôs imprecisions in difese.

Il prin timp al è ecuilibrât e salacor e je la scuadre di balon furlane chê che e fâs di plui.
Cun Matos, Thereau e Zapata indenant, la formazion di Delneri e mostre di no vê pôre dai innomenâts aversaris e la ande e je sù par jù chê de partide cu la Juve a Turin, chê dal esordi dal alenadôr di Aquilee.

Il Napoli si poie su lis iniziativis di Martens te corsie centrâl e su chês di Hamisk e Diawara, che però a cjatin su la lôr strade Badu e Fofana. Insigne in atac al è fer e nol cumbine alc e ce, ancje parcè che Danilo e Wague a tegnin bot e no i fasin rivâ riforniments. Cussì ni Reina ni Karnezis a àn masse ce fâ e lis ocasions miôr a son chês dal Udin, a tacâ de conclusion di Zapata ator dal minût numar 18.

Tal secont timp – finalmentri, pai tifôs partenopeus; magari cussì no, par chei furlans – Insigne al tache a movisi, la difese blancje e nere e clope in cualchi ocasion e cussì l’atacant napolitan al sbloche il risultât, suntun cross di Callejon che al mande in crisi la tierce linie furlane. Po al cjape une travierse, al tire ancjemò, ma fûr bersai, e al profite ancje di un erorat di Widmer par firmâ la doplete.

Intun cuart di ore scjars l’Udin si cjate sot di doi goi. Mancul mâl che i blancs e neris a superin in curt il moment di disorientament e a cjatin il gol cun Perica, metût dentri di Delneri al puest di Matos: corner di Kums e colp cul cjâf dal cravuat.

La reazion e je buine, ma no je avonde. Il Napoli al mante il contrôl de bale, l’Udin al piert alc in ordin e gjeometriis cu la jessude di Kums, i ospits a provin a incressi il vantaç cun Mertens e El Kaddouri cence jonzi l’obietîf e i parons di cjase no rivin a dreçâ il risultât.
Cussì pal Udin nol è nissun pont gnûf, al è un piçul pas indaûr in graduatorie, ma a son ancje elements positîf in tiermins tecnics, tatics e agonistics.
La prossime partide e sarà in trafierte: a Casteddu/Cagliari domenie ai 27 di Novembar.

 

Suns Ladinia, a Moena lis cjançons e lis lenghis de Europe alpine e mediteranie

suns_ladinia_2016

E je rivade la zornade dai 19 di Novembar. Usgnot a Moena, tal Teatri Navalge, si fasarà Suns Ladinia, la manifestazion dedicade ae produzion musicâl tes lenghis minorizadis de Europe alpine e mediteranie.

Chel che par ladin si clame Festival dla ciantia ti lengac di mendranza al è la edizion di chest an de rassegne nassude in Friûl tal 2009 e che di in chê volte si à davuelt in maniere plui o mancul alternade a Udin e inaltrò: tai Grisons tal 2011, in Ladinie – simpri a Moena – tal 2013 e in Sardegne, tal 2015.

sheyork

A tacâ dal an passât, cun Suns Sardigna, cheste manifestazion, che e cuvierç il Stât talian, la Slovenie, la Austrie, la Svuizare e la part sud ocidentâl dal Stât francês (la Corsiche, la zone francoprovençâl e part di chê ocitane), e je la preselezion ‘live’ – par grups e soliscj di cheste part dal continent european – de sezion dedicade ae musiche di Suns Europe, il festival european des arts tes lenghis minorizadis, che si davuelzarà te capitâl dal Friûl dal 1n ai 3 di Dicembar.

doro_gjat

Par chel la serade di Moena, che e je za interessante par so cont, e domande ancjemò plui curiositât e plui atenzion. I siei protagoniscj a saran il rapper cjargnel Doro Gjat, il performer sart Arrogalla, il cjantautôr de Grecìe Salentine Rocco De Santis, la cjantante rumance She, York, i rockers ladins Berdon, il lôr paisan Marco Mattia e i ocitans TRIP.

rocco-de-santis-1

Suns Ladinia e je une manifestazion inmaneade cul coordenament de associazion La Grenz e cu la poie des istituzions di chenti. La sô direzion artistiche e je par cure di Enrico Tommasini, musicist implicât di tancj agns in diviers progjets e par chel une vore cognossût ancje fûr de Ladinie e dal Trentin. La conduzion de serade e sarà par cure dal atôr e animadôr furlan Michele Polo e de cjantautore fassane Martina Iori.

L’event al tache a 9 di gnot.

 

 

Suns di ogni sorte e alc altri ancjemò te gnove pontade di Babêl Europe

suns_ladinia_2016

A mancjin pôcs dîs ai 19 di Novembar, cuant che a Moena, te ladine Val di Fasse/Val de Fascia, li dal Teatri Navalge si fasarà Suns Ladinia – Festival dla ciantia ti lengac di mendranza, la manifestazion dedicade ae produzion musicâl tes lenghis minoritariis de Europe alpine e mediteranie.
Cun di plui chi di mancul di trê setemanis  al sarà il prin di Dicembar cuant che a cuatri e mieze dopo di misdì si screarà in maniere uficiâl la seconde edizion di Suns Europe, il Festival european des arts  tes lenghis minoritariis che si fasarà a Udin li dal Teatri gnûf Giovanni da Udine.

familia-caamagno_foto-2

La gnove pontade di Babêl Europe, l’apontament cuindisinâl che al puarte lis scoltadoris e i scoltadôrs di Radio Onde Furlane a torzeon tra grups, soliscj, lenghis, musichis, minorancis e nazions cence stât, vuê in direte a 11 a buinore e doman in repliche a une dopo di misdì, no podarà fâ di mancul di cjalâ in direzion di chês dôs manifestazions.

suns-europe-ok

Par chel, e sarà une trasmission dedicade a Suns…  di ogni sorte. Di une bande, cu lis ultimis gnovis in cont de manifestazion che si davuelzarà cheste sabide, ancje parcè che e je une sorte di tape di svicinament ae manifestazion che e rindarà il Friûl il cûr de diversitât linguistiche e culturâl dal continent, cu lis sôs sezions dedicadis ae musiche, ae produzion audiovisive e ae leterature. Di chê altre propit cul inviament dal cont par ledrôs in direzion di Suns Europe e cu la scolte des cjançons di cualchidun dai protagoniscj de sezion musicâl di chê manifestazion.

1-moussu-t-e-lei-jovents-c-christine-cornillet-2016

Te scjalute dal program al sarà ancje alc altri, sgarfant ator tra jessudis discografichis babelichis saltadis fûr tai ultins mês, a tacâ di Navega!, il disc plui resint di Moussu T e Lei Jovents e di Lis conseguenzis dal deliri, il secont cd di Rive No Tocje.

Babêl Europe si pues scoltâle su lis frecuencis di Radio Onde Furlane  (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) e, dopo des dôs emissions di vuê e di doman, ancjemò in rêt.

logo_web

Corot pe muart di Renzo Balzan

renzo_balzan

Une brute gnove pe culture furlane. Magari cussì no, al è muart Renzo Balzan, une des figuris plui impegnadis e plui coerentis inte ativitât di promozion de identitât e des lenghis dal Friûl.

Dal 2004 al jere il dean de Union Scritôrs Furlans che al veve contribuît a fondâ ancjemò intal 1982 adun cun oms tant che Agnul Pitane, Antoni Beline, Celso Macôr e Riedo Pup.

Al curave zaromai di agns ‘Gnovis Pagjinis Furlanis’, la storiche riviste de Union, in plui di jessi fondadôr e diretôr dal mensîl Ladins dal Friûl. Al veve colaborât ancje cun cetantis rivistis furlanis e no dome, cun TeleAltoBût e cun Radio Onde Furlane.

Al à scrit cetancj libris che a van de poesie ae prose narative, de cronache politiche e culturâl aes tradizions popolârs. Tra i siei titui plui innomenâts al è ‘Liende di Agane e atris contis’.

Cu lis sôs oparis al veve vinçût, ancjemò tal 1983, il premi S. Simon e, intal 1987, la sezion pes contis dal Premi Friûl.
La sô ativitât di scritôr e di promotôr de culture furlane lu àn puartât ancje a cjapâ intal 1993 il premi ‘Nadâl furlan’.

Renzo Balzan al jere nassût intal 1943 a Felet, ma dal 1966 al viveve in Cjargne là che al jere un dai animadôrs de associazion Cjargne Culture e de Universitât de tierce etât de Cjargne, in plui di curâ la publicazion dai ‘Cuaders di Culture Cjargnele’.

Al jere ancje stât un dai plui atîfs intal mantignî vîfs i contats culturâi cu la comunitât ladine des Dolomitis.

Il taur, la acuile e la crôs: Turin, Ocitanie e Friûl

udinesemag_cover001

Sul numar 6 de riviste Udinese Magazine, dât fûr li dal Stadi Friûl ai 31 di Otubar pe partide tra Udin e Turin, al è jessût chest articul che al fevele dal Toro, di Turin, dal Friûl e de Ocitanie.

Cui che nol jere a Udin, li dal Stadi Friûl, e che par chel – e magari no dome par chel – nol à rivât a cjatâlu e a leilu, cumò al pues lei chel articul culì…

curvamaratona

Storie, liende, atualitât. Inte suaze dal zûc dal balon tal Stât talian il ‘Toro’ al à un puest particolâr. La sô innomine e va une vore plui innà de citât di Turin, dal Stât talian e dai stes risultâts tes competizions agonistichis. E je une innomine che in chel istès e je memorie, fantasie, mît, sium e salacor ancje consolazion, massime cuant che lis robis, tal cjamp o inaltrò, no van nuie ben.
Il ‘Toro’ al è stât e al è ancjemò un simbul di lote e di sperance. Pal spirt romantic e «barricadero» dal club turinês, Giovanni Arpino al veve inventât une espression di pueste: al veve cjapât ispirazion di un tiermin spagnûl e lu veve clamât «tremendismo granata».

La «Grande squadra del Torino»
Propit chel «tremendismo granata» al è l’element di fonde de identitât dal ‘Toro’ e de sô int.
Te storie taliane il Turin al è deventât un simbul, in particolâr vie pai agns Cuarante dal secul passât. Cul so zûc, cui siei talents e cui siei risultâts, il ‘Grande Torino’ al à rapresentât la volontât e la fuarce morâl di saltâ fûr dai rudinaçs e de devastazion de Seconde Vuere Mondiâl.
Chê stesse scuadre e veve cjapât sù un significât evocatîf, che al lave plui innà dal sport, za intant di chel conflit. Cemût che al salte fûr dal film ‘I nostri anni’ di Daniele Gaglianone, juste in chei agns il riferiment ae «Grande squadra del Torino» al jere deventât une sorte di peraule di ordin par ricognossisi tra antifassiscj e partigjans. Lote, sperance e Resistence.

gigi-meroni-2

Il ‘Grande Torino’ al jere la scuadre dal popul e cul popul. La scuadre di Mazzola, di Gabetto, di Bacigalupo e di ducj chei altris zuiadôrs, ma ancje la scuadre di Oreste Bolmida, il «trombettiere del Filadelfia», che al sunave la trombe par dâur fuarce ai granatas, e di ducj i siei tifôs.

Cussì in chê sere dai 4 di Mai dal 1949, a Superga, no murivin dome chei zuiadôrs e ducj chei altris passezîrs dal trimotôr Fiat G 212, ma al murive ancje alc tal cûr e te anime di dute la int.

E jere une muart che però e deventave risurezion: mît e memorie.
No sarà la uniche. Al baste pensâ ae figure di Gigi Meroni, il cjavelon cui cjalçons inrodolâts, cul so stîl di zûc e di vite e cu la sô muart, ai 15 di Otubar dal 1967, tirât sot di dôs machinis.
Une di chês e jere vuidade di un zovin che passe trente agns plui tart al deventarà il president dal ‘Toro’, Attilio Romero. Une altre disgrazie, un altri mît e un altri segn dal destin, stant che ancje il Turin tant che societât al sarà protagonist di une muart e di une risurezion: il faliment dal 2005 e la rifondazion.

Turin e Friûl
Ogni partide cul Turin e devente une ocasion par confrontâsi cul so mît e cu la sô storie, che e devente almancul in part ancje la nestre. Di cui che i plâs il zûc dal balon. Di cui che i plâs il Friûl. Di cui che si vise che ancje te nestre storie al jere – e al è ancjemò, cundut che al ven masse dispès platât – un «tremendismo» furlan. Di cui che si vise dai diviers zuiadôrs furlans che a àn zuiât tal ‘Toro’: dal clautan Ruggero Grava, ancje lui colât a Superga, al plui cognossût Enzo Bearzot, dal gurizan Giorgio Puia al campion di Italie Vittorio Caporale, di Claudio Sclosa a Massimo Donati. E di cui che si ricuarde che a Turin a son tancj di lôr che a son di divignince furlane: a saressin sù par jù uns vincjmil di lôr.

enzobearzot_toro

Al è ancje un altri aspiet dal ‘Toro’ che al pues tocjânus tant che furlans. A son chês bandieris rossis, cuntune crôs zale cun dodis pomui (trê par ogni braç), che si viodin simpri plui dispès framieç di chês granatas, tal stadi di Turin e ancje inaltrò. A son lis bandieris de Ocitanie, simbul di une identitât cence confins e di une lenghe cuntune nobiltât leterarie antighe che e à patît une minorizazion forsit ancjemò plui penze di chê dal furlan.

lou_dalfin1_granatissimo

L’ocitan al è la lenghe storiche di dutis lis tieris ‘d’Oc’ dai Pireneus aes Alps. A’nt fasin part ancje dodis valadis des provinciis di Cuneo e di Turin, là che la lenghe e esist, e resist e si torne a inventâ cul cine, in graciis di autôrs tant che Fredo Valla, Diego Anghilante e Andrea Fantino, e cu la musiche di tancj di lôr, a tacâ dai Lou Seriol e dai Lou Dalfin, esemplis di «tremendismo» granata e ocitan.

Marco Stolfo

bandieredoc

Genoa – Udinese 1-1

fuarceudinees

Cul sgarfâ tant che dindiats i risultâts a rivin. Ancje a Gjenue l’Udin al fâs une partide discrete e al puarte a cjase un risultât positîf.

Bon il prin timp, plui sufierte la seconde part, ma in dut câs un altri passut indenant, te mentalitât, te classifiche e tal zûc, a tacâ de difese, là che e je stade plui atenzion che cuintri dal Turin. E magari, se Zapata al ves butât dentri chel balon a puarte vueide ae fin de prime frazion di zûc, la gare cuintri di un Genoa fuarton e varès podût cjapâ une plee ancjemò miôr, ancje se insom l’un a un al è un risultât just, che al pues lâ ben a dutis dôs lis scuadris.

L’Udin al partìs ben e al mostre di volê tignî bot denant de determinazion e dal ritmi dai parions di cjase. Al rive in chestis cundizions il gol dal un a zero per scuadre di balon furlane: scat su la fasse di Widmer, cross bas pinelât par Thereau e conclusion a bersai dal atacant blanc e neri.
Il Genoa al rispuint, sburtât dal dinamisim di Edenilson, Ocampos, Rigoni e Rincon e ancjemò prime de mieze ore di zûc i ros e blu a segnin: cross di Edenilson e conclusion cul cjâf di Ocampos.

Delneri al cambie scheme e al met De Paul a çampe. La partide e va indenant in maniere plasevule e divertente e prime de polse l’Udin si svicine une altre volte al vantaç, prime cuntun tîr di Thereau parât indaûr di Perini e po cul ‘tap in’ di Zapata, che si fâs cjapâ des striis e cu la puarte vueide le spare cul plat parsore de travierse.

Tal secont timp il Genoa al incres la sô pression, ma l’Udin al mostre di jessi in stât di difindisi cun sintiment e di rispuindi cence masse padins. Laxalt nol siere ben un altri biel cross di Edenilson e par Delneri al sune il campanel di alarme: cussì al cambie De Paul cun Adnan e po Thereau cun Perica, al jemple la linie mediane e i da al atacant cravuat la libertât di dâi fastidis ae difese dal Genoa cu la poie di Matos, jentrât al puest di Zapata.

Al passe il timp e lis conclusions fatis di une bande e di chê altre no cambiin il risultât. No rivin a fâlu nancje i doi tîrs, tal ultin, di Pavoletti e Rincon, parcè che Karnezis al è simpri tal puest just, tal moment just par fâ la robe juste. E cussì e finìs un a un.