Il Friûl al piert Franco Marchetta

marchetta

 

Il Friûl al piert un dai siei scritôrs miôr.
O jerin daûr a preparâ un articul di presentazion de edizion di chest an dal Premio Ostana. Scritture in lingua madre, sei cun chê di segnalâ che di doman a lunis a Ostana, te Val dal Po, si davuelzarà la premiazion e si fasaran une schirie di altris iniziativis in non de diversitâ linguistiche e culturâl, sei soredut par marcâ che un dai premis al è destinât a Franco Marchetta, un dai scritôrs furlans plui ispirâts e inovatîfs.
Intant di chel, o vin savût che Marchetta al è muart.

A chest pont il Premi Ostana lu ritirarà cualchidun altri par lui, in memorie dal lavôr fat cu la lenghe furlane, a pro de lenghe furlane e a pro del culture dal Friûl (e no dome).

Par rindisi cont di cui che al jere Marchetta, di ce che al à fat e di cetant impuartante che e je la sô ereditât, us segnalìn cualchi articul e cualchi coment:

http://www.ilquotidianofvg.it/e-morto-franco-marchetta/

http://cisilino-udine.blogautore.repubblica.it/2014/05/29/mandi-franco-marchetta-free-climber-della-letteratura-friulana/

http://messaggeroveneto.gelocal.it/udine/cronaca/2014/05/28/news/addio-a-franco-marchetta-intellettuale-del-medio-friuli-1.9313098

http://contecurtegnove.blogspot.it/2014/05/mandi-franco.html

http://fur.wikipedia.org/wiki/Franco_Marchetta

O vevin cognossût personalmentri Franco Marchetta sù par jù un an indaûr.
O cognossevin la sô scriture za di prin.
O pandìn il nestre corot ae sô famee.

 

Advertisements

Cungjò, president

adrianodegano

Domenie stade al è muart Adriano Degano, par sigûr une des personalitâts plui impuartantis de emigrazion furlane e soredut dal associazionisim de emigrazion, almancul dai agns Sessante incà.

Nassût a Paulêt tal 1920, par tancj agns al veve lavorât al Inps, prime a Udin e po, a tacâ dal 1961, a Rome.
Propit te capitâl dal stât talian al à esprimût ad in plen la sô grande personalitât tal mont dal associazionisim de emigrazion, che di chel al è stât un protagonist, in tiermins operatîfs e istituzionâi, fintremai ae sô muart.

Dispès si fevele dai furlans pal mont clamantju ambassadôrs dal Friûl. Par sigûr cheste definizion e jere juste par lui, pe sô grande capacitât di vê e di tignî relazions, ancje ai nivei istituzionâi plui alts.
In chest sens, Adriano Degano, par tancj agns president dal Fogolâr Furlan di Rome, al è stât un ambassadôr dal Friûl, di chel ‘in Friûl’ e di chel che al è ‘pal Mont’.
In particolâr al è stât l’ambassadôr dal Friûl di ca e di là dal Tevere.

O vin vût ocasion di cognossilu e di preseâ il so caratar, la sô culture e il so amôr pal Friûl.
Par chest, cun stime e cun rispiet pe sô persone, in chest moment ancje nô de associazion Lidrîs e Butui si sintìn dongje de sô famee, dai siei amîs e dal Fogolâr Furlan di Rome.

Udinese – Sampdoria 3-3

totoorei

Sîs goi par une partide di fin stagjon, tipiche, rilassade e plasevule, che e je soredut une fieste par Sant Totò Di Natale. Udin e Sampdoria a sierin il campionât cuntun pont par om, a fasin viodi robis bielis e erôrs di sgrisulâsi, si gjoldin la salvece concuistade za timp indaûr e a lassin sul cjamp cualchi pont di domande su ce che al è stât vie pal an e ce che al sarà pal avignî. Pal Udin in particolâr a restin viertis lis cuistions che a tocjin ce rûl che al varà Guidolin te scuadre blancje e nere e soredut se a’nt varà un e cuâi che a son i zuiadôrs che a restin, chei che a van vie e chei che a rivaran. Pe scuadre furlane al è soredut di domandâsi cemût che si à di fâ par no tornâ a zuiâ un altri campionât cussì grîs e cence grandis sodisfazions e di fâ in maniere che nol sucedi un altri viaç.

La partide si vierç cul prin gol di Okaka dopo dîs minûts, che a chel al rispuint ae sô maniere Di Natale. Totò al segne l’un a un cuntune punizion di soremestri che e lasse Fiorillo fer su la linie de puarte a cjalâ il balon jentrâ tal sac là che no si rive a cjapâlu. Gol numar 191 in serie A e fieste in  bancjine cun Guidolin che al fâs il ‘sciuscià’. La lustrade di scarpis dal tecnic e puarte bene e Di Natale al puarte in vantaç l’Udin cuntune deviazion a puarte viert su cross di Pereyra. Prime dal interval il cjapitani al cjape ancje un pâl e al tire fûr di pôc une altre punizion.

Il secont timp si vierç cui ospits che a sburtin un tic di plui e a rivin a segnâ il doi a doi cun Eder e a passâ in vantaç cun Soriano. In ducj doi i câs a son determinants i balons confenzionâts di Okaka e une cierte fragjilitât de difese blancje e nere. Però al è ancjemò timp par comedâ la situazion: i pense Di Natale, judât cence volê di un passaç indaûr fat di  Wszolek, che al viôt chê bale golose e le met in puarte.

udin_neri

Vie pe setemane si savarà za alc in cont dal avignî di Guidolin e plui in gjenerâl dal Udin. Al somee sigûr che Di Natale al resti e cheste e je une biele notizie se al zuie compagn che tes ultimis partidis e soredut se l’Udin dal 2014/2015 al vignarà fat sù cun lui e no intor di lui, cemût che al è stât chest an. Il so contribût di tecniche, di caratar e di esperience al è impuartanton e al va valorizât inte maniere miôr.

Chê che si siere e je stade une stagjon là che in tantis ocasion a son mancjadis gjambis, cûr e cerviel, là che zuiadôrs a àn deludût il public, rindint mancul di ce che si spietavisi di lôr, soredut in difese – Naldo e Danilo – e in atac, cemût che si à viodût tal câs di Muriel, che a part cualchi partide di Cope Italie nol à rivât a esprimi cualitât e continuitât.
Chê che si siere e je stade une stagjon che tai moments bogns e à fat saltâ fûr il talent zovin di Scuffet, Widmer e Bruno Fernandes, cu lis confermis, dentri dal campionât e in Cope Italie, di Pereyra e Heurtaux.
Chê che si siere e je stade une stagjon là che par sigûr nol à funzionât alc te preparazion e la jessude svelte de Europa League e je stade la prime dimostrazion di chest. Pal 2014/2015, là che no saran altris impegns fûr dal  campionât e de Cope Italie e duncje no saran scusis di premuris e stress, si varà di tignî cont ancje di chest aspiet.

Pal 2014/2015 i tifôs a spietin un Udin mancul grîs: plui atent, plui concret, plui costant.
Pal 2014/2015 al è just domandâ ancje un Udin plui furlan. Cu la lenghe furlane che si le dopri pardabon te comunicazion istituzionâl de societât e che e sedi doprade te cartelonistiche dal stadi gnûf. E je une maniere par jessi in Europe ancje chê, cemût che a mostrin i esemplis dal Barça e dal Athletic  Bilbao. E je une maniere par jessi plui ricognossibii, plui internazionâi e plui furlans.
Se cumò ancje il lat al devente Blanc, no si pues plui spietâ che si palesi almancul un pôc plui furlan ancje il nestri blanc e neri.

fuarceudinees

Turin, Friûl, Europe

europe

Sul sît dal Centro studi sul federalismo di Moncalieri al è saltât fûr un gnûf articul che al tocje une cuistion di fonde de Europe dal dì di vuê: il fat che e mancji une vere politiche europeane di relazions cul rest dal mont. Il coment, di Sergio Pistone, si pues leilu e discjamâlu achì.

In cont de Europe, dal antieuropeisim e di un ciert europeisim che dispès nol zove ae cause de promozion de unitât europeane o segnalìn ancje chest articul par furlan che al tocje ancje il rapuart tra Europe e Friûl.

Cheste relazion e je un dai argoments che a vignaran frontâts intune trasmission speciâl, dedicade ae Europe e aes lezions europeanis, che e larà in direte doman, ai 17 di Mai, su lis frecuencis di Radio Onde Furlane e duncje ancje in rêt.

O zontìn il comunicât di presentazion:

ondef

‘Dret e Ledrôs’ dai 17 di Mai, a Onde Furlane di fevele di Europe
Ospits de trasmission Renato Damiani, Giorgio Cavallo, Felice Besostri e Marco Di Blas

Lis elezions europeanis si svicinin ma di Europe si fevele avonde pôc. Nol è cussì su Radio Onde Furlane, sei par ce che al tocje la sô programazion in gjenerâl sei pes trasmissions di aprofondiment.

La riflession in cont des elezions europeanis dai 25 di Mai e plui in gjenerâl de situazion de Europe, inviade passe un mês indaûr cuntune trasmission che e je lade in onde sabide ai 12 di Avrîl e che si pues scoltâle ancjemò su internet ae direzion http://www.ondefurlane.eu , e va indenant sabide ai 17 di Mai, vie pe buinore, dentri di ‘Dret e Ledrôs’ cuntun altri speciâl.

Di 9 e mieze a undis a matine, su lis frecuencis di Onde Furlane (90 Mhz pe plui part dal Friûl, 90.200 e 106.500 Mhz in Cjargne e 96.600 Mhz a Colonia Caroya, in Argjentine, in rêt par dut il mont in streaming), si fevelarà di euro e di Bancje centrâl europeane, ma ancje di Friûl e Europe, di rapresentance, di leçs eletorâls e de clime preeletorâl in Austrie, dopo che al jere za stât fat un scandai compagn in cont de situazion in Slovenie e Cravuazie.

Adun cul diretôr de “radio libare dai furlans”, Mauro Missana, e cun Marco Stolfo, titolâr dal modul Jean Monnet ‘Multilingualism, Multicultural Citizenship and European Integration’ te Universitât dal Friûl, a saran Renato Damiani, vicepresident de Cjase pe Europe di Glemone che di resint al à dât fûr il libri ‘Impariamo l’Europa’, e Giorgio Cavallo, za conseîr regjonâl e aministradôr tal Comun di Udin e opinionist di Onde Furlane.

A son previodûts ancje i intervents dal gjornalist Marco Di Blas, che al contarà de situazion de Austrie e in particolâr de Carinzie, e dal avocat Felice Besostri, za senadôr e reladôr de Leç 482 dal 1999, che al fevelarà dai ricors fats indenant cuintri de leç eletorâl taliane pes elezions europeanis, in cont dal sbarament dal 4% e de mancjade garanzie di rapresentance des minorancis linguistichis.

La trasmission e larà in repliche domenie ai 18 di Mai a 8 di buinore e si podarà scoltâle ancjemò su internet, simpri ae direzion www.ondefurlane.eu.

Festintenda e Artetica. Un vinars di R/Esistence (no dome in Dub)

resistence_in_dub

Dal 1984, a mieze strade tra il Friûl di Mieç e la Basse Furlane, la Vierte si jemple di musiche dal vîf e di altris iniziativis culturâls. Il merit al è dal  circul culturâl ‘Il Cantîr’ di Mortean, che di in chê volte al inmanee in cheste stagjon la rassegne Festintenda cu la colaborazion di  Radio Onde Furlane.

La edizion numar 31 di Festintenda si scree usgnot cul dopli conciert dai furlans R/Esistence in Dub, che a àn tornât a dâsi dongje che nol è tant cuntun gnûf disc produsût cu la colaborazion di mad professor, e i trentins Rebel Rootz, che si vevin fat preseâ l’an passât dentri dal Rototom Reggae Contest. Doman a saran Luna e Un Quarto e Radio Zastava, dôs des formazions miôr dal Friûl, che a misclicin sunôrs e lenghis tra blues, rock, folk e cjançon di autôr, i prins, e balkan sound e swing salvadi, i seconts.

festintenda5_definitivo

La setemane che e ven, la musiche e continue cul rock ruspiôs dai cjargnei Mig 29 Over Disneyland e dai Polar for the Masses, vinars ai 23. Sabide ai 24 sperimentazion, eletroniche e confront tra Friûle  Turin cui Arbeiter e cun Boosta, innomenât dj e tastierist dai Subsonica. Dai 30 di Mai al prin di Jugn trê seradis reggae e dub, cemût che si pues lei ancje achì http://www.festintenda.it/2012/?page_id=178.

I concierts, che si fasin sot dal tendon che si cjate tal ex cjamp di esercitazions militâr di Cjasielis, a tachin uficialmentri a 9 di gnot, ma par solit a scomencin une vore plui tart. Par cui che si cjate di chês bandis, prime de serade di Festintenda al è un altri apontament di no pierdi. A tacâ di 9 mancul un cuart a Blancjade di Palaçûl, li de Cjase dal Marinaretto, l’Anpi di Palaçûl-Muçane-Pucinie-Prissinins e la associazion Artetica a screin il program di ‘Resistenze’, une altre manifestazion che si davuelç za di cualchi an vie pe Vierte. Il prin apontament al è l’incuintri dal titul  R/Esistendo. Parole e musica per un senso di R/Esistenza.

aidatalliente

L’incuintri al ten dongje memorie storiche, cussience civiche, leterature e musiche, tra lis altris cun leturis di tescj di Stéphane Hessel John Berger, Vittorio Arrigoni, Aung San Suu Kyi, Nelson Mandela e Federico Tavan, par cure di Pino Roveredo, Stefano Montello e Gabriella Cecotti.
A son previodûts ancje l’intervent dal partigjan Bruno Franco ‘Rosso’ e une selezion di cjants popolârs e de Resistence, par cure di  Aida Talliente e Roberto Fabrizio.

L’event al à il patrocini dal Comune di Palaçûl e al è metût dongje cu la colaborazion dal Centri Culturâl Art-Port, de Auser, dal Spi-Cgil e di Radio Onde Furlane.

Furlans al Salon dal Libri. Mattiuzza al vinç InediTO 2014

maurizio-mattiuzza

Vuê e finìs la edizion 2014 dal Salon internazionâl dal Libri di Turin. Ancje chest an li dal Lingotto, cun dut che no je stade nissune iniziative fate diretamentri di Lidrîs e Butui (al è sucedût l’an passât, ma la nestre associazion e finive dîs agns di ativitât e soredut e veve une publicazion di presentâ), si à rivât a cjatâ un pôc di Friûl. Al è ce che al sucedût, par esempli, sabide ai 10 di Mai, cuant che e je stade fate la premiazion dal concors leterari InediTo – premio Colline di Torino.

Il prin premi te sezion pe poesie al è stât dât a un dai autôrs furlan plui interessants, Maurizio Mattiuzza, za esponent dal grup poetic dai Trastolons e di cuasit vincj agns incà autôr di viers e di tescj biei di lei e plens di significât, par furlan, par talian o tal dialet de Valsugana.
In chest câs Mattiuzza al à vinçût cuntune selezion di dîs composizions ineditis par talian, che a varessin di jessi il cûr di une racuelte di une trentine di poesiis, cul titul coletîf di “La donna del chiosco sul Po”. Chestis lirichis a son stadis une vore preseadis de bande de Jurie dal concors, che il so president al è il poete Davide Randoni, e in graciis dal premi a varessin di vignî publicadis dentri dal an.

I viers di Mattiuzza a contin cun fuarce e cun origjinalitât une societât e soredut une gjenerazion cence ponts di riferiment, “perdida en el siglo”, cemût che al cjantave Manu Chao, involuçade intune amnesie totâl e assolude, tra siums sfantâts, fabrichis sieradis, diasporis, migrazions e storiis individuâls che a deventin paradigmatichis cence pierdi specificitât e personalitât.
Une conferme de sô poesie narative e evocative, sute, minimaliste e in chel stes visionarie, che si pues leile e preseâle za tes ricueltis “La cjase sul ôr”, “L’inutile necessitâ(t)” e “Gli alberi di argan” o ben scoltâle tal cd cun Lino Straulino “Tiere nere”.

Il sucès di Mattiuzza nol è il prin di un furlan tal premio InediTo. Cuatri agns fa lu veve vinçût ancje Antonella Sbuelz Carignani.

Verona – Udinese 2-2

fuarceudinees

Une partide discrete cuntun Udin che al mostre caratar e ancje cualchi idee di zûc e cussì al torne a cjase almancul cuntun pont te sachete. Il risultât finâl al è just, stant che in moments diferents de gare dutis dôs lis scuadris a someavin in stât di puartâ a cjase I trê ponts e cussì. La trasfierte a Verone e presente une scuadre furlane cun cualchi novitât interessante, a tacâ de cubie di atac Di Natale-Nico Lopez, che però e funzione dome a metât.

L’incuintri al partìs avonde ben pai blancs e neris, cuntun asset tatic a trazion anteriôr e cuntune ande positive e propositive, cemût che al salte fûr di une biele triangolazion tra Totò e Nico. Cul passâ dai minûts e cres la pression dai parons di cjase, che a rivin a vudagnâ un rigôr, segnât cun mistîr de bande di Toni. La reazion dal Udin e je scjarsute e la scuadre di Guidolin e somee patî l’efiet di une sorte di blackout, compagn che in tantis altris ocasions. I parons di cjase si puartin indenant cun costance e cun snait e Toni si svicine al doi a zero.

Tal secont timp l’Udin al torne a masanâ zûc e a cjapâ la iniziative, ma pal moment nol rive a svicinâsi ae puarte di Rafael. I veronês, al contrari, a scugnin restâ plui sierâts ma cuant che a sburtin a rivin a vuadagnâ metris di cjamp e fintremai a segnâ il doi a zero, cun Hallfredsson che al disfrute inte maniere miôr un cross e une disatenzion di Scuffet.

A passin pôcs minûts e Di Natale al ridûs lis distancis cuntune biele zirade che e lasse Rafael sbacalît. I parons di cjase a son plui decîs in atac, ma l’Udin nol mole: al ten bot, si salve – ancje su la linie de puarte, su lis conclusions di Toni e Cacciatore – e al rispuint. Cussì, a fuarce di dâi al rive il gol di Badu.

Zornade de Europe 2014

unida_en_la_diversidad

Chê di vuê e je une zornade impuartante: e je la Zornade de Europe, clamade ancje ‘Zornade europeane’ o ‘Fieste de Europe’.
Ai 9 di Mai al cole l’inovâl de innomenade ‘Declarazion Schuman’, dade fûr a Paris tal 1950, che e je calcolade tant che il prin pas in cualchi maniere formâl dal procès di integrazion europeane, e cheste date e je deventade une ocasion par fâ fieste pe Europe e par pensâi parsore, cjalant al avignî.

Chi di pocjis setemanis a saran ancje lis elezions europeanis e un moment di riflession e aprofondiment su la situazion de Europe e des istituzions de Union europeane al devente ancjemò plui necessari.

Par chest us segnalìn doi articui, che si cjatin tal sît dal Centro studi sul federalismo di Moncalieri:
L’Europa necessaria di Umberto Morelli
Le ragioni dell’euro di Roberto Palea e Flavio Brugnoli

Us segnalìn ancje il progjet HOPEurope di Gjenue e trê articui par furlan su chescj argoments, che si pues leiju achì , achì  e achì.

Cence dismenteâ un articul che si cjate tal nestri blog e une trasmission speciâl di Radio Onde Furlane  che si pues tornâ a scoltâle ancje in rêt.

bandeu

Ai 6 di Mai dal 1976…

taramot_friul_1976_mularie

Vuê al è l’inovâl dal Orcolat, la prime scjassade di taramot che e sdrumà il Friûl.
Ogni an cheste date e je ocasion di riflessions, di ricuarts e avonde dispès ancje di peraulis a slas.

Si limitìn a dôs segnalazions: il museu TiereMotus, metût adun a Vençon tal Palaç Orgnani Martina, e il libri di Igor Londero,  Pa sopravivence, no pa l’anarchie. Forme di autogestione nel Friuli terremotato: l’esperienza della tendopoli di Godo (Gemona del Friuli).

A son segnalazions che a valin par vuê, par vie che si lein cun chê dì dal 1976 e cun chês dai 11 e dai 15 di Setembar di chel stes an, ma che a son simpri buinis par une visite o par une leture.

Udinese – Livorno 5-3

fuarceudinees

Vot goi, erôrs e spetacul. L’incuintri tra Udin e Livorno al è un biel omaç ae memorie di Piermario Morosini, al mostre i limits de scuadre amaranto e al presente une scuadre furlane plui dinamiche e plui vivarose di cemût che si le à viodude tai ultins timps (magari cussì no, al bastave pôc…), là che al torne a jessi protagonist Di Natale, autôr di doi goi e implicât ancje in altris dôs segnaduris.

La partide e tache plancuç. Dutis dôs lis scuadris a scugnin cirî di vinci: l’Udin par salvâ la muse e il Livorno par vê ancjemò cualchi sperance di salvâsi. I ospits a son i prins a puartâsi indenant in dôs ocasions e Scuffet al interven cun puntualitât. Dome dopo nûf minûts di zûc e rive ancje la prime conclusion dal Udin: acrobazie di Di Natale e bale fûr di pôc.

La sagre dal gol si vierç cuntun punizion di Paulinho: Livorno un, Udin zero e cualchi sgrisul pai tifôs furlans, che a pandin la lôr preocupazion. I blancs e neris no si pierdin pai trois e a provin daurman a tornâ a dreçâ la situazion: prime Coda al bute jù Domizzi, Rocchi al sivile ma Di Natale nol realize il rigôr, dopo al è il cjapitani a segnâ il gol dal un a un e cualchi minût plui indenant Totò i da une bale di aur a Badu che al ribalte il risultât. Ma no je finide achì: Paulinho al segne ancje une altre punizion, cul jutori di une deviazion, e al rive il doi a doi; Di Natale al servìs Badu che le met tal mieç par Pereyra che al segne cence fastidis il gnûf vantaç; il Livorno al va in crisi, Gabriel Silva al firme il poker e Di Natale al met dentri la bale dal cinc a doi, su assist di Pinzi.

Il prin timp si siere cul Udin in trionf. Il cinc a doi si manten a dilunc: il Livorno nol rive a sburtâ, l’Udin al manten il control de partide, dut il stadi al jeve in pîts cuant che Di Natale al lasse il puest a Nico Lopez e prime de ultime sivilade di Rocchi al rive ancje il tierç gol amaranto, cun Mesbah che al profite di une disatenzion di Gabriel Silva.

Stin contents, stin calmuts.