Furlan a scuele: buine gnot Friûl!!!! (?)

lengate1

Se l’esam di tierce medie par sart di Riccardo Laconi in Sardegne, cun dut de sô ecezionalitât che par so cont e distude la plui part dal entusiasim e de passion,  al fâ vignî voie di dî ancjemò Good morning Sardinia!, e je dute une altre la ispirazion che e diven de clime in cont dal furlan a scuele.

Cun di fat, a cjatin une gnove conferme lis preocupazions che o vevin let e sintût ator za timp indaûr sei par ce che al tocje i contignûts contraditoris dal cussì clamât Plan regjonâl pal insegnament de lenghe furlane che plui in gjenerâl pe situazion de lenghe furlane a scuele, tra disinformazion, mancjance di aplicazion des leçs e iniziativis discriminatoriis, cemût che al denunciave il Comitât/Odbor/Komitaat/Comitato 482.

Dut chest al salte fûr a clâr intun articul che si cjate sul numar di vuê dal setemanâl Novi Matajur.

Une gnove de Sardegne. Ancjemò: good morning Sardinia (????)

einstein

Une biele gnove che e rive de Sardegne. E je une storie che e conte di afermazion positive di identitât e dirits di fonde, di insegnants che a àn sintiment e di une scuele che e je in stât di fâ pardabon il so mistîr di scuele, ancje se dome in maniere ecezionâl.

Magari cussì no, cjalantsi ator, e somee la classiche biele ecezion che e conferme une regule negative: une normalitât normalmentri anomale, là che i dirits a son une concession e une ecezion e nol somee jessi sperance e avignî, tra prejudizis, lûcs comuns e ignorance che a cressin.

In cualsisedi maniere e je une bugade di aiar bon e di otimisim pal avignî, propit intun moment là che, par esempli in cont di Friûl e furlan a scuele, dopo dal ultin an scolastic, l’aiar che al tire al è simpri piês.

Al è ancje par chest che o vin tornât a meti sù chel stes titul za doprât intune altre ocasion, simpri in cont di Sardegne e lenghe sarde. Ancje se no podìn dismenteâ che al tocje zontât alc altri, magari cualchi pont di domande.

La gnove si pues leile achì.

“Cjantâ Vilotis”, ancje in Friûl si fâs fieste par Sant Zuan

Vescovo_Grimaz

Sant Zuan nol è ocasion di fieste dome a Turin. Chescj a son dîs di fieste ancje in Friûl, daûr di une tradizion lungjonone, cemût che par esempi al ven ricuardât achì.

In cheste suaze al merete segnalât l’apontament fis cu la musiche e la poesie inmaneât za di cualchi an de bande dal Comun di Tavagnà pe “Gnot di Sant Zuan”. Chest an l’event si fasarà li de aree verde di Vie Damiano Chiesa a Culugne, dulà che ai 23 di Jugn, aes 9 di sere, il Sportel comunâl pe lenghe furlane, la Associazion Pionîrs e Radio Onde Furlane a proponin une serade di intensitât musicâl e liriche une vore alte.

La gnot di Sant Zuan, che e segne il passaç de Vierte al Istât cun fûcs, lûs e contis, e sarà la ocasion par viodi e scoltâ dal vîf une cubie di ecezion: il cjantautôr Loris Vescovo, che in curt al vignarà fûr un disc gnûf, il cuart cd dal titul Penisolâti, e la cjantante e atore Caia Grimaz. I doi a presentaran un repertori selezionât di cjançons tradizionâls furlanis, chês cjantis o vilotis che intai ultins agns a àn puartât e rinovât in plui ocasions, sedi in Friûl che soredut inaltrò, in particolâr in Trentin.

La colaborazion tra i doi artiscj furlans e je tacade tal 2008, cuant che a àn metût il cûr, la vôs e il cjâf a disposizion dal progjet Cjantâ Vilotis, iniziative dedicade a une gnove leture dal cjant popolâr furlan e ladin che e je deventade un spetacul, un disc e un dvd adun cu la ex cjantante dai Matia Bazar Antonella Ruggiero.

Cjantâ Vilotis al è ancje il titul de serade di Culugne li che l’autôr di racueltis une vore impuartantis pe cjançon furlane contemporanie tant che Doi oms e une puarte (1998), Stemane Ulive (2002) e Borderline (2008) e la interprete arleve di Giovanna Marini e diretore dal côr multietnic La Tela a presentaran une sielte di vilotis tra lis plui poetichis e sugjestivis.

Vescovo e Grimaz a àn colaborât, che nol è tant, ancje par altris progjets, a mieç tra musiche e teatri, come Pieripauli, dedicât ae opare di Pier Paolo Pasolini, e Dagos, su la emigrazion furlane in Australie. Si prepare une serade di cualitât cun contignûts di emozions une vore alts.

L’apontament dai 23 di Jugn a Culugne al è a jentrade libare. In câs di ploie la serade si fasarà  dentri dal Teatri Bon di Culugne.

Par savênt di plui: www.comune.tavagnacco.ud.it e www.ondefurlane.eu.

Sant Zuan si svicine, fieste grande a Turin

sangiovanni13

A son tacadis Sabide stade lis fiestis par Sant Zuan, il patron di Turin. Par une desene di dîs un pôc par dute la citât – tal centri storic, ma ancje a Mirafiori, in Vie San Donato e in Cors France – a son events e iniziativis.

Salacor in timps di crisi al covente ancjemò di plui dâsi dongje e sintîsi comunitât.

Il grant finâl al è par Lunis ai 24 a 10 e mieze di gnot cui fûcs artificiâi dongje dal Po.

Dut il program si lu cjate achì.

Fuarce Tavagnà (e no dome chel) e fuarce Friûl!

tavagnàforlì

Nol è mai masse tart. L’insegnament dal “maestro Manzi” lu fasìn jessi bon ancje pal nestri blog e cussì, cuntune setemane abondante di intart, o tornìn a fevelâ di sport e intal specific di balon feminin.

In cheste dissipline, inte massime serie taliane, il Friûl al è rapresentât di trê scuadris: Tavagnà, Cjasielis e Pordenon. Ae fin dal campionât 2012/2013 dutis trê a àn mantignût la lôr presince in serie A, là che lis cjatarìn ancje pe stagjon che e ven.

Cun di plui il Tavagnà al è rivât secont in classifiche e duncje al vuadagnât un puest in Champions League. Ma no je finide achì: il 1n di Jugn a Forlì lis zuiadoris vuidadis di Marco Rossi a àn vinçût 2-0 la finâl di Cope Italie cuintri dal Bardolino.

Nol è dome l’Udin di Di Natale e Guidolin.

Lenghis, dirits, citadinance, Europe. Une cunvigne a Udin ai 6 e 7 di Jugn

20agns

In chel che al è l’an european dai citadins e a pôcs mês dal vincjesim inovâl de adozion de bande dal Consei de Europe de Cjarte europeane des lenghis regjonâls o minoritariis, il Dipartiment di Siencis Juridichis e la catedre Jean Monnet in Guvier e politichis de Union Europeane de Universitât dal Friûl a inmanein la cunvigne internazionâl di studis dal titul Vincj agns di Cjarte europeane des lenghis regjonâls o minoritariis.Lenghis, dirits, citadinance: Friûl-Vignesie Julie, Italie, Europe, Mediterani.

La organizazion e ven fate cu la colaborazion direte de Regjon Autonome Friûl-Vignesie Julie, Direzion centrâl culture, sport, relazions internazionâls e comunitariis, Servizi coregjonâi tal forest e lenghis minoritariis e ancje cul jutori dal PRIN 2008 “La Unione pal Mediterani: viers di un spazi economic integrât”, coordenât de bande dal Ateneu furlan.

La iniziative, che si davuezarà ai 6 di Jugn dal 2013te Sala Gusmani, li de sede deUniversitât di Palaç Antonini a Udin (Vie Petracco 8) e la dì dopo te Sale Pasolini dal Palaç de Regjon di Udin (Vie Sabbadini 31), e vûl jessi une ocasion di confront e di riflession di caratar multidissiplinâr su la tutele des minorancis linguistichis inte regjon Friûl-Vignesie Julie, in Italie, In Europe e tal spazi mediterani, par ce che al tocje la normative e lis politichis ativis dedicadis ae promozion dal ûs des lenghis minoritariis tes scuelis, tai media, te societât e te produzion culturâl.

Une atezion di pueste e vignarà dedicade ae Cjarte, ai siei contignûts, al contest indulà che e je stade cjapade sù, al rapuart tra cheste convenzion e la tutele des minorancis linguistichis in diviers Paîs europeans, ae relazion jenfri lis istancis di garanzie dai dirits linguistics e il procès di integrazion  dal continent e ae dimension europeane e internazionâl de garanzie dal dirit ae lenghe.

A cjaparan part ae cunvigne studiôs e esperts che a lavorin sei inte regjon Friûl-Vignesie Julie che inaltrò tal Stât talian e in Europe (Sardegne, Salento, Trentin, Val di Aoste, Ream di Spagne, Stât francês, Slovenie; Cravuazie e Austrie).