Autonomie o autono…NIE?

Stampa

Vuê a colin i cincuante agns dal Statût Speciâl di chê che par talian si clame “Regione autonoma Friuli-Venezia Giulia”. Pal inovâl a son in vore une schirie di celebrazions, in Friûl e a Triest.

La ricorence e je ancje une ocasion par une riflession e par une valutazion su ce che e à puartât cheste specialitât, su cemût che e je stade gjestide e su cualis che a son lis sôs prospetivis pal avignî.

Su chescj argoments a son diviers ponts di viste e no mancjin nancje trionfalisims esagjerâts e critichis di fonde.

Tra lis tantis opinions, a meretin segnaladis chê di Gianfranco D’Aronco, intervistât sul cuotidian di Udin, Messaggero Veneto, e chê di Carli Pup, che si cjate tal blog dal Comitât/Odbor/Komitaat/Comitato 482.

«Vuê forsit plui che in altris moments, ancje par vie de apatie di tancj di lôr, la nestre autonomie e je sot atac», al scrîf, marcant che «par difindile e par incressile però no bastin lis peraulis».

«Di une bande al covente savêle esercitâ no par garantî cualchi privileç, ma par ufrî un model di guvier che al permeti ai citadins e aes comunitâts che si aministre di vivi miôr (sul front dai dirits, dal ambient, dai servizis, dal lavôr e v.i.). Di chê altre bande al covente motivâle, ven a dî spiegâ il parcè de nestre specialitât. Une specialitât che no si fonde plui su lis resons che a podevin jessi 50 agns indaûr, ma che in dì di vuê si fonde dome suntun element: la presince, ancjemò maioritarie, di comunitâts che a fevelin intune lenghe divierse di chê dal stât», al zonte.

E al osserve che «su chest secont pont la Regjon in chescj agns e à fat pardabon pôc, par no dî che e je lade di chê altre bande… ». Cussì frontâ chest argoment al vûl dî domandâ che lis istituzions a dedin pardabon sostance e aplicazion a ce che al previôt l’articul 3 dal Statût regjonâl.

Chestis e altris considerazions che a cjapin dentri storie, atualitât e avignî a vegnin fatis indenant de bande dal stes  Comitât/Odbor/Komitaat/Comitato 482 e de associazion slovene Edinost in chest comunicât: comst13_02_statût.

Advertisements

Onde Furlane e Spazio 103: radiofonie e lenghe furlane in pericul

aradio

Une gnove denunzie de mancjance di politiche linguistiche pal furlan. E rive di Radio Onde Furlane e di Radio Spazio 103 che îr a Udin a àn clamât une conference pe stampe par frontâ chest argoment. In chê ocasion Paolo Cantarutti, il president di Informazione Friulana, la cooperative editore de “radio libare dai furlans”, e Roberto Pensa, diretôr de emitente diocesane, a àn presentât la situazion.

Il câs di Radio Onde Furlane al è chel plui evident: cun passe il 70% de sô programazion par furlan e lis sô diviersis iniziativis su internet e sul teritori, la radio e davuelç une vere funzion di servizi public e cun dut achel tal 2013 si cjate a vê a ce fâ cuntune riduzion dal 40% dal jutori regjonâl rispiet al an passât, che e devente fintremai dal 60% rispiet al 2009. Ancje Radio Spazio 103 e à patît un tai dai fonts avonde significatîf: dal 2008 al dì di vuê e à il 50% in mancul dai fonts.

Lis dôs radios no patissin dome l’efiet de riduzion dai contribûts regjonâi pai ents ricognossûts di impuartance primarie pe tutele de lenghe furlane, ma a son colpidis ancje dal tierç azerament dai fonts pes trasmissions radiotelevisivis par furlan. Che la situazion e fos grivie e penze lu vevin za marcât tai dîs passâts il Comitât pe autonomie e pal rilanç dal Friûl e il Comitât/Odbor/Komitaat/Comitato 482.
Tra i partecipants ae conference al jere ancje Carli Pup, il puartevôs di chest comitât, che al ten dongje associazions e altris entitâts espression des comunitâts furlane, slovene e gjermaniche dal Friûl. «Al è un câs paradigmatic de mancjance di politiche linguistiche e di planificazion strategjiche de bande de Aministrazion regjonâl», al à vût dit Pup, marcant che pes radios, cence sigurecis in cont des risorsis finanziariis e dai timps pe lôr disponibilitât, al devente dificil sei organizâ e fâ il lôr lavôr che invistî su lis personis e su lis lôr professionalitâts.

La cuistion e tocje ancje la economie e no dome la lenghe, la culture, i dirits e la fonde de autonomie speciâl de Regjon Friûl-VJ. Cun di fat e cjape dentri puescj di vore, produzion di informazion e servizis e promozion dal teritori.

Dut chest al è impuartanton, massime intun moment di crisi, cemût che a àn marcât ancje i rapresentants di SFF, Kappa Vu e La Patrie dal Friûl, altris sogjets privâts che, compagn di Onde Furlane e Spazio 103, la lôr funzion e je ricognossude primarie pe promozion e pe tutele dal furlan. Le pense compagn il president de ARLeF, Lorenzo Zanon.

Udinese – Siena 1-0

FuarceUdinees

L’Udin al torne a zuiâ, ma dome un pôc, e al torne a vinci. Une setemane dopo de disfate di Turin la scuadre furlane e recupare gjambis, cûr e sintiment e cussì e rive a jonzi ancje il risultât.

Une gnove conferme de cubie di atac Muriel – Di Natale, une prove di maturitât e di caratar. Salacor, ancje cuntun tic di cinisim, stant che dilunc dai novante minûts i blancs e neris a son stâts avonde grîs, compagn dai lôr aversaris. Tal Udin a meretin marcadis lis buinis prestazions di Padelli tra i pâi e di Muriel là denant.

Il Siena al spude balins, Rosina si mangje doi goi cuasi fats. La partide no je biele ma e je buine, almancul pal Udin, soredut pal risultât.

Guidolin e la sô formazion a puedin gjoldisi la concuiste di trê ponts bogns pe classifiche e pal morâl. Cumò ju spiete une setemane par tornâ a cjatâ ad in plen zûc e continuitât. Prossime stazion: Milan.

Gnovis de Ocitanie e ancje dal Friûl

001304_bandiera_OC

Al è saltât fûr che nol è tant il numar di Zenâr 2013 di Nòvas d’Occitània, il periodic di informazion in rêt che al cuvierç dutis lis tieris “d’Oc”e lis minorancis linguistichis dal Piemont e di inaltrò intal Stât talian e ator pe Europe.

Un dai articui publicâts al da cont di un gnûf “manifest ocitanist” che al è stât prontât inte “Occitània Granda” su la fonde di un dibatiment vivarôs e inte suaze di une schirie di iniziativis e mobilitazions.

Il numar 120 di Nòvas d’Occitània al cjape dentri ancje il comunicât pe stampe dât fûr di Comitât/Odbor/Komitaat/Comitato 482 e Comitât pe autonomie e pal rilanç dal Friûl su fats, cifris e peraulis in cont di minorancis, tutele e autonomie inte Regjon Friûl-VJ.

Piês il tacon de buse?

conseireg2

Un fat e dôs gnovis: une biele e une che e lasse plui di cualchi pont di domande.

Il fat al è che la riduzion dal numar dai conseîrs regjonâi de Regjon autonome Friûl-VJ e je deventade leç, stant che ai 22 di Zenâr, le à fate buine la Cjamare dai Deputâts, cun 397 vôts a pro, doi cuintri e un astignût.

Propit cheste e je la buine gnove, almancul par tancj di lôr.

Lis motivazions par jessi contents a varessin di jessi almancul dôs. La prime: parcè che no si spietavisi plui che, ae fin de legjislature, i deputâts a fossin in stât di fâlu. La seconde: si dîs che dîs o undis conseîrs di mancul a fasaran sparagnâ sù par jù 10milions di euros in cinc agns e duncje in graciis de aprovazion di cheste leç costituzionâl a vegnin ridusûts i coscj de politiche.

Se al fos cussì, o varessin di fâ fieste. Impen, al salte fûr ancje cualchi dubi: su la entitât efetive di chest sparagn e su chel che al è il rapuart concret tra sparagns, beneficis e coscj, sei economics che politics.

Par chest, al ven di fâsi cualchi domande. Par esempli: un consei regjonâl cun mancul conseîrs no riscjial di jessi mancul rapresentatîf de societât e dal teritori inte lôr unitât, complessitât e varietât? E ancjemò: no saressial stât miôr ridusi i coscj de politiche politicante, chei emoluments e chei rimbors che a somein pardabon privileçs cence sens, e mantignî la rapresentance democratiche, cence slargjâ la distance tra eletôr e elet e slontanâ rapresentants e rapresentâts?

Par sigûr al sarà plui dificil che inte assemblee legjislative a cjatedin spazi posizions e ponts di viste “altris”, “periferics” e alternatîfs”, cun dut che a esistin inte societât.
Se lis cjadreis a calin, e sarà ancjemò plui concorence sleâl, a coventaran plui bêçs pe propagande e cussì i professioniscj de politiche politicante si cjataran intune situazion di vantaç par ocupâlis e lis ocuparan daûr dai lôr interès personâi, di corint, di tribù, di lobby. E a cjaparan sù decisions, soredut par ce che al tocje dirits, strategjiis di disvilup economic e sociâl e gjestion dal teritori, che a tignaran cont – ancjemò plui di ce che al sucêt za cumò – dome dai interès di pôcs (i lôr e chei dai lôr sponsors) e no ancje des dibisugnis di ducj.

La “caste” e sarà ancjemò plui “caste”. Piês il tacon de buse?

Gabriel Brovade, il vêr strolic furlan

strolic

Nol è mai masse tart par savê cualis che a son lis previsions pal 2013.

Su Radio Onde Furlane la voie di cognossi ce che si lei tes stelis in cont dal nestri avignî e à cjatât sodisfazion cu la tornade, dome pe ocasion, di Gabriel Brovade, mitic personaç radiofonic saltât fûr vie pal an passât.

Lis previsions dal vêr strolic furlan si puedin scoltâ ancje in rêt.

Par savê alc di plui. E soredut par fâ dôs ridadis.

In Alessia We…Trost

trosttitulmondiaaljunior

Nol è dome il campionât talian di balon masculin di serie A.
Il sport, in gjener
âl e in Friûl, al cjape dentri un grum di altris robis, di altris dissiplinis e di altris personis. Mancul mâl.

Cussì, ancjemò cu la bocje garbe pe sconfite dal Udin a Turin, o podìn fâ fieste pe atletiche furlane, stant che îr e je stade la zornade di Alessia Trost.

La zovine atlete di Pordenon, che l’an passât a Barcelone e veve vinçût il titul mondiâl junior di salt adalt, e à tacât benon il 2013 cul secont risultât di simpri indoor a nivel talian.
Li dal PalaBernes di Udin
e à saltât 1,98 cm: un centimentri di plui di ce che e veve saltât Sara Simeoni tal 1981; un risultât che tra lis altris i fâs jonzi il record talian under 23.

Une biele maniere di tacâ l’an gnûf. Chi di cualchi dì e sarà in Moravie, a Hustopeče e a Trineč, ai 26 e ai 29 di Zenâr.

Juventus – Udinese 4-0

udin

Nuie ce fâ. Dopo vê zuiât e vê vinçût cuintri di Inter e Fiorentina, l’Udin a Turin nol zuie e cussì al piert: 4-0.

I cuatri piruçs cjapâts li dal Juventus Stadium a piturin a clâr la ande che e à cjapât la partide, sin dal principi. E jere une scuadre sole in cjamp e chê no jere l’Udin.
Cemût che a àn ametût ae fin de partide sei Guidolin che Hertaux, la formazion furlane ur à lassât masse cjamp e masse iniziative ai parons di cjase.
La scuadre che o vin viodût nossere e someave masse a chel Udin che vincj o trente agns indaûr al scombateve par restâ in serie A e al vignive a Turin par zuiâ cuintri de Juve cun chê di cirî di difindi un zero a zero e cul risultât di cjapâlis, in cualchi câs pardabon cence pietât.

Nossere a Turin si podeve pierdi, stant che la Juve no je dome une scuadre siore ma e je ancje – propit par chel – une siore scuadre, cuntun so zûc e cuntune sô cualitât. Però, daûr dal compuartament mostrât de bande dal Udin tes ultimis setemanis, no si spietavisi une sconfite di cheste fate e di chestis proporzions.
Di un pôcs di agns o sin usâts a vivi lis partidis dal Udin, ancje chês cuintri de Juve, intune maniere divierse di chê di une volte e cussì, cuant che lis robis a van in cheste maniere achì, risultât e compuartament tecnic e agonistic de scuadre a son un tic plui dificii di parâju jù.

Ma se une setemane indaûr al jere just no esaltâsi masse e restâ cui pîts par tiere, cumò nol è propit il câs di fâsi cjapâ de depression.

“Chantar l’Uvern”, sclesis di culture ocitane e francoprovençâl

chantar (1)

Ancje chest fin de setemane tes Vals dal Sangone e di Susa a son diviers apontaments cu la musiche, cul teatri e cu lis tradizions des comunitâts locâls di lenghe ocitane e francoprovençâl. Cun di fat, e je in plen davuelziment la setime edizion di “Chantar l’Uvern: da Natale a Sant’Orso frammenti di cultura occitana e francoprovenzale”, rassegne che e cjape dentri spetacui teatrâi, concierts, conferencis e altris manifestazions.

Il program, che al è stât screât la vilie di Nadâl a Gravere, si disvilupe vie pal invier, fintremai ai 23 di Fevrâr.

Par savênt di plui: http://www.provincia.torino.gov.it/speciali/2012/chantar_uvern/

Mancul dal 0,1% dal belanç de Regjon

lengate1

La presince rilevante des minorancis linguistichis e la lôr tutele a son la fonde plui impuartante de autonomie speciâl de Regjon Friûl-Vignesie Julie.
Sei di un pont di viste storic che  soredut cuntune vision di prospetive, chest al è pardabon un resonament che al à mani. Cun di plui, su chest argoment si cjatin sù par jù ducj cuancj in cunvigne, ancje i vertiçs istituzionâi de Regjon, che avonde dispès a fasin declarazions publichis là che si marche propit in chest sens il valôr dal caratar multilengâl e multiculturâl de comunitât teritoriâl che e ten dongje il Friûl e Triest.

Chest fat al somearès alc di positîf, se nol fos che lis peraulis a van intune direzion impen che i fats a van di une altre bande.
Cun di fat, al à reson Sandri Carrozzo, che tal so blog timp indaûr al scriveve che no àn nissune credibilitât chei che a fevelin di autonomie speciâl e tutele des minorancis e intant a agjissin intune maniere diferente e contrarie.
Chest al saltave fûr za intant des conferencis regjonâls su la tutele des minorancis slovene e furlane, fatis tai mês di Otubar e Novembar dal an passât.
E chest al cjate conferme ulteriôr te Finanziarie regjonâl, cemût che a marchin intun comunicât il Comitât/Odbor/Komitaat/Comitato 482 e il Comitât pe autonomie e pal rilanç dal Friûl.

Daûr di ce che si lei, pe Regjon autonome Friûl-Vignesie Julie lis minorancis linguistichis e la lôr tutele a valin mancul dal 0,1% dal belanç regjonâl. Probabilmentri parcè che, plui che la autonomie speciâl, a chescj sorestants ur interesse la fantomatiche “Macroregjon dal Nord Italie”, dulà che il Friûl e ancje Triest a vegnaressin scjafoiâts….

PS. Il comunicât al è chel chi: comunicatcom4821601013
PS2. Sul argoment al merete cjalât ancje il blog dal Comitât/Odbor/Komitaat/Comitato 482:
http://com482.blogspot.it/2013/01/pe-regjon-no-valin-nancje-il-01-dal.html.