An Englishman in… Cividât

Un concierton di gale. Al è chel che al à fat nossere Sting a Cividât pe conclusion de edizion di chest an dal Mittelfest. Il cjantant, musicist, autôr (e atôr e tantis altris robis ancjemò) di Wallsend si à presentât sul palc metût adun tal Parc de Lese intune forme fenomenâl e compagnât di une band di grande sostance, a tacâ dai ghitariscj Dominic Miller e Ruful Miller e dal baterist Josh Freese, che e à fat il so dal principi ae fin, cuntun spetacul sempliç e compat di passe une ore e mieze.

E jere une des datis dal tour leât ae jessude dal so disc plui resint – 7th & 9th, il diesim secont de sô produzion tant che solist – ma la plui part dal spetacul dal professôr Gordon Sumner e à cjapât dentri tocs dai siei albums plui vecjos e soredut nûf classics dal repertori dai Police.
Sting e i siei compliçs a àn tacât a scjaldâ il cûr dal public e a parâ vie i nûi neris che a jerin ancjemò tal cîl parsore dal Nadison propit cuntun poker di ‘oldies and goldies’, de viertidure cun ‘Sincronicity II’ a ‘Englishman in New York’, passant par ‘If I ever lose my faith on you’ e ‘Spirit in the Material World’.

Il tîr al è chel just e la conferme e rive de esecuzion di ‘Every little thing she does is magic’ e de rispueste dal public, par sigûr ben sintonizât su lis frecuencis dai trê puliziots plui preseâts dal Ream Unît tra il 1977 e il 1984, che e fâs di puint cuntune rieste di tocs de seconde vite artistiche di chel che une vole al jere un «young teacher», là che si presein soredut lis esecuzions di ‘She’s too good to me’ e ‘Petrol head’.

Intant che si svicine la metât dal conciert, la atmosfere si scjalde ancjemò. Al rive il messaç che in tancj a spietavin: une version apassionade di ‘Message in a Bottle’, che e somee marcâ un altri svolt tal percors che al ten dongje chei sul palc e i siet mil di lôr che, sentâts o impins, si cjatin tal prât.
A rivin ancje l’omaç a David Bowie cun ‘Ashes to Ashes’, la gnove (che e sa di antîc) ‘Five Thousand’ e po ‘Walking on the Moon’, inmagante come simpri, che e segne un altri cambiament di pas. La int cumò e mole lis sentis e si tire dongje dal palc. L’amarcord puliziot al va dilunc cuntune ‘So Lonely’ viamente e svariade, daûr de sô tradizion miôr, al lasse spazi a ‘Desert Rose’, là che però si sint la mancjance di Cheb Mami, e po al torne in bombe cun ‘Roxanne’, che si stramude in ‘Ain’t No Sunshine’ di Bill Withers e po e torne in se, in chel istès dolce, ruspiose e sincopade.

E podarès finî cussì, ma par fortune al è ancjemò alc: tra une polse rituâl piçule piçule e chê altre al è spazi ancjemò par un poker di emozions, dal classicon ‘Next to You’ al sucès planetari ‘Every breath you take’, di ‘Fragile’, cun Sting che al sune la ghitare, a ‘I Can’t stop thinking about you’, gjavade fûr dal album gnûf.

Tal cîl si tornin a viodi lis stelis e salacor nol è nancje plui frêt. Pardabon une biele serade.
Se Sting al ves dit ancje «Mandi Cividât» e «Dober Večer Čedad» e sarès stade perfete…

 

(fotos di Simone Di Luca / graciis a Azalea)

Babêl Europe ‘in Onde’ tra punk rock e novitâts discografichis sardis e ocitanis

Doman al è martars e a 11 a buinore su Onde Furlane al torne Babêl Europe, la trasmission cuindisinâl dedicade ae produzion musicâl tes lenghis minorizadis dal continent.

La ultime pontade dal mês di Lui di chest an, che si podarà scoltâle in repliche ancje miercus ai 26 a une dopo di misdì e sabide ai 29 a une e mieze dopo di misdì, e promet gnovis cercis di discs che a son saltâts fûr tra la fin dal 2016 e il 2017.

In particolâr si larà dilunc a scoltâ alc altri dai discs plui resints dai Goulamas’k, Resistencia, e di Dr. Drer & CRC Posse, Cabudanni.

Dongje des novitâts discografichis de Ocitanie e de Sardegne, al sarà spazi ancje par cualchi (plui o mancul) ‘classic’ di punk rock  babelic, dal Gales ae Catalogne e fintremai al Paîs Basc, cun Anhrefn, Camarada Kalashnikov e Zarama.

Chi di cualchi dì, cheste pontade di Babêl Europe, dopo de emission in direte e des replichis di miercus e di sabide, si podarà tornâ a scoltâle in rêt, compagn di chê altris, sul sît internet di Radio Onde Furlane.

La radio libare dai furlans si scolte sui 90 Mhz pe plui part dal Friûl, sui 90.200 in Cjargne e in rêt, par dut il mont, ae direzion www.ondefurlane.eu.

Mittelfest 2017, Cividât al è…par Aiar

Sabide ai 15 di Lui si à screade a Cividât la edizion di chest an di Mittelfest, il festival des arts nassût tal 1991 cun chê di promovi lis carateristichis ambientâls e culturâls specifichis dal Friûl e de regjon Friûl-VJ e di rinfuartî lis relazions jenfri chescj teritoris e chei de Europe centrâl e dai Balcans.

La manifestazion, daûr di une tradizion di passe vincjecinc agns, e met dongje ancje chest an une schirie di events, tra incuintris cui artiscj, performance, spetacui, concierts e vents di ogni sorte.

Il so program, che si disvilupe dilunc vie di dîs dîs, fintremai ai 25 di Lui, al è pardabon siôr.

Daûr des intenzions dai siei organizadôrs, la peraule clâf che e fâs di fîl ideâl di dute la manifestazion di chest an e je Aiar. Dopo dal festival dedicât ae Aghe tal 2015 e di chel dedicât ae Tiere tal 2016, il festival di chest an al è dedicât a chest element, che adun cun chei altris doi al rapresente un dai ponts critics dal vivi contemporani: risorse di vite, argoment di pinsîr e di azion e par chel ancje ispirazion creative.

Il program di Mittelfest si pues consultâlu culì, ancje – almancul par alc… – par furlan, par sloven e par todesc.

‘Dos gardenias par BB’, sabide ai 15 di Lui a Puart un ricuart dal poete Lazzara

Te gnot tra sabide ai 12 e domenie ai 13 di Jugn dal an passât, nus lassave intune maniere improvise Raff BB Lazzara, poete furlan, babelic e visionari, ironic, libertari e scalembri.

Di une bande, par chel, nus tocje dî che Raff BB nol è plui cun nô. Di chê altre bande, però, la sô vôs, lis sôs peraulis e lis sôs visions nus compagnin ancjemò in dì di vuê.

Sabide ai 15 di Lui a Puart, inte suaze de rassegne Notturni DiVersi, te Plaçute de Pescjarie, e sarà une ocasion propit par ricuardâ Raff BB e par dâsi dongje cu la sô vôs, cu lis sôs peraulis e cu lis sôs visions.

L’apontament si clame Dos gardenias par BB e al è un omaç ae poesie furlane e planetarie di Raff BB Lazzara, cun leturis, imagjins e cjançons.

A saran i Trastolons – Stiefin Morat, Lussia Di Uanis, Pauli Cantarutti, Vera Putelli, Fabian Riz, Guido Carrara, Maurizio Mattiuzza – e cun lôr ancje Loris Vescovo, Rive No Tocje, Romano Todesco e Ermes “Momi” Ghirardini.

Si tache a 9 di gnot.

De Sardegne ae Frisie. Ancjemò reggae, ancjemò dub, ancjemò Babêl Europe

Ancjemò reggae, ancjemò dub, ancjemò Babêl Europe. La gnove pontade de trasmission cuindisinâl dedicade ae produzion musicâl tes lenghis minorizadis dal continent, che si pues scoltâle vuê, martars ai 11 di Lui, a 11 in direte su lis frecuencis di Radio Onde Furlane (sui 90 Mhz pe plui part dal Friûl, sui 90.200 in Cjargne e in rêt, par dut il mont, ae direzion www.ondefurlane.eu) e va daûr di chê di cuindis dîs indaûr, lant dilunc te esplorazion su lis contaminazions  tra i ritmis di divignince gjamaicane, i sunôrs dilatâts cun rivocs e efiets eletronics e lis lenghis des minorancis e des nazions cence stât de Europe.

Il viaç musicâl babelic al tocjarà la Sardegne, la Corsiche, la Galizie, la Frisie e il Friûl. Si scoltaran i risultâts di une colaborazion, fate cualchi an indaûr, tra Arrogalla e Ratapignata, lis rimis di Fyah P, lis melodiis dai Lamatumbá, chês di Riddim X e un classic dai Carnicats.

Dopo de direte di vuê, ancje cheste pontade di Babêl Europe e torne in programazion in repliche doman, miercus ai 12 di Lui, a une dopo di misdì e sabide ai 15 di Lui a une e mieze dopo di misdì.

Chê stesse trasmission si podarà scoltâle ancje sul sît internet di Radio Onde Furlane.

 

Occit’Amo, usgnot a La Roca la scree in musiche cu la galiziane Susana Seivane

Al torne Occit’Amo, il festival multisensoriâl des Vals ocitanis dal Piemont. La rassegne e je tacade îr e e larà indenant fintremai ai 15 di Avost cun concierts, incuintris e une schirie di altris apontaments, de buinore ae gnot.
Usgnot a 9 a La Roca (Roccasparvera), te Val de Estura, si scree il program musicâl che al proviôt la partecipazion di grups e soliscj de Ocitanie di ca e di là dal clap, di Val di Aoste, dal Salento, de Catalogne, dal Paîs Basc, des Asturiis, dal Aragon e de Galizie.

Protagoniste dal prin apontament e je propit une innomenade strumentiste galiziane, la ‘gaitera’ Susana Seivane. Tirade sù intune famee di musiciscj – par esempli il so von Xosé Manuel e so pari Alvaro – e dopo jessi stade tal grup Milladoiro, e à inviât une cariere soliste che e je stade segnade ancje di une schirie di colaborazions internazionâls. Ta chê stesse serade a saran ancje i Autre Chant, che dal 2011 a van dilunc a sunâ lis musichis des tieris ‘d’Oc’ di ca e di là dal clap.
La part di program dal festival che si davuelç te Val d’Estura e va indenant ancje vie pe zornade di doman a tacâ de buinore.

Tes setemanis a vignî Occit’Amo al larà a torzeon tes Vals Maira, Po, Varacha e Grana e te plane bande Cuneo.
Tra i protagoniscj dai concierts (che – al merete tornât a ricuardâlu – a son dome une part di dut il program de manifestazion) a son ancje i salentins Mascarimì, i valdostans Trouveur Valdoten, i catalans Brams, i bascs Kherau, i aragonês A Cadiera Coixa, Goran Bregoviċ e Lou Dalfin.

Dutis lis informazions, plui in detai par ducj i events, si cjatin in rêt.

Suns Europe, al è fûr il bant pe sezion musiche de tierce edizion dal festival

Dopo de cerce dai 9 di Jugn, cul dopli conciert de artiste galese Gwenno e dal progjet furlan vERsO, ve chi un altri pas indenant dilunc de strade che e puarte ae tierce edizion di Suns Europe, il festival european des arts tes lenghis minorizadis.

Al è finalmentri saltât fûr, za di cualchi dì, il bant di partecipazion de sezion dedicade ae musiche di chê manifestazion che dal 2015 e puarte in Friûl artiscj che a doprin cun snait e cun creativitât lis lenghis propriis des minorancis e des nazionalitâts.

L’invît a fâ indenant lis candidaturis al vâl par ducj i musiciscj – grups o soliscj – che a produsin musiche origjinâl doprant une des «lenghis regjonâls o minoritariis» dal continent, cemût che a vegnin definidis te innomenade Cjarte fate buine dal Consei de Europe tal 1992.
Il bant (par furlan, par inglês e par talian) si pues leilu in rêt e si pues discjamâlu dal sît www.sunseurope.com. La scjadince e je chê dai 10 di Avost.
Par ce che al tocje lis sezions dedicadis ae leterature e ae produzion audiovisive lis modalitâts di individuazion dai partecipants no proviodin la publicazion di bants e la selezion dai partecipants e vignarà fate de bande di un comitât di esperts. Cundut achel, e je ancje la pussibilitât di presentâ propuestis specifichis. Al baste scrivi a info@sunseurope.com.

Tal percors viers de tierce edizion di Suns Europe, dongje de publicazion dal bant pe sezion Musiche, dal inzornament dal sît internet e dal conciert di Udin dai 9 di Jugn, al cjate puest ancje il dopli incuintri che une delegazion dai organizadôrs de manifestazion, formade di rapresentants di Radio Onde Furlane, de ARLeF (Agjenzie Regjonâl pe Lenghe Furlane) e de cooperative Punto Zero al à vût, ancjemò vie pal mês di Mai a Strasburc, cui rapresentants dal Consei de Europe e dal Parlament european.
In particolâr, il grup vuidât dal diretôr artistic di Suns Europe, Leo Virgili, si à cjatât adun cul responsabil dal Segretariât de Cjarte europeane des lenghis regjonâls o minoritariis, Sixto Molina, e cui eurodeputâts plui atents e sensibii viers des cuistions che a tocjiin i dirits des minorancis e la diversitât linguistiche e culturâls.

Risultati immagini per EUROPARLAMENTO SUNS EUROPE

Il Segretariât de Cjarte europeane des lenghis regjonâls o minoritariis dal Consei de Europe, che a tacâ de prime edizion, al da il so patrocini al festival, al à palesât il so interès in cont di Suns Europe, tant che une iniziative impuartantone pe promozion des lenghis, dai dirits e de cussience civiche, massime in chescj agns – il 2017 e il 2018 – che a son segnâts di inovâi une vore significatîfs: par chest an i vincjecinc agns de adozion de Cjarte europeane e par l’an che al ven il ventesim de jentrade in vore (tal 1998) de Cjarte stesse e de Convenzion cuadri pe protezion des minorancis nazionâls, fate buine tal 1995.

L’Intergrup del Parlament european pes minorancis, pes comunitâts nazionâls e pes lenghis al à pandût il so preseament par Suns Europe, sù par jù cun chês stessis motivazions.

Suns Europe al è ancjemò… plui european.