Bologna – Udinese 1-2

Il 2017 si siere cun doi biei tons furlans, tal zûc dal balon e te bale tal zei. Vuê a Bologne la scuadre blancje e nere e à vinçût la sô cuinte partide consecutive, intant che îr ai Riçs si à zuiât Udin – Triest di basket A2 e i parons di cjase a àn vinçût cuintri dai triestins prins in classifiche 73 a 69.

Il sucès de scuadre di mister Oddo si insuaze intun moment positîf pe plui part dal sport furlan e al da motîf di otimisim pal 2018 ancje in altris cjamps, là che pal Friûl al somee che al salti fûr alc altri di interessant. L’Udin si conferme tant che une scuadre ecuilibrade, in stât di scombati, di resisti e di fâ risultât, e par chel si vuadagne ancje une biele posizion in classifiche.

Cuintri dal Bologna di Donadoni no je une partide facile. I parons di cjase a cirin di fâ valê la lôr supremazie teritoriâl, ma l’Udin al rispuint cun snait e cun caratar. I ros e blu a cjatin daurman une biele ocasion cun Verdi, ma par fortune al è Jankto che al cuvierç e i met un blec.

La struture de scuadre furlane e je simpri chê: Bizzari in puarte, difese a trê cun Samir dongje di Danilo e Larsen, mediane a cinc cun Widmer e Alì Adnan tes corsiis laterâls e cun Barak, Berhami e Jankto tal mieç e atac cun Lasagna e Maxi Lopez. L’Udin al resist denant dai atacs aversaris e al rispuint cun Behrami e Barak che a masanin zûc, cun Widmer e Alì Adnan che a garantissin riforniments e pression dilunc des fassis e cun Lasagna che al è un pont di riferiment costant, dinamic e precîs.

Ator de prime mieze ore di zûc al rive il gol dai parons di cjase. Magari cussì no, lu segne Danilo, che al tocje in maniere determinante il tîr cross di Verdi par Destro e al mande la bale te puarte di Bizzarri e che al conferme che il Dall’Ara al è un cjamp che i puarte sfighe, stant che ancje l’an passât al veve fat un autogol. La reazion dal Udin e je imediade e tal zîr di dîs minûts e rive une combinazion tra Alì Adnan e Widmer che e cjate la difese bolognese in dificoltât e che e met il zuiadôr svuizar tes cundizions di segnâ l’un a un.

I blancs e neris a mantegnin chê stesse ande ancje tal imprin dal secont timp e anzit a vuadagnin alc in velocitât, stant che dongje di Lasagna al jentre De Paul al puest di Maxi Lopez. Al rive daurman il vantaç di Lasagna e po l’atacant di San Benedetto Po al torne a fâi pôre a Mirante intun pâr di ocasions.

A passin i minûts e il Bologna nol rive a fâ alc e ce, nancje dopo de jentrade in cjamp di Palacio. L’Udin si difint cun sintiment e al continue a jessi vivarôs indenant, in graciis dal dinamisim di Lasagna e De Paul e de buine intese tra i doi. Ancje Bizzarri al à il so moment di glorie cuntun bon intervent suntune conclusion di Destro, intant che la partide e somee no finî plui, cuntun lunc recupar là che al prove a fâ l’atacant ancje Mirante, ma par di bant, e cuant che Gavillucci al sivile la fin, e je finalmentri ore di fâ fieste.

Ancjemò augurons blancs e neris e furlans!

Advertisements

La ultime pontade dal an di Babêl Europe. Novitâts discografichis di vuê e di doman

Al è passât Nadâl, al rive Sant Stiefin e al torne Babêl Europe, il program cuindisinâl dedicât a lenghis, musichis e nazions cence stât. Vuê al è martars e l’apontament babelic su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al è a undis a buinore. Cun di plui si podarà tornâ a scoltâ la trasmission ancje tal dopodimisdì di doman ai 27, a une, e di sabide ai 30, a une e mieze.

Te ultime pontade dal 2017 si fevelarà di discs jessûts vie par chest an e ancje di cualchi produzion che e saltarà fûr tal 2018. E sarà la ocasion par tornâ a scoltâ alc di Cabudanni di Dr. Drer e CRC Posse e par une dople cerce di Amb l’esperança entre les dents, il disc solist di Xavi Sarrià, innomenât cjantant, musicist e scritôr dai Paîs Catalans, par passe vincjecinc agns vôs e ghitare dai Obrint Pas.

Si tornaran a memoreâ ancje i trente agns di ativitât dai Dixebra e si fevelarà dai Lou Seriol che a son daûr a prontâ un album gnûf: cun chê scuse si scoltaran ancje dôs covers babelichis dai Sex Pistols gjavadis fûr dal repertori dal grup storic asturian e di chel dai sghirats des Valadis Ocitanis dal Piemont, che nus ricuardin che «anarquista» al fâs rime cun «occitanista».

 

Ancje par chest an… auguris babelics!

leb

Bon Nadâl e bon an
Vesel Božič in srečno novo leto
Ein frohes Weinachtfest und ein glückliches Neues Jahr
Buon Natale e felice anno nuovo
Bonas pascas de Nadale e prosperu annu nou
Pulit Nadal e bona anada
Bon Tsalendre e Treinadan
Joyeux Noël et bonne année
Zorionak eta Urte Berri On!
Nedeleg laouen na bloavezh mat
Bon Nadal i un Bon Any Nou!
Nadelik looan na looan blethen noweth
Pace è salute
Noflike Krystdagen en in protte Lok en Seine yn it Nije Jier
Nadolig Llawen
Bon Nadel y Bon Ann Nuef
Nollick ghennal as blein vie noa
Bachtalo krecunu Thaj Bachtalo Nevo Bers
Buorrit Juovllat
Nollaig chridheil huibh

Udinese – Verona 4-0

L’Udin al torne a zuiâ in campionât e al torne a vinci. Cuintri dal Verone la scuadre di balon furlane e onore il Stadi dai Riçs inte maniere miôr cuntune partide caraterizade di chel che nus plasarès clamâlu efiet Friûl.

La formazion di Oddo e conferme il so mement bon cuntune prestazion positive, in continuitât tatiche e agonistiche cu la vitorie di Milan. L’implant de scuadre al è chel di San Sio cu lis inovazions di Behrani te mediane e di Maxi Lopez in atac dongje di Lasagna.

Tal zîr di dîs minûts i blanc e neris a rivin daurman a imponi la lôr superioritât te fasse centrâl e tes corsiis laterâls. Ator de prime mieze ore di zûc la intese tra Widmer e Jankto, il dinamisim di Lasagna e il sens de posizion di Barak a produsin la prime segnature: assist dal svuizar e gol dal boem, che si zove ancje di une deviazion di Caracciolo.

I ospits no rivin a imbastî nissune reazion, l’Udin al mante il comant de partide e al è ancjemò pericolôs des bandis di Nicolas, che al fâs une biel numar suntune conclusion di Lasagna ma po al ven superât di Widmer prime de polse.

Tal secont timp la musiche e reste chê: une biele sinfonie blancje e nere. A rivin cussì il tierç gol di Barak, che al siere une combinazion preseose tra Widmar e Lasagna, il poker dal atacant di San Benedetto Po e almancul altris trê conclusions in puarte dai blancs e neris che a viodin Nicolas salvâsi intune maniere o in chê altre.

Auguris blancs e neris e furlans.

 

Ai 23/12 e ai 24/12 su Radio Onde Furlane la Fieste e je dople e la Vilie e je Vi_NI_lie

Nadal

Si svicine il Nadâl e su Onde Furlane, daûr di chê che e je zaromai une vere e proprie tradizion, si fâs fieste in direte radio, cuntune programazion speciâl, cui intervents di colaboradôrs, ospits e scoltadôrs e cuntun grum di musiche dal vîf.

La Fieste de Vilie de radio libare dai furlans par chest an e sarà une fieste dople, par vie che e tache za ai 23 di Dicembar a 9 e mieze cuant che al sarà il diretôr de emitente, Mauro Missana, a screâ e a puartâ indenant la direte là che par almancul trê oris la radio e la sô int si da adun tai studi di Vie Volturno 29, in modulazion di frecuence e in rêt.

E sarà ancje la ocasion par scoltâ la band cjargnele dai Dissociative e par gjoldi dal omaç in musiche ae poesie di Pierluigi Cappello, Leo Zanier e Federico Tavan cu lis vôs di Elsa Martin, Lino Straulino e Franco Giordani.

franco giordani a onde furlane

La Fieste de Vilie e larà dilunc ancje vie pal dopodimisdì de sabide cu la cuinte edizion speciâl di GabiTeRAPia OneLove: trê oris di hip hop, dutis dedicadis ae memorie dal artist Luciano Lunazzi, cul miôr dai dj e dai rappers, dai balarins e dai grafitârs dal Friûl e cun cualchi ospit che al rive ancje dal Venit e di Triest.

La Fieste de Vilie e toLa Fieste de Vilie e torne ‘on air’ domenie ai 24 di Dicembar, juste pe vilie di Nadâl, che pe ocasion si stramudarà in ViNIlie, cuntune maratone radiofoniche pe libertât di esisti, almancul fin a 3 a matine, cuinçade di une schirie di djsets fats cui discs in vinîl, tra pop, rock, punk, dark, noise, metal, sperimentazions e ibridazions di ogni sorte cun Piotre, SuperEzio DJ, Francis, Hadrianus, Nichi D’Andrea, Cristiano Deison, Mara Sala e Marilena Moroni.

La fieste e je za tacade lunis di sere cu lis sperimentazions musicâl di Buio Omega, pontade speciâl dal Hybrida Show, che e cjape ispirazion dal solstizi di invier.

Par cui che al è in zone l’invît al è ancje chel di passâ tai studis di Onde Furlane «cun alc di bon di bevi o di mangjâ».
Par ducj cuancj – ancje cui che al è plui lontan – al è chel di scoltâ la radio e di fâ fieste in maniere virtuâl in modulazion di frecuence (90 Mhz e 90.200 Mhz), in streaming ae direzion www.ondefurlane.eu, cu la App o in direte Facebook.

E tancj auguris!

logo_web_ROF_new

Cope Italie, ancje l’Udin si ferme tai otâfs di finâl


Dopo il Pordenon, ancje l’Udin. I risultâts des partidis dai otâfs di finâl a decidin che nol è puest pal Friûl in Cope Italie. Nossere a Napoli l’Udin al ten bot denant dai plui titolâts parons di cjase par passe une ore di zûc a al cole dome tai ultins vincj minûts par vie di une biel gol di Insigne, che al è ce che al covente ae scuadre di Sarri par lâ indenant in chê competizion.

I blancs e neris al San Paolo si presentin cuvierts e atents, cun diviersis novitâts in formazion compagn che i aversaris. Il 3-5-2 di Oddo al cjape sùù une struture diferente (5-4-1) e il Napoli nol rive pardabon a jessi pericolôs des bandis di Scuffet, fûr che cuntun pâl cjapât di Ounas e cuntune tîr di Callejon che al ven fermât dal puartîr di Remanzâs.

Il prin timp si siere cence goi cul Napoli che al sburte di plui ma cence rivâ a produsi alc e ce intant che l’Udin no si fâs mai viodi in atac. La musiche e je sùù par jù compagne dopo de polse. La diference si le viôt dome cuant che Sarri al met dentri Mertens e Insigne al puest di Callejon e Giaccherini. La sielte dal tecnic e ven premiade, stant che la manovre dal Napoli e je plui fluide e te difese dal Udin si vierç cualchi piçul sfris, là che a cjatin spazi i doi atacants napolitans plui innomenâts.

Al rive cussì il gol di Insigne, che al oblee l’Udin a provâ a tornâ a dreçâ la partide par zuiâsi òa cualificazion dai undis metris e che al met in cundizions il Napoli di sierâsi in maniere preventive cun chê di no lâ a cirî gnot e duncje di mantignî il vantaç fin ae fin de partide.

Pal Udin e je la prime sconfite de gjestion Oddo. Si scuen dî mandi ae Cope Italie ma si pues jessi avonde contents pe ande che e somee vê cjapât la scuadre e ancje pes prestazions di zuiadôrs che fin cumò a vevin zuiât pôc o no vevin zuiât pa nue, tant che Stryger e il stes Scuffet.

Inter – Udinese 1-3

Il stadi di San Siro al da ancjemò sodisfazion al Friûl e ai furlans. Se martars in Cope Italie al è stât il Pordenon a fâi cjapâ pôre ae Inter, che si à salvât in graciis di un pâl e dal ultin rigôr, vuê in campionât i à tocjât al Udin di fâ ancjemò miôr: trê goi, trê ponts e une vitorie che e met in discussion il primât de scuadre di Spalletti e che ur fâs fâ un biel pas indenant in classifiche ai blancs e neris.

La formazion di Oddo, cun Bizzarri in puarte, cu la difese a trê cun Danilo, Nuytinck e Larsen, cu la mediane cun Fofana tal mieç, cun Barak e Jankto dongje di lui e cun Widmer e Adnan su lis corsiis laterâls, par sburtâ e cuvierzi, e cu la cubie di atac formade di De Paul e Lasagna, e mostre di vê snait e caratar, gjambis e cûr. E rive sei a difindisi cun sintiment che a imbastî azions di atac che a metin in crisi i parons di cjase.

L’Inter al partìs daurman plui decîs cu lis conclusions fûr bersai di Vecino, Candreva e Perisic. L’Udin al ten bot, al rispuint in cuintripît cuntune combinazion tra De Paul e Lasagna che e ven parade di Handanovic e po cuntune iniziative di Widmer che i puarte vie la bale a Santon e le met tal mieç par Lasagna che al segne cence fastidis.

I parons di cjase a restin sot di un gol juste par pôc, stant che a jonzin la paritât te lôr prime azion seguitive: cross di Candreva e gol di Icardi. Vie pal prin timp la pression de Inter e je avonde produtive cun diviers tentatîfs di passâ in vantaç cun Santon, Candreva, Borja Valero, Brozovic e Perisic, ma Bizzarri al è atent e l’Udin al prove a rispuindi ancjemò in cuintripît.

La seconde frazion si vierç cul Udin che al tire fûr daurman lis ongulis, cun Lasagna che al oblee Handanovic a fâ une paradone. L’Inter al prove a dâsi une sveade ma no rive a fâ alc e ce in atac, intant che, cul jutori de Var, di un cross di Widmer tocjât cu la man in aree di Santon al salte fûr un penalty che al ven segnât di De Paul.

I parons di cjase no rivin a rispuindi cu la stesse intensitât de lôr repliche dal prin gol vie pal prin timp. A cjapin une travierse cun Skriniar e a impegnin Bizzarri cun Gagliardini e al è pardabon pôc altri ce contâ. L’Udin no si scompon, si difint cun sintiment e cun caratar e cussì al manten il vantaç cence sierâsi indaûr ma ben cun cualchi iniziative ofensive.

Al rive cussì il tierç gol: iniziative di Jankto e cross par Barak che al segne. E intant che tal ultin cuart di ore a son fingtremai cinc i zuiadôrs interiscj in atac, il risultât nol cambie e anzit Barak si cjate tes cundizion di provâ ancjemò a tirâ in puarte. Tant a dî che la vitorie furlane no je casuâl, ma e diven di une partide zuiade avonde ben.

Babêl Europe, su Onde Furlane gnovis e musiche de Corsiche, dal Paîs Basc, de Ocitanie, dai Paîs Catalans e de Arberie

Vuê al è martars e te programazion di Radio Onde Furlane e torne Babêl Europe, la trasmission cuindisinâl dedicade ae produzion musicâl tes lenghis minorizadis dal nestri continent. L’apontament in direte al è a undis a buinore, intant che vie pe setemane a saran ancje dôs replichis tal dopo di misdì: doman, miercus ai 13 di Dicembar, a une e sabide, ai 16 di Dicembar a une e mieze.

In particolâr e sarà la ocasion par tornâ a scoltâ la musiche e lis peraulis dai Cantelli, dai Goulamas’k, di Claudia Crabuzza, de Peppa Marriti Band e dal gnûf progjet là che si dan dongje Fermin Muguruza e il coletîf catalan The Suicide of Western Culture. La scjalute di Babêl Europe si disviluparà daûr di sugjestions che a divegnin de storie e de atualitât, tra Corsiche, Ocitanie, Paîs Catalans, Paîs Basc e Arberie.

Dentri de gnove pontade di Babêl Europe si fevelarà di manifestazions, di festivals, di gnovis produzions discografichis, di videos e di presentazions di discs.

Radio Onde Furlane  si scolte sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu.

Dopo de prime emission in direte e des replichis di miercus e di sabide, ancje cheste gnove pontade di Babêl Europe si podarà tornâle a scoltâ tal sît internet de radio libare dai furlans.

Udinese – Benevento 2-0

L’Udin al zuie, al scombat, al ten bot e al vinç. Cuintri de ultime in classifiche la scuadre di balon furlane no si piert pai trois, si mostre concrete e ordenade, e segne doi goi e e puarte a cjase altris trê ponts. La cure di mister Oddo, che ae fin de partide al mostre di vê capît dulà che al è cuntun messaç che si siere cu lis peraulis «Fuarce Udin» , e somee fâur ben ai blancs e neris, che no cjapin goi e ju fasin, tal moment just e inte maniere juste.

L’Udin si presente ancje tal Stadi Friûl cul 3-5-2: Bizzarri in puarte, Danilo, Nuytinck e Larsen in difese, mediane a cinc cun Fofana, Barak, Jankto, Widmer e Adnan e cubie di atac formade di Lasagna e Maxi Lopez. Il Benevento al rive in Friûl dopo vê vuadagnât il so prin pont in campionât cun chê di provâ a fâ il bis e par chel al è la prime scuadre che e prove a tirâ in puarte (conclusion di Puscas dopo cuatri minûts). I blancs e neris no si scomponin e a cjatin daurman la strade dal gol cun Barak, che si zove di un cross di Jankto e di un erôr di Del Pinto, e si svicinin in curt al doi a zero, cuntune punizion di Alì Adnan che e ven tocjade de bariere e e va a finîle su la travierse.

I ospits a son avonde vivarôs e a sburtin cun D’Alessandro e cun Letizia par provâ a dreçâ la partide. L’Udin al è ecuilibrât e atent, sei te mediane che te tierce linie. Al passe il timp, il Benevento al rive a fâsi vîf des bandis di Bizzarri ancjemò cun Puskas, ma cence mudâ il risultât. Cussì prime de fin dal prin timp la scuadre furlane e rive a capitalizâ la sô cualitât plui alte rispiet a chê dai aversaris: prime Larsen al strace une biele ocasion e po Barak al libere a man çampe Lasagna che al controle e al tire un diagonâl precîs che al finìs te puarte di Brignoli.

Vie pal secont timp il Benevento al prove ancjemò a jessi pericolôs, ma i mancjin precision e decision. L’Udin al gjestìs il dopli vantaç, cu la jentrade in cjamp di Balic al puest di Fofana e po cun De Paul che i da il cambi a Maxi Lopez, e cun snait, cun costance e ancje cuntun tic di fortune al rive a jonzi il risultât di no cjapâ goi e di concuistâ une altre vitorie impuartante.

Crotone – Udinese 0-3

L’Udin al torne a vinci ancje in campionât. Dopo de goleade in cjase te partide di Cope Italie cul Perugia, la scuadre di balon furlane e zuie avonde ben ancje a Crotone e cussì e rive a segnâ trê goi e a puartâ a cjase trê ponts che a zovin ae classifiche e ancjemò di plui al cûr dai zuiadôrs e dai tifôs. Pal gnûf alenadôr, Massimo Oddo, e je la prime vitorie di simpri tal campionât di serie A, pai blancs e neris al è un segnâl positîf pal avignî.

In Calabrie l’Udin al mostre di vê cualitâts miôr rispiet ai aversaris, che prime dal incuintri si cjatavin a vê chei stes ponts in classifiche. I parons di cjase a partissin decîs e passade la mieze ore di zûc s fasin vîfs untune conclusion di Nalini neutralizade di Bizzarri, ma intan e va dilunc a palesâsi la superioritât tecniche de scuadre furlane, che tal imprin e jere stade pericolose daurman cun Barak.

Cun di plui si fâs viodi ancje cualchi zuiadôr che tes ultimis setemanis nol veve fat alc e ce, a tacâ di Jakub Jankto. Al è propit il cec a vierzi lis segnaduris pôcs minûts prime de polse, recuperant il balon parât di Cordaz suntun tîr di Lasagna, e a dâi un svolt definitîf ae ande de partide. E al è ancjemò lui a dopleâ il vantaç tai prins dîs minûts dal secont timp suntun sugjeriment di Maxi Lopez, che vie par dut il timp al è avonde dinamic e gjenerôs.

Il 3-5-2 dai blancs e neris al funzione sei in difese che in fase di impostazion e di atac. Al rive cussì il tierç gol, firmât di Lasagna, che al siere une combinazion imbastide di Perica e Barak, intant che ancje il ste atacant cravuat, che al à cjapât il puest di Maxi Lopez, al da il so contribût ae manovre.

Al è ancjemò timp par provâ a fâ alc, stant che il Crotone al mostre di no rivâ a jessi mai pardabon pericolôs, e cussì a provin a cirî il poker ancje De Paul, jentrât al puest di Lasagna, e Barak, ma i lôr tîrs a son fûr bersai.
Domenie che e ven, cuintri dal , l’Udin al varà di confermâ dut c che di bon al à fat îr.