Bretagne + Irlande + Sardegne + Svezie + Premio Ostana = Babêl Europe 11/3018

O sin ai 29 di Mai, al è martars e cheste e je la setemane juste par une gnove pontade di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence che al cjate spazi tal palinsest di Radio Onde Furlane.  La prime emission e je vuê a 11 a buinore in direte. Il program al tornarà tal etar, in repliche, ancje doman, miercus ai 30 a une dopo di misdì, e sabide ai 2 di Jugn a une e mieze.

La pontade numar 11 dal 2018 de trasmission e pontarà la sô atenzion su la atualitât, tra festivals, premis e altris events, di Folkest 2018 al Premio Ostana, e une part de scjalute e sarà dedicade aes conessions tra sport, identitât, lenghis e musichis.

E sarà la ocasion par scoltâ une cjançon dai sarts Askra dedicade all’innomenât zuiadôr di balon Gigi Riva e par fâ une altre cerce di Eyjafjalljökull, il disc gnûf dal rocker breton  Gweltaz Adeux. Simpri in Bretagne Babêl Europe e tirarà fûr dal so archivi ancje un toc dal repertori dai Daonet intant che il percors de trasmission al tocjarà ancje la Irlande, cu la vôs de cjantante Lasairfhíona Ní Chonaola, e la Svezie, cui Jord, band che e cjante par tornedalian.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di cheste setemane e vignarà archiviade su internet.

Udinese – Bologna 1-0

L’Udin al vinç a al reste in serie A. Chê che e je stade par sigûr une des stagjons piês de storie resinte de scuadre di balon furlane si siere inte maniere miôr cuntune vitorie juste e meretade, ae fin di une partide zuiade une vore miôr dal Bologna e cul gol decisîf segnât di un dai siei zuiadôrs che vie pal campionât a àn deludût di plui, Seko Fofana.

I blancs e neris a frontin l’ultin e decisîf incuintri dal campionât sùù pa jùù cun chê stesse formazion che e veve vinçût la setemane stade a Verone: Bizzarri in puarte, difese a cuatri cun Danilo e Nuytinck takl mieç e Samir e Larsen laterâi, linie mediane cun Fofana al puest di Berhami dongje di Halfredsson, Barak e Jankto e atac cun De Paul trecuartist in bande di Lasagna prime vere ponte.

I parons di cjase, denant di un Bologna flaput, a mostrin daurman di vê cussience di scugni scombati par puartâ a cjase ducj i trê ponts a disposizion e di jessi in stât di cjapâ sù il control de partide. La prime ocasionone e rive dopo 18 minûts, cuntun tîr di Larsen che al sbat su la travierse. L’Udin al è ordenât daûr, dinamic dilunc des corsiis laterâls cun Barak e Jankto, ecuilibrât tal mieç cun Hallfredsson e Fofana e avonde pericolôs in atac cun Lasagna e De Paul.

Al rive cussì, dopo mieze ore, il gol di Fofana, che al siere a bersai une combinazion imbastide di De Paul e Barak. Lis gnovis che a rivin di Napoli in cont dal svantaç dal Crotone a dan ancjemò plui fuarce al mudament positîf dal risultât. Doi minûts plui indenant Lasagna al segne ma Gavillucci nol convalide parcè che al è in fûr zûc e prime de polse l’arbitri al controle cu la Var un intervent di Dzemaili che al somee fal di man ma in realtât nol è cussì.

Tal secont timp la musiche e je sùù par jùù chê dal prin timp: l’Udin al zuie e il Bologna al clope e al patìs. Da Costa al à il so bon ce fâ cuntun pâr di paradis su conclusions di Lasagna e Barak. I ospits si fasin viodi indenant cuntun tîr alt di Verdi, i blancs e neris si svicinin ancjemò al secont gol cun De Paul che al cjape un pâl e prime de fin si fâs viodi ancje la scuadre di Donadoni cuntun pâr di tentatîfs di Falletti, che Bizzarri al ferme cence masse fastidis.

E podeve finî cun cualchi gol di plui pal Udin, ma ce che al è impuartant al è il risultât positîf ancje se dome cuntune segnadure.

Une stagjon che e je stade screade cuntun sproc smamît e stupit tant che “Daremo l’anima” e segnade di dosis esagjeradis di efiet Mer…Dacia Arena e de mancjance di anime e di cûr e podeve finî malonon. Par fortune no je lade cussì, però la gjonde pe salvece no pues scancelâ lis soferencis, i patiments e lis macacadis di chest campionât, in linie cun chei dai ultins agns e salacor ancjemò piês di chei. Pal 2018/2019 al coventarà fat alc di diferent. Pardabon.

Discs gnûfs de Ocitanie + Nur + Joana Gomila = Babêl Europe 10/2018

O sin ai 15 di Mai e cheste e je la setemane juste par une gnove pontade di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence che al cjate spazi tal palinsest di Radio Onde Furlane vuê, martars, a 11 a buinore in direte, e po in repliche ancje doman, miercus ai 18 a une dopo di misdì, e sabide ai 21 ancjemò a une e mieze.

La pontade numar 10 dal 2018 de trasmission e pontarà la sô atenzion in particolâr su la Ocitanie e su lis jessudis discografichis gnovis e gnovissimis che a rivin des tieris “d’òc”. Si podarà scoltâ une cerce di Soleu d’Argent, il gnûf ep dal grup dai Uèi, un altri toc di Big Sur, l’album gnûf dai Mauresca Fracas Dub, e une altre selezion di I ès? des Cocanha.

Il viaç di Babêl Europe al tocjarà ancje i Paîs Catalans – e plui in detai la Isule di Mallorca – cu la musiche di Joana Gomila e dal so grup e al rivarà fintremai in Sardegne là che si tornarà a scoltâ i Nur e la lôr version di chel che di cualchi setemane al è deventât in maniere uficiâl, daûr di une leç regjonâl fate buine ai 28 di Avrîl stâts.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di cheste setemane e vignarà archiviade su internet.

Hellas Verona – Udinese 0-1

Un gol, trê ponts e soredut une vitorie che e mancjave di sù par jù trê mês e mieç che e puarte une bocjade di aiar bon e che e rint la classifiche un tic mancul pericolose. L’Udin a Verone al fâs ce che al à di fâ e al concuiste l’unic risultât bon pussibil.

Cuintri di une scuadre flape e smamide, zaromai in serie B, i blancs e neris a partissin ben e tal zîr di vincj minûts a van in plui ocasions al tîr cun De Paul, Larsen e Lasagna e po a cjatin il gol cun Barak che al segne suntun cross di Jankto.

Tudor al mande in cjamp une scuadre là che il classic 3-5-2 al devente un 4-4-1-1 cun Lasagna ponte ugnule, cun De Paul trecuartist, cun Barak, Behrami, Halfredsson e Jankto in mediane e cun Danilo, Nuytinck, Larsen e Samir denant di Bizzarri in puarte. I parons di cjase a van daûr dal 4-3-3 cun Cerci, Lee e Fares in atac, ma a rivin a fâsi viodi indenant dome dopo mieze ore di zûc cuntun tîr fûr bersai di Souprayen e cuntune iniziative di Lee parade di Bizzarri.

Il prin timp si siere cul Udin che al va une vore dongje dal doi a zero, cuntune conclusion cul cjâf di Nyutinck, intant che la seconde frazion si vierç cui parons di cjase che a somein vê un altri pas.
Al va ben jessi za in serie B, lâ in confusion in difese e produsi pôc o nuie in atac, ma alc di plui il public dal Bentegodi sal merete e cussì l’Hellas al zuie miôr, ancje se nol rive a jessi avonde incisîf.

L’Udin si difint cun sintiment e cence pierdisi pai trois e al à ancje la pussibilitât di rinfuarcî il vantaç cun Larsen che al pronte une bale golose par De Paul, ma l’argjentin al tire in puarte inte maniere piês e la bale si piert lontan de puarte di Nicolas.

I parons di cjase a provin a dreçâ la partide, ma no rivin nancje dopo des sostituzions comandadis di Pecchia, ven a dî, vie pal secont timp, cun Danzi, cun Aarons e cul furlan Bearzotti che a cjapin il puest di Zuculini, Souprayen e Vukovic.

L’Udin al zuie in cuintripît e al imbastìs ancjemò cualchi ocasion che però ni Halfredsson, ni Jankto e nancje De Paul a rivin a sierâ inte manier miôr. Cundut achel la scuadre furlane e rive a mantignî il vantaç fintremai aes trê siviladis di Calvarese e cussì e comede la sô posizion in classifiche.

Domenie che e ven l’Udin al spiete in cjase il Bologna. La scuadre di balon furlane e varà di fâ il so dovê par garantîsi la salvece.

Sperìn che no si sinti e che no si viodi l’efiet Mer…Dacia Arena. Za sintî e lei dapardut che a Verone si à zuiât “il derby del triveneto” al da avonde fastidi…

Udinese – Inter 0-4

L’Inter al resurìs e l’Udin al sbrisse jù te part plui basse de classifiche, intune posizion parsdabon grivie. Tal stadi Friûl si sint e si viôt ancjemò une volte l’efiet Mer…Dacia Arena. Ancjemò une volte i blancs e neris a mostrin di no vê morbin, di no vê cjâf e di no vê avonde gjambis o àn morbin.

Se si gjavin un pâr di iniziativis di Lasagna, in atac la scuadre furlane no si viôt, intant che daûr Bizzarri al à il so bon lavôr e Danilo al fâs doi salvaments, ma masse dispès il strapodê interist si zove des busis e des disatenzions de tierce linie blancje e nere.

Par cuasit dut il secont timp la scuadre furlane e zuie in dîs, par efiet de espulsion di Fofana, ma trê dai cuatri goi che a marchin il risultât finâl l’Udin ju cjape vie pe prime frazion, che si vierç cul Inter in plene e l’Udin daurman clopadiç.

I ospits si svicin al gol cun Perisic e cun Cancelo, ma Danilo prime e Bizzarri dopo ur disin di no, e a segnin l’un a zero dentri dal prin cuart di ore di zûc cun Ranocchia. L’Udin al è un câs par “chi l’ha visto?” almancul par mieze ore, cuant che si viôt des bandis di Handanovic cun Berhami e cun Lasagna. Su la seconde comnclusion di Kevin il puartîr interist al rive a meti un blec cul pît e il pericul parât vie al devente une gnove svearine pe scuadre di Spalletti che e siere il prin timp cun doi goi, a firme di Rafinha e di Icardi.

Dopo de polse la musiche no cambie alc e ce. La espulsion di Fofana e see lis gjambis in maniere definitive ai blancs e neris, che a restin in inferioritât numeriche. L’Inter al fâs zirâ la bale cun calme e cun personalitât e ogni tant e torne a fâsi viodi des bandis di Bizzarri, al segne il cuart gol cun Borja Valero e al cjape une travierse cun Karamoh.

La prossime partide dal Udin e sarà a Verone. O si zuie e si fasin ponts, o ben… o sin dal gjat.