Lazio – Udinese 1-3

Vitorie biele e buine dal Udin, che cu la Lazio al zuie cun snait e cun sintiment. I blancs e neris si presentin a Rome cun diviersis assencis e duncje cun cetantis novitâts, tacant dal fat che in bancjine nol è Gotti. Musso al è tra i pâi, Becao, Nuytinck e Samir a son i trê de difese, in mediane si cjatin Larsen, Arslan, Pereyra, Di Paul e Zeegelaar e in atac e je la cubie argjentine Pussetto-Forestieri.

Il prin atac al è dai parons di cjase, cun Correa che si presente denant di Musso e al tire çamp, ma il puartîr blanc e neri le pare cuntun pît. Pe Lazio al è il principi de fin, stant che par dut il prin timp no si fasarà plui viodi des bandis de puarte blancje e nere, fale che cuntune conclusion di Cataldi parade di Musso cence fastidis.

L’Udin al cjape il control di dutis lis operazions. La scuadre furlane e je atente e cuvierte in difese e dinamiche e produtive tal centricjamp e in atac. E vuadagne un pâr di corners e e prove la conclusion cun Nuytinck e cun De Paul, cence però dâi di lavorâ a Strakosha, che impen al ven clamât in cause dopo passât il prin cuart di ore di zûc, cuant che Arslan, su assist di Pereyram al tire benon di fûr e al ingjane il puartîr celest, judât in chest ancje di une deviazion involontarie di Acerbi.

L’Udin no si contente dal gol fat e al va dilunc a zuiâ al atac. De Paul al fâs di sugjeridôr, su corner, su punizion o cu la bale in moviment, par Samir, che su la sô strade al cjate Strakosha che al tocje la bale e la mande dilà de travierse, par Forestieri, che cul cjâf al mancje il bersai di pôc, e po par Pussetto, che prime cul cjâf nol cjate il spieli de puarte e po, intal recupar, al siere une azion di cuintripît e al impire Strakosha.

Sot di doi goi, la Lazio e scomence il secont timp al atac, cun chê di dreçâ la partide. I tentatîfs di Leiva e di Correa no crein problemis ai blancs e neris, che a van dilunc a difindisi in maniere ordenade e a meti adun azions in verticâl disfrutant lis corsiis laterâls. Cioffi, in bancjine tal puest di Gotti, al mande in cjamp Jajalo e Molina e al clame fûr Arslan e Zeegelaar.

Immobile al è protagonist di un pâr di conclusion, che a vegnin paradis di Musso. La pussibilitât pe Lazio di ridusi il disvantaç si sfante e impen al rive il tierç gol di Forestieri. La reazion de Lazio e à ancjemò tant che protagonist Immobile, che al vuadagne un rigôr, par un fal in jessude di Musso, lu tire e lu segne.

L’Udin no si scompon e al ten bot daûr, ancje parcè che la Lazio no rive a produsi alc e ce, dome une conclusion debile di Caceido che e ven parade cence problemis di Musso. Il timp al passe e dopo cuatri minûts di recupar Aureliano al sivile la fin. L’Udin al puarte a cjase altris trê ponts e une vitorie biele, buine e meretade.

Pescara – Pordenone 0-2

Il Pordenon al torne in trasfierte e al torne a vinci. Juste un mês dopo de vitorie cuintri dal Ascoli i neris e verts a zuin a Pescara e a vincin cun fuarce e cun snait cuintri dai parons di cjase, segnant un gol par timp.

La scuadre furlane e scomence cul pas just. I undis di Tesser si difindini cun sintiment e a imbastissin azions ofensivis cun continuitât, fasint funzionâ ben il lôr 4-3-1-2. Il Pescara al à une dibisugne mostre di pont e al cîr di tignî bot e di provâ a fâ valê la sô supremazie teritoriâl. Dopo vincjecinc minûts di zûc al rive il gol di Diaw, che dilunc di dute la partide al è il terminâl principâl des zuiadis dai sborfs.

Il gol sul imprin al see lis gjambis al Pescara che po al prove a reagjî. Il vantaç al rinfuartìs il Pordenon, che no si scompon denant dai tentatîfs di rimonte dai parons di cjase e al va dilunc a cirî il secont gol.

Sierât il print timp in vantaç, i neris e verts a incressin il vantaç inte seconde frazion cun Berra. Pal Pescara la situazion si fâs ancjemò plui grivie e penze, ancje par vie de espulsion di Fernandes. Cundut achel, i parons di cjase i dan un pôc di lavôr a Perisan, che però nol à fastidis a intervignî tes cinc ocasions che al covente: ae sô maniere al segne un gol ancje lui, ancje se no si viôt tal tabelin de partide, e la partide si siere cui trê ponts a disposizion che a van tes sachetis de scuadre furlane.

Il Pescara al scuen contentâsi dome dal fat di vê tignût di plui la bale e di jessi stât plui precîs intai passaçs. Masse pôc.
Il Pordenon, impen, al gjolt par vê tornât a vinci, cu la sperance e cul intindiment di rivâ a fâ compagn ancje a Lignan.

Cope Italie, l’Udin al piert tai timps suplementârs cuintri de Fiorentina

Il percors dal Udin in Cope Italie si ferme ae cuarte stazion (che in concret e je la seconde). Ae fin e vinç la Fiorentina, che e cjate il gol tal secont timp suplementâr dopo 112 minûts di zûc, cun Montiel, mandât in cjamp di Prandelli tal puest di Caceres pôcs minûts prime, che al romp chê ande che e somee indreçâ la partide viers dai rigôrs.

Cui che al vinç tal Stadi Friûl al va indenant, cui che al piert al va fûr. Al è par chel che lis dôs scuadris a metin dongje plui atenzion daûr che fuarce e incisivitât indenant. Gotti al sielç di tornâ a provâ il 4-3-3, cun Deulofeu in cjamp fint dal principi e cun chê di jonzi un altri bon risultât dopo de vitorie in campionât cul Genoa, Prandelli al presente une scuadre cence Ribery e Bonaventura e il so intindiment al è chel di cambiâ musiche dopo de sconfite patide cul Benevento.

Il prin timp al è avonde smamît. Lis unichis emozions a son un biel cuintripît lescjât di Borja Valero e concludût di Amrabat cuntun tîr fûr di buine posizion e une buine ocasion par Vlahovic, che nol rive a profitâ ad in plen di une bale zuiade mâl dai difensôrs blancs e neris.

Il secont timp si vierç cuntune biele azion di Forestieri, che al impegne Terracciano. Lis scuadris si slungjin, a son plui spazis e si zuie di plui. Il ritmi al reste avonde cuiet, cundut che l’Udin al fasi valê la sô supremazie teritoriâl.

Lis ocasions di gol e lis emozions a son ancjemò pocjis, Gotti al mande in cjamp Jajalo tal puest di Pereyra, suntun lanç di Pulgar Milenkovic cul cjâf al impegne Musso, che al fâs il so, e si rive fintremai al cuint minût di recupar cence goi.

Tai suplementârs la cjançon e reste sù par jù chê stesse, i doi puartîrs a àn pôc ce fâ e il timp al passe. Tal secont timp suplementâr Prandelli al zuie la cjarte Montiel e i va drete, stant che il zovin maiorchin al segne un biel gol su assist di Cutrone.

L’Udin al prove a reagjî ma il timp al è masse pôc e nol rive a impirâ Terracciano. Cussì la Fiorentina e vuadagne il passepuart pal turni seguitîf e l’Udin al scuen molâ ancje par chest an la Cope Italie.

Loris Vescovo + Mike Peters + The Alarm + Gruppo Rubanu + Peppa Marriti Band + Mans De Breish = Babêl Europe 24/2020

Tiere, lavôr, dirits e libertât. Al podarès jessi chest il titul specific de gnove pontade di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât.

Par cheste setemane – vuê a 11 a matine in direte e po in repliche tal dopo di misdì di doman, miercus ai 25 di Novembar a une, e in chel di sabide ai 28 a une e mieze – la trasmission e cjape ispirazion dal fat che vinars ai 27 si fasarà une cunvigne sui setante agns des Lotis dal Cormôr.

E sarà la ocasion par fâ un viaç jenfri storie e atualitât, tra Friûl, Ocitanie, Gales, Sardegne e Arberie. Si scoltarà une gnove cjançon di Loris Vescovo, une anticipazion de racuelte di tocs e di tescj che a fasin riferiment propit al siopar par ledrôs inte Basse Furlane tal 1950, e si ricuardaran i siopars dai minadôrs dal Gales (tra il 1984 e il 1985) e de Ocitanie (tra il 1961 e il 1962) e la lote di Pratobello in Sardegne tal 1969 cu la musiche di Mike Peters e The Alarm, di Mans De Breish e dal Gruppo Rubanu, intant che in continuitât cul consei di leture fat inte pontade passade di Babêl Europe al sarà spazi ancje par une cerce dal repertori de Peppa Marriti Band.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu). Dopo des sôs trê emissions vie pe setemane, ancje cheste gnove pontade si pues tornâ a scoltâle in rêt su Spreaker e su Spotify.

Udinese – Genoa 1-0

Un gol fat, une travierse, cualche altre buine ocasion metude adun, nissun gol cjapât e trê ponts che a valin aur puartâts a cjase. L’Udin al siere la partide cul Genoa inte maniere miôr o ben inte uniche maniere pussibile par cjapâ une bocjade di aiar bon, par slontanâsi almancul un tic de zone piês de classifiche e par lâ dilunc cun snait e cun fuarce.

L’Udin si presente cun Musso in puarte, cun Becao, Nuytinck e Samir in difese, cun Stryger Larsen, De Paul, Arslan, Pereyra e Zeegelaar in mediane e cu la cubie di atac Pussetto-Okaka. Ancje il Genoa al zuie cul 3-5-2, ma al scuen fâ di mancul di Rovella.

Lis dôs scuadris a àn une dibisugne mostre di fâ ponts e soredut di no cjapâ goi. La partide tal imprin e je segnade dal ecuilibri esoredut de pôre, cundut achel l’Udin al cîr di fâ valê la sô supremazie teritoriâl, cun De Paul diretôr di orchestre e cun Pussetto e Okaka che a cirin di vê spazi par lôr e par chei altris blancs e neris.

Lis ocasions di gol a son scjarsis e lis difesis a lavorin ben di dutis dôs lis bandis. L’Udin al fâs par sigûr alc di plui, tacant des conclusions cul cjâf fûr bersai di Samir e di Pussetto, intant che il Genoa al prove a dâi di lavorâ a Musso cuntun pâr di tentatîfs che a finissin fûr e cuntune azion inviade di un corner.

Il svolt al rive dopo passade la prime mieze ore di zûc, cun De Paul, che prime al tire masse adalt e doi minûts plui tart al siere une azion inviade di Zeegelaar e disvilupade di Okaka e di Pereyra cuntun tîr che al impire cence pietât Perin. Il Genoa al prove a reagjî cun Pellegrini che al sburte su la corsie di çampe e al fâs un biel cross par Bani, ma nol rive a cumbinâ alc e ce.

Il secont timp si vierç sù par jù compagn de prime frazion: l’Udin al cîr di fâ la partide e il Genoa al reste in spiete, cirint di no vê ancjemò fastidis e di provâ a gafâ la ocasion buine par recuperâ, cu la energjie gnove di Zajc, che al cjape il puest di Pandev, e ancjemò cun Pellegrini che al fâs di sugjeridôr e al prove ancje a tirâ in puarte.

Cul passâ dal timp, il ritmi al cres e cun chel a cressin ancje lis emozions. Gotti al clame fûr Arslan e Pussetto e al met dentri Mandragora e Lasagna, intant che Maran al mande a scombati ancje Destro tal puest di Masiello, cun chê di incressi la pression ofensive.

I ospits a provin a fâ alc ancjemò cun Pellegrini e cun Scamacca, ma cence risultâts. Di chê altre bande la scuadre di balon furlane prime e impegne Perin cun Mandragora e cun Lasagna e plui tart si svicine al doi a zero, cun De Paul che su punizion al cjape la travierse.

Passât il novantesim, i minûts di recupar a son siet e al sucêt un pôc di dut. A un ciert pont Musso al fâs une paradone suntun tîr di Bani e sul proseguiment de azion Scamacca le bute dentri ma Clavarese al controle il Var e no a dubis: al jere in fûr zûc e par chel nol è gol. Ae fin Perin al fâs ancje une fal brut su Strygen Larsen e al ven butât fûr cul cartelin ros.

Pordenone – Monza 1-1

Un gol dopo nancje vincj seconts, un prin timp dominât e un secont timp ecuilibrât no son avonde pal Pordenon par puartâ a cjase ducj i trê ponts a disposizion. Ancje cul Monza i sborfs no rivin a lâ plui innà de pate. A Lignan i neris e verts a zuin une buine partide ma a stracin cualchi ocasion di masse e soredut si cjatin denant un Lamanna che, dopo cjapât il gol in vierzidure, al pare dut ce che al è di parâ.

Tesser al mande in cjamp une scuadre ben struturade: un 4-3-1-2, cun Ciurria daûr de cubie di atac Diaw-Musiolik. Propit la ponte polache e siere cuntun gol la prime manovre puartade indenant cul so compagn di repart, che i da une bale golose tal mieç de aree, che lui al controle e al bute dentri cence fastidis.

Plui indenant Diaw si svicine al secont gol, ma il so diagonâl al va fûr bersai, intant che i tîrs tal spieli de puarte, ancje chei plui insidiôs, tacant di une conclusion di Musiolik, a cjatin Lamanna che i met un blec. Passade la prime mieze ore di zûc al à il so bon ce fâ ancje Perisan suntune iniziative di Maric e suntun tîr di Gytkjaer. In chê stesse azion, dopo dal intervent dal puartîr neri e vert, al è ancje un tîr cul cjâf di Boateng che al tocje l’esterni de rêt. Prime de polse a son ancjemò dôs ocasiononis par Ciurria, che al cjate su la sô strade un Lamanna atent e puntuâl, e un tentatîf di D’Errico neutralizât di Perisan.

Il secont timp al viôt ancjemò, sul imprin, il Pordenon che al va al atac ma nol rive a impirâ Lamanna. Il Monza, sghindât il pericul, al imbastìs daurman une biele combinazion: cross di Carlos Augusto, disledrosade di Gytkjaer e tîr cul cjâf di Maric, che al è il plui svelt di ducj forsit ancje par vie che si cjate in fûr zûc.

Par Di Martino al è dut regolâr e il gol fat ur da fuarce ai ospits, che a alcin la linie dal lôr zûc e a provin a ribaltâ l’incuintri, ma lis conclusions di D’Errico, Gytkjaer e Mota Carvalho a son fûr bersai. Tesser al zuie la cjarte Butic, che al cjape il puest di Musiolik, e juste tal ultin i sborfs a lenzin il sorpàs cu la zirade di cjâf di Diaw su corner di Calò. La bale passe plui indalt de travierse e cussì il Pordenon al scuen contentâsi de seste pate su vot partidis.

Lou Dalfin (in anteprime) + Kenze Neke + Eina + Mitili FLK + Vanilla Resident = Babêl Europe 23/2020

Une cerce in anteprime di une gnove produzion, sugjestions che a rivin dal lunari e si stramudin in musiche, tra storie, atualitât e storiis di disertôrs, di anarchics e rivoluzions e fintremai un consei di leture. Al è ce che e propon la gnove pontade di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât.

La anteprime e je chê di une gnove cjançon dai Lou Dalfin, che in curt e vignarà compagnade ancje di un video. La cjançon si clame L’Ostal de Bart e al è un omaç a Bartolomeo Vanzetti, anarchic nassût a Villafalletto, un paîs che si cjate des bandis di Cuneo e avonde dongje des Valadas Occitanas, di dulà che e rive il grup vuidât dal polistrumentis Sergio Berardo.

La storie di Sacco e Vanzetti, i doi anarchics talians incusâts in maniere injuste di omicidi e copâts in Massachussets su la cjadree eletriche ai 23 di Avost dal 1927, si incrose cun chê dal anarchic sart Michele Schirru, ancje lui emigrant in Americhe e ancje lui condanât a muart, ma a Rome tal 1931 par vie dal so progjet di copâ Mussolini, che al ven ricuardât in musiche dai Kenze Neke.

La musiche – chê dai Mitili FLK e dai Vanilla Resident che a recuperin un classic dal Povolâr Ensemble – e permet ancje di ricuardâ, in maniere furlane e babeliche, ancje la date dai 4 di Novembar. Cui catalans Eina si memorearà la Rivoluzion di Otubar in Russie (ai 7 di Novembar dal 1917) , intant che si fevelarà ancje dai vincjevot agns de adozion de Cjarte Europeane des Lenghis_Regjonâls o Minoritariis dal Consei de Europe e, lant indaûr tal timp fintremai ai 8 di Novembar dal 1366, si memorearà l’inovâl des Constituziones de Patrie dal Friûl.

Si fasarà ancje un scjampon in librarie, par dâi un cuc al libri di Tiziana Barillà, Quelli che Spezzano. Gli arbereshe fra municipalismo libertario e anarchia.

La gnove pontade di Babêl Europe si pues scoltâle vuê, martars ai 10 di Novembar, a undis a buinore, doman, miercus ai 11, a une dopo di misdì, e po sabide ai 14, a une e mieze dopo di misdì. Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), la stesse trasmission e sarà a disposizion in rêt, su Spreaker e su Spotify.

Pordenone – Chievo 1-1

Un gol par om e un pont par om. Il Pordenon al spude balins e al scombat e juste intai minûts di recupar al rive a segnâ e cjapâ un pont cuintri dal Chievo, che si presente a Lignan cun chê di puartâ a cjase la cuinte vitorie consecutive e il primât solitari in classifiche.

I neris e verts a àn l’intindiment di lâ dilunc cu la serie positive inviade cu la pate cuintri de Reggina e cu la vitorie esterne de setemanee stade cul Ascoli.
I veronês a mostrin sù par jù chê stesse muse de partide passade, un 4-4-2 cu la cubie di atac Djordjević-Fabbro, cui laterâi Garritano e Civiretti e cun Palmiero tal mieç dal cjamp, però dongje di lui nol è Obi, fûr par un signestri, ma Viviani, che al torne dopo de scualifiche. Tesser al conferme il 4-3-1-2, cun Ciurria daûr des pontis Butić e Diaw.

Par sigûr un dai protagoniscj de zornade al è Perisan. Il puartîr dai sborfs si met in evidence dopo un cuart di ore di zûc, prime parant un tîr di Viviani e po fermant une conclusion di Gigliotti, in zone gol sui disvilups di un corner. Perisan al fâs un miracul plui tart suntun tîr di Djordjević che si cjate denant de puarte. Di chê altre bande i siei compagns no rivin a dâi di lavorâ a Semper e la uniche note di cronache pal atac dal Pordenon e je chê de proteste pe mancjade concession di un penalty par un contat inte aree di rigôr clivense tra Renzetti e Butić.

Il secont timp si vierç cul Pordenon plui decîs in atac e a rivin dôs ocasions pe scuadre furlane, cun Diaw e po cun Magnino, che però a cjatin su la lôr strade Semper tal puest just tal moment just. Pierdude la dople ocasion di passâ in vantaç, i neris e verts pôcs minûts plui tart si cjatin a recuperâ la bale inte puarte di Perisan: assist di Garritano e pinelade di Fabbro sul secont pâl.

I parons di cjase sul imprin a patissin il colp e il Chievo al vuadagne fuarce e determinazion e si svicinin al secont gol. Djordjević al cjape la travierse e no mancjin altris tentatîfs neutralizâts cun sigurece di Perisan.
I neris e verts a tegnin bot daûr e in atac a recuperin cjamp e energjie par provâ in dutis lis manieris a cirî la pate. A fuarce di bati a jonzin il risultât tal secont minût di recupar cun Musiolik, jentrât vie pal secont timp tal puest di Butić, che, cuntun precîs diagonâl, al impire la puarte aversarie.
E al è un a un.

Sassuolo – Udinese 0-0

Alc al è alc. Cuintri dal Sassuolo l’Udin nol segne, nol cjape goi, nol piert e al puarte a cjase un pontut. I blancs e neris a Reggio Emilia a tornin al classic scheme 3-5-2: Musso tra i pâi, linie difensive cun Becao, Nuytinck e Samir, mediane cun Stryger Larsen, De Paul, Arslan, Pereyra e Zeegelaar e prime linie cun Pussetto e Okaka. L’intindiment al è clâr: fâ sùù bariduris fuartis denant di Musso e cirî di colpî in cuintripît, cun chê di rivâ a no vê masse fastidis denant di chê che in chest moment e je la seconde in classifiche. Il Sassuolo al volarès provâ a fâ rindi la sô supremazie tecniche, tatiche e teritoriâl par passâ denant dal Milan e cjapâ il prin puest in graduatorie, al manten il possès de bale ma il so zûc al è sterp e al sbat cuintri de muraie blancje e nere.

Cheste ande si palese bielzà tal imprin de partide. Di une bande al è un cross di Zeegelaar che al ven blocât di Consigli, di chê altre, un cuart di ore plui tart, e rive la prime conclusion dai parons di cjase, un tîr cul cjâf fûr bersai di Ferrari su cross di Berardi, intant che Pussetto e Nuytinck a cjapin un cartelin zâl par om. Plui tart Consigli al interven ancjemò suntun cross che al rive di Stryger Larsen e Musso nol à nuie ce fâ parcè che ai atacants de formazion emiliane no ur rivin balons di zuiâ.

I minûts a passin e prime de polse al è timp par une punizion di De Paul che e cjate il cjâf imprecîs di Pussetto, par une conclusion di Berardi di lontan che no i da nissune preocupazion a Musso e par un altri tîr fûr dal spieli de puarte di Ferrari. Dopo di un prin timp cence grandis emozions, la seconde frazion e somee plui vivarose par vie che si vierç cuntune buine combinazion De Paul-Pussetto-Okaka neutralizade de difese dal Sassuolo e po cuntun atac di Muldur e Caputo che al ven fermât di Becao. In realtât nol sucêt nuie di particolâr: l’Udin si difint e il Sassuolo nol rive a cjatâ un troi par lâ indenant.

La strategjie difensive dal Udin e funzione di plui di chê ofensive di De Zerbi, lis speris dal orloi a zirin e al è pardabon pôc ce notâsi tal cuader: une punizion di Lopez e une di De Paul, dutis dôs cence sucès, e nuie plui. Al è avonde, pal Udin, par rivâ ae prime pate dal campionât e duncje par vuadagnâ un pont. Alc al è alc…

Udinese – Milan 1-2

E podeve jessi une buine pate, ma ae fin e je une sconfite, che e impeole ancjemò di plui la scuadre blancje e nere. La partide tra Udin e Milan si siere inte maniere miôr pai ros e neris, che si confermin tal prin puest in classifiche, e in chê piês pe scuadre furlane, che e sbrisse ancjemò plui injù inte graduatorie.

Pal incuintri cul Milan tal Stadi Friûl Gotti al torne a vê a disposizion Musso in puarte e al pronte une scuadre cun chê stesse fisionimie tatiche de partide di Cope Italie cuintri dal Vicenza: un 4-3-3 cun Stryger Larsen, Becao, Di Mai e Samir in difese, De Paul, Arslan, Pereyra in mediane Pussetto, Okaka, Deulofeu in atac, che inte fase difensive si stramude intun 4-5-1. Pioli, di chê altre bande, al recupare Donnarumma e ducj chei altris che a jerin stâts lassâts fûr inte partide di Europa League: Hernandez, Kessie, Saelemaekers, Calhanoglu e Leao.

I blancs e neris a mostrin di no vê pôre dai milaniscj, ju spietin e a rispuindin in cuintripît. Lis primis conclusions a son dal Udin – un tîr di Deulofeu parât di Donnarumma e doi tentatîfs fûr bersai di Arslan e di Samir – ancje se il Milan al mostre di vê alc di plui e al rive a fâlu rindi cuntune azion corâl che si siere cuntun assit di Ibrahimovic par Kessie che al segne.

Fat il gol, i ospits a provin ancjemò a atacâ, intan che l’Udin al stente tal imbastî chê reazion che e covente e ancje cuant che al rive a fâlu i mancje ancjemò alc, par esempli cuant che Delofeu nol rive a meti tal mieç par Okaka. Tra tentatîfs falîts di une bande e di chê altre e un pâr di paradis di Musso il prin timp si siere cul Milan in vantaç.

Il secont timp si vierç cence mudaments te formazion di Gotti, che tal zîr di un pâr di minût e vuadagne un penalty par un fal di Romagnoli su Pussetto: dal discut al tire De Paul e al segne. Il gol fat al segne la paritât e i da fuarce e cûr al Udin, che nol mole, si difint cun sintiment e al sburte doprant lis corsiis estermis.

Il Milan al cîr di controlâ la partide, al met dongje cualchi iniziative ofensive, ma cence risultâts. Al fâs sù pa jù compagn ancje l’Udin, là che cul passâ dal timp a jentrin in cjamp Makengo par Arslan, Lasagna par Okaka, Owejean par Deulofeu. Forestieri par Pereyra e Bonifazi par Larsen.
La gare e somee inviade inte direzion di une pate che in tiermins simbolic e concrets e va ben pai parons di cjase e che e somee jessi il risultât plui just, ma nol è cussì stant che Ibrahimovic al met la sô çate e al impire Musso: sietim gol in campionât e firme di Zlatan par une vitorie che e rinfuartìs la prime posizion in classifiche de scuadre di Pioli.