Pordenone – Cremonese 1-0

bandieris-friuul

Il Pordenon al torne in Friûl e tal Stadi Friûl, vistût di fieste pai neris e verts, al torne a vinci dopo dai cuatri patafons cjapâts a Sant Stiefin cuintri de Salernitana.

A Udin la formazion vuidade di Attilio Tesser e torne a mostrâ la sô muse biele, concrete e salacor ancje ciniche e fortunade. La Cremonese e ten di plui la bale e si fâs vive in plui ocasions des bandis de puarte di Di Gregorio, ma ae fin il risultât al è bon dome pe scuadre di balon furlane.

E je determinante, in chest sens, la canonade tirade di Ciurra juste dopo dîs minûts di zûc che e finìs inte puarte di Agazzi. Impuartantons ancje i intervents di Di Gregorio e il sintiment e l’ordin che i sborfs a àn intal difindisi dai atacs dai aversaris.

Vie pal prin timp la Cremonese e masane zûc e e imbastìs ancje azions di gol, ma e cjate simpri o il puartîr neri e vert o ben i siei compagns de tierce linie, che a sierin ducj i trois e a fasin ripartî il cuintripît in direzion di Ciurra e di Strizzolo.

Intal secont timp lis scuadris si slungjin. La Cremonese e prove a tacâ ancjemò cun plui grinte, ma ae fin Di Gregorio nol à nancje masse lavôr ce fâ.
Il Pordenon al prove a incressi il vantaç in velocitât e dilunc des liniis verticâls e arivin cussì lis conclusions di Gavazzi (che però probabilmentri al varès fat miôr a dâi la bale a Ciurra di bessôl denant de puarte) e di Mazzocco. Nol rive a segnâ il secont, ma al rive a tignî bot denant dai atacs dai ospits fintremai intal ultin cuant che Di Gregorio al siere la puarte suntun tentatîf di Terranova.

La vitorie e conferme la seconde posizion in graduatorie dal Pordenon e e je une biele ocasion di fieste par chei sietmil di lôr che pe ultime partide dal 2019 si son dâts dongje li dal Stadi Friûl par gjoldi ancjemò de promozion de stagjon passade e magari ancje par insumiâsi une altre promozionae fin di chest campionât.

Salernitana – Pordenone 4-0

I cuatri patafons di Sant Stiefin. La Salernitana e mande indaûr su la tiere il Pordenon spaziâl. A Salerno la scuadre di balon furlane impegnade intal campionât di serie B e patìs la superioritât teritoriâl de formazion vuidade di Ventura.

I parons di cjase, daurman in vantaç cuntun tîr di Djuric, si svicin al secont gol cuntun pâl di Kiyine e cuntune travierse di Djuric.

La reazion dai neris e verts no prodûs alc e ce e dopo de polse la Salernitana e à la pussibilitât di dopleâ il vantaç ancjemò cun Djuric che dal limit al fâs partî un diagonâl che nol lasse redenzie a Di Gregorio.
La scuadre di Tesser e à di vê mangjât masse tra la Vilie e Nadâl. No à il so solit morbin e cussì la Salernitana e va dilunc a atacâ e i permet ancje a Kiyine di segnâ dôs voltis prime des trê siviladis finâls.

E che al sedi in pâs chest Nadâl che al ven

Bon Nadâl e bon an
Vesel Božič in srečno novo leto
Ein frohes Weinachtfest und ein glückliches Neues Jahr
Buon Natale e felice anno nuovo
Bonas pascas de Nadale e prosperu annu nou
Pulit Nadal e bona anada
Bon Tsalendre e Treinadan
Joyeux Noël et bonne année
Zorionak eta Urte Berri On!
Nedeleg laouen na bloavezh mat
Bon Nadal i un Bon Any Nou!
Nadelik looan na looan blethen noweth
Pace è salute
Noflike Krystdagen en in protte Lok en Seine yn it Nije Jier
Nadolig Llawen
Bon Nadel y Bon Ann Nuef
Nollick ghennal as blein vie noa
Bachtalo krecunu Thaj Bachtalo Nevo Bers
Buorrit Juovllat
Nollaig chridheil huibh

Pordenone – Ascoli 2-1

bandieris-friuul

Il Pordenon al va dilunc a vinci e si conferme tal secont puest inte classifiche dal campionât di Serie B. Dopo dal sucès esterni cuintri dal Cosenza la scuadre nere e verde e torne in Friûl, e fronte l’Ascoli e e met vie altris trê ponts, ae fin di une altre partide zuiade cun cûr e cun sintiment.

La prime ocasion e je dai ospits, che cuntun tîr cul cjâf di Brosco a oblein Di Gregorio a screâ la partide cuntun salvament. La scuadre di Tesser, che si presente cun Vogliacco, Barison, Bassoli e De Agostini in difese, cun Zammarini, Burrai e Pobega in mediane e cul fantasist Chiaretti daûr dal tandem di atac Strizzolo-Ciurria, i lasse la iniziative al Ascoli, ma lu ten di voli cul efiet che la manovre dai blancs e neris no rive a produsi alc e ce.

Tal framieç la scuadre dal Friûl ocidentâl e mostre di podê jessi pericolose cuntune iniziative di Zammarini che e ven fermade di Brosco e po, passade la prime mieze ore di zûc, e disbloche il risultât cuntune magjie di Burrai, che il so tîr a zîr dal limit al va a finîle juste sot de crosere dai pâi ae diestre di Leali. Cuatri minûts plui tart il Pordenon al torne a segnâ: Ciurria al va in profonditât e al crosse tal mieç par Strizzolo che cul cjâf al firme il doi a zero.

Intal secont timp i ospits a incressin i zîrs dal lôr motôr cun chê di dreçâ la partide. Il Pordenon no si scompon masse. Sul imprin Brlek le bute dentri, ma al è in fûr zûc e il so gol nol è bon. Plui indenant Di Gregorio nol à masse ce fâ, intant che Burrai al va avonde dongje de tierce segnadure cuntune biele punizion che si sfante pôc plui indalt de travierse.

L’Ascoli al rive a segnâ dome tal ultin minût dal timp regolamentâr: Da Cruz al invente e Cavion al fâs gol. Al è masse tart, ancje se intal lunc recupar i ospits a sburtin ancjemò. Il Pordenon si difint cun sintiment, al manten il vantaç e cussì al segne une altre vitorie tal so cuader dal campionât.

Udinese – Cagliari 2-1

bandieris-friuul

L’Udin al torne a vinci in campionât dopo un mês e mieç, trê patis e dôs sconfitis. Cuintri dal Cagliari, che in Friûl al piert pe prime volte in trasfierte, i blancs e neris a zuin, a scombatin e a concuistin chei ponts fondamentâi in cheste fase dal campionât par slontanâsi de zone plui basse e plui pericolose de classifiche.

La scuadre di balon furlane e fronte l’incuintri cuntun classic 3-5-2, là che denant di Musso a son De Maio, Ekong e Nuytinck, tal centricjamp si cjatin Mandragora tal mieç, Fofana a man çampe e De Paul a man drete, i esternis a son Sema a çampe e Larsen a diestre e in atac a son Okaka e Lasagna. Il Cagliari di mister Maran si presente cuntune struture “a arbul di Nadâl”, cun Simeone prime ponte e cun Nainggolan e João Pedro daûr di lui.

L’Udin al partìs cul pît just, cence vê pôre de cualitât e de fuarce dai aversaris. I blancs neris a masanin zûc e a cirin di neutralizâ i terminâi fondamentâi dal zûc de scuadre sarde cuntune marcjadure atente su Nainngolan e su Cigarini. La prime vere ocasion e je propit de formazion furlane, cuntun tîr cul cjâf fûr bersai di Ekong.
Sema al sburte ben dilunc de corsie di çampe e ancje Fofana e De Paul a somein in zornade buine.

La partide e je plasevule e divertente ancje se almancul par vincj minûts no son altris tîrs in puarte, ni di une bande e nancje di chê altre. Il Cagliari al prove cu lis iniziativis individuâls di Rog e di Nainngolan, che al rive a diliberâsi e al tire in puarte, ma la sô conclusion e cjape la base dal pâl. Rafael al viôt dispès rivâ maiis blancjis e neris des sôs bandis, ma nol à masse ce fâ. La sô trancuilitât e ven crevade pôcs minûts plui tart di De Paul, che si zove di une bale che i ven dade di Fofana par prontâ une pinelade che e scjavalgje il puartîr de scuadre sarde e cussì e va a finîle tal sac.

Sierât il prin timp ancjemò cuntun tentatîf di Okaka, fûr bersai, la seconde frazion si vierç cul Udin che al spiete la iniziative dal Cagliari e intant al mande in zone gol Okaka, Lasagna e Sema cu lis lôr azions personâls e po Nuytinck cuntun tîr cul cjâf suntune punizion di De Paul e Mandragora a sierâ une zuiade coletive.

I ospits a provin a svicinâsi ae paritât cuntune punizion di Cigarini, che e ven parade di Musso, e cuntune altre manovre che no cjate conclusion. Plui tart a son un cross di Ionita e un tap in di João Pedro parât vie di Musso. L’Udin al rispuint in cuintripît cuntun tandem Fofana-Okaka e tîr dal atacant che al ven fermât di Pisacane e po al riscje par vie di un erôr di Mandragora che i permet a Cerri di tirâ in puarte: la bale, tocjade di João Pedro, e finìs fûr di pôc.

A fuarce di dâi, il Cagliari al rive a cjatâ il gol dal un a un: cross mieze altece di Faragò e conclusion di João Pedro che e bat sul pâl e po e jentre intal sac. La pate no je avonde pal Udin e i blancs e neris a tornin daurman al atac cuntun lanç in aree par Okaka, che l’atacant al difint e po al tire in puarte. La so conclusion, tocjade di Pisacane, e devente un assist par Fofana che cence fastidis al controle e al tire une bombe che e impire Rafael.

A son ancjemò cinc minûts di zuiâ, che cul recupar a deventin unidis, e il Cagliari al prove ancjemò a dreçâ il risultât ma nol rive a jonzi il so obietîf e anzit al finìs in dîs cuintri undis cu la espulsion di di Pisacane che al magle la sô buine prestazion cjapant un secont cartelin zâl par vie di un colp improibît a Pussetto. Une bocjade di aiar bon pal Udin, che al siere il 2019 cuntun sucès che al da sperance e cûr.

Cosenza – Pordenone 1-2

bandieris-friuul

Il Pordenon al vinç ancjemò. Une setemane dopo dal sucès in cjase cul Crotone, la scuadre nere e verde e met vie altris trê ponts in trasfierte cuintri dal Cosenza.

La partence e je dai parons di cjase che a lenzin la travierse cuntune biele zirade di Carretta su cross di D’Orazio. La formazion furlane si dismôf e la sô rispueste e à la muse di Zammarini che al jentre inte aree cosentine, al tire a colp sigûr ma Capele al salve su la rie de puarte, chê di Pobega, che al tire fûr, e po chê di Strizzolo che cul cjâf al rive a metile dentri.

Passât in vantaç, Il Pordenon al ten bot denant de rispueste dal Cosenza, che al prove
a patâ cun Carretta e cun Riviere, e juste pôcs minûts prime de polse al cjate il secont gol ancjemò cun Strizzolo che al interven in acrobazie suntun cross di Candellone.

Il secont timp al tache cul Cosenza in atac. I parons di cjase a metin adun une biele ocasion che però e ven straçade di Riviere, di bessôl a puarte vueide. No i va miôr a Machach che il so prin tîr al ven parât vie di Di Gregorio e il so secont al sbat su la travierse. I parons di cjase a rivin a segnâ dome sul imprin dal ultin cuart di ore de partid cuntune biele conclusion di lontan di Lazaar.

Il gol i da cûr ai ros e blu, che però no rivi a cumbinâ alc e ce in atac e intal ultin a restin in dîs pe espulsion di Camporese. Il Pordenon al ten bot cence masse fastidis, al rive a tignî il vantaç fint ae fin e si conferme intal secont puest de graduatorie.

Juventus – Udinese 3-1

La trasfierte a Turin no podeve lâ piês di cussì. Cuintri di une Juve che e jere obleade a vinci dopo de partide pierdude a Rome cuintri de Lazio, la scuadre di balon furlane e fâs une altre volte la vitime sacrificâl e cussì e piert e ancje la sô posizion in classifiche e devente plui pericolose.

Pe ocasion Gotti al mande in cjamp un 3-5-2, là che denant di Musso a son De Maio, Ekong e Nuytinck, in mediane si cjatin Mandragora, Fofana e De Paul cun Ter Avest e Larsen intes corsiis laterâls e in atac a scombatin Okaka e Lasagne.

I parons di cjase a àn chê di cjapâ i trê ponts e si lu viôt za de sielte di Sarri di presentâsi cun trê pontis: Higuain, Dybala e Ronaldo. L’Udin al lasse la iniziative ae superpotence parone di cjase che prime ai impegnin Musso cun Matuidi e po a fasin gol cun CR7. La reazion dal Udin e je inesistente, intant che la Juve e masane zûc e e costruìs ocasions par dopleâ il vantaç cun Dybala che al rive ancje a butâle dentri, ma Pasqua si inecuarç che l’argjentin si jude cuntune man e duncje nol fâs bon il gol.

A passin i minûts, Musso al pare une buine conclusion di Higuain e finalmentri ancje l’Udin si fâs viodi des bandis di Buffon: cross di Ter Avest  par  Mandragora che al tire mâl e pal puartîr juventin no son fastidis. Al à par sigûr cetant di plui ce fâ Musso, che dopo dai intervents za fats al pare vie un altre conclusion di Higuain ma po al ven impirât ancjemò di Ronaldo e juste ae fin dal prin timp al cjape ancje un gol di Bonucci, che le bute dentri cul cjâf.

La partide e je ben che sierade. Par tornâ a vierzile al coventarès un meracul. Te seconde frazion l’Udin al prove a fâ alc e al rive ancje a fâlu (rispiet al nuie dal prin timp no i vûl masse…).

De Paul al vuadagne une buine punizion e il so tîr al devente un passaç par Mandragora che al prove cul pît çamp ma al tire fûr bersai, intant che di chê altre bande Dybala a cjape la travierse.

Juste dopo trê minûts Lasagna si cjate di bessôl denant di Buffon, che lu ferme. Il puartîr juventin al fâs ancjemò un pâr di intervents che no i permetin al Udin di segnâ il gol che al covente par provâ a dreçâ l’incuintri. Cussì la Juve e va dilunc a controlâ la situazion e e torne ancje a impegnâ Musso cun Dybala e Higuain.

La scuadre furlane finalmentri e rive a jessi plui dinamiche in ataca cun Pussetto che al jentre al puest di Okaka e cun Walace che al cjape il puest di De Paul. Buffon al torne a fâsi viodi che al è tal puest just tal moment just suntun pâr di tentatîfs di Pussetto e di Fofana e ancje Musso al fâs il so dovê suntune biele zirade di Ronaldo, che plui tart al cjape ancje il pâl.

L’Udin al rive a segnâ pe prime e uniche volte dome che tal ultin minût suplementâr cun Pussetto che al firme il gol de bandiere. Masse pôc e masse tart.

Lenghe furlane, ultins apontaments cui cors pai aministradôrs a Caprive e a Tumieç


A son daûr a finî i cors di formazion su la tutele des minorancis e in particolâr in cont de tutele de lenghe e de comunitât furlane. La iniziative formative e je stade inmaneade de Assemblee de Comunitât Linguistiche Furlane (ACLiF), l’organisim di rapresentance dai comuns furlanofons de Regjon Friûl-VJ, e dal CIRF, il Centri interdipartimentâl pal disvilup de lenghe e culture dal Friûl de Universitât di Udin, cun chê di meti a disposizion dai aministradôrs locâi e dai dipendents des aministrazions publichis lis cognossincis di fonde in cont di cheste cuistion che je une vore impuartante pal Friûl e pe regjon che e ten dongje la plui part dal Friûl cun Triest.

I cors, che a son vierts ancje ae partecipazion di ducj chei che a’nt vuelin savê alc in plui, a son stâts screâts ai 26 di Otubar cuntun incuintri public a Udin, e si davuelzin in cinc localitâts dal Friûl.
Ognidun di chei al è struturât in dôs lezions, là che a vegnin frontâts diviers aspiets de cuistion: si va de suaze teoriche e di chê normative di riferiment aes politichis linguistichis, jenfri garanzie di dirits fondamentâi, promozion dal patrimoni culturâl fintremai, potenziament de coesion sociâl e ricjadudis economichis pussibilis par dute la citadinance.

I cors di Tresesin, di Palme e di Spilimberc a son za finûts. Dentri di cheste setemane si sieraran ancje chei di Caprive e di Tumieç.
L’apontament tal centri dal Friûl orientâl al è par Joibe ai 12 di Dicembar a 6 sore sere li dal Centri Civic di place Vitorie 1. Chel inte “capitâl de Cjargne” al è par Vinars ai 13 a 5 inte Sale Conferencis dal Municipi (in place XX di Setembar 1).
Cui che al vûl partecipâ al pues ancjemò notâsi, contatant il CIRF ai numars telefonics 0432-556480 e 0432-556486 o al indreçament di pueste eletroniche cirf@uniud.it.

LaipNessLess + Paolo Fresu + Magalì Sare + Mocker’s + Y Sybs = Babêl Europe 24/2019

Vuê, doman e sabide su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt in streaming ae direzion www.ondefurlane.eu o fintremai ancje in video su Facebook ) al torne Babêl Europe, il program cuindisinâl dedicât ae produzion musicâl intes lenghis minorizadis dal nestri continent.

In chê che e podarès jessi la ultime pontade dal 2019 si tornarà a fevelâ de ultime edizion di Suns Europe e in particolâr de serade finâl dai 30 di Novembar stâts. E sarà la ocasion par tornâ a scoltâ la vincidore dal concors musicâl, la cjantante catalane, Magalì Sare, e chei altris doi grups segnalâts de jurie internazionâl, i bascs Mocker’s e i galês Y Sybs.

E sarà ancje la ocasion par scoltâ i LaipNessLess, che juste sabide stade a àn screât il lôr disc gnûf, Cormôrra, e l’innomenât trombetist e flicornist Paolo Fresu, che domenie stade al jere in Friûl, a Pordenon, adun cun Daniele Di Bonaventura par une serade inmaneade de Accademia Naonis.

Ancje cheste pontade di Babêl Europe, dopo des sôs trê emissions vie pe setemane (vuê in direte a 11 a buinore, doman in repliche a une dopo di misdì e ancjemò sabide in repliche a une e mieze dopo di misdì),  si podarà tornâ a scoltâle in rêt su Spreaker e su Spotify.

Pordenone – Crotone 1-0

bandieris-friuul

Il Pordenon al torne in Friûl e tal Stadi Friûl e al torne a vinci. I sborfs neris e verts cuintri dal Crotone a zuin une partide discrete, a resistin denant dai atacs dai aversaris e po a cjatin la strade dal gol ancje cuntun tic di fortune, che ur permet di tignî il vantaç fint ae fin de partide e di cjatâsi tal secont puest de classifiche dal campionât.

La partence e je de scuadre calabrese che dopo cinc minûts di zûc e prove la conclusion cun Messias. La rispueste de formazion furlane e rive cuasit daurman cun Pobega che ancje lui al tire fûr bersai. Il Crotone al torne al atac e i da di lavorâ a Di Gregorio che al fâs dôs paradonis, une daûr di chê altre, su Simy e su Vido.

I ospits a fasin zirâ il balon, cirint di cjatâ spazis, intant che il pordenon al siere in mnaere preventive dutis lis busis. Dopo de prime mieze ore di zûc i ritmis a van al mancul e la gare, fûr che par une conclusion di Crociata, e devente plui noiose, fin cuant che Mustacchio al fâs autogol, pôc prime de polse: azion manovrade dal Pordenon, Gavazzi che al va al cross bas e colp dal zuiadôr crotonês che impen di butâle in corner al mande il balon inte puarte di Cordaz.

Il secont timp al è mancul interessant. Il Crotone al prove ancjemò a imbastî azions di atac, il Pordenon si difint cun atenzion e cun sintiment e al rispuint in cuintripît.
No son grandis ocasions di gol ni di une bande e ni di chê altre. I furlans a domandin un penalty par un intervent su Strizzolo inte aree rosse e blu, ma l’arbitri al fâs mot che nol è nuie che nol sedi iregolâr.

Cul passâ dal timp il ritmi al torne a calâ. Stroppa al mande in cjamp Nalini cun chê di disniçâ i siei, ma l’unic risultât concret e je une bale golose par Rutten che però nol rive a disfrutâle e cussì il Pordenon al puarte a cjase i trê ponts.