Juventus – Udinese 4-1

This image has an empty alt attribute; its file name is udin_neri.png

L’Udin al scomence il 2021 in chê stesse maniere che al veve finît il 2020: cuntune sconfite. Dopo vê pierdût la ultime partide in cjase, ae fin dal an passât, cuintri dal Benevento, la scuadre di balon furlane e fâs la vitime sacrificâl in cjase de Juventus, che e veve une dibisugne mostre di vinci, par ripiâsi dai trê patafons cjapâts de Fiorentina.

A Turin Gotti al met in cjamp Musso in puarte, Bonifazi, De Maio e Samir in difese, Stryger Larsen, De Paul, Walace, Pereyra e Zeegelaar in mediane e Pussetto e Lasagna in atac. La Juve e mostre daurman che e je la parone di cjase, ancje se, almancul in principi, l’Udin nol somee impressionâsi masse, ni cuant che Ronaldo al prove a tirâ ma nol cjate il spieli de puarte e nancje su la zirade di Ramsey, e anzit si fâs vîf des bandis di Szczesny cuntun tîr cul cjâf di Pussetto, che al è debil e nol cree problemis ae Juve, e po cun De Paul, che le bute dentri, ma Giacomelli, cjalât il Var e viodût il control de bale cu la man dal argjentin, nol fâs bon il gol.

Sfantade la pussibilitât di passâ in vantaç, l’Udin al tache a patî la pression e la iniziative de scuadre di Pirlo. I parons di cjase, a fuarce di dâi, juste passade la prime mieze ore, a segnin cun Ronaldo, che al impire Musso, zovantsi di une bale robade cun mistîr di Ramsey a De Paul, pardabon pôc atent in chê ocasion, e prontade cun precision a pro dal portughês. La scuadre furlane e à daurman la pussibilitât di impatâ, cuant che Ramsey si fâs scjampâ un balon che al sarès bon par Lasagna, che però nol tire cu la fuarce e cu la precision che a coventin.

Sierât il prin timp ancjemò cuntune conclusion di Ramsey che no spaurìs Musso, la Juve e cjate il gol dai doi a zero tal imprin de seconde frazion: assist di Ronaldo e conclusion a bersai di Chiesa cun Musso che nol pues fâ nuie. La bale e jentre ancjemò inte puarte dal Udin cun Ramsey, che intune fase di batibui inte aree di rigôr furlane al tire in puarte sentât par tiere dopo vê tocjade la bale cu la man e par chel ancje in cheste ocasion Giacomelli no fâs bon il gol.

L’Udin al prove a alçâ il cjâf cun chê di dreçâ la partide. Magari cussì no, nol à masse fortune, stant che un tîr cul cjâf di Stryger Larsen al sbat cuintri de travierse. La scuadre di Gotti e stente e e fâs fature, la Juve e à la vitorie inte sachete ma e prove ancjemò a incressi il vantaç, rivant a jonzi il tris ancjemò cun Ronaldo, che al profite di un invît perfet di Bentancur.

La rispueste dal Udin e je une altre travierse: Forestieri, jentrât tal puest di Pussetto, i da la bale a Zeegelaar che il so tîr al sbat cuintri dal len parsore di Szczesny. Pal ultin cuart di ore Gotti al zuie lis cjartis Mandragora e Nestorovski, che a cjapin il puest di Pereyra e Lasagna, e po al cambie Walace cun Makengo. L’Udin al rive a segnâ juste tal ultin, cun Zeegelaar, ma tal recupar al rive il poker dai parons di cjase, firmât di Dybala. Vitorie nete e pesante pai parons di cjase e sconfite che e bruse pai furlans, che a pierdin posizions in graduatorie e, se no rivin a fâ ponts, a riscjin di sbrissâ inte zone retrocession.

Pordenone – Reggiana 3-0

bandieris-friuul

Il 2020 dal Pordenon si siere cuntune vitorie plene e taronde. A Lignan cu la Reggiana i verts e neris a cjapin sù il control de partide daurman, a imponin il lôr zûc e a metin il risultât in cassefuart za dentri dal prin timp.

La prime ocasion dal incuintri e rive dopo dîs minûts cuntune conclusion cul cjâf di Scavone parade vie di Cerofolini. I ospits a rispuindin cuntun dialic tra Radrezza e Kargbo, che al ven contrastât di Barison. I Sborfs a segnin dopo passâts i prins vincj minûts di zûc: iniziative di Mallamo su la diestre, che al bruse Pezzella e al crosse tal mieç de aree di rigôr, là che si cjate Diaw che cuntun tîr potent al impire Cerofolini.

La reazion de Reggiana si concretize intun tîr debil di Muratore, intune conclusion di Libutti che Perisan nol à fastidis a fermâ e intune punizion tirade alte di Pezzella. I parons di cjase a doplein il vantaç juste prime de polse: tal mieç dal cjamp Diaw al anticipe Gyamfi e i passe la bale a Ciurria, che al è libar di lâ in direzion de puarte, là che Cerofolini al prove a meti un blec, ma nol rive a fâ nuie sul tîr di Zammarini. La formazion emiliane no somee particolarmentri pericolose ancje se e lenç il gol cun Kargbo in dôs ocasions: prime al cjape il pâl e dopo Perisan al pare.

La seconde frazion si vierç cul Pordenon che al torne a cjapâ la iniziative e in curt al segne il trê a zero cun Ciurria, che al ricêf la bale di Zammarini, al salte cun facilitât Varone e al lasse partî un tîr fuart e precîs che di fûr de aree di rigôr al va finile sot de travierse là che Cerofolini nol pues rivâ.
Il gol al siere in maniere definitive la partide. Il Pordenon al manten il control des operazions, la Reggiana e prove a imbastî ancjemò cualchi azion ma no rive mai a jessi perivolose des bandis di Perisan. Cun di plui i ospits a restin cuntun om di mancul par vie de espulsion di Cerofolini.

Pe scuadre di balon dal Friûl Ocidentâl i trê goi fats e i trê ponts cjapâts a rapresentin un pas indenant in classifiche e une bocjade di aiar bon ancje pal spirt, dopo de sconfite cu la Cremonese e de pate cul Frosinone.

Frosinone – Pordenone 1-1

This image has an empty alt attribute; its file name is pordenone-calcio.png

Un gol par om e un pont par om, che a zovin a dutis dôs lis scuadris, che a rivavin di une sconfite. Il pont cjapât, di une bande, al pese ancjemò di plui pai parons di cjase, in cjamp cuntune formazion di emergjence e cu la bancjine curte par vie dal Covid-19, ma di chê altre al è une bocjade di aiar bon pal Pordenon, dopo dal risultât negatîf cuintri de Cremonese, e in chel istès al lasse un tic di marum in bocje par vie che i Sborfs ancje in cheste partide a van di lunc a cjapâ sù di mancul di ce che a semenin e il risultât al ven ridimensionât juste intai ultins minûts.

Il prin timp al è avonde ecuilibrât. I parons di cjase a tegnin di plui la bale e la fasin zirâ cun chê di jessi pericolôs des bandis di Perisan. La lôr supremazie teritoriâl si palese in concret dome intal possès de sfere, stant che i neris e verts a tegnin bot cence masse padins e a provin ancje lôr a masanâ zûc e a meti dongje azions ofensivis. Cundut achel vie pal prin timp i doi puartîrs no à masse ce fâ e si rive ae polse cence goi.

La seconde frazion si vierç cul Pordenon che al mostre di volê fâ alc di plui. La scuadre furlane e rive a jonzi l’obietîf dentri di vot minûts cul gol di Diaw. I parons di cjase a provin a reagjî cuntun tîr di Gori che al podarès jessi un bon cross par Parzyszek, ma l’atacant nol rive a tocjâlu. Il Frosinone al piert Ciano, che al cole malamentri intun scuintri di zûc e al ven cambiât cun Tabanelli, intant che la scuadre furlane e prove a dopleâ il vantaç ancjemò cun Diaw, ma cence sucès.

Il timp al passe e cuant che al somee che il Pordenon al puedi puartâsi a cjase dut il botin al rive il gol di Parzyszek. A mancjin sîs minûts ae fin e il Pordenon al prove a tornâ al atac, Pezzuto a’nt ordene ancjemò cuatr di recupar, i Sborfs a sburtin, i Canarins si difindin e cussì cuant che l’arbitri al sivile il risultât al reste chel: un a un.

Bon Nadâl e bon finiment. E un 2021 cun sintiment

stelecom

Bon Nadâl e bon an
Vesel Božič in srečno novo leto
Ein frohes Weinachtfest und ein glückliches Neues Jahr
Buon Natale e felice anno nuovo
Bonas pascas de Nadale e prosperu annu nou
Pulit Nadal e bona anada
Bon Tsalendre e Treinadan
Joyeux Noël et bonne année
Zorionak eta Urte Berri On!
Nedeleg laouen na bloavezh mat
Bon Nadal i un Bon Any Nou!
Nadelik looan na looan blethen noweth
Pace è salute
Noflike Krystdagen en in protte Lok en Seine yn it Nije Jier
Nadolig Llawen
Bon Nadel y Bon Ann Nuef
Nollick ghennal as blein vie noa
Bachtalo krecunu Thaj Bachtalo Nevo Bers
Buorrit Juovllat
Nollaig chridheil huibh

leb

Udinese – Benevento 0-2

This image has an empty alt attribute; its file name is udin_neri.png

Nuie fieste di Nadâl. La partide dal Udin in cjase cuintri dal Benevento e finìs inte maniere piês. I blancs e neris a fasin zûc e a imbastissin ocasions ma no rivin a disfrutâlis inte maniere miôr intant che i ospits a son plui concrets, atents daûr e precîs e concrets in atac, e ae fin a vincin: doi goi fats e trê ponts puartâts a cjase.

Gotti al presente sù par jù la stesse formazion titulâr che domenie e veve zuiât cuintri dal Cagliari. Lis variazions a son dôs: Arslan, tal mieç tra Di Paul e Pereyra, là che in Sardegne al jere Walace, e Lasagna tal puest di Deulofeu, dongje di di Pussetto in atac. Confermade la difese a trê cun Becao, Bonifazi e Samir, compagn dai letarâi Strygen Larsen e Zeegelar. Un sôl cambiament par Inzaghi a pet de vitorie cuintri il Genoa: in mediane al torne Schiattarella.

La partide e tache cuntun bon ritmi. La prime ocasion e je pal Udin, cun De Paul che i da une bale di aur a Lasagna che al tire fûf bersai. Al è plui precîs Caprari, doi minûts plui tart: i robe la bale a Arslan e al tire un diagonâl che al finìs tal cjantonut a çampe di Musso e al è un a zero.

Lasagna al à une altre ocasionone, ma nol rive a gafâ l’un a un. L’Udin al alce la linie dal so zûc e i ospits si sierin ben, cirint di rispuindi in cuintripît cun Lapadula. La scuadre furlane e à ancjemò pussibilitâts di segnâ. Il terminâl principâl des azions blancjis e neris al è simpri Lasagna, che al va dilunc a tirâ fûr de puarte. Il prin timp si siere cuntun pâr di conclusions di Caprari che no cjatin il bersai.

Il secont timp si vierç ancjemò cul Udin che al sburte indenant. De Paul al vuide la scuadre e lis primis conclusions dopo de polse a son di Zeegelar, che il so tîr cross al ven tocjât in maniere pericolose di Letizia che al lenç l’autogol, di Pussetto, che al ponte il secont pâl, e di Becao, che in acrobazie al tire masse adalt.

Inzaghi al cambie Ionita e Insigne cun Tello e Dabo tal puest di Ionita e Famose, Gotti al rispuint cun Walace e Deulofeu par Arslan e Bonifazi e l’Udin al passe dal 3-5-2 al 4-3-3. Il catalan al jentre ben inte partide e i da une buine bale a Lasagna, che si fâs fermâ di Montipò. Ancjemò cambis pal Benevento – fûr Lapadula e Improta, dentri Foulon e il zovin Di Serio – e pal Udin, che al scuen rinunciâ a Deulofeu, che il so puest al ven cjapât di Nestorovski, e po ancje a Zeegelar par Ter Avest.

I minûts a passin, la pression dal Udin si smole e il Benevento al respire e al prove a rispuindi ancjemò in cuintripît. Al rive il secont gol: assist di Caprari par Letizia che al jentre in aree de diestre e al spare inte crosere dai pâi cul efiet di rinfuartî il vantaç de sô scuadre e di seâ lis gjambis al Udin, che al piert fuarce ofensive e nol è nancje masse fortunât, stant che su punizion De Paul al cjape in plen la travierse. E cussì il Benevento al vinç e al passe l’Udin in classifiche.

Pordenone – Cremonese 1-2

This image has an empty alt attribute; its file name is pordenone-calcio.png

Prime sconfite in cjase pal Pordenon. A Lignan la scuadre di Tesser no rive a fâ rindi la sô supremazie teritoriâl. La Cremonese e ten bot e cul so zûc di rimesse al rive prime a vierzi lis segnaduris e po, dopo de paritât concuistade daurman dai Sborfs, juste tal ultin al cjate il gol de vitorie finâl.

La partence dal Pordenon e je buine. La scuadre furlane si fâs viodi des bandis di Volpe cun Mallamo e Butic. I ospits a rispuindin cuntun cross di Valeri par Ghisolfi, che però nol rive a disfrutâlu. Cul passâ dai minûts il zûc si colore simpri plui di neri e vert e Ciurria al impegne in dôs ocasions Il puartîr aversari. La Cremonese e resist e il prin timp si siere cence goi.

Tornâts dai camarins, i neris e verts a tornin a tacâ cun snait e cun decision e cussì a lenzin il vantaç par dôs voltis cun Mallamo. Volpe e compagns no si scomponin e dopo vincj minûts une iniziative di Pinato e oblee Perisan a parâ fûr la bale, cun Celar che al è il plui svelt di ducj a recuperâle e a metile tal sac.

Il vantaç de Cremonese al dure juste cuatri minûts, stant che Falasco al segne su punizion. La musiche de partide e torne chê di prime: Pordenon al atac cun chê di vinci e Cremonese atente e cuvierte cul intindiment di no pierdi. A fuarce di dâi la bale e va dentri – Butić al cjape un pâl su punizion e Musolik al recupare e al segne – ma par Robilotta il gol nol è bon par vie de posizion di fûr zûc dal polac. Cussì, cuant che al somee che la partide e vedi di sierâsi sul un a un, al rive il gol dei grîs e ros, firmât di Ciofani.

Mauresca Fracas Dub + Alessio Velliscig + Claudi Martì + Adwaith + Sa Ratapignata = Babêl Europe 26/2020

Gnovis produzions discografichis, inovâi impuartants, atualitât e un piçul belanç de anade che e je daûr a finî. Al è ce che al propon la ultime pontade dal 2020 di Babêl Europe, il program cuindisinâl di Radio Onde Furlane dedicât a lenghis, musichis, minorancis e e nazions cence stât.

Intal apontament di cheste setemane – in direte vuê, martars ai 22 di Dicembar, a 11 a buinore e in repliche tal dopo di misdì di doman, miercus ai 23, a une e in chel di sabide ai 26, a une e mieze – si fasarà un viaç musicâl jenfri Ocitanie, Friûl, Gales e Sardegne.

Adwaith Interview

Si scoltarà une cerce di Bartàs Party, il gnûf disc dal vîf dai ocitans Mauresca Fracas Dub, e plui o mancul in anteprime la cjançon fate di Alessio Velliscig in ocasion dai setante agns des Lotis dal Cormôr. Cun di plui al sarà spazi pe musiche di Claudi Martì, des Adwaith e di Sa Ratapignata.

Si fevelarà ancje de edizion 2020 di Suns Europe, de risoluzion fate buine joibe stade de bande dal Parlament European a pro dai dirits linguistics, de tutele des minorancis e plui in detai dai contignûts dal Minority SafePack, dal inovâl de Cjarte di Chivasso, il storic document su autoguvier e minorancis prontât ai 19 di Dicembar dal 1943 di un grup di antifassiscj valdostans e des valadis valdesis e ocitanis de Provincie di Turin e di un articul jessût su Filosofia de Logu, segnalât ancje di Ethnos & Demos.

Dopo dai passaçs di cheste setemane inte programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu), ancje cheste pontade di Babêl Europe e sarà a disposizion in rêt, su Spreaker e su Spotify.

This image has an empty alt attribute; its file name is logo_web.png

Cagliari – Udinese 1-1

This image has an empty alt attribute; its file name is udin_neri.png

L’Udin al va dilunc a fâ ponts. In cjase dal Cagliari la scuadre di balon furlane e zuie une buine partide, ordenade e ecuilibrade. I parons di cjase a patissin la organizazion e la costance dal blancs e neris, ma a tegnin bot e a rivin fintremai a passâ in vantaç ator de prime mieze ore di zûc. L’Udin al recupare tal prin cuart di ore dal secont timp e al prove a vinci, ancje se ae fin il risultât al reste un a un.

Gotti al mande in cjamp Musso tra i pâi, Becao, Bonifazi, Samir in difese, Stryger Larsen, Di Paul, Walace, Pereyra e Zeegelaar in mediane e la cubie Pussetto-Deulofeu in atac. L’alenadôr dal Udin al sielç Walace in cabine di regjie, intant che Di Francesco al rilance Godin.

La prime iniziative ofensive e je dal Cagliari, cuntun cross di Lykogiannis par Pavoletti che al ven fermât di Musso. L’Udin al rispuint daurman cuntune azion di Samir che al crosse in aree par Pussetto, che al tire ben ma Cragno al pare. I blancs e neris in maie zale no molin, cun Pussetto e Deulofeu in evidence. Il ritmi al è alt, il Cagliari al patìs il pressing furlan, Strygen Larsen al ven butât jù inte aree rosse e blu ma par Piccinini al è dut in regule.

Sghindât in plui ocasions il pericul di cjapâ un gol, il Cagliari al prove a reagjî cuntun tîr di Lykogiannis, cuntune punizion di Marin e cuntune deviazion di Pavoletti che no crein problemis a Musso. Dopo fermât un scat pericolôs di Deulofeu, il difensôr grêc de scuadre sarde al bat une punizion e al segne e Sottil al prove a incressi il vantaç ma Musso i dîs di no.

Sot di un gol, l’Udin al torne a tacâ a masanâ zûc e a fâsi vîf des bandis di Cragno, che al è un pôc clopadiç intes jessudis, ma di chest i blacs e neris no rivin a profitâ, intant che il puartîr dal Cagliari si mostre atent e puntuâl suntune conclusion di De Paul e cussì il risultât nol cambie fin ae polse.

La seconde frazion si vierç cul Udin in bombe: al ten la bale e al imbastìs azions e acelerazions a soprese, tacant cuntun tîr di Bonifazi, cuntun biel cross di Stryger Larsen par Pussetto che al tire cul cjâf ma al mancje il bersai di un et e po cuntune conclusion di Deulofeu fermade di Cragno. Gotti al clame fûr il catalan e al met dentri Lasagna, che al à daurman la ocasion par meti la sô firme su la partide: lanç di Pussetto e scat di KL15, che al bruse Carboni e al segne.

L’Udin no si contente e si puarte ancjemò indenant cuntune azion personâl di De Paul, cuntun tîr di Lasagna che Carboni al mande in corner e cun Becao che al tire cul cjâf pôc adalt parsore la travierse. Il Cagliari al rispuint cuntun pâr di cross di Nandez e di Lykogiannis, che al servìs ben Joao Pedro, ma Samir al salve cuntun grant intervent.

A passin i minûts, il ritmi si manten bon ancje se la precision di passaçs e tîrs e va al mancul. Gotti al met dentri Mandragora e Nestorovski tal puest di Pereyra e Pussetto. I doi gnûfs jentrâts si metin in evidence in zone tîr ma cence sucès, Cragno al pare une punizion di De Paul e juste tal ultin al torne a fâsi viodi in atac Lykogiannis che al tire e al lenç la travierse. E je la ultime ocasion, prime dai cuatri minûts di recupar che a compagnin lis dôs scuadris tai camarins cuntun gol par om e un pont par om. Pal Udin al è il siest risultât positîf in file.

Entella – Pordenone 0-1

bandieris-friuul

Il Pordenon al torne a vinci. Dopo de sconfite di Pisa e de pate di sabide cul Brescia la scuadre nere e verde finalmentri e concuiste ducj i trê ponts a Chiavari cuintri dal Entella, che al reste tal ultin puest in classifiche. In Ligurie la scuadre furlane e rive a segnâ tai prins minûts, no si scompon denant dai tentatîfs gjenerôs dai aversaris e in plui ocasions si svicine al secont gol.

La partence de scuadre di Tesser e je buine. Dopo cuatri minûts Illuzzi al viôt une stratignude inte aree di rigôr di Paolucci su Scavone e al ordene il rigôr. Dal discut al tire Diaw e al segne.
La reazion dai parons di cjase si viôt daurman cuntun tîr di Paolucci e po cuntune conclusion di
Settembrini, ma Perisan al interven in ducj i doi câs cence problemis. E je plui impegnative la parade dal puartîr futrlan suntun tîr di Chiosa, tal ultin cuart di ore dal prin timp, che si siere di chê altre bande cuntun tîr di Ciurra fermât di Russo.

Inte seconde frazion par un cuart di ore nol sucêt alc e ce. Dopo e rive une gnove conclusion di Ciurria che e tocje il pâl e si stude tra i braçs dal puartîr dal Entella. Il timp al passe e si scombat tal mieç dal cjamp e a dîs minûts prime de fin de partide il Pordenon al à une altre ocasion golose cuntune biele azion di Magnino che al tire a colp sigûr, ma al scuen fâ i conts cuntun miracul di Russo che al ten in partide i siei. L’Entella cussì al prove ancjemò a puartâsi indenant cun chê di segnâ e vuadagnâ un pont, ma nol rive pardabon a impegnâ Perisan e la partide si siere cul sucès dal Pordenon, che cumò si gjolt ancje un salt indenant inte graduatorie.

Pordenone – Brescia 1-1

This image has an empty alt attribute; its file name is pordenone-calcio.png

Un gol par om e un pont par om. A Lignan, Pordenon e Brescia a scuegnin contentâsi de pate. Pai neris e verts al è un pas indenant dopo de sconfite e de partide deludente di sabide stade cul Pisa, ancje se, massime vie pal prin timp, a vevin bongs motîfs par pensâ di cjapâ ducj i trê pont a disposizion.

La partence dai parons di cjase e je buine. Dopo dîs minûts i sborfs a rivin ancje a segnâ cun Diaw, che al fâs valê la sô velocitât, al passe Mangraviti e al impire Joronen. Passâts in vantaç, i undis di Tesser a mantegnin il control de partide, vuidâts di Ciurria e Scavone. Il Brescia si fâs viodi des bandis di Perisan dome cuntune punizion di Martella e cuntun tîr di Spalek, ma il puartîr furlan al è tal puest just tal moment just.

Dopo vincj minûts Joronen al fâs une paradone suntune conclusion di Scavone: un intervent che al pesarà inte contabilitât finâl de partide. Scjampât il pericul, i ospits a alcin la linie dal lôr zûc e inte ultime part de prime frazion a provin a jessi pericolôs cun Sabelli, cun Torregrossa e cun Van De Looi, ma il Pordenon al manten il vantaç cence padins.

Tal secont timp i blanc e celescj a rivin a gafâ l’un a un cun Spalek che al tire in puarte e zovantsi de deviazion di Bassoli al impire Perisan. Doi minûts plui tart il Brescia al reste in dîs, par vie che Van De Looi si intope intal secont zâl e al ven mandât fûr de bande di Gariglio.

I neris e verts a cirin di profitâ de superioritât numeriche, ma la lôr pression ofensive no prodûs alc e ce, parcè che il Brescia si difint cun ordin e cun sintiment. La ocasion par tornâ in vantaç il Pordenon le cjate jueste ae fin de partide, ancjemò cun Diaw che al tire e al lenç il pâl. In plen recupar Joronen si fâs mâl, ma al reste tal so puest e i ospits, strenzint i dincj, a puedin tornâ a cjase cuntune pate di rilêf sigûr.