Udinese – Roma 1-0

Al torne a tacâ il campionât e l’Udin al zuie in cjase e al vinç. La rivade dal gnûf alenadôr, Davide Nicola, e puarte une bocjade di aiar bon tal cjâf, tes gjambis e tal cûr dai zuiadôrs blancs e neris, che no àn pôre de Rome, prin a tegnin bot e po a cressin in proiezion ofensive e par chel a rivin a concuistâ i trê ponts.

La “Maggica” e rive a Udin cuntune formazion cence diviers titolârs, tant che Manolas, De Rossi, Perotti, Pastore e il puartîr Olsen. La scuadre di balon furlane i da il benvignût cuntune struture tatiche atente e dinamiche: un 3-5-2 che cuant che a àn la bale i aversaris si stramude in 5-3-2. Nicola al mande in cjamp Musso in puarte, Nuytinck, Ekong e Samir te linie difensive, Fofana, Behrami e Mandragora tal mieç cun Ter Avest e Stryger Larsen laterâi e la cubie di atac formade di De Paul e Pussetto.

Il prin timp al è avonde ecuilibrât. La Rome e fâs zirâ di plui la bale ma no rive a jessi masse pericolose in atac, stant che El Sharawy al prove a fâ alc, cuntun pâr di conclusions fûr bersai, e un biel tîr di Cristante al ven parât vie Musso. L’Udin si difint cun atenzion e cun sintiment e al rispuint in cuintripît e ator de prime mieze ore di zûc al fâs un pâr di tentatîfs cun Pussetto e Behrami che prò no impegnin Mirante.

Te ultime part de prime frazion la tenzion agonistiche e cres. La Rome e incrès la sô pression ofensive ma e rive a vudagnâ dome cualchi corner, stant che Musso e i difensôrs blancs e neris a son simpri tal puest just tal moment just e che Schick, Kolarov e Nzonzi no son masse precîs.

Dopo de polse la Rome e torne al atac, ancje se e va dilunc ancjemò dome a vuadagnâ corners e a fâ cualchi tîr fûr bersai cun El Sharawy e Kolarov, cence dismenteâ il scjuc inte aree blancje e nere di Pellegrini che al fâs fente di jessi stât butât jù di Samir ma nol rive a ingjanâ Fabbri. L’Udin al va dilunc a difindisi cun sintiment, no si scompon e al rispuint tirant sùù la linie dal so zûc cuntun colp di tac di Pussetto che al libere DePaul e i permet di brusâ Santon e Fazio, di cjatâsi di bessôl denant di Mirante e di segnâ.

L’un a zero al da fuarce al Udin e al stice la reazion de Rome, che e scugne puartâsi indenant e lassâ cualchi spazi libar pal cuintripît furlan. Nzonzi si svicine daurman ae paritât, cuntun tîr cul cjâf che al va fûr di pôc, e doi minûts i tocje a Musso dî di no dôs voltis a Pellegrini.

Sghindâts i pericui daûr, l’Udin al cres in atac. La cubie De Paul-Pussetto e imbastìs une altre bile combinazion e il secont dai doi al controle e al segne, ancje se Fabbri, dopo vê consultât il Var, al decît che al è un fal di man e duncje no si pues convalidâ il gol. La Rome e prove ancjemò a fâ alc, ma cence masse fuarce e cun pocje convinzion. Cuant che lis azions romanistis a son plui decisis Musso e i difensôrs a intervegnin par ordin e di chê altre bande dal cjamp l’Udin al fâs ancjemò alc pal staronzâ il sucès, cun Mandragira e soredut cun Machis, che tal ultin nol rive a sbusâ Mirante, o almancul par confermâ di vê cûr e snait e di meretâsi la vitorie.

La partide e finìs inte maniere miôr. Un gol fat, trê ponts e une condote di gare inteligjente e gjenerose.
Sperìn che e sedi dome la prime di tantis.

Advertisements

Anteprime Suns Europe + Lou Seriol + Moussu T e Lei Jovents + Dr. Drer e CRC Posse + Ethnos & Demos = Babêl Europe 23/2018

Al va dilunc il percors di svicinament ae edizion 2018 di Suns Europe, il Festival european des arts in lenghe minoritarie, tra musiche, cine e leterature, inmaneât di Radio Onde Furlane cu la poie di ARLeF, Regjon Friûl-VJFondazion Friuli e cul patrocini dal Consei de Europe, e dal NPLD, che si davuelzarà in Friûl dai 29 di Novembar ai 2 di Dicembar. Cussì ancje il gnûf  episodi di Babêl Europe, il program cuindisinâl di Onde Furlane dedicât a lenghis, musichis, minorancis e nazions cence stât, al dedicarà la plui part dal so spazi ae discuvierte di ce che si viodarà e che si scoltarà inte suaze di chê manifestazion.

Te pontade 23/2018 de trasmission, in onde vuê, martars ai 13 di Novembar a 11, e po ancje doman, miercus ai 14 a une dopo misdì, e ancjemò sabide ai 17 a une e mieze dopo misdì, si scoltaran altris trê dai nûf protagoniscj de sezion musicâl di Suns Europe. Dopo vê fate la cognossince, cuindis dîs indaûr, di Laura Hoo, cjantautore de minorance svedese de Finlandie, dai Yr Ods, grup indie rock dal Gales, e dai furlans Luna e un Quarto, e sarà la ocasion par cerçâ alc dal repertori de cjantante de Basse Sassonie, Melissa Meewisse, dal grup dai Paîs Catalans Janski e dal progjet folk-prog-pop galizian Espiño.

Cun di plui, dentri di Babêl Europe, al sarà spazi pes novitâts discografichis che a rivin de Ocitanie, cuntune gnove cerce di Occitan, il disc gnûf dai Lou Seriol presentât in anteprime un mês indaûr inte suaze de trasmission, e cuntune selezion di Operette Vol . 2, l’album gnûf dai marsiliês Moussu T e Lei Jovents, e par une riflession tra storie e atualitât, compagnade de musiche di Dr. Drer e CRC Posse  e de segnalazion di un articul dal blog Ethnos & Demos.

Si pues scoltâ Babêl Europe e plui in gjenerâl Radio Onde Furlane sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.

Dopo dai 4 di Novembar, dôs cjançons a son miôr di une

La zornade dai 4 di Novembar e je finide. Ancje il centenari de “vitorie” al è lât.

Vie pai ultins agns chel inovâl si è jemplât simpri plui di retoriche sglonfe, vueide e in chel istès strafonde di banalitâts e mistificazions.

O vin il suspiet che chê solfe e larà indenant ancjemò cetant.

Tai ultins agns o scrivevin che denant di cheste situazion al jere miôr scoltâ une biele cjançon par furlan.

O tornìn a scrivilu ancje chest an, cuntune zonte.

Dongje di cheste, che in dutis lis sôs versions nus somee simpri la cjançon juste te zornade juste (cundut che e larès ben ancje in altris zornadis), a ‘nt zontìn une altre, diretamentri de Sardegne.

 

Udinese – Milan 0-1

Chê dai 4 di Novembar e je za une zornade fastidiose par so cont. Se po ancje l’Udin al piert, Diu nus vuardi… Cul Milan la scuadre di balon furlane e zuie un timp e mieç, vie pe prime frazion e rive ancje a spaurî il diaul in formazion di emergjence e ancje dopo de polse nol va malat: al cale ma al somee in stât di puartâ a cjase almancul un pontut. Tes ultimis batudis, però, il Milan al rive a capitalizâ chê dose di cualitât di plui e al ven judât in chest ancje dai blancs e neris che juste ae fin dal recupar, cun Opuku, ur regalin la bale buine ai milaniscj che a segnin cun Romagnoli.

Velazquez al mande in cjamp une scuadre cun cualchi novitât, a tacâ di Ter Avest daûr, dongje di Opuku, Nuytinck e Ekong, cun Stryger Larsen a sburtâ a çampe, Samir cul compit di stâ daûr di Suso, Fofana e Mandragora tal mieç, Musso ancjemò in puarte e Pussetto plui indenant dongje di Lasagna, cun De Paul daûr di lôr libar di inventâ e di sugjerî. La scuadre si compuarte ben e il Milan nol rive a fâ alc e ce.

Vie pai prins cuarantecinc minûts al imbastìs plui azions di gol l’Udin che il Milan, massime cun Pussetto, Mandragora e Ter Avest, intant che il Milan al piert Higuain, infortunât, si fâs viodi des bandis di Musso dome cun Suso che al tire fûr bersai e cun Cutrone che al scjalde lis mans dal puartîr.

Il prin timp al è plasevul, ancje se al è cence goi. La seconde frazion si vierç sù par jù cun chê stesse ande, ancje se al è il Milan che al fâs plui zûc e al tire di plui in puarte. Cun di fat, se si gjave une conclusion di Lasagna al minût numar 85, parât di Donnarumma, l’unic puartîr che al à ce fâ al è Musso, che al neutralize un tîr di Castillejo e po al cjale une bale tirade di Suso che si piert lontan de sô puarte.

Chel che lu clamin “risultât cui ocjai” al somee aromai segnât e impen vie pai minûts di recupar al sucêt dut ce che nol varès di sucedi a une scuadre che tes ultimis setemanis e à pierdût masse dispès e che e spere di stramudâ il pont vuadagnât cul Genoa intal prin di une serie lungje: prime Nyutinck al fâs un falat su Castillejo e Di Bello al tire fûr il cartelin ros e po dopo, tal ultin minût, Opoku al pastroce cul balon e lu piert a vantaç di Romagnoli che al imbastìs une azion cun Suso e Cutrone e le siere cuntun biel diagonâl che al sbuse Musso.

Il Milan al vinç e l’Udin al reste fer a cuote nûf, te part plui basse de classifiche, a trê ponts di vantaç sul Empoli che juste domenie al spiete i blancs e neris in cjase.
La situazion e je grivie e penze. E no dome pal avignî di Velazquez.

Canzoniere Grecanico Salentino + Ruben Dimitri + Anteprime Suns Europe 2018 (Laura Hoo, Yr Ods e Luna e un Quarto) = Babêl Europe 22/2018

Si svicine la edizion 2018 di Suns Europe, il Festival european des arts in lenghe minoritarie, tra musiche, cine e leterature, inmaneât di Radio Onde Furlane cu la poie di ARLeF, Regjon Friûl-VJFondazion Friuli e cul patrocini dal Consei de Europe, e dal NPLD, che si davuelzarà in Friûl dai 29 di Novembar ai 2 di Dicembar. Par chel, tacant di cheste setemane, Babêl Europe, il program cuindisinâl di Onde Furlane dedicât a lenghis, musichis, minorancis e nazions cence stât, al larà ae discuvierte di ce che si viodarà e che si scoltarà inte suaze di chê manifestazion.

Te pontade 22/2018 de trasmission, in onde vuê, martars ai 30 di Otubar a 11, e po ancje doman, miercus ai 31, a une dopo misdì e ancjemò sabide ai 3 di Novembar a une e mieze dopo misdì, si scoltaran trê dai nûf protagoniscj de sezion musicâl di Suns Europe, ven a dî Laura Hoo, cjantautore de minorance svedese de Finlandie, Yr Ods, grup indie rock dal Gales, e i furlans Luna e un Quarto.

Cun di plui, dentri di Babêl Europe, al sarà spazi ancje di Ruben Dimitri, musicist con fondis saldis tal rock e tal blues, che al cjante ancje te lenghe de minorance cravuate dal Burgenland (Austrie di soreli jevât), e di une cjançon par griko dal repertori dal Canzoniere Grecanico Salentino, che juste dîs dîs indaûr al à vût vinçût il premi pal miôr grup world music dal mont, inmaneât de innomenade riviste Songlines.

Si pues scoltâ la trasmission e plui in gjenerâl Radio Onde Furlane sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade di Babêl Europe si podarà tornâ a scoltâle in podcast cun Spreaker e Spotify .

Genoa – Udinese 2-2

L’Udin al rive a fermâ la tendince negative des ultimis setemanis e a Gjenue al cjape un pont che al da ossigjen ae scuadre, al ambient e soredut al alenadôr Velazquez, che le sô bancjine e someave une vore balarine. Il prin timp dai blancs e neris al è flaput e il Genoa al va in vantaç, intant che al fâs une vore miôr te seconde frazion, cuant che al rive a dreçâ la partide e fintremai a svicinâsi al sucès. Di une bande la scuadre di balon furlane e je debile in difese, e à pocje iniziative e no rive a zuiâ plui di un timp, di chê altre e recupare De Paul, protagonist in prime persone e tant che sugjeridôr, e e zuie almancul tal timp just, il secont, e al puarte a cjase un risultât che nol è une sconfite.

Pe partide cul Genoa Velazquez al presente une scuadre cun cualchi novitât: il scheme di partence al è un 3-5-1-1, compagn che cul Napoli, in puarte si viôt Musso al puest di Scuffet, te difese a trê al è Opoku dongje di Ekong e Samir, te mediane a son Pussetto e Larsen larcs, Behrami tal mieç e Fofana e Barak dongje di lui, indenant a son Lasagna prime ponte e De Paul daûr di lui cun libertât di azion e di moviment.
Il prin timp al è in sostance un monolic dal Genoa. I parons di cjase a son ordenâts e organizâts cun Bessa, Romulo e Piatek che a dan il lôr bon ce fâ ai difensôrs blancs e neris. Dopo trê minûts Musso al anticipe Piatek, al minût numar nûf Bessa al cjape un pâl e dome ator dal prin cuart di ore di zûc l’Udin si fâs vîf des bandis di Radu cuntune conclusion di Lasagna, fermade dal puartîr. Il Genoa al continue a sburtâ, Opoku al somee chel plui in dificoltât tra i difensôrs blancs e neris e Musso al pare ancjemò un biel tîr di Criscito.

La egjemonie dal Genoa e ven confermade dopo de prime mieze ore, cuant che Musso al interven in maniere iregolâr su Bassa, Mazzoleni al sivile il rigôr, Romulo al tire e al segne. I parons di cjase a mostrin di volê incressi il vantaç e a tornin al atac, l’Udin al ten bot e al prove a rispuindi cun Fofana e De Paul, ma cence rivâ a mudâ il risultât.

Tal secont timp la musiche e cambie. L’Udin al è plui dinamic e ordenât te costruzion dal zûc, cu lis iniziativis di Pussetto, Barak, Berhami e De Paul, ancje se la pauarte di Radu e reste lontane. Dopo cualchi combinazion lade sùù pai stecs finalmentri De Paul e Lasagna a cjatin la intese juste e cussì al rive il gol di KL15 che al tocje cul cjâf un biel cross dal argjentin. Magari cussì no pal Udin, il Genoa nol spiete masse par rispuindi: Musso al rive a meti un blec suntune colcusion di Bessa ma po dopo nol rive a fâ nuie sul tîr cul cjâf di Romero e al è doi a un.

Di gnûf sot di un gol, i blancs e neris a tornin a masanâ azions e iniziativis. Al è ancjemò in evidence il talent di De Paul, che a vincj minûts de fin cuntun biel tîr al sgnache la bale tal siet e al bat Radu. La gnove paritât e met un tic in crisi i parons di cjase, che a restin in dîs dopo de espulsion di Romero, e i da un pôc di spirt al Udin, che te ultime part de partide al prove a puartâ a cjase ducj i ponts a disposizion, ma nol rive, nancje ae fin cuant che Mandragora al à pardabon une buine ocasion.

Udinese – Napoli 0-3

Tierce sconfite consecutive pal Udin. Dopo Bologna e Juventus al è il turni dal Napoli, che al rive a crevâ ancje l’unic record che e veve la scuadre di balon furlane, ven a dî no cjapâ goi inte prime mieze ore di zûc. Cumò i blancs e neris a sbrissin jù in classifiche fintremai inte posizion numar sedis, là che si tache a sintî che al tire un aiar che nol è par nuie bon.

Al è clâr che vê a ce fâ cu la prime e cu la seconde de graduatorie nol è facil, però lassâi al Napoli usgnot e ae Juve dôs setemanis indaûr il control totâl de partide tacant dal prin minût al è pardabon masse. Vie pal prin timp l’Udin si viôt pôc o nuie – si dismôf dome dopo vê cjapâ il prin gol – e te seconde frazion al fâs alc di sests e di bon dome pai prins vincj – vincjecinc minûts: masse pôc par fâi cuintri ae scuadre di Ancelotti, masse pôc par scugnî no tornâ a preocupâsi pe situazion che e somee tornâ a jessi segnade dal efiet Mer…Dacia Arena.

Pe ocasion Velazquez al mude la struture tecniche de scuadre: l’Udin si presente cuntun inedit 3-5-1-1, che in fase difensive al devente 5-3-1-1. Lasagna al è la prime ponte, De Paul i sta daûr cuntune cierte libertât di moviment e te linie mediane a son Behrami tal mieç, Fofana a man drete, Mandragora a man çampe e Larsen e Pussetto tes corsiis esternis, cul compit dopli di sierâ (soredut il prin) e di sburtâ (massime l’argjentin).

Il Napoli al è cence Insigne e Ancelotti al sielç la cubie di atac Milik-Mertens e te sô formazion a son diviers ex blancs e neris, di Karnezis in puarte a Zielinski e Allan. Dopo cuatri minûts i opsits a pierdin Verdi par infortuni e al so puest al jentre Fabian Ruiz, che sù par jù dîs minûts al sarà l’om just tal puest just che al fâs la robe juste a pro de sô scuadre.

La scuadre di Ancelotti e partìs cul pît just, al ten la bale e a concuiste teren. La prime ocasion e je di Callejon che al scjalde lis mans di Scuffet. I blancs e neris a spietin i aversaris: l’intidiment al è chel di tignî bot e di rispuindi in cuintripît cun Fofana, Mandragora e Pussetto, a vantaç di De Paul e Lasagna, ma magari cussì no no rivin a fâ alc e ce. Prime Callejon al recupare une bale e al tire fûr bersai e dopo al conclût Fabian Ruiz che le met là che Scuffet nol pues rivâ.

Dopo un cuart di ore di zûc il Napoli al è in vantaç e l’Udin al somee in zenoglon. Fofana e De Paul a provin a fâ un pôc di moviment, ma no son avonde precîs, e Lasagna al ven tignût di voli dai difensôrs napoletans. Ator de metât dal prin timp la ponte dal Udin e rive a profitâ di une erôr di Albiol par lâ viers de puarte aversarie e tirâ dentri: la esecuzion e je buine ma Karnezis al pare in doi timps. KL15 al à altris dôs oportunitâts, ma nol rive a disfrutâlis inte maniere miôr, e la ocasion che si cjate Pussetto si sfante tra i pîts di Koulibaly, intant che di chê altre bande Scuffet al à di stâ in vuaite su lis conclusions di Zielinski e Milik che però a son fûr dal perimetri de puarte.

Dopo de polse l’Udin al somee plui decîs. La scuadre furlane e je plui alte e il Napoli si tire indaûr in spiete des iniztiavisi dai blancs e neris. Larsen al sburte di plui de sô bande, De Paul al vuadagne spazi indenant e ancje Pussetto al recupare teren e posizion. Lasagna al à dôs bielis ocasions tai prins cuindis minûts, ma nol è nuie ce fâ: il prin apontament al ven mancjât e te seconde conclusion i met un blec Koulibaly.

Velazquez al prove a dâi benzine al Udin clamant dentri Barak al puest di Berhami. L’Udin al prove ancjemò a sburtâ e a pressâ. Larsen al crosse par Lasagna ma il so colp cul cjâf nol cjate la puarte.

Al è un brut segnâl, cemût che si capirà tal zîr di pôcs minûts: prime Samir al riscje l’autogol cuntune deviazion di un cross di Zielinski, po al rive il tîr di Callejon tocjât cul braç di Opoku, rigôr e gol di Mertens, e po ancjemò il tîr di Rog, a pene mandât dentri di Ancelotti, che al firme il trê a zero finâl.

Prossime partide a Gjenue.

Storie + memorie + atualitât + la anteprime dal disc gnûf dai Lou Seriol + musiche des Asturiis al Friûl =Babêl Europe 21/2018

Storie, memorie, atualitât e musiche di îr, di vuê e di doman, cuntune cerce in anteprime di un disc che al vignarà presentât in maniere uficiâl ae fin di cheste setemane. La pontade numar 21 dal 2018 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane, si presente in continuitât plene cun chê di cuindis dîs indaûr.

Cun di fat, si tornarà a fevelâ dal crowfunding inviât dai sarts Balentia pe produzion dal album che ju viôt tornâ dongje e che al varès di saltâ fûr dentri de fin dal an e soredut si scoltarà alc di Occitan, il disc gnûf dai Lou Seriol che al vignarà screât ai 19 di Otubar a Lo Vernant / Vernante te Val Vermenanha (Valadis ocitanis dal Piemont).

Vie pal apontament di vuê, martars ai 16 di Otubar a 11 a buinore in direte, e po in repliche ancje doman, miercus ai 17 a une dopo di misdì, e sabide ai 20 ancjemò a une e mieze, si memorearan ancje la fusilazion di Lluís Companys (ai 15 di Otubar dal 1940), la deportazion dai ebreus di Rome (ai 16 di Otubar dal 1943) e la aprovazion de prime Risoluzion dal Parlament european su la tutele des minorancis (ai 16 di Otubar dal 1918).

Si scoltarà ancje musiche par yiddish, cun Talila e Ensemble Kol Aviv, par asturian, cui Dixebra, e par furlan, cun Rive No Tocje.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Cun di plui, compagn di chês altris pontadis, ancje chê di cheste setemane e vignarà archiviade su internet, cun Spreaker e cun Spotify.

Udinese – Juventus 0-2

Nuie ce fâ. L’Udin si met in zenoglon denant de Juventus di Ronaldo, Dybala e Mandzukic. Lis sperancis di viodi la scuadre di balon furlane tignî bot denant dai prins in classsifiche si sfantin tal zîr di cuatri minûts dopo de prime mieze ore di zûc, cul gol di Bentancur su cross di Cancelo, cul tîr di Mandzukic parât di Scuffet e cu la seconde segnature, firmade di CR7.

La formazion di Velazquez e fronte la capoliste e la sô potence tecniche e tatiche cun chê di sierâsi indaûr e di provâ a rispuindi in cuintripît. Magari cussì no, la difese no je simpri perfete e indenant lis iniziativis di De Paul a son masse pocjis e Lasagna nol rive a fâ alc e ce.

La Juve e cjape sù il comant des operazions daurman e si viôt vie par dut il prin timp, che siere cul dopli vantaç pe scuadre di Allegri e cul displasê pal Udin par no vê rivât a meti in puarte un biel tîr di Berhami juste prime de polse.

Te seconde frazion l’Udin al mostre un tic di iniziative in plui, ma al rive a fâsi viodi des bandis di Szczesny in ben pocjis ocasions e cuant che nol rive il puartîr al è Alex Sandro che i met un blec. Di chê altre bande al à par sigûr plui lavôr Scuffet, che al à il merit di evitâ che i ospits a fasin un botin ancjemò plui sostanziôs.

La performance dal puartîr di Remanzâs e je la robe miôr de partide, almancul cuntune cjaladure furlane. Pal rest, cundut che si saveve che cuintri de Juve e jere dificle, l’Udin al delût e si torne a sintî aiar di Mer…Dacia Arena.