De Joibe Grasse dal 1511 ae Zornade Furlane dai Dirits dal 2014

JoibeGrasse1511

Ai 27 di Fevrâr dal 1511 al sclopà a Udin e si slargjâ inte plui part de Patrie chel che al è il riviel popolâr plui impurtant di dute la storie dal Friûl e il prin de Europe dal Cinccent.

Al è un fat storic une vore impuartant, cemût che o vevin scrit l’an passât.
A tacâ dal 2004, stant che il riviel dal 1511 al jere stât fat cuintri de prepotence dai nobii e pe difese dai “dirits antîc” des comunitâts rurâls, lis associazions e chês altris entitâts des comunitâts furlane, slovene e todescje dal Friûl, che si dan dongje tal Comitât/Odbor/Komitaat/Comitato 482 ancjemò tal 2004 a à sielzude cheste date tant che Zornade Furlane dai Dirits.
Cun chest ategjament, che al cjale ae storie e soredut ae atualitât, ancje chest an la ricorence e ven memoreade di Radio Onde Furlane cuntune programazion speciâl che e larà indenant par dute la zornade.

microfonROF

Tra i apontaments principâi, doi aprofondiments di atualitât: un su lis prospetivis pal lavôr e pe economie dal Friûl, a tacâ di 9 e mieze di buinore, e un sul avignî dal Friûl inte suaze des riformis istituzionâls inviadis in regjon, a partî di 4 e mieze tal dopodimisdì.
Tra
11 e misdì e mieç, invezit, si fasarà il pont su la situazion dai dirits linguistics des comunitâts dal Friûl cul presidente de Agjenzie Regjonâl pe Lenghe Furlane, Lorenzo Fabbro, cul president dea Kanaltaler Kulturverein Alfredo Sandrini, e cul redatôr dal Novi Matajur Antonio Banchig.
Cun di plui a son previodûts ancje speciâi musicâi dedicâts ai dirits e aes nazionalitâts minorizadis de Europe.
Dutis lis informazions in cont de programazion de Zornade Furlane dai Dirits si cjatin ae direzion www.ondefurlane.eu, là che al è ancje pussibil scoltâ la radio in streaming.

Par cui che al vîf in Friûl al è ancje un altri apontament pal inovâl de Joibe Grasse dal 1511 e pe Zornade Furlane dai Dirits. Lu inmanee la clape di culture La Patrie dal Friûl, editore dal mensîl omonim in lenghe furlane, cu la presentazion publiche dal prin numar dal 2014 de riviste, ai 27 di Fevrâr, a 6 sot sere a Osôf, li de Tratorie di Min. Ducj i detais si cjatin achì.

Udinese – Atalanta 1-1

udin_neri

Plui grîs che blanc e neri. Cuintri de Atalanta l’Udin al mostre pe enesime volte la sô muse piês: chê di une scuadre flape e salacor ancje smonade, fate di zuiadôrs pôc atents – in difese e tal mieç dal cjamp – e inconcludents, a tacâ di Muriel, la delusion de zornade. La Atalanta e fâs la sô partide, oneste e duncje buine, e cjape lis misuris ai furlans e si palese plui grintose de metât dal cjamp indenant e atente ce che al covente tal repart difensîf.

La scuadre ospite si rint pericolose za sul imprin: sui disvilups dal prin corner, Bonaventura al tire e al cjape il pâl.
La rispueste furlane e rive dopo siet minûts cun Di Natale che i da a Muriel un balon di aur, dome di butâ dentri, di bessôl denant dal puartîr, ma la conclusion e je debule e centrâl, compagn di un altri tîr fat al minût diesim prin.
Di chê altre bande dal cjamp si fâs viodi Scuffet, che al è atent suntune zirade di Moralez, intant che Consigli nol à masse problemis suntune conclusion di Pinzi. Sù par jù une desene di minût plui tart une durmide de difese e une indecision dal puartîr furlan a stramudin un cross pinelât cul esterni di Raimondi intune ocasion gol par Brivio, che le bute dentri: un a zero.

I bergamascs a tegnin il control de partide e la reazion dal Udin no je alc e ce. I blancs e neri a vuadagnin alc in tiermins dinamisim ofensîf dopo de jentrade di Bruno Fernandes al puest di Naldo, ma la ande de partide no cambie e al è anzit Scuffet a ripsuindi inte maniere miôr a un pâr di balons pericolôs che a menacin la sô puarte.

Tal secont timp la musiche e somee jessi ancjemò chê. Alc in miôr al rive dopo de sostituzion di Muriel cun Nico Lopez, ma des bandis di Consigli l’Udin nol rive a rindisi pardabon pericolôs. Chest al sucêt dome cuntun bile tîr dal uruguaian che al oblee il puartîr bergamasc a fâ une rispueste curte, cu la bale che i rive a Di Natale che però al ven butât jù di Stendardo: rigôr e realizazion dai undis metris de bande di Totò.

La Atalanta e torne al atac, l’Udin si difint cun ansie e al ven salvât di un tic di fortune, stant che al bombe di vincjecinc metris tirade di Cigarini e sbat su la travierse, e di Scuffet che al met i pugns e al slontane un potenziâl pericul pôc prime de fin. Cun dut de esitance sul gol di Brivio, la sô prestazion e je une des miôr inte scuadre di Guidolin, là che meretin alc di plui di suficience ancje Di Natale, Nico Lopez, Bruno Fernandes e Danilo, intant che a deludin un tic Widmer e Basta, che però si capìs che si ctarès miôr su chê altre corsie.

Un pont par om e plui o mancul ducj contents, almancul pe classifiche. Se prime de partide si sperave intune vitorie, dopo dai passe novante minûts di zûc si scuen contentâsi dal fat che cualchi mês indaûr une partide cussì l’Udin le varès pierdude. Une sodisfazion che e fâs rime cun avilizion.

Lis lenghis locâls pe citadinance globâl

poster2014

Vuê e je la Zornade internazionâl de lenghe mari.

In cont di cheste ricorence, des sôs origjinis e des sôs motivazions, o vevin scrit alc za l’an passât.

Chest an la Zornade proclamade de UNESCO tal Novemabr dal 1999 e mostre une atenzion specifiche in cont dal rapuart tra lenghis locâls e citadinance globâl e dal ûs de lenghe mari tes siencis, te ricercje, te comunicazion e te divulgazion sientifiche, cemût che al ven sclarît achì.

La ‘Zornade’ e ven memoreade cun diviersis iniziativis. Tra chestis nus somee interessant segnalâ l’apontament li de Universitât di studis forescj di Tokyo.

La ‘Zornade’ e je soredut une ocasion di riflession in cont de ricjece de diversitât linguistiche e dal dirit ae lenghe proprie e aes lenghis in gjenerâl. Magari cussì no, a son une ricjece e un dirit che a vegnin menaçâts e tibiâts ducj i dîs.

In cont de ‘Zornade’, dal dirit ae lenghe e di altris iniziativis di rivendicazion e di promozion, ve chi cualchi segnalazion:
https://www.facebook.com/174907085047/photos/a.10150196912125048.438595.174907085047/10153816350180048/?type=1&theater
http://rising.globalvoicesonline.org/blog/2014/02/17/tweet-in-your-mother-language-on-february-21/
http://eurofurlan.wordpress.com/2014/02/21/zornade-internazional-de-lenghe-mari-ocjo-al-monalinguismo/.

Buine Zornade internazionâl de lenghe mari a ducj!

Moussu T e lei Jovents usgnot a Aison

1-moussu-t-e-lei-jovents-artemis-c-christine-cornillet-480ok

Fiestonone plene di musiche e di Ocitanie usgnot a Aison /Aisone te Val d’Estura (Valle Stura di Demonte), in provincie di Cuneo.
Li dal Bar Centro Fondo Aisone – Stazione Polare Occitana (Vie Ponte 1), a tacâ di 10 di gnot (h. 22) a sunin dal vîf Moussu T e lei Jovents, band di La Ciotat, nassude in bande dai Massilia Sound System, che e met dongje cun snait e cun energjie la cjançon ocitane, il blues e i sunôrs che a rivin de Afriche, des Americhis e dal Mediterani.

Moussu T (aka Tatou e pe anagrafe francese François Ridel), tra lis altris, al è un dai artiscj che a son stâts intervistâts pe realizazion dal libri Occitania, Friuli, Europa. La mia lingua suona il rock editât de associazion Lidrîs e Butui,  Moussu T e lei Jovents si cjatin cuntun toc, ‘Putan de Cançon’, ancje tal cd che al è in zonte di chê publicazion.

La serade e larà indenant cul dj set di DJ Bubu. Par savênt di plui: 0171 95717 e info@barcentrofondo.it.

Une biele ocasion par fâ une gjite ‘fuori porta’.

Genoa – Udinese 3-3

udin_neri

Un pont vuadagnât o doi ponts pierdûts? Passe vincjecuatri oris dopo de partide di Gjenue al reste chest pont di domande.

L’incuintri di Marassi al à une ande strambe: flape te prime mieze ore; vivarose te ultime part dal prin timp cul Udin che al cjape il control des operazions e lu ten te sezion centrâl de gare; dinamiche, divertente e salacor fûr cui sintiments, cul Genoa che al cîr di recuperâ i doi goi di disvantaç e l’Udin che cun cualchi erôr lu jude inte imprese. Il risultât al è un spieli di cheste situazion, tal ben e tal mâl.

Par ce che al tocje la scuadre furlane, i elements positîf si ju cjate tes prestazions di Basta, pe prime volte te corsie di man çampe, che al jere un pôc di timp che no si lu viodeve cussì, di Scuffet, che al cjape trê goi ma al fâs almancul doi intervents bielonons, di Bruno Fernandes, che al spude balins, di Badu, che al garantìs une pression costante, e di Pereyra, soredut in proiezion ofensive. A convincin di mancul i erôrs in difese e la mancjance di chê grinte che e covente par sierâ la partide, magari cuntun altri gol, cul risultât di cjapâ doi goi tai ultins vincjecinc minûts e di vê cualchi sgrisul di masse. Il stes discors al vâl pe partide di Muriel, che nol perdone dai undis metris (mancul mâl) ma nol mostre la continuitât e la luciditât che a coventin.

Pe cronache, l’Udin al va i gol cuant che al frache sul aceleradôr. Il svolt al è segnât de conclusion di Pereyra su sugjeriment di Muriel: pôcs minûts plui indenant a rivin il gol di Basta, che si zove di une bale robade de bande di Badu, e chel di Bruno Fernandes, che le met dentri dopo de rispueste di Perin al ferme un tîr di Pereyra. Il prin timp si siere cul doi a un segnât in acrobazie di Konate.
Dopo dal interval al rive daurman il tierç gol: lu segne Muriel suntun rigôr avonde contestât dai parons di cjase. A chest pont il Genoa al reagjìs, cu la jentrade di Fetfatzidis che al distribuìs balons di zuiâ e cui doi goi di Gilardino.

Trente agns dal ‘Progjet Spinelli’. Storie e atualitât

 spinelli

Trente agns indaûr il Parlament european al faseve bon il Progjet di Tratât che al istituìs la Union europeane, fat indenant di Altiero Spinelli.
Ai 14 di Fevr
âr dal 1984, ae fin de legjislature là che pe prime volte i eurodeputâts a jerin stâts elets diretamentri dai citadins dai Stâts membris des Comunitâts europeanis, chê risoluzion e vignive fate buine di une maiorance largjonone. Cun chel document il Parlament european al faseve indenant une propueste articolade di riforme e di riorganizazion dal asset istituzionâl des
Comunitâts europeanis di in chê volte.

 L’intindiment di chel che al ven clamât ‘Progjet Spinelli’, propit par marcâ l’impegn te sô elaborazion de bande di chel che al è stât un dai promotôrs plui atîfs e plui convints de unitât de Europe, a tacâ dal cussì clamât ‘Manifesto di Ventotene’, al jere chel di definî a clâr la distribuzion di competencis tra i Stâts membris e il nivel comunitari. In cheste suaze, là che a vignivin fats indenant ancje il concet di citadinance europeane e la denominazion di Union europeane, si definivin ancje il principi di fonde dal primât dal dirit de Union su chel dai Stâts, chel de partecipazion ative e democratiche dai citadins e chel de sussidiarietât, ven a dî la adozion di dutis lis decisions al nivel istituzionâl plui dongje dai citadins.

Chê propueste di riforme profonde des istituzions comunitariis intune prospetive federâl e jere une vore inovative e salacor rivoluzionarie. Propit par chest, dome pocjis des propuestis operativis e dai indreçaments che si cjatin tal ‘Progjet Spinelli’ a àn rivât adore – e dome in timps plui resints – a jentrâ dentri dai tratâts europeans.

Memoreâ chê iniziative, fate indenant di chel stes Parlament european che pe prime volte a nivel comunitari al veve cjapât sù ancje une iniziative a pro de tutele des minorancis cu lis risoluzions Arfè dal 1981 e dal 1983, nol à dome une valence storiche, par marcâ la impuartance di chel document e de influence, parziâl ma significative, che al à vût intal disvilup dal procès di integrazion continentâl.
L’inovâl de aprovazion dal ‘Progjet Spinelli’ al è ancje une ocasion di riflession su la Europe dal dì di vuê: chê che e je e chê che e mancje e che e covente fate sù.Une Europe dai popui, dai citadins europeans e dai dirits di ducj: plui solidarie, plui juste, plui sane, plui democratiche e pardabon “unide inte diversitât”. Une Europe divierse di chê fate indenant sei di chei che, sglonfs di nazionalisim, populisim e demagogjie. a son cuintri de integrazion europeane, sei di chei che si platin daûr di un europeisim di façade, minimalist, economicistic e intergovernatîf. Une Europe plui Europe,
pardabon ‘unide inte diversitât’.

Fiorentina – Udinese 2-0

udin_neri

Une biele partide e une brute sconfite. Il sium di rivâ a zuiâ la finâl di Cope Italie e di jentrâ in Europa League si sfante tal stadi “Franchi” di Florence. E vinç la Fiorentina e al piert l’Udin, che al cjape doi goi, al zuie avonde ben ma no rive a met la bale tal sac, un pôc par sfighe (il pâl cjapât di Di Natale), un pôc par imprecision e un pôc ancje par merit dai aversaris, a tacâ di chei osteâts di ex di Pizarro e Cuadrado.

La Fiorentina si zove ancje de poie fuartonone dai siei tifôs e a un ciert pont ancje de penurie di balons (isal pussibil che cuant che la bale e va fûr no sedi daurman une altre a disposizion?), che impen a saltin fûr ae fin de partide cuant che i parons di cjase jù tirin in curve e in tribune par fâ fieste cul lôr public.

La “viola” soredut e rive a profitâ inte maniere miôr dai erôrs tal mieç dal cjamp de scuadre furlane, che a vegnin stramudâts in iniziativis ofensivis che a rivin ancje a vê sucès, cemût che al sucêt in ocasion dal golon di Cuadrado, tal secont timp.

La partide di nossere e tache ben, in gjenerâl, par vie che si viodin dôs scuadris metudis ben tal cjamp e zuiadôrs che a son in stât di zuiâ cun intensitât, cualitât e motivazion, e in particolâr pal Udin, che al mostre di no vê pôre dai aversaris e si fâs viodi daurman des bandis de puarte di Neto cuntune conclusion di Bruno Fernandes fermade di un difensôr florentin.

Dopo di chestis flamadis sul imprin, l’Udin al cale e e cres la Fiorentina, che e zuie miôr cu la bale par tiere sul curt e cui sugjeriments luncs di Pizarro. Al è cussì che al rive l’un a zero: bale alte che e rive a Joaquin, difese blancje e nere ferme ipnotizade e passaç indaûr par Pasqual che al spare une bombe imparabile par Scuffet.

L’Udin al patìs la bote ma al rive a reagjî, cu la pression di Pereyra e Widmer e cui moviments di Di Natale e Bruno Fernandes. Ator de mieze ore a son almancul trê lis ocasion par rivâ ae paritât, a tacâ di un tîr fûr dal spieli di Di Natale e di une conclusion di Gabriel Silva che e ven mandade in corner di un superNeto. Plui indenant a rivin lis conclusions in acrobazie di Domizzi e di Di Natale che al cjape il pâl a man drete dal puartîr florentin.

Il secont timp si vierç cuntun pâr di erôrs in fase difensive e di impostazion de bande dal Udin, cun cualchi stocade dai parons di cjase che a cjatin la rispueste pronte tai biei intervents di Scuffet. La pression de Fiorentina e diven plui di chestis inciertecis blancjis e neris tal mieç dal cjamp che di une vere volontât di pression. L’Udin al somee masse lunc e i coventin un pôcs di minûts par tornâ a vê une sorte di eculibri e tornâ a sburtâ indenant cun Pereyra e Widmer. Cussì la pression ofensive e torne buine, ma a mancjin o l’ultin passaç o il tîr in puarte, cun dut che al jentre ancje Muriel.

La Fiorentina si difint e e rispuint in cuintripît: al rive cussì il gol di Cuadrado, che al scate e al tire in maniere imparabile.

L’Udin al continue a vê cûr, gjambis e sintiment, ma al stente tal moment di tirâ in puarte, tra tîrs cross, tîrs fûr, paradis di Neto e salvaments dai difensôrs. Il timp al passe, l’Udin al sburte, ma il risultât nol cambie. Si scombat fin tal ultin, cuant che Muriel al clame ancjemò Neto a fâ un meracul e Nico Lopez si fâs cjapâ des striis su la rispueste dal puartîr e al tente, cun premure, di metile dentri cul cjâf e cussì al tire fûr une conclusion flape che e vene neutralizade cence padin.

Ce restial cumò? La sodisfazion pe partide, pe cundizion dai singui, a tacâ di Pereyra e Scuffet, e la delusion pal risultât e pe straçarie di ocasions di gol.

Sperìn che no si pierdin il snait e la grinte mostrade de scuadre in chestis partidis di Cope. A coventin, e tant, ancje pal campionât. Stin calmuts, ma stin dismots!

Udinese – Chievo 3-0

fuarceudinees

Trê goi e trê ponts par une vitorie impuartante intune une partide ‘double face’. In cjase cuintri dal Chievo, l’Udin al fâ il risultât che al covente pe classifiche dal campionât e pal spirt, in spiete de seconde pontade de semifinâl di Cope Italie, ma al mostre dôs musis diferentis. La prime e je chê de scuadre smamide e flapute dal prin timp, che e stente a imponi il so zûc, e mostre di patî la determinazion palesade dai aversaris e si cjate a fâ erôrs che a puedin jessi fatâi. La seconde e je chê dal coletîf che sul imprin de riprese al cjape sù la gjestion de partide, al vierç lis marcaduris cun Di Natale e cul passâ dal timp al devente paron assolût dal cjamp di zûc.
Scuffet in puarte no si scompòn, la difese e ten bot cence padin, Basta al torne in cjamp cuntune buine prestazion, compagn di Badu e di Pereyra, che al da un contribût determinant ae vitorie. Buinis ancje lis prestazions di Di Natale, che al somee tornât ai siei nivei, concret e gjenerôs, e di Bruno Fernandes, che al firme un gol e un assist.

Te prime frazion i blancs e neris no rivin a imponisi, intant che il Chievo al somee plui ordenât e plui pericolôs,cuntun pâr di incursions des bandis di Scuffet, che a partissin di balons pierdûts malamentri de bande dai blancs e neris. Aes conclusions di Lazzari e Basta i veronês a rispuindin cuntune acelerazion di Stojan e cuntun colp di tac di Thereau su sugjeriment di Bentivoglio, ma la bale e sbat su la part esterne dal pâl, pe fortune de scuadre furlane, che te part finâl dal prin timp e confezione une ocasion golose cun Lazzari che al libere Di Natale su la corsie di drete, ma il cjapitani nol tire inte maniere miôr: la sô e je parabule lente che e finìs tes mans di Puggioni.

Dopo dal interval l’Udin al torne in cjamp cuntun Pereyra in plui (al puest di Lazzari) e la diference si le viôt in tiermins di agonisim e di zûc. Di une cumbinazion cun Basta e salte fûr la bale dal prin gol, fat di Di Natale cuntun diagonâl potent e precîs. Plui indenant prime al è Gabriel Silva che le met tal mieç par Pereyra, ma la sô conclusion di cjâf no i fâs pôre al puartîr zâl e blu, e dopo al è Di Natale che al fâs partî Pereyra: assist par Bruno Fernades, jentrât al puest di un Maicosuel volenterôs ma svoladi, e conclusion a puarte vierte.
Il doi a zero al rapresente ad in plen i gnûfs ecuilibris tal cjamp: l’Udin no si sente e al continue a puartâsi indenant. Guidolin al clame fûr Di Natale e al bute dentri Muriel che si vuadagne ancje lui il so pagnut e al partecipe in maniere positive aes manovris ofensivis dai blancs e neris. Al rive cussì ancje il tierç gol: lu firme Badu su assist di Bruno Fernandes.

Martars che al ven, a Florence cu la Fiorentina, la seconde pontade de semifinâl di Cope Italie. Ancjemò une volte: stin contents e stin camuts, par rivâ a vivi inte maniere juste chel che al è un apontament cu la storie.

Udinese – Fiorentina 2-1

bandieris

Une altre biele serade di Cope Italie. L’Udin al vinç par doi a un e al puarte a cjase un piçul vantaç inte direzion dal acès ae finâl di chê competizion. Te partide cuintri de Fiorentina si torne a viodi la scuadre biele di gnot, che e scombat, che no à pôre e che e je in stât di colpî in cuintripît in maniere ciniche e determinade.

Compagn che pôcs dîs indaûr cuintri dal Bologna in campionât, Guidolin al induvine dutis lis sieltis. Di Natale in cjamp dal prin minût al zuie il prin timp cun snait, esperience e voie di sacrificâsi e al fâs ancje il prin gol. Muriel al jentre te ultime part e i fâs zirâ i tabars a dute la difese colôr di viole, cui siei moviments e cu lis sôs conclusions: une zirade alte e une canonade milimetriche, chê decisive, che e sbat tal pâl e si ferme te puarte di Neto, che par almancul dîs minûts al reste a bocje vierte a domandâsi ce zîr che al à fat il balon. Widmer al conferme che te sô corsie al passe dome lui, che al è al servizi de scuadre sei cul balon che cence e che soredut al cor sù e jù cence padin e cun dutis lis acelerazions e lis verticalizazions che a coventin. In puarte Scuffet al è une sigurece, tra i pâi e fûr – biele la jessude sui pîts di Matri – e cu lis mans – i da ancje un biel scufiot a une bale pericolose butade tal mieç di Joaquin – e cui pîts. E Pereyra al masane cjamp e balons, al sugjerìs e al cuvierç e al à par sigûr i siei merits ancje te confezion dai doi goi furlans.

La partide e tache ben. La ploie no je la uniche protagoniste: a son ancje la Fiorentina e l’Udin.
I blancs e neris a mostrin di vê plui iniziative e la prime conclusion de gare e je di Nico Lopez dopo passe vincj minûts. Si fâs viodi indenant ancje la scuadre di Montella, cuntun tîr fûr bersai di Vargas, ma passade la prime mieze ore al è ancjemò l’Udin che al sburte indenant, cun Di Natale che i da un biel balon a Pinzi: tîr, rispueste di Neto e conclusion fûr di pôc di Pereyra.
Cul savê di dopo, si pues calcolìalu tant che un avîs dal gol: cuatri minûts plui tart Pereyra al scate in verticâl tal mieç dal cjamp, al zire a drete par Widmer che al jentre in aree e al passe a Totò, che al torne finalmentri a segn ancje su azion.

La Fiorentina e patìs il colp. Però e reagjìs daurman, ma e rive a bati Scuffet dome cuntune bordade imparabile di Vargas prime dal interval: un a un.
Tal secont timp Guidolin al lasse fûr Di Natale, che no i à plasût par nuie cemût che al è stât butât jù di Gonzalo Rodriguez e al met dentri Bruno Fernandes. La Fiorentina e cjape in man il balin de partide, cul possès de bale e cu lis conclusions di Joaquin e Matri, ma no rive a mudâ il risultât.
L’Udin, dopo vê patî la incressite de intensitât dal zûc dai aversaris, e recupare cjamp e iniziative. Montella al fâs jentrâ l’ex Cuadrado e Guidolin al mande dentri Badu par Pinzi e Muriel par Nico Lopez. L’intindiment dal mister di Castelfranco di dâ gnove energjie ae sô scuadre, intun moment là che la Fiorentina e somee contentâsi dal un a un, si concretize cun gnovis acelerazions di Pereyra e Widmer e cu lis conclusions di Muriel: la prime e va indalt, la seconde e va dentri e al è doi a un.

Al è ancjemò timp par scombati e par resisti. In spiete de tornade di Florence, là che si varà di scombati ancjemò par rivâ ae finâl de Cope. E ancjemò prime in spiete de partide di campionât cuintri dal Chievo, là che si varà di lâ indenant su la strade vierte a Bologne.

Cussì, ancje se o riscjìn di tornâ a scrivi chê e simpri chê, al covente stâ contents – anzit, contentons – ma al covente ancje continuâ a stâ calmuts.

Bologna – Udinese 0-2

fuarceudinees

Mancul mâl che al è finût il mês di Zenâr cu la sô file di partidis pierdudis in campionât!
Cun di fat, al à bastât passâ tal mês di Fevrâr e finalmentri si à viodût l’Udin vinci e puartâ a cjase trê ponts intun colp sôl. Dut chest al è sucedût sabide stade a Bologne, cuintri de scuadre di cjase, in chê che e veve za dutis lis carateristichis par jessi une dispate pe salvece.

Par sigûr no je stade une partidone, però, dongje dal risultât, al è saltât fûr alc altri di bon che al pare vie almancul un tic di chê avilizion che e compagne i tifôs de scuadre furlane a tacâ dal imprin de stagjon o almancul di un pâr di mês incà.
Di une cierte voglade, la robe miôr in assolût e je stade l’esordi in prime scuadre dal puartîr Simone Scuffet, stant che a jerin almancul dîs agns che no si viodeve un zuiadôr furlan cu la maie dal Udin. La sô prime volte in serie A – e al à dome 17 agns e siet mês – e je stade positive, cence goi, no dome par vie che nol è stât masse impegnât dai aversaris ma ancje parcè che cuant che al à vût alc ce fâ – in particolâr suntune punizion di Diamanti – nol à vude pôre e si à fat cjatâ tal puest just, tal timp just e te maniere juste.

simonescuffet
Altris aspiets positîfs a tocjin la mentalitât de scuadre: atente, dinamiche e coragjose. Al à mostrât cûr e sintiment ancje Guidolin, che tai ultins timps lis sôs cuotazions a jerin caladis cetant. L’alenadôr al à brincât dutis lis sieltis, sei te preparazion de partide che tes sostituzions, e al à mostrât di vê inmò il tamon de scuadre. Ben ancje Di Natale: un gol su rigôr e un ciert dinamisim, che al jere un pôc di timp che a mancjavin. Un altri che al à mostrât di jessi ancjemò al è Lazzari, che al à scombatût, si à vuadagnât il rigôr dal una zero e al à masanât chilometros e balons. Par no fevelâ di Nico Lopez, il miôr li denant e forsit in tiermins assolûts, e di Heureaux, il miôr in difese. Buine partide, par cualitât e cuantitât, ancje chê di Badu, intan che Basta nol rive a rindi cemût che si spietisi di lui.

Il belanç al è positîf pal risultât e pal caratar de scuadre, che si spere che finalmentri e vedi parât vie lis fantasimis che le an tormentade fin cumò. Dut câs, sul plan dal zûc al è ancjemò cetant ce fâ. Duncje, stin contents ma stin ancje “calmuts”, par doprâ la peraule clâf dal Guidolin dal an passât, stant che l’erôr piês, dentri e fûr dal cjamp di zûc, al sarès chel di montâsi il cjâf e di jessi convints che cumò al è dut a puest.
Di chê altre bande, però, si à di no vê pôre e di jessi otimiscj, cun ecuilibri e cun determinazion. Se chel di Bologne, cuintri di une scuadre a patràs, al è stât pardabon un svolt si lu viodarà za doman, te prime semifinâl di Cope Italie cuintri de Fiorentina in cjase.
Une ocasion par verificâ cemût che e sta la scuadre ancje pal campionât. E par fâsi vignî ancjemò plui cûr, plui snait e plui gole di no molâ e di fâ alc di bon. A chest pont si à di provâ a rivâ fin in som di cheste che, ben e no mâl, e reste une competizion impuartante e soredut une puarte par jentrâ in Europe.