Storie dal Friûl e de emigrazion furlane, i cincuante agns de Cunvigne di Friburc memoreâts vuê su Radio Onde Furlane

Vuê al cole un inovâl impuartant inte storie de emigrazion furlane e plui in gjenerâl in chê dal Friûl. Cincuante agns indaûr, ai 2 di Març dal 1969, inte sale riunions dal ristorant “Gambrinus” di Friburc, si davuelzeve la prime “Cunvigne dai furlans emigrâts in Svuizare”. Ancjemò in dì di vuê si pues calcolâle une iniziative impuartante, par plui di un motîf.

Un prin element par sigûr impuartant al è chel dai sogjets che le vevin inmaneade: a jerin la associazion “Pal Friûl” di Losanna (un sodalizi gnûf, che al jere stât metût adun propit in Svuizare intal 1968, cun chê di tignî dongje i emigrants cuntun spirt diviers, cemût che al marcave ancje il so non par furlan), il Fogolâr Furlan di Friburc e la associazion dai emigrants slovens dal Friûl-VJ, ancje cheste costituide di pôc. La cunvigne e nasseve dal bas e de colaborazion tra furlans e slovens.

Un altri element al è chel dai siei contignûts, stant che tra esperiencis e rivendicazions, in chê zornade si veve fevelât, si veve resonât e si veve discutût di economie, di societât, di lavôr, di culture, di dirits, di dibisugnis, di identitât, di solidarietât, di presint e di futûr, di servitûts militârs, di lenghis, di Universitât furlane, di sessualitât, di barachis, di prejudizis e di sperancis.
Cemût che si pues viodi massime se si lein lis relazions presentadis dai diviers protagoniscj di chel incuintri, la mozion unitarie fate buine ae fin de zornade e i articui detaiâts che vie pes setemanis seguitivis a vevin cjatât spazi su lis pagjinis di “Friuli d’Oggi”, chei che si vevin dâts dongje a Friburc a vevin discutût dal sigûr di cuistions in cont de emigrazion e dai furlans «pal mont», ma a vevin fevelât e resonât plui in gjenerâl in cont dal Friûl «in Friûl», che i partecipants ae Cunvigne a palesavin in maniere braurose la lôr volontât di jessi part di chel e che cun chel a volevin mantignî e disvilupâ un rapuart fuart, vîf e colaboratîf.

Probabilmentri al è par ducj chei motîfs che la organizazion de Cunvigne e veve cjatât diviers ostacui in Friûl. Gianfranco Ellero, che in chê volte al jere il diretôr dal sfuei dal Moviment Friûl, al scrivè che la preparazion di chê zornade e jere stade lungje e dificile «perché il Friuli vecchio e rancido aveva interesse a boicottare il convegno, ad evitare una presa di posizione poco gradita e tanto meno opportuna per il conservatorume di casa nostra».

Cundut achel, la Cunvigne e je stade inmaneade cun sucès, cun snait e cuntune disposizion e cuntune vision, là che di une bande al è fuart il spirt di chei timps e di chê altre si rive a vualmâ plui di cualchi contignût che al è bon ancjemò in dì di vuê, no dome in tiermins di storie e di memorie ma ben anche cun riferiment ae atualitât, pal Friûl «in Friûl» e ancje par chel che al è «pal mont» (che al esist ancjemò e anzit al è ancjemò plui consistent che in passât, se si calcolin i fîs e i dissendents dai emigrants “storics” adun cun chê che e je clamade “gnove emigrazion”).

Chê manifestazion di cussience, di vitalitât e di dignitât no poderin fâ di mancul di viodile e ricognossile nancje lis istituzions regjonâls, che a scugnirin tignî cont di lôr, a tacâ de prime Conference de emigrazion, inmaneade a Udin in maniere uficiâl che a Udin vie pal mês di Dicembar dal 1969.

Vuê la Cunvigne di Friburc e vignarà memoreade su Radio Onde Furlane inte rubriche setemanâl di aprofondiment Dret & Ledrôs, par cure di Mauro Missana, cuntune schirie di ospits e di testemoneancis.

Radio Onde Furlane si puest scoltâle sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Advertisements

Ai 27 di Fevrâr su Onde Furlane si ricuarde la Joibe Grasse dal 1511 e si fâs fieste pe Zornade Furlane dai Dirits

lengate12

Chê dai 27 di Fevrâr par Radio Onde Furlane e je une zornade speciâl, intal stes timp di fieste e di riflession. Al è l’inovâl de innomenande celebre Joibe Grasse dal 1511, cuant che al vignive inviât il riviel popolâr furlan plui impuartant che, massime intes campagnis, al veve à cjapât sù un caratar di rivendicazion dai “dirits antîcs” des comunitâts rurâls.
Par cheste reson, sui 90 Mhz inte plui part dal Friûl e sui 90.200 e sui 106.500 Mhz in Cjargne e ancje in streaming sul sît web www.ondefurlane.eu, chê date e ven memoreade tant che Zornade furlane dai dirits.

A son za tancj agns aromai che la radio libare dai furlans e presente pe ocasion une programazion specifiche che, tra selezions musicâls a teme e trasmissions di aprofondiment, e à chê di stiçâ la riflession in cont dai dirits dai furlans e des bataiis in at par difindiju e garantîju. Dut chest al sucedarà ancje chest an, in particolâr des 9 a buinore a 7 sot sere.

1511

La Zornade e vignarà introdusude de bande dal diretôr responsabil dal emitent, Mauro Missana, e dal responsabil di redazion Carli Pup, che aes 9 e mieze a lassaran spazi ae prime rubriche musicâl ‘a teme’, une edizion speciâl di Babêl Europe, trasmission dedicade ae produzion musicâl intes lenghis minorizadis di Europe par cure di Marco Stolfo, pe ocasion caraterizade di une scjalute di cjançons dutis pontadis su lotis e dirits.

Des 10 aes 11 e mieze il teme dai dirits al vigfnararà declinât cun riferiment specific al autoguvier teritoriâl. Inte suaze de rubriche di aprofondiment gjornalistic Dret & Ledrôs la cuistion e sarà frontade cun riferiment particolâr al dibatiment in cont des riformis istituzionâls a nivel regjonâl: cun Mauro Missana a discutaran de cuistion Giorgio Cavallo, Pier Mario Zanin, Rodolfo Ziberna, Massimo Moretuzzo e Cristiano Shaurli.

microfon_ROF

Une des cuistions clâf che e ven frontade dilunc de celebrazion de Zornade e je chê dai dirits des minorancis linguistichis storichis furlane, slovene e todescje. In particolâr, des 11 e mieze fint a misdì, Carli Pup al dialogarà cun redatôr dal setemanâl Novi Matajur, Antonio Banchig, su la situazion de comunitât slovene. Cun misdì a saran difondudis lis intervistis racuetis di Enrico Turloni in cont dal ûs public de lenghe furlane e dal gnûf progjet ARLeF dai sportei linguistics regjonâi decentrâts.

A misdì e mieze al sarà spazi pe rievocazion storiche de Joibe Grasse, cu la leture par cure di Barbara Minen, che e lassarà spazi ae musiche fint aes 3 e mieze dopo di misdì, cuant che Mauro Missana e Carli Pup a vierzaran la programazion pomeridiane.

aradio

A 5 sot sere, dopo des replichis des pontadis speciâls di Babêl Europe e Dret & Ledrôs za proponudis vie pe buinore, si fasarà il pont de situazion des politichis che a rivuardin la lenghe furlane, tornant a cjapâ sùù lis relazions presentadis a Udin intal ambit de seconde Conference Regjonâl de bande di Patrizia Pavatti, Marco Stolfo, Erika Adami e Donato Toffoli, dedicadis in maniere rispetive a scuele, aministrazion publiche, medie e planificazion linguistiche.

«Al è passât plui di un an de Conference Regjonâl – al sotlinee al rivuart il diretôr di Onde Furlane, Mauro Missana – ma chês relazions a son ancjemò di grande atualitât e si che duncje o vin decidût di tornâi a trasmeti in ocasion de Zornade furlane dai dirits».

Des 7 sot sere al sarà dât di gnûf spazi ae musiche «cence confins».

Il segnâl de ‘radio libare dai furlans‘ si pues cjapâlu dapardut ancje su smartphone, tablet, iPhone e iPad cu la aplicazion di pueste di discjamâ de rêt.

logo_web

Lou Seriol + Oi Polloi + Les Ramoneurs de Menhirs + Dissociative + La Banda Trapera del Rio + Coffeeshock + François Fontan = Babêl Europe 3/2019

Punk, vinîl, libris, storie e atualitât. A son lis cinc peraulis clâf che a permetin di definî in struc i contignûts de tierce pontade dal 2019 di Babêl Europe, il program cuindisinâl dedicât a lenghis, musichis, minorancis e nazions cence stât, che al cjate spazi intal palinsest di Radio Onde Furlane il martars in direte a 11 a buinore e po in repliche il miercus a une dopo di misdì e la sabide a une e mieze.

Inte trasmission che e va in onde vuê ai 5 di Fevrâr e po ancje doman, miercus ai 6, e sabide ai 9 al sarà spazi par musiche ruspiose e plene di snait che e rive de Scozie, de Bretagne, de Ocitanie, de Catalogne, dal Friûl e dal Burgenland.

Si scoltarà un altri toc gjavât fûr di Occitan, il disc plui resint dai Lou Seriol, che di cualchi dì al è disponibil ancje in vinîl. Cun di plui al sarà spazi par dôs formazion “storichis” tant che i scozês Oi Polloi e i bretons Les Ramoneurs de Menhirs, pai furlans di esportazion Dissociative, pe prime cjançon punk rock par catalan che si cjate tal album di esordi de La Banda Trapera del Rio jessût cuarante agns indaûr e pai Coffeshock Company, grup crossover espression de minorance cravuate de Austrie orientâl.

Si fevelarà ancje di un libri, Etnismo. Verso un nazionalismo umanista, la gnove edizion par talian di chel scrit di François Fontan, jessût te sô version definitive tal 1975, che al ven calcolât tant che une sorte di manifest dal ocitanisim politic moderni. La publicazion e je stade prontade di Diegu Corraine e Fredo Valla e e ten dongje ancje il dvd di E i à lo solelh, il videodocumentari dedicât a Fontan, fat juste vincj agns indaûr di Fredo Valla e Diego Anghilante. Jenfri vinars e domenie chê iniziative editoriâl e vignarà presentade tes valadis ocitanis dal Piemont.

Si pues scoltâ Babêl Europe  sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e Spotify.

 

Malasorti + Xavi Sarrià + Silvia Michelotti + Lin Jaldati + BGKO + Ando Drom = Babêl Europe 2/2019

Novitâts, anteprimis, anticipazions e memorie. Si podaressin doprâ chestis cuatri “peraulis clâf” par presentâ in struc la pontade numar 2 dal 2019 di Babêl Europe, il program cuindisinâl dedicât ae produzion musicâl tes lenghis propriis des minorancis e des nazions cence stât dal nestri continent che al cjate spazi tal palinsest di Radio Onde Furlane.

Cun di fat, vie pe trasmission che e larà in onde in direte vuê, martars ai 22 di Zenâr a 11 a buinore, e po in repliche ancje doman, miercus ai 23 a une dopo di misdì, e sabide ai 26, ancjemò a une e mieze, si podarà cerçâ alc di un pâr di produzions babelichis che a son saltadis fûr che nol è tant, pôcs dîs o pocjis setemanis indaûr, al sarà spazi fintremai par un progjet che al è ancjemò in lavorazion e, in coerence cun chê che e je une sorte di tradizion dal program, ancje par chest an e sarà fate une celebrazion in musiche de Zornade internazionâl de memorie des vitimis dal olocaust.

Une des dôs novitâts e je S’ArdiCity, il disc gnûf di Malasorti, progjet metût adun di Francesco Medda “Arrogalla” cu la complicitât dal cjantant Emanuele Pittoni e dal trombetist Francesco Bachis, che al misclice in maniere ingteressante eletroniche, musichis dal mont, sonorizazions ambientâls e lenghe sarde.
Chê altre e rive dai Paîs Catalans e e je la produzion plui resinte di Xavi Sarrià adun cu la band El Cor de la Fera.
La anticipazion, invezit, e je chê dal lavôr “in progress” de cjantautore furlane Silvia Michelottiche al somee une vore interessant pes sugjestions leterariis e pes sonoritâts.

Pe Zornade de memorie  e sarà la ocasion par tornâ a discuvierzi la cjantante yiddish Lin Jaldati, il storic grup rom ongjarês Ando Drom e la Barcelona Gipsy balKan Orchestra.

Si pues scoltâ cheste pontade Babêl Europe in direte ca di cualchi ore, martars ai 22 di Zenâr a 11 a buinore, e po in repliche ancje doman, miercus ai 23 a une dopo di misdì, e sabide ai 26, ancjemò a une e mieze.
L’apontament cun Babêl Europe
e plui in gjenerâl cun Radio Onde Furlane al è sui 90 Mhz te plui part dal Friûl, sui 90.200 Mhz te plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane ancje cheste pontade de trasmission si podarà tornâ a scoltâle in podcast cun Spreaker e cun Spotify.

Dopo dai 4 di Novembar, dôs cjançons a son miôr di une

La zornade dai 4 di Novembar e je finide. Ancje il centenari de “vitorie” al è lât.

Vie pai ultins agns chel inovâl si è jemplât simpri plui di retoriche sglonfe, vueide e in chel istès strafonde di banalitâts e mistificazions.

O vin il suspiet che chê solfe e larà indenant ancjemò cetant.

Tai ultins agns o scrivevin che denant di cheste situazion al jere miôr scoltâ une biele cjançon par furlan.

O tornìn a scrivilu ancje chest an, cuntune zonte.

Dongje di cheste, che in dutis lis sôs versions nus somee simpri la cjançon juste te zornade juste (cundut che e larès ben ancje in altris zornadis), a ‘nt zontìn une altre, diretamentri de Sardegne.

 

Buine Fieste de Patrie dal Friûl. Al Friûl che al è in Friûl e al Friûl che al è pal Mont

Chê dai 3 di Avrîl e je une zornade impuartante pal Friûl che al è in Friûl e pal Friûl che al è pal Mont.
E je une date che e ten dongje storie, atualitât e avignî e propit cun cheste vision e merete ricuardade e memoreade.

Juste in chê dì, tal 1077, l’imperadôr Indrì IV i deve al patriarcje di Aquilee Siart il titul di «Comes Fori Julii, Dux et Marchio». Cun chê invistidure il patriarcje al cjapave sù il podê «temporâl», ven a dî chel «politic», e il Patriarcjât di Aquilee al deventave, inte suaze dal Imperi, un «stât» par so cont. Chel moment si pues calcolâlu une sorte di «at di nassite» dal Friûl, intindût tant che comunitât teritoriâl unitarie, tant che «Patrie», cemût che al vignarà clamât par tancj secui. Cun di fat, chê situazion politiche e istituzionâl e marcarà la sô unitât storiche e gjeografiche dutun cu la sô specifiche pluralitât linguistiche e culturâl e in cheste suaze cu la peculiaritât e cu la unitarietât de lenghe furlane. Cun di plui, propit in chel contest, il Friûl al disviluparà une rêt di relazions cun diviersis zonis de Europe, sei inte direzion nord-sud che in chê est-ovest.

La «Fieste de Patrie dal Friûl» no je une ricorence ni di nostalgjie, ni di mitologjie. Il riferiment ae Ete di Mieç, al «stât» patriarcjâl e salacor ancje ae sôs istituzions – a tacâ del Parlament, screât ai 6 di Lui dal 1231 e par chel ricognossût tant che un dai plui antîcs de Europe – al tocje soredut il Friûl contemporani e chel di doman. Al è cussì in dì di vuê, cemût che si lei ancje tal test de leç regjonâl 6/2015, che trê agns indaûr e à istituît la Fieste in maniere uficiâl, e al jere cussì tal 1977, cuant che a Aquilee si faseve la sô prime celebrazion, propit cun chê di promovi la identitât e l’autoguvier dal Friûl, daûr dal sburt des rivendicazions saltadis fûr cuntune fuarce gnove dopo dal taramot. a tacâ des esperiencis di partecipazion e di autogjestion di chel timp de int des comunitâts locâls.

Propit chel spirt, ancje se si palese cun ategjaments diferents che a van daûr des specificitâts dai diviers sogjets che vie pai ultins cuarante agns a àn memoreât la «Fieste de Patrie dal Friûl», al è il caratar di fonde des tantis manifestazions inmaneadis vie pai ultins cuaranteun agns pal inovâl dai 3 di Avrîl.

lengate12

La «Fieste de Patrie» e je une ocasion di riflession, di cognossince e di condivision. Par resonâ in cont dal Friûl di vuê e dal so avignî, de sô pluralitât linguistiche e culturâl e de sôs relazions cul rest de Europe e dal Mont. Par cognossi e ricognossi la dimension teritoriâl unitarie dal Friûl, la complessitât de sô storie e de sô identitât e la impuartance des sôs diviersis specificitâts. Par spartî ideis, cognossincis e cussience. Pal Friûl che al è in Friûl e pal Friûl che al è pal Mont.

La «Fieste de Patrie dal Friûl» e je la Fieste di une Patrie che e je di ducj, inclusive, plurâl e rispietose. E par chel e je une Fieste di ducj e par ducj. Di ducj e par ducj chei che i tegnin al Friûl, ae sô unitât teritoriâl, ae sô pluralitât linguistiche e culturâl, ae sô esistence, ae sô resistence e al so avignî.

E je la fieste di une Patrie che par chel no à ni agjetîfs ni etichetis.
E je la fieste di une Patrie che no je ni «piçule», ni «extralarge».
E je la nestre fieste.

Buine Fieste de Patrie a dutis e a ducj!
Al Friûl che al è in Friûl e al Friûl che al è pal Mont.

22_03_014_udin_friul

La Joibe Grasse dal 1511 e la Zornade Furlane dai Dirits par radio, in rêt e in librarie

Chê di vuê e je une zornade impuartante pal Friûl e pai furlans, in Friûl e ator pal Mont.
Al è l’inovâl de Joibe Grasse dal 1511, l’inviament dal plui impuartant riviel popolâr furlan: une pagjine di storie, magari cussì no ancjemò masse pôc cognossude e fintremai un tic mistificade e rimovude, che e à mostrât la dignitât e la sogjetivitât des comunitâts furlanis, in lote pe difese dai lôr dirits antîcs.
Par chel, chê dai 27 di Fevrâr, e je za di timp la Zornade Furlane dai Dirits.

Ancje chest an, cemût che al sucêt di dîs agns incà, Radio Onde Furlane e propon ai siei scoltadôrs une programazion dute speciâl par cheste zornade.
Lis trasmissions si inviaran cun aprofondiments e speciâi musicâi dedicâts al teme dai dirits in Friûl.
Ta cheste suaze si varà ancje la ocasion di scoltâ i intervents dai grups di vore metûts sù par fâ il pont su la metude in vore de leç regjonâl su la lenghe furlane, ma ancje par resonâ su la situazion politiche furlane e, massime, sui spazis di autoguvier e sul plan dai rapuarts tra Stât centrâl e Regjon.
No mancjarà po la ocasion par fevelâ de situazion de comunitât slovene dal Friûl e des comunitâts gjermanofonis, in particolâr di Sapade, che juste ta chescj ultins mês e je tornade adun ancje sul plan aministratîf cu la plui part dal Friûl te regjon Friûl-VJ.
Ancje i programs musicâi a saran in teme cu la zornade, cun pontadis speciâls di Gerovinyl 55/80, Tommy Radio Magazine e Babêl Europe.

microfon_ROF

Cun di plui, a Udin, l’inovâl de Joibe Grasse dal 1511 al vignarà memoreât ancje te Librarie Tarantola, cuntun incuintri di presentazion dai contignûts dal libri 1511. La ‘crudel zobia grassa’. Rivolte contadine e faide nobiliari nel Friuli tra ‘400 e ‘500 di Furio Bianco, dedicât propit a chê storie.
In chê ocasion l’innomenât storic, autôr di chê ricercje, al dialogarà cun Carli Pup di Onde Furlane e l’incuintri al vignarà moderât dal diretôr de emitente Mauro Missana.

logo_web

La conclusion di Europa 57/17, students e esperts a domandin plui Europe e plui Friûl

La Europe e clame e il Friûl al rispuint. La sô rispueste e je chê di une comunitât teritoriâl multilengâl e multiculturâl che e à cussience di chestis sôs peculiaritâts e che su chestis fondis e marche il so jessi part de Europe: tant a dî un Friûl «unît te diversitât» che si ricognòs te Europe «unide te diversitât» e che par chel al domande ae Union Europeane di jessi plui Union e plui Europeane.

Dut chest al è saltât fûr a clâr inte suaze di Europa 57/17, iniziative metude adun de bande  dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane, che e je stade screade ai 14 di Otubar, cu la prime di une serie di programs su Radio Onde Furlane, e che si à sierade vinars ai 3 di Novembar cuntune conference/taule taronde li dal centri economic e juridic dal Ateneu Furlan di Vie Tomadini 30/a.

Propit l’event conclusîf dal progjet, cu la partecipazion di cuatricent students dal convit Paolo Diacono di Cividât e dai istitûts Deganutti, Uccellis, Marinelli, Percoto e Stellini di Udin e cui intervents di une schirie di reladôrs che a àn frontât diviers aspiets de storie e de atualitât dal procès di integrazion continentâl, cuntune atenzion specifiche pontade su la «prossimitât» e su la «cuotidianitât» de dimension europeane, al à mostrât cetant che a son fuarts e positîfs, in teorie e in pratiche, i rapuarts tra Friûl e Europe e tra Europe e Friûl.

Une sensibilitât di cheste fate le a à palesade in particolâr il scritôr, insegnant e vicepresident de Cjase pe Europe  di Glemone, Angelo Floramo, che tal so intervent al à marcât cemût che di simpri il Friûl, unitari e plurâl, al sedi simpri stât part de Europe e che chestis sôs peculiaritâts, scjafoiadis tal ultin secul e mieç dal nazionalisim dominant, a resistin ancjemò in dì di vuê e ta chest gnûf contest a deventin un patrimoni e une risorse.

Par Floramo la alteritât dal Friûl plurâl, che e jere stade calcolade un probleme e salacor un pericul inte suaze dal Stât nazionâl talian, fat sù su la fonde de idee di nazion «una d’arme, di lingua e d’altare», cemût che al scriveve Alessandro Manzoni te sô poesie ‘Marzo 1821’, e devente une risorse impuartantone par metisi in relazion positive cun chei altris e duncje par jessi citadins europeans, cun cussience e cun cognossince.

Su chescj aspiets a àn tornât a bati ancje Carli Pup, president de cooperative Informazione Friulana, e Diego Navarria, president de Assemblee de Comunitât linguistiche furlane. In particolâr a àn fevelât di esperiencis di cooperazion cun altris entitâts des minorancis in Europe di caratar rivendicatîf e politic – par esempli il Protocol di Donostia pe garanzie dai dirits linguistics in Europe, fat indenant di 120 sogjets e tra chescj propit di Informazione Friulana, Radio Onde Furlane, La Patrie dal Friûl, CLAAP e Novi Matajur – o ben culturâl e promozionâl, a tacâ des colaborazions tra i media ai progjets in rêt e de realizazion dal festival Suns Europe, e di cemût che il disvilup de integrazion europeane si zovi de tutele des minorancis e al vedi zovât ae tutele des minorancis, massime tal Stât talian, là che lis «normis specifichis» proviodudis dal articul 6 de Costituzion a son rivadis dome a tacâ de fin dal secul stât.

Chest element al jere saltât fûr ancje te ultime trasmission radiofoniche di Europa 57/17, cu la testemoneance di Antonio Banchig, gjornalist dal Novi Matajur. Ta chês altris dôs pontadis de serie coordenade e condusude di Marco Stolfo, e jere stade presentade la storie dal procès di integrazion europeane e a jerin stâts frontâts diviers argoments leâts ae situazion dal dì di vuê, cui intervents dal responsabil sientific dal Centri di documentazion europeane ‘G. Comessatti’‘, Claudio Cressati, dal espert di politiche europeane e internazionâl Roberto Castaldi (Universitât eCampus e CESUE), e di Renato Damiani de Cjase pe Europe di Glemone.

Propit Damiani, adun cul president dal Comitât talian dal Moviment european, Pier Virgilio Dastoli, e cul ricercjadôr de Scuola Superiore Sant’Anna di Pisa, Giorgio Grimaldi, al è stât un dai reladôrs de prime part de buinore dai 3 di Novembar, che e jestade dedicade ai Tratâts di Rome e aes disfidis che a son denant de Europe dal dì di vuê.  Te seconde parte de zornade a son stâts ancje i intervents di Francesco Rossi di Zero Idee e di Sonia Bosaro e Jolita Ziauberyte de Universitât dal Friûl, che a àn fevelât des oportunitâts pai zovins inte suaze dai programs Europe Creative, Europe pai CitadinsZoventût e de mobilitât europeane e internazionâl dai students, a tacâ dal progjet Erasmus, che juste tal 2017 al finìs i siei prins trente agns.

La partecipazion dai students e je stade buine e vivarose e si à palesade cuntune schirie di domandis e osservazions che a àn tocjât diviers argoments: de situazion de Catalogne ai gnûfs slargjaments de UE, dal defict democratic ai dirits sociâi, de necessitât di plui competencis pes istituzions europeanis aes cuistions leadis ae sigurece e al terorisim.

Il progjet Europa 57/17 al è stât metût adun cun chê di memoreâ il 60esim inovâl dai Tratâts di Rome, di fâ cognossi il procès di integrazion europeane e lis istituzions de UE e di promovi cussì une citadinance europeane cussiente. Su la fonde di cemût che e je lade la buinore di vinars stât e po ancje daûr dai contignûts des trasmissions su Onde Furlane, si pues dî che al à jonzût i siei obietîfs. Un pont di partence o un moment di passaç inte direzion di une Europe pardabon «unide te diversitât», cence pôris, cence prejudizis e magari ancje cence retoriche.

Europa 57/17 al è stât metût adun ancje cu la colaborazion dal progjet MuMuCEI dal Dipartiment di Siencis Juridichis de Universitât dal Friûl, de ‘AUSE (Associazione universitaria di studi europei), de Cjase pe Europe di Glemone, de  Accademia europeista del Friuli-Venezia Giulia di Gurize, de associazion KLARIS e dal CIME.

 

La cjançon juste (massime) pai 4 di Novembar. Ancje par chest an

 

Vuê o sin ai 4 di Novembar. Ancje chest an al è miôr scoltâ une cjançon.

Cheste (ancje in cheste version achì) e je simpri la cjançon juste te zornade juste (cundut che e larès ben ancje in altris zornadis).

Europa 57/17, doman ai 3 di Novembar la taule taronde finâl

La Europe e clame e il Friûl al rispuint, marcant il fat che, juste par vie des sôs peculiaritâts, al è european, al fâs part de Europe e te dimension di une Europe pardabon ‘unide te diversitât’ al pues jessi plui Friûl e duncje plui european. Dut chest al salte fûr a fuart de iniziative, metude adun de bande dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane, dal titul  Europa 57/17, che e je stade screade ai 14 di Otubar e che si siere doman cuntune conference/taule taronde che e viodarà la partecipazion di diviers esperts e di cuatricent students di un trop di scuelis superiôrs.

Chescj aspiets a son stâts marcâts za vie des trê trasmissions cun chel stes titul, trasmetudis di Radio Onde Furlane  tes setemanis passadis e che si pues tornâ a scoltâlis in rêt,  e a tornaran a jessi frontâts, cu la zonte di cualchi detai par esempli in cont des oportunitâts pai zovins, de citadinance europeane e de tutele des minorancis, intant dal incuintri di doman, che si davelç li de Aule 3 dal Pôl economic e juridic de Universitât dal Friûl, a tacâ di 9 a buinore. Il program complet si pues leilu ancje culì.

Europa 57/17 si insuaze intun progjet di rêt che al coinvolç ducj i centris di documentazion europeane dal Stât talian e che il so titul al è 60 anni di Unione europea: sfide e prospettive per l’Europa, e al à chê di memoreâ il 60esim inovâl dai Tratâts di Rome, di fcognossi il procès di integrazion europeane e lis istituzions de UE e di promovi cussì une citadinance europeane cussiente.

Europa 57/17 al è stât metût adun ancje cu la colaborazion dal progjet MuMuCEI dal Dipartiment di Siencis Juridichis de Universitât dal Friûl, de ‘AUSE (Associazione universitaria di studi europei), de Cjase pe Europe di Glemone, de  Accademia europeista del Friuli-Venezia Giulia di Gurize, de associazion KLARIS e dal CIME.

Altris informazions in cont di dute la iniziative si cjatin achìachì, achì e achì.