«Che al puedi jessi in pâs chest Nadâl che al ven», vuê un speciâl di Babêl Europe

microfonROF

Vuê al è martars  e su Radio Onde Furlane a 11 a buinore al torne Babêl Europe, il program cuindisinâl dedicât a lenghis, musichis, minorancis e nazions cence stât.

Vuê al è l’ultin martars dal 2015, un an che al è stât marcât sei des memoreazions (e magari cussì no, soredut des celebrazions… ) dal centesim inovâl de jentrade dal Ream di Italie te Prime vuere mondiâl sei di tancj conflits, vecjos e gnûfs.

Pieter_Bruegel_the_Elder_-_The_Tower_of_Babel_Rotterdam

Par chel vuê a 11 a buinore e doman, ai 30 di Dicembar, a une dopo di misdì e torne in onde (sui 90 Mhz te plui part dal Friûl, sui 90.2 Mhz in Cjargne e su www.ondefurlane.eu in dut il mont) la pontade di Babêl Europe prontade pai 3 e pai 4 di Novembar stâts, dedicade aes vueris e a cui che lis vueris lis à patidis di plui.

Un viaç tra storiis, musichis e peraulis, tra Catalogne, Friûl, Ocitanie e Bretagne, tra ‘soldadets’, ‘soldaduts’, ‘soldatins’, ‘soldats’ e ‘soudard’, cun Manel, Mitili FLK, Claudi Martì, Alan Stivell e Lluis Llach.

Cuntune atenzion specifiche pe Prime vuere mondiâl, cuntun pâr di sugjeriments di leture  e cul auguri, tirât fûr dal test di une des cjançons inte scjalute: «Che al puedi jessi in pâs chest Nadâl che al ven».

‘Parole povere’, a Nadâl Pierluigi Capello su Rai 5

capello_parolepovere

Une presince fuarte e preseade de culture e de leterature furlane contemporanie par television.

Usgnot a 9 e un cuart, su Rai 5 si podarà viodi il documentari di Francesca Archibugi ‘Parole povere’, che al conte la personalitât, la storie e soredut la scriture dal poete furlan Pierluigi Capello.

Al è un apontament di no pierdi. Ancje par cui che il film lu veve za viodût doi agns indaûr alì dal Torino Film Festival, là che al jere stât presentât in anteprime.

E ancje par cui che al jere stât un tic deludût, forsit par vie che de bande di une regjiste cussì innomenade tant che Francesca Archibugi si spietave un cine plui profont e plui siôr, plui in linie cu la la personalitât, cu la storie e cu la scriture di Capello. Magari al varà la ocasion par cambiâ idee.

Une altre lungje vilie di Nadâl, i auguris speciâi di Onde Furlane

logo_web_ROF_new

Vuê su Onde Furlane si fâs fieste pe vilie di Nadâl. Ancje chest an, a tacâ di 10 a buinore, la ‘radio libare dai furlans’ e fasarà une programazion speciâl cun intervents di in direte di colaboradôrs, ospits e scoltadôrs e cuntun grum di musiche dal vîf.

franco giordani a onde furlane

Pe Fieste de Vilie de buinore a sunaran Alvise Nodale, Franco Giordani e Piero Cargnelutti. Tal dopodimisdì, di 3 a 6, e sarà lla tierce edizion speciâl di GabiTerapia OneLove: trê oris di hip hop cul miôr dai dj e dai rappers dal teritori.

gabriellina one love 2

La sere, di 8 vie par dute la gnot fintremai a 8 di buinore dai 25 di Dicembar, al sarà un altri apontament ‘classic’ sot dal arbul di Nadâl di Onde Furlane: la otave edizion di Piotrethon, maratone radiofoniche pe libertât di esisti, cun speakers, concierts e djsets.

pio3_piotre

Cun di plui a misdì e mieç dai 25 di Dicembar si scree ancje une gnove trasmission, che e larà indenant vie par su par jù un mês, dal lunis ae sabide simpri cun chel orari: a son lis leturis, par cure dal lôr autôr, Luca De Clara, da Lis storiis di Inge e Bach, bielis contis pai fruts che a son stadis publicadis timp indaûr de bande de KappaVu intun librut cu lis ilustrazions di Francesca Gregoricchio.

declara

La fieste e je za tacade lunis di sere cu lis sperimentazions musicâl di Buio Omega, pontade speciâl dal Hybrida Show, che e cjape ispirazion dal solstizi di invier.

Nadal

Pe cuantitât, pe varietât e pe cualitât ancje chest an chê di Onde Furlane si pues clamâle la lungje vilie di Nadâl.

Altris informazions in cont de programazion speciâl di Onde Furlane si pues leilis achì.

Auguris babelics 2015-2016!!!

leb

Bon Nadâl e bon an
Vesel Božič in srečno novo leto
Ein frohes Weinachtfest und ein glückliches Neues Jahr
Buon Natale e felice anno nuovo
Bonas pascas de Nadale e prosperu annu nou
Pulit Nadal e bona anada
Bon Tsalendre e Treinadan
Joyeux Noël et bonne année
Zorionak eta Urte Berri On!
Nedeleg laouen na bloavezh mat
Bon Nadal i un Bon Any Nou!
Nadelik looan na looan blethen noweth
Pace è salute
Noflike Krystdagen en in protte Lok en Seine yn it Nije Jier
Nadolig Llawen
Bon Nadel y Bon Ann Nuef
Nollick ghennal as blein vie noa
Bachtalo krecunu Thaj Bachtalo Nevo Bers
Buorrit Juovllat
Nollaig chridheil huibh

Torino – Udinese 0-1

fuarceudinees

L’Udin al zuie, al scombat, al sufrìs e al vinç. La trasfierte a Turin e va inte maniere miôr pe scuadre di balon furlane, no dome pal risultât finâl ma ancje pe maniere che si à compuartade dilunc vie di dute la partide: cun grinte, cun snait e cun atenzion.

Toro e Udin a zuin une partide biele e plene di emozions. I blancs e neris a segnin cualchi minût prime dal interval, dopo jessi stâts pericolôs in plui ocasions e dopo vê resistût ai atacs dai parons di cjase. I granatas a provin a dreçâ la partide tal secont timp, ma l’Udin nol mole e ancje cuant che si cjate in inferioritât numeriche al ten bot e al difint i trê ponts di puartâ a cjase.

La partide dal Olimpico e viôt une denant di chê altre dôs scuadris che vie pe setemane a vevin zuiât e pierdût l’otâf di finâl di Cope Italie e che tes ultimis partidis di campionât a vevin palesât plui di cualchi probleme, a tacâ de mancjance di risultâts.

Des dôs e je propit chê furlane la formazion che e mostre di vê plui numars: in atac e je la cubie Di Natale-Perica; daûr di lôr Bruno Fernandes al fâs moviment e al manten i riforniments; te linie mediane Lodi al governe la manovre,  Widmer e Edinilson a sburtin su lis corsiis laterâls e Badu al recupare balons e si fâs viodi ancje indenant; Karnezis tra i pâi al è une sigurece e denant di lui a stan in vuaite Felipe, Wague e Danilo. Il Toro al somee plui flap e plen di pôre, ancjemò traumatizât par vie dai cuatri patafs che al à cjapât tal derby di Cope Italie.

I blancs e neris a son svelts e concrets. Si difindin cun atenzion e a imbastissin azions ofensivis che a metin in dificoltât i aversaris. Lu fasin sul imprin cun Di Natale, che al scjalde lis mans di Padelli, e dopo vê neutralizât cun Karnezis une biele conclusion di Bellotti a tornin a fracâ il pedâl dal aceleradôr par cirî la strade dal gol.

La marcadure e rive al minût 41 cun Perica, che al ven servît benon di Lodi, al profite di un mieç pastroç tra Molinaro e Moretti e al cjate il tîr just, dopo vê za straçât cualchi minût prime une altre ocasion.

Sierât il prin timp in vantaç, l’Udin di une bande al tire sù une muraie difensive par mantignî il vantaç e di chê altre al prove a viodi se al rive a segnâ il secont. La reazion dal Toro, vuidade di Quagliarella e di Bellotti, no prodûs masse ocasions, nancje cuant che l’Udin al reste in dîs pe espulsion di Wague. Cuntun om di mancul – e cun Piris al puest di Di Natale e cun Adnan al puest di Edenilson – l’Udin al resist e viers la fin si svicine fintremai al secont gol, ancjemò cun Perica, che te partide di Turin al scuen contentâsi dome di vê segnât il so prin gol dal campionât e no ancje di vê fat il bis.

Pal Udin la prestazion e i risultât che a coventavin par cjapâ ossigjen, pal Turin ancjemò marum e avilizion.

Suns Europe e alc altri ancjemò a Babêl Europe, su Onde Furlane e ancje in rêt

sume

Martars ai 15 di Dicembar, in direte a 11 a buinore su lis frecuencis di Radio Onde Furlane (90 Mhz te plui part dal Friûl,  90.2 Mhz in Cjargne e www.ondefurlane.eu in dut il mont), al è tornât Babêl Europe, il program cuindisinâl dedicât a lenghis, musichis e nazions cence stât.

Pieter_Bruegel_the_Elder_-_The_Tower_of_Babel_Rotterdam

La trasmission, che e je lade in onde in repliche ancje miercus ai 16 di Dicembar a une dopo di misdì, no podeve fâ di mancul di contâ (e di fâ scoltâ) ancjemò alc di Suns Europe, dai vincidôrs Me+Marie al grup groenlandês dai Sumé, protagonist de musiche e de politiche de Groenlande dai agns Setante e di un dai cines presentâts a Udin dentri de Mostre dal Cine passe vincj dîs indaûr.

corsiche

Cun chê di meti dongje i contignûts dal incuintri dai 4 di Dicembar stâts cun Patrizia Gattaceca – inte suaze di Sunsûrs, la sezion leterarie di Suns Europe – e il risultât des elezions regjonâls in Corsiche, dentri di Babêl Europe e je stade la pussibilitât di scoltâ ancje Canta U Populu Corsu.

nola

La trasmission si à sierade cuntune cerce dal gnûf progjet musicâl e audiovisîf di Fermin Muguruza, Nola? Irun meets New Orleans, un puint di sunôrs e di visions tra il Paîs Basc e la Luisiane.

Par cui che al à voie di scoltâlu, il program si cjate ancje in rêt.

Lazio – Udinese 2-1

udin_neri

L’Udin al piert ancje in Cope Italie. Dopo dai cuatri papins cjapâts in cjase domenie cuintri dal Inter, la scuadre di balon furlane si ripet a Rome e i lasse il cjamp e il risultât ae formazion romane, che e passe il turni e i da un tic di stabilitât ae bancjine di Pioli, che tes ulimis setemanis e jere deventade pardabon balarine.

I blancs e neris a partissin avonde ben e sul imprin a rivin fintremai a fâur pôre ai parons di cjase, che però cul passâ dal timp a cjapin sù il control de partide e tal secont timp prime a van sot di un gol e po a drecin la partide, profitant de eclissi di un Udin smamît e in inferioritât numeriche.

Pe cronache e je propit la formazion di Colantuono chê che in principi si rint plui pericolose indenant. Al sucêt, per efiet de pression de scuadre furlane, prime cuntun pastroç di Maurico comedât tal ultin di Berisha e po cuntun pâr di tentatîfs fûr bersai di Perica.

La supremazie teritoriâl de Lazio, cuant che e rive a palesasi ad in plen, no prodûs alc e ce, sei par vie de imprecision di Candreva, sei parcè che Meret si cjate simpri tal puest just tal moment just e al interven inte maniere miôr su lis conclusions dai laziâi.

Il prin timp si siere cence goi, intant che la seconde frazion si vierç cuntune Lazio plui determinade. Colantuono, che za vie pal prin  timp al veve scugnût cambiâ Domizzi, che si veve sinistrât, cun Felipe, al decît di tirâ fûr cuasi daurman Guilherme par Kone e dopo vincj minûts ancje Evangelista par Aguirre.

Lis dôs sostituzions a saran decisivis, tal ben e tal mâl: di une bande Kone al invente e al firme il gol dal vantaç furlan; di chê altre Aguirre si fâs mâl ae schene e l’Udin, che no pues fâ plui nissun cambi, al reste in dîs cuintri undis.

La superioritât numeriche i zove ae Lazio, che cussì prime e segne l’un a un cun Matri e po e marche il vantaç definitîf cun Cataldi, che in posizion plui che suspiete – fûr zûc che a viodin ducj fale che Damato e i siei colaboradôrs – le bute dentri cul cjâf dopo che Meret al veve fat un altri meracul suntune conclusion di Konko.

Propit la prestazion une vore buine di Meret e je la biele gnove di une serade che no jere tacade mâl ma che e je finude malon.

Cumò si torne al campionât: domenie si zuie a Turin cuintri dal Toro, che in Cope Italie al à fat ancjemò piês dal Udin. Apontament a 6 sot sere, alì di chel che une volte si clamave il Comunale.

 

Udinese – Inter 0-4

udin_neri

L’Udin al fâs Sante Luzie e nol spiete nancje la miezegnot par fâi almancul trê regaluts al Inter. La partide di sabide di sere cuintri de scuadre prime in classifiche si siere cuntune vitorie dai ospits, che a profitin inte maniere miôr di trê erorats dai blancs e neris che a deventin trê regâi pe formazion di Mancini.

L’incuintri al tache cuntun bon ritmi. L’inter al mostre ecuilibri e convinzion e si presente in curt des bandis di Karnezis, cuntune combinazion tra Perisic e Jovetic là che il puartîr blanc e neri al mostre di jessi vuaite. L’Udin nol mostre di vê sudizion, stant che tai prins vincj minûts di zûc Thereau al impegne Handanovic e Di Natale al pinele une punizion che e va fûr di pôc.

L’ecuilibri al ven rot al minût numar 23, cuant che Bruno Fernandes al fâs un passaç indaûr che però al è bon dome par Icardi. L’argjentin al brinche il balon, sal puarte indenant, al salte Domizzi e al bat Karnezis cuntune conclusion in diagonâl.

La partide e devente di rive sù pal Udin, che però nol mole e al prove a cirî la paritât cun Di Natale in aree di rigôr. La situazion e va in piês cuant che Domizzi al sbuse l’intervent, Jovetic al profite e al ringrazie cuntune pinelade che si distude tal sac daûr di Karnezis. Il prin timp, si pues dî, si siere in chel moment, cuntun doi a zero che al fâs mâl.

Dopo de polse, si spietisi une reazion de bande dal Udin. La scuadre di balon furlane no tradìs e cussì e prove a puartâsi indenant cun chê di mudâ il risultât, ma l’Inter al ten bon cence scomponisi masse e i blancs e neris si fasin imberdeâ de manovre aversarie e se a àn cualchi ocasion no rivin a concretizâle, nancje denant di un mieç pastroç di Handanovic suntun cross bas, cemût che al sucêt a Iturra. Cui che al continue a zovâsi dai erôrs dai aversaris al è l’Inter e in particolâr Icardi che al gjolt ancje dal tierç regâl dal Udin-Sante Luzie: un assist firmât di Lodi che lu puarte a fâ il trê a zero.

L’Udin al distude la lûs e l’Inter al rive a fâ – almancul chel, di bessôl… – ancje il cuart: Guarin al libere Brozovic su la corsie di çampe e il cravuât al siere e al tire in puarte cun precision.

Dut ben pal Inter, che al rest prin; risultât e classifiche bruts pal Udin, che di une bande al mostre di jessi tant miôr di un pâr di mês indaûr e di chê altre al fâs masse dispes erorats che si cjate a paiaju une vore cjâr. Joibe i blancs e neris a saran a Rome pe Cope Italie, cuintri de Lazio, e domenie a Turin, cuintri dal Toro, là che al coventarà fat lamancul un pont (e là che cuâl che al sedi il risultât, cualchidun di noaltris al sarà sei un tic content sei un tic displasût…).

Suns Europe, une serade musicâl bielonone di no dismenteâ

suns_vert

Une altre seradone plene di ‘Suns’. Dopo Suns Sardigna, dôs setemanis indaûr a Casteddu/Cagliari, nossere a Udin e je stade la serade finâl dal concors musicâl di Suns Europe, che e à presentât inte maniere miôr il spirt e i intindiments dal Festival european des arts  performativis tes lenghis minoritariis, che si siere vuê cul conciert di Marco Brosolo a Manià.

L’event che si à davuelt tal teatri gnûf Giovanni da Udine al à mantignût ce che si spietavisi sei pe cualitât dal spetacul che pe partecipazion dal public, cul Teatron plen di int e tancj di lôr a scoltâ la direte par radio su lis frecuencis di Onde Furlane e vie internet in formât audio e video sui sîts www.sunscontest.com e www.ondefurlane.eu: une serade che no si pues dismenteâ, che e à palesât sei la vivarosetât des espressions musicâls e plui in gjenerâl culturâls des minorancis e des nazionalitâts de Europe sei la impuartance des lôr rivendicazions e de lôr tutele.

Suns Europe 2015 - foto Andrea Tomasin-1

Sul palc dal ‘Teatron’ si à viodût ancje une rapresentazion concrete dai resonaments fats vie pe buinore dentri de taule taronde Friûl@Europe. Lenghis, dirits, creativitât e promozion dal teritori, che si à davuelte alì de Universitât dal Friûl. La diversitât linguistiche e je un valôr, un dirit e une oportunitât par ducj e l’investiment di risorsis fat a pro des lenghis minoritariis, de lôr tutele e de lôr promozion al è alc che al zove ancje al disvilup, sei in tiermins di coesion sociâl e di cualitât de vite, sei in tiermins economics, cemût che al à mostrât in particolâr il rapresentant dal guvier de Comunitât autonome basche (C.A.B.), Jorge Gimenez Bech, che te sô relazion al à presentât i dâts dal impat des politichis pal euskera su la economie (pal basc si investìs l’1% dal belanç de C.A.B., ma chest al prodûs il 5% dal prodot interni  sporc regjonâl).

Friuul@EuropeIMG

Cu la conduzion dal atôr e regjist furlan Michele Polo e de atore e cjantante sarde Claudia Aru, si àn tignût dongje il trip hop inmagant dai Ilmu de Carelie, il folk scalembri dai galizians Caxade, il crossover hip hop dai bretons Rhapsoldya, la fusion tra cjant tradizionâl sami e blues des Ozas, il folk punk dai bascs Kasernarat, lis sugjestions esotichis des Baschirie dai Zaman, il rock shoegaze dal irlandês Tuath, il pop di autôr emozionant de cubie rumance-ladine Me+Marie, il cjantautôr furlan Loris Vescovo e il pop soul dai frisons Marit & Nigel.

Te ultime part de serade, intant che si tiravin dongje i vôts dal public in sale e ator pal mont e la jurie tecniche e prontave il so judizi finâl, e je stade la performance di  Marco Brosolo, che cu la sô band e cu la complicitât dal rapper sart Alessio Mura e dal cjargnel Dek Ill Ceesa, al à presentât cinc tocs dal so disc Cadremo Feroci, dât fûr pôcs mês indaûr de bande de etichete britaniche Rought Trade, là che al vistìs di musiche e al interprete in plui lenghis nûf poesiis di Federico Tavan.

Tra i dîs finaliscj, il premi dal public al è lât ai Ilmu, intant che la jurie i à ricognssût la vitorie a Me+Marie, marcant lis carateristichis de lôr cjançon: semplice, intense e une vore trative.

E je stade une vitorie ancje par cui che al à volût Suns Europe e al à spudìat balins par metilu adun.

Suns Europe 2015 - foto Andrea Tomasin-1-2

Suns Europe al è un progjet metût adun cul jutori de ARLeF (Agjenzie Regjonâl pe Lenghe Furlane) e di Turismo FVG, cul coordenament de cooperative Informazione Friulana e cu la colaborazion dal CEC – Centro espressioni cinematografiche di Udine, des associazions Bottega Errante e Il Laboratorio, de cooperative Punto Zero, dal Comun di Udin e dal Teatri Gnûf ‘Giovanni da Udine’.

‘Friûl@Europe’. Ai 11 di Dicembar a Udin si fevele di lenghis, dirits e creativitât

Friuul@EuropeIMG

Une gnove ocasion par fâ il pont de situazion su lenghis, dirits e tutele, tra Friûl e Europe. E je chê che e ven ufierte di Friûl@Europe. Lenghis, dirits, creativitât e promozion dal teritori, la cunvigne che si davuelzarà alì de Universitât dal Friûl inte buinore dai 11 di Dicembar.

L’apontament al è a tacâ di 9 e mieze te Sale Florio, in bande de sede dal Retorât dal Ateneu furlan (v. Florio 1, Udin), là che si daran dongje rapresentants des comunitâts di lenghe furlane, slovene e todescje de regjon Friûl-Vignesie Julie e esperts e operadôrs che a fasin part di istituzions e di altris organizazions e entitâts che a son espression di diviersis minorancis e nazionalitâts in Europe.

foto_uniud

Al sarà un confront tra personis che a lavorin tal cjamp de promozion des lenghis minoritariis e in chel dai media e de organizazion di events e di ativitâts culturâls e artistichis, che la lôr peculiaritât e je propit chê di fâ riferiment aes specificitâts linguistichis des lôr comunitâts teritoriâls.
Tant a dî: il ‘logos’ – la lenghe – che al devente ‘logo’, une marcje di cualitât e di ricognossibilitât par prodots, servizis e teritoris, intune prospetive di disvilup sostignibil no dome in tiermins economics e sociâi ma ancje par ce che al tocje il rispiet dal ambient, des identitâts e dai dirits linguistics.

Friûl@Europe. Lenghis, dirits, creativitât e promozion dal teritori e je la seconde taule taronde inmaneade inte suaze dal Modul Jean Monnet MuMuCEI (Multilingualism, Multicultural Citizenship and European Integration) dal Dipartiment di Siencis Juridichis de Universitât dal Friûl, un progjet che al met dongje ativitâts di docence e di ricercje sul rapuart tra integrazion europeane e promozion de diversitât lingusitiche e culturâl, par cure di Claudio Cressati, professôr di Storie des dotrinis politichis, e di Marco Stolfo, dotôr di ricercje in Storie dal federalisim e de unitât europeane.

mumucei_4

La cunvigne si insuaze intal program gjenerâl dal festival Suns Europe e e cjaparà dentri ancje un intervent musicâl dai frisons Marit & Nigel, tra i protagoniscj dal event che si tignarà chê stesse sere alì dal Teatri gnûf ‘Giovanni da Udine’.

La partecipazion ae cunvigne e je libare e sore nuie.

Il program complet de taule taronde si pues leilu achì: friuul@europe_program_11-12-15.

Altris informazions ancjemò si cjatin achì:
friul@europe2_suns_def_ITA.