Gran Bal Dub + Alidé Sans + Perynn Bleunven + Musicos pola Oficialidá + Alan Stivell (interviste) = Babêl Europe 7/2021

La gnove pontade di Babêl Europe, la trasmission cuindisinâl dedicât a lenghis, musichis, minorancis e nazions cence stât, in programazion su Radio Onde Furlane vuê, martars ai 30 di Març a 11 a buinore, e po doman, miercus ai 31, a une dopo di misdì, e sabide ai 3 di Avrîl a une e mieze, e je une repliche dal episodi numar 7 dal 2019.

Cussì e sarà la pussibilitât di tornâ a scoltâ la interviste cun Alan Stivell, fate a Mestre in ocasion dal so conciert di vinars ai 22 di Març dal 2019, là che il cjantant, arpist e polistrumentist di divignince bretone al fevele di musiche, di lenghis, di dirits, di Bretagne, di Catalogne e di Europe.

This image has an empty alt attribute; its file name is gran-bal-dub.jpg

Si scoltarà ancje la musiche di Gran Bal Dub, progjet di contaminazion jenfri la musiche tradizionâl ocitane e la eletroniche là che si dan dongje Sergio Berardo dai Lou Dalfin e Madaski dai Africa Unite, e dai Musicos pola Oficialidá, une sorte di rapresentative dai musiciscj asturians, e lis versions speciâls dai imnis nazionâi de Ocitanie e de Bretagne, interpretadis de cjantante aranese Alidé Sans e de cjantante bretone Perynn Bleunven adun cun tancj siei conazionâi, tacant dal stes Alan Stivell.

Radio Onde Furlane si scolte sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, e su Facebook.

Dutis lis pontadis  di Babêl Europe si cjatin ancje in podcast su Spreaker e su Spotify.

Udinese – Lazio 0-1

This image has an empty alt attribute; its file name is udin_neri.png

La Lazio e ferme la rie di risultâts positîfs dal Udin. Ai Riçs la scuadre romane e rive a vuadagnâ ducj i trê ponts a disposizion in gracie di un print timp zuiât cun plui atenzion e cun plui precision de formazion furlane, rivant a segnâ cun Marusič, e di une seconde frazion di resistence denant de organizazion e de determinazion dai blancs e neris.

Ancje cuintri de Lazio Gotti al sielç il scheme di partence dal 3-5-1-1: Musso il puarte, Becao, Bonifazi e Nuytinck in difese, Molina, De Paul, Walace, Makengo e Stryger Larsen in mediane, Llorente in atac e Pereyra daûr di lui, par poiâlu in atac e par mantignî lis conession cu la seconde linie. Inzaghi al rispuint cul 3-5-2 che al viôt Reina tra i pâi, Patric, Acerbi e Radu in difese, Lazzari, Milinković Savić, Leiva, Luis Alberto e Marusič in meidane e Immobile e Muriqi in atac.

La partide si vierç cuntune fase di studi di sù par jù une desene di minûts. Lis scuadris a son metudis in cjamp in mnaiere cuasi speculâr e si neutralizin inte fasse mediane. Cul passâ dal timp la Lazio e mostre di vê alc in plui tes gjambis, tai pîts, tal cûr e tai polmons. I ospits a fasin zirâ di plui e miôr la bale e a rivin a fasin viodi des bandis di Musso, un pôc par merit lôr e un pôc pes busis lassadis dal Udin, che al piert plui di cualchi bale inte fase di jessude e di impostazion.

La Lazio e sburte soredut dilunc de corsie di diestre là che Luis Alberto e Marusič a son une vore atîfs e a profitin ancje de zornade grise di Becao e de scjarse cuviertidure di Molina. Propit Luis Alberto al è il prin che i da il so bon ce fâ a Musso cuntune sô conclusion. I laziâi a concuistin ancje diviers corners, i blancs e neris a tegnin bot ma si viôt che a patissin la iniziative dai aversaris, che a fuarce di dâi a rivin a segnâ te ultime part dal prin timp cuntune biel tîr di Marusič. Il gol cjapât al fâs sunâ la svearine tra i blancs e neris che prime de polse a imbastissin une biele azion cun De Paul e Molina, che e ven sierade di Stryger Larsen, cuntun tîr fermât di Reina.

L’Udin al partìs cul pît just ancje tal imprin dal secont timp. La scuadre furlane e à un altri pas rispiet ae plui part de prime frazion e cun Nestorovski tal puest di Makengo al mude la sô fisionomie tatiche, cun dôs pontis veris indenant. Dopo un cuart di ore a jentrin ancje Okaka tal puest di Llorente e Forestieri par Becao e l’Udin al manten il control dal zûc e al sburte indenant, obleant la Lazio a sierâsi indaûr par difindi il vantaç.

Che la musiche e sedi une altre, in confront cul prin timp, lu mostre a clâr De Paul daurman, cinc minûts dopo tornâts dai camarins, che al lenç l’un a un: la sô conclusion e passe Reina ma e sbat cuintri dal pâl. Plui indenant al è ancjemò protagonist l’argjentin, sei tirant in puarte sei tant che sugjeridôr, cuntune biel assist par Okaka che al tire in puarte cul cjâf. L’Udin al prove a segnâ ancje cuntune zirade di Nestorovski su invît di Forestieri ma e va strucje.

La Lazio, cui cambis ordenâts di Inzaghi, e tire sù lis sôs bariduris in mediane e in difese e plui indenant e prove a rispuindi in cuintripît, cul intindiment intune maniere o in chê altre di puartâ a cjase la vitorie. In atac si le viôt avonde pôc, fale che par une iniziative dople di Immobile che prime e ven parade vie di Musso e po e cjape il pâl e par un pâr di ocasions neutralizadis di Nuytinck e di Musso.

A son plui produtîfs i blancs e neris, che tal ultin a provin ancjemò a impirâ Reina cun Okaka, cun Pereyra e cun Nestorovski, ma no rivin a mudâ il risultât, che al premie la Lazio e i permet di no pierdi teren de part plui alte de classifiche, intant che l’Udin si manten inte zone mediane de graduatorie.

Fermin Muguruza + Xavi Sarrià + Akelarre + Ane + Doctors de Trobar + Adwaith + Massimo Silverio = Babêl Europe 06/2021

Musiche di scoltâ e di… cjalâ. Inte gnove pontade di Babêl Europe, il program cuindisinâl di Radio Onde Furlane dedicât a lenghis, musichis, minorancis e nazions cence stât, si fevelarà ancjemò di gnovis produzions musicâls, ma al sarà spazi ancje pal cine e plui in gjenerâl pe produzion audiovisive.

La atenzion e vignarà pontade prin di dut in direzion dal Paîs Basc. Si scoltarà alc di gnûf dal repertori di Fermin Muguruza, che al è daûr a lavorâ sul so gnûf cine di animazion Black is Beltza II – AINHOA, e si fevelarà dai diviers premis Goya 2021 vinçûts dai cines bascs Ane (atore protagoniste miôr, atore rivelazion miôr e senegjature adatade miôr) e Akelarre (direzion artistiche, trucadure, costums, efiets speciâi e coment musicâl). Cussì al saràa spazi par almancul une cerce dal coment musicâl premiât, firmât des composidoris Aránzazu Calleja e Maite Arroitajauregi.

Il sest viaç babelic dal 2021 al cjaparà dentri ancje i Paîs Catalans, cun Xavi Sarrià e i siei gnûfs progjets tra musiche e audiovisîf, e la Ocitanie, cuntun piçul salt indaûr tal timp par tornâ a cjatâ i Doctors de Trobar. Cun di plui, in continuitât cu la trasmission dai 2 di Març stâts, si scoltarà la seconde version de cjançon par furlan e par galês, che e je il risultât de colaborazion tra lis rockers galesis Adwaith e il cjantautôr cjargnel Massimo Silverio, che juste in chescj dîs al scree ancje il so gnûf disc solist.

L’apontament di cheste setemane cun Babêl Europe al è in direte vuê, martars ai 16 di Març, a 11 buinore e po in repliche tal dopo di misdì di doman, miercus ai 17 (h. 13), e di sabide ai 20 (h.13.30).

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.radioondefurlane.eu). Dopo des sôs trê emissions vie pe setemane, ancje cheste gnove pontade si podarà tornâ a scoltâle in rêt su Spreaker e su Spotify.

This image has an empty alt attribute; its file name is logo_web.png

Genoa – Udinese 1-1

This image has an empty alt attribute; its file name is udin_neri.png

Une altre partide zuiade cun sintiment, un altri risultât bon, un altri pont puartât a cjase che al zove ae classifiche e al spirt di dute la scuadre. A Gjenue l’Udin si dinfint ben, al imbastìs ancje diviersis azions di atac, al ten bot cuant che il Genoa al è pericolôs e tal ultin al à ancje un tic di fortune, cuant che Berhami al cjape il pâl.

L’Udin a Marassi si presente cun chel stes scheme di partence de partide cul Sassuolo: un 3-5-1-1 cun Llorente uniche ponte, cun Musso in puarte, cun Becao che al torne in cjamp dongje di De Maio e di Nuytinck in difese, cun Molina, De Paul, Walace, Arslan, Stryger Larsen in mediane e cun Pereyra daûr dal atacant basc. Il Genoa al rispuinti cul 3-5-2, recuperant tra i pâi Perin, cun Biraschi, Radovanovic e Criscito inte linie difensive, cun Zappacosta, Zajc, Badelj, Strootman e Czyborra in mediane e cu la cubie Shomurodov-Pandev indenant.

L’incuintri si invie cul Udin che al môf la bale e i parons di cjase che a cirin di fâi cuintri dun decision. Dopo dîs minûts il Genoa al cjate il gol cun Pandev: par Camplone l’atacant macedon par tirâ si jude cuntun Braç e par chel no lu fâs bon, ma dopo dal confront cul Var al scuen cambiâ idee e al sivile l’un a zero pai ros e blu. La scuadre furlane e rispuint daurman e dopo trê zîrs di orloi Pereyra al rive a impirâ Perin, ancje se l’arbitri in chest câs al viôt Llorente in fûr zûc e il risultât nol cambie.

Il prin timp al va dilunc a jessi divertent e scombatût. Ator de metât de prime frazion lis parts a cambiin: cumò al è il Genoa che al manten il possès de bale e l’Udin si ricompate par no lassâ spazi ae manovre aversarie par rispuindi in cuintripît. Di une bande, Strootman e Pandev a rivin a vierzi un troi par jentrâ inte aree blancje e nere, là che il macedon al cole dopo un contrast ma par Camplone al è dut regolâr. Di chê altre, De Paul al lance indenant Llorente però al interven Radovanovic e nol sucêt nuie. Plui indenant prime al rive un tîr masse alt di Stryger Larsen e po al è un fal net in aree di Criscito su Pereyra e il rigôr pal Udin: al tire De Paul e al segne.

Dutis dôs lis scuadris a provin a passâ in vantaç prime de polse. Chê di Gotti e à la ocasion miôr cun Llorente, che suntun cross di Stryger Larsen al salte e cul cjâf al zire ben la bale in puarte, là che Perin al rive a fermâle.

Tal secont timp la musiche e je sù par jù compagne: ecuilibri tal mieç dal cjamp e cualchi ocasion di une bande e di chê altre. De Maio cul cjâf al spaurìs Perin, Zappacosta e Stryger Larsen a son pôc fortunâts cui lôr tîrs di lontan e Perin al è ancjemò protagonist suntune iniziative pericolose di Pereyra.

Al passe il timp e i doi tecnics a sielzin di mandâ in cjamp fuarcis frescjis. In atac Ballardini al cambie Pandev cun Scamacca e plui tart Gotti al calme fûr Llorente par Nestorovski, intant che tal Genoa il puest di Strootman al ven cjapât di Behrami. Prime a son blancs e neris che a tornin a svicinâsi al doi a un cuntun biel cross di Pereyra par Nestorovski, che però nol rive a incuadrâ la puarte, e po cun De Paul che al tire di lontan une buine bale, ma Zajc le ferme e le pare vie.

Tal ultin a son i parons di cjase che a lenzin il sucès, cun Zajc, che al jentre in maniere pericolose inte aree blancje e nere ma al tire fûr, e cun Berhami che cuntun grant tîr de distance al cjape in plen il pâl. E cussì il risultât al reste chel.

Pordenone – Pescara 0-0

This image has an empty alt attribute; its file name is pordenone-calcio.png

Alc al è alc e nuie al è nuie. Il Pordenon nol segne, ma nol cjape nancje goi e al puarte a cjase un pont, ancje se nol rive ancjemò a tornâ a vinci. Cul Pescara, in teorie, la scuadre nere e verde e varès podût fâ ancje di plui, ma tignint cont di cemût che e je lade e de dibisugne mostre di ponts che a vevin ancje i ospits, il risultât al è just e bon.

I Sborfs a partissin cul pît just. Dopo doi minûts Mallamo, intune barafuse furiose inte aree aversarie, al à la bale buine ma al tire fûr. Al fâs compagn pôc plui tart Scavone cul cjâf, intant che Ciurria al lenç il gol dal vantaç cjapant la travierse. Il Pescara al patìs la pression de formazion friulane ma al ten bot. Cul passâ dal timp la partide e devente plui ecuilibrade, cui neris e verts che a sbassin il ritmi e i ospits che a cjapin flât e a vuadagnin spazi tal cjamp e a impegnin Perisan dome intune ocasion cun Odgaard.

La seconde frazion si vierç cuntune travierse di Maistro. Il Pordenon al rispuint ancjemò cun Scavone cul cjâf, però al cjate la parade di Fiorillo. Lis ocasions a son diviersis par dutis dôs lis formazions, ma il Pescara si svicine di plui al vantaç. Prime al cjape une altre travierse cun Galano, plui tart Perisan si met in mostre cuntun biel intervent suntune conclusion di doi pas di Guth e juste tal ultin Galano nol rive a disfrutâ une bale golose. E la partide si siere cence goi.

Il Parlament european ur gjave la imunitât a trê eurodeputâts indipendentiscj catalans. What Europe has made of Europe?

Lunis ai 8 di Març il Parlament European al à votât a maiorance a pro dal ritîr de imunitât garantide fin cumò ai trê eurodeputâts catalans Carles Puigdemont, Toni Comín e Clara Ponsatí.
L’ex President de Generalitat, Puigdemont, e i doi ex consellers (ven a dî “ministris” o “assessôrs”) dal guvier catalan, Comín e Ponsatí, a son acusâts tal Stât Spagnûl di reâts grâfs che a àn a ce fâ cul lôr rûl inte organizazion e inte gjestion dal referendum pe indipendence dal 1n di Otubar dal 2017. Par chel a son stâts “libars di scugnî lâ” inte Belgjiche e in Scozie e intant dal lôr esili si son candidâts aes elezions europeanis dal 2018 e a son stâts elets inte assemblee di Strasburc e Brussels.

Lis acusis fatis indenant a son dutis di caratar politic, cundut a chel – o ben, magari cussì no: juste par chel – i eurodeputâts a maiorance a àn a votât per che ur vegni gjavade la imunitât, lant daûr de votazion fate inte Comission juridiche dal Parlament European ai 23 di Fevrâr.
Tal câs di Puigdemont, a àn votât a pro de revoche in 400 di lôr, intant che si son esprimûts cuintri 245 e altris 45 si son astignûts e son sù par jù compagn i numars par Comín e Ponsatí: 404 a pro, 247 cuintri e 42 astignûts.

Il vôt al jere segret e fasint doi cont si viôt che a àn votât a pro de revoche i popolârs, la massime part dai conservadôrs e la plui part (ma no ducj, cualchidun al è lât plui daûr de sô cussience che dai ordins di scudarie) dai socialiscj e dai liberâi. Ur àn votât cuintri cun convinzion i eurodeputâts dai grups dai Verts/Aleance Libare Europeane e de Çampe Europeane, chei di altris grups plui piçui e uns pôcs di “dissidents”.

E je une vore significative la maniere che, in cheste ocasion, si son dividûts i esponents dai partîts che a poin il guvier spagnûl: di une bvande i socialiscj dal premier Pedro Sanchez a àn votât adun cu lis diestris spagnolistis dal PP, di Ciudadanos e di Vox; di chê altre i rapresentants di Podemos a àn votât a pro dal manitigniment de imunitât.

Il risultât dal vôt al è che a tornin a vignî inviadis lis proceduris pe estradizion dai trê europarlamentârs, che a son stâts elets regolarmentri tes ultimis elezions europeanis, par che a vegnin judicâts de justizie spagnole. Cumò la bale e passe ai tribunâi de Belgjiche, dulà che a son a stâ in esili Puigdemont e Comín, e de Scozie, là che si è rifugjade Ponsatí.

Timp indaûr, la magjistrature belghe e veve dineât a la estradizion tal Stât Spagnûl di un altri ex conseller catalan, Lluis Puig, ancje lui rifugjât a Brussel, contestant lis fondis dome che politichis des acusis cuintri di lui. Simpri la magjistrature belghe e veve blocât la estradizion di Josep Valtonyc, un rapper catalan condanât a trê agns e mieç di reclusion par vie dai tescj des sôs cjançons.

Cun chel vôt, il Parlament European al à dât la sô poie ae strategjie persecutorie che e ven puartade indenant de bande de classe politiche e dai tribunâi dal Ream di Spagne e plui in gjenerâl al à mostrât dipendence e salacor sotanance rispiet ai Stâts e ai lôr guviers.

Ancje par chel, magari cussì no, la votazion di lunis si pues calcolâle tant che une gnove brute figure de Union Europeane, dongje de sielte fate doi mês indaûr de Comission Europeane di no cjapâ sù lis propuestis fatis indenant cu la iniziative dai citadins Minority SafePack e in linie cul ategjament mantignût des istituzions europeanis intant che Madrid al mandave polizie e militârs a petâ milions di eletôrs in file ai seçs par partecipâ al referendum su la autodeterminazion dal prin Otubar 2017.

L’unic dât positîf dal vôt di lunis stât al è chel de consistence de oposizion: tra vôt contraris e astignûts a son sù par jù 300 di lôr.
Pal rest, lis istituzions europeanis a pierdin (ancjemò) crodibilitât e autorevolece e in cont de idee di Europe “unide inte diversitât” (e intai dirits di fonde e intes libertâts), al vignarès di dî, recuperant a miezis un viers di William Wordsworth: “What Europe has made of Europe?”

Udinese – Sassuolo 2-0

bandieris-friuul

L’Udin al vinç e al convinç. Cuintri dal Sassuolo la scuadre furlane e zuie cun sintiment e e rive a segnâ un gol par timp e a puartâ a cjase ducj i trê ponts a disposizion che i permetin di rivâ juste a metât de classifiche.

Pe ocasion, compagn che pe partide cul Milan, Gotti al torne a sielzi il 3-5-1-1 tant che modul di base: Musso tra i pâi; Bonifazi, De Maio e Nuytinck in difese; Molina, De Paul, Arslan, Walace e Stryger Larsen in mediane, Llorente uniche ponte e Pereyra daûr di lui, ancje se vie pe partide si puartarà dispès ancje lui inte prime linie. Il Sassuolo al rispuint cul 4-2-3-1: in puarte al è Consigli; in difese a son Toljan, Marlon, Ferrari e Kyriakopoulos; in mediane a son Ayhan e Locatelli denant de difese e Berardi, Lopez e Traorè plui indenant a supuart de uniche ponte Raspadori.

Il prin timp al è ecuilibrât e avonde divertent. Lis dôs scuadris si difindin ben e a imbastissin ancje cualchi biele zuiade. Dopo undis minûts e je une buine cumbinazion tra De Paul e Pereyra che però no à nissun impat, stant che nol è nissun compagn inte aree di rigôr in stât di tirâ in puarte. Plui indenant il Sassuolo al rive a jessi plui pericolôs, cuntun cross sul secont pâl di Berardi par Kyriakopoulos, che al tire ma Musso le pare vire in corner, e ancjemò cuntun pâr di balons metûts tal mieç, cun Musso e De Maio che a intervegnin cence padins.

Passade la metât dal prin timp l’Udin al recupare cjamp e si fâs vîf indenant cun Stryger Larsen che al ricêf un bon sugjeriment di Walace, si sposte in posizion centrâl e al lasse partî un diestri che al impegne Consigli, che al è brâf a meti un blec e a alçâ la bale parsore de travierse. Il puartîr dal Sassuolo al è ancjemò protagonist rispuindint cuntun interven cu la man vierte a une biele zirade al svol di Llorente che al profite di un cross pinelât di De Paul. Prime de polse al rive il gol dal atacant basc, che al siere inte maniere miôr un assist di Molina e al segne il so prin gol cu la maie de scuadre furlane.

La seconde frazion si vierç cul Sassuolo al atac, sburtât des energjiis frescjis di Caputo e Djuricic, jentrâts tal puest di Traorè e Raspadori. La pression dai ospits no prodûs alc e ce: tai prins dîs minûts a son dome un cross fûr misure di Locatelli e un tîr di Berardi che al ven parât vie di Nuytinck. Al è plui insidiôs l’Udin cuntune azion di Stryger Larsen e po cuntune conclusion di De Paul che al cjape la crosere dai pâi cun Consigli batût, intant che Maggioni al sivile il fûr zûc.

La pression dal Sassuolo si manten cul passâ dai minûts ma e va dilunc a no dâi di lavorâ a Musso, intant che l’Udin al siere ducj i spazis e al rispuint in cuintripît, creant ancjemò cualchi probleme ai ospits, cemût che al mostre ancje il fal di man in aree di Locatelli a pôcs minûts de fin: Maggioni al sivile, De Paul al è pront par tirâ, ma dut al ven anulât daûr de indicazion dal Var, che al ricognòs un fûr zûc di Molina, autôr dal cross che al ven tocjât dal difensôr emilian.

L’Udin al lenç ancjemò il doi a zero cuntun tîr di Stryger Larsen, che al cjate su la sô strade un altri bon intervent di Consigli, po al ferme cun Musso une canonade di Djuricic e ae fin, al tierç minût di recupar, al incrès il vantaç cun Pereyra, che su assist di De Paul al met ancje la sô firme sot dal risultât finâl.

Monza – Pordenone 2-0

This image has an empty alt attribute; its file name is pordenone-calcio.png

Une vitorie impuartantone pal Monza e une altre sconfite pesante pal Pordenon.
I parons di cjase a vuadagnin trê ponts pesants che, profitant de sbrissade dal Vignesie, i permetin di puartâsi intal secont puest in classfiche. Pe scuadre dal Friûl Ocidentâl e je la cuarte partide pierdude intes ultimis cinc.

La formazion vuidade Christian Brocchi e mostre daurman di vê alc di plui dai aversaris. Cundut achel il Pordenon al ten bot par almancul vincjecinc minûts. La partide e ven disblocade un minût plui tart, cuant che denant di un biel tîr cul cjâf di Frattesi Perisan nol pues fâ nuie altri che viodi la bale che e jentre inte puarte. Il Monza al prove ancjemò a jessi pericolôs cun Armellino e cun Boateng, ma il puartîr dal Pordenon al è simpri tal puest just intal moment just

Sierât il prin timp cul Monza indenant e cui Sborfs che no rivin mai a creâ pericui des bandis dal ex neri e vert Di Gregorio, inte seconde frazion si viôt daurman un altri Pordenon, plui decîs e propositîf. La pression dce scuadre furlane e prodûs une biele conclusion di Morra dal limit de aree, che e ven deviade in corner, e un tîr cul cjâf di Camporese che nol rive a cjatâ la puarte.

Al somee il principi dal riscat dai ospits, ma nol è cussì, stant che al 61esim minût al rive il rigôr pal Monza concedût par un fal di Vogliacco su Sampirisi: Gitkjaer al tire di potence e al bat Perisan.
Cualchincjariâsi de batude: bale fuarte e centrâl e Perisan batût. Cualchi minût plui tart si viôt ancje Balotelli, cun Perisan che al salve la puarte, intant che plui tart al ven butât fûr cul cartelin ros Carlos Augusto par un brut fal su Magnino e prime de fin il Monza si svicine al tris cuntune conclusion di Barillà che e va a finîle fûr di pôc.

Milan – Udinese 1-1

This image has an empty alt attribute; its file name is udin_neri.png

L’Udin al lenç la vitorie, ma al scuen contentâsi dal un a un. Al ten bot denant dal Milan e fintremai ur fâs pôre ai ros e neris, massime vie pal secont timp cuant che al passe in vantaç cun Becao. La partide e somee inviade inte direzion miôr pe scuadre furlane, ma juste tal ultin, ae fin dal recupar, inte aree di rigôr blancje e nere, Stryger Larsen al fâs un fal di man clamorôs, Massa al sivile e Kessie al segne dal discut.

I blancs e neris si presentin a San Siro cun chê di puartâ a cjase almancul un pônt: ben sierâts indaûr e pronts a colpî in cuintripît, cuntun 3-5-1-1, là che tal mieç a son Makengo, Arslan e De Paul, cun Molina e Zeegelas tes corsiis laterâls, in difese, denant di Musso, si viodin Becao, Bonifazi e Nuytinck, Nestorovski al è la uniche ponte e daûr di lui lu saponte Pereyra. Il Milan al rispuint cul 4-2-3-1: Donnarumma in puarte; Kalulu, Kjaer, Romagnûi e Hernandez in difese; tal mieç a son Tonali e Kessie e plui indenant Castillejo, Diaz e Rebic, cun Leao di ponte.

Il prin timp al è blocât, ruspi e puntît cuntune vore di fai. I blancs e neris a son ben organizâts, si sierin cun sintiment e a pontin a imbastî verticalizazions sveltis, che però a saltin fûr di râr, stant che il Milan al fâs sù par jù compagn, une vore atent e sierât daûr e in mediane. Ator de metât de prime frazion a rivin lis primis ocasions: pal Milan al è un tîr di Diaz parât di Musso, pe scuadre furlane un tentatîf di Nestorovski fûr bersai. Plui indenant, tra fai e cartelins zâi a rivin une zirade di Pereyra che e sbat intor di Zeeglaar e un slalom cun tîr di Castillejo, che al ven neutralizât cu la ponte dal pît di Musso.

Il prin timp si siere sul zero a zero cul Udin che al fâs rindi la sô concretece inte fase difensive e il dinamisim di Pereyra in atac. Dopo de polse la scuadre furlane e à daurman une buine ocasion: bale indaûr di Hernandez e scat di Pereyra, che al recupare la bale, al passe Donnarumma e al met la bale tal mieç par Nestorovski, che al tire cul cjâf e la bale e larès a finîle in puarte se nol rivàs Tomagnoli a salvâ su la linie. Il Milan al rispuint cuntune conclusion alte di Meitè e cuntun tîr cul cjâf di Kessie che al ven parât di Musso.

Gotti al clame fûr Makengo e al mande in cjamp Llorente, cun chê di zuiâ cun plui pês ofensîf e cun plui fisicitât. E rive une gnove biele ocasion di De Paul, che al robe la bale a Hernandez e al tire in puarte ma nol incuadre il bersai. E je une sorte di anticipazion di ce che al nas trê minûts plui tart: corner e Becao che al salte plui indalt di ducj e al segne, zovantsi ancje di un moviment di Nestorovski che al ingjane Donnarumma.

Il Milan al prove a dreçâ la partide, ma nol rive a cumbinâ alc e ce, almancul in principi. Anzit, al è Pereyra che cuntun cross al cîr la conclusion cul cjâf di Llorente, che però al fâs fal su Romagnoli e nol siere la azion. A passin i minûts, i ros e neris a provin a concludi cun Leao che al tire fûr e l’Udin al à pardabon la pussibilitât di puartâ a cjase i trê ponts.
I blancs e neris a protestin par un contat in aree tra Kjaer e Llorente, che par Massa al è regolâr. In plen recupar a rivin ne conclusion di Hernandez fûr dal spieli de puarte e po, juste tal ultin, un intervent difensîf inte aree blancje e nere di Stryger Larsen che al tocje la bale cu la man. Magari cussì no, no son dubis, al è rigôr: Kessie al va sul discut e al segne l’un a un finâl.

Chievo – Pordenone 3-0

This image has an empty alt attribute; its file name is pordenone-calcio.png

Il Pordenon al torne a pierdi. Cuintri dal Chievo i Sborfs a cjapin trê patafons e a scurtin la distance tra la lôr posizion e la part plui basse de classifiche. I parons di cjase a zuin miôr dal principi ae fin, a fasin valê la lôr predominance e a meretin ad in plen il sucès, che ur permet di tornâ a cori in direzion de zone promozion dopo trê sconfitis une daûr di chê altre. Pai neris e verts l’incuintri cui zâi e blu al conferme che al è alc che nol funzione e che Tesser al varà di comedâ in curt.

I parons di cjase si presentin cul lôr solit 4-4-2, cun Sauli Vaisanen, pe prime volte in cjamp dopo dal signestri tal puest di Leverbe e la cubie di atac Margiotta-De Luca. Il Pordenon al rispuint cuntun 4-3-1-2 là che in prime linie si cjatin Ciurria e Morra.
La prime ocasion e je de scuadre furlane: in cuintripît Zammarini e Bionts si cjatin in doi cuintri un, ma no rivin a profitâ. Il Chievo al prodûs di plui e cun plui continuitât, ancje se a rivin a jessi pericolôs dome ator de prime mieze ore di zûc cun Ciciretti che al tire cun fuarte e cun precision di lontan e al segne. Trê minûts plui tart i parons di cjase, cun Garritano, a segnin il secont gol, che al pese tant che une sorte di ipoteche pal risultât finâl.

Tal secont timp il Pordenon al prove a dreçâ la partide. La ocasion miôr le à Morra, che al tire in puarte cun decision une buine bale che i ven passade di Zammarini, ma Semper al siere la puarte. I neris e verts a imbastissin ancjemò altris zuiadis ofensivis ma no rivin a cumbinâ alc e ce. Passade la metât de seconde frazion il Chievo al segne il tierç gol cun Obi che al siere une azion confusionade inte aree di rigôr nere e verde e al bat un inocent Perisan. Tai ultins vincj minûts i parons di cjase a mantegnin il control dal vantaç e il Pordenon nol rive a mudâ la situazon nancje di un et.