‘Friûl SotSore’, su Onde Furlane il taramot dal 1976 e lis ideis gnovis di Friûl

Il taramot dal 1976 al torne «in Onde». Doman, sabide ai 26 di Novembar, la programazion de buinore di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont su internet ae direzion www.ondefurlane.eu) e presente la cuarte pontade di Friûl SotSore, la serie speciâl di Dret & Ledrôs, che e partìs dal cuarantesim inovâl dal sisme che al à sdrumât il Friûl par ricuardâ chei moments, par contâ chê storie e chês storiis e par meti adun une riflession in cont di chê esperience, di soference, di solidarietât e di citadinance ative.

Il program al à chê di recuperâ, cence retoriche, la memorie di chê solidarietât che il taramot al à discjadenât dentri e fûr dal Friûl, des mobilitazions, des lotis popolârs e des esperiencis di autoguvier dal bas, e di ce che al è saltât fûr di chê esperience.

In particolâr, dopo vê frontât un mês indaûr propit il teme dal protagonisim de int, dentris des tendopolis e inaltrò, e chel de solidarietât dentri e fûr des comunitâts, Friûl SotSore al pontarà la atenzion su lis ideis e lis iniziativis buridis fûr propit di chês mobilitazions e di chê solidarietât.

Pe ocasion il diretôr de radio libare dai furlans, Mauro Missana, cu la colaborazion di Guglielmo Pitzalis, al fevelarà cun Adrian Cescje des rivendicazions in cont de tutele de lenghe furlane e des iniziativis inviadis in chei agns pal so ûs e pal so insegnament tes sculis, cun   Sandro Fabbro, che al insegne planificazion teritoriâl li dal ateneu furlan, de nassite de Universitât dal Friûl,  e cun Enos Costantini, ricercjadôr e za insegnant tes scuele agrarie di Cividât, des conessions tra sience e teritori.

In cheste suaze si fevelarà ancje de fondazion de cooperative Informazione Friulana e duncje di Radio Onde Furlane e plui in gjenerâl di informazion, culture e visions alternativis di Friûl, cun Giorgio Cavallo e Elia Mioni, e des bataiis a pro dal ricognosiment e dal ûs de lenghe furlane in ambit liturgjic, cun pre Romano Michelotti, presidente de associazion Glesie Furlane.

Chest apontament cun Friûl SotSore si podarà tornâ a scoltâlu in repliche domenie ai 27 di Novembar a 8 a buinore e miercus ai 30 a 3 dopo di misdì.

Al merete ricuardât che dongje che in modulazion di frecuence e in internet, Radio Onde Furlane si pues scoltâle su smartphone, Iphone, tablet e Ipad, doprant la aplicazion specifiche che si le discjame de rêt daûr des indicazions che si cjatin ae direzion www.ondefurlane.eu.

 

Parcè si tratial il Friûl cul stîl de campagne dal Fertility Day?

Un mês indaûr a Udin e jere stade presentade une iniziative dal titul  Inmyland. Indagine su un friulano al di sopra di ogni sospetto, che e varès di jessi une sorte di ricercje in cont des ideis che cui che al vîf in Friûl al à di se e de sô tiere.

Finalmentri o vin rivât a dâi un cuc e o sin restâts cence peraulis.

O vin vude la sensazion che – propit te Universitât che tancj i tegnin a clamâle ‘dal Friûl’, par rispiet de sô storie e di chê che e varès di jessi la sô funzion, ancje daûr di ce che e dîs la sô leç istitutive – cui che al à metût adun il cuistionari che al covente par tirâ dongje i dâts pe ricercje nol vedi albe di ce che al è il Friûl.

Che al sedi par mancjance di cognossince – si podarès dî par ignorance… incussiente – o par ideologjie (ven a dî cuntune vision di Friûl – in chest câs «cussiente» – che e dinee o che e minimize tancj siei caratars impuartants e peculiârs), in cualsisedi maniere chel scandai al somee nassi clopadiç, stant che no je nancje la pussibilitât di fâ indenant altris ideis di Friûl.

Lis ideis di Friûl che a vignaran rilevadis no podaran che jessi in linie cun chês che – in maniere o incussiente o ben cussiente, ideologjiche e distuarte – a son lis ideis di partence di cui che al à metût adun il cuistionari: visions di Friûl e di furlan che, in chestis cundizions, no puedin fâ di mancul di lâ daûr di chês tindincis che si pues definilis in gjenerâl «minimalistis» o ben «negazionistis».

Par chel, al devente dificil no cjatâsi in cunvigne cun cui che in rêt o su la stampe al palese perplessitâts di cheste fate, cun osservazions in cont dal fat che la Universitât dal Friûl e mostre di no savê dulà (e ce) che al è il Friûl o ben cun coments dulà che plui che jessi «al di sopra di ogni sospetto» il furlan ogjet dal scandai al sarès «al di sotto di ogni rispetto».

Se e fos une performance dal Udin o fevelaressin – magari cussì no, daûr di une usance zaromai consolidade – di efiet (Mer)Dacia Arena.

Ma stant che no je une robe che e tocje la scuadre di balon furlane (che o sperìn che finalmentri si dedi une sveade…), il tiermin di paragon al devente un altri: la iniziative dal Fertility day e lis sôs campagnis di comunicazion, cemût che al ven marcât achì.

E alore nus ven di domandâ: «Ma parcè si aial di tratâ il Friûl cul stîl de campagne dal Fertility Day?»