Vindotalé + Silent Woo Goore + Kortatu + Sagarroi + Llan de Cubel + Suns Europe = Babêl Europe 18/2019

De Udmurtie ae Bretagne, de Ocitanie al Paîs Basc, des Asturiis ae Basse Sassonie. La gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une dopo e di sabide a une e mieze, e sarà une vore siore di contignûts.

Si fevelarà di novitâts discografichis e in particolâr di Vindotalé, il gnûf progjet là che e je implicade la cjantante bretone Bleunwenn Mevel. Si fevelarà ancje di atualitât, ricuardant lis manifestazions pe Diada Nacional in Catalogne dai 11 di Setembar e chê cuintri de francesizazion dai nons di lûc in Bretagne di sabide ai 14. In cheste suaze si scugnarà frontâ ancje cualchi brute gnove.

Te Federazion Russe e va dilunc la politiche inviade di Putin doi agns indaûr cuintri des lenghis “altris”, de lôr presince inte societât e dal lôr insegnament intes scuelis: par protestâ cuintri di cheste situazion il linguist Al’bert Razin, innomenât studiôs de lenghe udmurte e militant a pro dai dirits linguistics de sô int, si à dât fûc e al è muart. Intal Stât spagnûl, vie pe prime part di Setembar, a son muarts doi impuartants musiciscj babelics: il basc Iñigo Muguruza e l’asturian Elías García. Par chel si scoltarà ancje la musiche di Silent Woo Goore, Kortatu, Sagarroi e Llan de Cubel.

Al sarà spazi ancje par une buine gnove. A tacâ dal apontament di chest setemane (vuê in direte, doman e sabide in repliche) si discuvierzarà alc de edizion 2019 di Suns Europe, il festival des arts tes lenghis minorizadis dal nestri continent. Lis primis anticipazions a tocjin la sezion musicâl e i siei partecipants: par esempli i ocitans Mauresca Fracas Dub e il cjantautôr de Basse Sassonie neerlandese Leon Moorman.

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.

Mandi, Silvio. La tô int ti dîs «grazie»

Martars ai 16 di Lui, li dal ospedâl Mauriziano di Turin, al è muart Silvio Stolfo. Nassût a Cjarlins intal 1934, al à passât la plui part de sô esistence inte aree metropolitane turinese. Achì al à lavorât tant che muredôr e dopo, dal 1964 fint ae pension, tant che operari ae Fiat.

Al veve un caratar pacific e al jere sensibil e gjenerôs. Il so ategjament viers de vite al jere stât simpri positîf – «la vite e merete vivude in ducj i siei moments», al diseve dispès – e cun chest spirt al à vivût, al à lavorât e si à impegnât a di lunc intal volontariât e intal associazionisim, in ambit sociâl, culturâl e ambientâl. Vie pai ultins agns, cul rivâ de vecjaie e cul vignî sù di plui di cualchi probleme di salût, al à scugnût molâ chestis ativitâts.

Vinars a ai 19 di Lui al è stât fat il so funerâl, li de glesie de parochie dai “Beati parroci Federico Albert e Clemente Marchisio” a Mirafiori. E je stade la ocasion par ricuardâ la sô esperience di vite e la sô vision de vite – vivi cun chei altris e par chei altris, daûr di chei principis di solidarietât e di umanitât che a son stâts simpri la sô bussule – e il so amôr pe nature e pal lavôr, intindût ancje tant che espression personâl e tant che cjamp di condivision e di emancipazion coletive.

Su la sô casse e je stade metude une striche cu la scrite (par furlan) “La tô int”: une maniere par tignî dongje lis tantis dimensions de sô vite, tacant de sô famee fintremai aes comunitâts di apartignince, di chê dal cuartîr a chê dal so paîs di divignince.

Silvio nus lasse ancje la cussience de impuartance di jessi personis e di jessi (e di vivi in) comunitât.
Ancje par chel i disìn «Grazie».

Al è muart il mestri Luciano Lunazzi, artist contemporani e furlan dal mont


Une altre brute gnove che e rive dal Friûl e che e tocje la culture furlane contemporanie.
Trê dîs dopo de muart di Pierluigi Cappello, îr al è vignût a mancjâ ancje Luciano Lunazzi.

Cjargnel di Cjaline di Davâr, emigrant in Svuizare, citadin dal mont, artist.
Lunazzi al à vivût e al à cognossût il mont, cun snait e cuntune umanitât vere e no convenzionâl.
Dut chest si à palesât ad in plen te sô art semplice, colorade, visionarie e tal so jessi presint ator par Udin e ator pal Friûl.

Cumò nus restin i siei cartons piturâts, i siei dissens, i siei collages, che nus contin di siums di libertât, di mont, di Friûl e di mont vivût e contât cuntune cjaladure furlane e par chel libare e di liberazion.

Mandi, mestri Luciano!

E graciis di dut.

Mandi, Pierluigi Cappello

Al è muart Pierluigi Cappello, om zentîl e poete fin.

Si distude la sô vôs, ma nus restin lis sôs peraulis, par furlan e par talian. Peraulis «puaris», vivis e vivarosis.

Lu ricuardìn cun chest articul di Maurizio Crosetti e cuntun so intervent gjavât fûr dal documentari di Marco D’Agostini, I Volti spirituali del Friuli.

Lu ricuardìn cu la «maravee dal frut che al dîs che al à svolât».