Uvernada 2014, trê dîs di musiche «d’oc». Ma cence i Massilia Sound System

loutapage

Al è di gnûf timp di Uvernada, la fieste di unvier de musiche e de culture ocitanie in Piemont. Il dut si davuelç tes Valadas e al ven inmaneât de bande dai Lou Dalfin. Doman a Lo Borg/Borgo San Dalmazzo, in provincie di Cuneo, si jentre tal clou de manifestazion cu la edizion numar 24 de ‘Festa de Lou Dalfin’, un apontament là che dongje dal grup di Sergio Berardo si dan adun tancj altris musiciscj, des Valadas Occitanas dal Piemont, de Occitania Granda e ancje di altris bandis de Europe e dal mont.

Il program des seradis dai 31 di otubar e dal 1n e dai 2 di Novembar si cjate achì. Juste tal ultin al è saltât fûr un cambiament di program. Cemût che al ven sclarît achì, no saran i Massilia Sound System, che tai dîs passâts a àn fat fieste pai trente agns de lôr ativitât e a  pe ocasion a àn dât fûr un gnûf disc e a àn tacât un gnûf tour. E sarà distès une biele ocasion, stant che sul palc si viodaran i mitics Nux Vomica, che tra lis altris  si cjatin ancje tal cd in zonte dal libri Occitania, Friuli, Europa. La mia lingua suona il rock, e i Lou Tapage, grup occitan che ai 15 di Novembar al sarà in Friûl tant che finalist di Suns, il festival european de cjançon in lenghe minoritarie.

Advertisements

‘La Gnot dai Muarts’, ai 31 di Otubar la tradizion e vîf a Tavagnà

25-10-14_gnot

Pe tradizion furlane chê dai 31 di Otubar e je “la Gnot dai Muarts”. Za di cualchi an il Comun di Tavagnà e il so Sportel pe lenghe furlane a fasin indenant pe ocasion une serade di pueste tra storie, leterature e musiche.
Un event di cheste fate al vignarà inmaneât de bande de associazion Lenghis dal Drâc cul jutori dal Comun e cu la colaborazion di Radio Onde Furlane e de associazion Pionîrs juste Vinars ai 31 di Otubar, a tacâ di 9 sot sere, li dal Centri Civic di place Di Prampero.

L’apontament al ten dongje i temis e lis atmosferis di chê che e je une gnot speciâl, moment di incuintri tra il lusôr e la oscuritât e tra la vite e la muart, là che si cjatin chês stessis lidrîs dal  Samhain celtic e dai Dies parentales dai Romans. Te tradizion popolâr furlane dut chest al à cjapât sù ancje altris significâts, che a son leâts al lavôr de tiere, tra la fin des vendemis, la spartizion des risiervis pal invier e il paiament dal cuartês al plevan.

Chescj aspiets diferents a vignaran frontâts inte prime part de serade de bande di Sandri Carrozzo, espert di linguistiche e di tradizions popolârs, che al presentarà un viaç tal spazi e tal timp, in Europe e in Americhe, daûr des olmis di chê gnot «Cuant che i muarts e i vîfs si cjatin».

Cun di plui a saran protagonistis la musiche e lis peraulis cun Lino Straulino, il soremestri de cjançon di autôr in Friûl, studiôs  dal cjant popolâr e ideatôr di une schirie di progjets dedicâts ae opare poetiche di autôrs storics e contemporanis, di Ermes di Colloredo a Maurizio Mattiuzza.

Cu la sô vôs e la sô ghitare, Straulino al presentarà un repertori fondât propit su lis cjançons de tradizion furlane che a fevelin dal incuintri tra i vîfs e i muarts e soredut suntune schirie di tescj dal  poete Emilio Nardini, che un secul indaûr al dedicave a chest teme diviersis sôs composizions,  da “Il pronostic” a “I trei orlois”, e al compagnarà in cheste maniere il public «Là che il timp no si misure».

La partecipazion ae serade e je sore nuie.

Fiorentina – Udinese 3-0

udin_neri

Trê patafs e dôs musis. L’Udin a Florence al zuie ben un timp e al cjape un gol prime de polse, cuant che salacor al podeve jessi za passât in vantaç, intant che te seconde frazion al disparìs, compagn che in tantis altris trafiertis, e i lasse cjamp, iniziative e glorie ai parons di cjase.

Dopo dal sucès cuintri de Atalanta, la scuadre di Stramaccioni e veve di mostrâ di jessi in stât di vê continuitât di zûc e di ategjament ancje lontan di Udin. Sul imprin la partide dal ‘Franchi’ e somee confermâ il biel e il bon di domenie: difese atente, a part une distrazion in vierzidure che e met Ilicic di bessôl denant di Karnezis, flessibilitât e dinamisim te zone mezane, cun Bruno Fernandes a çampe e Badu a drete, e atac vivarôs cun Di Natale che al cîr il gol numar 200, su punizione  cu la bale in moviment, e Muriel che al zuie dal prin minût cun snait e buinis acelerazions.

La Fiorentina, a pet di un Udin cun personalitât, no rive a fâ alc e ce e e torne a fâsi viodi indenant
dome ator de mieze ore di zûc cun Babacar che cul cjâf al interprete inte maniere miôr un sugjeriment di Pasqual, ma Karnezis al è tal so puest. Lis robis a van piês pal Udin a doi minûts dal interval, cuant che Babacar al bute dentri la respinte debule dal puartîr blanc e neri.

Tal secont timp si spietisi che l’Udin al dreci la partide, ma e je la Fiorentina a cjapâ in man il control des operazions. La scuadre di balon furlane si difint cun cualchi inciertece ma no rive a inviâ nissune vere azion di rispueste. A chel pont mistre Strama al tire fûr Bruno Fernandes, pôc presint te manovre, e al bute dentri Thereau, che al zove almancul alc ae azion ofensive blancje e nere. Però nol è avonde, parcè che intant che l’Udin al prove a tornâ a alçâ il cjâf e je une altre volte la Fiorentina a cjatâ la strade dal gol, ancjemò cun Babacar, che si inserìs suntun lanç lunc intun mieç pastroç tra Heutreaux e Widmer e le met tal sac.

L’Udin al à ancje cualchi balon bon in atac, ma nol rive a concretizâju. Lis fuarcis a van al mancul, il caratar ancje e la Fiorentina e gjestìs il vantaç, rivant a segnâ ancjemò une altre rêt.

La scuadre furlane e reste simpri tierce in classifiche, adun cu la Sampdoria e cumò ancje cul Milan. Se nossere a àn confermât cierts lôr limits in trasfierte,  domenie a Udin cuintri dal Genoa, che al à fermât la corse de Juve, i blancs e neris a varan di confermâ ancje chel ategjament positîf che al salte fûr dispès in cjase.

Udinese – Atalanta 2-0

22_03_014_udin_friul

Une bocjade di aiar fresc e bon, che e pare vie la fumate e la maluserie de partide di Turin e e sburte l’Udin al tierç puest in classifiche. La partide di îr cuintri de Atalanta e va inte maniere miôr pe scuadre di balon furlane che cuintri de Atalanta in cjase e vinç cul classic risultât ae inglese.

Il sucès al è meteretât sei sul plan dal caratar che par ce che al tocje la cualitât dal zûc. Il risultât finâl al ven fat sù cun personalitât vie dal prin timp, cuant che i blancs e neris a imponin la lôr supremazie teritoriâl, e al ven mantignût vie pe seconde frazion, cuant che i aversaris a rivin imbastî une cierte reazion, ma l’Udin al ten bot.

Al è impuartanton il contribût dal cjapitani Totò, no dome pal gol segnât dopo nancje sîs minûts di zûc, che al è un esempli di tecniche e esperience, ma plui in gjenerâl pe tignude dal cjamp – di gjambis, di cûr e di çurviel – che e zove ae scuadre ancje tal moment di scombati, tal secont timp.
Al zuie ben ancje Thereau, che sul imprin nol rive a metile dentri suntun biel sugjeriment di Di Natale ma al mostre costance, dinamisim e snait e al segne il doi a zero tal ultin cuart di ore dal prin timp.

La Atalanta, che tai prins cuarantecinc minûts no si viôt indevant e e clope daûr, tal secont timp e prove a dreçâ la sô situazion, cu la jentrade tal cjamp di Boakye e Denis e cun  Maxi Moralez a sapontâ lis dôs pontis. L’Udin nol piert il cjâf, al gjestìs il risultât e lis fuarcis cence fastidis, te seconde e te tierce linie, e al rispuint ancje in atac, soredut cun Bruno Fernandes, che si svicine a tierce segnadure.

Tes prossimis partidis cuintri di Fiorentina e Genoa l’Udin al è clamât a confermâ dut ce che di bon al à mostrât cuintri dai bergamascs. Par intant, gjoldìnsi cuote sedis e il tierç puest dongje de Sampdoria, daûr di Juve e Rome e denant di Lazio e Milan. Stin «calmuts» e anìn dilunc!

FuarceUdinees

‘Targhe Tenco’, Loris Vescovo tra i cinc finaliscj

Vescul

Ancjemò musiche furlane buine, fuarte e di esportazion. Dopo des sperimentazions sonoris e poetichis di Orko Trio e Fabian Riz  in tour ator pe Italie e pe Europe
al è une altre volte il moment di Loris Vescovo, par sigûr un dai miôr cjantautôrs furlans, che za di agns al met dongje tescj in stât di esprimi pinsîrs e sensazions cun snait, cun ironie e cun disincjant e une misture sauride di folk, jazz, rock e world music.

Il so album plui resint, Penisolâti, che cuindis dîs indaûr al jere stât inserît te prime selezion di finaliscj pes Targhe Tenco, il premi plui impuartant in cont de cjançon di autôr, cumò si cjate dentri de cincuine finâl, inte categorie dedicade aes produzions tai dialets talians e ta chês altris lenghis dal Stât talian, su la fonde di une prime valutazion fate di dusinte esperts, gjornaliscj e critics musicâi.

La gnove e rive diretamentri dal sît internet dal Premio Tenco, là che si cjate la liste di ducj i finaliscj de competizion.

E je une altre conferme dal valôr des produzions musicâls fatis in Friûl e par furlan. Za agns indaûr a jerin rivâts in finâl diviers esponents dal panorame de musiche furlane contemporanie che a cjantin par furlan e tes altris lenghis dal Friûl, di Lino Straulino ai Kosovni Odpadki e di Luigi Maieron al stes Loris Vescovo, che tal 2009 al jere jentrât te selezion finâl cul disc Borderline.

Il verdet definitîf si lu savarà ai 6 di Dicembar, cuant che a Sanremo, li dal teatri Ariston, si fasarà la cerimonie di consegne dai premis, intune serade là che al sarà, tant che ospit, ancje David Crosby.

penisolâti

Orko Trio e Fabian Riz in tour in Italie e in Europe

ork03io4

E je une stagjon di musiche «furlane», «fuarte» e di esportazion, in dutis lis sôs espressions.
Tal cjamp de ricercje e de sperimentazion e je esemplâr la esperience di Orko Trio e Fabian Riz, il supergrup saltât fûr de colaborazion tra il ‘bluesom’ ruspiôs di Breçan di Cormons e il trio metût adun di Michele Cuzziol (batarie), Enrico Giletti (bas eletric) e Giorgio Pacorig (tastieris), che dopo dal disc dât fûr tal 2013 cun Musiche Furlane Fuarte e di bielis performances ator pal Friûl, cumò al puarte  la sô musiche cjantade par furlan ancje ator pe Europe.

Dut al è scomençât ai 17 di Otubar, a Rome li dal Fanfulla, che al è un puest unevore innomenât pe musiche altrenative, e al è lât indenant li dal Barcsòn Vecc di San Martino Spino in Emilie.  Tai mês di Novembar e di Dicembar la tournée e larà indenant sei tal Stât talian che inaltrò, in Austrie e in Slovenie.
La iniziative e ven promovude di Radio Onde Furlane, Hybrida e Dobialab cul jutori de ARLeF (Agjenzie Regjonâl pe Lenghe Furlane). Musiche furlane fuarte e cence confins!

IMG_5164 Viva Onde Furlane ven 2 agosto 2013 020813

Torino – Udinese 1-0

udin_neri

Nuie ce fâ. A Turin l’Udin nol rive a cjapâ ponts ni tal Juventus Stadium ni tal Olimpico. Ancje cuintri dal Toro la scuadre di Stramaccioni  e piert la partide. Se cu la Juve, inte seconde zornade, la scuadre di balon furlane e veve mostrât personalitât e e veve scombatût, ancje se si viodieve za sul imprin la diference di pas e di potenziâl dai aversaris, cuintri dai ‘granatas’ di Ventura si à palesât sù par jù vie par ducj i novante minûts tant che une formazion flape e smamide.

Te prime frazion di zûc no si viôt alc e ce ni d une bande ni di chê altre. I atacs no rivin a jessi pericolôs, lis difesis a fasin il lôr e i doi puartîrs a son disocupâts, stant che lis pocjis conclusions di ca e di là a son simpri fûr dal spieli d epuarte. Dome un sgrisul dilunc dal fîl de schene par Karnezis, dopo 35 minûts, cuant che Vives al rive a fâsi viodi des sôs bandis ma, par fortune dai furlans, il so tîr al sbat cuintri dal pâl.

Tal secont timp la musiche e cambie, soredut pal Toro e par merit dai parons di cjase, che a sielzin di rindi la lôr azion plui incisive e dinamiche cun verticalizazions e balons alts te aree di rigôr a pro dal ‘pivot’ Amauri, che passe dîs minûts dopo de fin dal interval al rive ancje a zirâle cul cjâf in maniere pericolose, cun Karnezis che al rive a fermâle par ordin.
Il gol dal Turin al rive cinc minûts plui indenant: lu segne l’ex Quagliarella, ancje lui in acrobazie. L’Udin si mostre debil sui balons alts e chest al è avonde strani cun int tant che Herteux e Danilo, però al è ce che al sucêt. Cun di plui i blancs e neris no rivin nancje a imbastî une reazion di sest: a son dome uns pôcs di tentatîfs ofensîfs cun Bruno Fernandes e Thereau, che al è il plui pericolôs dai blancs e neris, e ae fin ancje cun Muriel, ma il risultât al reste chel.

La classifiche e reste avonde buine, ma vie pe setemane si varà di tornâ a recuperâ gjambis, cjâf e cûr. La setemane che e ven L’Udin al zuiarà cu la Atalanta.

Capî e meti in vore la autonomie, par che no sedi autono…NIE

LabAut

No son dome la Scozie, la Catalogne, il Paîs Basc, la Corsiche…. Tra i teritoris e lis comunitâts che ator pe Europe – e no dome di cumò –  a fasin indenant resons e rivendicazions di autoguvier al è ancje il Friûl. Cheste situazion, che in tiermins storics, politics e culturâi, e esist almancul di un secul, tes ultimis setemanis si à palesade cuntun ciert impat mediatic e in formis in aparence avonde gnovis.

Cun di fat, dal prin di Otubar e je in vore une consultazion in cont de indipendence dal Friûl. La iniziative, che no si capìs ben se e je un plebissît, un referendum o dome un scandai di opinion, e à stiçât un ciert dibatiment, che si à palesât ad in plen in rêt, cemût che al salte fûr dal Diari e de programazion speciâl di Onde Furlane che si pues tornâ a scoltâle in internet.
Di une bande e je la manifestazion di une dibisugne gjenerâl e de necessitât di sierâ cuntun ciert autonomisim autoreferenziâl. Di chê altre a son une vore di contradizions di sostance, salacor propit in continuitât cun chel stes autonomisim che al à cognossût, massime tai ultins vincj / vincjecinc agns une vere e proprie involuzion, te teorie, te azion e ancjemò prime te organizazion, te rapresentazion e te rapresentance.

In chest contest –  là che di une bande in dute Europe e je une bolidure di iniziativis che a tocjin l’autoguvier des regjons e des nazions cence stât e di chê altre tal Stât talian dutis lis cuistions dal decentrament e dal federalisim a son disparidis de agjende politiche e istituzionâl e a vegnin fintremai metudis in discussion ancje lis autonomiis speciâls –  e somee pardabon interessante la iniziative cjapade sù di un grup di sindics dal Friûl, di meti dongje un Laboratori di Autonomie, cu la colaborazion dai media furlans plui atents ae cuistion, di diviersis associazions e di progjet di ricercje de Universitât.

L’intindiment, cemût che si pues lei ancje chi al è chel di vierzi un dibatiment e un confront su chescj argoments, in maniere operative, propit a tacâ des esperiencis des comunitâts locâls, des dibisugnis concretis e dai problemis dal dì di vuê. La idee e je chê di inviâ un percors di disvilup sociâl, economic e civic che al tegni cont dal teritori, de sô int, des lôr risorsis e dai lôr dirits, daûr di une logjiche si sostignibilitât là che cualitât e identitât a valin di plui de cuantitât.

Il prin pas di chest percors al è un program di incuintris publics, che al tache usgnot a Cjarlins e al va indenant par passe un mês, tra Flaiban (ai 23 di Otubar), Rivis di Arcjan (ai 30 di Otubar), Flumisel (ai 13 di Novembar) e Merêt di Tombe (ai 20 di Novembar).

Il program dai incuintris in detai si pues leilu achì e achì. Altris informazions si cjatin achì .

Cumò e je propit ore di capî e meti in vore la autonomie, par che no deventi autono…NIE.

‘Babêl, Europe’ al torne in Onde

ondef

Su lis frecuencis di Radio Onde Furlane – te plui part dal Friûl sui 90 Mhz, in Cjargne sui 90.2 e 106.5, a Colonia Caroya in Argjentine sui 96.6 e in dut il mont in rêt ae direzion www.ondefurlane.eu  – al torne Babêl, Europe, il viaç cuindisinâl a torzeon pe Europe de diversitât linguistiche e de creativitât musicâl.

A tacâ di vuê, une setemane sì e une setemane no, la «radio libare dai furlans» e da apontament a scoltadoris e scoltadôrs , il martars in direte a 11 e il miercus in repliche  a une dopodimisdì, cuntune mieze ore dedicade a musichis, lenghis, popui e teritoris,  tra storie, novitâts discografichis, concierts e iniziativis variis.

Par contats: babel.europe@gmail.com.

cover_la_me_lenghe_e_sune_il_rock

Udinese – Cesena 1-1

udin_neri

Displasê e rabie par vê pierdude la pussibilitât di puartâ a cjase altris trê ponts une vore pesants par vie di un rigôr che clamâlu discutibil al è fâi i compliments. No je la uniche clâf di leture de partide di îr tra Udin e Cesena, ma par sigûr al è ce che al colpìs di plui di chel incuintri là che i blancs e neris si à àn cjatât par mieze ore – in spiete dal big match tra Juve e Rome – su la spice de classifiche cun chês dôs e po si àn viodûts ridimensionâts sei il risultât de gare che il posizionament te graduatorie.
Probabilmentri Mariani, viodude la maie colôr di rose cun chês dôs riis par tres, al à di vê pensât che la aversarie dal Udin no veve di jessi il Cesena ma une altre innomenade formazion taliane, cuntune sô divise storiche, avonde usade a ricevi cualchi «aiutino» de bande dai arbitris, cemût che si lei ator di tant timp…

Lassant in bande polemichis e ironiis in cont des decisions arbitrâls, o podìn dî che l’Udin di îr al è stât une scuadre che e à scombatût e che e à masanât zûc, ancje se cun mancul luciditât che in altris ocasions, parcè che al à vût a ce fâ cuntun aversari che al à palesât caratar e capacitât di resisti e di rispuindi in maniere convincente, cemût che al salte fûr di cualchi note di cronache.

Il Cesena si presente za sul imprin ben sierât e coraçât daûr e dinamic e vivarôs denant, zuiant in cuintripît. L’Udin al patìs la disposizion tal cjamp da aversaris, che no i permetin di disvilupâ il so zûc e che anzit si fasin viodi in maniere pericolose des bandi di Karnezis, che al fâs ad in plen il so dovê, soredut cuintri des conclusions di Marilungo e Brienza. Tal prin timp la scuadre furlane, cun Thereau e Di Natale, no rive pardabon a impegnâ Leali, cundut che la pression di Badu e Widmer e fâs spudâ balins ae seconde e ae tierce linie dai romagnûi.

Tal secont timp la musiche e reste chê: l’Udin al cîr di sburtâ indenant ma no rive a butâ jù lis bariduris tiradis sùù dal Cesena. Alc al cambie cul passâ dal timp, cu lis conclusions di Guilherme e Di Natale, dutis dôs fûr dal spieli de puarte, che a testemoniein la incressite de pression de scuadre furlane. La muraie dal Cesena, però, si rive a passâle dome cuntune azion personâl di Bruno Fernandes, che al salte Capelli e De Feudis e al bat Leali: un a zero.

Dopo dal numar dal zuiadôr portughês e rive ancj une conclusion di Thereau, che e ven fermade di Leali, intant che il Cesena al prove a rispuindi cu la jentrade tal cjamp di Rodriguez al puest di Defrel e dongje di Brienza e Marilungo. Karnezis al bloche un balon insidiôs tirât propit di Rodriguez e e je glorie ancje pal puartîr dai ospits suntune canonade di Allan.
Dut ben, o scuasit! Par Mariani il contat tra Rodriguez e Widmer al è un fâl di rigôr, Cascione al tire dai undis metris e Karnezis nol rive a parâ. Risultât finâl: un a un e cuart puest in classifiche.

Aldo Sbadiglio e la Famiglia Ananas in vacanza a Dreda a cjantin che No covente rabiâsi. Saraie vere?