Dopli apontament ai 31 di Otubar a Udin: Trastolons + Rive No Tocje e LaipNessLess

tananai

Poesie e musiche furlane e babeliche a Udin. Ai 31 di Otubar a son doi apontaments di pierdi.

Il prin al è a 6 e mieze sot sere li dal Bar di Moroldo ‘Cjanton da Cjargno’ in vie Caccia 47. Al è un incuintri di pinsîrs, di peraulis, di sunôrs, di emozions e di visions «cence leç» (senza legge) che si palesin intune lenghe che si declare «caraibiche». I protagoniscj dal event a son i Trastolons, il grup poetic che di vincj agns incà al puarte indenant il so percors poetic e leterari cence etichetis, scalembri e iregolâr, furlan e disobedient, incostant e babelic.

Guido Carrara, Stiefin Morat, Lussia di Uanis e Fabian Riz cu la complicitât dai Rive No Tocje a presentaran pe prime volte i siet Cjants di acompagnament al tierç mileni, une performance leterarie-musicâl che e va daûr de ispirazion che e à marcât tantis altris azions ‘trastolonis’, des publicazions Tons Trastolons (dal 1998) e Tananai (dal 2001) ai diviers events publics di chescj agns.

rive_no_tocje

Une ocasion par ricuardâ che di Alap a Kabul nol è dome savalon e par tornâ a saludâ Raff BB Lazzara, cuntun gnûf omaç ae memorie dal trastolon che nol è plui.

Il secont apontament al è a 9 di gnot alì dal Quinto Recinto Enofficina, in splaç dai Pecile 3.

E sarà une gnove ocasion par viodi e scoltâ dal vîf i LaipNessLess, innomenade formazion de Basse Furlane, che di un pâr di agns incà e met dongje cun efiets simpri interessants une turbostaiare ironiche, visionarie e plene di rock e di blues.

Di Muçane e Ziline lis Bestiis Forestis si preparin a invadi la capitâl dal Friûl.

laiplessness4

Il Friûl e la Europe a son su Onde Furlane e il furlan e la Europe si cjatin a Bruxelles

foto_bandieris

Su Radio Onde Furlane si va indenant a fevelâ di Friûl e di Europe e plui in gjenerâl dai diviers aspiets dal rapuart tra integrazion europeane, tutele des minorancis e autoguvier.
Chescj argoments a vegnin frontâts dentri di Friûl_Furlanija_Friaul_Friuli, l’Europa batte dove la lingua duole, program curât e condusût de bande di Marco Stolfo.

Dopo de prime pontade, dedicade al 35esim inovâl de aprovazion de bande dal Parlament euriopean, de Risoluzion suntune Cjarte des lenghis e des culturis regjonâls e suntune Cjarte dai dirits des minorancis, e dal secont apontament, là che si à fevelât de evoluzion de tutele des minorancis a nivel european de fin de seconde vuere mondiâl fintremai al dì di vuê, sabide ai 29 (e domenie ai 30 in repliche) i argoments frontâts a saran chei des visions europeanis e europeistis de cuistion furlane e dai contats e des colaborazions tra diviersis realtâts dal Friûl e altris sù par jù compagnis inaltrò in Europe in cont des rivendicazions e des azions di tutele e di autoguvier.

logo_web_ROF_new

Il percors storic al metarà dongje lis ideis di Friûl e furlan di Achille Tellini, Felix Marchi, Pre Bepo Marchet, la partecipazion di une delegazione furlane ae fondazion de FUEN (Union federaliste des nazionalitâts europeanis), lis mobilitazions dal ’68 e lis rêts europeanis dai ultins cuarante agns.

Il program al fâs part dal progjet Friûl_Furlanija_Friaul_Friuli, l’Europa batte dove la lingua duole. Identitât, autoguvier, teritori e citadinance europeane, metût adun de bande de associazion di promozion sociâl e culturâl KLARIS cul contribût de Provincie di Udin, cun chê di proponi ocasions di cognossince e di riflession sul pluralisim linguistic e culturâl, sui dirits linguistics, su la citadinance europeane su la relazion tra unitât europeane, diversitât culturâl, partecipazion civiche e autonomiis teritoriâls.

La trasmisssion e va in onde juste doi dîs dopo che a Bruxelles – tant par confermâ cetant che al è srent il leament tra Friûl, furlan e Europe – a son stadis metudis adun de ARLeF, in colaborazion cu la Regjon Friûl-VJ e cul NPLD, dôs iniziativis dal titul Furlan Lenghe de Europe.

Altris informazions in cont dal progjet tal so complès e de trasmission in particolârs si cjatin culì: http://klarisweb.wordpress.com e www.ondefurlane.eu.

banner-arlef-bruxelles

Palermo – Udinese 1-3

bandieris-friuul

Une buine partide, zuiade cul cûr e cun caratar, che si siere inte maniere miôr pussibile: cun trê goi e cun trê ponts. L’Udin a Palermo prime al patìs e po al reagjìs, al gjestìs e al vinç. Cussì al cjape une altre bocjade di aiar bon e al da une altre sodisfazion ai siei tifôs, che dopo vê viodût une scuadre resuride che e à pierdût cu la Juve e une intermitente che e à vinçût, a’nd à preseade une che e à fat risultât in maniere convinciente.

La trasfierte siciliane dai blancs e neris e ufrìs diviersis indicazions positivis pe scuadre di Delneri, che e mostre di jessi un coletîf compat e unît in stât di interpretâ lis diviersis fasis di une partide che ae vilie si presentave dificile almancul in misure compagne di chê di Turin di dôs setemanis indaûr – cul Palermo in astinence di risultâts – e che vie pai novante minûts e à mudât plui volte fisionomie.

Il prin timp si vierç cuntune fase di studi, tra il 4-2-3-1 dai parons di cjase e il 4-3-3 de formazion furlane, là che te prime linie si torne a viodi Matios dongje di Thereau e Zapata. Il Palermo al olse un tic di plui, al fâs valê une cierte supremazie teritoriâl e al cjate la strade dal gol dopo dîs minûts cun Nestorovski, che i robe la bale a Angella, al jentre te aree di rigôr e al bat Karnezis cuntun tîr che si zove ancje di une deviazion lizere di Widmer.

L’Udin al rispuint cuntun tîr di Kums e po cuntune incressite de sô manovre, vuidade dal zuiadôr belgjic e di Fofana. Il Palermo, dopo vê viertis lis segnaduris profitant di un dopli erôr di Angella e Danilo, al prove a meti ancjemò in crisi i doi centrâi, ma nol rive, intant che i blancs e neris cul passâ dai minûts a alcin la linie dal so zûc: il 4-3-3 al devente un 4-4-2, cun Thereau in posizion plui centâl e cun Matos un tic plui in bande e indaûr.

Passade la mieze ore di zûc, prime il Palermo al va al tîr ancjemò cun Nestorovski e po l’Udin al cjate il gol dal un a un cun Widmer che al libere Thereau e il francês che al segne. Tai ultins cinc minûts i doi puartîrs a deventin protagoniscj: Karnezis al interven suntune conclusion cul cjâf di Embalo e Posavec al siere la sô puarte in dôs ocasions consecutivis di Matos e Fofana.

Il secont timp al tache in maniere blande e cun cualchi acelerazion a soprese di une bande e di chê altre. Delneri al cambie Matos cun Badu e De Zerbi al rispuint cun Chochev al puest di Pezzella e Sallai par Diamanti. A passin i minûts, al jentre ancje De Paul al puest di Kums, il Palermo nol siere une buine conclusion tra Rispoli e Sallai e l’Udin al rispuint cuntune interdizion di Hallfredsson, che e devente un lanç par Fofana che al tire in puarte e al segne.

Si jentre tal ultin cuart di ore e l’Udin al segne ancjemò cuntun cuintripît inviât di Badu che al met Fofana tes cundizions pal tierç gol. Il Palermo al reste in dîs – espulsion di Sallai – e l’Udin si svicine al poker: tîr di Thereau e pâl.

Lunis ai 31 di Otubar si zuiarà a Udin cuintri dal Turin.

Udinese – Pescara 3-1

fuarceudinees

Trê goi e trê ponts puartâts a cjase. Dopo de biele partide cuintri de Juve, tal esordi su la bancjine dal Stadi Friûl di Luigi Delneri l’Udin al rive a fâ ancje il risultât che al covente. La prestazion de scuadre e je par sigûr mancul biele di chê dal Juventus Stadium e duncje il tecnic di Aquilee al varà di lavorâ ancjemò cetant, però la sostance e je avonde positive, massime in principi dal prin timp, sei pal caratar sei par chês olmis di zûc che planc a planc si rive a vualmâ.

Tra i blancs e neri al torne a zuiâ ancje Widmer – e ancje cheste e je une buine gnove – e la presince dal svuizar e zove a dute la scuadre, che si presente cun chê stesse struture tatiche de partide cu la Juve e cu la linie di atac formade di De Paul, Zapata e Thereau.
Il Pescara al à un scheme a forme di arbul di Nadâl cun Caprari uniche vere ponte e si difint e al cîr di zuiâ cu la bale par tiere.

L’Udin al partìs ben, cul pît fracât sul aceleradôr, e si svicine ae segnadure za al cuint minûts cuntune conclusion di Thereau. Il zuaidôr francês al segne cuatri minûts plui indenant cuntun tîr dal discut, assegnât di Rocchi par un intervent falôs di Campagnaro su Zapata. Il pescara nol rive a reagjî in maniere decise, stant che la sô manovre e je un tic masse ingredeade. La uniche ocasion i segnâ e rive suntune bale alte: Caprari le zire in puarte cuntune acrobazie ma e sbat su la travierse de puarte difindude di Karnezis. Di chê altre bande i blancs e neris si svicinin al doi a zero prime dal interval, cuntun diagonâl di Zapata fûr bersai.

Tal secont timp il Pescara al prove a olsâ e a cjapâ sù il control dal zûc te fasse mezane dal cjamp, cun recupars e rilançs plui decîs e agressîfs e cun cualchi iniziative di Caprari. L’Udin al aptìs un tic masse la pression dai aversaris, cundut che no rivin a cjatâ la strade dal gol, e al rive a rispuindi cuntune dople iniziative di Badu e Thereau: il prin al tire in puarte ma al cjate Bizzarri che al rispuint, il secont al recupare il balon parât vie dal puartîr e lu met tal sac.

Sot di doi goi, Oddo al mude la muse tatiche de sô scuadre, cu la jentrade di Crescenzi e Mitrita al puest Cristante e Benali.
Il Pescara al vuadagne energjiis gnovis e al rive a smiezâ il disvantaç cuntun biel tîr di Aquilani, ancje parcè che al è l’Udin che al continue a vê problemis di ossigjen, di atenzion e di luciditât, cemût che al jere clâr za tal imprin dal secont timp.

La scuadre di balon furlane e patìs un pôc la pression dai aversaris e un pôc i siei limits, però cun Fofana e mostre di vê cûr e caratar sei in atac che in difese, cuant che il Pescara al prove l’atac finâl. Cussì i blancs e neris a rivin a tignî bot fin tal ultin e a cjatin ancje la strade par staronzâ il risultât: Zapata si vuadagne un rigôr par un fal di Crescenzi e al segne dal discut.

Prossimis partidis cuintri dal Palermo, joibe in trasfierte, e po cul Toro, lunis ai 31 in cjase.

Storie, memorie e atualitât. E va «in Onde» une altre ‘Sabide Furlane Fuarte’

logo_web_ROF_new

Ancje la zornade dai 22 di Otubar su Radio Onde Furlane e sarà une Sabide Furlane Fuarte, in particolâr vie pe buinore.

Cun di fat, dopo de prime edizion dal Gjornâl radio e dal Meteo, a 8.30 e je proviodude la seconde pontade di Friûl_Furlanija_Friaul_Friuli. L’Europa batte dove la lingua duole, intant che a 9.30 e sarà la tierce pontade di Friûl SotSore, il speciâl dedicât al taramot dal 1976 e ae ricostruzion.

La prime trasmission e fâs part dal progjet Friûl_Furlanija_Friaul_Friuli, l’Europa batte dove la lingua duole. Identitât, autoguvier, teritori e citadinance europeane, metût adun de bande de associazion di promozion sociâl e culturâl KLARIS cul contribût de Provincie di Udin, cun chê di proponi ocasions di cognossince e di riflession sul pluralisim linguistic e culturâl, sui dirits linguistics, su la citadinance europeane su la relazion tra unitât europeane, diversitât culturâl, partecipazion civiche e autonomiis teritoriâls.

european-charter-for-regional-or-minority-languages-giving-regional-and-minority-languages-a-say

In particolâr vie par chest apontament si presentarà la evoluzion de tutele des minorancis e de promozion des lenghis minoritariis e plui in gjenerâl dal pluralisim linguistic e culturâl a nivel european, a tacâ de fin de Seconde Vuere Mondiâl fintremai al dì di vuê. Cun di plui si marcaran lis conessions tra la tutele des minorancis e il procès de integrazion continentâl, che di chel si podarès calcolâle tant che un spieli o une unitât di misure e di valutazion par vie che il so specific disvilup al va daûr des sôs fasis di evoluzion e des sôs frenadis e lis evidenzie in maniere specifiche.

Al vignarà completât il cuadri piturât la setemane passade, dentri de trasmission dedicade ae prime cjolte di posizion uficiâl de bande dal Parlament european in cont de tutele des minorancis, de promozion des lenghis minoritariis e de garanzie dai dirits, la Risoluzion suntune Cjarte des lenghis e des culturis regjonâls e suntune Cjarte dai dirits des minorancis etnichis, fate buine juste 35 agns indaûr, ai 16 di Otubar dal 1981, e cognossude ancje cul non dal so reladôr, l’eurodeputât socialist Gaetano Arfè.

manifud76

Dopo de rassegne stampe di In dì di Vuê, e je proviodude la tierce pontade di Friûl SotSore, la serie speciâl de rubriche setemanâl di aprofondiment gjornalistic Dret & Ledrôs dedicade al taramot dal 1976. Il program, che al à chê di recuperâ, cence retoriche, la memorie di chê solidarietât che il taramot al à discjadenât dentri e fûr dal Friûl, des mobilitazions, des lotis popolârs e des esperiencis di autoguvier dal bas, al frontarà propit il teme dal protagonisim de int, dentris des tendopolis e inaltrò, e chel de solidarietât dentri e fûr des comunitâts.

Pe ocasion Mauro Missana e Mauro Tosoni, che in chei agns al steve daûr di In Uaite, il sfuei di informazion dal coordenament dai paîs dal taramot, a tiraran dongje lis testemonenacis di altris protagoniscj di chê ete, tant che Remo Cacitti, Laura Nicoloso, Gianfrancesco Gubiani, Duilio Corgnali e Corrado Della Libera, e chê dal ricercjadôr Igor Londero, autôr dal libri Pa sopravivence, no pa l’anarchie.

cuviertele_londar

La Sabide Furlane Fuarte si podarà tornâ a scoltâle ancje… domenie: la repliche di Friûl SotSore e je a vot a buinore e chê di Friûl_Furlanija_Friaul_Friuli. L’Europa batte dove la lingua duole a undis e mieze.

Onde Furlane si cjate in modulazion di frecuence sui 90 Mhz te plui part dal Friûl, sui 90.2 Mhz in Cjargne e su internet ae direzion www.ondefurlane.eu .
Cun di plui si pues scoltâle su smartphone, Iphone, tablet e Ipad, doprant la aplicazion specifiche che si le discjame de rêt daûr des indicazions che si cjatin ae direzion www.ondefurlane.eu.

Dai 19 di Otubar ai 17 di Novembar a Udin a son lis gnovis Lezions di Autonomie

LabAut

Si scree vuê a Udin une gnove serie di Lezions di Autonomie.
Dai 19 di Otubar ai 17 di Novembar a saran altris cinc incuintris tematics par resonâ de atualitât, de storie e dal avignî dal Friûl e soredut par frontâ une schirie di argoments che a tocjin la teorie e la pratiche dal autoguvier teritoriâl, ancje cuntun confront cun altris realtâts dal Stât talian e dal rest de Europe, tant che la Val di Aoste, il Tirôl dal Sud e il Paîs Basc.

La iniziative e je promovude dal Laboratori di Autonomie, la rêt che e ten dongje vincjeun comuns dal Friûl e di une schirie di entitâts e istituzions. des associazions La Grame e  Patrie dal Friûl a Radio Onde Furlane e fintremai al Modul Jean Monnet MuMuCEI de Universitât dal Friûl.

Lis cinc gnovis Lezions di Autonomie si fasaran dutis a Udin li de Sale Florio dal Retorât de Universitât dal Friûl.

uniud

Tal prin incuintri si fevelarà di autonomie economiche e politiche-aministrative e al è proviodût ancje l’intervent dal jurist e politic valdostan Roberto Louvin.

Tes lezions seguitivis a vignaran frontâts i temis dal rapuart tra identitâts linguistichis e autonomie, de scuele e de competence primarie su la istruzion che i coventarès centant ae regjon Friûl-VJ, di Europe, tutele des minorancis e politichis linguistichis e di cemût che la specificitât linguistiche e je un valôr ancje in tiermins economics, a tacâ de esperience de Comunitât autonome basche, là che a pro de lenghe basche si investìs l’1% dal belanç regjonâl e chest al prodûs il 5% dal prodot interni sporc de regjon, cemût che al jere stât contât l’an passât inte suaze de seconde taule taronde Friûl@Europe.

Ducj i incuintri a tachin a 6 sot sere. La partecipazion e je libare e al ven conseât di notâsi prime cun chê di vê sigurece di cjatâ puest.

Il program in detai si pues leilu achì.

lezions_2016_2017

 

A Babêl Europe lis gnovis di Suns Europe e Suns Ladinia

Pieter_Bruegel_the_Elder_-_The_Tower_of_Babel_Rotterdam

Vuê ai 18 di Otubar a 11 a buinore in direte e doman ai 19 a une dopo di misdì, su lis frecuencis di Radio Onde Furlane  (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu), al torne Babêl Europe, il program cuindisinâl dedicât ae creativitât musicâl tes lenghis minorizadis.

Dentri di cheste gnove pontade, il viaç tra lenghis, musichis, minorancis e nazions cence stât al larà daûr di cualchi novitât e di cualchi riferiment storic e al pontarà la sô atenzion soredut su lis gnovis che a rivin in cont di Suns Europe, il festival des arts performativis in lenghe minoritarie che si davuelzarà a Udin tra la fin di Novembar e i prins di Dicembar, e su Suns Ladinia, festival de musiche tes lenghis minoritariis de Europe alpine e mediteranie, che al è une sorte di tape di svicinament ae manifestazion che e rindarà il Friûl il cûr de diversitât linguistiche e culturâl dal continent.

In particolâr si tacarà a cerçâ cualchidune des cjançons che a vignaran presentadis dal vîf te serade dai 19 di Novembar li dal teatri Navalge di Moena. Par esempli Kama dal cjantautôr de Grecìe Salentine Rocco De Santis, Discolce dal rapper cjargnel Doro Gjat e Is  dal musicist sart Arrogalla.

E sarà ancje la ocasion par ricuardâ i dîs agns de muart dal storic cjantant dai Tazenda, Andrea Parodi, il 35esim inovâl de prime Risoluzion dal Parlment european a pro de tutele des minorancis, ricorence che e je memoreade cuntune trasmission speciâl di Onde Furlane vie pai dîs passâts, e il cuint inovâl de Declarazion di Aiete a pro dal inviament dal procès di pâs tal Paîs Basc, compagnâts de musiche dai Skalariak, cence dismenteâ che vinars ai 21 di Otubar a Sanremo alì dal Premi Tenco e sarà ancje la cjantante algherese Claudia Crabuzza.

Ancje cheste pontade di Babêl Europe, dopo des dôs emissions di vuê e di doman, si podarà tornâ a scoltâle in rêt.

banner-2-2

I 35 agns de «Cjarte di Strasburc», un inovâl impuartant pe Europe «unide te diversitât»

0515_lengate

Chê dai 16 di Otubar e je une date impuartantone par cui che i ten ae diversitât culturâl, ai dirits linguistics, ae tutele des minorancis e plui in gjenerâl ae democrazie e ae prospetive di une Europe «unide te diversitât».

In chê dì di trentecinc agns indaûr – juste ai 16 di Otubar dal 1981 – il Parlament european al faseve buine la Risoluzion suntune Cjarte des lenghis e des culturis regjonâls e suntune Cjarte dai dirits des minorancis etnichis, cognossude ancje cul non dal so reladôr, l’eurodeputât socialist talian Gaetano Arfè.

Chê Risoluzion e je la prime cjolte di posizion uficiâl in cont di chestis cuistions de bande dai rapresentants dai citadins di chê che in chê volte e jere la Comunitât economiche europeane. La sô aprovazion e i siei contignûts si insuazin intun contest politic e sociâl che al palese la situazion di crisi dal stât nazionâl e la incressite de dibisugne di democratizazion a ducj i nivei istituzionâi e teritoriâi e là che si cjatin dongje il cussì clamât revival  etnic e la gnove fase di avanzament dal procès di integrazion continentâl rapresentade des primis elezions europeanis dal 1979.

libri_stolfo_arfe

Propit chel gnûf leam tra eletôrs e elets al marche un svolt pardabon rilevant par ce che al tocje la evoluzion des istituzions comunitariis, stant che di in chê volte, su la fonde de sô elezion direte, il Parlament european al devente par sigûr plui rapresentatîf dai citadins.

Cun di plui chel stes Parlament european che ai 16 di Otubar 1981 al vote in maiorance a pro de cussì clamade «Cjarte di Strasburc», ai 14 di Fevrâr dal 1984 al fasarà bon ancje il Progjet di Tratât de Union Europeane  fat indenant di Altiero Spinelli, che di chê altre bande al veve dade la so poie ae Risoluzion promovude di Arfè.

La relazion tra citadins e eurodeputâts e je determinante ancje par che il Parlament european al puarti ae atenzion di chei altris orghins comunitariis lis cuistions che a tocjin minorancis, lenghis e tutele.
Cun di fat, vie pe campagne eletorâl des europeanis dal 1979 diviers citadins che a fasin part di minorancis e nazions cence stât a sburtin i candidâts a fâ alc par che a nivel comunitari al vegni fat alc che al zovi al ricognossiment e ae garanzie dai dirits linguistics e che al meti ancje i Stâts – par esempli chel talian e chel francês – tes cundizions di indotâsi di une normative e di politichis di pueste. Al è che che al sucêt ancje in Friûl, là che Arfè al à contats e ocasions di confront cun diviers rapresentants des comunitâts furlanis e slovenis.
Par chel si pues dî che la «Cjarte di Strasburc» e je nassude (ancje) in Friûl.

bandiera-europa

Chel test al palese, in cont di lenghis, minorancis e tutele, une vision che e je moderne e globâl, stant che su fondis teorichis une vore saldis al fronte l’argoment no dome tai siei aspiets culturâi, ma ben ancje dal pont di viste juridic e politic cuntun orientament a clâr europeist.

Propit par chel la prime Risoluzion Arfè e je «fie dai siei timps», ma e je ancje di grande atualitât.

Prin di dut, la «Cjarte di Strasburc» e sclarìs cemût che la tutele di chês comunitâts, dai lôr dirits e des lôr lenghis, che il podê dai Stâts ur à fat cuintri o a palês o in cidin, no rispuint dome a une dibisugne culturâl ma e je ancje la metude in vore di principis di fonde tant che libertât e avualiance. Cun di plui, e proferìs ancje une schirie di indicazions operativis che a son concretis e coerentis cun chei principis stes e che a tocjin azions e intervents tai cjamps de istruzion, dai media e de vite publiche.

La sô impuartance storiche pe tutele des minorancis in Europe e je ancje intai siei efiets.
A son chei imediâts, tant che l’inseriment di cheste cuistion inte suaze des politichis comunitariis, cu la viertidure tal 1983 di une gnove linie di belanç che almancul fintremai ae fin dal secul passât i à dât ae Comission europeane la pussibilitât di sapontâ progjets e iniziativis di tutele e di promozion cun contribûts di pueste.
E a son chei che no cognossin limits di timp, che a rindin la «Cjarte di Strasburc» un pont di riferiment in Europe sei pes rivendicazions che pes politichis di tutele.

arfe

Par chel al è ben e al convent ricuardâ chê Risoluzion e il so reladôr e memoreâ chest inovâl, cemût che e veve fat cuindis agns indaûr la Provincie di Turin, cemût che a àn fat in chescj dîs in Friûl la associazion KLARIS e Radio Onde Furlane e cemût che o fasìn ancje nô cun chest articul e cul invît a documentâsi e a lei alc altri in cont de «Cjarte di Strasburc», par furlan e par talian.

Juventus – Udinese 2-1

udin_neri

L’Udin al piert, ma al zuie avonde ben, par sigûr miôr di cemût che al veve zuiât fin cumò, e salacor al pues rivendicâ ancje alc in cont dal risultât, stant che se al ves puartât a cjase un pontut nol sarès stât nuie di falât.

Nossere a Turin la scuadre di balon furlane e à mostrât une muse gnove, plui biele e plui grintose.
La rivade in bancjine di Luigi Delneri i à fat ben ai zuiadôrs, al ambient e ancje al zûc. Cun di fat, ae vilie de partide cuintri de Juve l’alenadôr furlan al veve domandât ai siei di vê snait e determinazion e vie par dut l’incuintri i blancs e neris cu la maie blu a àn rispuindût inte maniere juste.

Denant dal 4-4-2 de Juve la scuadre furlane si presente cuntune disposizion dinamiche che e mude dal 4-3-3 in posizion di atac al 4-5-1 tal moment che al covente difindi. La sielte tatiche e je chê juste, stant che i parons di cjase no rivin a fâ alc e ce, fûr che une conclusion di Mandzukic.

L’Udin si difint cun sintiment ma soredut al mostre di jessi in stât di fâur ancje un tic di pôre ai parons di cjase, cul dopleâ lis marcjaduris e cul fâ ancje un pôc di pressing. Al rive cussì il gol dal vantaç furlan, juste dopo mieze ore di zûc: erôr dopli tra Evra e Hernanes, inseriment di Jankto, tîr e… un a zero!

La reazion de Juve e je dute tal cjâf, tes gjambis e tai pîts di Dybala, che prime de polse al segne il gol dal un a un cuntune biele punizion.

Tal secont timp Allegri al prove a sburtâ indenant i siei zuiadôrs cun Cuadrado chel ven mandât in atac e Dybala che si slargje a man drete.

I ecuilibris de partide no cambiin masse, però la Juve e rive a vuadagnâsi un rigôr suntun fal di De Paul su Alex Sandro: dal discut al tire Dybala – ancjemò lui – e al segne. A chel pont la Juve e cîr di difindi il risultât, intant che l’Udin al prove a dreçâlu: par vincj minûts Buffon nol à masse impegns, ma tal ultin cuart di ore al à il so bon ce fâ par salvâ il risultât su lis conclusions di Thereau e Zapata.

Si à viodût il zûc – cul 51% di possès de bale – e si à viodût ancje il caratar. Se l’udin al larà indenant cussì si viodaran ancje i risultâts.

Viodarìn.

Europe, taramot e sport, ai 15/10 une sabide ‘super’ su Onde Furlane

microfonROF

Informazion, intratigniment, memorie storiche e sperimentazion. Chês che si pues calcolâlis lis coordenadis di riferiment gjenerâls de ativitât di Radio Onde Furlane si palesin ancjemò plui a fuart dal solit dentri de programazion dai 15 di otubar.

Cuntune parafrasi dal titul di une cjançon di Sergio Caputo e cuntun riferiment al non de etichete discografiche nassude in bande de ‘radio libare dai furlans’, la zornade di doman si podarès definîle Une sabide furlane… fuarte.

Cun di fat, dopo de prime edizion dal Gjornâl radio e dal Meteo, a 8.30 si scree une gnove trasmission, che il so titul al è Friûl_Furlanija_Friaul_Friuli. L’Europa batte dove la lingua duole.
Il program al fâs part dal progjet Friûl_Furlanija_Friaul_Friuli, l’Europa batte dove la lingua duole. Identitât, autoguvier, teritori e citadinance europeane, metût adun de bande de associazion di promozion sociâl e culturâl KLARIS cul contribût de Provincie di Udin, cun chê di proponi ocasions di cognossince e di riflession sul pluralisim linguistic e culturâl, sui dirits linguistics, su la citadinance europeane su la relazion tra unitât europeane, diversitât culturâl, partecipazion civiche e autonomiis teritoriâls.

bandiera-europa

L’argoment de prime pontade al è chel de prime cjolte di posizion uficiâl de bande dal Parlament european in cont de tutele des minorancis, de promozion des lenghis minoritariis e de garanzie dai dirits, la Risoluzion suntune Cjarte des lenghis e des culturis regjonâls e suntune Cjarte dai dirits des minorancis etnichis, fate buine juste 35 agns indaûr, ai 16 di Otubar dal 1981, e cognossude ancje cul non dal so reladôr, l’eurodeputât socialist Gaetano Arfè.
Si fevelarà di chê Risoluzion e dai siei contignûts e dal contest storic, politic e sociâl di dulà che e je vignude fûr, tra la crisi dal stât nazionâl, la incressite de dibisugne di democratizazion a ducj i nivei istituzionâi e teritoriâi, il cussì clamât ‘revival etnic’ e la gnove fase di avanzament dal procès di integrazion continentâl rapresentade des primis elezions europeanis.

logo_web

Dopo de rassegne stampe di In dì di Vuê, e je proviodude la seconde pontade di  Friûl SotSore, la serie speciâl de rubriche setemanâl di aprofondiment gjornalistic Dret & Ledrôs, dedicade al taramot dal 1976 cun chê di recuperâ, cence retoriche, la memorie di chê solidarietât che il taramot al à discjadenât dentri e fûr dal Friûl, des mobilitazions, des lotis popolârs e des esperiencis di autoguvier dal bas.
Ancje in chest câs e je une conession fuartonone tra storie e atualitât: cussience, solidarietât, mobilitazion e autoguvier a coventin ancje in dì di vuê.

Dentri di chest apontament di Friûl SotSore si fevelarà soredut di ricostruzion tra Regjon, Comuns e Stât. Pe ocasion Mauro Missana e Giorgio Cavallo a metaran dongje lis testemoneancis di  Roberto Dominici, za assessôr regjonâl Dc pe ricostruzion, di Franceschino Barazzutti, za sindic di Cjavaç e conseîr regjonâl Pdup e cumò president de Associazion dai Sindics de ricostruzion, di Roberto Jacovissi, assessôr regjonâl MF a Glemone, di Armando Angeli, in chê volte referent de Dc pe ricostruzion tal Friûl ocidentâl, e di Giulio Colomba, che al jere in parlament, deputât dal Pci.

foto_taramot

A trê dopo di misdì al sarà un altri apontament di gale, che al mostre la vivarositât e la normalitât de lenghe furlane: la direte de partide di balon di prime Categorie tra Serenissima Pradaman e Union Martignà.

Onde Furlane si pues scoltâle sui 90 Mhz te plui part dal Friûl, sui 90.2 Mhz in Cjargne e in dut il mont su internet ae direzion www.ondefurlane.eu.

Cun di plui, dongje che in modulazion di frecuence e in internet, si pues scoltâle su smartphone, Iphone, tablet e Ipad, doprant la aplicazion specifiche che si le discjame de rêt daûr des indicazions che si cjatin ae direzion www.ondefurlane.eu.