I auguris di Onde Furlane: une lungje vilie di Nadâl

Nadal

Vuê su Onde Furlane si fâs fieste pe vilie di Nadâl. A tacâ di 10 a buinore la “radio libare dai furlans” e fasarà une programazion speciâl cun intervents di in direte di ospits e scoltadôrs e musiche dal vîf.

Vie pe matine al sarà ancje il conciert acustic dal progjet Marilenghe di Marisa Scuntaro, Lucia Clonfero, Michele Pucci: musiche popolâr furlane presentade cun cûr e cun sintiment. Tal dopodimisdì, a tacâ des 3, e sarà une edizion speciâl dal program ‘Gabri Terapia’: trê oris di hip hop cul miôr dai dj e dai rappers dal teritori.
La sere, di 7 vie par dute la gnot fintremai a 8 di buinore dai 25 di Dicembar, si fasarà la sieste edizion di Piotrethon, maratone radiofoniche cun speakers, concierts e djsets.
Cun di plui la fieste e je za tacade nossere cu lis sperimentazions di ‘Buio Omega’, pontade speciâl dal Hybrida Show.

Pe cuantitât, pe varietât e pe cualitât chê di Onde Furlane si pues clamâle la lungje vilie di Nadâl, cemût che si lei achì.
Il program complet si pues leilu diretamentri sul sît de Radio, che e esist, che e resist e che e fâs ducj i dîs un lavôr di servizi public, che però nol ven ricognossût cemût che al covente.
Al è pardabon un parados che une esperience di vivarositât culturâl di chê fate e vedi di scugnî scombati ducj i dîs par fâ la sô ativitât a pro dal Friûl in Friûl e ancje dal Friûl che al è pal mont.
Cheste situazion e ven comentade ancje in rêt: achì e achì.
Alc in cont di cheste situazion lu vevin scrit ancje .

Advertisements

Livorno – Udinese 1-2

fuarceudinees

Al somee propit che al Udin i coventi cjatâsi intes pestis par dismovisi e rivâ a fâ risultât. La scuadre di Guidolin cuintri dal Livorno e torne a dâ cheste impression, compagn che un pôc di timp indaûr. In Toscane i blancs e neris no fasin par sigûr une partidone ma almancul a zuin cuntune cierte determinazion, si movin, a cjapin la iniziative, a mostrin concretece e magari a àn ancje un tic di fortune. Dopo de brute figure in cjase cuintri dal Turin la formazion furlane no podeve permetisi altris sbrissadis. Pierdi ancje cuintri dal Livorno al varès volût dî impantanâsi te part plui basse de classifiche in maniere pardabon pericolose.

La partide si vierç intune situazion di ecuilibri sostanziâl. Dopo une desene di minûts Nico Lopez al profite di un erôr di Emerson, i puarte vie il balon e al va al tîr: un a zero. I blancs e neris, che a tornin a vê Pinzi tal mieç dal cjamp e si cjatin pe prime volte Douglas titolâr, a controlin la partide, ancje parcè che il Livorno al stente tal meti ordin tra i diviers reparts e tal meti adun une reazion di sest. I amarants si drecin ator de mieze ore, cuant che prime Luci al tire e Brkič al pare e po Siligardi al ricêf un bon balon di Paulinho, sal governe inte maniere miôr, al fâs fûr Domizzi e le met tal sac: un a un. L’Udin no si spaurìs e si svicine al gol prime dal interval, cun Allan che cul jutori di une deviazion dai livornês al impegne Bardi intune deviazion che par so fortune e mande la bale su la travierse.

I blancs e neris a scomencin ben ancje la seconde frazion. L’Udin al cres sei te ocupazion dal cjamp che te intensitât dal zûc, cun Pinzi che al torne tal mieç dal cjamp a dâ timps e ordin. Al rive cussì il doi a un: corner di Di Natale, conclusion di prime di Danilo, rispueste di Bardi e conclusion di doi pas di Hertaux, difensôr cul vizi dal gol. A chel pont l’Udin al gjestìs il vantaç, al ten bot ae reazion dai parons di cjase, che za par sô cont no somee masse concrete, e al siere la partide cun ducj i trê ponts te sachete.

La vitorie che e coventave pal cûr e pe classifiche e je rivade. Cumò al covente doprâ inte maniere miôr la polse tra Nadâl e il prin dal an par mantignî e salacor incressi cundizion e cunvinzion:il campionât al tornarà cu la partide in cjase cuintri dal Verona, une des scuadris miôr de prime part dal campionât di chest an.
Intant a saltin fûr altris indicazions. Par ce che al tocje l’atac, finalmentri Nico Lopez al à rivât a esprimisi cemût che si spietisi di lui, ma Di Natale al conferme di jessi ancjemò intun ‘moment no’. Te zone mediane Basta e Allan a zirin ben e Pinzi al torne a disposizion, intant che daûr a son stâts fats mancul erôrs e Hertaux al conferme la sô propension a fâ gol, par solit sui disvilups di tîrs plaçâts. Al è un dai goleadors de scuadre: brâf lui, ancje se chest al è un segnâl che al è ancjemò alc che nol funzione.

Se sabide a Livorno la scuadre furlane e à mostrât caratar e personalitât, a mancjin ancjemò la continuitât che e covente ae scuadre e la capacitât di meti dongje azions di gol e goi su azion. Rivaraial l’Udin a metisi a scuare cul principi dal an gnûf?

Udinese – Torino 0-2

udin_neri

L’Udin al va a rompisi i cuars cuintri dal Toro. Dopo dôs partidis là che la scuadre e someave vê rivât adore a liberâsi des sôs inciertecis e a cjapâ sù une fisionomie tatiche e agonistiche plui adate par frontâ il campionât, la ande che e à cjapât la partide di îr e soredut il so risultât finâl a son une frenade pericolose e un pas indaûr che al fâs vignî pôre. Magari cussì no, cumò al somee pardabon che no sedin plui dubis: la scuadre furlane e à di scombati par salvâsi.

Chê cuintri dal Turin je une “zornade no” e si lu capìs za sul imprin. L’Udin al cjape la iniziative ma nol rive a jessi masse incisîf, un pôc par merit de difese e dal puartîr dal Turin e soredut pai siei limits te fase ofensive. Il Toro si difint cun ordin e al colpìs in cuintripît, ma Brkič al à la situazion sot control e cussì il prin timp si siere cence goi.

La riprese si vierç cun Gudiolin che al cambie Fernandes cun Maicosuel. L’intindiment al varès di jessi chel di dâ plui velocitât aes azions di atac, però ce che al salte fûr al è dute une altre musiche, cul Udin che nol à compatece e il Toro che al rive a cjatâ une altre volte la strade dal cuintripît e cun doi passaçs, di Brighi a Cerci e di Cerci a Farnerud, al met il so zuiadôr svedês denant di Brkič: pinelade di sot e un a zero pai ospits.

Il Toro al met il gol in cassefuarte e al tire sù dutis lis bariduris che a coventin par fermâ la voie dai blancs neris di dreçâ la partide. L’Udin al môf la bale ma nol rive a scjavaçâ la muraie toriniste, cundut che Guidolin al fâs jentrâ ancje Nico Lopez.
A mancjin chê grinte e chê luciditât che si jerin viodudis inte partide cul Napoli e ancje in chê cuintri de Juve: Di Natale al è isolât e intermitent e i siei compagns di scuadre a dan la impression, di une bande, di scugnî zuiâ pal cjapitani e, di chê altre, di zuiâ ognidut par so cont.
Il risultât al è che la scuadre no à ecuilibri e il Toro al fâs ancjemò mâl ator de mieze ore dal secont timp cun Immobile che al cjate la bale juste pal doi a zero.
Al Udin i reste sù par jù un cuart di ore par provâ a dreçâ la partide, ma il so atac afanât e confusionari nol rive a combinâ nuie di bon.

Cumò la situazion si fâs grivie. Lu conferme ancje il sbroc di Guidolin ae fin de partide che si à dit dispunibil a fâ un pas indaûr. La robe e je rientrade e chest al è un ben: un cambiament de direzion tecniche in chest moment nol somee jessi la robe miôr, stant che tes ultimis partidis ancje il tecnic al veve mostrât di jessi in stât di meti in cjamp la scuadre cun sintiment e di recuperâ ancje la voie di jessi scuadre e di scombâti in grup dai siei zuiadôrs.

Al è ben che il mister al cjapi in man la situazion compagn che tes uiltimis setemanis e no cemût che (nol ?) veve fat timp indaûr. A son diviers problemis, ma – daûr di chês che a son lis prestazions individuâls – al salte fûr in particolâr chel che al tocje Di Natale che nol somee plui lui. Il rapuart tra la sô presince in cjamp, il so rindiment e chel de scuadre al è une sorte di reazion a cjadene negative e la domande e ven sù spontanie: no saraial miôr che al lassi spazi a cualchidun altri – chel Udin cence Totò dal San Paolo al è stât un dai miôr di dute la stagjon – e che al resti a disposizion par jentrâ eventualmentri tal secont timp e par judâ a cressi i siei compagns plui zovins par che a rivedin a esprimi miôr il lôr potenziâl?

Cumò al covente preparâsi ben par lâ a zuiâ a Livorno.

Napoli – Udinese 3-3

fuarceudinees

L’Udin si à dismot. La partide di sabide a Napoli e conferme che tes gjambis, tal cjâf, tal cûr e te maniere di stâ tal cjamp e di zuiâ de scuadre furlane alc al è cambiât in miôr. Si à tacât a viodilu in cjase cuintri de Fiorentine, si à tornât a palesâ cun plui fuarce ancje se cuntun risultât negatîf la setemane stade cu la Juventus e si à mostrât ben e no mâl doi dîs indaûr li dal San Paolo.

L’Udin al patìs, al resist e al scombat e cussì al rive a puartâ a cjase un pont. Sul plan tatic Guidolin al conferme di vê rivât a dâi elasticitât, ecuilibri e sostance ae scuadre, a tacâ de difese, che si zove dal jutori di Basta e Silva che a tornin simpri cuant che al covente e che a sburtin indenant. La formazion furlane e cambie fisionomie cuant che e je in atac, in graciis dal dinamisim tes fassis e de pression tes corsiis centrâls cun Fernades, che al conferme cualitât e continuitât, cun Pereyra e cun Lazzari, che al somee dut un altri zuiadôr di chel viodût te prime part dal campionât.

L’Udin al mostre fin dal principi di no vê pôre dal Napoli. Anzit, i fâs pôre: lu ferme cuant che al prove a puartâsi indenant e lu instupidìs cun iniziativis ofensivis che i gjavin cualsisedi pont di riferiment ae difese, che e patìs il moviment dai blancs e neris.
Ce che al mancje al Udin, che al sburte di plui, a son lis conclusions in puarte. La strade dal gol, invezit, cun dut des sôs dificoltâts, le cjate il Napoli dopo de prime mieze ore di zûc cun doi goi di Pandev, che però no mandin l’Udin ko.

La scuadre furlane e reagjìs, no si piert pai trois e no piert i sintiments e lu mostre za prime dal interval, daurman cun Pereyra e plui indenant cun Hertaux, che cu la complicitât involontarie dal napoletan Fernandez, al smieze lis distancis e al vierç una sperance concrete pal secont timp.
Il Napoli, che al somee rinfrancjât dal vantaç, al vierç la seconde frazion cuntun tic di agressivitât in plui, ma l’Udin no si scompòn e al rispuint in cuintripît, prime cuntune conclusion flapute di Nico Lopez e dopo cuntune biele tonade di Fernandes, che al firme il doi a doi.

No je finude achì: ni di une bande ni di chê altre. Dzemaili al segne e il Napoli al torne in vantaç, ma l’Udin al rispuint ancje cu la decision di Guidolin di meti dentri Maicosuel al puest di Nico Lopez. Al rive il gol di Basta, sui disvilups di un corner, che al siere il risultât sul trê a trê. E a rivin ancjemò li incursions pericolosis di Maicosuel, che intune ocasion al ven fermât cu lis manieris tristis de bande di Maggio, e si manten une pression ofensive che cualchi setemane indaûr, tal finâl di une partide di cheste fate, no si sarès mai viodude.

In conclusion, une biele prove di caratar e di zûc, che e fâs sperâ ben pal avignî, intant che al ven di pensâ che al San Paolo si podevin puartâ a cjase fintremai ducj i trê ponts a disposizion, soredut cjalant la classifiche, che e je curtute inte sô part plui basse.
Pai prossims incuintris cul Toro e cul Livorno al coventarà mantignî l’ecuilibri e il snait mostrâts tai ultins turnis e in particolâr a Napoli par dâ un svolt positîf a un campionât che al è scomençât mâl.

Lis lenghis ‘altris’ sul schermi a Udin, a Turin e cumò a Casteddu

babelmark

Al è timp di festivals cinematografics e di lenghis minoritariis in mostre sul schermi grant.
Dai 20 ai 23 di Novembar a Udin si à davuelte la tierce Mostre dal Cine, rassegne dedicade al cine tes lenghis des nazions cence stât de Europe di soreli a mont. In cuatri dîs il cine furlan si à cjatât intune cun chel sart, basc, catalan e galizian. Tra i films che a son stâts proietâts li dal Visionario di Udin a son stâts preseâts une vore, par esempli, ‘Su Re’ di Giovanni Columbu, il documentari catalan ‘Velocitat’, che al conte dal TAV che al varès di colegâ Barcelone e Parîs, e il film basc ‘Barrura Begiratzeko Leihoak (Ventanas al interior)’, opare di cinc regjiscj che e conte cinc storiis di ancjetancj presonîrs politics. Biel e interessant ancje ‘Fènix11*23’ di Joel Joan e Sergi Lara, un cine di finzion che però al conte une storie vere, in chel stes sureâl, ridicule e dramatiche.

SuRe

Dai 22 ai 30 di Novembar e je stade ancje la edizion numar 31 dal Torino Film Festival, che daûr di une tradizion zaromai consolidade al à puartât in citât une rieste une vore siore di titui, tra curts e luncsmetraçs, cines di finzion e documentaris. Tra i tancj films tal cartelon a jerin ancje, fûr concors, il luncmetraç catalan ‘Historia de la meva mort’ di Albert Serra, za premiât a Locarno, e il documentari di Francesca Archibugi, ‘Parole Povere’, dedicât al poete furlan Pierluigi Cappello.
Il fat che il cine, se al è bon, al sedi tratîf indipendentementri de lenghe doprade, lu vin sperimentât a Turin ancje nô in ocasion des proiezions fatis par La mia lingua suona…IN TOUR. Visioni babeliche a Mirafiori ai 21 di Novembar stâts, in particolâr par vie de rEazion positive di chei che a jerin rivâts par câs li de Casa del Parco e li si son fermâts fint insom, colpîts de cualitâts des oparis.

HISTORIADELAMEVAMORT

Di cualchi dì une biele selezion di cines fats doprant lenghis minorizadis e altris codiçs periferics e ven presentade a Casteddu/Cagliari, in Sardegne, inte suaze de tierce edizion dal Babel Film Festival.
Il concors internazionâl inmaneât de bande de Cineteca Sarda, screât cuntune anteprime fate a Aristanis/Oristano ai 29 di Novembar, al è in plen davuelziment, dai 2 ai 7 di Dicembar. Dongje dai films in concors, tes trê sezions pai luncsmetraçs di finzion, pai curtsmetraç di finzion e pai documentarsi, a son in program altris proiezions speciâls e events che a tocjin diviers aspiets de creativitât tes lenghis minorizadis, a tacâ dal incuintri in musiche tra Sardegne e Friûl di chê altre sere dai 3 cui sarts Malasorti, Beppe Dettori, Dr Dreer & CRC Posse, cui catalans da L’Alguer Claudia Crabuzza e Gabriele Sanna e cun Lino Straulino.

jnk

Tra i i titui in concors al è ancje il film ‘JNK Oltri la ultime frontiere’ di Marco D’Agostini, che o vin viodût cuindis dîs indaûr propit a Turin.
Il program e dutis lis informazions in cont dal festival si cjatin achì.

Juventus – Udinese 1-0

udin_neri

«Dalle stelle alle stalle». Cheste espression de lenghe taliane e sclarìs benon cemût che e je lade la partide di nossere dal Udin cuintri de Juventus. Prime la scuadre furlane e somee fintremai in stât di vinci, stant che e fronte i gobos e ju met sot, po e ten bot cu la britule in man e si sint di vê te sachete un pont plui che meretât e ae fin e cjape un gol e cussì e torne a cjase a mans vuedis.

Li dal Juventus Stadium si viôt un Udin che nol à pôre de Juve. E je une scuadre che si difint cun cuatri daûr e cuntune linie mediane che e somee un soflet, che si strenç e si puarte indenant cemût che al covente, intant che Fernandes al fâs di colegament cun Di Natale, un pôc mancul solitari che in altris ocasions.
La Juve no somee inte sô zornade miôr. I varis Pirlo, Vidal, Marchisio, Pogba e compagnie no rindin tant, no dome par lôr cont ma ancje par merit de scuadre furlane. L’Udin no ur permet di svicinâsi ae puarte, là che dut câs Brkič al sta simpri in vuaite, e i da ancje alc ce fâ a Buffon, che ae fin al sarà il miôr di dute la formazion di Conte.
Il puartîr dal Udin al neutralize une conclusion di Tevez dopo nancje dîs minûts, intant che ator de mieze ore Di Natale si vuadagne la bale juste par vierzi la partide cemût che al plasarès a ducj i tifôs furlans e soredut a chei di Turin, che in tancj agns di Juve-Udin a àn patît tant a dilunc e a àn gjoldût tantonon dome in cualchi ocasion. Totò i robe la bale a Bonucci e si cjate denant di Buffon, al decît di scjavaçâlu cuntune pinelade ma Chiellini al met un blec.

Tal secont timp la ande e somee compagne. Si tache cuntune ocasionone de Juve e une paradone di Brkič dopo cinc minûts: corner di Tevez, mieze trussade di Llorente e svual dal puartîr dal Udin. La scuadre di Guidolin e rispuin pôcs minûts plui indenant cuntune azion di cuintripît che e puarte Fernandes a metile tal mieç par Di Natale, scajvaçant Buffon: Totò al tire e Buffon al rive a brincâle. Altre ocasionone al 63esim cun Di Natale che cuntun colp di tac fantastic al libere Lazzari: tîr a colp sigûr e deviazion in corner di Buffon. Simpri zero a zero.
Ator dal 75esim timp Conte al tire la suste de Juve e al met dentri l’ex Udin Quagliarella. L’Udin si difint e Brkič al pare dut e ancje Allan al fâs un salvament su la linie de puarte. Ma ae fin al rive il gol di Llorente, compagn di un rip tai… dincj. Pecjât.

In conclusion, si à di jessi avonde contents par cemût che l’Udin si à compuartât. Finalmentri al somee jessi (avonde?) a puest cu lis gjambis, cul cjâf e cul cûr e nol è plui chê fantasime di scuadre che si à viodude a dilunc tai mês passâts. Però i mancje ancjemò concretece e fuarce in atac. Cumò che Muriel al è ko al covente cjatâ cualchi altre soluzion: no si pues pratindi che al fasi dut Sant Totò. Se no si met dentri il balon no si fasin ponts. E se no si fasin ponts si va jù inte classifiche.
Al covente rivâ a fâ chel e chel.

Une ultime osservazion e tocje la atmosfere particolâr che e jere nossere a Turin cun ducj chei fruts puartâts tal Juventus Stadium. Par promuovi sport e educazion sportive? Sigûr, ma ancje par lavâ la cussience di un pôcs di lôr, no dome in curve.
Il risultât, par chest, al è stât chel di une situazion biele dome a metât cun cheste biele zoventût che i berlave di dut cuintri di Brkič. Un amì di Venaria al à marcât che, magari cussì no, no si pues pratindi masse. chei fruts a son fîs, nevôts e fradis di cualchidun. A àn scrit compagn ancje sui gjornâi e su internet.
Une cuistion di stîl Juve o di Italian style?