Di Bagnarie a Tarcint e a Cividât, une Onde… furlane, lungje e vivarose

vivaondefurlane

Tra vinars ai 17, sabide ai 18 e domenie ai 19 di Lui, in Friûl o vin vivût un fin di setemane lunc e soredut siôr di apontaments e iniziativis. No si podeve rivâ dapardut e o vin scugnût sielzi. Cussì o vin scugnût fâ di mancul di lâ a Postaja Topolove/Stazione Popolò, che ancje chest an al veve un biel program, e lassâ in bande i doi concierts plui impuartants di domenie – chel di Passarian, cun Gilberto Gil e Caetano Veloso, stant che a jerin za stâts a Chieri une setemane indaûr, e chel dal gaitero asturian Hevia a Tumieç –  e si vin dedicâts a Tarcento Jazz, a Viva Onde Furlane e a Mittelfest. Ogni an la rassegne di Cividât e messede mainstream e sperimentazion, inovazion e alc di za sintût e za viodût. Nus somee che e fasi compagn ancje chest an. Cun di plui, si cjatìn avonde in cunvigne cun cui che al pense (e che al volarès) che sei tes propuestis da so cartelon che te sô comunicazion istituzionâls si viodessin di plui lis lenghis ‘ altris’ dal Friûl. Cun dut che al è ancjemò tant ce fâ, o vin viodût cun plasê che, magari dome tal ultin, te edizion di chest an al è saltât fûr alc di plui in chest sens: cualchi messaç plurilengâl, il spazi dedicât ae poesie furlane contemporanie, cui viers di Tavan, Cappello, Giacomini, Moratto e Mattiuzza dedicâts ae aghe e un pâr di spetacui.

color_aghe

Domenie stade al jere in program un di chescj, ven a dî Colonie, spetacul teatrâl par furlan e par talian di leturis, musiche, bal e bodypainting metût adun di Loris Vescovo e di Giorgio Olmoti, cu lis atoris e cjantantis Saba Anglana e Claudia Grimaz, la balarine Cora Steinsleger, lis proiezions di Cosimo Morelli e i musiciscj Leo Virgili e Ermes Ghirardini. Lu vin viodût e nus à plasût un grum. No lu scrivìn parcè che o vin stime par plui di cualchidun di lôr, che a son coinvolzût tal progjet, e che ju calcolìn tant che amîs, a tacâ di Loris Vescovo, Giorgio Olmoti e Leo Virgili, ma cun obietivitât: la idee di partence e je biele e al è une vore bon ancje l’impat emotîf e senic. O sperìn che Colonie al puedi vignî tornât a fâ, parcè che al merete. Cun di plui, in cheste maniere al podarà inmò rinfuarcî la sô fuarce narative e seniche e magari ancje rifinì cualchi passaç. Colonie al met dongje dôs storiis di colonizazion, di vuere e di emigrazion che si incrosin, scjavaçant lûcs e timps.  Lis protagonistis de rapresentazion a son dôs feminis che a àn memorie vive, in graciis des contis des lôr nonis, di doi fats di violence: un che al è stât patît dai furlans ae fin de Seconde vuere mondiâl, a Clauian il 1n di Mai dal 1945, e un là che i talians a jerin stâts i sassins, intant de colonizazion de Afriche orientâl, li de glesie cristiane-copte di Debre Libanos in Etiopie. Lis dôs – Claudia, furlane che e lavore a Berlin, e Abeba, etiope imigrade tal Stât talian – si cjatin propit devant de glesie di Clauian là che al jere stât metût in vore il svindic de bande dal esercit todesc…

colonie

Il nestri fin de setemane furlan al jere tacât za vinars a Tarcint cui prins concierts de gnove edizion di Tarcento Jazz, la rassegne inmaneade di Hybrida alì di Palaç Frangipane. E je stade la ocasion di viodi dal vîf il biel progejt di vocalês folk jazz di Vocinconsuete, il jazz-core cuinçât di eletroniche dai Martello e la potence policromatiche dal cuartet dai Roots Magic. La sabide di sere no vevin dubits su ce fâ: o sin lâts a Bagnarie a Viva Onde Furlane. Un biel puest, tal mieç dai cjamps e in bande e de autostrade, une biele atmosfere di fieste e une lungje gnotolade di musiche, vierte di Vocinconsuete (simpri lôr: bravis e vonde) e puartade indenant dai Carnicats in version lizere – cence grup, come une volte – che a àn confermât di jessi bulos e professionâi, dai Daisy Chain, pe ocasion cence mascare ma simpri cuntun biel tîr, e dai Volvodrivers, zovins de Basse tirâts sù a dosis fuartis di grunge a hard rock, e sierât dai LaipLessNess, protagoniscj di une performance potente e divertente, visionarie e sfolmenade.

laiplessness4

Vie pe buinore di sabide o vin stât ancje li de Universitât, a Udin, pe cunvigne su Autonomie speciâl e Statût regjonâl dal Friûl-VJ, ma di chel o scrivarìn un altri viaç.

Doi dîs dopo di cheste overdose di Friûl furlan e babelic nus ven sù ancjemò une osservazion. Cul cjalâ in nons di tancj di lôr coinvolzûts ancje in altris events e situazions, al somee pardabon che chê di Onde Furlane e sedi une onde lungje, poliedriche e vivarose.

Al à propit reson Pierluigi Cappello.

Viva Onde Furlane, Sabide a Bagnarie une fieste a pro de radio libare dai furlans

vivaondefurlane

Par cui che al è in Friûl e je une altre volte il moment di Viva Onde Furlane, la fieste-conciert a pro de “radio libare dai furlans”.

Di une bande cheste e je une biele gnove, stant che il caratar di fonde de manifestazion, che zaromai di cinc agns e je deventade une ocasion speciâl di incuintri tra emitente e il so public, al è chel di jessi une biele fieste di musiche, di ideis e di creativitât. Di chê altre, però, e je la enesime conferme di cemût che Onde Furlane, che a tacâ dai prins di Fevrâr dal 1980 e fâs un servizi public di informazion e di promozion culturâl, si cjati simpri a scugnî inventâsi alc di gnûf par mantignisi “vive” e par lâ dilunc a jessi cussience critiche, motôr identitari e pont di riferiment multiculturâl libar e indipendent.

dek_ill_cheesa

L’apontament cun Viva Onde Furlane al è par sabide ai 18 di Lui a Bagnarie, alì dal Parc ‘ex Tiro a volo’ a tacâ di 9 sot sere. Il program al è siôr, come par solit, e al cjape dentri   il messedot di texmex e surf rock’n’roll dai Daisy Chain, lis improvisazions vocâls tra jazz e folk des Vociniconsuete, il rock potent e alternatîf dai Volvodrivers, l’hip hop cjargnel e internazionâl dai Carnicats e la turbostaiare scalembre, visionarie e penze di rock e di blues dai LaipNessLess, che di pôc timp incà a àn dât fûr il lôr cd di esordi Bestiis Forestis, disc numar 50 dal catalic di Musiche Furlane Fuarte, la etichete discografiche nassude tal 1999 propit daûr de esperience di Onde Furlane e dal concors musicâl Premi Friûl.

mostro+dal+cormor

Sul palc a saran ancje altris vôs e espressions “furlanis” e “fuartis”, che a rivin de radio o ben che a son dongje de emitente, che e trasmet sui 90 Mhz te plui part dal Friûl e sui 90.2 Mhz in Cjargne e che si pues scoltâle in dut il mont su internet ae direzion http://www.ondefurlane.eu.
Al è il câs dai Cjastrons, i trê zovins creatîfs che in chestis setemanis a son daûr a meti adun, cu la regjie di Marco D’Agostini, la serie tv Friûl Revolution, produsude propit de cooperative Informazione Friulana che e je la societât editore di Onde Furlane.
Al è ancje chel dai atôrs Federico Scridel e Michele Polo, che tra lis altris a son autôrs e protagoniscj, dutun cun Leo Virgili, dal spetacul Contis Tarondis, produsût de associazion Lenghis dal Drâc – Amîs di Onde Furlane e vincidôr dal premi Piccoli Palchi 2014/2015 dal ERT (Ente regionale teatrale del Friuli-VG).
La titolâr de organizazion di Viva Onde Furlane e je propit Lenghis dal Drâc, che e je stade  metude adun par fâ progjets culturâi e di agregazion e soredut cun chê di meti dongje iniziativis a pro des ativitâts de radio.

cjastrons

La part finâl de manifestazion e varà tant che protagonist il dj set de crew di Abrasive, trasmission che ogni martars di sere, di 9 e mieze a 11, e sparnice su lis frecuencis di Onde Furlane punk e hard core a sbreghebalon.

abrasive

Viva Onde Furlane si conferme ancje chest tant che une sorte di vetrine di ce che al nas ator de radio e de sô societât editore.
Cualchi an indaûr l’innomenât poete Pierluigi Cappello al marcave che «Onde Furlane e à une funzion fondamentâl: di testemoneance, di resistence e di moltiplicatôr culturâl» e che «se e gjoldès  di un jutori economic che al fos proporzionâl cu la cuantitât di ideis e di energjiis che e prodûs e che met dongje, e sarès pardabon siore».
Magari cussì no, nol è cussì e Onde Furlane, cun ce che e je e cun ce che e fâs, e je simpri in pericul di ridimensionament e fintremai di disparizion. Par chel al è impuartant cjapâ part a Viva Onde Furlane: par che Onde Furlane e vivi. Ducj a son invidâts: jentrade libare e “ufierte obleade”.

logo_web_ROF_new

L’event al è zimulât cul cuint Forum cuintri des grandis oparis inutilis e imponudis, che si davuelç a Bagnarie dai 17 ai 19 di Lui.

Bens comuns, di vuê a domenie il Festival internazionâl a Chieri

chieri_beni_comuni

Cuatri dîs di incuintris, di resonaments, di proiezions di cines, di presentazions di libris e di spetacui dedicâts ai bens comuns, ae partecipazion des personis, ai dirits e ae resposabilitât sociâl. Al è il Festival internazionale dei beni comuni, inmaneât a Chieri, che si scree vuê e al va indenant fint domenie ai 12 di Lui.

Il program al è interessant e une vore siôr. Tra i tancj che a intervegnin a son ancje Stefano Rodotà, Salvatore Settis, Ugo Mattei, Gustavo Zagrebelsky, Marco Paolini, Toni Negri, Giovanni Sollima, Carlo Freccero, Marco Travaglio, Caetano Veloso e Gilberto Gil, Davide Ferrario, Luca Mercalli, Vandana Shiva, Carlo Petrini e Michela Murgia.

Informazions in cont di ducj i events si cjatin achì e achì.

In biciclete de Val di Susa ae Basse Furlane

valsusa

Vot dîs in biciclete, dal Piemont ae Basse Furlane. E je la traviersade che a àn scomençât diviers di lôr propit vuê, ai 8 di Lui, cun partence de Val di Susa e cun destinazion Bagnarie.

Partence e destinazion no son par nuie casuâls e chest al vâl ancje pes diviersis tapis dal itinerari che al cjape dentri Montanaro, Novara, Monza, Lonato, Vicence, Dolo e Cjaurlis.

Cun di fat la carovane e à chê di cjapâ part al cuint Forum cuintri lis grandis oparis inutilis e imponudis, che si tignarà propit a Bagnarie dai 17 ai 19 di Lui, e di tocjâ dilunc vie dal percors une schirie di situazions là che la int ur fâs cuintri a diviersis infrastruturis che a costin tant, che no coventin e che a vegnin fatis cuintri dai dirits e dai interès des personis e des comunitâts teritoriâls

Il Forum, che al à une rilevance che e va plui innà de dimension statâl taliane, al cjape dentri laboratoris, presentazions di esperiencis e relazions di diviers esperts.

Par aderî ae traviersade in biciclete si veve di notâsi dentri dal 1n d Lui, ma al pues stâi che si zontisi ancje dopo. Informazions in cont de iniziative si cjatin achì, achì, achì e soredut achì.